ଭୁବନେଶ୍ୱର: ରାଜ୍ୟ ତଥା ଦେଶରେ ଦକ୍ଷିଣ-ପୂର୍ବ ମୌସୁମୀ ବାୟୁ ଫେରିବା ପ୍ରକ୍ରିୟା ଜାରି ରହିଛି । ଏହାର ପ୍ରଭାବରେ ରାଜ୍ୟର ବିଭିନ୍ନ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ଜାରି ରହିଛି । ବିଶେଷ କରି ଗଞ୍ଜାମ ଜିଲ୍ଲାର ବ୍ରହ୍ମପୁର, ଗୋପାଳପୁର, ଦିଗପହଣ୍ଡି,ଛତ୍ରପୁର, ପୁରୁଷୋତ୍ତମପୁରରେ ସର୍ବାଧିକ ବର୍ଷା ରେକର୍ଡ ହୋଇଛି । ଏଥିସହିତ ଗଜପତି, ଖୋର୍ଦ୍ଧା, କନ୍ଧମାଳ, ଅନୁଗୁଳ, ନୟାଗଡ଼, ପୁରୀ, କୋରାପୁଟ ଓ କନ୍ଧମାଳ ଜିଲ୍ଲାରେ ମଧ୍ୟ ପ୍ରବଳ ବର୍ଷା ରେକର୍ଡ ହୋଇଛି । ଅପରପକ୍ଷରେ ଆସନ୍ତକାଲି ପର୍ଯ୍ୟନ୍ତ ଉପୂଳକ ଓଡ଼ିଶା ସମେତ କୋରାପୁଟ, ମାଲକାନଗିରି, କନ୍ଧମାଳ,ରାୟଗଡ଼ା, ବୌଦ୍ଧ, ଢେଙ୍କାନାଳ, କେନ୍ଦୁଝର ଓ ମୟୂରଭଞ୍ଜ ଜିଲ୍ଲାକୁ ପାଣିପାଗ ବିଭାଗ ପକ୍ଷରୁ ୟେଲୋ ଓ୍ୱାର୍ଣ୍ଣିଂ ଜାରି କରାଯାଇଛି । ଏହି ସବୁ ଜିଲ୍ଲାରେ ଘଡ଼ଘଡ଼ି ସାଙ୍ଗକୁ ବର୍ଷା ସମ୍ଭାବନା ରହିଛି ।
କଂଗ୍ରେସ କାର୍ଯ୍ୟକାରିଣୀ ବୈଠକରେ ରାହୁଲଙ୍କୁ ସଭାପତି କରିବା ପାଇଁ ଉଠିଲା ଦାବି
ନୂଆଦିଲ୍ଲୀ: ଦିଲ୍ଲୀରେ ଚାଲିଥିବା କଂଗ୍ରେସ କାର୍ଯ୍ୟକାରିଣୀ ବୈଠକରେ ରାହୁଲ ଗାନ୍ଧିଙ୍କୁ ପୁଣିଥରେ କଂଗ୍ରେସ ସଭାପତି କରିବା ପାଇଁ ଦାବି ଉଠିଛି । ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗହଲୋତ୍ ଓ ବରିଷ୍ଠ ନେତା ଅମ୍ବିକା ସୋନି ଏହି ଦାବି କରିଛନ୍ତି । ଅନ୍ୟପକ୍ଷରେ କଂଗ୍ରେସ ସଭାପତି ପଦ ପାଇଁ ଆସନ୍ତା ବର୍ଷ ଅଗଷ୍ଟ ୨୧ରୁ ସେପ୍ଟେମ୍ବର ୨୦ ମଧ୍ୟରେ ନିର୍ବାଚନ ହେବ ବୋଲି ଦଳର ମହାସଚିବ କେସି ବେଣୁ ଗୋପାଳ କହିଛନ୍ତି ।
ମୁଁ ବିଚାର କରିବି : ରାହୁଲ
ଅମ୍ବିକା ସୋନି ମିଟିଂରେ କହିଥିଲେ ଯେ,ରାହୁଲ ସଭାପତି ହେବା ସମସ୍ତେ ଚାହାନ୍ତି । ତେବେ ଏହା ତାଙ୍କ ଉପରେ ନିର୍ଭର କରୁଛି । ସୋନିଙ୍କ ପୂର୍ବରୁ ଗହଲୋତ ମଧ୍ୟ ସଭାପତି ପଦ ପାଇଁ ରାହୁଲଙ୍କ ନାମ ଉଠାଇଥିଲେ । ସେ କହିଥିଲେ ଯେ, ରାହୁଲ କଂଗ୍ରେସର ନେତୃତ୍ୱ ନେବା ଆବଶ୍ୟକ । ଦୁଇ ନେତାଙ୍କ ମତାମତ ଶୁଣିବା ପରେ ରାହୁଲ କହିଥିଲେ ଯେ,ଏହା ଉପରେ ମୁଁ ଚିନ୍ତା କରିବି ।
ମୁଁ ଫୁଲ୍ ଟାଇମ୍ ପ୍ରେସିଡେଣ୍ଟ୍ : ସୋନିଆ
