ନନ୍ଦିଘୋଷ ବ୍ୟୁରୋ: ଦିଲ୍ଲୀରୁ ଚେନ୍ନାଇ ଯାଉଥିବା ଇଣ୍ଡିଗୋ ବିମାନରେ ନିଆଁ। ଏକ ମୋବାଇଲର ପାୱାର ବ୍ୟାଙ୍କରୁ ନିଆଁ ଲାଗିଥିବା ଜଣାପଡ଼ିଛି। ହାଇଦ୍ରାବାଦରେ ଏହାର ଜରୁରୀ ଅବତରଣ କରାଯାଇଥିଲା। ଜଣେ ଯାତ୍ରୀଙ୍କ ମୋବାଇଲ ପାୱାର ବ୍ୟାଙ୍କରେ ତ୍ରୁଟି ଯୋଗୁଁ ବିମାନର ଉପର ଲଗେଜ୍ କମ୍ପାର୍ଟମେଣ୍ଟରେ ନିଆଁ ଲାଗିଯାଇଥିଲା। ରାଜୀବ ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ବିମାନଟି ସୁରକ୍ଷିତ ଭାବେ ଅବତରଣ କରିଛି। ଏହି ଘଟଣାରେ ସମସ୍ତ ଯାତ୍ରୀ ଓ ବିମାନ କର୍ମଚାରୀ ସୁରକ୍ଷିତ ଅଛନ୍ତି। କ୍ୟାବିନ୍ କ୍ରୁ ସଦସ୍ୟମାନେ ଅଗ୍ନିନିର୍ବାପକ ଯନ୍ତ୍ର ବ୍ୟବହାର କରି ନିଆଁକୁ ଲିଭାଇଥିଲେ। ଏହି ବିମାନ ୧ଟା ୩୦ ମିନିଟ୍ରେ ଦିଲ୍ଲୀ ଛାଡ଼ିଥିଲା। ଚେନ୍ନାଇରେ ଅପରାହ୍ଣ ୪ଟାରେ ପହଞ୍ଚିବାର ଥିଲା। କିନ୍ତୁ ନିଆଁ ଲାଗିବା ପରେ ପାଇଲଟ୍ ବିମାନକୁ ହାଇଦ୍ରାବାଦ ଡାଇଭର୍ଟ କରିଥିଲେ।
ସୁନା ବିସ୍କୁଟ ନାଁରେ ଲୁଟ୍, ପୋଲିସ ଜାଲରେ ୩ ଅଭିଯୁକ୍ତ
ବରଗଡ଼: ବରଗଡ଼ରେ ନକଲି ସୁନା ବିସ୍କୁଟ ବିକ୍ରି ନାଁରେ ଲୁଟ୍ ଅଭିଯୋଗ । ସୁନା ବିସ୍କୁଟ କିଣିବାକୁ ଡାକି ଜଣେ ବ୍ୟକ୍ତିଙ୍କ ଠାରୁ ୪୨ ହଜାର ଟଙ୍କା ଛଡ଼ାଇ ନେବା ସହ ଆକ୍ରମଣ କରିଥିବା ଅଭିଯୋଗ । ଅଭିଯୋଗ ପରେ ୩ ଜଣଙ୍କୁ ଗିରଫ କଲା ପୋଲିସ । ରମେଶ ସାହୁଙ୍କୁ ଏକ ଅଜଣା ମୋବାଇଲ୍ ନମ୍ବରରୁ ଫୋନ୍ କରି ସୁନା ବିସ୍କୁଟ ଥିବା କହି ୪ ଲକ୍ଷ ଟଙ୍କାରେ ବିକ୍ରି କରିବା ପ୍ରସ୍ତାବ ଦେଇଥିଲେ ଅଭିଯୁକ୍ତ । ପରେ ଅକ୍ଟୋବର ୧୦ ତାରିଖ ସକାଳ ପ୍ରାୟ ୯ଟା ସମୟରେ ମେଲଛାମୁଣ୍ଡା ଥାନା ଅନ୍ତର୍ଗତ ଦୁବୁଲାବାହାଲ ଛକ ନିକଟକୁ ତାଙ୍କୁ ଡାକିଥିଲେ । ସେଠାରେ ଏକ ମୋଟର ସାଇକେଲରେ ଆସିଥିବା ୩ ଜଣ ବ୍ୟକ୍ତି ତାଙ୍କୁ ସୁନା ପରି ଦେଖାଯାଉଥିବା ଦୁଇଟି ବିସ୍କୁଟ ଆକୃତିର ଜିନିଷ ଦେଖାଇଥିଲେ ।
ତେବେ ଉକ୍ତ ଜିନିଷ ନକଲି ବୋଲି ସନ୍ଦେହ କରି ପ୍ରତିବାଦ କରିବା ପରେ ଅଭିଯୁକ୍ତମାନେ ତାଙ୍କୁ ଆକ୍ରମଣ କରି ୪୨ ହଜାର ଟଙ୍କା ନେଇ ସେଠାରୁ ଚମ୍ପଟ ମାରିଥିଲେ । ରମେଶ ଏନେଇ ଥାନାରେ ଅଭିଯୋଗ କରିଥିଲେ । ପୋଲିସ ତଦନ୍ତ କରି ବଲାଙ୍ଗୀର କାପାଣି ଗ୍ରାମର ଦୁର୍ଯ୍ୟୋଧନ ତାଣ୍ଡି, ବଡ଼ବେଜୁରୀ ଗ୍ରାମର ରାଜୁ ରାୟ ଏବଂ ମାଟିଖାଇ ଗ୍ରାମର ତପନ ଓରଫ ତପନେଶ୍ୱର ବାଗଙ୍କୁ ଗିରଫ କରିଛି । ପୋଲିସ ସେମାନଙ୍କଠାରୁ ୪୨ ହଜାର ଟଙ୍କା, ସୁନା ପରି ଦେଖାଯାଉଥିବା ଦୁଇଟି ଧାତୁ ଖଣ୍ଡ ଏବଂ ଏକ ବାଇକ ଜବତ କରିଛି ।
