ନନ୍ଦିଘୋଷ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦୁଇ ଦିନିଆ ଚୀନ ଗସ୍ତରେ ଅଛନ୍ତି। ସେଠାରେ ସେ ଚୀନ ରାଷ୍ଟ୍ରପତି ଶି ଜିନପିଙ୍ଗଙ୍କ ସହ ଏକ ଘଣ୍ଟା ଧରି ବୈଠକ କରିଛନ୍ତି। ଏହି ବୈଠକରେ ସୀମାରେ ଶାନ୍ତି ଓ ସ୍ଥିରତା ଉପରେ ଗୁରୁତ୍ବ ଦିଆଯାଇଛି। ଉଭୟ ନେତା ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବା ନେଇ ଆଲୋଚନା କରିଛନ୍ତି। ଚୀନ ରାଷ୍ଟ୍ରପତି ମୋଦୀଙ୍କ ଚୀନ ଗସ୍ତ ପାଇଁ ଖୁସି ପ୍ରକାଶ କରିଛନ୍ତି ଏବଂ କହିଛନ୍ତି ଯେ ଡ୍ରାଗନ ଓ ହାତୀର ଏକତ୍ର ହେବା ଜରୁରୀ।
ସାତ ବର୍ଷ ପରେ ମୋଦୀ ଓ ଜିନପିଙ୍ଗଙ୍କ ମଧ୍ୟରେ ଏହି ବୈଠକ ହୋଇଛି। ଏହା ଉପରେ ସମଗ୍ର ବିଶ୍ୱର ନଜର ରହିଛି। ଆମେରିକାର ଟାରିଫ ମଧ୍ୟରେ ଭାରତ ଓ ଚୀନର ନିକଟତା ଉପରେ ବିଶ୍ୱର ଦୃଷ୍ଟି ରହିଛି।
ତିଆନଜିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଚୀନ ରାଷ୍ଟ୍ରପତି ଶି ଜିନପିଙ୍ଗଙ୍କ ମଧ୍ୟରେ ଦ୍ୱିପାକ୍ଷିକ ବୈଠକ ପ୍ରାୟ ଏକ ଘଣ୍ଟା ଧରି ଚାଲିଥିଲା। ଏହି ବୈଠକରେ ଅନେକ ପ୍ରସଙ୍ଗ ଉପରେ ଉପରେ ଆଲୋଚନା ହୋଇଥିବା ସମ୍ଭାବନା ରହିଛି। ପ୍ରଧାନମନ୍ତ୍ରୀଙ୍କ ସହ ବୈଦେଶିକ ସଚିବ ବିକ୍ରମ ମିଶ୍ରୀ ଏବଂ ଜାତୀୟ ସୁରକ୍ଷା ଉପଦେଷ୍ଟା ଅଜିତ ଡୋଭାଲ ମଧ୍ୟ ଉପସ୍ଥିତ ଥିଲେ।
ଚୀନ ରାଷ୍ଟ୍ରପତି ଶି ଜିନପିଙ୍ଗଙ୍କ ସହ ବୈଠକରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି, “ଗତ ବର୍ଷ କଜାନରେ ଆମର ବୈଠକ ଅତ୍ୟନ୍ତ ଉପଯୋଗୀ ଥିଲା, ଯାହା ଆମ ସମ୍ପର୍କକୁ ଏକ ସକାରାତ୍ମକ ଦିଗ ଦେଇଛି। ସୀମାରେ ସୈନ୍ୟ ପ୍ରତ୍ୟାହାର ପରେ ଶାନ୍ତି ଓ ସ୍ଥିରତାର ମାହୋଲ ସୃଷ୍ଟି ହୋଇଛି।”
ବୈଠକରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଆମ ସମ୍ପର୍କ ଏକ ସକାରାତ୍ମକ ଦିଗ ପାଇଛି। ସୈନ୍ୟ ପ୍ରତ୍ୟାହାର ପରେ ମଧ୍ୟ ସୀମାରେ ଶାନ୍ତି ଓ ସ୍ଥିରତା ରହିଛି। କୈଲାସ ମାନସରୋବର ଯାତ୍ରା ପୁଣି ଆରମ୍ଭ ହୋଇଛି। ଏହା ସହ ୨.୮ ବିଲିୟନ ଲୋକ ଜଡ଼ିତ ଏବଂ ଏହାର ଲାଭ ସମଗ୍ର ମାନବଜାତିକୁ ମିଳିବ। ଏସସିଓର ସଫଳତା ପାଇଁ ମୁଁ ଅଭିନନ୍ଦନ ଜଣାଉଛି। ଉଭୟ ଦେଶ ମଧ୍ୟରେ ସିଧାସଳଖ ବିମାନ ସେବା ଆରମ୍ଭ ହେବା ଉଚିତ।
ପ୍ରଧାନମନ୍ତ୍ରୀ ମୋଦୀଙ୍କୁ ଭେଟି ଶି ଜିନପିଙ୍ଗ କହିଛନ୍ତି, “ପ୍ରଧାନମନ୍ତ୍ରୀ ମୋଦୀ, ଆପଣଙ୍କୁ ଭେଟି ଖୁସି ଲାଗୁଛି। ମୁଁ ଏସସିଓ ଶିଖର ସମ୍ମିଳନୀ ପାଇଁ ଚୀନକୁ ଆପଣଙ୍କୁ ସ୍ୱାଗତ କରୁଛି। ଗତ ବର୍ଷ କଜାନରେ ଆମର ସଫଳ ବୈଠକ ହୋଇଥିଲା।” ପ୍ରଧାନମନ୍ତ୍ରୀ ମୋଦୀ ଓ ଚୀନ ରାଷ୍ଟ୍ରପତିଙ୍କ ମଧ୍ୟରେ ପ୍ରାୟ ଏକ ଘଣ୍ଟା ଧରି ଆଲୋଚନା ହୋଇଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାତ ବର୍ଷ ପରେ ଚୀନ ଗସ୍ତରେ ଯାଇଛନ୍ତି। ୨୦୨୦ ମସିହା ଜୁନରେ ଗଲୱାନ ଉପତ୍ୟକାରେ ହୋଇଥିବା ସଂଘର୍ଷ ପରେ ଭାରତ ଓ ଚୀନ ମଧ୍ୟରେ ସମ୍ପର୍କ ବହୁତ ଖରାପ ହୋଇଯାଇଥିଲା। ତେବେ ସାମ୍ପ୍ରତିକ ସମୟରେ ଭାରତ ଓ ଚୀନ ମଧ୍ୟରେ ସମ୍ପର୍କକୁ ପୁଣି ଠିକ କରିବା ପାଇଁ ପ୍ରୟାସ ଜାରି ରହିଛି। ଏହି ଗସ୍ତର ଉଦ୍ଦେଶ୍ୟ ଉଭୟ ଦେଶ ମଧ୍ୟରେ ସୀମା ବିବାଦକୁ କମ କରିବା ମଧ୍ୟ ରହିଛି।
ସାତ ବର୍ଷ ପରେ ଚୀନରେ ତିଆନଜିନ ବିମାନବନ୍ଦରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସ୍ୱାଗତ ପାଇଁ ରେଡ କାର୍ପେଟ ବିଛାଯାଇଥିଲା। ବିମାନବନ୍ଦରରେ ପାରମ୍ପରିକ ନୃତ୍ୟ ସହ ତାଙ୍କୁ ସ୍ୱାଗତ କରାଯାଇଥିଲା। ଟ୍ରମ୍ପଙ୍କ ତରଫରୁ ଭାରତ ଉପରେ ୫୦%, ଚୀନ ଉପରେ ୩୦%, କଜାକିସ୍ତାନ ଉପରେ ୨୫% ଏବଂ ଅନ୍ୟ ଏସସିଓ ଦେଶମାନଙ୍କ ଉପରେ ଉଚ୍ଚ ଟାରିଫ ଲଗାଯାଇଛି। ଏହି ପରିପ୍ରେକ୍ଷୀରେ ଏସସିଓ ବୈଠକରେ ଟାରିଫ ନେଇ ମଧ୍ୟ ଆଲୋଚନା ହୋଇପାରେ।