spot_img
Home Blog Page 5075

କାଶ୍ମୀରରେ TRF କମାଣ୍ଡର ସୁରକ୍ଷା ବଳଙ୍କ ସହ ସଂଘର୍ଷରେ ନିହତ

ଶ୍ରୀନଗର: ଜମ୍ମୁ କାଶ୍ମୀରରେ ଆତଙ୍କବାଦ ବିରୋଧରେ ସେନାର ବଡ଼ ସଫଳତା। କୁଲଗାମରେ ସେନା ଓ ଆତଙ୍କବାଦୀଙ୍କ ମଧ୍ୟରେ ହୋଇଥିବା ଗୁଳି ବିନିମୟରେ ୫ ଜଣ ଆତଙ୍କବାଦୀଙ୍କ ମୃତ୍ୟୁ ଘଟିଛି । କୁଲଗାମର ପାମବେରେ ୩ ଓ ଗୋପାଳପୁରାରେ ଦୁଇ ଜଣ ଆତଙ୍କବାଦୀ ନିହତ ହୋଇଛନ୍ତି ।

ବିଶ୍ୱସ୍ତ ସୁତ୍ରରୁ ଖବର ପାଇ ସେନା ପକ୍ଷରୁ  ଏହି ଅପରେସନ୍ ଆରମ୍ଭ କରାଯାଇଥିଲା । ପରେ ପାମବେ ଅଞ୍ଚଳରେ ୩ ଆତଙ୍କବାଦୀଙ୍କୁ ଏନକାଉଣ୍ଟର କରାଯାଇଥିଲା । ସେନା ଚାରିପଟୁ ଉକ୍ତ ଅଞ୍ଚଳକୁ ଘେରି ଯିବା ସହ ଖସିବାକୁ କାହାକୁ ସୁଯୋଗ ଦେଇନଥିଲେ । ଖାଲି ଏତିକି ନୁହେଁ ସୁରକ୍ଷା ଦୃଷ୍ଟିକୁ ନଜରରେ ରଖି ପୂରା ଅଞ୍ଚଳରେ ଯାତାୟାତ ଉପରେ ରୋକ୍ ଲଗାଯାଇଥିଲା ।

ସେହିପରି କୁଲଗାମର ଗୋପଳପୁରା ଅଞ୍ଚଳରେ ସେନା ଓ ଆତଙ୍କବାଦୀ ମଧ୍ୟରେ ହୋଇଥିବା ଗୁଳି ବିନିମୟରେ ଦୁଇ ଆତଙ୍କବାଦୀ ନିହତ ହୋଇଥିଲେ । ମୃତ୍ୟୁ ବରଣ କରିଥିବା ଆତଙ୍କବାଦୀଙ୍କ ନାମ ଟପ୍ କମାଣ୍ଡର ଅଫାଫ୍ ସିକନ୍ଦର, ଶକିର, ହୖେଦର ଓ ଇବ୍ରାହିମ୍ ବୋଲି ଜଣାପଡିଛି ।

ଗତ କିଛି ଦିନ ହେବ ଆତଙ୍କବାଦୀଙ୍କୁ ମୂଳପୋଛ କରିବା ଲାଗି ସେନା ପକ୍ଷରୁ ଅଭିଯାନ ଆରମ୍ଭ ହୋଇଛି । ନିକଟରେ ମଧ୍ୟ ଶ୍ରୀନଗରର ହୈଦରପୋରା ଅଞ୍ଚଳରେ ସେନା ଓ ଆତଙ୍କବାଦୀଙ୍କ ମଧ୍ୟରେ ମୁହାଁମୁହିଁ ହୋଇଥିଲା ।

IPS ସ୍ତରରେ ପରିବର୍ତ୍ତନ: ବିନୟାନନ୍ଦ ଗୃହ ବିଭାଗର ଓଏସ୍‍ଡି, ସୁଧାଂଶୁ ଷଡଙ୍ଗୀଙ୍କୁ ରେଳବାଇ ପୁଲିସ୍‍ ଦାୟିତ୍ୱ

ଭୁବନେଶ୍ୱର: ଆଇପିଏସ୍‍ ସ୍ତରରେ ବିରାଟ ପଟପରିବର୍ତ୍ତନ  ।  ଅଦଳ ବଦଳ କରିଛନ୍ତି ରାଜ୍ୟ ସରକାର  ।  ୧୯୮୮ ବ୍ୟାଚ୍‍ ଆଇପିଏସ୍‍ ବିନୟାନନ୍ଦ ଝାଙ୍କୁ ଗୃହ ବିଭାଗର ଓଏସ୍‍ଡି ଭାବେ ନିଯୁକ୍ତ ଦେଇଛନ୍ତି ସରକାର  । ସେହିପରି ୧୯୮୯ ବ୍ୟାଚ୍‍ ଆଇପିଏସ୍‍ ପ୍ରାଣବିନ୍ଦୁ ଆଚାର୍ଯ୍ୟଙ୍କୁ ଓଏଚ୍‍ଆରସିର ଅତିରିକ୍ତ ପୁଲିସ୍‍ ମହାନିର୍ଦ୍ଦେଶ ଭାବେ ନିଯୁକ୍ତି ଦିଆଯାଇଛି  ।