କ୍ୟାମ୍ପସରେ ନିର୍ବାଚନୀ ତାତି, ୧୫ରେ ଭୋଟ୍
ନନ୍ଦିଘୋଷ ବ୍ୟୁରୋ: ଛାତ୍ର ସଂସଦ ନିର୍ବାଚନକୁ ନେଇ କମ୍ପୁଛି କ୍ୟାମ୍ପସ। ୧୪ ତାରିଖରେ ମୁଁ କାହିଁକି ପ୍ରାର୍ଥୀ ସଭା, ୧୫ରେ ଭୋଟ। ନିଜ ସପକ୍ଷରେ ସମର୍ଥନ ଜୁଟାଇବାକୁ ବଳ କଷୁଛନ୍ତି ଛାତ୍ର ନେତା ଓ ନେତ୍ରୀ । କଲେଜ ଇଲେକ୍ସନରେ ସ୍ଥାନ ପାଇଛି ରାଜ୍ୟ ଓ ଜାତୀୟ ପ୍ରସଙ୍ଗ। ମୁଖ୍ୟ ନିର୍ବାଚନ କମିଶନର୍ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଜେନ- ଜି ଆନ୍ଦୋଳନ ବି ଏଥର ପ୍ରସଙ୍ଗ ପାଲଟିଛି। ଛାତ୍ର ରାଜନୀତି ସହିତ ରାଜ୍ୟର ପ୍ରମୁଖ ରାଜନୈତିକ ଦଳ ଯୋଡ଼ି ହୋଇ ରହିଥିବାରୁ ସମସ୍ତଙ୍କ ପାଇଁ ପତିଆରା ଲଢ଼େଇ ସମ୍ମାନର ପ୍ରଶ୍ନ ହୋଇଛି । ବିଭିନ୍ନ ଛାତ୍ର ସଂଗଠନ ପକ୍ଷରୁ ପ୍ରାର୍ଥୀ ଏବେ ନିର୍ବାଚନ ରଣାଙ୍ଗନରେ। କଲେଜ ନିର୍ବାଚନକୁ ନେଇ ରାଜ୍ୟର ବିଭିନ୍ନ ଜାଗାରୁ ନିର୍ବାଚନୀ ହିଂସା ଘଟଣା ସାମ୍ନାକୁ ଆସିଲାଣି । କିଛି ଜାଗାରେ ଅଶାନ୍ତ ପରିବେଶ ଯୋଗୁଁ ନିର୍ବାଚନ ବନ୍ଦ ହେଲାଣି । ଏଥିପାଇଁ ଶାସକ ଦଳର ନେତା ଓ ସେମାନଙ୍କ ପ୍ରରୋଚନାରେ ଚାଲିଥିବା ସରକାରୀ କଳକୁ ଦାୟୀ କରିଛନ୍ତି ବିରୋଧୀ । ପକ୍ଷପାତିତା, ଜୋର ଜବରଦସ୍ତି ଭଳି ଗୁରୁତର ଅଭିଯୋଗ ଆଣିଛନ୍ତି ବିସିଜେଡି ଓ ଏନଏସୟୁଆଇ।
କଲେଜ ନିର୍ବାଚନରେ ହିଂସାର କାରଣ ଶାସକ ଦଳ ବୋଲି ବିରୋଧୀଙ୍କ ଅଭିଯୋଗ ଉପରେ ଜବାବ ରଖିଛି ବିଜେପି। ଦଳ କହିଛି, କଲେଜ ନିର୍ବାଚନରେ ଆମର କୌଣସି ଭୂମିକା ନାହିଁ। ଏପରିକି ବିଜେପି ବିଧାୟକ ଅଶୋକ ମହାନ୍ତି କହିଛନ୍ତି, ଆମର କୌଣସି ଛାତ୍ର ଶାଖା ନାହିଁ। ବିଜେପି ପ୍ରତ୍ୟକ୍ଷ କିମ୍ବା ପରୋକ୍ଷ ଭାବେ କଲେଜ ରାଜନୀତି ସହ ଜଡି଼ତ ନୁହେଁ। ଯେଉଁଠି ହିଂସା ହେଉଛି, କଲେଜ କର୍ତ୍ତୃପକ୍ଷ ନିଷ୍ପତ୍ତି ନେଉଛନ୍ତି
ଦିଲ୍ଲୀରୁ ଦେଶବ୍ୟାପୀ ଛାତ୍ର ଆନ୍ଦୋଳନର ତାତି, ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଏକଜୁଟ ଜେନ୍-ଜି
