ନନ୍ଦିଘୋଷ ବ୍ୟୁରୋ : ରନୱେରୁ ବିମାନ ଖସି ଦୁର୍ଘଟଣାଗ୍ରସ୍ତ। ସିଧା ଯାଇ ସମୁଦ୍ରରେ ପଡିଲା। ହଂକଂ ଇଣ୍ଟରନ୍ୟାସନାଲ ଏୟାରପୋର୍ଟରେ ଘଟିଛି ଏକ ବଡ଼ଧରଣର ବିମାନ ଦୁର୍ଘଟଣା।ଦୁବାଇରୁ ଆସିଥିବା ଏକ ମାଲବାହୀ ବିମାନ ହଂକଂ ଏୟାରପୋର୍ଟରେ ଅବତରଣ ବେଳେ ଦୁର୍ଘଟଣାଗ୍ରସ୍ତ ହୋଇଛି। ପ୍ଲେନଟି ରନଓ୍ୱେରୁ ଖସି ସିଧା ଯାଇ ସମୁଦ୍ରରେ ପଡ଼ିଥିଲା। ଦୁର୍ଘଟଣାରେ ୨ ଜଣକଙ୍କର ମୃତ୍ୟୁ ହୋଇଥିବା ଜଣାପଡିଛି। ବିମାନଟି ଏକ ବୋଇଂ ୭୪୭ ଶ୍ରେଣୀର ବୋଲି ଜଣାପଡ଼ିଛି। ଦୁର୍ଘଟଣା ପରେ ବିମାନଟି ସମୁଦ୍ରରେ ପଡ଼ିଯାଇଥିଲା। ବିମାନଟି ଦୁଇ ଖଣ୍ଡ ହୋଇଯାଇଛି। ବିମାନରେ ଥିବା ୪ କ୍ରୁ ମେମ୍ବରଙ୍କୁ ଉଦ୍ଧାର କରାଯାଇଛି।ପ୍ଲେନ୍ ଖସିଯିବା କାରଣରୁ ରନଓ୍ୱେ ଗ୍ରାଉଣ୍ଡ ଡ୍ୟୁଟି କରୁଥିବା ୨ ଜଣ କର୍ମଚାରୀ ମୃତ୍ୟୁ ହୋଇଥିଲା। ଏହାପରେ ବିମାନଟି ସିଧା ଯାଇ ସମୁଦ୍ରରେ ପଡ଼ିଥିଲା । ଦୁର୍ଘଟଣା ପରେ ହଂକଂ ଏୟାରପୋର୍ଟର ଦୁର୍ଘଟଣା ଘଟିଥିବା ରନଓ୍ୱେକୁ ବନ୍ଦ କରିଦିଆଯାଇଛି।ବିମାନଟି ୩୨ ବର୍ଷ ପୁରୁଣା ବିମାନ ଥିଲା ବୋଲି ଜଣାପଡିଛି। ଆଉ କାର୍ଗୋ ବିମାନ ଭାବେ କାମ କରୁଥିଲା।
ଭାରତକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପୁଣି ଧମକ
ନନ୍ଦିଘୋଷ ବ୍ୟୁରୋ : ଭାରତକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପୁଣି ଧମକ। ରୁଷ ଠାରୁ ତେଲ କିଣିବା ପ୍ରସଙ୍ଗରେ ଚେତାବନୀ ଦେଇଛନ୍ତି ରାଷ୍ଟ୍ରପତି ଟ୍ରମ୍ପ। କହିଛନ୍ତି, ରୁଷ ଠାରୁ ଭାରତ ତୈଳ କିଣିବା ବନ୍ଦ ନକଲେ ଲାଗୁ ହେବ ଅଧିକ ପରିମାଣର ଶୁଳ୍କ। ଗଣମାଧ୍ୟମର ପ୍ରଶ୍ନରେ ଏହି ଉତ୍ତର ରଖିଛନ୍ତି ରାଷ୍ଟ୍ରପତି ଟ୍ରମ୍ପ।ରୁଷ ଠାରୁ ତେଲ ନକିଣିବାକୁ ଭାରତ ପ୍ରତିଶ୍ରୁତି ଦେଇଛି ପୂର୍ବରୁ କହିଥିଲେ ଟ୍ରମ୍ପ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ବ୍ୟକ୍ତିଗତ ଭାବରେ ପ୍ରତିଶ୍ରୁତି ଦେଇଛନ୍ତି ବୋଲି ଦାବି କରିଥିଲେ। କିନ୍ତୁ ଯଦି ଭାରତ ତେଲ କିଣିବା ଜାରି ରଖେ ତେବେ ଭାରତ ଉପରେ ଭାରି ଶୁଳ୍କ ଦେବାକୁ ପଡିବ। ସେପଟେ ପ୍ରଧାନମନ୍ତ୍ରୀ ମୋଦୀଙ୍କ ସହ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ହୋଇଥିବା ଆଲୋଚନାକୁ ଭାରତ ଖାରଜ କରିଥିବା ନେଇ ସାମ୍ବାଦିକଙ୍କ ପ୍ରତିକ୍ରିୟଆରେ ଟ୍ରମ୍ପ ଚିହିଁକି ଉଠିଥିଲେ। ଏହାର ଉତ୍ତରରେ ଟ୍ରମ୍ପ କହିଛନ୍ତି ଯଦି ଭାରତ ଏହା କରିବାକୁ ଚାହୁଁଛି ତେବେ ତାକୁ ଭାରି ଶୁଳ୍କ ଦେବାକୁ ପଡ଼ିବ। ଭାରତର ପ୍ରାୟ ଏକ ତୃତୀୟାଂଶ ତେଲ ରୁଷରୁ ଆସିଥାଏ।