ଅନ୍ୟ ପକ୍ଷରେ ୧୯୯୦ ବ୍ୟାଚ୍‍ ଆଇପିଏସ୍‍ ସୁଧାଂଶୁ ଷଡଙ୍ଗୀଙ୍କୁ ରେଳବାଇ ପୁଲିସ୍‍ ଓ ଉପକୂଳ ସୁରକ୍ଷା ଦାୟିତ୍ୱ, ୨୦୦୩ ବ୍ୟାଚ୍‍ ଆଇପିଏସ୍‍ ସଫିନ ଅହମ୍ମଦ ଅଗ୍ନିଶମ ଏବଂ ଗୃହରକ୍ଷୀ ବିଭାଗର ଆଇଜିପି  ଏବଂ ୨୦୧୩ ବ୍ୟାଚ୍‍ ଆଇପିଏସ୍‍ ସୁଶ୍ରୀ ଏଲ.ଡିଭ୍ୟାଙ୍କୁ ଢେଙ୍କାନାଳ ଏସ୍‍ପି ଭାବେ ନିଯୁକ୍ତି ଦେଇଛନ୍ତି ରାଜ୍ୟ ସରକାର  ।

 

ଦୋକାନୀଙ୍କୁ ଖଣ୍ଡାରେ ହାଣିଲେ ଲୁଟେରା

ମହାରାଷ୍ଟ୍ର : ମହାରାଷ୍ଟ୍ରର ବୁଲଡାଣା ଜିଲ୍ଲା ଅନ୍ତର୍ଗତ ଗତ ମଙ୍ଗଳବାର ରାତିରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଜଣେ ଦୋକାନୀଙ୍କୁ ଡକାୟତମାନେ ଖଣ୍ଡାରେ ହାଣି ହତ୍ୟା କରିଥିବା ଜଣାପଡ଼ିଛି । ଏହି ଘଟଣା ବୁଲଡାଣାର ଚିଖଲି ସିଟି ଏରିଆରେ ଥିବା ଏକ ଇଲେକ୍ଟ୍ରିକ ଦୋକାନ ଭିତରେ ଘଟିଥିଲା । ଯାହା ଦୋକାନ ବାହାର ଆଉ ଭିତରେ ଥିବା ସିସିଟିଭି କ୍ୟାମେରାରେ ରେକର୍ଡ ହୋଇଯାଇଥିଲା । ଦୋକାନ ମାଲିକ କମଳେଶ ପୋପଟ ଯେତେବେଳେ ଦୋକାନ ବନ୍ଦ କରି ଘରକୁ ବାହାରିଥିଲେ ଠିକ୍ ଏତିକିବେଳେ ଦୁଇ ଜଣ ଯୁବକ ମାସ୍କ ପିନ୍ଧିଥିବା ଅବସ୍ଥାରେ ଦୋକାନ ଭିତରକୁ ପ୍ରବେଶ କରିଥିଲେ । ଦୁଇ ଯୁବକଙ୍କ ମଧ୍ୟରୁ ଜଣେ ବନ୍ଧୁକ ବାହାର କରିବା ବେଳେ ଅନ୍ୟ ଜଣେ ପାଖରେ ଥିବା ଖଣ୍ଡା ବାହାର କରିବାର ସିସିଟିଭିରେ ଦେଖାଯାଇଥିଲା ।

ଏହି ମାରଣାସ୍ତ୍ରରେ ଉଭୟେ ଦୋକାନୀକୁ ଆକ୍ରମଣ କରିବା ପରେ ଦୋକାନୀ ଜଣକ ତାଙ୍କ ସହ ଲଢ଼େଇ କରିଥିଲେ । ମାତ୍ର ଖଣ୍ଡା ଧରିଥିବା ଯୁବକ ଜଣକ ଦୋକାନୀଙ୍କୁ ଉକ୍ତ ଖଣ୍ଡାରେ ହାଣିଦେଇଥିଲା । ଏହା ପରେ ଉଭୟ ଯୁବକ ଦୋକାନରେ ଥିବା ଟଙ୍କା ଲୁଟିବା ସଙ୍ଗେ ସଙ୍ଗେ ଅନ୍ୟ ମହଙ୍ଗା ଜିନିଷ ବାଇକରେ ନେଇଯାଇଥିବା ଦେଖାଯାଇଥିଲା । ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଦୋକାନୀ ଜଣଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ପୋଲିସ ମାମଲାର ଯାଞ୍ଚ କରିବା ସଙ୍ଗେ ସଙ୍ଗେ ଉଭୟ ଯୁବକଙ୍କୁ ଧରିବା ପାଇଁ ପ୍ରୟାସ ଚଳାଇଛି ।

ବିଗ୍ ବସରେ ଧୁମ୍ ମଚାଇଲେ ଭାରତୀୟ ଖେଳାଳି; ସ୍ମୃତିଙ୍କ ଶତକ; ହରମନପ୍ରୀତଙ୍କ ଧୂଆଁଧାର ୮୧ ରନ

ମେଲବର୍ଣ୍ଣ: ଅଷ୍ଟ୍ରେଲିଆରେ ଚାଲୁଥିବା ମହିଳା ବିଗ୍ ବସରେ ଦମ ଦେଖାଇଲେ ଭାରତୀୟ ଖେଳାଳି । ବୁଧବାର ଖେଳାଯାଇଥିବା ମ୍ୟାଚରେ ମେଲବର୍ଣ୍ଣ ଓ ସିଡନୀ ମଧ୍ୟରେ ଖେଳାଯାଇଥିଲା ମ୍ୟାଚ । ଏହି ମ୍ୟାଚରେ ଉଭୟ ଦଳ ପକ୍ଷରୁ ଜଲଓ୍ବା ଦେଖାଇଛନ୍ତି ଦୁଇ ଭାରତୀୟ ମହିଳା କ୍ରିକେଟର । ଟିମ୍ ଇଣ୍ଡିଆର ଓପନର ସ୍ମୃତି ମନ୍ଧାନା ଦମଦାର ଶତକ ହାସଲ କରିଥିଲେ । କିନ୍ତୁ ସ୍ମୃତି ମନ୍ଧାନାଙ୍କ ଶତକ ତାଙ୍କ ଦଳକୁ ବିଜୟ ଭେଟି ଦେଇପାରିନଥିଲା । ସ୍ମୃତି ମନ୍ଧାନା ୬୪ଟି ବଲ ଖେଳି ୧୧୪ ରନ ସଂଗ୍ରହ କରିଛନ୍ତି । ଏହି ପାରିରେ ସ୍ମୃତି ୧୪ଟି ଚୈକା ଥିବାବେଳେ ୩ଟି ଛକା ମାରିଥିଲେ ।