ନନ୍ଦିଘୋଷ ବ୍ୟୁରୋ: ଦିଲ୍ଲୀରେ ଛାତ୍ର ଆନ୍ଦୋଳନର ଗର୍ଜନ ଏବେ ସାରା ଦେଶରେ ଛାଇଗଲାଣି । ନିର୍ବାଚନ କମିଶନ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଏକଜୁଟ ହେଉଛନ୍ତି ଜେନ-ଜି । କକ୍ରୋଚ ପାର୍ଟିର ତିନି ନେତା ମୁକୁଳିବା ପରେ ଆନ୍ଦୋଳନକୁ ବଳ ମିଳିଛି । ଆସନ୍ତାକାଲି କଂଗ୍ରେସ ଆନ୍ଦୋଳନରେ ସାମିଲ ହେବ। ସାରା ଦେଶରୁ କଂଗ୍ରେସ ନେତାଙ୍କ ଭିଡ଼ ଲାଗିବ ଦିଲ୍ଲୀରେ । ଓଡିଶାରୁ ଶତାଧିକ ନେତା ଯୋଗ ଦେବେ। ଗଣତନ୍ତ୍ରରେ ଯିଏ ପ୍ରତିବାଦ କରିବ, ତାର ସ୍ୱର ଚପାଇବାକୁ ସରକାର ବଳ ପ୍ରୟୋଗ କରିବା ଠିକ ନୁହେଁ। ସରକାରଙ୍କ ଅତ୍ୟଧିକ ଦମନମୂଳକ ନୀତିକୁ ସମାଲୋଚନା କରିଛୋ କଂଗ୍ରେସ । ଏହାର ପ୍ରତିବାଦରେ ରାସ୍ତାକୁ ଓହ୍ଲାଇଛି ବାମ ଦଳ।
ଭୋଟ ଚୋରି ଅଭିଯୋଗ ତୀବ୍ର ହେବା ପରେ ୟୁ ଟର୍ନ ନେଲେ ନିର୍ବାଚନ କମିଶନ। ପୁଣି ଥରେ ଆରମ୍ଭ ହେଲା ଏସଆଇଆର ପ୍ରକ୍ରିୟା। ଆନ୍ଦୋଳନକାରୀଙ୍କ ଦାବି ଗ୍ରହଣଯୋଗ୍ୟ ବୋଲି ଅନୁଭବ କଲେ।।ଧୀରେ ଧୀରେ ଯୁବ ଗୋଷ୍ଠୀ ଏଥିରେ ଯୋଡି ହେଲେ।।ଯେତେବେଳେ ଆନ୍ଦୋଳନ, ପ୍ରତିବାଦ ଜୋରଦାର ହେଲା, ସେତେବେଳେ ସରକାର ନିଜ କ୍ଷମତା ଜାହିର କଲେ। ବିରୋଧୀଙ୍କ ଏଭଳି ଅଭିଯୋଗର ଜବାବ ରଖିଛି ବିଜେପି।
ଦିଲ୍ଲୀରୁ ଡାକରା, ଆନ୍ଦୋଳନ ପାଇଁ ସଜବାଜ ଓଡ଼ିଶା କଂଗ୍ରେସ
ନନ୍ଦିଘୋଷ ବ୍ୟୁରୋ: ଦେଶର ରାଜଧାନୀରେ ଗର୍ଜିବେ ଓଡ଼ିଶା ନେତା । ବରିଷ୍ଠ ନେତାଙ୍କୁ ଦିଲ୍ଲୀ ଡକରା । ଇସିଆଇଙ୍କ ବିରୋଧରେ ଆନ୍ଦୋଳନରେ ହେବେ ସାମିଲ । ଇଣ୍ଡି ମେଣ୍ଟ ପକ୍ଷରୁ ଚାଲିଥିବା ଆନ୍ଦୋଳନରେ ଯୋଗଦେବେ ଓଡ଼ିଶାର ବରିଷ୍ଠ କଂଗ୍ରେସ ନେତା । ପିସିସି ସଭାପତି ଭକ୍ତ ଚରଣ ଦାସ କହିଛନ୍ତି, ରାଜ୍ୟ କଂଗ୍ରେସ ନେତାଙ୍କୁ ଦିଲ୍ଲୀରେ ପହଞ୍ଚିବାକୁ କୁହାଯାଇଛି । ଆସନ୍ତାକାଲି ଦିଲ୍ଲୀ ଜନ୍ତରମନ୍ତରରେ ଜୋରଦାର ଲଢେଇ ହେବ । ଦିଲ୍ଲୀରେ ଗଣତନ୍ତ୍ରକୁ ହତ୍ୟା କରିବାକୁ ଯୋଜନା ଚାଲିଛି । ଗଣତନ୍ତ୍ର ରକ୍ଷା ପାଇଁ ରାହୁଲ ଗାନ୍ଧୀ ଯେଉଁଭଳି ଲଢେଇ ଲଢୁଛନ୍ତି, ଆମେ ତାଙ୍କର ସାଥ ଦେବାକୁ ପଡିବ । ମୋତେ ଦିଲ୍ଲୀ ପୋଲିସ ଭୟବିତ୍ତ କରିପାରିବ ନାହିଁ.. ମୁଁ ଅସୁସ୍ଥ ଅଛି କିନ୍ତୁ ଲଢେଇ ଛାଡ଼ିବି ନାହିଁ । ଏହାପରେ ଓଡିଶା ସରକାର ମଧ୍ୟ ତିଷ୍ଠିବେ ନାହିଁ । ରାଜ୍ୟସରକାରଙ୍କ ବିରୋଧରେ ମଧ୍ୟ ବଡ ମୁଭମେଣ୍ଟ ହେବ । ଯେତେ ପୋଲିସ ଆସିଲେ ମଧ୍ୟ ଆନ୍ଦୋଳନକୁ ଅଟକାଇ ପାରିବେ ନାହିଁ । ଏଭଳି କହି ଡବଲ ଇଂଜନ ସରକାରକୁ ଚେତାବନୀ ଦେଇଛି କଂଗ୍ରେସ ।