ଅନ୍ୟପକ୍ଷରେ ଆଜି ସୋନିଆ ଗାନ୍ଧି ଦଳର ଅସନ୍ତୁଷ୍ଟ ଜି-୨୩ ନେତାଙ୍କୁ ପରୋକ୍ଷରେ ସନ୍ଦେଶ ଦେଇଛନ୍ତି । ସେ କହିଛନ୍ତି ଯେ, ମୁଁ ଦଳର ପୁର୍ଣ୍ଣକାଳିକ ସଭାପତି । ସୂଚନାଯୋଗ୍ୟ ଯେ, ଜି-୨୩ରେ କଂଗ୍ରେସର ସେହି ୨୩ ଜଣ ନେତା ସାମିଲ ଅଛନ୍ତି ଯେଉଁମାନେ କଂଗ୍ରେସରେ ସଂସ୍କାର ଚାହୁଁଛନ୍ତି । ଏହି ୨୩ ନେତା ଗତ ବର୍ଷ ସୋନିଆଙ୍କୁ ଚିଠି ଲେଖି ଦଳରେ ସଂସ୍କାର ସହିତ ପୁର୍ଣ୍ଣକାଳିକ ସଭାପତିଙ୍କ ଆବଶ୍ୟକତା କଥା ଉଠାଇଥିଲେ । କୌଣସି ନେତାଙ୍କ ନାମ ନନେଇ ସୋନିଆ କହିଥିଲେ ଯେ, ସେ ସ୍ପଷ୍ଟ କଥାର ସମର୍ଥକ କିନ୍ତୁ ମିଡିଆ ଜରିଆରେ ତାଙ୍କ ସହିତ କେହି କଥା ନହୁଅନ୍ତୁ । ସେ କହିଥିଲେ ଯେ, ମୁଁ ଫୁଲ ଟାଇମ୍ ପ୍ରେସିଡେଣ୍ଟ୍ ଓ ସମ୍ପୂର୍ଣ୍ଣ ସକ୍ରୀୟ ଅଛି ।
ଆତ୍ମହତ୍ୟା କରିଥିବା ଡାକ୍ତରୀ ଛାତ୍ରୀଙ୍କ ଘରୁ ଚୋରି,୩ ଲକ୍ଷରୁ ଅଧିକ ଟଙ୍କା ସହିତ ଗହଣା ଚୋରି
ବଲାଙ୍ଗୀର: ନିକଟରେ ଆତ୍ମହତ୍ୟା କରିଥିବା ବଲାଙ୍ଗୀର ଭିମଭୋଇ ମେଡିକାଲ କଲେଜର ଡାକ୍ତରୀ ଛାତ୍ରୀ ନିରୂପମା ନନ୍ଦଙ୍କ ଘରେ ଚୋରି । ଚୋର ଘରେ କେହି ନଥିବାର ସୁଯୋଗ ନେଇ ନଗଦ ଟଙ୍କା ସହିତ ସୁନା ଗହଣା ଚୋରି କରିଥିବା ଜଣା ପଡିଛି । ସୂଚନା ଅକ୍ଟୋବର ୬ ତାରିଖ ଦିନ ହଷ୍ଟେଲର ରୁମ ନମ୍ବର ୩୦୮ରୁ ତାଙ୍କ ଝୁଲନ୍ତା ମୃତଦେହ ଆବିଷ୍କାର କରାଯାଇଥିଲା । ପରିବାର ନିରୁପମା ଆତ୍ମହତ୍ୟା କରିବାକୁ ବିଶ୍ୱାସ କରୁନାହାନ୍ତି । ସେମାନଙ୍କ ଅନୁସାରେ ଏହା ହତ୍ୟା । ଝିଅର ମୃତ୍ୟୁ ପରେ ଗାଁକୁ ଯାଇଥିବା ପରିବାର ଘରକୁ ଫେରିବା ପରେ ଚୋରି ହୋଇଥିବା ଜାଣିବାକୁ ପାଇଛନ୍ତି ।
ଝିଅର ସନ୍ଦେହଜନକ ମୃତ୍ୟୁ ପରେ ଭାଙ୍ଗି ପଡ଼ିଥିଲେ ବଲାଙ୍ଗୀର ସିଭିଲ କୋର୍ଟ ପଛପଟେ ରହୁଥିବା ବଲାଙ୍ଗୀର କୋଠାବାଡ଼ି ଡିଭିଜନର ଅବସରପ୍ରାପ୍ତ ଷ୍ଟେନୋ ସମାରୁ ନନ୍ଦ ଓ ତାଙ୍କ ପରିବାର ଲୋକ । ୭ତାରିଖ ସକାଳେ ମେଡିକାଲ କଲେଜ ହସ୍ପିଟାଲରେ ଝିଅର ଶବ ବ୍ୟବଚ୍ଛେଦ ପରେ ମୃତ ଦେହ ଧରି ଗାଁକୁ ଚାଲି ଯାଇଥିଲେ ପୁରା ପରିବାର । ଦୁଃଖରେ ପାହାଡ଼ ତାଙ୍କ ଉପରେ ଖସି ପଡ଼ିଥିଲା । ଘରେ ତାଲା ପକାଇ ଯାଇଥିଲେ । ଝିଅର ଶୁଦ୍ଧିକ୍ରିୟା ସାରି ଘରକୁ ଆଜି ଦିନ (ଶନିବାର) ୧୨ଟାରେ ଫେରିଥିଲେ । ତେବେ ଘରେ ପହଞ୍ଚି ସେମାନେ ଚୋରି ହୋଇଥିବା ଜାଣିବାକୁ ପାଇଥିଲେ ।
ଚୋର ଆଲମୀରା ଭାଙ୍ଗି ନଗଦ ୩ଲକ୍ଷ ୫୦ହଜାରରୁ ଅଧିକ ଟଙ୍କା ସମେତ ବିପୁଳ ସୁନା ଗହଣା , ଦାମିକା ଶାଢ଼ୀ ଓ ମୂଲ୍ୟବାନ ସାମଗ୍ରୀ ଚୋରୀ କରିଥିବା ଜଣା ପଡିଛି । ପଛପଟ ଫାଟକ ତାଲା ଭାଙ୍ଗି ଚୋର ଘରେ ପସିଥିବା ଜଣା ପଡିଛି । ଘର ଭିତରେ ଜିନିଷପତ୍ର ଛିନଛତ୍ର ହୋଇ ପଡିଥିବା ଦେଖିବାକୁ ମିଳିଛି ।