ରୁଷ ଠାରୁ ଭାରତ ତୈଳ କ୍ରୟ କିଣିବା ଘଟଣାକୁ ୟୁକ୍ରେନ ଯୁଦ୍ଧ ପାଇଁ ମସ୍କୋର ଆର୍ଥିକ ସହାୟତା ଭାବେ ନେଇଛି ଆମେରିକା। ସେପଟେ ଭାରତୀୟ ବୈଦେଶିକ ମନ୍ତ୍ରଣାଳୟ ଟ୍ରମ୍ପଙ୍କ ଦାବିକୁ ଖାରଜ କରିଛି। ଟ୍ରମ୍ପ ଏବଂ ପ୍ରଧାନମନ୍ତ୍ରୀ ମୋଦୀଙ୍କ ମଧ୍ୟରେ ଏହି ପ୍ରସଙ୍ଗ ନେଇ କୌଣସି ଆଲୋଚନା ବିଷୟରେ ଅଜ୍ଞ ବୋଲି କହିଛନ୍ତି ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ। ସେ କହିଛନ୍ତି ଯେ, ଭାରତ ଏବଂ ଆମେରିକା ମଧ୍ୟରେ ଶକ୍ତି ସହଯୋଗ ଉପରେ ଆଲୋଚନା ଚାଲିଛି। ଆମେରିକା ସହିତ ଶକ୍ତି ସମ୍ପର୍କକୁ ଆହୁରି ଗଭୀର କରିବା ଉପରେ ଗୁରୁତ୍ଵ ଦେଉଛି ଭାରତ। ଟ୍ରମ୍ପଙ୍କ ଏହି ଚେତାବନୀ ଏପରି ଏକ ସମୟରେ ଆସିଛି ଯେତେବେଳେ ଭାରତ ଆମେରିକାରୁ ଭାରି ଆମଦାନୀ ଶୁଳ୍କର ସାମ୍ନା କରୁଛି।
ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକୁ ମାନୁନାହାନ୍ତି ବାବୁ, ଗ୍ରାଉଣ୍ଡରେ କାର୍ଯ୍ୟକାରୀ ହେଉନି ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ
ନନ୍ଦିଘୋଷ ବ୍ୟୁରୋ : ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକୁ ମାନୁନାହାନ୍ତି ଅଧିକାରୀ । ଜନଶୁଣାଣିକୁ ଗୁରୁତ୍ବ ଦେଉନାହାନ୍ତି ୬ ବିଭାଗ । ୬ଟି ବିଭାଗ ଲୋକଙ୍କ ଅଭିଯୋଗର ସମାଧାନ ଦିଗରେ ଗୁରୁତ୍ବ ଦେଉ ନାହାନ୍ତି । ଯେଉଁଥିପାଇଁ ପ୍ରାୟ ୩୮ହଜାର ଲୋକଙ୍କ ଅଭିଯୋଗର ସମାଧାନ ହୋଇପାରୁନାହିଁ । ଏନେଇ ସରକାରଙ୍କ ପକ୍ଷରୁ ବାରମ୍ବାର ଚିଠି ଲେଖାଗଲେ ମଧ୍ଯ କର୍ଣ୍ଣପାତ କରୁ ନଥିବାରୁ ଗତ ୧୫ ତାରିଖରେ ସମ୍ପୃକ୍ତ ବିଭାଗୀୟ ମୁଖ୍ୟଙ୍କୁ ପୁଣି ଥରେ ଚିଠି ଲେଖି ତାଗିଦ କରାଯାଇଛି । ସାଧାରଣ ପ୍ରଶାସନ ବିଭାଗ ଏହି ରିପୋର୍ଟ ସାର୍ବାଜନୀନ ହେବା ପରେ ସତ୍ଯ ପଦାକୁ ଆସିଛି । ଜଳସମ୍ପଦ, ମହିଳା ଓ ଶିଶୁ ବିକାଶ, ସ୍ବାସ୍ଥ୍ୟ ଓ ପରିବାର କଲ୍ୟାଣ, ପଞ୍ଚାୟତିରାଜ, ଇସ୍ପାତ ଓ ଖଣି ଏବଂ ବିଦ୍ୟାଳୟ ଏବଂ ଗଣଶିକ୍ଷା ବିଭାଗରେ ଅଭିଯୋଗ ସମାଧାନ ହାର ଅନ୍ୟ ବିଭାଗଠାରୁ ଯଥେଷ୍ଟ କମ୍ ରହିଛି ।