ସ୍ମୃତି ମନ୍ଧାନାଙ୍କ ଏହି ଶାନଦାର ପାରି ଫଳରେ Sydney Thunder Women ଟିମ୍ ୧୭୧ ରନ କରିପାରିଥିଲେ । ଯାହା ଫଳରେ ସିଡନୀ ୪ ରନରେ ପରାଜୟ ବରଣ କରିଥିଲା । ଯଦି ମେଲବର୍ଣ୍ଣ କଥା କହିବା ତାହାଲେ Melbourne Renegades Woman ନିର୍ଦ୍ଧାରିତ ୨୦ ଓଭରରେ ୧୭୫ ରନ କରିଥିଲା । ମେଲବର୍ଣ୍ଣ ତରଫରୁ ଟିମ୍ ଇଣ୍ଡିଆ ଅଧିନାୟକ ହରମନପ୍ରୀତ କୌର ୫୫ ବଲରେ  ୮୧ ର ଧୁଆଁଧାର ଇନିଂସ ଖେଳିଥିଲେ । ହରମନପ୍ରୀତଙ୍କ ଏହି ଇନିଂସରେ ସେ ୧୧ଟି ଚୌକା ମାରିଥିବାବେଳେ ୨ଟି ଛକା ମାରିଥିଲେ । ସବୁଠାରୁ ବଡ଼ କଥା ହେଉଛି ହରମନପ୍ରୀତ ତାଙ୍କ ଟିମ୍ ପାଇଁ ଶେଷ ଓଭର ବୋଲିଂ କରିଥିଲେ । ଯେତେବେଳେ କି ଶେଷ ଓଭରରେ ସିଡନୀକୁ ଦରକାର ଥିଲା ୧୩ ରନ । ଯାହାକୁ ଅଟକାଇ ଦେଇଥିଲେ ହରମନପ୍ରୀତ ଏବଂ ନିଜ ଦଳକୁ ବିଜୟ ଭେଟି ଦେଇଥିଲେ । କିନ୍ତୁ ଏହି ମ୍ୟାଚରେ ଦମଦାର ଶତକ ପାଇଁ ସ୍ମୃତି ମନ୍ଧାନାଙ୍କ ପ୍ଲେୟାର ଅଫ ଦି ମ୍ୟାଚ ପୁରସ୍କାର ମିଳିଥିଲା ।

ଲକଡାଉନରେ ପ୍ରଦୂଷଣ ହ୍ରାସ ‘ଓଜନସ୍ତର’ ବୃଦ୍ଧି

0

ଦିଲ୍ଲୀ : ଦିଲ୍ଲୀରେ ଲକଡାଉନ ଲଗାଯାଇଥିବା ବେଳେ ଦିଲ୍ଲୀ ବାୟୁମଣ୍ଡଳ ବିଶୁଦ୍ଧ ହେବା ସହ ଅନେକ ସଫା ମଧ୍ୟ ଦେଖାଯାଉଥିଲା । ଏପରିକି ଏଭେରେଷ୍ଟ ଶୃଙ୍ଗ ଦେଖାଯିବା ସହ ହିମାଳୟ ପର୍ବତର ଶିଖର ଦେଖାଯାଉଥିଲା । ପୂର୍ବରୁ ଦିଲ୍ଲୀରେ ଲକଡାଉନ ନିୟମ ଲଗାଯାଇଥିବାରୁ ଦିଲ୍ଲୀରେ ଅନେକ ମାତ୍ରାରେ ପ୍ରଦୂଷଣର ହାର କମ୍ ହୋଇଥିଲା ସତ ମାତ୍ର ଲକଡାଉନ କାରଣରୁ ଯେତେ ପରିମାଣରେ ବାୟୁ ପ୍ରଦୂଷଣ ହାର ହ୍ରାସ ହେବାର ଅନୁମାନ କରାଯାଇଥିଲା ସେତେ ମାତ୍ରାରେ ପ୍ରଦୂଷଣ ହାର କମିନଥିଲା । ଏହାର ବଡ଼ କାରଣ ଏବେ ଏକ ରିପୋର୍ଟରୁ ଜଣାପଡ଼ିଛି । ନିକଟରେ ଅର୍ନ୍ତରାଷ୍ଟ୍ରୀୟ ରିପୋର୍ଟ ଅନୁସାରେ ବାୟୁ ପ୍ରଦୂଷଣ ହ୍ରାସ ନ ହେବାର ମୁଖ୍ୟ କାରଣ ଓଜନସ୍ତର ।

କାନାଡ଼ା ସ୍ଥିତ ୟାର୍କ ୟୁନିଭର୍ସିଟି ରିପୋର୍ଟ ଅନୁଯାୟୀ ଲକଡାଉନ କାରଣରୁ ପ୍ରଦୂଷଣରେ ସହାୟ ହେଉଥିବା ପଦାର୍ଥ ହ୍ରାସ ହେଲା ସତ ମାତ୍ର ଓଜନସ୍ତରରେ କୈାଣସି ପରିବର୍ତ୍ତନ ଦେଖାଯାଇନଥିଲା । ଏହା ହ୍ରାସ ହେବା ପରିବର୍ତ୍ତେ ବୃଦ୍ଧି ପାଇଥିବାର ଦେଖାଦେଇଥିଲା । ୟାର୍କ ୟୁନିଭର୍ସିଟିର କର୍ମକର୍ତ୍ତାଙ୍କ କହିବାନୁସାରେ ଲକଡାଉନରେ ବାୟୁପ୍ରଦୂଷଣର ମାତ୍ରା ହ୍ରାସ ହୋଇଥିବାର ଦେଖାଯାଇଥିଲା ଏହାର କାରଣ ଥିଲା ଦିଲ୍ଲୀରେ ଯାନବାହାନ ଚଳାଚଳ ଉପରେ ଲଗାଯାଇଥିଲା ପ୍ରତିବନ୍ଧକ । ଯାତାୟତ ବ୍ୟବସ୍ଥା ଅନେକ ମାତ୍ରାରେ କମିଯାଇଥିବାରୁ ପ୍ରଦୂଷଣ ମାତ୍ରା କମ୍ ହେବାର ଦେଖାଯାଇଥିଲା । ଏହି କାରଣରୁ ଆକାଶ ନିର୍ମଳ ଦେଖାଯାଉଥିଲା ।