ଦିଲ୍ଲୀରୁ ଡାକରା ଆସିବା ପରେ ଚଳଚଞ୍ଚଳ ଓଡ଼ିଶା କଂଗ୍ରେସ । ପୂର୍ବତନ ପିସିସି ସଭାପତି ଜୟଦେବ ଜେନା ଓ ବରିଷ୍ଠ କଂଗ୍ରେସ ନେତା ସନ୍ତୋଷ ସିଂହ ସାଲୁଜା ଦିଲ୍ଲୀ ଲଢେଇ ସାମିଲ ହେବେ ବୋଲି କହିଛନ୍ତି । ଯନ୍ତର ମନ୍ତର ଆନ୍ଦୋଳନକୁ ଅଧିକ ଶକ୍ତିଶାଳୀ କରିବାକୁ ଏଭଳି ନିଷ୍ପତି ନେଇଛି କଂଗ୍ରେସ । ପିସିସି ସଭାପତି, ପୂର୍ବତନ ପିସିସି ସଭାପତି, ସାଂସଦ, ବିଧାୟକ ମାନଙ୍କୁ ଦିଲ୍ଲୀ ଡାକରା ହୋଇଛି । ମୁଖ୍ୟ ନିର୍ବାଚନ ଆୟୋଗ ଜ୍ଞାନେସ କୁମାର ଇସ୍ତଫା ପ୍ରସଙ୍ଗରେ ଶକ୍ତି ପ୍ରଦର୍ଶନ କରିବାକୁ ଯୋଜନା କରିଛି କଂଗ୍ରେସ । କେବଳ ଓଡ଼ିଶା ନୁହେଁ ସମସ୍ତ ରାଜ୍ୟର କଂଗ୍ରେସ ନେତାମାନଙ୍କୁ ଦିଲ୍ଲୀ ଡାକରା ହୋଇଛି । ଗତକାଲି ଜନ୍ତରମନ୍ତରରୁ ଯେଉଁଭଳି ବର୍ବାରତାର ଦୃଶ୍ୟ ଦେଖିବାକୁ ମିଳିଛି, ଏହାକୁ ନିନ୍ଦା କରିଛି କଂଗ୍ରେସ । କେନ୍ଦ୍ର ସରକାର ଅଘୋଷିତ ଏମରଜନ୍ସୀ ଲାଗୁ କରିଛନ୍ତି ଦେଶରେ । ପୂର୍ବତନ ମୁଖ୍ୟମନ୍ତ୍ରୀ, ୩ ହଜାରରୁ ଉର୍ଦ୍ଧ ଯୁବକ- ଯୁବତୀଙ୍କୁ ଅଟକ ରଖାଯାଇଛି । ବିମାନ ଭିତରୁ ଯୁବକଙ୍କୁ ଗିରଫ କରାଯାଉଛି । ଦେଶରେ ଆଉ ଗଣତନ୍ତ୍ର ନାହିଁ ବୋଲି ଓଡିଶା କଂଗ୍ରେସ ନେତା ଅଭିଯୋଗ କରିଛନ୍ତି ।
ମାଆ ଲକ୍ଷ୍ମୀଙ୍କୁ ଦେଇଥିବା ପ୍ରତିଶ୍ରୁତି ରଖିଲେ ମହାପ୍ରଭୁ, ଶ୍ରୀକ୍ଷେତ୍ରରେ ଆରମ୍ଭ ହେଲା ଗୁପ୍ତ ଗୁଣ୍ଡିଚା
ନନ୍ଦିଘୋଷ ବ୍ୟୁରୋ: ମାଆଙ୍କୁ ଦେଇଥିବା ପ୍ରତିଶ୍ରୁତି ପାଳନ କଲେ ମହାପ୍ରଭୁ । ଶ୍ରୀକ୍ଷେତ୍ରରେ ଆରମ୍ଭ ହେଲା ଗୁପ୍ତ ଗୁଣ୍ଡିଚା । ଲୋକକଥା ଅନୁସାରେ ରଥଯାତ୍ରାରେ ଲକ୍ଷ୍ମୀଙ୍କୁ ସାଥିରେ ନେଇ ନଥିବାରୁ ଗୁପ୍ତ ଗୁଣ୍ଡିଚାରେ ନେବାକୁ ପ୍ରତିଶ୍ରୁତି ଦେଇଥିଲେ ମହାପ୍ରଭୁ । ତେଣୁ ସେହି ପ୍ରତିଶ୍ରୁତି ଓ ପରମ୍ପରାକୁ ରକ୍ଷା କରି ପୁରୀ ଶ୍ରୀମନ୍ଦିରରେ ଆରମ୍ଭ ହୋଇଛି ଗୁପ୍ତ ଗୁଣ୍ଡିଚା । ଆଶ୍ବିନ ମାସରେ ଷୋଳପୂଜା ସମୟରେ ପ୍ରଥମ ୮ ଦିନ ଦୁର୍ଗା ମାଧବ ଶ୍ରୀମନ୍ଦିର ପରିସରରେ ଥିବା ମାଆ ବିମଳାଙ୍କ ମନ୍ଦିର ଜଗମୋହନରେ ପୂଜା ପାଉଥିବା