ନନ୍ଦିଘୋଷ ବ୍ୟୁରୋ : ପାରିବାରିକ କଳହର କରୁଣ ପରିଣତି । ଝଗଡା ପରେ ଗୋଟିଏ ଘରେ ଝୁଲି ପଡିଲେ ଦମ୍ପତି । ସ୍ୱାମୀ ମୃତ, ସ୍ତ୍ରୀ ଗୁରୁତର । ଅନୁଗୁଳ ଜିଲ୍ଲା ପାଲଲହଡା ଉପଖଣ୍ଡ ଖମାର ଥାନା ଅନ୍ତର୍ଗତ ସାଆନ୍ଦା ଗାଁରେ ଘଟିଛି ଏହି ଅଭାବନୀୟ ଘଟଣା । ମିଳିଥିବା ସୂଚନା ଅନୁଯାୟୀ ଗାଁର ବାପୁନ ସାହୁ ଏବଂ ନିଜ ସ୍ତ୍ରୀ ଲିଟିଲ ସାହୁଙ୍କ ମଧ୍ୟରେ ପ୍ରାୟ ସବୁଦିନ ଝଗଡା ଲାଗିରହେ । ଗତକାଲି ସନ୍ଧ୍ୟାରେ କୌଣସି କଥାକୁ ନେଇ ପୁଣି ଝଗଡା ହୋଇଥିଲା । ଝଗଡା ପରେ ଉଭୟ ସ୍ୱାମୀ ସ୍ତ୍ରୀ ନିଜ ଶୋଇବା ଘରେ ଝୁଲି ପଡ଼ିଥିଲେ ।ପରେ ଘର ଲୋକ ଦୁଇଜଣଙ୍କୁ ଉଦ୍ଧାର କରି ତଳକୁ ଓଲ୍ହାଇ ଥିଲେ । ଘଟଣାସ୍ଥଳରେ ସ୍ୱାମୀ ବାପୁନଙ୍କର ମୃତ୍ୟୁ ହୋଇଥିବାବେଳେ ସ୍ତ୍ରୀ ଲିଟିଲଙ୍କୁ ପ୍ରଥମେ ଖମାର ଡାକ୍ତରଖାନା ଏବଂ ପରେ ଜିଲ୍ଲା ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ପି. ଚିଦାମ୍ବରମଙ୍କ ବଡ଼ ବୟାନ : ଅପରେସନ ବ୍ଲୁ ଷ୍ଟାର ଏକ ବଡ଼ ଭୁଲ ଥିଲା, ନିଜ ଜୀବନ ଦେଇ ମୂଲ୍ୟ ସୁଝିଥିଲେ ଇନ୍ଦିରା ଗାନ୍ଧୀ
ନନ୍ଦିଘୋଷ ବ୍ୟୁରୋ : ଅପରେସନ ବ୍ଲୁ ଷ୍ଟାର ସମ୍ପର୍କରେ ଏକ ବଡ଼ ବୟାନ ଦେଇଛନ୍ତି କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ପି. ଚିଦାମ୍ବରମ । ସେ କହିଛନ୍ତି ଯେ, ଅପରେସନ ବ୍ଲୁ ଷ୍ଟାର ଏକ ଗମ୍ଭୀର ଭୁଲ ଥିଲା, ଯାହା ପାଇଁ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ନିଜ ଜୀବନ ଦେଇ ମୂଲ୍ୟ ସୁଝିଥିଲେ । ହିମାଚଳ ପ୍ରଦେଶର କସୌଲିରେ ଖୁଶୱନ୍ତ ସିଂହ ସାହିତ୍ୟ ମହୋତ୍ସବରେ ପି. ଚିଦାମ୍ବରମ ଏହି ବୟାନ ଦେଇଛନ୍ତି।
ଏହି ଆଲୋଚନାରେ ସେ ଅପରେସନ ବ୍ଲୁ ଷ୍ଟାରକୁ ଭୁଲ ବୋଲି ନିନ୍ଦା କରିଥିଲେ। ସେ କହିଥିଲେ ଯେ, ଇନ୍ଦିରା ଗାନ୍ଧୀ ତାଙ୍କ ଜୀବନର ମୂଲ୍ୟ ଦେଇଥିଲେ। ସେ ଏହା ମଧ୍ୟ କହିଥିଲେ ଯେ, ଏହି ନିଷ୍ପତ୍ତି ତତ୍କାଳୀନ ପ୍ରଧାନମନ୍ତ୍ରୀଙ୍କ ଏକମାତ୍ର ନିଷ୍ପତ୍ତି ନୁହେଁ, ବରଂ ଏକ ମିଳିତ ନିଷ୍ପତ୍ତିର ପରିଣାମ। ସେ ପଞ୍ଜାବରେ ଖଲିସ୍ତାନ ଦାବିର ଅନ୍ତ ପାଇଁ ମଧ୍ୟ ଆହ୍ୱାନ ଦେଇଥିଲେ।
ଇନ୍ଦିରା ଗାନ୍ଧୀଙ୍କ ନିଷ୍ପତ୍ତି କେବଳ ତାଙ୍କର ନଥିଲା
ପି. ଚିଦାମ୍ବରମ କହିଥିଲେ ଯେ ଅପରେସନ ବ୍ଲୁ ଷ୍ଟାର କରିବାର ନିଷ୍ପତ୍ତି ଏକା ଇନ୍ଦିରା ଗାନ୍ଧୀଙ୍କର ନଥିଲା। ଏଥିରେ ସେନା, ପୋଲିସ, ଗୁଇନ୍ଦା ଏବଂ ପ୍ରଶାସନିକ ସେବା ସମେତ ସମସ୍ତେ ସାମିଲ ଥିଲେ। ଏହା ପରେ ହିଁ ନିଷ୍ପତ୍ତି ନିଆଯାଇଥିଲା, କିନ୍ତୁ ଏଥିପାଇଁ ଇନ୍ଦିରା ଗାନ୍ଧୀଙ୍କୁ ଦାୟୀ କରାଯାଇଛି, ଯାହା ଭୁଲ୍। ସେ କହିଥିଲେ, “ମୁଁ କୌଣସି ସାମରିକ ଅଧିକାରୀଙ୍କୁ ଅସମ୍ମାନ କରୁନାହିଁ, କିନ୍ତୁ ସେହି (ବ୍ଲୁ ଷ୍ଟାର) ସ୍ୱର୍ଣ୍ଣ ମନ୍ଦିର ପୁନଃପ୍ରାପ୍ତିର ଭୁଲ ଉପାୟ ଥିଲା। କିଛି ବର୍ଷ ପରେ, ଆମେ ସେନାକୁ ବାହାରେ ରଖି ସ୍ୱର୍ଣ୍ଣ ମନ୍ଦିର ପୁନଃପ୍ରାପ୍ତିର ସଠିକ୍ ଉପାୟ ଦେଖାଇଲୁ।”