ଏହି ରିପୋର୍ଟ ଅନୁସାରେ ଓଜନସ୍ତର ଦିଲ୍ଲୀରେ ଲକଡାଉନ ସମୟରେ ପ୍ରଦୂଷଣରେ ସହାୟ ହେଉଥିବା ପଦାର୍ଥ ଅନେକ ମାତ୍ରାରେ ହ୍ରାସ ହେଲା ସତ ମାତ୍ର ଓଜନସ୍ତର ଖୁବ୍ ବୃଦ୍ଧି ପାଇଥିଲା । ବାୟୁମଣ୍ଡଳ ସହ ଆକାଶ ଅନେକ ସଫା ଦେଖାଯିବା ସଙ୍ଗେ ସଙ୍ଗେ ସୂର୍ଯ୍ୟଙ୍କର ଉଜ୍ଜ୍ୱଳ କିରଣ ମଧ୍ୟ ଦେଖାଦେଇଥିଲା । ମାତ୍ର ଏହି କାରଣରୁ ୩୦ ପ୍ରତିଶତ ଓଜନସ୍ତର ବୃଦ୍ଧି ପାଇଥିଲା ।

ସୁର କୋଭିଡ଼ ସଂକ୍ରମିତ, ସଂଗରୋଧରେ ରହିବେ ପତି-ପତ୍ନୀ

ଭୁବନେଶ୍ୱର: ମାସ୍କ ପିନ୍ଧୁନଥିଲେ  । ଭୂତାଣୁକୁ ବେଖାତିର କରୁଥିଲେ  । ଏବେ ସଂକ୍ରମିତ ହେଲେ  । ଜଟଣୀ ବିଧାୟକ ତଥା ବରିଷ୍ଠ କଂଗ୍ରେସ ନେତା ସୁର ରାଉତରାୟଙ୍କୁ କରୋନା  । ସୁର ଏବଂ ତାଙ୍କ ପତ୍ନୀ ଉଭୟେ କୋଭିଡ଼ ସଂକ୍ରମିତ ହୋଇଥିବା ଜଣାପଡ଼ିଛି  । ମେଡ଼ିକାଲରେ କୋଭିଡ଼ ପରୀକ୍ଷା କରାଇବା ପରେ ତାଙ୍କ ଠାରେ କରୋନା ପଜିଟିଭ ଥିବା ଜଣାପଡିଥିଲା । ତେବେ ବର୍ତ୍ତମାନ ବିଧାୟକ ସୁର ରାଉତରାୟ ଏବଂ ତାଙ୍କ ପତ୍ନୀଙ୍କୁ କ୍ୱାରେଣ୍ଟାଇନରେ ରହିବା ପାଇଁ ନିର୍ଦ୍ଦେଶ ଦେଇଛନ୍ତି ଡାକ୍ତର  ।

ସବୁଠାରୁ ବଡ଼ କଥା ହେଉଛି, ଯେଉଁ ସମୟରେ ସମଗ୍ର ବିଶ୍ୱରେ କୋଭିଡର କହର ଜାରି ରହିଥିଲା  । ସେହି ସମୟରେ ସୁର କୋଭିଡର ନିୟମକୁ ବେଖାତିର କରିଚାଲିଥିଲେ  । ପ୍ରଥମ ପର୍ଯ୍ୟାୟ କୋଭିଡ  ଏବଂ ଦ୍ୱିତୀୟ ପର୍ଯ୍ୟାୟ କୋଭିଡରେ ମଧ୍ୟ ମାସ୍କ ପିନ୍ଧୁନଥିଲେ ବିଧାୟକ ସୁର ରାଉତରାୟ  ।

ବିଗତ କିଛିଦିନ ହେବ ସେ ଅସୁସ୍ଥ ରହିଥିଲେ  । ଏହାପରେ ଡାକ୍ତରଙ୍କ ପରାମର୍ଶ କ୍ରମେ କୋଭିଡ ଟେଷ୍ଟ କରିଥିଲେ ସୁର ରାଉତରାୟ ଏବଂ ତାଙ୍କ ପତ୍ନୀ  । ଶେଷରେ ଉଭୟଙ୍କ ଶରୀରରେ କୋଭିଡ ପଜିଟିଭ ଥିବା ନେଇ ଜଣାପଡ଼ିଛି  । କୋଭିଡ ନିୟମ ଅନୁପାଳନ କରି ବର୍ତ୍ତମାନ ସେ ସଂଗରୋଧରେ ରହିବେ ବୋଲି କହିଛନ୍ତି ଡାକ୍ତର  ।