ଝିଅର ଅସମୟ ମୃତ୍ୟୁକୁ ନେଇ ଭାଙ୍ଗି ପଡିଥିବା ପରିବାର ପାଇଁ ଚୋରି ବଡ଼ ଧକ୍କା ସାବ୍ୟସ୍ତ ହୋଇଛି । ଏନେଇ ଟାଉନ ଥାନା ପୋଲିସକୁ ଖବର ଦେବା ପରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ତଲା ଭାଙ୍ଗିବାରେ ବ୍ୟବହୃତ ସମଗ୍ରୀକୁ ପୋଲିସ ଜବତ କରିଛି । ସାଇଣ୍ଟିଫିକ ଟିମ ଓ ସନ୍ଧାନୀ କୁକୁର ସହାୟତାରେ ତଦନ୍ତ କରାଯିବ ବୋଲି ଏସ୍ଡିପିଓ ତୋଫାନ ବାଗ କହିଛନ୍ତି ।
ସୂଚନାଯୋଗ୍ୟ ଯେ, ଅକ୍ଟୋବର ୬ ତାରିଖ ଦିନ ନିରୁପମାଙ୍କ ଝୁଲନ୍ତା ମୃତଦେହ ମେଡିକାଲ କଲେଜର ହଷ୍ଟେଲ ନମ୍ବର ୩୦୮ରୁ ଆବିଷ୍କାର କରାଯାଇଥିଲା । ପୋଲିସ ଏହାକୁ ଆତ୍ମହତ୍ୟା ବୋଲି କହୁଥିବା ବେଳେ ପରିବାର ହତ୍ୟା ସନ୍ଦେହ କରୁଛନ୍ତି ।
ସ୍ୱାମୀଙ୍କ ସହ ଝଗଡ଼ାରୁ ଜଲାପୁଟ ଜଳଭଣ୍ଡାରକୁ ଡେଇଁଲେ ସ୍ତ୍ରୀ
ଲମତାପୁଟ: ଚମ୍ପାପୁଟ ପୋଲ ନିକଟ ଜଲାପୁଟ ଜଳଭଣ୍ଡାରରେ ଅଘଟଣ । ସ୍ୱାମୀଙ୍କ ସାମ୍ନାରେ ଜଲାପୁଟ ଜଳ ଭଣ୍ଡାରକୁ ଡେଇଁ ପଡ଼ିଲେ ମହିଳା । ଦଶହରା ପୂଜା ସାରି ଫେରୁଥିବା ବେଳେ ଏହି ଅଭାବନୀୟ ଘଟଣା ଘଟିଛି । ସ୍ୱାମୀ, ସ୍ତ୍ରୀଙ୍କ ମଧ୍ୟରେ କଳହ ପରେ ଜଳ ଭଣ୍ଡାରକୁ ସ୍ତ୍ରୀ ଡେଇଁ ପଡ଼ିଥିବା ଅଭିଯୋଗ ହୋଇଛି । ମହିଳାଙ୍କୁ ପାଡ଼ୁଆ ପୋଲିସ ଓ ନନ୍ଦପୁର ଅଗ୍ନିଶମ ବାହିନୀ ଖୋଜୋଖାଜି କରୁଛନ୍ତି ।
କୁକୁଡାପକ୍ଷୀ ଗାଁର ପଦ୍ମାଖରା ଓ ତାଙ୍କ ସ୍ୱାମୀ ପୂର୍ଣ୍ଣ ଖରା ଦଶହରା ପୂଜା ସାରି ପୂଜାରିଗୁଡ଼ ଘରକୁ ଫେରୁଥିଲେ । ସେହି ସମୟରେ ଦମ୍ପତିଙ୍କ ମଧ୍ୟରେ କୌଣସି କାରଣକୁ ନେଇ ଝଗଡ଼ା ହୋଇଥିଲା । ଏଥିରେ ଉତ୍ତ୍ୟକ୍ତ ହୋଇ ପଦ୍ମାଖରା ଜଳଭଣ୍ଡାରକୁ ଡେଇଁ ପଡ଼ିଛନ୍ତି । ପୋଲିସ ଘଟଣାର ତଦନ୍ତ କରୁଥିବା ସୂଚନା ଦେଇଛନ୍ତି ନନ୍ଦପୁର ଏସଡିପିଓ ।
ଅଷ୍ଟମ ଓ ଏକାଦଶ ଶ୍ରେଣୀ ଖୋଲିବା ନେଇ ଆସିଲା ଏସଓପି
ଭୁବନେଶ୍ୱର: ଖୋଲିବ ଅଷ୍ଟମ ଓ ଏକାଦଶ ଶ୍ରେଣୀ । ଏଥିପାଇଁ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଏସଓପି ଜାରି ହୋଇଛି । ସ୍କୁଲ୍ ଖୋଲିବା ପୂର୍ବରୁ ସ୍କୁଲ ପରିଚାଳନା କମିଟି ସହ ଆଲୋଚନା ହେବ । ଆଲୋଚନା ପାଇଁ ଜିଲ୍ଲାପାଳଙ୍କୁ ବିଦ୍ୟାଳୟ ଓ ଗଣଶିକ୍ଷା ସଚିବ ନିର୍ଦ୍ଦେଶ ଦେଇଛନ୍ତି । ସ୍କୁଲ ଖୋଲିବା ପୂର୍ବରୁ ବିପଦସଙ୍କୁଳ ସ୍ପଟ ଚିହ୍ନଟ କରିବେ କର୍ତ୍ତୃପକ୍ଷ । ସ୍କୁଲ ପରିଷ୍କାର କରିବାକୁ ଅଭିଭାବକ ଓ ପଞ୍ଚାୟତିରାଜ ସଦସ୍ୟଙ୍କ ସହଯୋଗ ନିଆଯାଇ ପାରିବ ।