ପଞ୍ଚାୟତିରାଜ ବିଭାଗରେ ଏବେ ବି ୨୦ହଜାର ୫୪୪ଟି ଅଭିଯୋଗ ସମାଧାନ ହୋଇ ନ ଥିବାବେଳେ ମହିଳା ଓ ଶିଶୁ କଲ୍ୟାଣ ବିଭାଗରେ ୨ହଜାର ୩୧୯ ଅଭିଯୋଗ ଗଡ଼ୁଛି। ସେହିପରି ଜଳସମ୍ପଦ ବିଭାଗରେ ୧ହଜାର ୪୪୬, ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗରେ ୪ହଜାର ୯୮୮,ବିଦ୍ୟାଳୟ ଓ ଗଣଶିକ୍ଷା ବିଭାଗରେ ୮ହଜାର ୬୫୨ ଏବଂ ଖଣି ଓ ଇସ୍ପାତ ବିଭାଗରେ ୫୦୬ଟି ଅଭିଯୋଗ ଗଡୁଛି । ପଞ୍ଚାୟତିରାଜ ବିଭାଗକୁ ବାଦ୍ ଦେଇ ଅନ୍ୟ ୫ଟି ବିଭାଗରେ ଅଭିଯୋଗ ସମାଧାନ ହାର ୮୦ପ୍ରତିଶତରୁ କମ୍ ରହିଛି ଇତିମଧ୍ୟରେ ରାଜ୍ୟରେ ୪୦ଟି ବିଭାଗକୁ ୪ଲକ୍ଷ ୯୯ହଜାର ୮୫୧ଟି ଅଭିଯୋଗ ମିଳିଥିବାବେଳେ ଗତ ସେପ୍ଟେମ୍ବରରେ ୧୭ହଜାର ୧୧ଟି ଅଭିଯୋଗ ସରକାରଙ୍କ ହସ୍ତଗତ ହୋଇଛି । ସେପ୍ଟେମ୍ବର ସୁଦ୍ଧା ରାଜ୍ୟରେ ୬୬ହଜାର ୮୬୮ଟି ଅଭିଯୋଗ ୪୦ଟି ବିଭାଗରେ ଗଡୁଛି । ଏହାକୁ ନେଇ ବିରୋଧୀ ସରାକାରଙ୍କୁ ଘେରିଛନ୍ତି ।
ବିଜେଡି କହିଛି, ମୁଖ୍ୟମନ୍ତ୍ରୀଙ୍କ ଜନଶୁଣାଣି ପ୍ରହସନ ପାଲଟିଛି । ସରକାର କେବଳ ଫୋଟୋ ଉଠାଇ ସୋସିଆଲ ମିଡିଆରେ ଛାଡି ନିଜେ ପାଳ ଗଦାରେ ଠିଆ ହୋଇ ପୁରୁଣା ସରକାରକୁ ନୀଚ୍ଚା କରିବାକୁ ପ୍ରୟାସ କରୁଛନ୍ତି । ବାସ୍ତବରେ ଲୋକଙ୍କ ସମସ୍ୟାର ସମାଧାନ ହେଉନି । ବିକାଶ ମନୋଭାବ ନ ଆସିବା ଯାଏଁ ସମସ୍ୟାର ସମାଧାନ ହେବନି । ବ୍ୟବସ୍ଥାରେ ପରିବର୍ତ୍ତନ ହେବା ଦରକାର । ସାଧାରଣ ପ୍ରଶାସନ ବିଭାଗ ଏହି ସତ୍ୟ ମାନିଲା । ସରକାର ମଧ୍ୟ ଏହି ସତକୁ ସ୍ୱୀକାର କରିବା ଦରକାର ବୋଲି ବିଜେଡି କହିଛି । ସେପଟେ କଂଗ୍ରେସ ବି ସମାନ ଢଙ୍ଗରେ ସମାଲୋଚନା କରିଛି । ସରକାରରେ ନେତୃତ୍ୱ ଅଭାବ ଓ ପ୍ରଶାସନିକ ନେତୃତ୍ବ ଅଭାବ ରହିଛି । ଅଫିସର ମୁଖ୍ୟମନ୍ତ୍ରୀଙ୍କ କଥା ଶୁଣୁ ନାହାନ୍ତି । ଫାଇଲରେ ହାତ ମାରୁ ନାହାନ୍ତି । ମନ୍ତ୍ରୀ ମନ୍ତ୍ରୀ ଭିତରେ ସମନ୍ୱୟ ନାହିଁ । ବିଜେପି ସରକାର ଓଡ଼ିଶାକୁ ଗତ ୧୫ ମାସରେ ବହୁ ପଛକୁ ନେଇ ଗଲାଣି ବୋଲି କଂଗ୍ରେସ କଟାକ୍ଷ କରିଛି । ତେବେ ଏହି ଅଭଯୋଗକୁ ଖଣ୍ଡନ କରି ବିଜେପି କହିଛି, ମୁଖ୍ୟମନ୍ତ୍ରୀ ମୋହନ ମାଝୀ ଦିନ ସାରା ଲୋକଙ୍କ ଅଭିଯୋଗ ଶୁଣୁଛନ୍ତି । ପରିବର୍ତ୍ତନ ହଠାତ ହୁଏନି । ଭଲ ଭାବେ ଜନଶୁଣାଣି ଶୁଣାଣି ସହିତ ଲୋକଙ୍କ ସମସ୍ୟାର ସମାଧାନ ହେଉଛି ବୋଲି ବିଜେପି କହିଛି ।
