ନନ୍ଦିଘୋଷ ବ୍ୟୁରୋ : ଦିଲ୍ଲୀରେ କର୍ଣ୍ଣାଟକର ଦୁଇ ହେଭିୱେଟ ମୁଖ୍ୟମନ୍ତ୍ରୀ ସିଦ୍ଦରମୈୟା ଓ ଉପମୁଖ୍ୟମନ୍ତ୍ରୀ ଡିକେ ଶିବ କୁମାର। ଉଭୟଙ୍କୁ ଡାକିଛନ୍ତି ହାଇକମାଣ୍ଡ । କଂଗ୍ରେସ ସଭାପତି ମଲ୍ଲିକାର୍ଜୁନଙ୍କ ବାସଭବନରେ ହେବ ବୈଠକ। ନିଜେ ରାହୁଲ ଗାନ୍ଧି ମଧ୍ୟ ଉପସ୍ଥିତ ରହିବେ। ନିଜ ନିଜର ସମର୍ଥକଙ୍କ ସହିତ ଶିବ କୁମାର ଓ ସିଦ୍ଦରମୈୟା ଦିଲ୍ଲୀରେ ପହଞ୍ଚିଛନ୍ତି। ଏହି ଦୁଇ ନେତାଙ୍କ ସହିତି ଆଲୋଚନା କରିବେ ହାଇକମାଣ୍ଡ। କର୍ନାଟକରେ ନେତୃତ୍ଵ ପରିବର୍ତ୍ତନ ନେଇ ଚର୍ଚ୍ଚା ଲାଗି ରହିଛି। ବଦଳିବେ କି ମୁଖ୍ୟମନ୍ତ୍ରୀ, ଏହି ପ୍ରଶ୍ନ ବେଶ୍ କିଛି ଦିନ ହେଲା ଉଠୁଛି। ସିଦ୍ଦରମୈୟାଙ୍କୁ ହଟାଇ ଶିବ କୁମାରଙ୍କୁ ମୁଖ୍ୟମନ୍ତ୍ରୀ କରାଯିବ ବୋଲି ଚର୍ଚ୍ଚା ହେଉଛି। ଏଥିପାଇଁ ଦୁଇ ଜଣଙ୍କୁ ଦିଲ୍ଲୀ ଡକା ଯାଇଛି। ସିଏମ୍ ଚୌକିକୁ ନେଇ ଦୁଇ ନେତାଙ୍କ ମଧ୍ୟରେ ବହୁ ଦିନରୁ ଚାଲିଛି ଛକାପଞ୍ଝା। ଦେଖିବାକୁ ଗଲେ କର୍ଣ୍ଣାଟକରେ କଂଗ୍ରେସ ସରକାର ଗଠନ ଦିନରୁ ହିଁ ଉଭୟଙ୍କ ମଧ୍ୟରେ ଚାଲିଛି ଛକାପଞ୍ଝା। ପରିସ୍ଥିତିରେ ପଡ଼ି ସ୍ଵଚ୍ଛ ଭାବମୂର୍ତ୍ତି ପାଇଁ କଂଗ୍ରେସ ସିଦ୍ଦରମୈୟାଙ୍କୁ ସିଏମ୍ କରିଥିଲା। କିନ୍ତୁ ଶିବ କୁମାରଙ୍କ ନେତୃତ୍ଵରେ ହିଁ ଦଳ ସେଠାରେ ନିର୍ବାଚନ ଲଢିଥିଲା। ଦଳକୁ ଜିତାଇବାରେ ତାଙ୍କର ବଡ଼ ଭୂମିକା ଥିଲା। କିନ୍ତୁ ତାଙ୍କ ବିରୋଧରେ ଇଡି ଲାଗିଥିବାରୁ ଓ ନାନା ଆଇନଗତ ମାମଲା ଥିବାରୁ ତାଙ୍କୁ କଂଗ୍ରେସ ସେତେବେଳେ ସିଏମ୍ କରିନଥିଲା। କିନ୍ତୁ ସେ ମାନୁ ନାହାନ୍ତି। ସିଏମ୍ ହେବା ନିଶା ତାଙ୍କୁ ଏତେ ଘାରିଛି ଯେ, ଏହାକୁ ନେଇ ଦଳରେ ଲାଗି ରହିଛି କନ୍ଦଳ। ତାର ସମାଧାନ ପାଇଁ ସିଦ୍ଦରମୈୟା ଓ ଶିବକୁମାରଙ୍କୁ ଦିଲ୍ଲୀ ଡାକିଛନ୍ତି ହାଇକମାଣ୍ଡ।
ପୁରୀରେ ହେବ ବ୍ରିକ୍ସ ରାଷ୍ଟ୍ର ସମୂହର ଦ୍ଵିତୀୟ ବୈଷୟିକ ସମ୍ମିଳନୀ ; ଜୁନ ୩ ରୁ ୫ ତାରିଖ ପର୍ଯ୍ୟନ୍ତ ଚାଲିବ
ନନ୍ଦିଘୋଷ ବ୍ୟୁରୋ : ପୁରୀରେ ହେବ ବ୍ରିକ୍ସ ରାଷ୍ଟ୍ର ସମୂହର ଦ୍ଵିତୀୟ ବୈଷୟିକ ସମ୍ମିଳନୀ। ଆସନ୍ତା ଜୁନ ୩ ରୁ ୫ ତାରିଖ ପର୍ଯ୍ୟନ୍ତ ପୁରୀରେ ଏହି ସମ୍ମିଳନୀ ଅନୁଷ୍ଠିତ ହେବ। ସମ୍ମିଳନୀରେ ବ୍ରିକ୍ସ ଦେଶର ପ୍ରତିନିଧି ଓ ବିଶେଷଜ୍ଞମାନେ ଯୋଗଦେଇ ବିପର୍ଯ୍ୟୟ ପରିଚାଳନା, ପ୍ରତିରୋଧ କ୍ଷମତା ବୃଦ୍ଧି ଏବଂ ଅନ୍ତର୍ଜାତୀୟ ସହଯୋଗ ସମ୍ପର୍କିତ ବିଭିନ୍ନ ପ୍ରସଙ୍ଗରେ ଆଲୋଚନା କରିବେ । ବ୍ରିକ୍ସ ସଦସ୍ୟ ହେଉଛନ୍ତି ଭାରତ, ରୁଷିଆ, ଚୀନ, ବ୍ରାଜିଲ୍ ଓ ଦକ୍ଷିଣ ଆଫ୍ରିକା। ଏହି