୧୦୦ ପ୍ରତିଶତ ଟାରିଫକୁ ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ଫୁ
ନନ୍ଦିଘୋଷ ବ୍ୟୁରୋ : ଚୀନ ଉପରେ ଆମେରିକାର ୧୦୦ ପ୍ରତିଶତ ଟାରିଫକୁ ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ଫୁ। କହିଲେ- ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଗ୍ରହଣ କରୁଛନ୍ତି ଦୋମୁହାଁ ନୀତି। ଆମେରିକାର ଟାରିଫ ବିରୋଧୀ ଯୁଦ୍ଧରେ ସେ ଲଢେଇ କରିବାକୁ ପ୍ରସ୍ତୁତ ବୋଲି କହିଛନ୍ତି ଜିନପିଙ୍ଗ। ଗତକାଲି ଚୀନ ବିରୋଧରେ ଟ୍ରମ୍ପ ୧୦୦ ପ୍ରତିଶତ ଟାରିଫ ଲାଗୁ କରିବା ଫଳରେ ଚୀନ ଉପରେ ମୋଟ ଟାରିଫ ଭାର ୧୩୦ ପ୍ରତିଶତ ଛୁଇଁଥିଲା। ଟ୍ରମ୍ପଙ୍କ ଟାରିଫ ବୋଝକୁ ବି ସମାଲୋଚନା କରିଛି ଚୀନର ବାଣିଜ୍ଯ ମନ୍ତ୍ରାଳୟ। ଆସନ୍ତା ନଭେମ୍ବର ୧ରୁ ଚୀନ ବିରୋଧରେ ଲାଗୁ ହେବ ୧୦୦ ପ୍ରତିଶତ ଟାରିଫ। ଏହି ଘୋଷଣା ଯୋଗୁ ପ୍ରଭାବିତ ହେବ ଚୀନର ରପ୍ତାନି। ଟ୍ରମ୍ପଙ୍କ ଏହି ଘୋଷଣା ପରେ ଦୁଇ ଦେଶ ମଧ୍ୟରେ କୂଟନୈତିକ ଓ ବାଣିଜ୍ୟିକ ଉତ୍ତେଜନା ଅଧିକ ହୋଇଛି।
ମଧ୍ୟରାତ୍ରୀରେ ପାକିସ୍ତାନ ଉପରେ ଭୟଙ୍କର ଆକ୍ରମଣ ; ୭ ସେନା ଆଡ୍ଡା ଧ୍ୱଂସ
ନନ୍ଦିଘୋଷ ବ୍ୟୁରୋ : ପାକିସ୍ତାନ ଉପରେ ଭୟଙ୍କର ଆକ୍ରମଣ । ଶନିବାର ରାତିରେ ପାକିସ୍ତାନ ଉପରେ ଆକ୍ରମଣ କରିଛି ଆଫଗାନିସ୍ତାନ । ବାହାରାମଚା ଅଞ୍ଚଳର ଶକିଜ, ବିବି ଜାନି ଏବଂ ସାଲେହାନୁ ଅଞ୍ଚଳରେ ଆଫଗାନିସ୍ତାନ ସେନା ତିନି ଘଣ୍ଟା ଧରି ଅପରେସନ ଜାରି ରଖିଥିଲେ। ଶନିବାର ବିଳମ୍ବିତ ରାତିରେ ଡୁରାଣ୍ଡ ରେଖା ନିକଟରେ ଥିବା ଅନେକ ପାକିସ୍ତାନୀ ସୀମା ପୋଷ୍ଟ ଉପରେ ଆଫଗାନିସ୍ତାନ ଗୁଳିବର୍ଷା କରିଥିଲା। ଏହି ଆକ୍ରମଣ ପରେ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ପରିସ୍ଥିତି ଅତ୍ୟନ୍ତ ଉତ୍ତେଜନାପୂର୍ଣ୍ଣ ହୋଇଛି ।
ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଏବେ ଯୁଦ୍ଧରେ ପରିଣତ ହୋଇଛି। କାବୁଲରେ ବିମାନ ଆକ୍ରମଣର କିଛି ସମୟ ପରେ, ଆଫଗାନିସ୍ତାନ ପ୍ରତିଶୋଧ ନେଇଥିଲା। ଆଫଗାନିସ୍ତାନ ସେନା ପାକିସ୍ତାନୀ ସାମରିକ ପୋଷ୍ଟ ଉପରେ ଏକ କ୍ରମାଗତ ବିଧ୍ୱଂସକାରୀ ଆକ୍ରମଣ ଆରମ୍ଭ କରିଥିଲା । ଗୁଳିବର୍ଷା କରି ଆକ୍ରମଣର ଜବାବ ଦେଇଥିଲା ଆଫଗାନିସ୍ତାନ ।