ନୌସେନା ସୈନିକଙ୍କ ସହ ପ୍ରଧାନମନ୍ତ୍ରୀଙ୍କ ଦୀପାବଳି ପାଳନ, INS ବିକ୍ରାନ୍ତରୁ ସୈନିକଙ୍କୁ କଲେ ସମ୍ବୋଧନ
ନନ୍ଦିଘୋଷ ବ୍ୟୁରୋ : ନୌସେନାର ଯବାନଙ୍କ ସହ ଦୀପାବଳି ପାଳିଲେ ପ୍ରଧାନମନ୍ତ୍ରୀ ମୋଦି। ଆଇଏନଏସ ବିକ୍ରାନ୍ତରେ ନୌସେନାର ନାବିକଙ୍କ ସହ ପ୍ରଧାନମନ୍ତ୍ରୀ ମୋଦି ଦୀପାବଳି ଉତ୍ସବ ପାଳନ କରିଛନ୍ତି। ଏହି ଅବସରରେ ସମ୍ବୋଧିତ କରିଥିଲେ ପ୍ରଧାନମନ୍ତ୍ରୀ। କହିଥିଲେ, ଯେଉଁମାନେ ନିଜ ଦମରେ ଲଢ଼ନ୍ତି ସେମାନଙ୍କର ସର୍ବଦା ବିଜୟ ହୁଏ। ଦୀପାବଳି ପାଳନ କରିବାର ପରମ୍ପରାକୁ ବଜାୟ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୋଆ ଏବଂ କରୱାର ଉପକୂଳରେ ଅବସ୍ଥିତ INS ବିକ୍ରାନ୍ତ ପରିଦର୍ଶନ କରିଥିଲେ।
ଏହି ଅବସରରେ ସେ ଭାରତୀୟ ନୌସେନାର ସାହସୀ ଅଧିକାରୀ ଏବଂ ସୈନିକମାନଙ୍କୁ ଭେଟି ଦୀପାବଳିର ଶୁଭେଚ୍ଛା ଜଣାଇଥିଲେ। ଯବାନଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ, ଅପରେସନ ସିନ୍ଦୂରରେ ତିନି ସଶସ୍ତ୍ର ବାହିନୀର ସାହସିକତା ଏହା ପ୍ରମାଣିତ କରିଛି ଯେ ଆମର ସେନା ସବୁଠାରୁ ଶକ୍ତିଶାଳୀ। ଆମର ସାହସୀ ସୈନିକମାନେ ପାକିସ୍ତାନକୁ ଧୂଳି ଚଟାଇଛନ୍ତି। ମୁଁ ମଧ୍ୟ ଏହି ଦୀପାବଳି ମୋ ପରିବାର ସହିତ ପାଳନ କରୁଛି ବୋଲି କହିଥିଲେ ପ୍ରଧାନମନ୍ତ୍ରୀ। ଏହି ଦୀପାବଳି ସ୍ୱତନ୍ତ୍ର ବୋଲି କହିଥିଲେ ପ୍ରଧାନନମନ୍ତ୍ରୀ। ପ୍ରଥମ ଥର ଲାଗି ପ୍ରଧାନମନ୍ତ୍ରୀ ମୋଦି ନାବିକମାନଙ୍କ ସହିତ ଦୀପାବଳି ପାଳନ କରିଛନ୍ତି। ଏହି ମୁହୂର୍ତ୍ତଟି ସ୍ମରଣୀୟ। ଆଜି ଗୋଟିଏ ପାର୍ଶ୍ୱରେ ବିଶାଳ ସମୁଦ୍ର ଅଛି ଏବଂ ଅନ୍ୟପଟେ ଭାରତ ମାତାର ସାହସୀ ସୈନିକମାନଙ୍କର ଅପାର ଶକ୍ତି ଅଛି। ସମୁଦ୍ର ଜଳରେ ଝଲସୁଥିବା ସୂର୍ଯ୍ୟଙ୍କ କିରଣ ଏହି ସାହସୀ ସୈନିକମାନଙ୍କ ଦ୍ୱାରା ପ୍ରଜ୍ଜ୍ୱଳିତ ଦୀପାବଳି ଦୀପ ସଦୃଶ ବୋଲି କହିଥିଲେ ପ୍ରଧାନମନ୍ତ୍ରୀ।
RJDର ୧୪୩ ଜଣିଆ ପ୍ରାର୍ଥୀ ତାଲିକା ପ୍ରକାଶ : ତାଲିକାରେ ଅନେକ ନାମୀ ଓ ଲୋକପ୍ରିୟ ନେତା