ସମ୍ମିଳନୀରେ ଏହି ସବୁ ଦେଶର ପ୍ରତିନିଧି ଯୋଗ ଦେବେ। ଓଡ଼ିଶାକୁ ଏହି ଗୁରୁତ୍ୱପୂର୍ଣ୍ଣ ବୈଷୟିକ ବୈଠକର ଆୟୋଜକ ଭାବେ ଚୟନ କରାଯାଇଥିବାର ପ୍ରଚ୍ଛଦରେ ରହିଛି ବିପର୍ଯ୍ୟୟ ପ୍ରସ୍ତୁତି ଓ ପରିଚାଳନା କ୍ଷେତ୍ରରେ ରାଜ୍ୟର ସକ୍ରିୟ, ସଫଳ ଏବଂ ସୁଦୃଢ଼ ପଦକ୍ଷେପ । ବିଶେଷକରି ବାତ୍ୟା ପରିଚାଳନା, ଗୋଷ୍ଠୀ-ଭିତ୍ତିକ ପୂର୍ବ ସଚେତନତା ବ୍ୟବସ୍ଥା ଏବଂ ସଫଳ ଉଦ୍ଧାର ଓ ସ୍ଥାନାନ୍ତରଣ କୌଶଳ ନିମନ୍ତେ ଓଡିଶା ଅନ୍ତର୍ଜାତୀୟସ୍ତରରେ ପ୍ରଶଂସିତ ହୋଇଆସିଛି । ଏହି ବୈଷୟିକ ସମ୍ମିଳନୀ ମାଧ୍ୟମରେ BRICS ଦେଶମାନଙ୍କ ମଧ୍ୟରେ ବିପର୍ଯ୍ୟୟ ପରିଚାଳନା ସମ୍ବନ୍ଧୀୟ ଜ୍ଞାନ-ବିନିମୟ, ନୂତନ ପ୍ରଯୁକ୍ତି ଓ ସମନ୍ୱିତ କାର୍ଯ୍ୟପଦ୍ଧତି ଉପରେ ଆଲୋଚନା ହେବା ସହିତ ପାରସ୍ପରିକ ସହଯୋଗ ଆହୁରି ସୁଦୃଢ଼ ହେବ ବୋଲି ଆଶା କରାଯାଉଛି l ଏହି ପରିପ୍ରେକ୍ଷୀରେ BRICS ରାଷ୍ଟ୍ରସମୂହଙ୍କୁ ନେଇ ଏପରି ଏକ ବୈଷୟିକ ସମ୍ମିଳନୀ ପୁରୀଠାରେ ଅୟୋଜିତ ହେବା ଓଡ଼ିଶାର ବିପର୍ଯ୍ୟୟ ପରିଚାଳନା କ୍ଷେତ୍ରରେ ସଫଳତା ଓ ଦକ୍ଷତାକୁ ଅନ୍ତର୍ଜାତୀୟସ୍ତରରେ ପ୍ରଚାରିତ କରିବା ସହ ବିଶ୍ବସ୍ତରରେ ଓଡ଼ିଶାର ଛବିକୁ ଆହୁରି ସମୃଦ୍ଧ କରିବ।
ବହୁଚର୍ଚ୍ଚିତ ପ୍ଲଟ ବ୍ୟବସାୟୀ ସୁଧୀର ପାତ୍ର ଅପହରଣ ଓ ହତ୍ୟା ମାମଲା ; ସରୋଜ ପଣ୍ଡାଙ୍କୁ ପୁଲିସର ଏନକାଉଣ୍ଟର
ନନ୍ଦିଘୋଷ ବ୍ୟୁରୋ : ବହୁଚର୍ଚ୍ଚିତ ପ୍ଲଟ ବ୍ୟବସାୟୀ ସୁଧୀର ପାତ୍ର ଅପହରଣ ଓ ହତ୍ୟା ମାମଲାରେ ପୋଲିସର ଏନକାଉଣ୍ଟର । ଫେରାର ଅଭିଯୁକ୍ତ ବଡ଼ଗଡ଼ ଥାନା ଅନ୍ତର୍ଗତ ନଉଗାଁର ରଞ୍ଜନ ମଲ୍ଲିକ ଓ ହିଞ୍ଜିଳିକାଟୁ ଥାନା ଅନ୍ତର୍ଗତ ସିକିରି ପାଢ଼ୀ ସାହିର ସରୋଜ ପଣ୍ଡାଙ୍କୁ ପୋଲିସ ଏନକାଉଣ୍ଟର କରିଛି ବ୍ରହ୍ମପୁର ପୋଲିସ । ଆହତ ଅଭିଯୁକ୍ତଙ୍କୁ ଚିକିତ୍ସା ନିମନ୍ତେ ବ୍ରହ୍ମପୁର ବଡ଼ ମେଡିକାଲରେ ଭର୍ତ୍ତି କରାଯାଇଛି । ଗତକାଲି ପୋଲିସ ରାଜସ୍ଥାନରୁ ରଞ୍ଜନ, ସରୋଜଙ୍କ ସମେତ ଆଉ ଦୁଇ ଜଣଙ୍କୁ ଟ୍ରାଞ୍ଜିଟ ରିମାଣ୍ଡରେ ଆଣୁଥିଲା । ଏହି ସମୟରେ ସଦର ଥାନା ଅନ୍ତର୍ଗତ ରତ୍ନପୁର ଠାରେ ଏମାନେ ରାତି ପ୍ରାୟ ୧୨ ଟାରେ ପରିସ୍ରା ଯିବା ପାଇଁ କହିଥିଲେ । ଜଣେ ASI ଓ କନେଷ୍ଟବଳ ଓହ୍ଲାଇ ଥିଲେ । ସେହି ସମୟରେ ପୋଲିସ କବଜାରୁ ଚମ୍ପଟ ମାରିବାକୁ ଚେଷ୍ଟା କରିଥିଲେ ଦୁଇ ଅଭିଯୁକ୍ତ । ପୋଲିସର ସର୍ଭିସ ରିଭଲଭର୍ ନେଇ ପୋଲିସ ଉପରକୁ ଫାୟାରିଙ୍ଗ କରିବା ପରେ ପୋଲିସ ଏନକାଉଣ୍ଟର କରିଥିଲା । ପୋଲିସ ଗୁଳିରେ ରଞ୍ଜନ ମଲ୍ଲିକ ଓ ସରୋଜ ପଣ୍ଡାଙ୍କ ଗୋଡରେ ଆଘାତ ଲାଗିଛି । ଅଭିଯୁକ୍ତମାନେ ସୁଧୀର ପାତ୍ର ହତ୍ୟା ମାମଲାରେ ସୂର୍ଯ୍ୟ ପ୍ରତାପ ସିଂହ ଓରଫ ଗୋଲୁ ସହ ମିଶି ହତ୍ୟା କରିଥିଲେ । ସୁଧୀରଙ୍କ ଝିଆରୀ ନିବେଦିତା ତାଙ୍କ ପ୍ରେମିକ କାଳୁ ପ୍ରଧାନଙ୍କୁ ହତ୍ୟା ଯୋଜନା କହିଥିଲେ । କାଳୁ ଏହି ଦୁହିଁଙ୍କ ସହ ମିଶି ସୂର୍ଯ୍ୟ ପ୍ରତାପ ସିଂହ ଗୋଲୁକୁ ପୁରା ହତ୍ୟା ଯୋଜନା ରଚିଥିଲା । ସେଥିରେ ସୁରଟର ସୁମିତ୍ ସିଂ, ଗଞ୍ଜାମର ମୁକେଶ ସାହୁଙ୍କ ସମେତ ରଞ୍ଜନ ଓ ସରୋଜ ସାମିଲ ଥିଲେ। ସୁରଟରେ ରଞ୍ଜନ, ସୂରଜ ଗଞ୍ଜେଇ ଚାଲାଣ ମାମଲାରେ ଗିରଫ ହୋଇଥିଲେ । ପରେ ସେଠାରେ ଜେଲରେ ଅନ୍ୟ ଅଭିଯୁକ୍ତ ଙ୍କ ସହ ମିଶିଥିଲେ । ପୋଲିସ ଗୋଲୁକୁ ଗିରଫ କରିଥିଲେ ସୁଦ୍ଧା ଏମାନେ ସୁଯୋଗ ଦେଖି ଫେରାର ହୋଇଯାଇଥିଲେ । ରାଜସ୍ଥାନରେ ଏମାନେ ଥିବା ଖବର ପାଇ ପୋଲିସ ରାଜସ୍ଥାନରେ ଚଢ଼ାଉ କରି ଗିରଫ କରିଥିଲା ।
ଗତକାଲି ମଙ୍ଗଳା ବେହେରାଙ୍କ ଆକ୍ରମଣକାରୀ ତଥା ମୁଖ୍ଯ ଅଭିଯୁକ୍ତ ଜଗା ସାହୁ ଓରଫ ଜଗନ୍ନାଥ ପୋଲିସ ଗୁଳିରେ ଆହତ ହୋଇଛି । ଏହାକୁ ମିଶାଇ ବ୍ରହ୍ମପୁର ପୋଲିସ ଜିଲ୍ଲାରେ ଏନାକାଉଣ୍ଟର ସଂଖ୍ୟା ୪ରେ ପହଞ୍ଚିଛି । ଗତକାଲି ଆହତ ମଙ୍ଗଳା ବେହେରାଙ୍କ ଆକ୍ରମଣକାରୀ ତଥା ଅଭିଯୁକ୍ତ ଜଗା ସାହୁ ଓରଫ ଜଗନ୍ନାଥକୁ ଏନକାଉଣ୍ଟର କରିଥିଲା ପୋଲିସ । ଅଭିଯୁକ୍ତ ଜଗା ବାଉରୀ ସୁକୁଣ୍ଡାରେ ଥିବା ସୁରାକ ପାଇ ପୋଲିସ ଟିମ ଚଢ଼ାଉ କରି ଜଗାକୁ ଏନକାଉଣ୍ଟର କରିଥିଲା । ସେହିପରି ଗତ ୨୧ ତାରିଖରେ ବ୍ରହ୍ମପୁର ଗିରିରୋଡ ଯୁବକ ଓ ତାଙ୍କ ବାନ୍ଧବୀଙ୍କୁ ଆକ୍ରମଣ ଘଟଣାରେ ଫେରାର ମୁକେଶ ସାହୁକୁ ବ୍ରହ୍ମପୁର ପୋଲିସର ଏନକାଉଣ୍ଟର କରିଥିଲା । ଗତ ୧୮ ତାରିଖରେ ବ୍ରହ୍ମପୁର ଗିରିରୋଡ଼ରେ ଘଟିଥିଲା ଏହି ଚାଞ୍ଚଲ୍ୟକର ଘଟଣା । ଅତି ନିର୍ମମ ଭାବେ ବିଚ ରାସ୍ତାରେ ହୋଇଥିଲା ବର୍ବର ଆକ୍ରମଣ । ସେହିପରି ଗତ ୧୭ ତାରିଖରେ ଦୁର୍ଦ୍ଦାନ୍ତ ଅପରାଧି ଦୀପୁନା ନାୟକ ପୋଲିସ ଗୁଳିରେ ଜଖମ ହୋଇଥିଲା । ଗୋପାଳପୁର ଥାନା ଅଞ୍ଚଳରେ ଛପି ରହିଥିବା ଲାଞ୍ଜିପଲ୍ଲୀ ଅଞ୍ଚଳର ଦୀପୁନା ନାୟକଙ୍କୁ ପୋଲିସ ପ୍ରଥମେ ଧରିଥିଲା । ଦୀପୁନାଙ୍କ ଅନ୍ୟ ସହଯୋଗୀ ମାନଙ୍କୁ ଧରିବା ପାଇଁ ପୋଲିସ ଦୀପୁନାଙ୍କୁ ନେଇ ଗୋଳନ୍ଥରା ଥାନା ଅନ୍ତର୍ଗତ କୀର୍ତ୍ତିପୁର ଜଙ୍ଗଲକୁ ଯାଇଥିବା ବେଳେ ସେଠାରେ ଦୀପୁନା ପୋଲିସ ଉପରକୁ ବୋମା ଫିଙ୍ଗିଥିଲା । ଯାହାଫଳରେ ପୋଲିସ ବାଧ୍ୟ ହୋଇ ଦୀପୁନାଙ୍କୁ ଏନକାଉଣ୍ଟର କରିଥିଲା । ଆଜି ପୁଣି ସୁଧୀର ପାତ୍ର ଅପହରଣ ଓ ହତ୍ୟା ମାମଲାରେ ପୋଲିସ ଦୁଇଜଣଙ୍କୁ ଏନକାଉଣ୍ଟର କରିଛି ।
