ନନ୍ଦିଘୋଷ ବ୍ୟୁରୋ: ନିକଟରେ ପୂର୍ବତନ ସ୍ବାମୀଙ୍କ ସହ ମାନହାନି ମାମଲାରେ ଚର୍ଚ୍ଚାରେ ଥିବା ହଲିଉଡ ଅଭିନେତ୍ରୀ ଅମ୍ବର ହର୍ଡ ପୁଣିଥରେ ଚର୍ଚ୍ଚାକୁ ଆସିଛନ୍ତି । କିନ୍ତୁ ଏଥର କୌଣସି ଝଗଡା ପାଇଁ ନୁହେଁ ନିଜର ସୁନ୍ଦର ଚେହେରା ପାଇଁ ଚର୍ଚ୍ଚାକୁ ଆସିଛନ୍ତି । ବିଜ୍ଞାନ ଅନୁସାରେ ଅମ୍ବର ହର୍ଡଙ୍କ ମୁଁହ ବିଶ୍ବରେ ସବୁଠୁ ସୁନ୍ଦର ଓ ନିଖୁଣ । ଜଣେ ବ୍ରିଟିଶ ଶଲ୍ୟ ଚିକିତ୍ସକ ଦାବି କରିଛନ୍ତି ବିଶ୍ବର ସବୁଠୁ ସୁନ୍ଦର ଚେହେରା ଅମ୍ବର ହର୍ଡଙ୍କର ବୋଲି ।
ବିଜ୍ଞାନ ଆଧାରରେ ଦାବି କରିଥିବା ଏହି ବ୍ରିଟିଶ୍ କସ୍ମେଟିକ୍ ସର୍ଜନ ହେଉଛନ୍ତି ଡାକ୍ତର ଜୁଲିୟନ ଡି ସିଲଭା । ରିପୋର୍ଟ ମୁତାବକ ନିଜ ରିସର୍ଚ୍ଚରେ ସେ ଅମ୍ବର ହର୍ଡଙ୍କ ଚେହେରା ୯୧.୮୫ ପ୍ରତିଶତ ଆକ୍ୟୁରେଟ ପାଇଛନ୍ତି । ଡା. ସିଲଭା ଫେସ ମ୍ୟାପିଙ୍ଗ ଟେକନିକ୍ ପଦ୍ଧତିର ଉପଯୋଗ କରି ୧୨ ପ୍ରମୁଖ ପଏଣ୍ଟର ବିଶ୍ଲେଷଣ କରିଥିଲେ । ଆଖି, ନାକ, ଓଠ, ଥୋଡି, ମାଢି ଏବଂ ଚେହାରାର ଆକାର ସମେତ ବିଭିନ୍ନ ଫିଚର୍ସର ମୂଲ୍ୟାଙ୍କନ କରିଥିଲେ । ଏହି ଟେକନିକ୍ ଆଧାରରେ ଚେହେରାର ସୁନ୍ଦରତାର ମୂଲ୍ୟାଙ୍କନ କରିବା ପାଇଁ ସର୍ବପ୍ରଥମେ ଚେହେରାର ଲମ୍ବ ଏବଂ ଚୌଡା ମପାଯାଇଥାଏ ।
ଚେହେରାର ସୁନ୍ଦରତା ମାପିବାକୁ ବ୍ୟୁଟି ଫ୍ରିର ଗ୍ରୀକ ଗୋଲ୍ଡେନ ରେସିଓର ବ୍ୟବହାର କରାଯାଇଥାଏ । ହଜାର ହଜାର ବର୍ଷ କାଳରୁ ଏହାକୁ ଚେହେରା ମାପିବାର ସବୁଠୁ ଭଲ ପ୍ରକ୍ରିୟା ଭାବେ ଜଣାଯାଇଛି । ଏହି ଆଧାରରେ ଅମ୍ବର ହର୍ଡଙ୍କୁ ସବୁଠୁ ସୁନ୍ଦର ମହିଳା ବିବେଚିତ କରାଯାଇଛି ।
ସେହିପରି କିମ କାର୍ଡାସିଆନ ଦ୍ବିତୀୟ ସ୍ଥାନରେ ରହିଛନ୍ତି । ତାଙ୍କ ଚେହେରାର ୯୧.୩୯ ପ୍ରତିଶତ ଆକୁରେସି ରହିଛି । ଏହି ଷ୍ଟଡି ଅନୁଯାୟୀ କିଛି ଅଭିନେତ୍ରୀ ଓ ଚର୍ଚ୍ଚିତ ମହିଳାଙ୍କ ଚେହାରର କିଛି କିଛି ଅଙ୍ଗକୁ ମିଶାଯାଇ ଏକ ଶତପ୍ରତିଶତ ପରଫେକ୍ଟ ଫେସ୍ ପ୍ରସ୍ତୁତ କରାଯାଇଥିଲା । ଭିନ୍ନ ଅଭିନେତ୍ରୀଙ୍କ ନାକ, ଆଖି, ଓଠ ଓ ଅନ୍ୟ ଅଙ୍ଗକୁ ମିଶାଇ ଏହି ଷ୍ଟଡି କରାଯାଇଛି ।
ତେବେ ଅମ୍ବର ହର୍ଡଙ୍କ ନାକ, କିମ କାର୍ଡାସିଆନଙ୍କ ଆଇବ୍ରୋ, ସ୍କାରଲେଟ୍ ରନସନଙ୍କ ଆଖି, ରିହାନ୍ନାଙ୍କ ଚେହେରାର ଆକାର, ଏମିଲି ରତଜକୋସ୍କିଙ୍କ ଓଠ ଏବଂ କେଟଙ୍କ ମସ୍ତକ କପାଳ ସବୁଠୁ ସୁନ୍ଦର ବୋଲି ବିବେଚନା କରାଯାଇଛି ।
ସୂଚନାଥାଉକି ଭର୍ଜିନିଆର ଏକ ଅଦାଲତ ଚଳିତ ମାସ ଆରମ୍ଭରେ ପୂର୍ବରୁ ସ୍ବାମୀ ସ୍ତ୍ରୀ ଥିବା ହଲିଉଡ ତାରକା ଜନି ଡେପ ଏବଂ ଅଭିନେତ୍ରୀ ଅମ୍ବର ହର୍ଡଙ୍କ ହାଇ ପ୍ରୋଫାଇଲ ମାନହାନି ମାମଲାରେ ନିଜ ରାୟ ଶୁଣାଇଥିଲେ । ଜନି ଡେପଙ୍କ ସପକ୍ଷରେ ରାୟ ଦେବା ସହ ୭ ଜଣିଆ ଜଜ୍ ବିଶିଷ୍ଟ ବେଞ୍ଚ ଅଭିନେତ୍ରୀଙ୍କୁ କ୍ଷତିପୂରଣ ଆଧାରରେ ନିଜର ପୂର୍ବତନ ପତିଙ୍କୁ ୧୫ ମିଲିୟନ ଡଲାର ଦେବାକୁ ନିର୍ଦ୍ଦେଶ ଦେଇଥିଲେ । ଏହି ମାମଲାର ଶୁଣାଣି ସମୟରେ ଅମ୍ବର ହର୍ଡ ଜନି ଡେପଙ୍କ ଉପରେ ଯୌନ ଶୋଷଣ ଆରୋପ ଲଗାଇଥିଲେ ।