ନନ୍ଦିଘୋଷ ବ୍ୟୁରୋ : ବିହାର ବିଧାନସଭା ନିର୍ବାଚନ। ୧୪୩ ଜଣିଆ ପ୍ରାର୍ଥୀ ତାଲିକା ପ୍ରକାଶ କଲା ରାଷ୍ଟ୍ରୀୟ ଜନତା ଦଳ ଆରଜେଡି। କଂଗ୍ରେସ ସହିତ ଆସନ ଭାଗବଣ୍ଟା ସଙ୍କଟ ମଧ୍ୟରେ RJD ପ୍ରାର୍ଥୀଙ୍କ ତାଲିକା ପ୍ରକାଶ କରିଛି। ୧୪୩ ଆସନରେ ପ୍ରାର୍ଥୀ ଘୋଷଣା କରିଛି। RJD ନେତା ତେଜସ୍ୱୀ ଯାଦବ ବୈଶାଳୀ ଜିଲ୍ଲାର ରାଘୋପୁର ବିଧାନସଭା ଆସନରୁ ନିର୍ବାଚନ ଲଢ଼ିବେ। ତେଜସ୍ୱୀ ଯାଦବଙ୍କ ନେତୃତ୍ୱରେ ପ୍ରକାଶିତ ଏହି ତାଲିକାରେ ଯୁବପିଢ଼ି, ମହିଳା ଏବଂ ସଂଖ୍ୟାଲଘୁଙ୍କୁ ପ୍ରାଥମିକତା ଦିଆଯାଇଛି। RJD ମହୁଆରୁ ମୁକେଶ ରୋଶନଙ୍କୁ ମନୋନୀତ କରିଛି। ଯିଏ ତେଜ ପ୍ରତାପ ଯାଦବଙ୍କ ବିପକ୍ଷରେ ପ୍ରତିଦ୍ୱନ୍ଦ୍ୱିତା କରିବେ। ଏଥର RJD 18ଜଣ ସଂଖ୍ୟାଲଘୁ ପ୍ରାର୍ଥୀ ଏବଂ 24 ଜଣ ମହିଳା ପ୍ରାର୍ଥୀଙ୍କୁ ଟିକେଟ୍ ଦେଇଛି।
ଦଳ ଏହାକୁ ସାମାଜିକ ସଦଭାବ ଏବଂ ପ୍ରତିନିଧିତ୍ୱର ପ୍ରତୀକ ଭାବରେ ବର୍ଣ୍ଣନା କରିଛି। ବିରୋଧୀ ଦଳ ନେତା ତେଜସ୍ୱୀ ଯାଦବ ପୁଣି ଥରେ ରାଘୋପୁର ଆସନରୁ ନିର୍ବାଚନ ଲଢ଼ିବେ, ଯାହାକୁ ତାଙ୍କର ପାରମ୍ପରିକ ଗଡ଼ ବୋଲି ଧରାଯାଉଛି। ତାଲିକାରେ ଅନେକ ବଡ଼ ଏବଂ ଲୋକପ୍ରିୟ ନେତାଙ୍କ ନାମ ରହିଛି। ପୂର୍ବତନ କେନ୍ଦ୍ରମନ୍ତ୍ରୀ ଜୟ ପ୍ରକାଶ ଯାଦବଙ୍କୁ ଝଜ୍ଜରରୁ ପ୍ରାର୍ଥୀ କରାଯାଇଛି। ଛଅ ଥର ବିଧାୟକ ଲଳିତ ଯାଦବଙ୍କୁ ଦରଭଙ୍ଗା ଗ୍ରାମାଞ୍ଚଳରୁ ପ୍ରାର୍ଥୀ କରାଯାଇଛି। ଲାଲୁ ପ୍ରସାଦ ଯାଦବଙ୍କ ଘନିଷ୍ଠ ବିଶ୍ୱାସୀ ବୋଲି କୁହାଯାଉଥିବା ଭୋଳା ଯାଦବ ବାହାଦୁରପୁର ଆସନରୁ ନିର୍ବାଚନ ଲଢ଼ିବେ।ପୂର୍ବତନ ବିଧାନସଭା ବାଚସ୍ପତି ଅୱଧ ବିହାରୀ ଚୌଧୁରୀ ସିୱାନରୁ ଆରଜେଡି ପ୍ରାର୍ଥୀ ହେବେ। ଦିବଂଗତ ଶକ୍ତିଶାଳୀ ଶାହାବୁଦ୍ଦିନଙ୍କ ପୁଅ ଓସାମା ଶାହାବଙ୍କୁ ରଘୁନାଥପୁର ଆସନରୁ ପ୍ରାର୍ଥୀ କରାଯାଇଛି।ଏହା ବ୍ୟତୀତ, ଭୋଜପୁରୀ ସୁପରଷ୍ଟାର ଖେସାରି ଲାଲ ଯାଦବଙ୍କୁ ଛାପରାରୁ ପ୍ରାର୍ଥୀ କରାଯାଇଛି।
ମାଥିଲି ବିଷ୍ଣୁ ନାୟକ ହତ୍ୟା ଘଟଣାର ନୂଆ ମୋଡ, ଗିରଫ ଶଙ୍କର ହିଣ୍ଡିଆଙ୍କ ନାବାଳିକା ଝିଅର ଆତ୍ମହତ୍ୟା