ଆଫଗାନିସ୍ତାନର ଭୟଙ୍କର ଆକ୍ରମଣ
ପାକିସ୍ତାନ ସୀମାରେ ରାତିସାରା ଗୁଳିର ବର୍ଷା । ହେଲମାଣ୍ଡ, ପାକଟିଆ, ଖୋଷ୍ଟ ଏବଂ ନାଙ୍ଗରହାର ଅଞ୍ଚଳରେ ପାକିସ୍ତାନ ଏବଂ ଆଫଗାନ ସେନା ମଧ୍ୟରେ ପ୍ରବଳ ଗୁଳି ବିନିମୟ ହୋଇଥିଲା । ରାତିସାରା ଉଭୟ ସେନା ମଧ୍ୟରେ ପ୍ରବଳ ବୋମାମାଡ଼ ମଧ୍ୟ ହୋଇଥିଲା। ତେବେ ଆଫଗାନ ସେନାର ଗୁଳିରେ ୧୫ ଜଣ ପାକିସ୍ତାନୀ ସୈନିକ ନିହତ ହୋଇଥିବା ଜଣା ପଡିଛି । ରିଆଜ କହିଛନ୍ତି ଯେ ଏହି ଅପରେସନରେ ଆଫଗାନ ସେନା ତିନୋଟି ପାକିସ୍ତାନୀ ସାମରିକ ପୋଷ୍ଟକୁ ମଧ୍ୟ କବଜା କରିଥିଲେ ।
୭ଟି ସ୍ଥାନରେ ଧ୍ୱଂସାବଶେଷ
ପାକିସ୍ତାନୀ ଫ୍ରଣ୍ଟିୟର୍ କୋର୍ପ୍ସ ପୋଷ୍ଟଗୁଡ଼ିକ ଗୁରୁତର ଭାବରେ କ୍ଷତିଗ୍ରସ୍ତ ହୋଇଛି। କୁନାର ଏବଂ ହେଲମାଣ୍ଡରେ ମଧ୍ୟ ଅନେକ ପାକିସ୍ତାନୀ ଆଉଟପୋଷ୍ଟ ଧ୍ୱଂସ ପାଇଛି। କୁରମ, ନାଙ୍ଗରହାର ଏବଂ କୁନାର ସମେତ ସାତଟି ଆଉଟପୋଷ୍ଟ ଧ୍ୱଂସ ପାଇଛି। ଏକ ସୁରକ୍ଷା ସୂତ୍ର ବିବିସି ଉର୍ଦ୍ଦୁକୁ କହିଛି ଯେ, ପାକିସ୍ତାନ-ଆଫଗାନିସ୍ତାନ ସୀମାନ୍ତରେ ଥିବା ଅନେକ ଅଞ୍ଚଳରେ ଗୁଳି ବିନିମୟ ହୋଇଛି, ଯେପରିକି ଅଙ୍ଗୁର ଆଡ୍ଡା, ବାଜୌର, କୁରାମ, ଦିର୍, ଚିତ୍ରାଲ୍ ଏବଂ ବର୍ମାଚା।
ପ୍ରଥମ ଆକ୍ରମଣ କରିଥିଲାପାକିସ୍ତାନ
ଗୁରୁବାର ଦିନ ଆଫଗାନିସ୍ତାନ ଉପରେ ପ୍ରଥମ ଆକ୍ରମଣ କରିଥିଲା ପାକିସ୍ତାନ । ପାକିସ୍ତାନ କାବୁଲରେ କ୍ଷେପଣାସ୍ତ୍ର ମାଡ଼ କରିଥିଲା। ଆଫଗାନିସ୍ତାନ ଦାବି କରିଥିଲା ଯେ ଏହି ଆକ୍ରମଣରେ କୌଣସି କ୍ଷତି ହୋଇନାହିଁ। ତଥାପି, ଆଫଗାନିସ୍ତାନ ପରବର୍ତ୍ତୀ ସମୟରେ ପାକିସ୍ତାନକୁ ପରିଣାମ ଭୋଗିବାକୁ ଚେତାବନୀ ଦେଇଥିଲା।
ଆଫଗାନ ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ, ପାକିସ୍ତାନରେ ଟାର୍ଗେଟ ଉପରେ ଆକ୍ରମଣ କରିବା ପରେ ସାମରିକ ଅଭିଯାନ ଶେଷ ହୋଇଛି। ତାଲିବାନ ସରକାର ଦାବି କରିଛି ଯେ, ଏହାର ଯୋଦ୍ଧାମାନେ ଅନେକ ପାକିସ୍ତାନୀ ସାମରିକ ପୋଷ୍ଟକୁ ଟାର୍ଗେଟ କରିଛନ୍ତି। ତାଲିବାନ ଯୋଦ୍ଧାମାନେ ତିନୋଟି ପାକିସ୍ତାନୀ ସେନା ପୋଷ୍ଟକୁ କବଜା କରିଛନ୍ତି। ଡୁରାଣ୍ଡ ରେଖା ଆରପାରିରେ କୁନାର ଏବଂ ହେଲମାଣ୍ଡ ପ୍ରଦେଶରେ ମଧ୍ୟ ପାକିସ୍ତାନୀ ପୋଷ୍ଟଗୁଡ଼ିକୁ ଧ୍ୱଂସ କରାଯାଇଛି। ପାକିସ୍ତାନୀ ସେନାର ଇଣ୍ଟର-ସର୍ଭିସେସ୍ ପବ୍ଲିକ୍ ରିଲେସନ୍ସ (ISPR) ଏପର୍ଯ୍ୟନ୍ତ ଏହି ବିଷୟରେ କୌଣସି ସରକାରୀ ବିବୃତ୍ତି ଜାରି କରିନାହିଁ।
ଫୁଲ ତୋଳିବାକୁ ଯାଇଥିବା ବେଳେ ଯୁବକଙ୍କୁ ହତ୍ୟା : ହାତକୁ ହାଣି ନେଇଛନ୍ତି ଦୁର୍ବୃତ୍ତ
