ଭୁବନେଶ୍ୱର: ଆଜି ବିଜୁ ପଟ୍ଟନାୟକଙ୍କ ଶ୍ରାଦ୍ଧ ଦିବସ । ସାରା ରାଜ୍ୟ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି । କରୋନା କଟକଣା ଭିତରେ ଆୟୋଜନ କରାଯାଇଛି ବିଭିନ୍ନ କାର୍ଯ୍ୟକ୍ରମ । କିନ୍ତୁ କାହିଁକି ବିଜୁବାବୁଙ୍କ ପାଇଁ ଏତେ ବ୍ୟାପକ ଆୟୋଜନ ? ବିଜୁବାବୁ କେବଳ ରାଜନେତା ନଥିଲେ, ସେ ଥିଲେ ଜନନେତା । ଓଡ଼ିଆଙ୍କ ପାଇଁ କହୁଥିଲେ, ଓଡ଼ିଶା କଥା କହୁଥିଲେ, ଆଉ ସେଥିପାଇଁ ତାଙ୍କୁ ସମେସ୍ତ ହୃଦୟରୁ ଭଲ ପାଉଥିଲେ। ଦକ୍ଷ ସଂଗଠକ, ଓ ରାଜନୀତିର କୁରୁକ୍ଷେତ୍ରରେ ଅପରାଜେୟ ଯୋଦ୍ଧା ଥିଲେ ବିଜୁବାବୁ । ସ୍ୱାଧୀନତା ପରେ ସେ ଦେଶର ଗଣତାନ୍ତ୍ରିକ ସମୃଦ୍ଧି ପାଇଁ ଅଣ୍ଟା ଭିଡିଥିଲେ। ଓଡ଼ିଶା ଥିଲା ବିଜୁବାବୁଙ୍କ ରାଜନୈତିକ ପ୍ରୟୋଗଶାଳା। ଆଜି ତାଙ୍କ ୨୫ତମ ଶ୍ରାଦ୍ଧ ଦିବସରେ ସାରା ରାଜ୍ୟ ମନେ ପକାଉଛି ତାଙ୍କ ବୀରତ୍ୱର ଗାଥା ।
ପ୍ରବାଦପୁରୁଷ, କଳିଙ୍ଗବୀର, ଦ୍ୱିତୀୟ ଖାରବେଳ, ଭୂମିପୁତ୍ର । ଏମିତି ଅନେକ ବିଶେଷଣର ଅଧିକାରୀ ଥିଲେ ବିଜୁ ପଟ୍ଟନାୟକ । ସେ ଓଡ଼ିଶାର ଅନ୍ୟତମ ପରିଚୟ, ସେ ପ୍ରତିଟି ଓଡ଼ିଆଙ୍କ ପରିଚୟ । ଓଡ଼ିଆଙ୍କ ସହ ତାଙ୍କ ସଂପର୍କ ଥିଲା ଅତି ଆତ୍ମୀୟତାର ସମ୍ପର୍କ। ଓଡ଼ିଶାର ସ୍ୱାଭିମାନ ପାଇଁ ସାରା ଜୀବନ ସଂଘର୍ଷ କରିଥିଲେ ବିଜୁବାବୁ । ରାଜନୀତିର କୁରୁକ୍ଷେତ୍ରରେ ସାଜିଥିଲେ ରାଷ୍ଟ୍ର ନାୟକ। କଟକରୁ ଆରମ୍ଭ ହୋଇଥିଲା ଏହି ବିଚକ୍ଷଣ ରାଜନେତାଙ୍କ ଜୀବନ ଯାତ୍ରା। ରାଜନୀତିର ମହାନାୟକ, ନୂଆ ଓଡ଼ିଶାର ବିଶ୍ୱକର୍ମା ବିଜୁବାବୁ । ସେ ଥିଲେ ରାଜନୀତିର ଉତ୍ତୁଙ୍ଗ ଶିଖର । ସେ କେବଳ ଜଣେ ରାଜନେତା ନଥିଲେ, ଥିଲେ ରାଷ୍ଟ୍ରନାୟକ । ବିଚକ୍ଷଣ ବୁଦ୍ଧିମତ୍ତା ସାଙ୍ଗକୁ ବିଜୁଙ୍କ ଦୁଃସାହସିକ ଓ ଦୁର୍ବାର ବ୍ୟକ୍ତିତ୍ୱ ଓଡ଼ିଶା ରାଜନୀତିରେ ସୃଷ୍ଟି କରିଥିଲା ନୂଆ ଅଧ୍ୟାୟ । ଜୀବଦଶାରେ ହିଁ ସେ ପାଲଟିଯାଇଥିଲେ କିମ୍ବଦନ୍ତୀ । ଏକଥା ପ୍ରମାଣିତ କରୁଛି, କିଭଳି ଥିଲା ବିଜୁବାବୁଙ୍କ ଲୋକପ୍ରିୟତା ।
ମାତ୍ର ୪୫ ବର୍ଷ ବୟସରେ ବିଜୁ ପଟ୍ଟନାୟକ ପ୍ରଥମ ଥର ପାଇଁ ରାଜ୍ୟର ଶାସନ ସମ୍ଭାଳିଥିଲେ ୧୯୬୧ ମସିହାରେ । ଓଡ଼ିଶା ପାଇଁ ସ୍ୱପ୍ନ ଦେଖୁଥିଲେ ବିଜୁବାବୁ, ସମୃଦ୍ଧି ପାଇଁ ନେଇଥିଲେ ଦୃଢ଼ ସଂକଳ୍ପ। କେବଳ ସ୍ୱପ୍ନ ନୁହେଁ, ଦୂରଦୃଷ୍ଟିକୁ ବାସ୍ତବ ରୂପ ଦେବା ପାଇଁ ବି କରିଥିଲେ ଭରପୂର ଉଦ୍ୟମ । ରାଜ୍ୟ ପାଇଁ ଚିନ୍ତା କରୁଥିବା ଏହି ଜନନାୟକ ଜାତୀୟ ରାଜନୀତିରେ ବି ଥିଲେ ପାରଙ୍ଗମ । ପ୍ରାଇମ ମିନିଷ୍ଟର ମେକର୍, କ୍ରାଇସିସ୍ ମ୍ୟାନେଜର ଭାବେ ତାଙ୍କର ଥିଲା ସ୍ବତନ୍ତ୍ର ପରିଚୟ । କେବଳ ନିଜ ଦଳ ନୁହେଁ, ବିରୋଧୀ ଦଳର ତୁଙ୍ଗ ନେତାମାନେ ମଧ୍ୟ ସମସ୍ୟାର ସମାଧାନ ପାଇଁ ବିଜୁ ବାବୁଙ୍କ ସାହାଯ୍ୟ ଲୋଡ଼ୁଥିଲେ । କେନ୍ଦ୍ରରେ ଏତେ ପତିଆରା ସତ୍ତ୍ବେ ବିଭିନ୍ନ ପଦପଦବୀକୁ ତୁଚ୍ଛ କରି ସେ ଓଡ଼ିଶା ଫେରିଥିଲେ ।
୧୯୯୦ରେ ବିଜୁ ପଟ୍ଟନାୟକଙ୍କ ନେତୃତ୍ୱରେ ଜନତା ଦଳ ବିଧାନସଭା ୧୨୩ ଆସନରେ ବିଜୟୀ ହେବା ପରେ ଦ୍ବିତୀୟ ଥର ପାଇଁ ମୁଖ୍ୟମନ୍ତ୍ରୀ ଦାୟିତ୍ୱ ନେଇଥିଲେ ବିଜୁ ପଟ୍ଟନାୟକ । ଶିଳ୍ପରୁ କୃଷି, ଓଡ଼ିଶା ବିକାଶ ମାନଚିତ୍ରରେ ରହିଛି ବିଜୁଙ୍କ ଅଲିଭା ସ୍ୱାକ୍ଷର। କ୍ଷମତା ନୁହେଁ, ସେ ଜନତାଙ୍କ ପାଇଁ ସ୍ୱପ୍ନ ଦେଖୁଥିଲେ । ଯେବେବି ସୁଯୋଗ ମିଳିଥିଲା, କେନ୍ଦ୍ର ଆଗରେ ରଖିଥିଲେ ଓଡ଼ିଶାର ଦାବି । ପାରାଦୀପ ବନ୍ଦରରୁ ଆରମ୍ଭ କରି କଳିଙ୍ଗ ଆଇରନ୍ ଓ୍ୱାର୍କସ, କଳିଙ୍ଗ ରିଫ୍ରାକ୍ଟୋରିଜ୍, ଭୁବନେଶ୍ୱର ବିମାନବନ୍ଦର, ସୈନିକ ସ୍କୁଲ, ରାଉରକେଲା ରିଜିଓନାଲ ଇଞ୍ଜିନିୟରିଂ କଲେଜ, ଭୁବନେଶ୍ୱର ଓୟୁଏଟି, ନାଲକୋ, ତାଳଚେର ଥର୍ମାଲ ପାଓ୍ୱାରପ୍ଲାଣ୍ଟ, ବାଲିମେଳା ହାଇଡ୍ରୋ ପ୍ରୋଜେକ୍ଟ, ସୁନାବେଡା ହାଲ୍, ଚୌଦ୍ୱାର ଏବଂ ବଡବିଲ ଶିଳ୍ପାଞ୍ଚଳ, ଓଡ଼ିଶା ଆଭିଏସନ୍ ରିସର୍ଚ୍ଚ ସେଣ୍ଟର ପର୍ଯ୍ୟନ୍ତ ପ୍ରତ୍ୟେକ ଉପଲବ୍ଧି କହେ ବିଜୁ ବାବୁଙ୍କ ଅବଦାନର ଗାଥା। ଆଜି ତାଙ୍କ ଶ୍ରାଦ୍ଧ ଦିବସରେ ସାରା ଓଡ଼ିଶା ମନେ ପକାଉଛି ବିଜୁଙ୍କ ବୀରତ୍ୱର ଗାଥା । ବିଜୁଙ୍କ ସାହସିକତା ଓ ନିର୍ଭୀକତାକୁ ଯୁବପିଢ଼ି ଆପଣେଇଲେ ଏହା ହିଁ ତାଙ୍କ ପାଇଁ ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ ।
ଓଡ଼ିଶା ପ୍ରତି ବିଜୁବାବୁଙ୍କ ଅବଦାନକୁ କେତେକ ଶବ୍ଦ ଓ କେତେକ ପଙ୍କ୍ତି ଭିତରେ ସୀମିତ କରିବାକୁ ଚେଷ୍ଟା କରିବା ଧୃଷ୍ଟତା ମାତ୍ର । ଓଡ଼ିଶା ଆସି ବିଜୁବାବୁଙ୍କ ଶବାଧାରରେ ପ୍ରଧାନମନ୍ତ୍ରୀ, ପୂର୍ବତନ ପ୍ରଧାନମନ୍ତ୍ରୀଙ୍କ ସମେତ ଅନେକ କେନ୍ଦ୍ରମନ୍ତ୍ରୀ ଓ ରାଜନେତା ପୁଷ୍ପ ମାଲ୍ୟାର୍ପଣ କରିବା ଏବଂ ତାଙ୍କ ମରଶରୀରରେ ତିନିଟି ଦେଶର ଜାତୀୟ ପତାକା ପଡ଼ିବା ତାଙ୍କ ବିଶାଳ ଲୋକପ୍ରିୟତାର ପ୍ରମାଣ ଦିଏ ।
