ଭୁବନେଶ୍ୱର: ପ୍ରଥମ ପର୍ଯ୍ୟାୟରେ କରିଥିଲେ ହିଂସା । ଦ୍ବିତୀୟ ପର୍ୟ୍ୟାୟରେ ସମାନ ଢ଼ଙ୍ଗରେ ହିଂସାର ରାସ୍ତା ଆପଣେଇଲା ବିଜେପି । ପଞ୍ଚାୟତ ନିର୍ବାଚନରେ ହାରିବା ଭୟରେ ହିଂସା କରୁଛି ବିଜେପି । ଆଜି ଜଗତସିଂହପୁରର ୨ଟି ସ୍ଥାନରେ ବିଜେପିର ଗୁଣ୍ଡାଗିରି ଯୋଗୁ ଭୋଟଦାନ ବନ୍ଦ ରହିଛି । ନିର୍ବାଚନରେ ହିଂସା କାହିଁକି ବୋଲି ପ୍ରଶ୍ନ କରିଛନ୍ତି ବିଜେଡି ମୁଖପାତ୍ର ଲେନିନ୍ ମହାନ୍ତି । ବିଜେପିର ହିଂସା ନିର୍ବାଚନ କମିଶନଙ୍କୁ ଭେଟିଲେ ବିଜେଡି ନେତା । ହିଂସା ବିରୋଧରେ ଫେରାଦ ହେଲା ବିଜେଡି । ଏଥର ପଞ୍ଚାୟତରେ ବିଜେଡି ଐତିହାସିକ ବିଜୟ ଲାଭ କରିବ । ରାଜ୍ୟ ବିଜେପି ଏନେଇ ଭୟଭୀତ ହୋଇଥିବାରୁ ହିଂସାର ପନ୍ଥା ଆପଣାଇଛି ।
ଦିନ ୧୨ ସୁଦ୍ଧା ରାଜ୍ୟରେ ୪୩ ପ୍ରତିଶତ ମତଦାନ
ଭୁବନେଶ୍ୱର: ଦ୍ୱିତୀୟ ପର୍ଯ୍ୟାୟରେ ସାରା ରାଜ୍ୟରେ ସୁରୁଖୁରୁରେ ଚାଲିଛି ମତଦାନ । ଦିନ ୧୨ଟା ସୁଦ୍ଧା ହୋଇଛି ୪୩ ପ୍ରତିଶତ ମତଦାନ । ଏନେଇ ସୂଚନା ଦେଇଛନ୍ତି ନିର୍ବାଚନ କମିଶନଙ୍କ ସଚିବ ରବୀନ୍ଦ୍ର କୁମାର ସାହୁ । କେବଳ ଜଗତସିଂହପୁରର ଦୁଇଟି ବୁଥକୁ ଛାଡିଦେଲେ ଏପର୍ଯ୍ୟନ୍ତ ପୋଲିଂ ଶାନ୍ତିପୂର୍ଣ୍ଣ ରହିଛି । ସେହିପରି ଭାବରେ କୋଟିଆରେ ମତଦାନରେ ବେଶ ଉତ୍ସାହ ଦେଖିବାକୁ ମିଳିଛି ବୋଲି କହିଛନ୍ତି ନିର୍ବାଚନ କମିଶନଙ୍କ ସଚିବ । ସକାଳୁ କୋଟିଆରେ ଶାନ୍ତିଶୃଙ୍ଖଳାର ସହ ମତଦାନ ଚାଲିଛି । ଦିନ ୧୨ଟା ସୁଦ୍ଧା ୪୦ ପ୍ରତିଶତରୁ ଅଧିକ ମତଦାନ ହୋଇଛି ବୋଲି ସୂଚନା ଦେଇଛନ୍ତି ନିର୍ବାଚନ କମିଶନଙ୍କ ସଚିବ ରବିନ୍ଦ୍ର କୁମାର ସାହୁ ।
ଅହମ୍ମଦାବାଦ ସିରିଏଲ ବ୍ଲାଷ୍ଟ ମାମଲା; ୩୮ ଜଣଙ୍କୁ ଫାଶୀ, ୧୧ ଜଣଙ୍କୁ ଆଜୀବନ କାରାଦଣ୍ଡ