ଭାରତ ନ୍ୟୁଜିଲାଣ୍ଡ ପ୍ରଥମ ଟି-୨୦; ଟସ୍ ଜିତି ବୋଲିଂ କରିବ ଟିମ୍ ଇଣ୍ଡିଆ

ଜୟପୁର:  ଭାରତ- ନ୍ୟୁଜିଲାଣ୍ଡ ମଧ୍ୟରେ ଆଜି ଖେଳାଯାଉଛି ପ୍ରଥମ ଟି-୨୦ ମ୍ୟାଚ୍ । ଏହି ଟି-୨୦ ସିରିଜର ପ୍ରଥମ ମ୍ୟାଚ ଜୟପୁରରେ ଖେଳାଯାଉଛି । ଆଜି ମ୍ୟାଚରେ ଟସ୍ ଜିତି ବୋଲିଂ କରିବକୁ ନିଷ୍ପତି ନେଇଛି ଟିମ୍ ଇଣ୍ଡିଆ । ତେବେ ଆଜି ଭାରତୀୟ ଦଳରେ ଡେବ୍ୟୁ କରିଛନ୍ତି ଅଲରାଉଣ୍ଡର ଭେଙ୍କଟେଶ ଆୟାର । ଚଳିତ ଆଇପିଏଲରେ କୋଲକାତା ନାଇଟ ରାଇଡର୍ସ ପକ୍ଷରୁ ଦମଦାର ପ୍ରଦର୍ଶନ କରିଥିଲେ ଆୟର । ଯାହା ଫଳରେ ସେ ନ୍ୟୁଜିଲାଣ୍ଡ ବିପକ୍ଷରେ ହେବାକୁ ଥିବା ଟି-୨୦ ସିରିଜ ପାଇଁ ଦଳରେ ସାମିଲ ହୋଇଥିଲେ ଏବଂ ପ୍ରଥମ ମ୍ୟାଚରେ ଭାରତ ପାଇଁ ମଧ୍ୟ ଡେବ୍ୟୁ କରିଛନ୍ତି ଭେଙ୍କଟେଶ ଆୟାର । ବହୁ ଦିନ ପରେ ଘରୋଇ ମାଟିରେ ମ୍ୟାଚ୍ ଖେଳିବାକୁ ଯାଉଛି ଟିମ୍ ଇଣ୍ଡିଆ । ଏଥି ପାଇଁ ସମସ୍ତ ଖେଳାଳି ବେଶ ଉତ୍ସାହିତ ଥିବା ସହ ବ୍ଲାକ କ୍ୟାପକୁ ଚକମା ଦେବା ପାଇଁ ଜୋରଦାର ଅଭ୍ୟାସ କରିଛନ୍ତି । ବିରାଟ କୋହଲୀଙ୍କ ଅବସର ପରେ ରୋହିତ ଶର୍ମାଙ୍କ ନେତୃତ୍ୱରେ ମୈଦାନକୁ ଓହ୍ଲାଇଛି ଟିମ୍ ଇଣ୍ଡିଆ ।

ଭାରତୀୟ ଦଳ : ରୋହିତ ଶର୍ମା (ଅଧିନାୟକ), କେ.ଏଲ୍ ରାହୁଲ, ସୂର୍ଯ୍ୟକୁମାର ଯାଦବ, ଶ୍ରେୟସ୍ ଆୟର, ଋଷଭ ପନ୍ତ (ଓ୍ବିକେଟ କିପର), ଭେଙ୍କଟେଶ ଆୟର୍, ଅକ୍ଷର ପଟେଲ, ରବିଚନ୍ଦ୍ରନ୍ ଅଶ୍ୱିନ୍, ଭୁବନେଶ୍ୱର କୁମାର, ଦୀପକ ଚହର ଏବଂ ମହମ୍ମଦ ସିରାଜ

ନ୍ୟୁଜିଲାଣ୍ଡ ଟିମ : ମାର୍ଟିନ ଗପ୍ଟିଲ, ଡାରିଲ ମିଚେଲ, ମାର୍କ ଚାପମାନ, ଗ୍ଲେନ ଫିଲିପ୍ସ, ଟିମ ସେଫର୍ଟ (ଓ୍ବିକେଟ କିପର), ରଚିନ ରବିନ୍ଦ୍ର, ମିଚେଲ ସାଣ୍ଟନର୍, ଟିମ୍ ସାଉଦୀ (ଅଧିନାୟକ), ଟଡ୍‌ ଆଷ୍ଟଲେ, ଲୋକି ଫର୍ଗୁସନ୍, ଟ୍ରେଣ୍ଟ ବୋଲ୍ଟ

ନଭେମ୍ବର ୩୦ ସୁଦ୍ଧା ଇ-ସର୍ଭିସକୁ ଅପଡ଼େଟ କରିବାକୁ ମୁଖ୍ୟ ଶାସନ ସଚିବଙ୍କ ନିର୍ଦ୍ଦେଶ

ଭୁବନେଶ୍ୱର: ମାନବ ସମ୍ବଳ ପରିଚାଳନାରେ ୫-ଟି ନୀତି ପ୍ରୟୋଗର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଚଳିତ ନଭେମ୍ବର ମାସ ୩୦ ତାରିଖ ସୁଦ୍ଧା ସମସ୍ତ ସରକାରୀ କର୍ମଚାରୀମାନଙ୍କର ଇ-ସର୍ଭିସକୁ ସଦ୍ୟତମ କରଣ ଶେଷ କରିବାକୁ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ସମସ୍ତ ବିଭାଗ ଏବଂ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି । ଲୋକସେବା ଭବନରୁ ଡିଜିଟାଲ୍ ମୋଡରେ ଅନୁଷ୍ଠିତ ଏକ ସମୀକ୍ଷା ବୈଠକରେ ଏହି କାର୍ଯ୍ୟର ଅଗ୍ରଗତି ବିଷୟ ଅନୁଧ୍ୟାନ କରି ସେ ଏହି ନିର୍ଦ୍ଦେଶ ଦେଇଛନ୍ତି । ମୁଖ୍ୟ ଶାସନ ସଚିବ କହିଥିଲେ ଯେ ଇ-ସର୍ଭିସକୁ ସରକାରୀ କର୍ମଚାରୀ ମାନଙ୍କ ଉତ୍ତମ ପରିଚାଳନାରେ ବହୁ ଭାବେ ସହାୟକ ହେବା ସହ ଅବସର ନେଉଥିବା କର୍ମଚାରୀମାନଙ୍କର ପେନସନ  ସମ୍ବନ୍ଧିତ ଦେୟ ପ୍ରଦାନକୁ ଅଧିକ ସ୍ୱଚ୍ଛ ଓ ତ୍ୱରାନ୍ୱିତ କରିବ । ଏହା ଉଭୟ କର୍ମଚାରୀ ଏବଂ ସରକାରୀ ବ୍ୟବସ୍ଥାକୁ ଅଧିକ କ୍ରିୟାଶୀଳ ଏବଂ ବୃତ୍ତିଗତ କରିବ ।

ନଭେମ୍ବର ୩୦ ତାରିଖ ସୁଦ୍ଧା ସମସ୍ତ ବିଭାଗର ପ୍ରମୁଖ ଶାସନ ସଚିବ, ବିଭାଗୀୟ ମୁଖ୍ୟ ଏବଂ ଜିଲ୍ଲାପାଳମାନେ ନିଜ ନିଜ ବିଭାଗ କର୍ମଚାରୀ ମାନଙ୍କର ଇ-ସର୍ଭିସ୍ବୁକ୍ କାର୍ଯ୍ୟର ସଦ୍ୟତନ ନିଶ୍ଚିତ କରାଇବା ପାଇଁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଥିଲେ । ଏହା ନହେଲେ ଡିସେମ୍ବର ମାସଠାରୁ ସଂପୃକ୍ତ କର୍ମଚାରୀ ଏବଂ ବିଭାଗୀୟ ନୋଡାଲ୍ ଅଧିକାରୀଙ୍କ ଦରମା ମିଳିବାରେ ବାଧା ସୃଷ୍ଟିହେବ ବୋଲି ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗର ବରିଷ୍ଠ ଅଧିକାରୀମାନେ ଜଣାଇଥିଲେ । ସମୀକ୍ଷାରୁ ଜଣାପଡ଼ିଥିଲା ଯେ ପୁର୍ତ୍ତ , କୃଷି ଓ କୃଷକ ସଶକ୍ତିକରଣ, ସମବାୟ, ଅନୁସୂଚିତ ଜାତି ଓ ଜନଜାତି ଉନ୍ନୟନ, ଅବକାରୀ, ଶିଳ୍ପ, ପର୍ଯ୍ୟଟନ, ଗୃହ, ଜଙ୍ଗଲ ପରିବେଶ ଏବଂ ଜଳବାୟୁ ପରିବର୍ତ୍ତନ, ଇସ୍ପାତ୍ ଓ ଖଣି, ନଗର ଓ ଗୃହ ଉନ୍ନୟନ, ସୂଚନା ଓ ଲୋକ ସଂପର୍କ, ଶ୍ରମ ଓ ନିୟୋଜନ ଆଦି ବିଭାଗର ପ୍ରାୟ ୯୫ ପ୍ରତିଶତ କର୍ମଚାରୀମାନଙ୍କର ଇ-ସର୍ଭିସ୍ବୁକ୍ ସଦ୍ୟତନ କରାସରିଛି ।

ସେହିପରି ବାଲେଶ୍ୱର, ବରଗଡ଼, ଭଦ୍ରଖ, ଝାରସୁଗୁଡ଼ା, କୋରାପୁଟ, ମାଲ୍କାନାଗିରି, ନବରଙ୍ଗପୁର, ରାୟଗଡ଼ା ଏବଂ ସୁବର୍ଣ୍ଣପୁର ଆଦି ଜିଲ୍ଲାରେ ପ୍ରାୟ ୯୨ ପ୍ରତିଶତ କାର୍ଯ୍ୟ ଶେଷ ହୋଇଛି । ଅନ୍ୟ ବିଭାଗ ଏବଂ ଜିଲ୍ଲାମାନେ ହାରାହାରି ୭୦ ପ୍ରତିଶତ କାର୍ଯ୍ୟଶେଷ କରିଛନ୍ତି । ବୈଠକରେ ମୁଖ୍ୟତଃ ଇ-ସର୍ଭିସ୍ବୁକ୍ ସଫଟ୍ଓୟାର ର କାର୍ଯ୍ୟକାରିତା, ସେଥିରେ ତଥ୍ୟ ସନ୍ନିବେଶ କରିବା, ଡାଟା ଏଣ୍ଟ୍ରି କାର୍ଯ୍ୟ ଆଦି ସମ୍ବନ୍ଧିତ ବିଷୟ ଆଲୋଚନା ହୋଇଥିଲା । ବିଭିନ୍ନ ଜିଲ୍ଲା ଏବଂ ବିଭାଗର ନୋଡାଲ୍ ଅଧିକାରୀମାନେ ନିଜ ନିଜର ଅଭିଜ୍ଞତା ଓ ସମସ୍ୟା ବିଷୟ ଜଣାଇଥିଲେ । ମୁଖ୍ୟ ଶାସନ ସଚିବଙ୍କ ନିର୍ଦ୍ଦେଶରେ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗର ବରିଷ୍ଠ ଅଧିକାରୀମାନେ ସେବୁର ଆଶୁ ସମାଧାନ କରିଥିଲେ ।