ସବୁ ଶ୍ରେଣୀଗୃହକୁ ସାନିଟାଇଜ କରିବାକୁ ନିର୍ଦ୍ଦେଶ ଦିଆଯାଯାଇଛି । ଛାତ୍ରଛାତ୍ରୀ ଓ ଶିକ୍ଷକଙ୍କ ପାଇଁ ରହିବ ମାସ୍କ ଓ ସାନିଟାଇଜର । ଦୈନିକ ଛାତ୍ରଛାତ୍ରୀ ଓ ଶିକ୍ଷକଙ୍କ ଥର୍ମାଲ ସ୍କ୍ରିନିଂ କରାଯିବ । ସ୍କୁଲରେ ଛାତ୍ରଛାତ୍ରୀଙ୍କ ସୁରକ୍ଷା ବ୍ୟବସ୍ଥାର ଯାଞ୍ଚ କରିବେ ବ୍ଲକ ଶିକ୍ଷା ଅଧିକାରୀ । ପିଲାଙ୍କ ଭିତରେ ସ୍କୁଲ ଯିବାକୁ ଆଗ୍ରହ ଅଛି । ହେଲେ କରୋନା ସମ୍ପୂର୍ଣ୍ଣ ଭାବେ ଯାଇନି । ଯେମିତି ସବୁ ଶିକ୍ଷକ ଡବଲ ଡୋଜ୍ ଟିକା ନେଇଥିବେ ତା’ ଉପରେ ସ୍ୱତନ୍ତ୍ର ଦୃଷ୍ଟି ଦିଆଯିବ ବୋଲି ବିଭାଗୀୟ ମନ୍ତ୍ରୀ କହିଛନ୍ତି ।
ବିଦ୍ୟାଳୟ ଓ ଗଣଶିକ୍ଷା ବିଭାଗ ଏବଂ ସ୍ୱାସ୍ଥ୍ୟ ବିଭାଗ ମିଳିତ ଭାବେ କାମ କରିବେ । ଯେଉଁଠି ଛାତ୍ରଛାତ୍ରୀଙ୍କ ଭିତରେ ସାମାନ୍ୟ ଲକ୍ଷଣ ଦେଖାଯିବ, ତାଙ୍କୁ ତୁରନ୍ତ ଚିକିତ୍ସା ଦିଆଯିବା ନେଇ ଗୁରୁତ୍ୱ ଦିଆଯିବ । ମୁଖ୍ୟମନ୍ତ୍ରୀ ସବୁ ସମୟରେ ଶିକ୍ଷା ସହ ସ୍ୱାସ୍ଥ୍ୟକୁ ଗୁରୁତ୍ୱ ଦେଇଛନ୍ତି । ତେଣୁ ସ୍କୁଲ ଖୋଲିବା ପ୍ରକ୍ରିୟା ଆରମ୍ଭ ହୋଇଥିବା ମନ୍ତ୍ରୀ କହିଛନ୍ତି ।
ଅସନ୍ତୁଷ୍ଟଙ୍କୁ ସୋନିଆଙ୍କ ଚରମ ବାଣୀ, ଗଣମାଧ୍ୟମ ଜରିଆରେ ଆଲୋଚନା ଅନାବଶ୍ୟକ
ନୂଆଦିଲ୍ଲୀ: ଚଳିତ ବର୍ଷ ବଦଳିବେନି ଏଆଇସିସି ସଭାନେତ୍ରୀ । ଆସନ୍ତା ବର୍ଷ ସେପ୍ଟେମ୍ବରରେ ବଛାଯିବେ ଦଳର ନୂଆ ନେତା । ଦିଲ୍ଲୀରେ ଆୟୋଜିତ କଂଗ୍ରେସ କାର୍ଯ୍ୟକାରିଣୀରେ ଅଧ୍ୟକ୍ଷତା କରି ଏଆଇସିସି ସଭାନେତ୍ରୀ ସୋନିଆ ଗାନ୍ଧି କହିଛନ୍ତି- ସେ ଏବେ ଦଳର ପୂର୍ଣ୍ଣକାଳୀନ ସଭାନେତ୍ରୀ ଅଛନ୍ତି । ତାଙ୍କ ସମ୍ପର୍କରେ ମିଡିଆରେ କିଛି କହିବା ଅନାବଶ୍ୟକ । ଦଳରେ ସମସ୍ତେ ଶୃଙ୍ଖଳା ରକ୍ଷା କରିବା ଆବଶ୍ୟକ । ଏହା ସହ ସେ ଗ୍ରୁପ-୨୩ ନେତାଙ୍କୁ ମଧ୍ୟ ସତର୍କ କରାଇଛନ୍ତି । ଆଜିର ବୈଠକରେ ରାହୁଲ ଗାନ୍ଧିଙ୍କୁ ଏଆଇସିସି ସଭାପତି କରିବା ଲାଗି ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ପ୍ରସ୍ତାବ ଦେଇଥିବା କୁହାଯାଉଛି । ବୈଠକରେ ଦଳର ୫୨ଜଣ ତୁଙ୍ଗନେତା ଯୋଗ ଦେଇଥିବା ବେଳେ କେନ୍ଦ୍ର ସରକାରଙ୍କ ବିଭିନ୍ନ ନୀତିକୁ ସମାଲୋଚନା କରାଯାଇଛି ।
ଏହା ସହ ଜାମ୍ମୁ ଓ କାଶ୍ମୀରରେ ବଢିଥିବା ହତ୍ୟାକାଣ୍ଡ ଘଟଣାରେ ଉଦବେଗ୍ ପ୍ରକାଶ କରାଯାଇଛି । ସେପଟେ ଦୀର୍ଘକାଳୀନ ସମୟ ପାଇଁ କର୍ମକର୍ତ୍ତା ଚୟନ ଲାଗି କଂଗ୍ରେସ କାର୍ଯ୍ୟକାରିଣୀରେ ହୋଇପାରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି । ଆଜିର ବୈଠକରେ ଦଳର ନେତ୍ରୀ ସୋନିଆ ଗାନ୍ଧୀ, ରାହୁଲ ଗାନ୍ଧୀ, ଅଶୋକ ଗେହଲଟ, ଚରଣଜିତ ସିଂ ଚନ୍ନି, ଭୂପେଶ ବଘେଲ, ଗୁଲାମନବି ଆଜାଦ, ପ୍ରମୁଖ ନେତା ଉପସ୍ଥିତ ଅଛନ୍ତି । ୨୦୧୯ ନିର୍ବାଚନରେ କଂଗ୍ରେସର ଶୋଚନୀୟ ପରେ ଦଳର ସଭାପତି ପଦରୁ ରାହୁଲ ଗାନ୍ଧି ଇସ୍ତଫା ଦେବାରୁ ତାଙ୍କ ସ୍ଥାନରେ ସୋନିଆ ଗାନ୍ଧିଙ୍କୁ ଅନ୍ତରୀଣ ସଭାନେତ୍ରୀ ଭାବେ ଅବସ୍ଥାପିତ କରାଯାଇଥିଲା । ତେବେ ଜିଲ୍ଲାସ୍ତରରୁ ରାଜ୍ୟ ସ୍ତର ଯାଏଁ ସମସ୍ତ ସାଂଗଠନିକ ନିର୍ବାଚନ ଶେଷ ହେବା ଯାଏଁ ସୋନିଆ ସଭାନେତ୍ରୀ ଭାବେ ରହିପାରନ୍ତି ବୋଲି ଆଲୋଚନା ହେଉଛି ।
ସାରା ଦେଶରେ ଦଳର ସଦସ୍ୟ ସଂଖ୍ୟା ବୃଦ୍ଧି, ଆଭ୍ୟନ୍ତରୀଣ ନିର୍ବାଚନ, ତୃଣମୂଳ ସ୍ତରରୁ ନେତା ନିର୍ବାଚନ ଆଦି ପ୍ରକ୍ରିୟା ଦୁରୂହ ବ୍ୟାପାର ହୋଇଥିବାରୁ ସିଡବ୍ଲୁସି କି ନିଷ୍ପତ୍ତି ନେବ ତାହାକୁ ଅପେକ୍ଷା କରାଯାଇଛି । ସେହିପରି ଆସନ୍ତା ବର୍ଷ କିଛି ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଥିବାରୁ କଂଗ୍ରେସର ରଣନୀତି ମଧ୍ୟ ଏହି ବୈଠକରେ ନିର୍ଦ୍ଧାରଣ କରାଯିବା ସମ୍ଭାବନା ରହିଛି । ଦଳରେ ଆମୂଳଚୁଳ ପରିବର୍ତ୍ତନ କରିବା ଲାଗି ଗ୍ରୁପ ୨୩ର ନେତାମାନେ ସୋନିଆଙ୍କ ନିକଟକୁ ପତ୍ର ଲେଖିବା ପରେ ସିଡବ୍ଲୁସି ବୈଠକ ବସିବା ଅବଶ୍ୟମ୍ଭାବୀ ହୋଇଥିଲା ।
ସ୍କୁଲ ଖୋଲିବା ପରେ ମିଳିତ ମନିଟରିଂ କରିବେ ଗଣଶିକ୍ଷା ବିଭାଗ ଓ ସ୍ୱାସ୍ଥ୍ୟ ବିଭାଗ
ଭୁବନେଶ୍ୱର: ରାଜ୍ୟରେ ବର୍ତ୍ତମାନ କରୋନା ସଂକ୍ରମଣ ସ୍ଥିର ଅଛି । ପାର୍ବଣର ପ୍ରଭାବ ୭ରୁ ୧୦ ଦିନ ଭିତରେ ଜଣା ପଡ଼ିବ । ପାର୍ବଣରେ ଯେଭଳି ଭାବରେ ଲୋକମାନେ ଭିଡ଼ ଜମାଇଥିଲେ, ଏହାର ପ୍ରଭାବ ପଡ଼ିବାର ଆଶଙ୍କା ଥିବା ସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର କହିଛନ୍ତି । ତେବେ ମୁକାବିଲା ପାଇଁ ରାଜ୍ୟ ସରକାର ପ୍ରସ୍ତୁତ ଅଛନ୍ତି । ସର୍ଭେଲାନ୍ସକୁ ଜୋରଦାର କରାଯିବ । ଗ୍ରାମାଞ୍ଚଳରେ ଆଶାକର୍ମୀ ଓ ସହରାଞ୍ଚଳରେ ମ୍ୟୁନିସିପାଲଟି କର୍ତ୍ତୃପକ୍ଷ କଡ଼ା ନଜର ରଖିଛନ୍ତି । ସେଭଳି କିଛି ସଂକ୍ରମଣର ଆଭାସ ଆସିଲେ ସର୍ଭେଲାନ୍ସ କରାଯିବ ବୋଲି ସ୍ୱାସ୍ଥ୍ୟ ନିର୍ଦ୍ଦେଶକ କହିଛନ୍ତି ।
