ମଙ୍ଗଳ ଗ୍ରହରେ ଜୀବନର ସନ୍ଧାନ ଜାରି ରହିଥିବା ବେଳେ ଏଲିଅନ୍ସକୁ ନେଇ ମଧ୍ୟ ଭିନ୍ନ ଭିନ୍ନ ଦାବି କରାଯାଉଛି । ଧରିତ୍ରୀ ବାହାରେ ଥିବା ମହାକାଶରେ ନିଶ୍ଚିତ ଭାବେ ଜୀବନ ରହିଛି ବା ଜୀବନର ସମ୍ଭାବନା ରହିଥିବା କୁହାଯାଉଛି । ଏହି ସନ୍ଧାନରେ ବିଶ୍ବର ଅନେକ ମହାକାଶ ସଂସ୍ଥା ଲାଗି ପଡ଼ିଛନ୍ତି । ମାତ୍ର ଚୀନ ଏହି ଅନୁମାନ ଓ ସମ୍ଭାବନା ମଧ୍ୟରେ ସଭିଙ୍କୁ ଆଶ୍ଚର୍ଯ୍ୟ କରିଦେଇଛି । କାନାଡ଼ାର ବୈଜ୍ଞାନିକଙ୍କ ସହ ମିଶି ଚୀନର ବୈଜ୍ଞାନିକମାନେ ଧରିତ୍ରୀ ତଳେ ଅନ୍ଧାରରେ ଜୀବନର ସନ୍ଧାନ କରିଛନ୍ତି । ଉକ୍ତ ସ୍ଥାନରେ ଆଜି ପର୍ଯ୍ୟନ୍ତ ସୂର୍ଯ୍ୟ କିରଣ ପହଞ୍ଚି ପାରି ନାହିଁ । ଦୈନନ୍ଦିନ ଜୀବନରେ ଆମ ସମ୍ମୁଖରେ ଆସୁଥିବା ଭୂକମ୍ପରୁ ଧରିତ୍ରୀ ତଳେ ଥିବା ଜୀବନ ଉର୍ଜା ନେଉଥିବା ରିସର୍ଚ୍ଚରେ ଦାବି କରାଯାଇଛି ।
ଧରିତ୍ରୀ ପୃଷ୍ଠରୁ କିଛି କିମି ତଳେ ଜୀବନର ଅସ୍ତିତ୍ବ ନାହିଁ ବୋଲି ବର୍ତ୍ତମାନ ସୁଦ୍ଧା ଗ୍ରହଣ କରାଯାଉଥିଲା । ମାତ୍ର ନିକଟରେ କରାଯାଇଥିବା ଏହି ସନ୍ଧାନ ଏକ ବିଶାଳ ଓ ସକ୍ରିୟ ଜୀବନମଣ୍ଡଳରର ଖୁଲାସା କରିଛି । ଚୀନ ବିଜ୍ଞାନ ଏକାଡେମୀର ଗୁଆଙ୍ଗଝୋଉ ଇନଷ୍ଟିଚ୍ୟୁଟ ଅଫ୍ ଜିୟୋକେମିଷ୍ଟ୍ରି (GIG)ର ରିସର୍ଚ୍ଚରେ ଏହାର ଜବାବ ଖୋଜିବା ପାଇଁ ପ୍ରୟାସ କରାଯାଇଛି । ଧରିତ୍ରୀର ଯେଉଁ ଭୂକମ୍ପ ଗତିବିଧି ହେଉଛି, ତାହା ଏହି ଜୀବଙ୍କ ପାଇଁ ଜେନେରେଟରର କାମ କରିଥାଏ । ଏହାଦ୍ବାରା ଏହି ଜୀବଙ୍କର ଜୀବନ ଚକ୍ର ଚାଲିଥାଏ ।
ବୈଜ୍ଞାନିକଙ୍କ ମୁତାବକ, ଯେଉଁଠାରେ ଜୀବନ ରହିଛି, ତାହା ଧରିତ୍ରୀ ଠାରୁ ବହୁତ ଗଭୀର । ସେଥିପାଇଁ ଆଜି ପର୍ଯ୍ୟନ୍ତ ତୀବ୍ର ପାରାବାଇଗଣୀ ବିକିରଣ ଓ କ୍ଷୁଦ୍ର ଗ୍ରହର ବିନାଶ ପରି ଘଟଣାର ପ୍ରଭାବ ପଡ଼ିନାହିଁ । ଏହି ସ୍ଥାପନା ଜୀବନର ଉତ୍ପତ୍ତି ଓ ବିକାଶ ପାଇଁ ମହତ୍ତ୍ବପୂର୍ଣ୍ଣ ପରିବେଶ ପ୍ରଦାନ କରିପାରେ ।