ଅହମ୍ମଦାବାଦ: ଅହମ୍ମଦାବାଦ ସିରିଏଲ ବ୍ଲାଷ୍ଟ ମାମଲାରେ ୩୮ଜଣଙ୍କୁ ଫାଶୀ ଦଣ୍ଡାଦେଶ । ଏହି ମାମଲାର ରାୟ ଶୁଣାଇଲେ ଅହମ୍ମଦାବାଦ ସ୍ପେଶାଲ କୋର୍ଟ । ଅହମ୍ମଦାବାଦ ସିରିଏଲ ବ୍ଲାଷ୍ଟ ମାମଲାରେ ଅହମ୍ମଦାବାଦ ସ୍ପେଶାଲ କୋର୍ଟ ୩୮ ଜଣ ଅଭିଯୁକ୍ତଙ୍କୁ ଫାଶୀ ଦଣ୍ଡାଦେଶ ଦେଇଛନ୍ତି । ଦେଶରେ ପ୍ରଥମ ଥର ଲାଗି ଏତେ ସଂଖ୍ୟକ ଲୋକଙ୍କୁ ଫାଶୀ ଦଣ୍ଡାଦେଶ ହୋଇଛି । ସେହିପରି ୧୧ ଜଣଙ୍କୁ ଆଜୀବନ କାରା ଦଣ୍ଡାଦେଶ ହୋଇଛି । ୨୦୦୮ରେ ଗୁଜୁରାଟର ଅହମ୍ମଦାଦରେ ସିରିଏଲ ବ୍ଲାଷ୍ଟ ହୋଇଥିଲା । ମାତ୍ର ୭୦ ମିନିଟରେ ୨୧ଟି ସ୍ଥାନରେ ହୋଇଥିଲା ବିସ୍ଫୋରଣ । ଏହି ବିସ୍ଫୋରଣରେ ୫୬ ଜଣ ପ୍ରାଣ ହରାଇଥିବା ବେଳେ ଦୁଇ ଶହରୁ ଅଧିକ ଲୋକ ଆହତ ହୋଇଥିଲେ ।
2008 Ahmedabad serial bomb blast case | A special court pronounces death sentence to 38 out of 49 convicts pic.twitter.com/CtcEWGze2z
— ANI (@ANI) February 18, 2022
ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ଆଜି ସରିବ ପ୍ରଚାର, ୨୦ରେ ୧୭୧ଟି ଜିଲ୍ଲା ପରିଷଦ ଜୋନରେ ହେବ ଭୋଟିଂ
ଭୁବନେଶ୍ୱର: ସାରା ରାଜ୍ୟରେ ଜାରି ରହିଛି ପଞ୍ଚାୟତ ନିର୍ବାଚନ । ଫେବ୍ରୁଫରୀ ୧୬ରେ ପ୍ରଥମ ପର୍ଯ୍ୟାୟ ନିର୍ବାଚନ ସରିଥିବାବେଳେ ଆଜି ରାଜ୍ୟରେ ଜାରି ରହିଛି ଦ୍ୱିତୀୟ ପର୍ଯ୍ୟାୟ ନିର୍ବାଚନ । ସେପଟେ ଆଉ ଦିନକ ପରେ ରାଜ୍ୟରେ ତୃତୀୟ ପର୍ଯ୍ୟାୟ ପଞ୍ଚାୟତ ନିର୍ବାଚନ । ୨୦ ତାରିଖରେ ତୃତୀୟ ପର୍ଯ୍ୟାୟରେ ନେତା ବାଛିବ ଗାଁ । ଏଥିପାଇଁ ଆଜି ସନ୍ଧ୍ୟାରେ ସରିବ ପ୍ରଚାର । ତୃତୀୟ ପର୍ଯ୍ୟାୟରେ ରାଜ୍ୟରେ ୧୭୧ଟି ଜିଲ୍ଲା ପରିଷଦ ଜୋନରେ ହେବ ନିର୍ବାଚନ । ୧୩୮୨ ସରପଞ୍ଚ, ସମିତି ସଭ୍ୟ ଏବଂ ୧୮ହଜାର ୪୯୫ଟି ଓ୍ବାର୍ଡରେ ହେବ ଭୋଟିଂ ।
ତୃତୀୟ ପର୍ଯ୍ୟାୟ ପଞ୍ଚାୟତ ନିର୍ବାଚନରେ ୫୬ ଲକ୍ଷରୁ ଅଧିକ ଭୋଟର ନିଜର ମତଦାନ ସାବ୍ୟସ୍ତ କରିବେ । ଏଥିପାଇଁ ଆସନ୍ତାକାଲି ପ୍ରତି ବୁଥରେ ପହଞ୍ଚିବେ ପୋଲିଂ କର୍ମଚାରୀ । ଏଥିପାଇଁ ପ୍ରଶାସନିକସ୍ତରରେ ପ୍ରସ୍ତୁତି ମଧ୍ୟ ଜୋରସୋରରେ ହେଉଛି । ଅନ୍ୟପକ୍ଷରେ ନିର୍ବାଚନ ପାଇଁ ଶେଷ ମୁହୂର୍ତ୍ତରେ ଜୋରସୋରରେ ଚାଲିଛି ପ୍ରଚାର । ଗାଁ ଦାଣ୍ଡରେ ବୁଲୁଛନ୍ତି ହେଭିଓ୍ବେଟ୍ । ଘରକୁ ଘର ବୁଲି ଭୋଟ୍ ହାତେଇବାକୁ ଅନ୍ତିମ ଚେଷ୍ଟା କରୁଛନ୍ତି ପ୍ରାର୍ଥୀ । ସବୁ ଦଳ ଜିଲ୍ଲା ପରିଷଦ ଆସନ ଉପରେ ଫୋକସ କରିଛନ୍ତି । ଲୋକପ୍ରିୟ ଯୋଜନା ଓ ବିକାଶ ପାଇଁ ବିଜେଡି ସପକ୍ଷରେ ହାଓ୍ବା ବହୁଥିବାବେଳେ ଶାସକ ଦଳକୁ ଟକ୍କର ଦେବାକୁ ରଣନୀତି ପ୍ରସ୍ତୁତ କରିଛନ୍ତି ବିରୋଧୀ ।
ଭିଜିଲାନ୍ସ ଜାଲରେ ସହକାରୀ ଯନ୍ତ୍ରୀ, ଆୟ ବହିର୍ଭୂତ ସମ୍ପତ୍ତିଠୁଳ ଅଭିଯୋଗରେ ଚଢ଼ାଉ
କୋରାପୁଟ: ଭିଜିଲାନ୍ସ ଜାଲରେ ସହକାରୀ ଯନ୍ତ୍ରୀ । କୋରାପୁଟ ଜିଲ୍ଲା ସୁନାବେଡା ଏନଏସିର ସହକାରୀ ଯନ୍ତ୍ରୀ ମନୋଜ କୁମାର ପାତ୍ରଙ୍କ ଘରେ ଭିଜିଲାନ୍ସ ରେଡ୍ । ଆୟ ବହିର୍ଭୂତ ସମ୍ପତ୍ତିଠୁଳ ଅଭିଯୋଗରେ ଭିଜିଲାନ୍ସ ଚଢ଼ାଉ ଜାରି ରଖିଛି । ଏକକାଳୀନ ୬ଟି ସ୍ଥାନରେ ଚଢ଼ାଉ କରୁଛି ଭିଜିଲାନ୍ସ । ଭୁବନେଶ୍ୱର ପୋଖରୀପୁଟର କୋନିକା ଆପାର୍ଟମେଣ୍ଟରେ ଥିବା ଘର, ପାରଳାଖେମୁଣ୍ଡି ବି. ସୀତାପୁରର ପୈତୃକ ଘର, ବ୍ରହ୍ମପୁରରେ ଥିବା ସମ୍ପର୍କୀୟଙ୍କ ଘର ଓ ଶକ୍ତିନଗରରେ ଥିବା ୨ମହଲା କୋଠାରେ ଚାଲିଛି ରେଡ୍ । ଏହାସହ ସୁନାବେଡାରେ ଥିବା ଏନଏସି ଅଫିସ ଓ ସରକାରୀ କ୍ବାର୍ଟରରେ ଭିଜିଲାନ୍ସ ଛାପା । ଏହି ଭିଜିଲାନ୍ସ ଚଢ଼ାଉରେ ୫ ଡିଏସପି, ୮ ଇନସ୍ପେକ୍ଟର ଓ ଅନ୍ୟ ଅଧିକାରୀ ସାମିଲ ହୋଇଛନ୍ତି ।
ଜଗତସିଂହପୁର ପଟସରାରେ ନିର୍ବାଚନୀ ହିଂସା, ବୁଥରେ ଭୋଟ ବାକ୍ସ ଭଙ୍ଗାରୁଜା କଲେ ବିଜେପି କର୍ମୀ
ଜଗତସିଂହପୁର: ଜଗତସିଂହପୁର ପଟସରାରେ ନିର୍ବାଚନୀ ହିଂସା । ଜଗତସିଂହପୁରରେ ବିଜେପି କର୍ମୀଙ୍କ ଗୁଣ୍ଡାଗିରି । ପଟସରା ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟର ୨ନମ୍ବର ବୁଥରେ ଭୋଟ ବାକ୍ସ ଭଙ୍ଗାରୁଜା କଲେ ବିଜେପି କର୍ମୀ । ୪୦ ରୁ ୫୦ ବିଜେପି କର୍ମୀ ବୁଥ ଭିତରେ ପଶି ଭୋଟ ବାକ୍ସ ସହ ସବୁ ନିର୍ବାଚନ ସାମଗ୍ରୀ ଭାଙ୍ଗି ମତଦାତାଙ୍କୁ ଠେଲି ବାହାରକୁ ବିଦା କରିଦେଇଥିବା ଦେଖିବାକୁ ମିଳିଛି । ପରାଜୟ ଭୟରେ ବୁଥରେ ପଶି ଭୋଟ ବାକ୍ସ ଭଙ୍ଗାରୁଜା କରୁଛି ବିଜେପି କର୍ମୀ ।