ବେଳେ ଶେଷ ୮ ଦିନ ଦୋଳମଣ୍ଡପ ସାହି ନାରାୟଣୀ ମନ୍ଦିରକୁ ବିଜେ କରିଥାନ୍ତି । ଶାକ୍ତ ଗୁଣ୍ଡିଚା ବା ଗୁପ୍ତ ଗୁଣ୍ଡିଚା ଭାବେ ଅଭିହିତ ଏହି ନିଆରା ପାରମ୍ପରିକ ଯାତ୍ରା କାହିଁ ପ୍ରାଚୀନ କାଳରୁ ଅନୁଷ୍ଠିତ ହୋଇଆସୁଛି । ଦୁର୍ଗାମାଧବ ଉପାସନାର ପ୍ରତୀକ ସ୍ୱରୂପ ଶ୍ରୀଜଗନ୍ନାଥ ଗୁପ୍ତଗୁଣ୍ଡିଚାରେ ମାଆ ମହାଲକ୍ଷ୍ମୀ ସ୍ଵରୁପା ମାଆ ଦୁର୍ଗାଙ୍କୁ ନେଇ ବିଜେ କରିଥାନ୍ତି ।
ଆଜି ସକାଳ ଧୂପ ନୀତି ପରେ ଦୁର୍ଗାମାଧବଙ୍କୁ ସ୍ୱତନ୍ତ୍ର ବିମାନରେ ବିଜେ କରାଯାଇଥିଲା । ପରେ ଘଣ୍ଟ ଛତା, ବୟଯନ୍ତ୍ରୀ ବଜାଯାଇ ଶ୍ରୀମନ୍ଦିରରୁ ଦୋଳମଣ୍ଡପ ସାହି ନାରାୟଣୀ ମନ୍ଦିରକୁ ବିଜେ କରାଯାଇଥିଲା । ସେଠାରେ ପହଞ୍ଚିବା ପରେ ସ୍ୱତନ୍ତ୍ର ଉପଚାରରେ ପୂଜାର୍ଚନା କରାଯାଇ ନାରାୟଣୀ ମନ୍ଦିରରେ ଦୁର୍ଗା ମାଧବ ଅବସ୍ଥାନ କରିଥିଲେ । ସ୍ୱତନ୍ତ୍ର ଭାବେ ଏଠାରେ ତାଙ୍କୁ ମାଣ୍ଡୁଅ ଓ ଖାଇକୋରା ଭୋଗ ଲାଗି କରାଯାଇଥିଲା । ତେବେ ଷୋଳ ପୂଜା ସମୟରେ ଏହି ନିଆରା ପରମ୍ପରାକୁ ଦର୍ଶନ କରି ଭକ୍ତ ମାନେ ବିଭୋର ହୋଇପଡିଥିଲେ ।
ଭଡ଼ା ନାଁରେ ୩୦ ଟ୍ରକ୍ ଚୋରି, ବନ୍ଧାହେଲେ ବାପା-ପୁଅ
ନନ୍ଦିଘୋଷ ବ୍ୟୁରୋ: ଗାଡ଼ି ମାଲିକ ଟଙ୍କା ସୁଝିସୁଝି ନୟାନ୍ତ । ଏଗ୍ରିମେଣ୍ଟ କରି ୩୦ ଟ୍ରକ ଗାଏବ । ପୋଲିସ ଜାଲରେ ସାତିର୍ ବାପା-ପୁଅ । ଭଡ଼ା ସୂତ୍ରରେ ନେବାକୁ କହି ରାଜ୍ୟ ବାହାରେ ବିକ୍ରି କରୁଥିଲେ ଅଭିଯୁକ୍ତ । ଅଭିଯୋଗ ଅନୁସାରେ, ଟ୍ରକ୍ ହାତକୁ ଆସିବା ପରେ ଗାଡ଼ିକୁ ନେଇ ଚମ୍ପଟ ମାରୁଥିଲେ ଅଭିଯୁକ୍ତ । ଓଡ଼ିଶାରେ ଗାଡ଼ି ମାଲିକ ଖୋଜୁଥିବା ବେଳେ ରାଜ୍ୟ ବାହାରେ ଗାଡ଼ି ବିକ୍ରି କରିଦେଉଥିବା ଅଭିଯୋଗ ହୋଇଛି । ଏହି ରାକେଟ୍ରେ ବାପା ନିରଞ୍ଜନ ମହାପାତ୍ର ଗାଡ଼ି ବିକ୍ରିର ଡିଲ୍ କରୁଥିବା ବେଳେ ବଡ଼ ପୁଅ ଅଶୋକ ମହାପାତ୍ର ଟ୍ରକ୍ ନେଇ ଫେରାର ହେଉଥିଲା ।
ଗୋଟିଏ କିମ୍ବା ଦୁଇଟି ନୁହେଁ, ୩୦ ଟି ଟ୍ରକ ଏହି କରିତକର୍ମା ବାପ ପୁଅ ଚୋରି କରିଥିବା ଜଣାପଡ଼ିଛି । ଟଙ୍କା କାରବାର ପାଇଁ ୧୫ରୁ ଅଧିକ ବ୍ୟାଙ୍କ୍ ଆକାଉଣ୍ଟ ବ୍ୟବହାର କରୁଥିଲେ ଅଭିଯୁକ୍ତ । ଯେଉଁ ଆକାଉଣ୍ଟ ଗୁଡିକୁ ସ୍କାନରକୁ ନେଇ ତଦନ୍ତ ଆରମ୍ଭ କରିଛି ପୋଲିସ । ଆଉ ଏହି କାରବାର ପଛରେ ଅନ୍ୟ କାହାର ସମ୍ପୃକ୍ତି