ଅନ୍ୟପଟେ ଆଗକୁ ସ୍କୁଲ ଖୋଲିବାକୁ ଥିବାବେଳେ ପିଲା ଯେପରି ସଂକ୍ରମିତ ନହୁଅନ୍ତି, ସେଥିପ୍ରତି ଧ୍ୟାନ ଦିଆଯିବ । ସ୍କୁଲ ଖୋଲିବା ପରେ ଗଣଶିକ୍ଷା ବିଭାଗ ଓ ସ୍ୱାସ୍ଥ୍ୟ ବିଭାଗ ମନିଟରିଂ କରିବେ ବୋଲି କହିଛନ୍ତି ଡାକ୍ତର ସିବିକେ ମହାନ୍ତି । ସ୍କୁଲ ପିଲାଙ୍କର କ’ଣ ସବୁ ଲକ୍ଷଣ ଅଛି କି ନାହିଁ, ଶିକ୍ଷକମାନେ ଟିକା ନେଇଛନ୍ତି କି ନାହିଁ ଏହାର ଅନୁଧ୍ୟାନ କରାଯିବ ବୋଲି ଡିଏମ୍ଇଟି ନିର୍ଦ୍ଦେଶକ ଡାକ୍ତର ସି.ବି.କେ ମହାନ୍ତି କହିଛନ୍ତି ।
ପିଲାଙ୍କୁ ଟିକା ଦିଆଯାଇନଥିବା ବେଳେ ଏବେ ସ୍କୁଲ ଖୋଲୁଛି । ଏଥିପ୍ରତି ଅଭିଭାବକମାନେ ତୀକ୍ଷଣ ନଜର ରଖିବା ଦରକାର । ବଡ଼ ଲୋକଙ୍କଠାରୁ ପିଲାଙ୍କୁ କରୋନା ବ୍ୟାପିବାର ଆଶଙ୍କା ରହିଛି । ତେଣୁ ସମସ୍ତେ ସଚେତନ ରହିବା ଜରୁରୀ । ଶିକ୍ଷକ, ଅଭିଭାବକ ସମସ୍ତେ ଟିକା ନେବା ଜରୁରୀ ବୋଲି ଡିଏମଇଟି ନିର୍ଦ୍ଦେଶକ ଡାକ୍ତର ସିବିକେ ମହାନ୍ତି କହିଛନ୍ତି ।
ନଭେମ୍ବର ୨ରୁ ଜୟପୁରକୁ ବିମାନ ଉଡ଼ାଣ, ସପ୍ତାହକୁ ୩ ଦିନ ସେବା ଯୋଗାଇବ ଇଣ୍ଡିଗୋ
ଭୁବନେଶ୍ୱର: ଆକାଶ ମାର୍ଗରେ ଭୁବନେଶ୍ୱର ସହ ଯୋଡ଼ି ହେବ ଗୋଆ ଓ ରାଜସ୍ଥାନ । ଆସନ୍ତା ନଭେମ୍ବର ୨ ତାରିଖରୁ ଭୁବନେଶ୍ୱରରୁ ରାଜସ୍ଥାନରୁ ଜୟପୁରକୁ ଆରମ୍ଭ ହେବ ବିମାନ ସେବା । ଜୟପୁର-ଭୁବନେଶ୍ୱର ମଧ୍ୟରେ ବିମାନ ସେବା ଯୋଗାଇବ ଇଣ୍ଡିଗୋ । ଏହି ସେବା ସପ୍ତାହକୁ ତିନିଦିନ ମିଳିବ ।
ଅନ୍ୟପଟେ ଡିସେମ୍ବର ୧ ତାରିଖରୁ ଭୁବନେଶ୍ୱରରୁ ଗୋଆ ସିଧା ସଳଖ ଉଡ଼ିବ ବିମାନ । ସପ୍ତାହକ ସାତ ଦିନ ଭୁବନେଶ୍ୱରରୁ ଗୋଆ ବିମାନ ସେବା ଯୋଗାଇବ ଇଣ୍ଡିଗୋ । ଏନେଇ ଭୁବନେଶ୍ୱର ବିମାନବନ୍ଦରର ନିର୍ଦ୍ଦେଶକ ଡ. ପ୍ରଭାତ ରଞ୍ଜନ ବେଉରିଆ ସୂଚନା ଦେଇଛନ୍ତି ।
ଏବେ ଭୁବନେଶ୍ୱରରୁ ସିଧାସଳଖ କୋଲକାତା, ବେଙ୍ଗଳୁରୁ, ଦିଲ୍ଲୀ, ହାଇଦ୍ରାବାଦ, ମୁମ୍ବାଇ. ଆହ୍ଲାବାଦ, ଅହମଦାବାଦ, ଚେନ୍ନାଇ, ଝାରସୁଗୁଡ଼ା, ବାରଣାସୀକୁ ବିମାନ ଉଡ଼ାଣ କରୁଛି ।
’କାଳିଆ’ ଯୋଜନା ଦ୍ୱାରା ବର୍ଷକୁ ଉପକୃତ ହେଉଛନ୍ତି ପ୍ରାୟ ୫୬ ଲକ୍ଷରୁ ଅଧିକ ଚାଷୀ