ନନ୍ଦିଘୋଷ ବ୍ୟୁରୋ : ମାଲକାନଗିରି ଜିଲ୍ଲା ମାଥିଲି ଅଞ୍ଚଳର ବିଷ୍ଣୁ ନାୟକ ହତ୍ୟା ଘଟଣାରେ ନୂଆ ମୋଡ । ଗିରଫ ଶଙ୍କର ହିଣ୍ଡିଆଙ୍କ ନାବାଳିକା ଝିଅ ଆତ୍ମହତ୍ୟା କରିଛନ୍ତି । ବାପାଙ୍କ ଗିରଫ ଓ ତ୍ରିକୋଣୀୟ ପ୍ରେମ କଥାର ଅପପ୍ରଚାର ଯୋଗୁଁ ଆତ୍ମହତ୍ୟା କରିଥିବା ଅଭିଯୋଗ ଆଣିଛନ୍ତି ମୃତକଙ୍କ ମା’ । ସେ ଆହୁରି ମଧ୍ୟ କହିଛନ୍ତି ଯେ, ବିଷ୍ଣୁକୁ ମୋର ସ୍ଵାମୀ ହତ୍ୟା କରିନାହାନ୍ତି । ଫେରାର ଥିବା ଦୀପକ କୁମାର ହିଁ ଏହି ହତ୍ୟା କରିଛି । ତେଣୁ ସ୍ଵାମୀଙ୍କୁ ମୁକୁଳାଇବାକୁ ସେ ଅନୁରୋଧ କରିଛନ୍ତି । ସେପଟେ ଅଭିଯୋଗକୁ ଖଣ୍ଡନ କରିଛନ୍ତି ମାଥିଲି ଥାନା ଅଧିକାରିଣୀ । ଘଟଣାର ତଦନ୍ତ ସଠିକ ଭାବେ ହୋଇଛି ବୋଲି ପୋଲିସ କହିଛି । ଗତ କିଛିଦିନ ପୂର୍ବେ ରେଙ୍ଗାବେଡା ଗାଁର ବିଷ୍ଣୁ ନାୟକ ହତ୍ୟା ଘଟଣାରେ ତିନି ଜଣଙ୍କୁ ଗିରଫ କରିଥିଲା ପୋଲିସ । ତ୍ରିକୋଣୀୟ ଭଲ ପାଇବା ଯୋଗୁଁ ହତ୍ୟାକାଣ୍ଡ ଘଟଣାରେ ଶଙ୍କର ଓ ତାଙ୍କର ଦୁଇ ସହଯୋଗୀ ସାଗର ସୁନାମ ଏବଂ ମନୋଜ ଗୌଡ଼ଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିଲା ।
ଦୀପାବଳି ଆତସବାଜି ପୂର୍ବରୁ ବିଷାକ୍ତ ହେଲାଣି ଦିଲ୍ଲୀ ବାୟୁ
ନନ୍ଦିଘୋଷ ବ୍ୟୁରୋ : ଦୀପାବଳି ପୂର୍ବରୁ ବିଷାକ୍ତ ହେଲାଣି ଦିଲ୍ଲୀ ବାୟୁ । ସମଗ୍ର ଦେଶ ଦୀପାବଳି ପାଳନ କରୁଛି । ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ପ୍ରଦୂଷଣ ଲୋକଙ୍କ ସ୍ୱାସ୍ଥ୍ୟ ଉପରେ ବିପର୍ଯ୍ୟସ୍ତ ପ୍ରଭାବ ପକାଇଛି। ଦିଲ୍ଲୀର ପରିସ୍ଥିତି ଏପରି ହୋଇଛି ଯେ AQI 300 ଉପରେ ପହଞ୍ଚିଛି, ଯାହା “ଅତି ଖରାପ” ବର୍ଗରେ ଥିବା ନେଇ କୁହାଯାଉଛି । ଦିଲ୍ଲୀ-NCRରେ ଦୀପାବଳିରେ ଆତସବାଜି ଜଳିବା ଆରମ୍ଭ ହେବା ପୂର୍ବରୁ , ବାୟୁ ଗୁଣବତ୍ତା ବିପଦପୂର୍ଣ୍ଣ ସ୍ତରକୁ ପହଞ୍ଚିଛି।
ଦୀପାବଳି ପରେ AQI ଆହୁରି ବିପଜ୍ଜନକ ସ୍ତରରେ ପହଞ୍ଚିବାର ସମ୍ଭାବନା ଅଛି। ବର୍ଦ୍ଧିତ ପ୍ରଦୂଷଣକୁ ଦୃଷ୍ଟିରେ ରଖି, ବାୟୁ ଗୁଣବତ୍ତା ପରିଚାଳନା ଆୟୋଗ (CAQM) ତୁରନ୍ତ GRAPର ଦ୍ୱିତୀୟ ପର୍ଯ୍ୟାୟ କାର୍ଯ୍ୟକାରୀ କରିବାକୁ ନିଷ୍ପତ୍ତି ନେଇଛି। ଦିଲ୍ଲୀର ବାୟୁ ପୁଣି ଥରେ ସରକାର ଏବଂ ଲୋକଙ୍କ ଚିନ୍ତା ବଢ଼ାଇ ଦେଇଛି। ପ୍ରତିଦିନ AQI ବିପଦପୂର୍ଣ୍ଣ ସ୍ତରରେ ପହଞ୍ଚିବାରେ ଲାଗିଛି। ସୋମବାର ସକାଳ ୮ଟାରେ, ଦିଲ୍ଲୀର ଆନନ୍ଦ ବିହାରରେ ସର୍ବାଧିକ AQI ରେକର୍ଡ କରାଯାଇଥିଲା, ଯେତେବେଳେ ଶ୍ରୀ ଅରବିନ୍ଦ ମାର୍ଗରେ ସର୍ବନିମ୍ନ AQI ରେକର୍ଡ କରାଯାଇଥିଲା। ସାମଗ୍ରିକ AQI ବିଷୟରେ କହିବାକୁ ଗଲେ, ଏହା ୩୩୭ରେ ପହଞ୍ଚିଛି। ଦିଲ୍ଲୀର ୩୫ରୁ ଅଧିକ ଅଞ୍ଚଳରେ ପ୍ରଦୂଷଣ ପାଇଁ ରେଡ୍ ଆଲର୍ଟ ଜାରି କରାଯାଇଛି।