ନନ୍ଦିଘୋଷ ବ୍ୟୁରୋ : ଚିକିଟି ନୂଆପଡ଼ାର ବାହୁଦା ନଦୀ ପଠାରୁ ମୃତଦେହ ଉଦ୍ଧାର। ମୃତ ଶରୀରର ବିଭିନ୍ନ ସ୍ଥାନରେ ରହିଛି ଗଭୀର କ୍ଷତ ଚିହ୍ନ। ରକ୍ତ ଜୁଡୁବୁଡୁ ଶବ ଜବତ କଲା କେ. ନୂଆଗାଁ ପୋଲିସ। ଫୁଲ ତୋଳି ଗାଧୋଇବାକୁ ଯାଇଥିବା ବେଳେ ହତ୍ୟା। ଶରୀରର ବିଭିନ୍ନ ସ୍ଥାନରେ କ୍ଷତ ରହିଥିବା ବେଳେ, ହାତକୁ ହାଣି ନେଇ ଯାଇଛନ୍ତି ଦୁର୍ବୃତ୍ତ। ଘଟଣାସ୍ଥଳରେ କ. ନୂଆଁ ଗାଁ ପୋଲିସ, ଚିକିଟି ଫାଣ୍ଡି ପୋଲିସ ସହ ବ୍ରହ୍ମପୁର ପୋଲିସ ପହଞ୍ଚି ତଦନ୍ତ ଜାରି ରଖିଛି। ସନ୍ଧାନି କୁକୁର ଓ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। ବହୁ ଖୋଜା ଖୋଜି ପରେ ବି ମିଳୁନାହିଁ କଟା ହାତ। ହାତ ଖୋଜିବା ପାଇଁ ତଦନ୍ତରେ ସାମିଲ ହୋଇଛି ଅଗ୍ନିଶମ ବିଭାଗ। ଅଗ୍ନିଶମ ବାହିନୀ ନଦୀରେ କରୁଛନ୍ତି ଖୋଜାଖୋଜି।
ବିହାରରେ ମହାମେଣ୍ଟରେ ସ୍ଥିତି ହେଲାଣି ଜଟିଳ ; ହୋଇପାରୁନି ଆସନ ବୁଝାମଣା
ନନ୍ଦିଘୋଷ ବ୍ୟୁରୋ : ପାଖେଇ ଆସୁଛି ନିର୍ବାଚନ। ସରୁନି ମହାମେଣ୍ଟରେ ଆସନ ବୁଝାମଣା। ଦିନକୁ ଦିନ ଜଟିଳ ହେଉଛି ପ୍ରକ୍ରିୟା। କଂଗ୍ରେସ ଅଧିକ ଆସନ ଦାବି କରୁଥିବାବେଳେ ଆରଜେଡି କଂଗ୍ରେସକୁ ୫୨ ଆସନ ଯାଚିବା ପରେ ସ୍ଥିତି ଅଧିକ ଗୋଳମାଳିଆ ହୋଇଛି। ଏପରିକି ଦୁଇ ଦଳ ମଧ୍ୟରେ କଥାବାର୍ତ୍ତା ବନ୍ଦ ହୋଇଥିବା ଚର୍ଚ୍ଚା ହେଉଛି। ଗତ ନିର୍ବାଚନରେ ଆରଜେଡି ୧୪୪ ଆସନ, କଂଗ୍ରେସ ୭୦ ଆସନରେ ଲଢିଥିଲେ ।
ଆରଜେଡି ୭୫ ଆସନରେ ବିଜୟୀ ହୋଇଥିବାବେଳେ କଂଗ୍ରେସକୁ ମାତ୍ର ୧୯ ଆସନରେ ସନ୍ତୁଷ୍ଟ ହେବାକୁ ପଡିଥିଲା । ଏଦୃଷ୍ଟିରୁ କଂଗ୍ରେସକୁ ଅଧିକ ଆସନ ଦେବା ଲାଗି ଆରଜେଡି ଚାହୁଁ ନଥିବା ଚର୍ଚ୍ଚା ହେଉଛି । ସେହିପରି ମହାମେଣ୍ଟରେ ଥିବା ସିପିଆଇଏମଏଲ ୧୯ ଆସନରେ ଲଢି ୧୨ଟିରେ ବିଜୟୀ ହୋଇଥିଲା । ସିପିଆଇ ୬ ଆସନରେ ଲଢି ୨ ଆସନରେ ଏବଂ ସିପିଏମ ୪ ଆସନରେ ଲଢି ୨ ଆସନରେ ବିଜୟୀ ହୋଇଥିଲେ । ଗତ ନିର୍ବାଚନରେ ବିଜେପି ସର୍ବାଧିକ ୭୯ ଆସନ ଲାଭ କରିଥିବାବେଳେ ଆରଜେଡି ଦ୍ବିତୀୟ ସର୍ବାଧିକ ୭୭ ଆସନ ହାସଲ କରିଥିଲା । ଏ ଦୃଷ୍ଟିରୁ ଚଳିତ ଥର କଂଗ୍ରେସକୁ ୫୦ରୁ ୫୫ ଆସନ ଦେବାକୁ ଚାହୁଁଛି ଆରଜେଡି । ସେପଟେ ମହାମେଣ୍ଟକୁ ୧୪ ଯାଏ ଡେଡଲାଇନ ଦେଇଛି ଝାଡ଼ଖଣ୍ଡ ମୁକ୍ତି ମୋର୍ଚ୍ଚା। ଇଣ୍ଡିମେଣ୍ଟ ସହଯୋଗୀ ଭାବେ ଜେଏମଏମ ୧୨ ଆସନରେ ଲଢିବାକୁ ଚାହୁଁଛି। ଝାଡଖଣ୍ଡ ନିର୍ବାଚନରେ ଜେଏମଏମ ଯୋଗୁ କଂଗ୍ରେସ, ଆରଜେଡି, ସିପିଆଇଏମଏଲ ସମ୍ମାନଜନକ ସ୍ଥିତିରେ ଥିଲେ। ତେଣୁ ଏହାର ମୂଲ୍ୟ ବିହାରରେ ପାଇବାକୁ ଚାହୁଁଛି ଜଏମଏମ।
ପୋଲିସ ଏସଆଇ ପରୀକ୍ଷା ଜାଲିଆତି ମାମଲା : ସ୍ପଷ୍ଟୀକରଣ ରଖିଲା ଓପିଆରବି