ଭୁବନେଶ୍ୱର: ଓଡ଼ିଶା ଏକ କୃଷି ବହୁଳ ରାଜ୍ୟ । ଅଧିକାଂଶ ଲୋକେ କୃଷି ଉପରେ ନିଭର୍ର କରି ନିଜ ପରିବାର ଚଳାନ୍ତି । ରାଜ୍ୟରେ ନାମମାତ୍ର ଚାଷୀ ଓ ଭାଗ ଚାଷୀଙ୍କ ସଂଖ୍ୟା ବି ଅଧିକ । ବିପର୍ଯ୍ୟୟ କାରଣରୁ ଚାଷ ନଷ୍ଟ ହେଲେ ଏମାନଙ୍କ ମୁଣ୍ଡ ଉପରେ ଚଡ଼କ ପଡ଼ିଥାଏ । ଚାଷ ଓ ଚାଷୀ ଅର୍ଥନୀତିର ମେରୁଦଣ୍ଡ କୁହାଯାଉଥିଲେ ମଧ୍ୟ ଏମାନଙ୍କ ଆର୍ଥିକ ସ୍ଥିତି ସୁଧାରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନେଇଛନ୍ତି ବଳିଷ୍ଠ ପଦକ୍ଷେପ । ୨୦୧୮ ଡିସେମ୍ବର ୨୧ ତାରିଖରେ ରାଜ୍ୟରେ ଆାରମ୍ଭ କରିଛନ୍ତି କାଳିଆ ଯୋଜନା । କୃଷି କ୍ଷେତ୍ରରେ ଅର୍ଥ ବିନିଯୋଗ ଏବଂ କୃଷକମାନଙ୍କର ନିରାପତ୍ତା ରାଜ୍ୟରେ ଦାରିଦ୍ର୍ୟ ଦୂରୀକରଣ ଏବଂ ସମୃଦ୍ଧିର ଧାରାକୁ ତ୍ୱରାନ୍ୱିତ କରିଥାଏ । ‘କାଳିଆ’ (କୃଷକଙ୍କ ଜୀବିକା ଏବଂ ଆୟ ବୃଦ୍ଧି ପାଇଁ ସହାୟତା ) ଯୋଜନା ଏ କ୍ଷେତ୍ରରେ ଏକ ମାଇଲଖୁଣ୍ଟ ।
‘କାଳିଆ’ ଯୋଜନା ରାଜ୍ୟରେ ଚାଷୀ ଓ ଚାଷର ଉନ୍ନତି ପାଇଁ ବେଶ୍ ସହାୟକ ହେଉଛି । ବାସ୍ତବ ଦୃଷ୍ଟିକୋଣ ଉପରେ ଆଧାରିତ ଏହି ଦୂରଦୃଷ୍ଟି ସମ୍ପନ୍ନ ଯୋଜନା ମାଧ୍ୟମରେ ବର୍ଷକୁ ୧୦,୦୦୦ କୋଟି ଟଙ୍କାରୁ ଊର୍ଦ୍ଧ୍ଵ ରାଶି ବିନିଯୋଗ କରାଯାଇ ରାଜ୍ୟର ଅସମର୍ଥ କୃଷି ପରିବାର, ଭୂମିହୀନ ଚାଷୀ ଏବଂ ନାମମାତ୍ର ଚାଷୀଙ୍କୁ ଋଣ ଯନ୍ତା ଏବଂ ଦାରିଦ୍ର୍ୟରୁ ମୁକ୍ତ କରିବା ଏହାର ଲକ୍ଷ୍ୟ। ‘କାଳିଆ’ ଯୋଜନା ମାଧ୍ୟମରେ ରାଜ୍ୟ ସରକାର ୯୨ ପ୍ରତିଶତ ଚାଷୀ ଏବଂ ପ୍ରାୟ ସମସ୍ତ ଅଭାବଗ୍ରସ୍ତ ଭୂମିହୀନ ଚାଷୀ ମାନଙ୍କୁ ପରିସର ଭୁକ୍ତ କରିବା ପାଇଁ ବ୍ୟବସ୍ଥା କରିଛନ୍ତି ।
ଏହି ଯୋଜନା ମାଧ୍ୟମରେ ଏହି ସମସ୍ତ ହିତାଧିକାରୀ ବ୍ୟାଙ୍କ ଜମାଖାତାକୁ ସିଧାସଳଖ ସହାୟତା ରାଶି ପ୍ରେରଣ କରାଯିବାର ବ୍ୟବସ୍ଥା କରାଯାଇଛି । ରାଜ୍ୟର ସମସ୍ତ କ୍ଷୁଦ୍ର ଓ ନାମମାତ୍ର କୃଷକଙ୍କୁ ପ୍ରତି ରବି ଓ ଖରିଫ ଋତୁରେ ଚାଷ କାର୍ଯ୍ୟ କରିବା ପାଇଁ ବିହନ, ସାର, କୀଟନାଶକ ଔଷଧ କିଣିବା ସହିତ ମଜୁରୀ ଓ ଆନୁଷଙ୍ଗିକ ଅନ୍ୟାନ୍ୟ କାର୍ଯ୍ୟ ନିମନ୍ତେ ୫ ଗୋଟି ଫସଲ ଋତୁରେ ମୋଟ୍ ୨୫ ହଜାର ଟଙ୍କାର ସହାୟତା ପ୍ରଦାନ କରାଯିବ । ଏହି ଯୋଜନା ଚଳିତ ୨୦୧୮-୧୯ ରବି ଋତୁରୁ କାର୍ଯ୍ୟକାରୀ କରାଯାଉଛି ।