ଦୀପାବଳିରେ ବଡ ଅଘଟଣ : ବାଣ ବିସ୍ଫୋରଣରେ ଚାଲିଗଲା ଯୁବକଙ୍କ ଜୀବନ
ନନ୍ଦିଘୋଷ ବ୍ୟୁରୋ : ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ତେନ୍ତୁଳିଆପଲ୍ଲି ପଞ୍ଚାୟତ କଇଠଜା ଗାଁରେ ବାଣ ବିସ୍ଫୋରଣ । ବାଣ ଭିଡୁଥିବା ବେଳେ ବିସ୍ଫୋରଣ ଘଟି ଛିଡିଗଲା ଯୁବକଙ୍କ ହାତ ଓ ଗୋଡ । ମେଡିକାଲ ନେବା ବାଟରେ ଯୁବକଙ୍କ ମୃତ୍ୟୁ ହୋଇଛି । ମୃତକ ହେଲେ ପିଣ୍ଟୁ ପଲେଇ । ପିଣ୍ଟୁ ନିଜ ଘରେ ବାଣ ଭିଡୁଥିବା ବେଳେ ବିସ୍ଫୋରଣ ହୋଇଥିଲା । ବାଣ ବିସ୍ଫୋରଣରେ ଘର ନଷ୍ଟ ହୋଇଯାଇଛି । ପୋଲିସ ଘଟଣାର ତଦନ୍ତ କରୁଥିବା ବେଳେ ଶବ ବ୍ୟବଚ୍ଛେଦ ପାଇଁ ପଠାଇଛି ।
ନୂଆପଡ଼ା ଉପନିର୍ବାଚନ ଲାଗି ଆଜି ନାମାଙ୍କନ ଭରିଲେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ
ନନ୍ଦିଘୋଷ ବ୍ୟୁରୋ : ନୂଆପଡ଼ା ବିଧାନସଭା ଉପନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ କଲେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ। ଦଳର ପ୍ରମୁଖ ନେତା ଓ କର୍ମୀଙ୍କ ଗହଣରେ ଆସି ନାମାଙ୍କନ ଦାଖଲ କରିଛନ୍ତି। ନାମାଙ୍କନ ଦାଖଲ ପୂର୍ବରୁ ମନ୍ଦିରରେ ପୂଜାର୍ଚ୍ଚନା କରିଥିଲେ। ଗତକାଲି ନୂଆପଡ଼ାରେ ମେଗା ରୋଡ ସୋ କରିଥିଲେ ସ୍ନେହାଙ୍ଗିନୀ। ରୋଡ ସୋରେ ହଜାର ହଜାର କର୍ମୀ ସାମିଲ ହୋଇଥିଲେ। ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କୁ ଜନ ସମର୍ଥନ ଅଜାଡି ହୋଇପଡିଥିଲା। ହଜାର ହଜାର ସଂଖ୍ୟାରେ ଲୋକେ ଏହି ମେଗା ରୋଡ ସୋରେ ସାମିଲ ହୋଇଥିଲେ।
ଶୋଭାଯାତ୍ରା କରି ଜନତାଙ୍କ ଅପାର ସମର୍ଥନ ଲୋଡ଼ିଛନ୍ତି ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ। ଏହି ଶୋଭାଯାତ୍ରାରେ ସାମିଲ ହୋଇଥିଲେ ବିଜେଡିର ବରିଷ୍ଠ ପ୍ରମୁଖ ନେତା। ଉପନିର୍ବାଚନରେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କୁ ନେଇ ଦଳୀୟ ନେତା ଓ କର୍ମୀଙ୍କ ଭିତରେ ଅନେକ ଉତ୍ସାହ ଦେଖିବାକୁ ମିଳିଛି। ଖୋଦ ବିଜେଡି ସଭାପତି ନବୀନ ଯାଇ ସ୍ନେହାଙ୍ଗିନୀଙ୍କ ଲାଗି ପ୍ରଚାର କରିବେ। ନୂଆପଡା