ଡବ୍ଲିନ: ଆୟରଲ୍ୟାଣ୍ଡ-ଭାରତ ପ୍ରଥମ ଟି-୨୦ ମ୍ୟାଚ ଆଜି ଆୟରଲ୍ୟାଣ୍ଡର ଡବ୍ଲିନସ୍ଥିତ ଷ୍ଟାଡିୟମରେ ଅନୁଷ୍ଠିତ ହୋଇଯାଇଛି । ଟସ୍ ଜିତି ଭାରତ ବୋଲିଂ ନିଷ୍ପତ୍ତି ନେଇଛି । ବର୍ଷା ଯୋଗୁଁ ମ୍ୟାଚ୍ ଆରମ୍ଭ ହେବାରେ ବିଳମ୍ବ ହେଉଛି । ଭାରତୀୟ କ୍ରିକେଟ ଟିମର ନେତୃତ୍ୱ ନେଉଛନ୍ତି ହାର୍ଦ୍ଦିକ ପାଣ୍ଡ୍ୟା । ଆଜିର ମ୍ୟାଚରେ ଜମ୍ମୁ ପେସର ଉମ୍ରାନ ମଲ୍ଲିକ ଡେବ୍ୟୁ କରୁଛନ୍ତି । ଅଧିନାୟକ ହାର୍ଦ୍ଦିକ କହିଛନ୍ତି ଆମେ ବ୍ୟାଟିଂ କରିବାକୁ ଚାହୁଁଥିଲୁ କିନ୍ତୁ ବର୍ଷା ଯୋଗୁଁ ପିଚ୍ ଧିମା ରହିବ ଏହି କାରଣରୁ ବୋଲିଂ ନିଷ୍ପତ୍ତି ନେବାକୁ ପଡିଲା । ସମ୍ପୂର୍ଣ୍ଣ ଜୋଶର ସହ ଆମ ଯୁବ ଖେଳାଳି ମାନେ ପଡିଆକୁ ଓହ୍ଲାଉଛନ୍ତି ।
ସେହିପରି ଭୁବନେଶ୍ୱର କୁମାର, ହର୍ଷଲ ପଟେଲ, ଉମ୍ରାନ ମଲ୍ଲିକ ଓ ୟୁଜବେନ୍ଦ୍ର ଚହଲ ସମ୍ଭାଳିବେ ଟିମ୍ ଇଣ୍ଡିଆର ବୋଲିଂ ଭାର । ଅନ୍ୟପଟେ ଭ୍ରମଣକାରୀ ଦଳକୁ ଟକ୍କର ଦେବାକୁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିଛି ଘରୋଇ ଆୟରଲ୍ୟାଣ୍ଡ । ଆଜି ଦୁଇ ଟିକିଆ ସିରିଜର ପ୍ରଥମ ମ୍ୟାଚ୍ ଖେଳାଯାଉଛି । ଭାରତୀୟ ସମୟ ଅନୁସାରେ ରାତି ୯ ଟାରେ ଖେଳ ଆରମ୍ଭ ହୋଇଛି । ପୂର୍ବରୁ ନିର୍ଦ୍ଧାରିତ ସମୟ ଅନୁସାରେ ବର୍ଷା ଯୋଗୁଁ ଖେଳ ଆରମ୍ଭ ହୋଇପାରିନଥିଲା । ସେପଟେ ଟେଷ୍ଟ ମ୍ୟାଚ୍ ପାଇଁ ଇଂଲଣ୍ଡ ଯାଇଛି ଭାରତର ଆଉ ଏକ ଟିମ୍ । ଆସନ୍ତା ୧ ତାରିଖରେ ଇଂଲଣ୍ଡ ବିରୋଧରେ ଖେଳାଯିବ ବାକିଥିବା ଟେଷ୍ଟ ମ୍ୟାଚ୍ ।
ଭାରତୀୟ ଦଳ- ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ଦୀନେଶ କାର୍ତ୍ତିକ (ୱିକେଟକିପର), ଋତୁରାଜ ଗାୟକ୍ୱାଡ଼, ଇଶାନ କିଷାନ, ଦୀପକ ହୁଡା, ସୂର୍ଯ୍ୟକୁମାର ଯାଦବ, ଅକ୍ସର ପଟେଲ, ଭୁବନେଶ୍ୱର କୁମାର, ଆଭେସ ଖାନ, ଯୁଜବେନ୍ଦ୍ର ଚହଲ, ଉମ୍ରାନ ମଲ୍ଲିକ ।
ଆୟରଲ୍ୟାଣ୍ଡ ଦଳ- ପଲ ଷ୍ଟିରଲିଙ୍ଗ, ଆଣ୍ଡ୍ରିଉ ବଲବିର୍ନି (ଅଧିନାୟକ), ଗରେଥ ଡେଲାନି, ହାରି ଟେକ୍ଟର, ଲୋର୍କାନ ଟକର (ୱିକେଟ କିପର), ଜର୍ଜ ଡକରେଲ, ମାର୍କ ଆଡେର, ଆଣ୍ଡି ଏମସିବ୍ରାଇନ, କ୍ରେଜ ୟୋଙ୍ଗ, ଜୋସୁଆ ଲିଟିଲ, କୋନର ଓଲଫର୍ଟ ।