ଗ୍ରାମାଞ୍ଚଳର ଭୂମିହୀନ ଚାଷୀ ପରିବାର ପାଇଁ କୃଷି ଭିତ୍ତିକ ଆନୁଷଙ୍ଗିକ କାର୍ଯ୍ୟ ଯଥା କ୍ଷୁଦ୍ର ଛେଳିପାଳନ ୟୁନିଟ୍, କ୍ଷୁଦ୍ର କୁକୁଡା ପାଳନ ୟୁନିଟ, ବତକ ପାଳନ ୟୁନିଟ୍, ମତ୍ସ୍ୟଜୀବୀମାନଙ୍କୁ ମାଛଧରା ଉପକରଣ , ଛତୁଚାଷ ଓ ମହୁଚାଷ ଇତ୍ୟାଦି ନିମନ୍ତେ ୧୨,୫୦୦ ଟଙ୍କାର ଆର୍ଥିକ ସହାୟତା ପ୍ରଦାନ କରାଯିବାର ବ୍ୟବସ୍ଥା ରହିଛି । ରାଜ୍ୟର ଅନୁସୂଚିତ ଜାତି ଓ ଜନଜାତି ବ୍ୟକ୍ତି ମାନଙ୍କ ପାଇଁ ଏହି ଯୋଜନା ବିଶେଷ ଭାବେ ସହାୟକ ହେଉଛି । ଯେଉଁ କ୍ଷୁଦ୍ର, ନାମମାତ୍ର ତଥା ଭୂମିହୀନ କୃଷି ପରିବାର ଚାଷୀ ବାର୍ଦ୍ଧକ୍ୟ, ଅକ୍ଷମତା କିମ୍ବା ରୋଗଦ୍ୱାରା ଆକ୍ରାନ୍ତ ହୋଇ କୃଷି କାର୍ଯ୍ୟ ଓ ଜୀବିକା ଉପାର୍ଜନ କରିବା ନିମନ୍ତେ ଅସମର୍ଥ, ସେମାନଙ୍କ ପରିବାର ଜୀବିକା ନିର୍ବାହ କରିବା ପାଇଁ ଏକକାଳୀନ ୧୦,୦୦୦ ଟଙ୍କାର ଆର୍ଥିକ ସହାୟତା ମିଳୁଛି । ପ୍ରତିବର୍ଷ ୫ ଲକ୍ଷ ପରିବାର ଏହି ଯୋଜନାରେ ଅନ୍ତର୍ଭୁକ୍ତ ହେଉଛନ୍ତି ।
ସାମାଜିକ ସୁରକ୍ଷା, ସ୍ୱାସ୍ଥ୍ୟ ସୁରକ୍ଷା, ଖାଦ୍ୟ ସୁରକ୍ଷା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯେଭଳି ସ୍ୱତନ୍ତ୍ର ଯୋଜନା ପ୍ରଣୟନ କରିଛନ୍ତି । ଚାଷୀ ଓ ଚାଷ ପାଇଁ ପ୍ରଭୁ ଜଗନ୍ନାଥଙ୍କ ନାମରେ ନାମିତ ’କାଳିଆ’ ଯୋଜନା ଦ୍ୱାରା ବର୍ଷକୁ ପ୍ରାୟ ୫୬ ଲକ୍ଷରୁ ଅଧିକ ଚାଷୀ ଉପକୃତ ହେଉଛନ୍ତି ।
ଡିଜେଲ୍ ଦର ବୃଦ୍ଧି ପରେ ବଢ଼ିଲା ବସ୍ ଭଡ଼ା, ଆଜିଠୁ ଲାଗୁ
ଭୁବନେଶ୍ୱର: ତେଲ ପରେ ବସ୍ ଭଡ଼ାରେ ବୃଦ୍ଧି । ସାଧାରଣ ବସ୍ ଭଡ଼ା କିଲୋମିଟର ପିଛା ୩ ପଇସା ବଢ଼ିଥିବା ବେଳେ ଏକ୍ସପ୍ରେସ୍ ବସ୍ ଭଡ଼ା ୩ ପଇସା ବୃଦ୍ଧି ପାଇଛି । ସେହିଭଳି ଡିଲକ୍ସ ବସ୍ ଭଡ଼ା କିଲୋମିଟର ପିଛା ୬ ପଇସା, ଏସି ଡିଲକ୍ସ ବସ୍ ଭଡ଼ା ୬ ପଇସା ଓ ସୁପର ପ୍ରିମିୟମ୍ ବସ୍ ଭଡ଼ା ୯ ପଇସା ବୃଦ୍ଧି କରାଯାଇଛି ।
ପୂର୍ବରୁ ସାଧାରଣ ବସ୍ ଭଡ଼ା କିଲୋମିଟର ପିଛା ୮୯ ପଇସା ଥିଲା । ଏବେ ୯୨ ପଇସାକୁ ବୃଦ୍ଧି ପାଇଛି । ସେହିଭଳି ଏକ୍ସପ୍ରେସ୍ ବସ୍ ଭଡ଼ା ୯୩ ପଇସାରୁ ୯୬ ପଇସାକୁ ବଢ଼ିଛି । ଡିଲକ୍ସ ବସ୍ ଭଡ଼ା ୧ ଟଙ୍କା ୨୯ ପଇସାରୁ ବୃଦ୍ଧି ପାଇ ୧ ଟଙ୍କା ୩୫ ପଇସା ହୋଇଛି । ଏସି ଡିଲକ୍ସ ବସ୍ ଭଡ଼ା ୧ ଟଙ୍କା ୫୭ ପଇସାରୁ ବଢ଼ି ୧ ଟଙ୍କା ୬୩ ପଇସା, ସୁପର ପ୍ରିମିୟମ୍ ବସ୍ ଭଡ଼ା ୨ ଟଙ୍କା ୪୪ ପଇସାରୁ ବଢ଼ି ୨ ଟଙ୍କା ୫୩ ପଇସା ହୋଇଛି ।
ଜୁଲାଇ ପହିଲାରେ ଡିଜେଲ୍ ଦର ୯୭ ଟଙ୍କା ରହିଥିଲା । ଆଜି ସୁଦ୍ଧା ଡିଜେଲ୍ ଲିଟର ପିଛା ଦରରେ ପ୍ରାୟ ୬ ଟଙ୍କା ୧୭ ପଇସା ବଢ଼ିଛି । ସେହି ଅନୁସାରେ ବୃଦ୍ଧି ପାଇଛି ବସ୍ ଭଡ଼ା ।