ଅନ୍ୟପକ୍ଷରେ ଜଗତସିଂହପୁର ପଲି ପଞ୍ଚାୟତରେ ମଧ୍ୟ ଦେଖିବାକୁ ମିଳିଛି ନିର୍ବାଚନୀ ହିଂସା । ବୁଥ୍ ଭିତରେ ୱାର୍ଡମେମ୍ବର ସମର୍ଥକଙ୍କ ଭୋଜିକୁ ନେଇ ପୋଲିସ ଓ ଗ୍ରାମବାସୀ ମୁହାଁମୁହିଁ ହୋଇଛନ୍ତି । ଯାହାଫଳରେ ଉଭୟ ପକ୍ଷରୁ ୫ ଜଣ ଆହତ ହୋଇଛନ୍ତି । ସୂଚନା ଅନୁସାରେ ଗତକାଲି ବିଳମ୍ବିତ ରାତିରେ ପଲି ପଞ୍ଚାୟତର କିଛି ଯୁବକ ବୁଥ ମଧ୍ୟରେ ଭୋଜି କରିଥିଲେ । ଏହି ଖବର ପାଇ ପୋଲିସର ମୋବାଇଲ ଭ୍ୟାନ ଗାଁ ମଧ୍ୟକୁ ଆସିଥିଲା । ସେହି ସମୟରେ ସେଠାରେ ଭୋଜି କରୁଥିବା ଯୁବକମାନେ ପୋଲିସ ଗାଡି ଉପରକୁ ଢେଲା ମାଡ କରିଥିଲେ । ତେବେ ପୋଲିସ ଗାଡିକୁ ଆକ୍ରମଣ କରିଥିବା ଆକ୍ରମଣକାରୀଙ୍କ ଉପରେ ଖୁବଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସପି କହିଛନ୍ତି ।
ସୂଚନା ଅନୁସାରେ, ରାଜ୍ୟରେ ଆରମ୍ଭ ହୋଇଛି ଦ୍ୱିତୀୟ ପର୍ଯ୍ୟାୟ ପଞ୍ଚାୟତ ନିର୍ବାଚନ । ୩୦ ଜିଲ୍ଲାର ୬୮ ବ୍ଲକରେ ୧୮୬ ଜିଲ୍ଲା ପରିଷଦ ଆସନ ପାଇଁ ପଡ଼ୁଛି ଭୋଟ । ୧ ହଜାର ୫୧୪ ପଞ୍ଚାୟତର ୨୦ ହଜାରରୁ ଅଧିକ ବୁଥରେ ଆରମ୍ଭ ହୋଇଛି ମତଦାନ । ସକାଳ ୭ଟାରୁ ଭୋଟିଂ ଆରମ୍ଭ ହୋଇଥିବା ବେଳେ ଅପରାହ୍ନ ୧ଟା ପର୍ଯ୍ୟନ୍ତ ମତଦାନ ଚାଲିବ । ଭୋଟ କାର୍ଡ ନଥିଲେ ନିର୍ବାଚନ କମିଶନଙ୍କ ଦ୍ୱାରା ଅନୁମୋଦିତ ଅନ୍ୟ ୧୩ଟି କାର୍ଡ ଦେଖାଇ ଭୋଟର ମତାଧିକାର ସାବ୍ୟସ୍ତ କରିପାରିବେ ।
ଦୁଇଟି ବିଶ୍ୱଯୁଦ୍ଧ ପରେ ପୁଣି ଏକ ଯୁଦ୍ଧ ଆଡ଼କୁ ମୁହାଁଉଛି ବିଶ୍ୱ: ଆମେରିକା
ନୂଆଦିଲ୍ଲୀ: ଯୁଦ୍ଧ ଲାଗି ୟୁକ୍ରେନ ସମ୍ପୂର୍ଣ୍ଣ ପ୍ରସ୍ତୁତ । ୟୁକ୍ରେନ ସୀମାରେ ଦେଢ ଲକ୍ଷରୁ ଅଧିକ ସୈନ୍ୟଙ୍କୁ ବର୍ତ୍ତମାନ ସୁଦ୍ଧା ମୁତୟନ କରିଛି ୟୁକ୍ରେନ । ସେପଟେ ଜାତିସଂଘ ନିରାପତ୍ତା ପରିଷଦରେ ଋଷ ବିରୋଧରେ ଅଭିଯୋଗ କରିଛି ଆମେରିକା । ଏହା ସହ ଯୁଦ୍ଧ ଲାଗି ଋଷ ବ୍ଲୁ ପ୍ରିଣ୍ଟ ପ୍ରସ୍ତୁତି କରିଛି ଏବଂ ସୈନ୍ୟ ପ୍ରତ୍ୟାହାର ପ୍ରତିଶ୍ରୁତି ସମ୍ପୂର୍ଣ୍ଣ ମିଥ୍ୟା ବୋଲି ଦର୍ଶାଇଛି