ବହୁଚର୍ଚ୍ଚିତ ତ୍ଵିଷା ମାମଲା: ସିବିଆଇ ତଦନ୍ତ ସପକ୍ଷରେ ସର୍ବୋଚ୍ଚ ଅଦାଲତ
ନନ୍ଦିଘୋଷ ବ୍ୟୁରୋ : ଦେଶବ୍ୟାପୀ ଚର୍ଚ୍ଚା ସୃଷ୍ଟି କରିଥିବା ବହୁଚର୍ଚ୍ଚିତ ତ୍ଵିଷା ଶର୍ମା ମୃତ୍ୟୁ ମାମଲାରେ ସୁପ୍ରିମକୋର୍ଟ ଏକ ବଡ଼ ଆଭିମୁଖ୍ୟ ଗ୍ରହଣ କରିଛନ୍ତି। ସ୍ପର୍ଶକାତର ଘଟଣାର ତଦନ୍ତ ଭାର କେନ୍ଦ୍ରୀୟ ତଦନ୍ତ ବ୍ୟୁରୋ (CBI) ନେବାର ଆବଶ୍ୟକତା ରହିଛି ବୋଲି ସର୍ବୋଚ୍ଚ ଅଦାଲତଙ୍କ ପକ୍ଷରୁ କୁହାଯାଇଛି। ସିଜେଆଇ ଜଷ୍ଟିସ ସୂର୍ଯ୍ୟକାନ୍ତ, ଜଷ୍ଟିସ ଯୋଗମାଲ୍ୟା ବାଗଚୀ ଏବଂ ଜଷ୍ଟିସ ବିପୁଲ ଏମ. ପାଞ୍ଚୋଲିଙ୍କୁ ନେଇ ଗଠିତ ଏକ ସ୍ୱତନ୍ତ୍ର ଖଣ୍ଡପୀଠ ନିଜ ଆଡୁ,ଏହି ମାମଲାର ଶୁଣାଣି କରି ଏଭଳି ଗୁରୁତ୍ଵପୂର୍ଣ୍ଣ ମତ ରଖିଛନ୍ତି।
ଏହା ସହିତ ଏହି ମାମଲାରେ ବିଚାର ବିଭାଗର ସ୍ଥାଣୁତାକୁ ନେଇ ସୋସିଆଲ ମିଡିଆ କିମ୍ବା ବିଭିନ୍ନ ମହଲରେ ଚାଲିଥିବା ଚର୍ଚ୍ଚାକୁ କୋର୍ଟ ଦୃଢ଼ ଭାବରେ ଖଣ୍ଡନ କରିଛନ୍ତି। ଗତ ଶନିବାର ସୁପ୍ରିମକୋର୍ଟ ଘଟଣାର ଗାମ୍ଭୀର୍ଯ୍ୟକୁ ଦୃଷ୍ଟିରେ ରଖି ନିଜ ତରଫରୁ ଏହି ମାମଲା ରୁଜୁ କରିଥିଲେ। ଯୌତୁକ ନିର୍ଯାତନା ଅଭିଯୋଗ ଆସିବା ଏବଂ ଅଭିଯୁକ୍ତଙ୍କ ପରିବାର ପ୍ରଭାବଶାଳୀ ହୋଇଥିବାରୁ କୋର୍ଟ ଏହାକୁ ଗୁରୁତର ସହ ନେଇଛନ୍ତି।
୫ ମାସର ବିବାହ ଜୀବନ ଓ ଆତ୍ମହତ୍ୟା:
ସୂଚନାଯୋଗ୍ୟ ଯେ, ଗତ ମେ ୧୨ ତାରିଖରେ ତ୍ଵିଷା ଶର୍ମାଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା। ଯୌତୁକ ନିର୍ଯାତନା ସହି ନପାରି ସେ ଆତ୍ମହତ୍ୟା କରିଥିବା ନେଇ ଅଭିଯୋଗ ଆଣିଥିଲେ ପରିବାର ଲୋକେ । ସବୁଠାରୁ ଦୁଃଖଦ କଥା ହେଉଛି, ମୃତ୍ୟୁ ବେଳକୁ ତାଙ୍କ ବିବାହକୁ ମାତ୍ର ୫ ମାସ ହୋଇଥିଲା।
ତ୍ଵିଷାଙ୍କ ସ୍ଵାମୀ ସମର୍ଥ ସିଂହ ପେସାରେ ଜଣେ ଓକିଲ ଏବଂ ତାଙ୍କ ମାଆ ମଧ୍ୟ ଜଣେ ପୂର୍ବତନ ବିଚାରପତି। ଏହି ଘଟଣା ସାମ୍ନାକୁ ଆସିବା ପରେ ବାର୍ କାଉନସିଲ ଅଫ୍ ଇଣ୍ଡିଆ (BCI) ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ସମର୍ଥଙ୍କ ଓକିଲାତି ଲାଇସେନ୍ସକୁ ରଦ୍ଦ କରିଦେଇଛି। ବର୍ତ୍ତମାନ ସମର୍ଥ ଭୋପାଳ ପୋଲିସର ରିମାଣ୍ଡରେ ଅଛନ୍ତି ଏବଂ ପୋଲିସ ତାଙ୍କୁ ପଚରାଉଚରା କରୁଛି।
ମଧ୍ୟପ୍ରଦେଶ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଭୋପାଳ ଏମ୍ସ (AIIMS)ରେ ତ୍ଵିଷାଙ୍କ ଶରୀରର ଦ୍ଵିତୀୟ ଥର ପାଇଁ ପୋଷ୍ଟମର୍ଟମ କରାଯାଇଥିଲା। ଏହା ପରେ ମେ ୨୪ ତାରିଖରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି। ମାମଲାଟି ବିଚାର ବିଭାଗ ସହ ଜଡ଼ିତ ଥିବାରୁ ଏବଂ ନିରପେକ୍ଷ ତଦନ୍ତ ପାଇଁ ବର୍ତ୍ତମାନ ସର୍ବୋଚ୍ଚ ଅଦାଲତ ଏହି ମାମଲାକୁ ସିବିଆଇ ହାତକୁ ଟେକିଦେବା ସପକ୍ଷରେ ମତ ଦେଇଛନ୍ତି।
