ବାଲେଶ୍ୱର: ପ୍ରତିରକ୍ଷା ବିଭାଗର ଗୁପ୍ତତଥ୍ୟ ଲିକ୍ ଘଟଣା । ଆସିଲା ଚତୁର୍ଥ ଅଭିଯୁକ୍ତର ନାମ । ଚତୁର୍ଥ ଅଭିଯୁକ୍ତ ହେଲେ ହେମନ୍ତ ମିସ୍ତ୍ରୀ । ହେମନ୍ତ ଆଇଟିଆରର ଡ଼ିଜି ଅପରେଟର ଭାବେ ଠିକା କର୍ମଚାରୀ ଭାବେ କାମ କରୁଥିଲେ । ଶତ୍ରୁ ଦେଶ ପାଇଁ ସୁନ୍ଦରୀ ନେଉଥିଲେ ସିକ୍ରେଟ୍ ଡାଟା । ନିୟମିତ ପାକିସ୍ତାନରୁ ଫୋନ୍ କଲ୍ ବଢାଇଥିଲା ସନ୍ଦେହ । ଯାଞ୍ଚ ପରେ ପୂରା ଘଟଣାରୁ ଉଠିଲା ପରଦା । ବିଦେଶୀ ଏଜେଣ୍ଟଙ୍କୁ ଗୋପନ ତଥ୍ୟ ଯୋଗାଇବା ଅଭିଯୋଗରେ ୪ ଠିକା କର୍ମଚାରୀଙ୍କୁ ଗିରଫ କରାଯାଇଛି । ସେମାନଙ୍କ ନାଁରେ ଦେଶଦ୍ରୋହ ସହ ଅନେକ ସଂଗୀନ୍ ଦଫାରେ ମାମଲା ରୁଜୁ ହୋଇଛି । ୩ ମାସ ଧରି ଚାନ୍ଦିପୁର କ୍ଷେପଣାସ୍ତ୍ର ପରୀକ୍ଷା କେନ୍ଦ୍ରରୁ ହନିଟ୍ରାପ୍ ଦ୍ୱାରା ଗୁପ୍ତ ତଥ୍ୟ ହାତଉଥିଲେ ପାକିସ୍ତାନ ଏଜେଣ୍ଟ । ପାକିସ୍ତାନ ଏଜେଣ୍ଟଙ୍କୁ ମିଲିଟାରୀ ବ୍ଲୁ-ପ୍ରିଣ୍ଟ ପଠାଉଥିଲେ ଅସ୍ଥାୟୀ କର୍ମଚାରୀ । ଚାନ୍ଦିପୁର କ୍ଷେପଣାସ୍ତ୍ର ପରୀକ୍ଷା କେନ୍ଦ୍ରରୁ ଲିକ୍ ହେଉଥିଲା ଗୁପ୍ତ ତଥ୍ୟ । ଏନେଇ ଓଡ଼ିଶା କ୍ରାଇମବ୍ରାଞ୍ଚର ସ୍ୱତନ୍ତ୍ର ଟିମ୍ ସୁରାକ ପାଇବା ପରେ ଧରିବାକୁ ଆରମ୍ଭ ହୋଇଥିଲା ସିକ୍ରେଟ୍ ପ୍ଲାନ୍ । ଗିରଫ ଅଭିଯୁକ୍ତ ହେଉଛନ୍ତି ବସନ୍ତ ବେହେରା, ସେକ୍ ଫୁସାଫିର, ପ୍ରକାଶ ବେହେରା ଓ ହେମନ୍ତ ମିସ୍ତ୍ରୀ । ଆଇଟିଆର ୩ନଂ ଲଞ୍ଚପ୍ୟାଡ୍ରେ ଏମାନେ ଠିକା କର୍ମଚାରୀଭାବେ ନିୟୋଜିତ ହୋଇଥିଲେ । ଟଙ୍କା ଲୋଭ ଦେଖାଇ ଏମାନଙ୍କଠାରୁ କ୍ଷେପଣାସ୍ତ୍ର ସମ୍ପର୍କିତ ତଥ୍ୟ ହାତଉଥିଲେ ବିଦେଶୀ ଏଜେଣ୍ଟ ।
ମାଲା ବିଜୟ ପ୍ରସାଦଙ୍କୁ ରିମାଣ୍ଡରେ ଆଣିବ କ୍ରାଇମବ୍ରାଞ୍ଚ