ଆମେରିକା । ଜାତିସଂଘ ନିରାପତ୍ତା ପରିଷଦ ବୈଠକରେ ଯୋଗଦେଇ ଆମେରିକା ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ କହିଛନ୍ତି ୟୁକ୍ରେନ ସୀମାରେ ଋଷ ୧ ଲକ୍ଷ ୫୦ ହଜାର ସୈନ୍ୟଙ୍କୁ ମୁତୟନ କଲାଣି । ଲକ୍ଷ ଲକ୍ଷ ଲୋକଙ୍କ ଜୀବନ ବର୍ତ୍ତମାନ ବିପଦ ମୁହଁକୁ ଯାଇଛି । ଦୁଇଟି ବିଶ୍ବଯୁଦ୍ଧ ଓ ଗୋଟିଏ ଶୀତଳ ଯୁଦ୍ଧ ପରେ ପୁଣି ଥରେ ଆଉ ଏକ ଯୁଦ୍ଧ ମୁହଁକୁ ବିଶ୍ବ ଗତିକରୁଛି ବୋଲି ସେ କହିଛନ୍ତି ।
ସେହିପରି ଭାରତ ମଧ୍ୟ ୟୁକ୍ରେନ ସମସ୍ୟାର ଶାନ୍ତିପୂର୍ଣ୍ଣ ସମାଧାନ ଚାହୁଁଛି ବୋଲି କହିଛନ୍ତି ନିରାପତ୍ତା ପରିଷଦରେ ଭାରତର ସ୍ଥାୟୀ ପ୍ରତିନିଧି ଟି.ଏସ. ତିରୁମୂର୍ତ୍ତି । ସେ କହିଛନ୍ତି- ସକରାତ୍ମକ କୂଟନୈତିକ ଆଲୋଚନା ଜରିଆରେ ଏହି ବିବାଦର ସମାଧାନ ସମ୍ଭବ । ସେପଟେ ୟୁକ୍ରେନର କେତେକ ସ୍ଥାନରେ ଗୋଳାମାଡ କରାଯାଇଛି ଏବଂ କିଛି ଘର ନଷ୍ଟ ହୋଇଥିବା ନେଇ ଅଭିଯୋଗ କରିଛି ଆମେରିକା । ଏହାର ଫଟୋ ମଧ୍ୟ ପ୍ରକାଶ କରାଯାଇଛି । ଏହାସହ ୟୁକ୍ରେନ ସୈନ୍ୟ ଓ ଋଷୀୟ ସହାୟତାପ୍ରାପ୍ତ ବିଚ୍ଛିନ୍ନତାବାଦୀ ଶକ୍ତିଙ୍କ ମଧ୍ୟରେ ଗୁଳି ବିନିମୟ ହୋଇଥିବା ସୂଚନା ମିଳିଛି । ଏକ ଯୁଦ୍ଧ ଲାଗି ଋଷ କ୍ଷେତ୍ର ପ୍ରସ୍ତୁତ କରୁଛି ବୋଲି କହିଛନ୍ତି ଆମେରିକା ରାଷ୍ଟ୍ରପତି ଜୋ ବିଡେନ ।
Any steps that increase tension may best be avoided by all sides in the larger interest of securing international peace and security. Quiet and constructive diplomacy is the need of the hour: India's Permanent Rep to United Nations TS Tirumurti, at UNSC meeting on Ukraine pic.twitter.com/TgstlTYliL
— ANI (@ANI) February 17, 2022