ଭାରତ-ଆମେରିକା ଚର୍ଚ୍ଚା: ପାକିସ୍ତାନ ପ୍ରସଙ୍ଗରେ ରୁବିଓଙ୍କ ବଡ଼ ବୟାନ
ନୂଆଦିଲ୍ଲୀ: ଭାରତ ଏବଂ ଆମେରିକା ମଧ୍ୟରେ ଚାଲିଥିବା ଦ୍ଵିପାକ୍ଷିକ କଥାବାର୍ତ୍ତାକୁ ନେଇ ଏକ ବଡ଼ ବୟାନ ଦେଇଛନ୍ତି ଆମେରିକା ବୈଦେଶିକ ସଚିବ ମାର୍କୋ ରୁବିଓ। ପଶ୍ଚିମ ଏସିଆ ପ୍ରସଙ୍ଗରେ, ବିଶେଷ କରି ଆମେରିକା ଓ ଇରାନ ମଧ୍ୟରେ ସମଝୋତା ଲାଗି ପାକିସ୍ତାନ କରୁଥିବା ମଧ୍ୟସ୍ଥତାକୁ ନେଇ ଭାରତ କୌଣସି ପ୍ରସଙ୍ଗ ଉଠାଇନାହିଁ ବୋଲି ସେ ସ୍ପଷ୍ଟ କରିଛନ୍ତି।
ରୁବିଓଙ୍କ କହିବା ଅନୁଯାୟୀ, ଭାରତ ଓ ଆମେରିକା ମଧ୍ୟରେ ଅନେକ ଗୁରୁତ୍ଵପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଛି। ପାକିସ୍ତାନ ମାଟିରୁ ଚାଲିଥିବା ଆତଙ୍କବାଦୀ କାର୍ଯ୍ୟକଳାପ ସମ୍ପର୍କରେ ଭାରତ ସର୍ବଦା ନିଜର ଚିନ୍ତା ପ୍ରକଟ କରିଆସିଛି, ହେଲେ ଏହି ନିର୍ଦ୍ଦିଷ୍ଟ ମଧ୍ୟସ୍ଥତା ପ୍ରସଙ୍ଗରେ ଭାରତ କିଛି କହିନାହିଁ। ପାକିସ୍ତାନ ପ୍ରତି ଭାରତର ଆଭିମୁଖ୍ୟ ଏକ ସମ୍ପୂର୍ଣ୍ଣ ଭିନ୍ନ ପ୍ରସଙ୍ଗ ବୋଲି ସେ ପ୍ରକାଶ କରିଛନ୍ତି।
ଭାରତ ସହ ସମ୍ପର୍କକୁ ନେଇ ଟ୍ରମ୍ପଙ୍କ ଆଭିମୁଖ୍ୟ:
ବୈଦେଶିକ ସଚିବ ମାର୍କୋ ରୁବିଓ ପୁଣି ଦୋହରାଇଛନ୍ତି ଯେ, ଭାରତ ସହ ଘନିଷ୍ଠ ଏବଂ ମଜବୁତ ସମ୍ପର୍କ ରକ୍ଷା କରିବା ପାଇଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିଶେଷ ଗୁରୁତ୍ଵ ଦେଉଛନ୍ତି। ଆଗାମୀ ଦିନରେ ଦୁଇ ଦେଶର ସମ୍ପର୍କ ଆହୁରି ସୁଦୃଢ଼ ହେବ ବୋଲି ସେ ଆଶା ବ୍ୟକ୍ତ କରିଛନ୍ତି। ନିଜ ଭାରତ ଗସ୍ତର ତୃତୀୟ ଦିନରେ ଆମେରିକା ବୈଦେଶିକ ସଚିବ ଆଜି ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ଆଗ୍ରା ଏବଂ ଜୟପୁର ଗସ୍ତ କରିଛନ୍ତି। ଏହି ସାଂସ୍କୃତିକ ଗସ୍ତ ପରେ ସେ ନୂଆଦିଲ୍ଲୀ ଫେରିବେ।
ଆସନ୍ତାକାଲି ଅନୁଷ୍ଠିତ ହେବାକୁ ଥିବା ହାଇ-ପ୍ରୋଫାଇଲ୍ ‘କ୍ଵାଡ୍’ (QUAD) ବୈଦେଶିକ ମନ୍ତ୍ରୀ ସମ୍ମିଳନୀରେ ମାର୍କୋ ରୁବିଓ ଯୋଗଦେବେ। ଏହି ସମ୍ମିଳନୀରେ ଭାରତ ପ୍ରଶାନ୍ତ ମହାସାଗରୀୟ କ୍ଷେତ୍ରର ସୁରକ୍ଷା ଓ ସହଯୋଗ ସେମେତ ଅନେକ ଆନ୍ତର୍ଜାତୀୟ ମୁଦ୍ଦା ଉପରେ ଆଲୋଚନା ହେବାର ସମ୍ଭାବନା ରହିଛି।
ଦେବାଶିଷଙ୍କ ଇସ୍ତଫା ପରେ ,ବିଜେଡିର ସାମ୍ବାଦିକ ସମ୍ମିଳନୀ
ଭୁବନେଶ୍ବର : ଦେବାଶିଷ ସାମନ୍ତରାୟ ବିଜେଡିରୁ ଇସ୍ତଫା ଦେବା ପରେ ବିଜେଡିର ସାମ୍ବାଦିକ ସମ୍ମିଳନୀ । ଦେବାଶିଷ ସାମନ୍ତରାୟ ଦଳ ଛାଡିବା ବିଜେଡି ଉପରେ କୌଣସି ପ୍ରଭାବ ପଡିବ ନାହିଁ । ସେ ଦଳରୁ ୫ ଥର ଟିକେଟ ନେଇଛନ୍ତି । ନିଜ ଭୁଲ ପାଇଁ ଦୁଇ ଥର ହାରିଛନ୍ତି । ଏବେ ରାଜ୍ୟସଭା ଯାଇଛନ୍ତି । ସେ ନିଜ ସ୍ୱାର୍ଥ ପାଇଁ ଦଳ ଛାଡିଛନ୍ତି । ସେ ଦଳରୁ ଆଉ କେତେ ନେଇଥାନ୍ତେ । ଗତ ୪ ବର୍ଷରେ ଦଳ ପାଇଁ ତାଙ୍କର କୌଣସି ଅବଦାନ ନାହିଁ । ଦଳର ପ୍ରତିକୂଳ ପରିସ୍ଥିତିରେ ସେ ଦଳ ସହ ନାହାନ୍ତି । ସେ ବ୍ୟକ୍ତିଗତ ସ୍ୱାର୍ଥ ଦଳ ଛାଡିଛନ୍ତି । କଟକରେ ତାଙ୍କର ସଂଗଠନ ନାହିଁ । ଦିଲ୍ଲୀରେ କେବେ ତାଙ୍କ ସ୍ୱର ନଥିଲା । ଅନେକ ଲୋକ ଅଛନ୍ତି ଦିଲ୍ଲୀରେ ଦଳର ସ୍ୱର ଉଠାଇବା ପାଇଁ । ଦଳରେ ବର୍ତ୍ତମାନ କର୍ମୀ ସଂଖ୍ୟା ବଢ଼ୁଛନ୍ତି । ତାଙ୍କ ପ୍ରାପ୍ୟ ଠାରୁ ଅଧିକ ବିଜେଡି ଦେଇଛି ବୋଲି ପ୍ରତିକ୍ରିୟା ରଖିଛି ବିଜେଡି ।…
ଆସନ୍ତାକାଲି IPL ପ୍ରଥମ କ୍ବାଲିଫାୟାର ମ୍ୟାଚ
ନନ୍ଦିଘୋଷ ବ୍ୟୁରୋ: IPL ୨୦୨୬ରେ ପ୍ଲେଅଫ୍ ଚୂଡ଼ାନ୍ତ । ଆସନ୍ତାକାଲି ଖେଳାଯିବ ଇଣ୍ଡିଆନ୍ ପ୍ରିମିୟର ଲିଗ୍ ର ପ୍ରଥମ କ୍ବାଲିଫାୟାର ମ୍ୟାଚ । ପ୍ରଥମ କ୍ବାଲିଫାୟାରରେ ବିଗତ ଚାମ୍ପିଅନ ରୟାଲ ଚ୍ୟାଲେଞ୍ଜର୍ସ ବେଙ୍ଗଲୁରକୁ ଭେଟିବ ଗୁଜରାଟ ଟାଇଟାନ୍ସ । ଧର୍ମଶାଳାରେ ସଂଧ୍ୟା ୭ଟା ୩୦ ମିନିଟରେ ଖେଳାଯିବ ମ୍ୟାଚ । ବିଜେତା ଦଳ ସିଧା ଫାଇନାଲରେ ପହଞ୍ଚିବ । ୨୭ ତାରିଖରେ ଚଣ୍ଡିଗଡ଼ରେ ଖେଳାଯିବ ପ୍ରଥମ ଏଲିମିନେଟର । ମୁହାଁମୁହିଁ ହେବେ ରାଜସ୍ଥାନ ରୟାଲ୍ସ ଓ ସନରାଇଜର୍ସ ହାଇଦ୍ରାବାଦ । ଗତକାଲି ମୁମ୍ବାଇ ଇଣ୍ଡିଆନ୍ସକୁ ହରାଇ ଚତୁର୍ଥ ଟିମ ଭାବେ ରାଜସ୍ଥାନ ପ୍ଲେଅଫରେ ପ୍ରବେଶ କରିଥିଲା । ମୁମ୍ବାଇର ୱାଙ୍ଖେଡେ ଷ୍ଟାଡିୟମରେ ଖେଳାଯାଇଥିବା ଏହି ମୁକାବିଲାରେ ମୁମ୍ବାଇ ସାମ୍ନାରେ ରାଜସ୍ଥାନ ରୟାଲ୍ସ ୨୦୬ ରନ୍ର ବିଜୟ ଲକ୍ଷ୍ୟ ରଖିଥିଲା। ଜବାବରେ ମୁମ୍ବାଇ ଇଣ୍ଡିଆନ୍ସ ୨୦ ଓଭରରେ ୯ଟି ୱିକେଟ୍ ହରାଇ ୧୭୫ ରନ୍ ସଂଗ୍ରହ କରିଥିଲା। ଏଲିମିନେଟରରେ ବିଜୟୀ ଟିମ ଓ କ୍ବାଲିଫାୟାରରେ ପରାସ୍ତ ହୋଇଥିବା ଟିମ ସହ ୨୯ ତାରିଖରେ ଅନୁଷ୍ଠିତ ହେବ ଦ୍ବିତୀୟ କ୍ଵାଲିଫାୟାର ମ୍ୟାଚ । ଏଥିରେ ବିଜୟୀ ଦଳ ପ୍ରଥମ କ୍ଵାଲିଫାୟାର ବିଜୟୀ ଟିମ ସହ ୩୧ ତାରିଖରେ ଖେଳାଯିବ ଫାଇନାଲ ମ୍ୟାଚ । ମାର୍ଚ୍ଚ ୨୮ ତାରିଖରେ ୧୦ଟି ଟିମକୁ ନେଇ ଆରମ୍ଭ ହୋଇଥିଲା ହାଇପ୍ରୋଫାଇଲ ଇଣ୍ଡିଆନ ପ୍ରିମିୟର ଲିଗ୍ ର ୧୯ ତମ ସଂସ୍କରଣ ।….