ଭୁବନେଶ୍ୱର: ୱେଲଫେୟାର ବିଲ୍ଡିଂ ଆଣ୍ଡ ଇଷ୍ଟେଟ ପ୍ରାଇଭେଟ ଲିମିଟେଡ଼ ଚିଟଫଣ୍ଡ ଠକେଇ ମାମଲା । ବିଶାଖାପାଟଣା ଓ୍ୱେଷ୍ଟ ଜୋନର ପୂର୍ବତନ ବିଧାୟକ ମାଲା ବିଜୟ ପ୍ରସାଦକୁ ଆଜିଠୁ ୩ ଦିନିଆ ରିମାଣ୍ଡରେ ଆଣିବ କ୍ରାଇମବ୍ରାଞ୍ଚର ଇଓଡବ୍ଳ୍ୟୁ । ଠକେଇର ପରିମାଣ, କେତେ ଲୋକଙ୍କୁ ଠକିଛି, ଟଙ୍କା କେଉଁଠି ବିନିଯୋଗ କରିଛି ଓ ଗ୍ଲାମର ଲିଙ୍କ ନେଇ ଛାନଭିନ କରିବ ଇଓଡବ୍ଳ୍ୟୁ । ଏମ ଭି ପ୍ରସାଦଙ୍କ ସହଯୋଗୀଙ୍କ ସମ୍ପୃକ୍ତି ଏବଂ ପାରିବାରିକ ଲିଙ୍କ ନେଇ ମଧ୍ୟ ହେବ ଖୋଳତାଡ଼ । ୨୦୦୧ରେ ଆରମ୍ଭ ହୋଇଥିଲା ପ୍ରସାଦଙ୍କ ୱେଲଫେର ଗ୍ରୁପ ଅଫ କମ୍ପାନୀ । ପାଖାପାଖି ୧୨ଶହ କୋଟି ଟଙ୍କା ଠକିଥିବା ଅଭିଯୋଗ ରହିଛି । ସିବିଆଇର ଦୁଇଟି ମାମଲାରେ ଏବେ ଜାମିନରେ ଅଛନ୍ତି ପ୍ରସାଦ । ପ୍ରଶ୍ନ ଉଠୁଛି, କେତେ ଟଙ୍କା ଠକିଛି ୱେଲଫେୟାର ବିଲିଡିଂ ଆଣ୍ଡ ଇଷ୍ଟେଟସ ସଂସ୍ଥା ? ଓଡିଶା ଜମାକାରୀଙ୍କ ଟଙ୍କାରେ କେତେ ତେଲୁଗୁ ଫିଲ୍ମ ତିଆରି ହୋଇଛି ? ଏସବୁ ଦିଗକୁ ନେଇ ଖୋଳତାଡ଼ କରିବ ଇଓଡବ୍ଳ୍ୟୁ । ୩ ଦିନ ରିମାଣ୍ଡ ପାଇଁ OPID କୋର୍ଟରେ ଆବେଦନ କରିଥିଲା ଇଓଡ଼ବ୍ଲୁ । ୨୦୦୫-୦୬ରେ ଭୁବନେଶ୍ୱର ସହିଦନଗର ଅଞ୍ଚଳରେ ୱେଲଫେୟାର ବିଲିଡିଂ ଆଣ୍ଡ ଇଷ୍ଟେଟସ ନାଁରେ ସଂସ୍ଥାର ମୁଖ୍ୟାଳୟ ଖୋଲା ହୋଇଥିଲା । ଏହି ସମୟରେ ସଂସ୍ଥା ଅନେକ ଲୋକଙ୍କୁ ଠକିଥିବା ଅଭିଯୋଗ ହୋଇଛି ।
ଏଥିସହିତ ପଢ଼ନ୍ତୁ: ଦୁଷ୍ମନ୍ତ ମୃତ୍ୟୁ ମାମଲା: ଥାନାରେ ହାଜର ହେବେ ଓ୍ୱେବ ପୋର୍ଟାଲ ସାମ୍ୱାଦିକ
ରସୁଲପୁର ବ୍ଳକ୍ ଅଞ୍ଚଳରେ ଭାଙ୍ଗିଲା ବ୍ରାହ୍ମଣୀ ନଦୀବନ୍ଧ
ଯାଜପୁର: ଲଗାଣ ବର୍ଷା ଯୋଗୁଁ ଯାଜପୁର ଜିଲ୍ଲା ରସୁଲପୁର ବ୍ଲକ ଅଞ୍ଚଳରେ ଭାଙ୍ଗିଲା ବ୍ରାହ୍ମଣୀ ନଦୀବନ୍ଧ । ବ୍ରାହ୍ମଣୀ ନଦୀରେ ବନ୍ୟା ଆସିବାରୁ ରସୁଲପୁର ବ୍ଲକ ବନ୍ଧଢି଼ହ ପଞ୍ଚାୟତ କନ୍ଧିଆ ନିକଟରେ ବ୍ରାହ୍ମଣୀ ନଦୀର ଘେରିବନ୍ଧ ଭାଙ୍ଗି ଘାଇ ସୃଷ୍ଟି ହୋଇଛି । ଫଳରେ ପାଖାପାଖି ୧୦୦ ପରିବାର ପ୍ରଭାବିତ ହେବା ନେଇ ଆଶଙ୍କା ଉପୁଜିଛି । ଅନ୍ୟପକ୍ଷରେ ଜିଲ୍ଲା ଓ ବ୍ଲକ ପ୍ରଶାସନ ସଜାଗ ରହିଥିବା ବେଳେ ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି । ବ୍ରାହ୍ମଣୀ ନଦୀର ଜଳସ୍ତର ବୃଦ୍ଧି ପାଉଥିବା ବେଳେ ଜେନାପୁର ଠାରେ ବ୍ରାହ୍ମଣୀ ନଦୀର ଜଳ ବିପଦ ସଂକେତ ଉପରେ ପ୍ରବାହିତ ହେଉଛି । ଫଳରେ ଜିଲ୍ଲାର ବରୀ, ଧର୍ମଶାଳା, ବଡ଼ଚଣା, ରସୁଲପୁର ବ୍ଲକ ପ୍ରଭାବିତ ହେବା ନେଇ ଆଶଙ୍କା ସୃଷ୍ଟି ହୋଇଛି । ଏନେଇ ନଦୀ କୂଳିଆ ଲୋକେ ଆତଙ୍କିତ ହୋଇପଡିଛନ୍ତି । ସେପଟେ ବୈତରଣୀରେ ମଧ୍ୟ ବନ୍ୟାଜଳ ବିପଦ ସଙ୍କେତ ଉପରେ ପ୍ରବାହିତ ହେଉଛି ।
ଏଥିସହିତ ପଢ଼ନ୍ତୁ: ବିପଦ ସଂକେତ ଉପରେ ବୈତରଣୀ ଓ ଜଳକା
ଦୁଷ୍ମନ୍ତ ମୃତ୍ୟୁ ମାମଲା: ଥାନାରେ ହାଜର ହେବେ ଓ୍ୱେବ ପୋର୍ଟାଲ ସାମ୍ୱାଦିକ
କଟକ: ଦୁଷ୍ମନ୍ତ ଦାସ ମୃତ୍ୟୁ ମାମଲା । ଆଜି ମଙ୍ଗଳାବାଗ ଥାନାରେ ହାଜର ହେବେ ଦୁଇ ଓ୍ୱେବ ପୋର୍ଟାଲ ସାମ୍ବାଦିକ । ଏ ନେଇ ଓ୍ୱେବ୍ ପୋର୍ଟାଲ ସାମ୍ବାଦିକ ଅସିତ କୁମାର ରାଉତ ଓ ଦାମୋଦର ସେଠୀଙ୍କୁ ଗତକାଲି ସମନ କରିଥିଲା ପୋଲିସ । ଦୁଷ୍ମନ୍ତ ଦାସ ମୃତ୍ୟୁ ମାମଲାରେ ଏହି ଦୁହିଁଙ୍କ ବୟାନ ରେକର୍ଡ କରାଯିବ । ଘଟଣାରେ ଆଉ କେଉଁମାନେ ସମ୍ପୃକ୍ତ ଅଛନ୍ତି ତଦନ୍ତ ପରେ ତାହା ପଦାକୁ ଆସିବ । ଗତବର୍ଷ ଦୁର୍ଘଟଣାରେ ଶିକାର ହୋଇଥିବା ଦୁଷ୍ମନ୍ତଙ୍କ ମୃତ୍ୟୁକୁ ନେଇ ଅନେକ ପ୍ରଶ୍ନ ଉଠିଥିଲା । ଦୁର୍ଘଟଣା ପରେ ସେ ଠିକ୍ ଭାବେ ଚାଲି ପାରୁନଥିବାବେଳେ କିଏ ତାଙ୍କୁ ଭୁବନେଶ୍ୱର ଆଣିଥିଲେ ଓ କିଏ ତାଙ୍କୁ ବିଷ ଦେଇଥିଲେ ଏ ନେଇ ଦୁଷ୍ମନ୍ତଙ୍କ ମା’ କୁଜଙ୍ଗ ଥାନାରେ ଅଭିଯୋଗ କରିଥିଲେ । ପୋଲିସ ଯେଉଁ ଦୁଇ ସାମ୍ବାଦିକଙ୍କୁ ସମନ୍ କରିଛି ସେମାନେ ଦୁଷ୍ମନ୍ତଙ୍କ ସହ ସମ୍ପର୍କରେ ଥିବା ନେଇ ଚର୍ଚ୍ଚା ହେଉଛି । ଦୁଷ୍ମନ୍ତଙ୍କ ମୃତ୍ୟୁ ପଛରେ ଏମାନଙ୍କ ହାତ ଥିବା ନେଇ ମଧ୍ୟ ସନ୍ଦେହ ହେଉଛି ।
ଏଥିସହିତ ପଢ଼ନ୍ତୁ: ୪ କୋଟି ସମ୍ପତ୍ତିର ମାଲିକାଣୀ ଅଙ୍ଗନୱାଡ଼ି ଦିଦି
ଦୁର୍ବଳ ହୋଇଛି ଲଘୁଚାପ ତଥାପି୨ ଜିଲ୍ଲାରେ ଅତି ପ୍ରବଳ ବର୍ଷା ସମ୍ଭାବନା
ଭୁବନେଶ୍ୱର: ଦୁର୍ବଳ ହୋଇଛି ଲଘୁଚାପ । ଛତିଶଗଡ ଏବଂ ମଧ୍ୟପ୍ରଦେଶ ମଧ୍ୟରେ ରହିଛି ଲଘୁଚାପ । ପ୍ରଭାବରେ ଆଜି ରାଜ୍ୟର କିଛି ଜିଲ୍ଲାରେ ପ୍ରବଳ ବର୍ଷାର ହେବାର ସମ୍ଭାବନା ରହିଛି । ଦୁଇଟି ଜିଲ୍ଲା ସୁନ୍ଦରଗଡ଼ ଏବଂ ଝାରସୁଗୁଡା ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ପାଇଁ ଅରେଞ୍ଜ ଆଲର୍ଟ ଜାରି କରାଯାଇଛି । ସେହିପରି ୧୧ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ନୂଆପଡା, ବଲାଙ୍ଗିର, ସମ୍ବଲପୁର, ବରଗଡ, ଦେବଗଡ଼ କେନ୍ଦୁଝର, ମୟୁରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର ଏବଂ କେନ୍ଦ୍ରାପଡ଼ା ଜିଲ୍ଲାକୁ ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆସନ୍ତାକାଲିଠୁ ପାଗରେ ଆସିବ ପରିବର୍ତ୍ତନ । ଅବିଶ୍ରାନ୍ତ ବର୍ଷା ପରେ ବି ରାଜ୍ୟରେ ୧୪ ପ୍ରତିଶତ ନିଅଣ୍ଟିଆ ବର୍ଷା ହୋଇଛି । ଜୁନ୍ ୧ ତାରିଖରୁ ୯୧୧.୬ ମିଲିମିଟର ବର୍ଷା ରେକର୍ଡ କରାଯାଇଛି । ଦୁଇଟି ଜିଲ୍ଲାରେ ସ୍ୱାଭାବିକ ଠାରୁ ଅଧିକ ବର୍ଷା ହୋଇଥିବାବେଳେ ୧୮ଟି ଜିଲ୍ଲାରେ ସ୍ୱାଭାବିକ ଏବଂ ୧୦ ଟି ଜିଲ୍ଲାରେ ନିଅଣ୍ଟିଆ ବର୍ଷା ରେକର୍ଡ ହୋଇଛି । ଦୁଇ ଦିନ ମଧ୍ୟରେ ସେପ୍ଟେମ୍ବର ମାସର ସ୍ୱାଭାବିକ ବର୍ଷା ଠାରୁ ୬୦ ପ୍ରତିଶତ ଅଧିକ ବର୍ଷା ହୋଇଛି
ଏଥିସହିତ ପଢ଼ନ୍ତୁ: ୪ କୋଟି ସମ୍ପତ୍ତିର ମାଲିକାଣୀ ଅଙ୍ଗନୱାଡ଼ି ଦିଦି
ଅନ୍ୟ ରାଜ୍ୟକୁ ବଦଳି ହେଉଥିବା କର୍ମଚାରୀଙ୍କ ପାଇଁ ଖୁସି ଖବର
ଭୁବନେଶ୍ୱର: ବାରମ୍ବାର ଓଡ଼ିଶାରୁ ଅନ୍ୟ ରାଜ୍ୟକୁ ବଦଳି ହେଉଥିବା କର୍ମଚାରୀଙ୍କ ପାଇଁ ଖୁସି ଖବର । ଆସନ୍ତା କାଲିଠୁ ରାଜ୍ୟରେ ଆରମ୍ଭ ହେବ ଭାରତ ସିରିଡ୍ ଗାଡ଼ି ପଞ୍ଜିକରଣ । ସେନା ଅଧିକାରୀ, କେନ୍ଦ୍ର ସରକାରଙ୍କ ଅଧିକାରୀ, ୪ରୁ ଅଧିକ ରାଜ୍ୟରେ କାର୍ଯ୍ୟାଳୟ ଥିବା ସଂସ୍ଥାର କର୍ମଚାରୀ ଏହି ସୁବିଧା ପାଇପାରିବେ । ତେବେ ବେସରକାରୀ ସଂସ୍ଥାର କର୍ମଚାରୀ ନିଜ ଗାଡ଼ିର ପଞ୍ଜିକରଣ କରିବାକୁ ହେଲେ ପରିବହନ ୱେବସାଇଟରେ ଥିବା ଫର୍ମ ନମ୍ବର ୬୦ ପୂରଣ କରିବାକୁ ହେବ ।
ସେହିଭଳି ସରକାରୀ କର୍ମଚାରୀ ନିଜ ଆଇଡି କାର୍ଡରେ ଭାରତ ସିରିଜ୍ ପାଇଁ ଆବେଦନ କରିପାରିବେ । ତେବେ ଏଥିପାଇଁ ଆବେଦନକାରୀଙ୍କୁ ଦୁଇ ବର୍ଷର ରୋଡ ଟ୍ୟାକ୍ସ ଦେବାକୁ ପଡ଼ିବ । ରୋଡ୍ ଟ୍ୟାକ୍ସ ପାଇଁ ଭିନ୍ନ ଭିନ୍ନ ସ୍ଲାବ ରହିଛି । ଯଦି ଗାଡ଼ିର ମୂଲ୍ୟ ୧୦ ଲକ୍ଷରୁ କମ୍ ତାହା ହେଲେ ୮ ପ୍ରତିଶତ, ୧୦ରୁ ୨୦ ଲକ୍ଷ ହୋଇଥିଲେ ୧୦ ପ୍ରତିଶତ, ୨୦ରୁ ଅଧିକ ହୋଇଥିଲେ ୧୨ ପ୍ରତିଶତ ଟିକସ ଆଦାୟ କରାଯିବ ।
ବିପଦ ସଂକେତ ଉପରେ ବୈତରଣୀ ଓ ଜଳକା
ଭୁବନେଶ୍ୱର: ବର୍ଷା କମିବା ପରେ ବଢୁଛି ବିଭିନ୍ନ ନଦୀର ଜଳସ୍ତର । ବ୍ରାହ୍ମଣୀ, ବୈତରଣୀ ଓ ଜଳକା ନଦୀର ଜଳସ୍ତର ବଢିବାରେ ଲାଗିଛି । ରାତି ୧୦ଟା ସୁଦ୍ଧା ଜେନାପୁରରେ ବ୍ରାହ୍ମଣୀ ନଦୀର ଜଳସ୍ତର ବୃଦ୍ଧି ପାଇଛି । ଆଖୁଆପଦାରେ ବିପଦ ସଂକେତ ଉପରେ ପ୍ରବାହିତ ହେଉଛି ବୈତରଣୀ । ଏଠାରେ ବିପଦ ସଂକେତ ୧୭.