ଅନ୍ୟପକ୍ଷରେ ଭାରତୀୟମାନଙ୍କୁ ନିରାପଦରେ ସ୍ୱଦେଶ ଆଣିବା ଲାଗି ଦେଶର ବିଭିନ୍ନ ଏୟାରଲାଇନ୍ସକୁ ଅନୁରୋଧ କରିଛନ୍ତି ସରକାର । ୟୁକ୍ରେନରୁ ଭାରତକୁ ଅଧିକ ସଂଖ୍ୟକ ବିମାନ ଚଳାଇବା ଲାଗି ବୈଦେଶିକ ବିଭାଗ ମୁଖପାତ୍ର ଅରିନ୍ଦମ ବାଗଚୀ ପରାମର୍ଶ ଦେଇଛନ୍ତି । ଏୟାରବବଲ ରାଜିନାମା ଅନୁସାରେ ଅଧିକ ବିମାନ ଚଳାଚଳ କରିବକୁ ବ୍ୟବସ୍ଥା କରାଯାଇଥିବାବେଳେ କୋଭିଡ କଟକଣାକୁ ହଟାଇ ଦିଆଯାଇଛି । ତେଣେ ବୈଦେଶିକ ମନ୍ତ୍ରୀ ଏସ. ଜୟଶଙ୍କର ଜର୍ମାନୀ ଓ ଫ୍ରାନ୍ସ ଗସ୍ତରେ ଯାଇ ମ୍ୟୁନିକ ନିରାପତ୍ତା ସମ୍ମିଳନୀରେ ୟୁକ୍ରେନ ପରିସ୍ଥିତି ଓ ଭାରତର ଭୂମିକା ସମ୍ପର୍କରେ ବକ୍ତବ୍ୟ ରଖିବେ ବୋଲି ସୂଚନା ମିଳିଛି ।
ମାସେ ମଧ୍ୟରେ ଦ୍ୱିତୀୟ ଥର ଅଚଳ ହେଲା ଟ୍ୱିଟର, ସୁରକ୍ଷିତ ଅଛି ଲୋକଙ୍କ ଡାଟା
ନୂଆଦିଲ୍ଲୀ: ପୁଣି ଅଚଳ ହୋଇଗଲା ଟ୍ୱିଟର । ଦ୍ୱିତୀୟ ଥର ପାଇଁ ଅଚଳ ହୋଇଗଲା ଟ୍ୱିଟର । ସପ୍ତାହ ମଧ୍ୟରେ ଦ୍ୱିତୀୟ ଥର ପାଇଁଡାଉନ ହେଲା ଟ୍ୱିଟର ସର୍ଭର । ଭାରତ ସମେତ ଅନେକ ଦେଶରେ ଗୁରୁବାର ରାତି ୯ଟା ୪୧ ମିନିଟରୁ କିଛି ସମୟ ଲାଗି ଟ୍ୱିଟର ଅଚଳ ହୋଇଯାଇଥିଲା । ସର୍ଭର ଡାଉନ ହୋଇଯିବା ଯୋଗୁ ଏହି ସମସ୍ୟା ଉପୁଜିଥିବା ନେଇ କମ୍ପାନି ଦର୍ଶାଇଛି । ଟ୍ବିଟରକୁ ହ୍ୟାକ୍ କରିବା ଲାଗି ଉଦ୍ୟମ ହେବା ଯୋଗୁ ଏହି ଅବସ୍ଥା ସୃଷ୍ଟି ହୋଇଥିଲା । ତିନିଟି ମାର୍ଗ ଅର୍ଥାତ କ୍ରେଡିବିଲିଟି, ଇଣ୍ଟିଗ୍ରିଟି ଓ ଆଭେଲିବିଲିଟି ବା ସିଆଇଏ ଜରିଆରେ ଟ୍ବିଟରକୁ ହ୍ୟାକରମାନେ ଟାର୍ଗେଟ କରିଥିଲେ ।
ତେବେ ୟୁଜରମାନଙ୍କ ଆକାଉଣ୍ଟ ନିରାପଦ ରହିଥିବାବେଳେ ସେମାନଙ୍କ ତଥ୍ୟ ଲିକ୍ ହୋଇନାହିଁ ବୋଲି କହିଛି କମ୍ପାନୀ । ଗତ ଫେବ୍ରୁଆରୀ ୧୧ରେ ମଧ୍ୟ ଟ୍ୱିଟର ଅଚଳ ହୋଇଯାଇଥିଲା । ପ୍ରାୟ ଏକ ଘଣ୍ଟା ଧରି ମାଇକ୍ରୋବ୍ଲଗିଂ ସାଇଟ ଅଚଳ ହୋଇଯିବାରୁ ଭାରତ, ଆମେରିକା ସମେତ ଅନେକ ରାଷ୍ଟ୍ରରେ ୟୁଜର୍ସମାନେ ସମସ୍ୟାରେ ପଡ଼ିଥିଲେ ।
କୋଟିଆରେ ଚାଲିଛି ଗଣତନ୍ତ୍ରର ମହାପର୍ବ, ୧୩ଟି ବୁଥରେ ଭୋଟ ଦେଉଛନ୍ତି ଭୋଟର
