ଗୁଜରାଟରୁ ତିନି ଆତଙ୍କବାଦୀ ଗିରଫ, ଭାରତର ତିନୋଟି ସହର ଥିଲା ଟାର୍ଗେଟରେ
ନନ୍ଦିଘୋଷ ବ୍ୟୁରୋ: ଗୁଜରାଟ ଏଟିଏସ ଓ କେନ୍ଦ୍ରୀୟ ସୁରକ୍ଷା ଏଜେନ୍ସି ମିଳିତ ଭାବେ ତିନି ଜଣ ଆତଙ୍କବାଦୀଙ୍କୁ ଗିରଫ କରିଛନ୍ତି । ଏହି ଗିରଫଦାରୀ ପରେ ବଡ଼ ଖୁଲାସା ହୋଇଛି । ଗିରଫ ଆତଙ୍କବାଦୀଙ୍କ ମଧ୍ୟରେ ଚୀନରେ ଏମବିବିଏସ କରିଥିବା ୩୫ ବର୍ଷିୟ ଡକ୍ତର ଅହମ୍ମଦ ମୋହିଉଦ୍ଦିନ ସୟଦ ରହିଛି । ଯିଏ ଆଇଏସକେପି ସହ ଜଡ଼ିତ ବିଦେଶରେ ବସିଥିବା କଟ୍ଟରପନ୍ଥିଙ୍କ ସମ୍ପର୍କରେ ଥିଲା । ଅହମ୍ମଦ ସହ ତା’ର ଦୁଇ ସହଯୋଗୀ ମହମ୍ମଦ ସୁହେଲ ଏବଂ ଆଜାଦ ସେଫି ଗିରଫ ହୋଇଛନ୍ତି । ଏସଟିଏଫ ଅନୁସାରେ ଏମାନେ ଅହମ୍ମଦାବାଦ, ଲକ୍ଷ୍ନୌ ଓ ଦିଲ୍ଲୀରେ ଆତଙ୍କବାଦୀ ଆକ୍ରମଣ କରିବାକୁ ପ୍ରସ୍ତୁତି ଚଲାଇଥିଲେ । ଏମାନଙ୍କ ଉପରେ ଦୀର୍ଘ ସମୟ ଧରି ଭାରତୀୟ ସୁରକ୍ଷା ଏଜେନ୍ସ ନଜର ରଖିଥିଲେ ।
ଗୁଜରାଟ ଏସଟିଏଫ ଅନୁସାରେ, ତିନି ଆତଙ୍କବାଦୀଙ୍କ ଉପରେ ପ୍ରାୟ ଏକ ବର୍ଷ ହେବ ନଜର ରଖାଯାଇଥିଲା । ଲଗାତାର ସେମାନଙ୍କ ଲୋକେସନ ଟ୍ରାକ କରାଯିବା ସହ ପ୍ରତି ମୁଭମେଣ୍ଟ ଉପରେ ନଜର ରଖାଯାଇଥିଲା । ଏମାନେ ଆଇଏସଆଇଏସର ଆଇସିକେପି ସହ ଜଡିତ ଦୁଇଟି ଭିନ୍ନ ମଡ୍ୟୁଲର ସଦସ୍ୟ ବୋଲି କୁହାଯାଉଛି । ଏସିଏସ ଡିଆଇଜି ସୁନୀଲ ଜୋଶୀଙ୍କ ଅନୁସାରେ, ମହମ୍ମଦ ମୋହିଉଦ୍ଦିନକୁ ନେଇ ସାଙ୍ଘାତିକ ଇନପୁଟ ମିଳିବାରେ ଲାଗିଛି । ସେ କଟ୍ଟରପନ୍ଥି ଗତିବିଧିରେ ସାମିଲ ଥିଲେ । ତେଣୁ ତାଙ୍କ ଗତିବିଧି ଉପରେ ନଜର ରଖାଯାଇଥିଲା ।
କାରରୁ ଧରାପଡ଼ିଲା ମୋହିଉଦ୍ଦିନ, ନେଉଥିଲା ବିଷାକ୍ତ ରସାୟନ
ଦୁଇଦିନ ପୂର୍ବରୁ ମୋହିଉଦ୍ଦିନକୁ ଏଟିଏସ ଅଡାଲଜ ଟୋଲ ଭେଟ ପାଖରୁ ଧରିଥିଲା । ଏହି ସମୟରେ ସେ କାରରେ ମାରଣାସ୍ତ୍ର ଓ ବିଷାକ୍ତ କେମିକାଲ ସାଙ୍ଗରେ ନେଇ ଯାଉଥିଲା । ପଚରାଉଚରାରୁ ଜଣାପଡ଼ିଥିଲା ବିଦେଶରେ ଥିବା ଆଇଏସକେପିର ସଦସ୍ୟଙ୍କ ସମ୍ପର୍କରେ ଥିଲା ମୋହିଉଦ୍ଦିନ । ଅନ୍ୟ ଗିରଫ ଆତଙ୍କବାଦୀଙ୍କ ସହ ମିଶି ସେ ଆକ୍ରମଣର ଷଡଯନ୍ତ୍ର କରୁଥିଲା । ଏମାନେ ଅହମ୍ମଦାବାଦ, ଲକ୍ଷ୍ନୌ ଓ ଦିଲ୍ଲୀରେ ରେକି କରିଥିଲେ । କୌଣସି ବଡ଼ ଧରଣର ଆକ୍ରମଣ ପାଇଁ ଏମାନେ ବ୍ଲ୍ୟୁ-ପ୍ରିଣ୍ଟ ପ୍ରସ୍ତୁତ କରିବା ଯୋଜନାରେ ଥିଲେ ।
ସାୟନାଇଡଠାରୁ ଭୟଙ୍କର କେମିକାଲ ତିଆରି କରୁଥିଲେ
ଏଟିଏସ ଅନୁସାରେ ତିନି ଆତଙ୍କବାଦୀ ରାୟଜିନ ନାମକ ଏକ ବହୁତ ବିଷାକ୍ତ କେମିକାଳ ତିଆରି କରୁଥିଲେ । ଏହା ସାୟନାଇଡଠାରୁ ବି ଅଧିକ ଭୟଙ୍କର । ଏହାର ଳ୍ପ ମାତ୍ର ବ୍ୟବହାର କରି ବହୁ ସଂଖ୍ୟାରେ ଧନଜୀବନ ହାନୀ କରାଯାଇ ପାରିଥାନ୍ତି । ଏହାକୁ ବନାଇବା ପରେ କେମିତି ଏହାକୁ ବ୍ୟବହାର କରିଥାନ୍ତେ ତା’ର ଯାଞ୍ଚ ଜାରି ରହିଛି । ପଚରାଉଚରାରୁ ଏହା ମଧ୍ୟ ଜଣାପଡ଼ିଛି, ଆତଙ୍କବାଦୀଙ୍କ ପାଖରୁ ଜବତ ଅସ୍ତ୍ରଶସ୍ତ୍ର ସେମାନେ ରାଜସ୍ଥାନର ହନୁମାନଗଡ଼ରୁ ମଗାଇଥିଲେ ।ଏମାନେ ଗୁଜରାଟରେ ଅସ୍ତ୍ରଶସ୍ତ୍ର ବଦଳାଇବାକୁ ଯାଇଥିବା ବେଳେ ଏଟିଏସ ସେମାନଙ୍କୁ କାବୁ କରି ନେଇଥିଲା । କାରଣ, ଏଟିଏସ୍ ଏମାନଙ୍କ ଗତିବିଧି ଉପରେ ନଜର ରଖିଥିଲା ।