ଉପନିର୍ବାଚନରେ ଦେଖିବାକୁ ମିଳିବ ହାଇଭୋଲଟେଜ ପ୍ରଚାର। ଆଜି ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ ନାମାଙ୍କନ ଦାଖଲ କରୁଥିବାବେଳେ ଗତ ଶନିବାର ନାମାଙ୍କନ ଦାଖଲ କରିଥିଲେ ବିଜେପି ପ୍ରାର୍ଥୀ ଜୟ ଢୋଲକିଆ ଓ କଂଗ୍ରେସ ପ୍ରାର୍ଥୀ ଘାସିରାମ ମାଝୀ। ନୂଆପଡ଼ା ଉପନିର୍ବାଚନ ଲାଗି ଆଜି ସରୁଛି ନାମାଙ୍କନ। ଆସନ୍ତାକାଲି ପ୍ରାର୍ଥୀପତ୍ର ଯାଞ୍ଚ ପରେ ଅକ୍ଟୋବର ୨୩ରେ ପ୍ରାର୍ଥିପତ୍ର ପ୍ରତ୍ୟାହାରର ଶେଷ ଦିନ ରହିଛି। ଏହାପରେ ଆରମ୍ଭ ହୋଇଯିବ ଘମାଘୋଟ ପ୍ରଚାର। ନଭେମ୍ବର ୧୧ ତାରିଖରେ ଅନୁଷ୍ଠିତ ହେବ ଭୋଟଗ୍ରହଣ।ନଭେମ୍ବର ୧୪ରେ ଭୋଟ ଗଣତି ହେବ
ଆଖଣ୍ଡଳମଣିଙ୍କ ମନ୍ଦିରରେ ଦୀପାବଳୀ ନିତୀକାନ୍ତି ଚୂଡାନ୍ତ ; ରାତ୍ର ୯ଟାରେ ଉଠିବ ମହାଦୀପ
ଭଦ୍ରକ : ଆରଡିପୀଠ ବାବା ଆଖଣ୍ଡଳମଣିଙ୍କ ମନ୍ଦିରରେ ପବିତ୍ର ଦୀପାବଳୀରେ ମନ୍ଦିରଚୂଡାକୁ ଉଠିବ ମହାଦୀପ । ଏଥିପାଇଁ ଉଭୟ ମନ୍ଦିର ପ୍ରଶାସନ ଓ ସେବାୟତଙ୍କ ପକ୍ଷରୁ ଚୂଡାନ୍ତ ହୋଇଛି ନୀତିକାନ୍ତି । ଆଖଣ୍ଡଳମଣିଙ୍କ ମନ୍ଦିରରେ ଦୀପାବଳୀ ନିତୀକାନ୍ତି ଚୂଡାନ୍ତ ସରିଛି । ଆଜି ରାତି ୯ ଟାରେ ମନ୍ଦିର ଚୂଡାକୁ ଉଠିବ ମହାଦୀପ । ଏଥିପାଇଁ ଉଭୟ ମନ୍ଦିର ପ୍ରଶାସନ ଓ ସେବାୟତଙ୍କ ପକ୍ଷରୁ ଚୂଡାନ୍ତ ହୋଇଥିବା ନୀତିକାନ୍ତି ଅନୁଯାୟୀ ଚାଲିଛି ନୀତିକାନ୍ତି । ଭୋର ୪ ଟାରେ ଦ୍ବାର ଫିଟା ଯିବା ପରେ ମଙ୍ଗଳ ଆଳତୀ, ଘର୍ଷଣଲାଗି, ଜଳାଭିଷେକ ନୀତି ସମ୍ପନ୍ନ ହେଵା ପରେ ନବ ବସ୍ତ୍ର ଲାଗି କରାଯାଇ ବାବାଙ୍କୁ ଦିଗମ୍ବର ବେଶରେ ସଜ୍ଜିତ କରାଯାଇଛି ।
ମଧ୍ଯାହ୍ନ ୧ ଟାରେ ଯୋଗୀବେଶ ଓ ବଡନୀତି ପରେ ଏକ ଘଣ୍ଟା ଅବକାଶ ନୀତି ସମ୍ପନ୍ନ ହେବା ପରେ ଦୀପାବଳି ନୀତି ନିମନ୍ତେ ଅପରାହ୍ନ ୪ ଟାରେ ବାବାଙ୍କୁ ବଡସିଂହାର ବେଶରେ ସଜ୍ଜିତ କରାଯିବ । ସଂଧ୍ୟାରେ ଭକ୍ତ ମାନଙ୍କ ଦ୍ଵାରା ହଜାର ହଜାର ଦୀପ ପ୍ରଜ୍ଵଳନ କରାଯିବ । ୭ ଟାରେ ମହାଦୀପ ପ୍ରସ୍ତୁତି କରାଯାଇ ଶୋଡଷ ଉପଚାରରେ ପୂଜାର୍ଚ୍ଚନା ଓ ଅଗ୍ନି ସଂଯୋଗ କରାଯିବା ପରେ ରାତ୍ର ୯ଟାରେ ମନ୍ଦିର ବେଢା ପରିକ୍ରମା କରାଯାଇ ମନ୍ଦିର ଚୂଡାରେ ସ୍ଥାପନ କରାଯିବ । ଏଥିପାଇଁ ମନ୍ଦିର ଵାହାରେ ଓ ଭିତରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି।