ଉମରକୋଟ: ୯ ମାସ ଦଶ ଦିନ ପୁଅକୁ ଗର୍ଭରେ ରଖି ମାଆ ଜନ୍ମ ଦେଇଲା। ପୁଅଟେ ପାଇଁ ମାଆ କରିଥିଲା କେତେ ଉପବାସ ଆଉ ବ୍ରତ। ନିଜ ପେଟରୁ କାଟି ପୁଅକୁ ଖାଇବାକୁ ଦେଇଥିଲା। ନିଜ ପଣତରେ ଘୋଡ଼ାଇ ବାହର ଲୋକଙ୍କର କଳା ନଜରରୁ ସବୁ ସମୟରେ ମାଆ ରକ୍ଷା କରିଛି। ହେଲେ ଆଜି ଶେଷ ସମୟରେ ଅଲୋଡ଼ା ହୋଇଛି ମାଆ। ବୟସର ଅପରାହ୍ନରେ ଜୀବନ ବଞ୍ଚିଥିବା ବେଳେ ମିଳି ନଥିଲା ପୁଅର ସାହାରା। ଆଉ ମାଆ ଆରପାରିକୁ ଚାଲିଗଲା ପର ମଧ୍ୟ ମୃତ ଦେହକୁ ମିଳିଲାନି କାନ୍ଧ। ଯେଉଁ ମାଆର ହାତରେ ପୁଅ ଏଡ଼ିଟିରୁ ଏଡ଼େବଡ଼ ହୋଇଥିଲା ସେହି ମାଆର ମୃତ ଦେହକୁ ଉଠାଇବା ପାଇଁ ଆଜି ପୁଅର ହାତ ଗଲାନାହିଁ।

ପୁଅବୋହୂ ଥାଇ  ମହିଳାଙ୍କ ମୃତଦେହକୁ ମିଳିଲାନି କାନ୍ଧ। ଦିନେ ନୁହେଁ କୋଠରି ଭିତରେ ୪-୫ ଦିନ ପଡ଼ି ରହିଲା ମୃତଦେହ। ନବରଙ୍ଗପୁର ଜିଲ୍ଲା ଉମରକୋଟ ସହରର ଶିବାଜୀ ନଗରରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି।

ସୂଚନା ଅନୁସାରେ ବୃଦ୍ଧା କୁସୁମ ନାୟକ ସ୍ୱାମୀଙ୍କ ମୃତ୍ୟୁ ପରେ ବଡ଼ପୁଅ ଓ ବୋହୂ ପାଖରେ ରହୁଥିଲେ। କୁସୁମ ନାୟକ ସେବାମୀଙ୍କ ପେନସନ ଟଙ୍କାରେ ଗୁଜରାଣ ମେଣ୍ଟାଉଥିଲେ। କୁସୁମଙ୍କ ଅନ୍ୟ ଦୁଇପୁଅ ଅଲଗା ରହୁଥିଲେ। କିଛି ଦିନ ତଳେ ବଡ଼ ପୁଅଙ୍କର ମୃତ୍ୟୁ ହୋଇଥିଲା। ପରେ ବଡ଼ ବୋହୂ ବୃଦ୍ଧା କୁସୁମଙ୍କ ଦେଖାଶୁଣା ଠିକଭାବେ କରୁନଥିବା ଅଭିଯୋଗ ହୋଇଥିଲା।

କୁସୁମଙ୍କ ମୃତ୍ୟୁ ହେବା ପରେ ମୃତଦେହ ଘରେ ୪-୫ଦିନ ପଡ଼ି ରହିଥିଲା। ଏନେଇ ଦୁଇ ପୁଅ ଥାନାରେ ଅଭିଯୋଗ କରିବା ସହ ମା’ଙ୍କ ମୃତ୍ୟୁ କିପରି ହୋଇଛି, ତାହା ତଦନ୍ତ କରିବାକୁ ଦାବି କରିଛନ୍ତି। ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ଅଧିକ ତଦନ୍ତ ଚଳାଇଛି।

ବୁର୍ଲା: ପ୍ରେମରେ ପଡ଼ିଲା ରକ୍ତର ଛିଠା। ଘରେ ପଶି ଟାଙ୍ଗିଆରେ ମରଣାନ୍ତକ ଆକ୍ରମଣ। ଆକ୍ରମଣରେ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ରହିଛନ୍ତି। ତେବେ ଦେବଗଡ଼ ଥାନା ଗାଡ଼ପାଳ ଗାଁରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି। ଝିଅର ପ୍ରେମିକ ଓ ତା’ ମା’ଙ୍କୁ ଘରେ ପଶି ଟାଙ୍ଗିଆରେ ଆକ୍ରମଣ କରିଛନ୍ତି ଝିଅର ଘର ଲୋକେ। ମା’ ଘଟଣା ସ୍ଥଳରେ ମାଆଙ୍କର ମୃତ୍ୟୁ ହୋଇଥିବା ବେଳେ ଗୁରୁତର ଅବସ୍ଥାରେ ପୁଅକୁ ବୁର୍ଲା ମେଡିକାଲରେ ଭର୍ତ୍ତି କରାଯାଇଛି। ପ୍ରେମକୁ  ସଫଳ ନକେଇଦେପା ପାଇଁ ପ୍ଲାନ୍‌ ପରେ ହୋଇଥିଲା ଆକ୍ରମଣ।

ସୂଚନା ଅନୁସାରେ ଗାଁର ନରେନ୍ଦ୍ର ଶବର ଝିଅର ବିବାହ ପାଇଁ ପ୍ରସ୍ତାବ ଦେଖୁଥିଲେ। ହେଲେ ଝିଅ ଜଣେ ଯୁବକଙ୍କୁ ପ୍ରେମ କରୁଥିବା ଜାଣିବାକୁ ପାଇ ନିଜ ୪ପୁଅଙ୍କୁ ନେଇ ପ୍ରେମିକ ଘରକୁ ଯାଇଥିଲେ। ୫ ଜଣଙ୍କର ମନରେ ଥିଲା ପ୍ରଚଣ୍ଡ ରାଗ। ପ୍ରଥମେ ଝିଅକୁ ଭୁଲିଯିବା ପାଇଁ ଧମକାଇଥିଲେ ଝିଅ ଘର ଲୋକେ। ହେଲେ ପ୍ରେମିକ ନ ଶୁଣିବାରୁ ଖାଇବାକୁ ବସିଥିବା ଯୁବକଙ୍କୁ ଅତର୍କିତ ଟାଙ୍ଗିଆରେ ଆକ୍ରମଣ କରିଥିଲା ନରେନ୍ଦ୍ର।

ଏହା ପରେ ପ୍ରେମିକଙ୍କ ମାଆଙ୍କ ଉପରକୁ ମଧ୍ୟ ଆକ୍ରମଣ କରିଥିଲେ ଝିଅଘର ଲୋକେ। ଟାଙ୍ଗିଆ ଚୋଟରେ ଯୁବକଙ୍କ ମାଆ ଦରଥିଆ କୁଲୁଙ୍କ ମୃତ୍ୟୁ ହୋଇଥିବା ବେଳେ ମହିଳାଙ୍କ ପୁଅ ତଥା ଝିଅର ପ୍ରେମିକ କୁହାଯାଉଥିବା ଯୁବକ ଗୁରୁତର ଆହତ ହୋଇଛନ୍ତି। ଗୁରୁତର ଅବସ୍ଥାରେ ପ୍ରେମିକକୁ ବୁର୍ଲା ମେଡିକାଲରେ ଭର୍ତ୍ତି କରାଯାଇଛି। ଏସଡିପିଓ ପ୍ରତ୍ୟୁଷ କୁମାର ମହାପାତ୍ରଙ୍କ ନେତୃତ୍ୱରେ ଦେବଗଡ଼ ପୋଲିସ ତଦନ୍ତ ଆରମ୍ଭ କରିବା ସହ ବାପପୁଅ ୫ଜଣଙ୍କୁ କାବୁ କରି ଜେରା କରୁଛି ପୋଲିସ୍‌। ସେପଟେ ଝିଅର ପତ୍ତା ମିଳୁନଥିବା ବେଳେ ଅନର କିଲିଂ ଆଶଙ୍କା କରାଯାଉଛି।

ପୁରୀ: ଆଜି ପୁରୀ ପାଇଁ ବ୍ରହ୍ମଗିରିରୁ ଲେଖାହେବ ବିକାଶର ନୂଆ ଅଧ୍ୟାୟ। ପୁରୀ ଜିଲ୍ଲାରେ ଆରମ୍ଭ ହେବ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସ୍ମାର୍ଟ କାର୍ଡ ବଣ୍ଟନ। ଅପରାହ୍ନରେ ବ୍ରହ୍ମଗିରି ଯାଇ ବିଏସକେଓ୍ୱାଇ ସ୍ମାର୍ଟ କାର୍ଡ ବଣ୍ଟନର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ହିତାଧିକାରୀଙ୍କୁ କାର୍ଡ ବାଣ୍ଟିବେ ନବୀନ। ଜିଲ୍ଲାରେ ୩ଲକ୍ଷ ୭୬ ହଜାର ହିତାଧିକାରୀ ସ୍ମାର୍ଟକାର୍ଡ ଯୋଜନାରେ ଉପକୃତ ହେବେ। ସ୍ମାର୍ଟ କାର୍ଡ ସହିତ ବ୍ରହ୍ମଗିରିରେ ଏକାଧିକ ବିକାଶମୂଳକ ପ୍ରକଳ୍ପର ଉଦଘାଟନ ସହ ଲୋକାର୍ପଣ କରିବେ ମୁଖ୍ୟମନ୍ତ୍ରୀ। ବ୍ରହ୍ମଗିରି ପଞ୍ଚାୟତ ସମିତି କାର୍ଯ୍ୟାଳୟରେ ନବ ନିର୍ମିତ ମିନି ସଚିବାଳୟର ଲୋକାର୍ପଣ ହେବ। ପ୍ରାୟ ହଜାରେ କୋଟି ଟଙ୍କାର ପ୍ରକଳ୍ପର ଉଦ୍‌ଘାଟନ ଓ ଶିଳାନ୍ୟାସ କରିବା କାର୍ଯ୍ୟକ୍ରମ ରହିଛି। ନୂଆ ସଡକ ପ୍ରକଳ୍ପ ସାଙ୍ଗକୁ ପାନୀୟ ଜଳ ଓ ସ୍ବାସ୍ଥ୍ୟ ଭିତ୍ତିଭୂମୀ ସମ୍ପର୍କିତ ଏକାଧିକ ପ୍ରକଳ୍ପର ଉଦଘାଟନ କରିବେ ମୁଖ୍ୟମନ୍ତ୍ରୀ। ଏଥିପାଇଁ କେରାଣ୍ଡିଆ ହେଲିପ୍ୟାଡରେ ଏକ ସାଧାରଣ ସଭାର ଆୟୋଜନ କରାଯାଉଛି। ପୂର୍ବରୁ ମାଲକାନଗିରିରେ ଏହାର ଶୁଭାରମ୍ଭ ପରେ ସୁନ୍ଦରଗଡ, ବଲାଙ୍ଗୀର, ଗଜପତିରେ ସ୍ମାର୍ଟକାର୍ଡ ବଣ୍ଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।