ନନ୍ଦିଘୋଷ ବ୍ୟୁରୋ : ପୋଲିସ ଏସଆଇ ପରୀକ୍ଷା ଜାଲିଆତିକୁ ନେଇ ଓପିଆରବିର ବଡ଼ ବୟାନ। ପରୀକ୍ଷା ଜାଲିଆତି ନେଇ ସ୍ପଷ୍ଟୀକରଣ ରଖିଛି ଓଡିଶା ପୋଲିସ ନିଯୁକ୍ତି ବୋର୍ଡ ବା ଓପିଆରବି। ସରକାରୀ ଚାକିରି ଆଶାୟୀଙ୍କ ବିରୋଧରେ ବିଧିବଦ୍ଧ ଚକ୍ରାନ୍ତ ହୋଇଥିବା ସନ୍ଦେହ ପ୍ରକାଶ କରିଛି ଓପିଆରବି। ରାଜ୍ୟରେ ଚାଲିଥିବା ନିଯୁକ୍ତି ପ୍ରକ୍ରିୟାକୁ ବନ୍ଦ କରିବା କିମ୍ବା ପ୍ରଭାବିତ କରିବା ପାଇଁ ଏକ ବଡ଼ ଷଡଯନ୍ତ୍ର ହୋଇଛି ବୋଲି ସନ୍ଦେହ ପ୍ରକାଶ କରିଛି ଓପିଆରବି।
ଯେତେବେଳେ ବି ପ୍ରଶ୍ନପତ୍ର ଲିକ ହୋଇଛି, ସେହି ପ୍ରଶ୍ନପତ୍ରକୁ ତୁରନ୍ତ ବାତିଲ କରି ପୁଣି ଥରେ ଖୁବ କମ ସମୟ ବ୍ୟବଧାନରେ ପରୀକ୍ଷା କରାଯାଇଥାଏ ବୋଲି କହିଛି ଓପିଆରବି। ଗତ ସେପ୍ଟେମ୍ବର ୨୯ ତାରିଖରେ ଏସଆଇ ପରୀକ୍ଷା ଜାଲିଆତି ଘଟଣା ଓପିଆରବି ନଜରକୁ ଆସିବା ମାତ୍ରେ ତୁରନ୍ତ ଏହାର ତଦନ୍ତ ଦାୟିତ୍ବ କ୍ରାଇମବ୍ରାଞ୍ଚକୁ ଦିଆଯାଇଥିଲା। ଜଡିତ ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ସହ ପ୍ରଶ୍ନ ଲିକର ପୂରା ଲିଙ୍କ ଖୋଲି ବାହାର କରିବା ଏହାର ଉଦ୍ଦେଶ୍ୟ ଥିଲା ବୋଲି ଓପିଆରବି ପକ୍ଷରୁ କୁହାଯାଇଛି। ପରେ ଛାତ୍ରଛାତ୍ରୀ ବ୍ରହ୍ମପୁର ନିକଟରୁ ଗିରଫ ହେବା ପରେ ସ୍ବଚ୍ଛତା ରକ୍ଷା କରିବାକୁ ତୁରନ୍ତ ପରୀକ୍ଷା ବାତିଲ କରାଯାଇଛି।
ଏବେ କ୍ରାଇମବ୍ରାଞ୍ଚ ଏହି ଜାଲିଆତିର ତଦନ୍ତ କରୁଛି। ଓପିଆରବି ଏଥିରେ ସଂପୂର୍ଣ୍ଣ ସହଯୋଗ କରିବା ସହ ସବୁ ତଥ୍ୟ କ୍ରାଇମବ୍ରାଞ୍ଚକୁ ହସ୍ତାନ୍ତର କରାଯାଇଛି। ତଦନ୍ତ ସରିବା ପରେ ଏବଂ ଦୋଷୀକୁ ଦଣ୍ଡ ମିଳିବା ପରେ ପୁଣି ଥରେ ଏସଆଇ ପରୀକ୍ଷା କରାଯିବ। କିନ୍ତୁ ତାପୂର୍ବରୁ ଏହି ଜାଲିଆତିରେ ଓପିଆରବି ହେଉ କି ଆଇଟିଆଇ, ସିଲିକନ ବା ପଞ୍ଚସଫ୍ଟ ଯିଏ ବି ଦୋଷୀ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବା ଉଚିତ। ଏଥିପାଇଁ ସବୁ ପ୍ରକାର ସହଯୋଗ ଯୋଗାଇ ଦିଆଯାଉଛି ବୋଲି ଓପିଆରବି ପକ୍ଷରୁ କୁହାଯାଇଛି। ସେହିପରି କିଛି ନ୍ୟସ୍ତସ୍ବାର୍ଥ୍ୟ ବ୍ୟକ୍ତି ଏହି ଜାଲିଆତିରେ ଓପିଆରବିର ସମ୍ପୃକ୍ତିକୁ ନେଇ ଅଯଥା ବଦନାମ କରୁଛନ୍ତି।
ଏହି ଉଦ୍ୟମ ଉଦ୍ଦେଶ୍ୟମୂଳକ ଭାବେ ପରୀକ୍ଷା ପରିଚାଳନା ପ୍ରକ୍ରିୟାକୁ ବିଳମ୍ବିତ କରିବା ବୋଲି ଓପିଆରବି ପକ୍ଷରୁ କୁହାଯାଇଛି। ଓଡିଶା ପୋଲିସ ପକ୍ଷରୁ ପରୀକ୍ଷା ପାଇଁ ହୋଇଥିବା ଟେଣ୍ଡର ଆଇଟିଆଇ ଲିମିଟେଡ଼କୁ ଦିଆଯାଇଥିଲା। ଆଇଟିଆଇ ପ୍ରଶ୍ନପତ୍ର ପ୍ରସ୍ତୁତି ଠାରୁ ଆରମ୍ଭ କରି ପ୍ରଶ୍ନପତ୍ର ଛପେଇ ଓ ଅନ୍ୟାନ୍ୟ କାର୍ଯ୍ୟ କରିବା କଥା। କିନ୍ତୁ ଆଇଟିଆଇ ଯଦି ଏହି କାର୍ଯ୍ୟ ଅନ୍ୟ କାହାକୁ ସବଲେଟ କରିଛି ତେବେ ସେଥିରେ ସ୍ବଚ୍ଛତା ରକ୍ଷା କରାଯିବାର ଉତ୍ତରଦାୟିତ୍ବ ଆଇଟିଆଇର। ଟେଣ୍ଡର ଚୁକ୍ତି ଉଲଂଘନ କରିଥିବାରୁ ଓପିଆରବି ଆଇଟିଆଇ ଲିମିଟେଡକୁ କାରଣ ଦର୍ଶାଅ ନୋଟସ ମଧ୍ୟ ଜାରି କରାଯାଇଛି। ତେଣୁ ଆଶାୟୀମାନେ ହତାସ ନହେବାକୁ ଓପିଆରବି ଆଶ୍ବାସନା ଦେଇଛି। ତଦନ୍ତ ସରିବା ପରେ ପୁଣି ଥରେ ଏସଆଇ ପରୀକ୍ଷା କରାଯିବ। କିନ୍ତୁ ନିଯୁକ୍ତି ପ୍ରକ୍ରିୟାକୁ ଭଣ୍ଡୁର ପଛରେ ଥିବା ଷଡଯନ୍ତ୍ରକାରୀଙ୍କୁ ତୁରନ୍ତ ଆଇନ ଅନୁଯାୟୀ ଦଣ୍ଡ ଦିଆଯିବା ଉଚିତ ବୋଲି ଓପିଆରବି ପକ୍ଷରୁ କୁହାଯାଇଛି।
ପଶ୍ଚିମବଙ୍ଗରେ ଓଡ଼ିଆ ଡାକ୍ତରୀ ଛାତ୍ରୀଙ୍କୁ ଗଣଦୁଷ୍କର୍ମ ଘଟଣାରେ : ୩ ଜଣଙ୍କୁ ଗିରଫ କଲା ପୋଲିସ
ନନ୍ଦିଘୋଷ ବ୍ୟୁରୋ : ପଶ୍ଚିମବଙ୍ଗରେ ଓଡ଼ିଆ ଡାକ୍ତରୀ ଛାତ୍ରୀଙ୍କୁ ଗଣଦୁଷ୍କର୍ମ ଘଟଣାରେ ଛାନବିନ। ଲୋକେସନ ଟ୍ରାକ କରି ଦୁର୍ଗାପୁର ପରାନଗଞ୍ଜ ଜଙ୍ଗଲରୁ ୩ ଜଣଙ୍କୁ ଗିରଫ କଲା ପୋଲିସ। ଗିରଫ ୩ ଜଣ ସ୍ଥାନୀୟ ବାସିନ୍ଦା ବୋଲି ଜଣାପଡ଼ିଛି। ସେହିପରି ଅନ୍ୟ ୨ ଜଣଙ୍କୁ ମଧ୍ୟ ଚିହ୍ନଟ କରାଯାଇଛି। ଡ୍ରୋନ କ୍ୟାମେରା ଜରିଆରେ ଅନ୍ୟ ୨ ଜଣଙ୍କୁ ଖୋଜୁଛି ପୋଲିସ। ଦୁର୍ଗାପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। ଏହାସହ ଫରେନସିକ୍ ଟିମ୍ ମଧ୍ୟ ଘଟଣାସ୍ଥଳରେ ଛାନବିନ କରିଛି। ସ୍ଥାନୀୟ ଅଞ୍ଚଳରେ ସିସିଟିଭି ଫୁଟେଜ୍ ମଧ୍ୟ ଯାଞ୍ଚ କରାଯାଉଛି। ଘଟଣାକୁ ନେଇ ଦୁର୍ଗାପୁର ଶିଳ୍ପାଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଛି।
କଲେଜ ପରିସରରେ ବିଶାଳ ପୋଲିସ ଫୋର୍ସ ମୁତୟନ ହୋଇଛନ୍ତି। ଘଟଣାରେ ହସ୍ତକ୍ଷେପ ପାଇଁ ପଶ୍ଚିମବଙ୍ଗ ଡାକ୍ତର ସଂଘ ସୁପ୍ରିମକୋର୍ଟଙ୍କୁ ଚିଠି ଲେଖିଛନ୍ତି। ସେହିପରି ମମତା ବାନାର୍ଜୀ ଘଟଣାରେ ଦୁଃଖ ପ୍ରକାଶ କରିବା ସହ ପରିବାର ବର୍ଗକୁ ସମବେଦନା ଜଣାଇଛନ୍ତି। ଘଟଣା ସ୍ଥଳ ବୁଲି ଦେଖିଛନ୍ତି ମହିଳା କମିଶନ। ପ୍ରମାଣ ନଷ୍ଟ କରିବାକୁ ଉଦ୍ୟମ କରାଯାଇଛି ବୋଲି ଅଭିଯୋଗ ହୋଇଛି। ଛାତ୍ରଛାତ୍ରୀଙ୍କ ସମେତ ବିଜେପି ଓ ବାମପନ୍ଥୀମାନେ ଆନ୍ଦୋଳନ କରିଛନ୍ତି।
ସୂଚନା ଅନୁସାରେ, ଶୁକ୍ରାବାର ରାତି ପ୍ରାୟ ୮ଟା ବେଳେ କ୍ୟାମ୍ପସ ସାମ୍ନାରୁ ଓଡ଼ିଆ ଡାକ୍ତରୀ ଛାତ୍ରୀଙ୍କୁ ଟାଣି ନେଇ ଗଣଦୁଷ୍କର୍ମ କରା ଯାଇଥିଲା। ପୀଡ଼ିତା ଜଣକ ହସପିଟାଲରେ ଚିକିତ୍ସିତ ହେଉଛନ୍ତି। ତାଙ୍କ ଘର ବାଲେଶ୍ଵର ଜିଲ୍ଲା ଜଳେଶ୍ଵର ଅଞ୍ଚଳରେ। ପରିବାର ଲୋକେ ପ୍ରଶାସନ ଓ ମେଡିକାଲ କଲେଜ କର୍ତ୍ତୃପକ୍ଷଙ୍କ ଉଦାସୀନତା ନେଇ ପ୍ରଶ୍ନ ଉଠାଇଛନ୍ତି। ଅନ୍ୟପଟେ ଗଣଦୁଷ୍କର୍ମର ଶିକାର ହୋଇଥିବା ପୀଡ଼ିତାଙ୍କ ବାପାଙ୍କ ସହିତ କଥା ହୋଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ସମବେଦନା ଜଣାଇବା ସହିତ ରାଜ୍ୟ ସରକାର ସମସ୍ତ ପ୍ରକାର ସହାୟତା ଯୋଗାଇ ଦେବେ ବୋଲି ପ୍ରତିଶ୍ରୁତି ଦେଇଛନ୍ତି। ଏହାସହ ଅପରାଧୀଙ୍କୁ କଠୋର ଦଣ୍ଡ ଦେବା ପାଇଁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ ନିକଟରେ ଦାବି କରିଛନ୍ତି। ଏହାସହ ବାଲେଶ୍ବର ଏସ.ପି ଦୁର୍ଗାପୁର ପୋଲିସ ସହିତ ଯୋଗାଯୋଗରେ ରହି ଆବଶ୍ୟକ ସହାୟତା ଯୋଗାଇ ଦେଉଛନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ।
ପଶ୍ଚିମବଂଗରେ ଓଡ଼ିଆ ମେଡିକାଲ ଛାତ୍ରୀଙ୍କୁ ଦୁଷ୍କର୍ମ ଅଭିଯୋଗ
ନନ୍ଦିଘୋଷ ବ୍ୟୁରୋ : ପଶ୍ଚିମବଂଗରେ ଓଡ଼ିଆ ମେଡିକାଲ ଛାତ୍ରୀଙ୍କୁ ଦୁଷ୍କର୍ମ ଅଭିଯୋଗ। ବାଲେଶ୍ଵର ଜଳେଶ୍ଵର ଅଚଳର ଜଣେ ମେଡିକାଲ ଛାତ୍ରୀଙ୍କୁ ଦୁଷ୍କର୍ମ ଅଭିଯୋଗ ହୋଇଛି। ବର୍ଦ୍ଧମାନ ଜିଲ୍ଲା ଦୁର୍ଗାପୁରର ଶୋଭାପୁରରେ ଘଟିଛି ଏ ଲଜ୍ଜାଜଣକ ଘଟଣା। ଏକ ଘରୋଇ ମେଡିକାଲ କଲେଜରେ ଦ୍ଵିତୀୟ ବର୍ଷରେ ପଢୁଥିଲେ ସମ୍ପୃକ୍ତ ଛାତ୍ରୀ। ଡାକ୍ତରୀ ଛାତ୍ରୀଙ୍କୁ ହସ୍ପିଟାଲ ପରିସରରେ ଟାଣି ନେଇ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି। ପଶ୍ଚିମବଂଗର ସବୁଠାରୁ ବଡ଼ ଶିଳ୍ପକ୍ଷେତ୍ର କୁହାଯାଉଥିବା ଦୁର୍ଗାପୁରରେ ଘଟିଛି ଘଟଣା। ଛାତ୍ରୀ ଜଣକ ଗତକାଲି ରାତିରେ ପୁରୁଷ ବନ୍ଧୁଙ୍କ ସହ କ୍ୟାମ୍ପସରୁ ବାହାରକୁ ଆସିଥିଲେ। ସେ ଫେରୁଥିବା ବେଳେ ଜଣେ ବ୍ୟକ୍ତି ତାଙ୍କୁ ହସ୍ପିଟାଲ ପଛପଟେ ଥିବା ଏକ ନିର୍ଜନ ସ୍ଥାନକୁ ଟାଣି ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପୀଡିତାଙ୍କୁ ଡାକ୍ତରୀ ପରୀକ୍ଷା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ପୋଲିସ ମେଡିକାଲ କଲେଜର କର୍ମଚାରୀ ଏବଂ ମହିଳାଙ୍କ ସହିତ ଆସିଥିବା ବନ୍ଧୁ ସମେତ ଅନ୍ୟ ବ୍ୟକ୍ତିମାନଙ୍କୁ ମଧ୍ୟ ପଚରାଉଚରା ଆରମ୍ଭ କରିଛି। ଖବର ପାଇଁ ଛାତ୍ରୀଙ୍କ ପରିବାର ଆସି ମେଡିକାଲରେ ପହଞ୍ଚିଛନ୍ତି। ଝିଅ ଆଇସିୟୁରେ ରହିଛି, କୌଣସି ଚିକିତ୍ସା ସୁବିଧା ଦିଆଯାଉନି ବୋଲି କହିଛନ୍ତି ଛାତ୍ରୀଙ୍କ ବାପା।
ଆଫଗାନ ବୈଦେଶିକ ମନ୍ତ୍ରୀ ମୁତାକିଙ୍କ ପ୍ରେସ କନଫରେନ୍ସ ପ୍ରସଙ୍ଗ : ପ୍ରେସ କନଫରେନ୍ସରେ ସାମ୍ବାଦିକାଙ୍କୁ ମିଳିଲାନି ଅନୁମତି