କୁ ନେଇ ମଧ୍ୟ ତଦନ୍ତକୁ ଜୋରଦାର କରିଛି କମିଶନରେଟ ପୋଲିସ । ଅଭିଯୁକ୍ତଙ୍କ ନାଁରେ ପୂର୍ବରୁ ଭଞ୍ଜନଗର, ପିପିଲି, ବାଦାମବାଡ଼ି ଓ ବୌଦ୍ଧ ଭଳି ଅଞ୍ଚଳରେ ମଧ୍ୟ ମାମଲା ଥିବା ସୂଚନା ମିଳିଛି । ଗତ ଅଗଷ୍ଟ ମାସରେ ମଞ୍ଚେଶ୍ୱର ଅଂଚଳରୁ ଠିକ ସମାନ ଢଙ୍ଗରେ ଟ୍ରକ ଚୋରି ନେଇ ଅଭିଯୋଗ ଆସିବା ପରେ ପୋଲିସ ଆରମ୍ଭ କରିଥିଲା ତଦନ୍ତ । ସିସିଟିଭି ଓ ହ୍ୟୁମାନ ଇଣ୍ଟେଲ୍ଲିଜେନ୍ସ ଜରିଆରେ ଚମ୍ପୁଆରୁ ଧରାପଡିଥିଲେ ୨ ଅଭିଯୁକ୍ତ । ଆଜି ସେମାନଙ୍କୁ କୋର୍ଟଚାଲାଣ କରାଯାଇଛି।
କ୍ୟାମ୍ପସରେ ନିର୍ବାଚନୀ ତାତି, ପ୍ରଚାର ଜୋରଦାର
ନନ୍ଦିଘୋଷ ବ୍ୟୁରୋ: ଛାତ୍ର ସଂସଦ ନିର୍ବାଚନକୁ ନେଇ ଚଳଚଞ୍ଚଳ କଲେଜ କ୍ୟାମ୍ପସ । ବାଲେଶ୍ୱର ଫକୀର ମୋହନ ସ୍ୱୟଂଶାସିତ ମହାବିଦ୍ୟାଳୟରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବା ପରେ ଚାଲିଛି ଜୋରଦାର କ୍ୟାମ୍ପେନ । ବିଜେଡି ସରକାରଙ୍କ ଅମଳରେ ହୋଇଥିବା ବିକାଶକୁ ଅସ୍ତ୍ରକରି ଭୋଟ ନିଜ ସପକ୍ଷରେ ଆଣିବାକୁ ଜୋରଦାର ଉଦ୍ୟମ ଆରମ୍ଭ କରିଛି ବିସିଜେଡି । ଏହାସହ କଲେଜରେ ଥିବା ବିଭିନ୍ନ ମୌଳିକ ସମସ୍ୟାକୁ ମୁଦ୍ଦା କରି ଛାତ୍ରଛାତ୍ରୀଙ୍କୁ ଭେଟୁଛନ୍ତି ପ୍ରାର୍ଥୀ । ନିର୍ବାଚନ ପ୍ରଚାରରେ ଏବିଭିପି ମଧ୍ୟ ପଛରେ ପଡ଼ିନାହିଁ । ପ୍ରାର୍ଥିପତ୍ର ଯାଞ୍ଚ ପରେ ୬୯ ଜଣ ପ୍ରାର୍ଥୀ ନିର୍ବାଚନୀ ମଇଦାନରେ ଥିବା ବେଳେ ୧୮ ଜଣ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି । ନିର୍ବାଚିତ ହୋଇଥିବା ପ୍ରାର୍ଥୀଙ୍କ ପାଇଁ ଛୁଟୁଛି ଶୁଭେଚ୍ଛାର ସୂଅ ।
ନିର୍ବାଚନକୁ ନେଇ ଅନେକ କଲେଜରେ ଦେଖିବାକୁ ମିଳିଛି ହଙ୍ଗାମା । ପ୍ରାର୍ଥୀପତ୍ର ନାକଚ ହେବାପରେ କଟକ ଶୈଳବାଳା ସ୍ୱୟଂ ଶାସିତ ମହିଳା ମହାବିଦ୍ୟାଳୟ ସମେତ ଇନ୍ଦିରା ଗାନ୍ଧୀ ମହିଳା ମହାବିଦ୍ୟାଳୟ, ଏବଂ ଖ୍ରୀଷ୍ଟ କଲେଜରେ ନିର୍ବାଚନ ବନ୍ଦ୍ କରିବା ପାଇଁ ଏବିଭିପି ଛାତ୍ର ଛାତ୍ରୀ ଚକ୍ରାନ୍ତ କରୁଥିବା ଅଭିଯୋଗ ହୋଇଛି । ଯାହାକୁ ନିନ୍ଦା କରାଯାଇଛି । ସେପଟେ ୟପୁର ବିକ୍ରମ ଦେବ ବିଶ୍ବ ବିଦ୍ୟାଳୟରେ ଛାତ୍ର ନିର୍ବାଚନକୁ ନେଇ ରାଜନିତି ଜୋର ଧରିଛି । ଏକ ନିର୍ଦ୍ଦିଷ୍ଟ ଛାତ୍ର ସଂଗଠନର ଛାତ୍ର ମାନଙ୍କୁ ଜିତେଇବାକୁ ପ୍ରଶାସନ ଉଦ୍ୟମ କରୁଥିବା ଅଭିଯୋଗ କରିଛନ୍ତି ବିଧାୟକ । ସାମ୍ବାଦିକ ସମ୍ମିଳନୀରେ ଛାତ୍ର କଂଗ୍ରେସ ପକ୍ଷରୁ ପ୍ରାର୍ଥୀ ହେଇଥିବା ଛାତ୍ରମାନଙ୍କୁ ଭୋଟ ଦେବାକୁ ସେ ନିବେଦନ କରିଛନ୍ତି ।
ଦେବୀ ପୀଠରେ ଷୋଳ ପୂଜା
ଖୋର୍ଦ୍ଧା : ଦେବୀ ପୀଠରେ ଚାଲିଛି ଷୋଳ ପୂଜା। ଚଳଚଞ୍ଚଳ ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ ଗାଁପୁର ଗାଁର ବନଦୁର୍ଗା ମନ୍ଦିର। ରାଜା ରଜୁଡ଼ା ଅମଳରୁ ଏହି ମନ୍ଦିର ଅବସ୍ଥିତ। ପଶ୍ଚିମ ମୁଖା ମହାଦେବଙ୍କ ମନ୍ଦିର ପରିସରରେ ମାଆ ବନଦୁର୍ଗାଙ୍କ ମନ୍ଦିର ରହିଛି। ଷୋଳ ପୂଜାରେ ମନ୍ଦିର ପରିସର ଉତ୍ସବ ମୁଖର ହୋଇଥାଏ। ଘଣ୍ଟ ଘଣ୍ଟା, ଢୋଲରେ ପୀଠ କମ୍ପିଥାଏ। ଏଠାରେ ଏକ ଭିନ୍ନ ପରମ୍ପରା ରହିଛି , ଷୋଳ ପୂଜାରେ ପ୍ରତିଦିନ ଆମିଷ ଭୋଗ ହୁଏ। ଏହି ଆମିଷ ଭୋଗ ମହାଦେବ ଙ୍କ ପୂଜା ଥାଳିରେ ପ୍ରସାଦ ରୂପେ ମା ବନଦୁର୍ଗା ଙ୍କୁ ଅର୍ପଣ କରାଯାଏ।
ଆଜିଠାରୁ ଏଠାରେ ମଧ୍ୟ ନବରାତ୍ର ପୂଜା ହେଉଛି । ଷୋଳପୂଜାରେ ପ୍ରତି ସନ୍ଧ୍ୟାରେ ମା ଙ୍କ ପାଖେ ଆଳତି ହୁଏ। ପରଂପରା ଅନୁସାରେ ପୂଜକ ମାନେ ପାଳି କରି ପୂଜା ଏବଂ ଆଳତି କରନ୍ତି।ଏହି ଆଳତି ପରେ ପ୍ରସାଦ ଲାଗି ହୁଏ। ବର୍ଷ ତମାମ ମହାଦେବଙ୍କ ମନ୍ଦିର ପରିସରରେ ଆମିଷ ବାରଣ ଥାଏ। କିନ୍ତୁ ଏହି ଷୋଳପୂଜାରେ ପ୍ରତି ସନ୍ଧ୍ୟାରେ ମହାଦେବଙ୍କ ଭୋଗ ଥାଳିରେ ଆମିଷ ଭୋଗ ମାଙ୍କୁ ଲାଗି ହୁଏ। ଏହି ପୁରାତନ ମନ୍ଦିରରେ ବହୁ ମାନସିକ ଧାରି ମନୋସ୍କାମନା ପୂର୍ଣ୍ଣ ହେଲେ ଆମିଷ ଭୋଗ କରିଥାନ୍ତି।
ମାଙ୍କ ଆଳତି ଦର୍ଶନ କରି ମାନସିକ ସହ ପ୍ରସାଦ ସେବନ ପାଇଁ ଶ୍ରଦ୍ଧାଳୁଙ୍କ ଭିଡ଼ ଜମିଥାଏ ।
CJPର ଅଭିଜିତ୍ ଦୀପକଙ୍କ ଚେତାବନୀ: ‘ଆମେ ପୁଣି ରାସ୍ତାକୁ ଓହ୍ଲାଇବୁ…
ନନ୍ଦିଘୋଷ ବ୍ୟୁରୋ: କୋକ୍ରୋଚ୍ ଜନତା ପାର୍ଟିର ପ୍ରତିଷ୍ଠାତା ଅଭିଜିତ୍ ଦୀପକେ ତାଙ୍କ ଜେଜେମା‘ଙ୍କ ମୃତ୍ୟୁରେ ଯୋଗଦେବା ପାଇଁ ମହାରାଷ୍ଟ୍ର ଯାଇଛନ୍ତି। ତାଙ୍କ ଗସ୍ତ ସମୟରେ ସେ ଏକ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି। ଅଭିଜିତ୍ ଦୀପକେ କହିଛନ୍ତି, “ଆମେ ଏପରି କୌଣସି ଚୁକ୍ତି କରିନାହୁଁ ଯେଉଁଥିରେ କୁହାଯାଇଛି ଯେ ଆମେ ପ୍ରତିବାଦ କରିବୁ ନାହିଁ। ଆମେ ପୁଣି ଥରେ ରାସ୍ତାକୁ ଓହ୍ଲାଇବୁ।