କୋରାପୁଟ: ସାରା ରାଜ୍ୟରେ ଜାରି ରହିଛି ତ୍ରିସ୍ତରୀୟ ପଞ୍ଚାୟତ ନିର୍ବାଚନ । ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଆଜି ଜାରି ରହିଛି ଦ୍ୱିତୀୟ ପର୍ଯ୍ୟାୟ ମତଦାନ । ୩୦ ଜିଲ୍ଲାର ୬୮ ବ୍ଲକରେ ୧୮୬ ଜିଲ୍ଲା ପରିଷଦ ଆସନ ପାଇଁ ପଡ଼ୁଛି ଭୋଟ । ୧ ହଜାର ୫୧୪ ପଞ୍ଚାୟତର ୨୦ ହଜାରରୁ ଅଧିକ ବୁଥରେ ଆରମ୍ଭ ହୋଇଛି ମତଦାନ । ସକାଳ ୭ଟାରୁ ଭୋଟିଂ ଆରମ୍ଭ ହୋଇଥିବା ବେଳେ ଅପରାହ୍ନ ୧ଟା ପର୍ଯ୍ୟନ୍ତ ମତଦାନ ଚାଲିବ । କୋରାପୁଟର କୋଟିଆରେ ମଧ୍ୟ ଚାଲିଛି ଗଣତନ୍ତ୍ରର ମହାପର୍ବ । ଭୋଟ୍ ଦେଉଛନ୍ତି କୋଟିଆବାସୀ ।
ଆନ୍ଧ୍ରର ଷଡ଼ଯନ୍ତ୍ରକୁ ମାତ୍ ଦେଇ ନେତା ବାଛୁଛନ୍ତି ଜନତା । କୋଟିଆ ପଞ୍ଚାୟତର ୨୮ ଗାଁ’ରେ ମତଦାନ ସାବ୍ୟସ୍ତ କରୁଛନ୍ତି ଭୋଟର । ମୋଟ ୫ ହଜାର ୧୯୭ ଜଣ ଭୋଟରଙ୍କ ପାଇଁ ୧୩ଟି ବୁଥ ପ୍ରସ୍ତୁତ ହୋଇଛି । ସମସ୍ତ ବୁଥରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଜିଲ୍ଲା ପ୍ରଶାସନର ଫୋକସରେ ରହିଛି କୋଟିଆ । କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ନହେବା ପାଇଁ କୋଟିଆରେ ବ୍ୟାପକ ପୋଲିସ ଫୋର୍ସ ମୁତୟନ ଅଛନ୍ତି । ବରିଷ୍ଠ ଅଧିକାରୀମାନେ ମଧ୍ୟ କୋଟିଆକୁ ଯାଇ ସ୍ଥିତି ପରଖିଛନ୍ତି । ଅବାଧ, ମୁକ୍ତ ଓ ସୁରୁଖୁରୁରେ ନିର୍ବାଚନକୁ ଗୁରୁତ୍ବ ଦେଇଛି ପ୍ରଶାସନ । ସେପଟେ ଗତକାଲି ରାତ୍ରିରୁ ଆନ୍ଧ୍ରପ୍ରଦେଶ ସୀମା ସିଲ୍ କରିବା ସହିତ ସବୁ ଗାଡ଼ିକୁ ଯାଞ୍ଚ କରୁଛି ପ୍ରଶାସନ ।
ଆଜି ଭାରତ- ଓ୍ବେଷ୍ଟଇଣ୍ଡିଜ ଦ୍ବିତୀୟ ଟି-୨୦, ମ୍ୟାଚ ଜିତି ସିରିଜ୍ ଜିତିବା ଲକ୍ଷ୍ୟରେ ଟିମ୍ ଇଣ୍ଡିଆ
କୋଲକାତା: ଭାରତ ଓ ଓ୍ୱେଷ୍ଟଇଣ୍ଡିଜ୍ ମଧ୍ୟରେ କୋଲକାତାର ଇଡେନ ଗାର୍ଡେନରେ ଚାଲିଛି ଟି-୨୦ ସିରିଜ୍ । ଇଡେନ ଗାର୍ଡେନରେ ଖେଳାଯାଇଥିବା ପ୍ରଥମ ମ୍ୟାଚରେ ଟିମ୍ ଇଣ୍ଡିଆ ୬ ଓ୍ୱିକେଟରେ ନିଜ ନାମରେ କରିଛି । ଯାହା ଫଳରେ ଭାରତ ଏହି ସିରିଜରେ ୧-୦ରେ ଆଗୁଆ ରହିଛି । ପ୍ରଥମ ମ୍ୟାଚରେ ବିଜୟ ପରେ ଆଜି ଏହି ଦୁଇ ଦଳ ମଧ୍ୟରେ ଖେଳାଯିବ ଦ୍ୱିତୀୟ ଟି-୨୦ । କୋଲକାତାର ଇଡେନ ଗାର୍ଡେନରେ ସନ୍ଧ୍ୟା ୭ଟାରୁ ଆରମ୍ଭ ହେବ ଏହି ମ୍ୟାଚ୍ । ଆଜିର ମ୍ୟାଚ୍ ଜିତି ସିରିଜ କବଜା କରିବାକୁ ଉଦ୍ୟମ କରିବ ମେନ ଇନ୍ ବ୍ଲୁ ।