ସେୟାର ମାର୍କେଟରେ ଖୁସିର ଲହରୀ ,ଊର୍ଦ୍ଧ୍ବମୁଖୀ ଗ୍ରାଫ
ନନ୍ଦିଘୋଷ ବ୍ୟୁରୋ: ସେୟାର ମାର୍କେଟରେ ଖୁସିର ଲହରୀ। ବିଏସଇ ପ୍ରାୟ ୯୦୦ ପଏଣ୍ଟ ବୃଦ୍ଧି ପାଇ ହୋଇଛି ୭୬, ୩୦୭। ସେହିପରି ଏନଏସଇ ୨୬୦ ପଏଣ୍ଟ ବୃଦ୍ଧି ପାଇ ପହଞ୍ଚିଛି ୨୩, ୯୮୦ରେ। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବ୍ୟାରେଲ ପିଛା ୧୦୦ ଡଲାର ତଳକୁ ଖସିବା ପରେ ଷ୍ଟକ ମାର୍କେଟରେ ଉତ୍ସାହ ଦେଖାଦେଇଛି। ଦୁଇ ସପ୍ତାହରୁ ଅଧିକ ଦିନ ଧରି ସେୟାର ମାର୍କେଟରେ ଉତ୍ସାହ ପରିଲକ୍ଷିତ ହୋଇ ନଥିବାବେଳେ ଆଜି ଗ୍ରାଫ ଊର୍ଦ୍ଧ୍ବମୁଖୀ ହୋଇଛି। ବ୍ରେଣ୍ଟ ଅଶୋଧିତ ତୈଳ ଦର ୫.୫୮ ପ୍ରତିଶତ ହ୍ରାସ ପାଇ ବ୍ୟାରେଲ ପିଛା ଦର ହୋଇଛି ୯୭ ଟଙ୍କା ୭୬ ପଇସା। ସେହିପରି WTI ଅଶୋଧିତ ତୈଳ ଦର ୫.୮୫ ପ୍ରତିଶତ ହ୍ରାସ ପାଇ ହୋଇଛି ୯୮ ଟଙ୍କା। ପଶ୍ଚିମ ଏସିଆରେ ଖୁବ୍ ଶୀଘ୍ର ଶାନ୍ତିର ବାତାବରଣ ଫେରି ଆସିବ ବୋଲି କଳ୍ପନାଜଳ୍ପନା ପ୍ରକାଶ ପାଇବା ପରେ ଷ୍ଟକ ମାର୍କେଟରେ ଏହାର ପ୍ରଭାବ ପଡ଼ିଛି। ଗତ ଫେବ୍ରୁଆରୀରୁ ହର୍ମୁଜ ପ୍ରଣାଳୀକୁ ନେଇ ବିବାଦ ଲାଗି ରହିଥିବାରୁ ଏହାର ପ୍ରଭାବ ବିଶ୍ବ ତୈଳ ଓ ଗ୍ୟାସ କ୍ଷେତ୍ର ଉପରେ ପଡିଆସୁଛି। ମହିନ୍ଦ୍ରା ଆଣ୍ଡ ମହିନ୍ଦ୍ରା, ଏଚଡିଏଫସି, ବଜାର ଫାଇନାନ୍ସ, ଲାର୍ସନ ଆଣ୍ଡ ଟ୍ୟୁବ୍ରୋ, ମାରୁତି ସୁଜୁକି, ଏସବିଆଇ, ଆଇସିଆଇସିଆଇ, ବଜାଜ ଫିନସର୍ଭ ପ୍ରମୁଖ କମ୍ପାନୀର ସେୟାର ମୂଲ୍ୟ ବୃଦ୍ଧି ପାଇଛି।..