ଏଥର କଟ୍ରିନାଙ୍କର ପୋଲିସ ହେବାକୁ ଇଚ୍ଛା

ମୁମ୍ୱାଇ : ନିକଟରେ ହିନ୍ଦୀ ଚଳଚ୍ଚିତ୍ର ରୋହିତ ସେଟ୍ଟୀଙ୍କ ନିର୍ଦ୍ଦେଶିତ ସୂର୍ଯବଂଶୀ ରିଲିଜ୍ ହୋଇଯାଇଥିବା ବେଳେ ବକ୍ସ ଅଫିସରେ ଏହା ଚମତ୍କାର ପ୍ରଦର୍ଶନୀ କରିଛି । ଗତ ସେପ୍ଟେମ୍ୱର ମାସ ୭ ତାରିଖରେ ଏହି ଫିଲ୍ମରେ ଅଭିନୟ କରିଥିବା ଷ୍ଟାରଙ୍କ ସମେତ ରୋହିତ ସେଟ୍ଟୀ ସୂର୍ଯବଂଶୀର ପ୍ରମୋସନ ପାଇଁ ସୋନି ଚ୍ୟାନେଲରେ ପ୍ରସାରିତ ‘ଦ କପିଲ ଶର୍ମା ସୋ’ରେ ଆସିଥିଲେ । ଏହି ଚଳଚ୍ଚିତ୍ରରେ ଅଭିନୟ କରିଥିବା କଟ୍ରିନା କେଫ୍ ମଧ୍ୟ ସୋରେ ଉପସ୍ଥିତ ଥିଲେ । ରୋହିତଙ୍କ ନିର୍ଦ୍ଦେଶିତ ଏକ ଚଳଚ୍ଚିତ୍ରରେ ମହିଳା ପୋଲିସ ଚରିତ୍ରରେ ମୁଖ୍ୟ ଭୂମିକା ଭାବେ ଅଭିନୟ କରିବାକୁ ତାଙ୍କର ଖୁବ୍ ଇଚ୍ଛା ଅଛି ବୋଲି ସେ କହିଥିଲେ । ଏଥିପାଇଁ ରୋହିତଙ୍କ ଅନୁମତି ମାଗିଥିଲେ ।

ପୋଲିସ ଚରିତ୍ର ପର୍ଯ୍ୟବେସିତ ରୋହିତଙ୍କର ପ୍ରତ୍ୟେକ ଫିଲ୍ମ ପୁରୁଷକୈନ୍ଦ୍ରିକ, ସେ ସିମ୍ବା ହେଉ ଅବା ସିଂହମ୍ ଆଉ ଏବେ ସୂର୍ଯ୍ୟବଂଶୀରେ ପୋଲିସ ଚରିତ୍ରରେ ଥିବା ଅଜୟ ଦେବଗନ୍, ରଣବୀର ସିଂ, ଅକ୍ଷୟ କୁମାର ଏ ସମସ୍ତ ଚରିତ୍ର ପୁରୁଷକୈନ୍ଦ୍ରିକ । ଏବେ କଟ୍ରିନା ଏଭଳି ଚରିତ୍ରରେ ଅଭିନୟ କରିବାକୁ ଇଚ୍ଛା ପ୍ରକାଶ କରିଥିବା ବେଳେ ଖୁବ୍ ଶୀଘ୍ର ମହିଳା ପୋଲିସ ଭୂମିକାରେ ପର୍ଯ୍ୟବେସିତ ଏକ ଚଳଚ୍ଚିତ୍ର ରୋହିତ ଦର୍ଶକଙ୍କୁ ଭେଟିଦେବେ ବୋଲି କହିଛନ୍ତି । ଏଥିସହ ମହିଳା ପୋଲିସ ଟିମକୁ ନେଇ ଏହି ଫିଲ୍ମ ସେ ନ କରିପାରିଲେ ମଧ୍ୟ ଜଣେ ମହିଳାଙ୍କୁ ନେଇ ଏଭଳି ଚଳଚ୍ଚିତ୍ର ସେ ନିଶ୍ଚୟ କରିବେ । ମାତ୍ର ଏଥିପାଇଁ ଅନେକ ସମୟ ଲାଗିପାରେ ବୋଧହୁଏ ବର୍ଷେ ଉପରେ । ଦର୍ଶକଙ୍କୁ ଏଭଳି ଫିଲ୍ମ ଖୁବ୍ ପସନ୍ଦ ଆସିବ ବୋଲି ସେ କହିଥିଲେ । ଦର୍ଶକଙ୍କୁ ରୋହିତଙ୍କର ଆଗାମୀ ଚଳଚ୍ଚିତ୍ରକୁ ଅପେକ୍ଷା ।