ଏହା ଉଲ୍ଲେଖନୀୟ ଯେ କୋକ୍ରୋଚ୍ ଜନତା ପାର୍ଟିର ପ୍ରତିଷ୍ଠାତା ଅଭିଜିତ୍ ଦୀପକେଙ୍କୁ ଶନିବାର (୧୦ ଅକ୍ଟୋବର) ଦିଲ୍ଲୀ ବିମାନବନ୍ଦରରେ ଏକ ବିମାନରେ ଅଟକ ରଖାଯାଇଥିଲା। ପରେ ତାଙ୍କୁ ରବିବାର ସକାଳେ ସିଜେଏମ୍ କୋର୍ଟରେ ହାଜର କରାଯାଇଥିଲା, ଯେଉଁଠାରେ ତାଙ୍କୁ ବ୍ୟକ୍ତିଗତ ବଣ୍ଡରେ ମୁକ୍ତ କରାଯାଇଥିଲା।
ଜେଜେମାଙ୍କ ଦେହାନ୍ତ ପରେ ମହାରାଷ୍ଟ୍ର ଫେରିଲେ ଅଭିଜିତ୍ ଦୀପକେ
ଦିଲ୍ଲୀରେ, ୧୦ ଅକ୍ଟୋବରରେ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ପ୍ରତିବାଦ ପାଇଁ CJP ଡାକରା ଦେଇଥିଲେ। ପ୍ରତିବାଦରେ ଯୋଗଦେବାକୁ ଚେଷ୍ଟା କରୁଥିବା CJP ନେତାମାନଙ୍କୁ ରାସ୍ତାରେ ଅଟକ ରଖାଯାଇଥିଲା, ଯାହା ପ୍ରଦର୍ଶନରେ କିଛିଟା ବାଧା ସୃଷ୍ଟି କରିଥିଲା। ତଥାପି, ଅନେକ ବାମପନ୍ଥୀ ସଂଗଠନ ଏବଂ ପୂର୍ବତନ ମୁଖ୍ୟମନ୍ତ୍ରୀମାନେ ପ୍ରତିବାଦ ଜାରି ରଖିଥିଲେ।
ଏହି ସମୟରେ, ଅଭିଜିତ୍ ଦୀପକେଙ୍କ ଜେଜେମାଙ୍କ ମୃତ୍ୟୁ ଖବର ପ୍ରକାଶ ପାଇଲା। ଏହା ସୂଚାଇ ଦେଉଥିଲା ଯେ ଅଭିଜିତ୍ ଦୀପକେ ପ୍ରତିବାଦର ସମାପ୍ତି ଘୋଷଣା କରିବେ ଏବଂ ତାଙ୍କ ଜେଜେମାଙ୍କ ଅନ୍ତିମ ସଂସ୍କାରରେ ଯୋଗଦେବେ। ପୋଲିସ କହିଛି ଯେ ଦୀପକେଙ୍କୁ ମୃତ୍ୟୁ ବିଷୟରେ ସୂଚନା ଦିଆଯାଇଥିଲା, କିନ୍ତୁ ସିଜେପି ନେତାମାନେ ଏହାକୁ ଅସ୍ୱୀକାର କରିଛନ୍ତି।
ଦୀପକ ବର୍ତ୍ତମାନ ତାଙ୍କ ଜେଜେମାଙ୍କ ଶବଦାହରେ ଯୋଗ ଦେଉଛନ୍ତି। ଏହି ସମୟ ମଧ୍ୟରେ ସେ ତାଙ୍କ ପ୍ରଦର୍ଶନ ସମ୍ପର୍କରେ ଏକ ପ୍ରମୁଖ ସୂଚନା ସେୟାର କରିଥିଲେ। ସେ କୋର୍ଟ ଦ୍ୱାରା ସମାଧାନର ରିପୋର୍ଟର ମଧ୍ୟ ପ୍ରତିକ୍ରିୟା ଦେଇଥିଲେ। କୁହାଯାଉଥିଲା ଯେ କୋର୍ଟ ତାଙ୍କୁ ଅନେକ ସର୍ତ୍ତ ସହିତ ମୁକ୍ତ କରିଛନ୍ତି, କିନ୍ତୁ ଦୀପକ ଏହି ଦାବିଗୁଡ଼ିକୁ ପ୍ରତ୍ୟାଖ୍ୟାନ କରିଛନ୍ତି। ଦୀପକ କୁହନ୍ତି ଯେ କୌଣସି ସମାଧାନ ହୋଇନାହିଁ।
ଆନ୍ଦୋଳନ ଜାରି ରହିବ – ଆଶୁତୋଷ ରାଙ୍କା
ସିଜେପି ନେତା ଆଶୁତୋଷ ରାଙ୍କା ଏକ ସାମ୍ବାଦିକ ସମ୍ମିଳନୀରେ ଏକ ପ୍ରମୁଖ ବୟାନ ଦେଇଛନ୍ତି। ସେ କହିଛନ୍ତି, “ଏହି ଲଢ଼େଇ ଏବେ ଆରମ୍ଭ ହୋଇଛି। ପ୍ରତିବାଦ ଚାଲିଛି ଏବଂ ଜାରି ରହିବ। ଏହି ସରକାର ଜ୍ଞାନେଶ କୁମାରଙ୍କୁ ସୁରକ୍ଷା ଦେଉଛି।