କ୍ୟାପଟେନ ରୋହିତ ଶର୍ମାଙ୍କ ନେତୃତ୍ବରେ ଭାରତ ପଡ଼ିଆକୁ ଓହ୍ଲାଇବ । ଇଶାନ କିଶନ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ଋଷବ ପନ୍ଥ ଦଳରେ ସାମିଲ ହୋଇଛନ୍ତି । ସେପଟେ ଦିନିକିଆ ପରେ ଟି-୨୦ରେ ଆରମ୍ଭରୁ ପରାଜିତ ହୋଇ ବ୍ୟାକଫୁଟରେ ରହିଛି ଓ୍ବେଷ୍ଟଇଣ୍ଡିଜ । ତେବେ ମନୋବଳ ଦୃଢ଼ କରି ସିରିଜକୁ ଫେରବା ଲକ୍ଷ୍ୟରେ ଲଢେଇ କରିବ ଇଣ୍ଡିଜ୍ ।
ତେବେ ଆଜି ଖେଳାଯିବାକୁ ଥିବା ଦ୍ୱିତୀୟ ଟି-୨୦ ଅଧିନାୟକ ରୋହିତ ଶର୍ମା ଓ ପୂର୍ବ ଅଧିନାୟକ ବିରାଟ କୋହଲିଙ୍କ ପାଇଁ ବେଶ୍ ଗୁରୁତ୍ୱପୂର୍ଣ୍ଣ । କାହିଁକି ନା ଟି-୨୦ରେ ସର୍ବାଧିକ ରନ ସ୍କୋର କରିବା ରେସରେ ଏବେ ତିନି ଜଣ ଖେଳାଳି ରହିଛନ୍ତି । ଯେଉଁଥିରେ ଭାରତର ଉଭୟ ରୋହିତ ଓ ବିରାଟ ଅଛନ୍ତି । ଯଦିଓ ଏହି ରେସରେ ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନ ମାର୍ଟିନ ଗପ୍ଟିଲ ପ୍ରଥମ ସ୍ଥାନରେ ଅଛନ୍ତି । କିନ୍ତୁ ଓ୍ୱେଷ୍ଟଇଣ୍ଡିଜ୍ ବିପକ୍ଷରେ ଖେଳାଯିବାକୁ ଥିବା ଦ୍ୱିତୀୟ ଟି-୨୦ରେ ରୋହିତ ଶର୍ମା ଓ ବିରାଟ କୋହଲି ଗପ୍ଟିଲଙ୍କ ପଛରେ ପକାଇ ଶୀର୍ଷ ପହଞ୍ଚିବା ପାଇଁ ସୁଯୋଗ ରହିଛି ।
ଟିମ୍ ଇଣ୍ଡିଆର ସମ୍ଭାବ୍ୟ ଚୁଡ଼ାନ୍ତ ଏକାଦଶ:
ଇଶାନ କିଶନ, ରୋହିତ ଶର୍ମା (ଅଧିନାୟକ), ବିରାଟ କୋହଲି, ସୂର୍ଯ୍ୟକୁମାର ଯାଦବ, ଋଷଭ ପନ୍ତ (ଓ୍ବିକେଟ୍ କିପର), ଭେଙ୍କଟେଶ ଆୟର, ଦୀପକ ଚହର, ଭୁବନେଶ୍ୱର କୁମାର, ହର୍ଷଲ ପଟେଲ, ରବି ବିଷ୍ଣୋୟୀ ଏବଂ ୟୁଜବେନ୍ଦ୍ର ଚହଲ
ଓ୍ବେଷ୍ଟଇଣ୍ଡିଜ୍ର ସମ୍ଭାବ୍ୟ ଚୁଡାନ୍ତ ଏକାଦଶ:
ବ୍ରେଣ୍ଡନ୍ କିଙ୍ଗସ, କାଇଲ୍ ମେୟର୍ସ, ନିକୋଲସ୍ ପୁରନ (ଓ୍ବିକେଟ୍ କିପର), ରୋଭମାନ ପାୱେଲ, କିରନ୍ ପୋଲାର୍ଡ (ଅଧିନାୟକ), ରୋଷ୍ଟନ୍ ଚେଜ୍, ଜେସନ୍ ହୋଲଡର, ରୋମାରିୟୋ ସେଫର୍ଡ, ଅକୀଲ ହୁସେନ୍, ଓଡିୟନ୍ ସ୍ମିଥ ଏବଂ ଫାବିୟନ୍ ଏଲେନ