ଟି-୨୦ ରାଙ୍କିଂ ଟପ୍-୫ରେ ନାହାଁନ୍ତି ଭାରତୀୟ ଖେଳାଳି; ବାବର ନମ୍ବର-୧ ବ୍ୟାଟ୍ସମ୍ୟାନ

ନୂଆଦିଲ୍ଲୀ: ଟି-୨୦ ବିଶ୍ବକପ ଶେଷ ହେବା ପରେ ଆଇସିସି ପୁରୁଷ ବର୍ଗରେ ଟି-୨୦ ରାଙ୍କିଂ ଜାରି କରିଛି । ଟି-୨୦ ବ୍ୟାଟ୍ସମ୍ୟାନ ତାଲିକାରେ ପ୍ରଥମ ସ୍ଥାନରେ ଅଛନ୍ତି ପାକିସ୍ତାନ କ୍ରିକେଟ ଟିମର ଅଧିନାୟକ ବାବର ଆଜମ । ସେହିପରି ଭାବରେ ଚଳିତ ଟି-୨୦ ବିଶ୍ବକପରେ ଅଷ୍ଟ୍ରେଲିଆ ପକ୍ଷରୁ ଦମଦାର ବୋଲିଂ କରିଥିବା ଆଡାମ ଜାମ୍ପା ବୋଲିଂ ରାଙ୍କିଂରେ ତୃତୀୟ ସ୍ଥାନକୁ ଉଠିଛନ୍ତି । ତେବେ ସବୁଠାରୁ ଆଶ୍ଚର୍ଯ୍ୟକର କଥା ହେଉଛି ନୂଆ କରି ପ୍ରକାଶ ପାଇଥିବା ରାଙ୍କିଂରେ ବ୍ୟାଟିଂ, ବୋଲିଂ କି ଅଲରାଉଣ୍ଡରେ ଟପ୍-୫ ମଧ୍ୟରେ କୌଣସି ଭାରତୀୟ ଖେଳାଳି ନାହାନ୍ତି । ଭାରତୀୟ ଦଳର ଓପନର ବ୍ୟାଟ୍ସମ୍ୟାନ କେଏଲ ରାହୁଲ ବ୍ୟାଟ୍ସମ୍ୟାନ ତାଲିକାରେ ଷଷ୍ଠ ସ୍ଥାନରେ ରହିଥିବା ବେଳେ ବିରାଟ କୋହଲି ଅଷ୍ଟମ ସ୍ଥାନରେ ରହିଛନ୍ତି । ବୋଲିଂ କି ଅଲରାଉଣ୍ଡରେ ତାଲିକାରେ କୌଣସି ଭାରତୀୟ ଟପ୍-୧୦ ମଧ୍ୟରେ ମଧ୍ୟ ନାହାନ୍ତି ।

ଟି-୨୦ ବିଶ୍ବକପରେ ଇଂଲଣ୍ଡ ବିପକ୍ଷରେ ସେମିଫାଇନାଲ ମ୍ୟାଚରେ ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନ ଡେବୋନ କନଓ୍ବେ ୪୬ ରନ କରିଥିଲେ । ଯାହା ଫଳରେ ସେ ବ୍ୟାଟ୍ସମ୍ୟାନ ତାଲିକାରେ ତିନୋଟି ସ୍ଥାନ ଉପରକୁ ଉଠି ଚତୁର୍ଥ ସ୍ଥାନରେ ପହଞ୍ଚିଛନ୍ତି । ସେହିପରି ବିଶ୍ବକପ ଫାଇନାଲରେ ନ୍ୟୁଜିଲାଣ୍ଡ ବିପକ୍ଷରେ ୫୦ ବଲରେ ୭୭ ରନ କରି ଅଷ୍ଟ୍ରେଲିଆକୁ ଚମ୍ପିଆନ କରିବାରେ ବଡ଼ ଭୂମିକା ତୁଲାଇଥିଲେ । ଯାହା ଫଳରେ ଟି-୨୦ ରାଙ୍କିଂରେ ସେ ୧୩ତମ ସ୍ଥାନରେ ଆସି ପହଞ୍ଚିଛନ୍ତି ।

ବୋଲିଂ ରାଙ୍କିଂ କଥା ଯଦି କହିବା ତାହାଲେ ବୋଲିଂ ରାଙ୍କିଂରେ ପ୍ରଥମ ସ୍ଥାନରେ ଅଛନ୍ତି ଶ୍ରୀଲଙ୍କା ସ୍ପିନର ଓ୍ବାନେଡୁ ହସରଙ୍ଗା ।ସେହିପରି ଦ୍ବିତୀୟ ସ୍ଥାନରେ ଅଛନ୍ତି ତାରବିଜ୍ ସାମସି । ତେବେ ବିଶ୍ବକପରେ ଦମଦାର ବୋଲିଂ ଫଳରେ ଦୁଇଟି ସ୍ଥାନ ଉପରକୁ ଉଠି ତୃତୀୟ ସ୍ଥାନରେ ପହଞ୍ଚିଛନ୍ତି ଆଡାମ ଜାମ୍ପା । ତେବେ ବୋଲିଂ ରାଙ୍କିଂରେ ଆଦିଲ ରସିଦ ଓ ରସିଦ ଖାନ ଚତୁର୍ଥ ଓ ପଞ୍ଚମ ସ୍ଥାନରେ ଅଛନ୍ତି । ଜମ୍ପାଙ୍କ ବ୍ୟତୀୟ ଜୋଶ ହେଜେଲଉଡ ଦୁଇଟି ସ୍ଥାନ ଉପରକୁ ଉଠି ଷଷ୍ଠ ସ୍ଥାନରେ ପହଞ୍ଚିଛନ୍ତି ।

ଅନ୍ୟପକ୍ଷରେ ଅଲରାଉଣ୍ଡର କଥା ଯଦି କହିବା ତାହାଲେ ଟି-୨୦ ବିଶ୍ବକପରେ ଦମଦାର ପ୍ରଦର୍ଶନ ଫଳରେ ୭ଟି ସ୍ଥାନ ଉପରକୁ ଉଠିଛନ୍ତି ଇଂଲଣ୍ଡ ଅଲରାଉଣ୍ଡର ଲିଅମ ଲିଭିଙ୍ଗଷ୍ଟୋନ । ଲିଭିଙ୍ଗଷ୍ଟୋନ ତୃତୀୟ ସ୍ଥାନରେ ଏବେ ରହିଛନ୍ତି ।  ତେବେ ଏହି ଲିଷ୍ଟରେ ପ୍ରଥମ ସ୍ଥାନରେ ଅଛନ୍ତି ଆଫଗାନିସ୍ତାନ ଅଲରାଉଣ୍ଡର ମହମ୍ମଦ ନବି ଏବଂ ଦ୍ବିତୀୟ ସ୍ଥାନରେ ଅଛନ୍ତି ଶକିବ ଉଲ ହାସନ । ତେବେ ଲିଭିଙ୍ଗଷ୍ଟୋନଙ୍କ ବ୍ୟତୀତ ମୋଏନ ଅଲ୍ଲୀ ବି ତିନୋଟି ସ୍ଥାନ ଉପରକୁ ଉଠି ନବମ ସ୍ଥାନରେ ରହିଛନ୍ତି ।