ବ୍ରହ୍ମପୁରରେ ପୁଣି ଏନକାଉଣ୍ଟର : ଅପରାଧି ଜଗା ଆହତ
ବ୍ରହ୍ମପୁରରେ ଆଉ ଏକ ଏନକାଉଣ୍ଟର୍ । ପୋଲିସ ଏନକାଉଣ୍ଟରରେ ଜଗା ଆହତ । ଲଗାତାର ତୃତୀୟ ଥର ପାଇଁ ଏନକାଉଣ୍ଟର୍ କରିଛି ପୋଲିସ । ପୋଲିସ ଗୁଳିରେ ଆହତ ମଙ୍ଗଳା ବେହେରାଙ୍କ ଆକ୍ରମଣକାରୀ ତଥା ଅଭିଯୁକ୍ତ ଜଗା ସାହୁ ଓରଫ ଜଗନ୍ନାଥ ଆହତ ହୋଇଛି। ଅଭିଯୁକ୍ତ ଜଗା ବାଉରୀ ସୁକୁଣ୍ଡାରେ ଥିବା ସୁରାକ ପାଇ ପୋଲିସ ଟିମ ଚଢ଼ାଉ କରିବା ବେଳେ ଜଗା ପୋଲିସ ଉପରକୁ ବୋମା ଫିଙ୍ଗି ଖସିଯିବାକୁ ଉଦ୍ୟମ କରିଥିଲା । ପୋଲିସର ପାଲଟା ଗୁଳି ଚାଳନାରେ ଜଗା ଆହତ ହୋଇଛି । ତାର ଦୁଇଟି ଗୋଡରେ ଗୁଳି ବାଜିଛି । ଆହତ ଜଗାଙ୍କୁ MKCG ମେଡିକାଲରେ ଭର୍ତ୍ତି କରାଯାଇଛି । ଗତକାଲି ରାତିରେ ମଙ୍ଗଳାଙ୍କୁ ବଡ଼ ବଜାର ଅମ୍ବିକା ନଗର ଅଞ୍ଚଳରେ ଖଣ୍ଡାରେ ହାଣିଥିଲେ ଜଗା ଓ ବଳିଆ । ଯାହାର ଭିଡିଓ ସୋସିଆଲ ମିଡିଆରେ ମଧ୍ୟ ଭାଇରାଲ୍ ହୋଇଥିଲା । ଆକ୍ରମଣର ୫ ଘଣ୍ଟା ଭିତରେ ପୋଲିସ ଏନକାଉଣ୍ଟର କରିଛି । ପୂର୍ବରୁ ଦୁଇଟି ଏନକାଉଣ୍ଟର୍ ହୋଇଥିବା ବେଳେ ଆଉ ଏକ ଏନକାଉଣ୍ଟର ହୋଇଛି । ତଥାପି ବ୍ରହ୍ମପୁର ଅଶାନ୍ତ ରହିଛି । ଅପରାଧୀଙ୍କୁ ସୁଧୁରିଯିବାକୁ ଚେତାବନୀ ଦେଇଥିଲେ ଦକ୍ଷିଣାଞ୍ଚଳ ଆଇଜି ନିତି ଶେଖର। ତଥାପି ଆତଙ୍କ ଖେଳାଇଲେ ଅପରାଧୀ । ଗତକାଲିର ଘଟଣା ପରେ ପୋଲିସ ଅପରାଧୀଙ୍କ ଲମ୍ବା ତାଲିକା ପ୍ରସ୍ତୁତ କରିଥିବା ସୂଚନା ମିଳିଛି । ପୋଲିସର ଏଭଳି ପଦକ୍ଷେପକୁ ସହରବାସୀ ସ୍ୱାଗତ କରିଛନ୍ତି । ସହରରେ ଭାଇଚାରା ଓ ଶାନ୍ତି ଫେରାଇବା ପାଇଁ ପୋଲିସ ସମସ୍ତ ପ୍ରକାର ଉଦ୍ୟମ ଚଳାଇଛି ।…
ମହଙ୍ଗା ମାଡ: ଚତୁର୍ଥ ଥର ବଢିଲା ପେଟ୍ରୋଲ ଓ ଡିଜେଲ ଦର
ମହଙ୍ଗା ମାଡ଼ରୁ ନିସ୍ତାର ନାହିଁ । ପୁଣି ବଢ଼ିଲା ପେଟ୍ରୋଲ ଓ ଡିଜେଲର ଖୁଚୁରା ଦର । ପେଟ୍ରୋଲ ଲିଟର ପିଛା ୨ ଟଙ୍କା ୭୯ ପଇସା ଓ ଡିଜେଲ ଲିଟର ପିଛା ୨ ଟଙ୍କା ୮୮ ପଇସା ବୃଦ୍ଧି କରିଛନ୍ତି ରାଷ୍ଟ୍ରାୟତ୍ତ ତୈଳ କମ୍ପାନୀ । ପ୍ରିମିୟମ ପେଟ୍ରୋଲ ଲିଟର ପିଛା ଦର ବୃଦ୍ଧି ଘଟିଛି ୨ ଟଙ୍କା ୭୯ ପଇସା । ୧୧ ଦିନ ଭିତରେ ଲଗାତାର ଚତୁର୍ଥ ଥର ବଢିଲାପେଟ୍ରୋଲ ଓ ଡିଜେଲ ଦର । ବର୍ଦ୍ଧିତ ଦର ଅନୁଯାୟୀ ଭୁବନେଶ୍ବରରେ ପେଟ୍ରୋଲ ଲିଟର ବଢ଼ି ହେଲା ୧୦୯ ଟଙ୍କା ୧୫ ପଇସା । ଭୁବନେଶ୍ବରରେ ୧୦୦ ଟଙ୍କା ଟପିଲା ଡିଜେଲ ଦର । ଡିଜେଲ ଲିଟର ପିଛା ହେଲା ୧୦୦ ଟଙ୍କା ୮୦ ପଇସା । ପଶ୍ଚିମ ଏସିଆରେ ସଙ୍କଟ କାରଣରୁ ବାରମ୍ବାର ବଢ଼ିବାରେ ଲାଗିଛି ତେଲ ଦର । ନୂଆ ଦର ଅନୁସାରେ ଦିଲ୍ଲୀରେ ପେଟ୍ରୋଲ ଲିଟର ହୋଇଛି ୧୦୨ ଟଙ୍କା ୧୨ ପଇସା । ଡିଜେଲ ଦର ହୋଇଛି ୯୫ ଟଙ୍କା ୨୦ ପଇସା । ଦେଶରେ ପର୍ଯ୍ୟାପ୍ତ ତୈଳ ଗଚ୍ଛିତ ରହିଛି ବୋଲି କେନ୍ଦ୍ର ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରାଳୟ ପକ୍ଷରୁ କହିବା ପରେ ମଧ୍ୟ ଲଗାତାର ଦର ବୃଦ୍ଧି ଘଟିଛି । ଗତ ୧୫ ତାରିଖରେ ପେଟ୍ରୋଲ, ଡିଜେଲ ୩ ଟଙ୍କା ଲେଖାଏ ଓ ସିଏନଜି ୨ ଟଙ୍କା ବୃଦ୍ଧି ପାଇଥିଲା । ଗତ ୧୯ରେ ପେଟ୍ରୋଲ ଲିଟର ପିଛା ୯୬ ପଇସା ଓ ଡିଜେଲ ଲିଟର ପିଛା ୯୪ ପଇସା ବୃଦ୍ଧି ପାଇଥିଲା ।….