ନନ୍ଦିଘୋଷ ବ୍ୟୁରୋ : ଆଫଗାନିସ୍ତାନ ବୈଦେଶିକ ମନ୍ତ୍ରୀ ଆମିର ଖାନ ମୁତାକିଙ୍କ ପ୍ରେସ କନଫରେନ୍ସରେ ମହିଳା ସାମ୍ବାଦିକଙ୍କୁ ଅନୁମତି ନଦେବା ପ୍ରସଙ୍ଗ। ଘଟଣାକୁ ନେଇ ପ୍ରତିକ୍ରିୟା ରଖିଛି ଭାରତୀୟ ବୈଦେଶିକ ବ୍ୟାପାର ମନ୍ତ୍ରାଳୟ। ଆଫଗାନିସ୍ଥାନ ବୈଦେଶିକ ମନ୍ତ୍ରୀ ଆମିର ଖାନ ମୁତାକିଙ୍କ ସାମ୍ବାଦିକ ସମ୍ମିଳନୀ ଆୟୋଜନରେ କୌଣସି ଭୂମିକା ନାହିଁ ବୋଲି କହିଛି ଭାରତୀୟ ବୈଦେଶିକ ବ୍ୟାପାର ବିଭାଗ। ଗତକାଲି ଆୟୋଜନ ହୋଇଥିଲା ଏ ସାମ୍ବାଦିକ ସମ୍ମିଳନୀ। ଏଥିରେ କୌଣସି ମହିଳା ସାମ୍ବାଦିକଙ୍କୁ ବସିବାକୁ ଅନୁମତି ଦିଆଯାଇନଥିଲା। ପ୍ରସଙ୍ଗ ନେଇ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧି। ମୁତାକିଙ୍କ ଦ୍ୱାରା ସମ୍ବୋଧିତ ସାମ୍ବାଦିକ ସମ୍ମିଳନୀରେ କୌଣସି ମହିଳା ସାମ୍ବାଦିକ ଉପସ୍ଥିତ ନଥିଲେ। ଫଳରେ ଭାରତ ମାଟିରେ ତାଲିବାନର ଲିଙ୍ଗଗତ ପକ୍ଷପାତକୁ ନେଇ ବ୍ୟାପକ ସମାଲୋଚନା କରାଯାଇଛି। ବରିଷ୍ଠ କଂଗ୍ରେସ ନେତା ପି ଚିଦାମ୍ବରମ ମଧ୍ୟ ଘଟଣା ନେଇ କଡ଼ା ସମାଲୋଚନା କରିଛନ୍ତି। ତୃଣମୂଳ କଂଗ୍ରେସ ସାଂସଦ ମହୁଆ ମୋଇତ୍ରା ମଧ୍ୟ ସରକାରଙ୍କ ଉପରେ ବର୍ଷିଛନ୍ତି। କଂଗ୍ରେସ ନେତା ଜୟରାମ ରମେଶ ମଧ୍ୟ ସରକାରଙ୍କୁ କଡ଼ା ସମାଲୋଚନା କରିଛନ୍ତି। ଭାରତରେ ମହିଳା ସାମ୍ବାଦିକଙ୍କ ଉପରେ ତାଲିବାନି ଶାସନ ଆଶ୍ଚର୍ଯ୍ୟଜନକ ଏବଂ ଅସ୍ୱୀକାର୍ଯ୍ୟ ବୋଲି କହିଛନ୍ତି ଜୟରାମ ରମେଶ। କଂଗ୍ରେସ ମୁଖପାତ୍ର ଶାମା ମହମ୍ମଦ କହିଛନ୍ତି ଭାରତ ମାଟିରେ ଭାରତକୁ ଏହି ନିର୍ଦ୍ଦେଶ ଦେବାକୁ ସେମାନେ କିଏ? ମହିଳା ବିଦ୍ବେଷୀ ଚିନ୍ତାଧାରାକୁ ଭାରତରେ କାର୍ଯ୍ଯକାରୀ କାହିଁକି କରାଗଲା ? ଏହି କାର୍ଯ୍ୟକ୍ରମରେ ତାଲିବାନ ନେତାମାନେ କେବଳ ପୁରୁଷମାନଙ୍କ ପାଇଁ ଉଦ୍ଦିଷ୍ଟ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରୁଥିବା ଦେଖାଯାଇଥିଲା। ମୁତାକି ଓ ବୈଦେଶିକ ବ୍ୟାପାର ମନ୍ତ୍ରୀ ଏସ. ଜୟଶଙ୍କରଙ୍କ ମଧ୍ୟରେ ଆଲୋଚନା ପରେ ପରେ ଏହି ସାମ୍ବାଦିକ ସମ୍ମିଳନୀ ହୋଇଥିଲା। ସାମ୍ବାଦିକାଙ୍କୁ ଅନୁମତି ନ ମିଳିବା ପ୍ରସଙ୍ଗରେ ତାତିଛନ୍ତି ସାମ୍ବାଦିକ ଓ ସୋସିଆଲ ମିଡିଆ ୟୁଜର। ମୁତାକିଙ୍କ ଏହି ନିଷ୍ପତ୍ତି ମହିଳା ବିଦ୍ବେଷୀ ଚିନ୍ତାଧାରା ପ୍ରତିଫଳନ ବୋଲି ମତ ପ୍ରକାଶ ପାଇଛି। ପ୍ରାୟ ଏକ ସପ୍ତାହ ଲାଗି ଭାରତ ଗସ୍ତରେ ଆସିଥିବା ମୁତାକିଙ୍କୁ ସ୍ବାଗତ କରିଥିଲେ ବୈଦେଶିକ ବ୍ୟାପାର ମନ୍ତ୍ରାଳୟ ମୁଖପାତ୍ର ରଣଧୀର ଜୈସୱାଲ। ଭାରତ ଓ ଆଫଗାନିସ୍ତାନ ମଧ୍ଯରେ ଦ୍ବିପାକ୍ଷିକ ସମ୍ପର୍କ ବୃଦ୍ଧି ନେଇ ଆଲୋଚନା ହୋଇଛି। ଜୁଲାଇ ୨୦୨୧ରେ ତାଲିବାନ କ୍ଷମତାସୀନ ହେବା ପରେ ପ୍ରଥମ ଥର ଲାଗି ଭାରତ ଓ ଆଫଗାନିସ୍ତାନ ମଧ୍ୟରେ ଏହା ହେଉଛି ଶୀର୍ଷସ୍ତରୀୟ ବୈଠକ।