୮୩ ମିଟର ଥିବାବେଳେ ୧୮.୩୪ ମିଟର ଜଳ ପ୍ରବାହିତ ହେଉଛି । ମଥାନିରେ ବିପଦ ସଂକେତ ଉପରେ ରହିଛି ଜଳକାର ଜଳସ୍ତର । ବିପଦ ସଂକେତ ୫.୫୦ ମିଟର ଥିବାବେଳେ ୬.୪୧ ମିଟରରେ ପ୍ରବାହିତ ହେଉଛି ।
ଏପଟେ କାଶୀନଗରରେ କମୁଛି ବଂଶଧାରାର ଜଳସ୍ତର । ସେପଟେ ଉପରେ ମୁଣ୍ଡରେ ବର୍ଷା ଯୋଗୁଁ ହୀରାକୁଦରେ ୬ଟି ସ୍ଲୁଇସ୍ ଗେଟ୍ ଖୋଲାଯାଇଛି । ବାମ ପାର୍ଶ୍ୱର ୪ଟି ଗେଟ୍ ଏବଂ ଡାହାଣ ପାର୍ଶ୍ୱର ୨ଟି ଗେଟ୍ ଖୋଲା ଯାଇଛି । ପ୍ରତି ସେକେଣ୍ଡରେ ଡ୍ୟାମ ଭିତରକୁ ପ୍ରବେଶ କରୁଛି ୨ ଲକ୍ଷ ୧୦ ହଜାର ଘନଫୁଟ ଜଳ । ଏବେର ଜଳସ୍ତର ୬୨୭ ଫୁଟ୍ ଥିବାବେଳେ ଡ୍ୟାମର ସର୍ବାଧିକ ଜଳଧାରଣ କ୍ଷମତା ୬୩୦ ଫୁଟ୍ ।
ଅନ୍ୟପଟେ ଗଭୀର ଅବପାତ ପରେ ଆଜି ଦୁର୍ବଳ ହୋଇ ଅବପାତରେ ପରିଣତ ହୋଇଛି ଲଘୁଚାପ । ଏହା ଏବେ ଉତ୍ତର ଆଭ୍ୟନ୍ତରୀଣ ଓଡ଼ିଶା ଏବଂ ଉତ୍ତର ଛତିଶଗଡ ଉପରେ ସକ୍ରିୟ ରହିଛି । ଲଘୁଚାପ ପ୍ରଭାବରେ ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ଓଡ଼ିଶାର କିଛି ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ବର୍ଷା କମିଥିଲେ ମଧ୍ୟ ମହାନଦୀର ଉପରମୁଣ୍ଡରେ ପ୍ରବଳ ବର୍ଷା ହେବାର ସମ୍ଭାବନା ଥିବାରୁ ମହାନଦୀ ସମେତ କିଛି ଶାଖା ନଦୀରେ ଜଳସ୍ତର ବୃଦ୍ଧି ହେବାର ସମ୍ଭାବନା ଥିବା କହିଛି ଆଇଏମଡି ।
କଇଁଛ ଧରିବାକୁ ଯାଇ ବାପାପୁଅ ଓ ଜ୍ୱାଇଁ ଶ୍ୱାସରୁଦ୍ଧ ହୋଇ ମୃତ
ସୋନପୁର: ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକ କୁଇବାହାଲ ପଞ୍ଚାୟତ ଆନନ୍ଦପୁର ଗାଁରେ ଅଘଟଣ । ପରିତ୍ୟକ୍ତ କୂଅରେ ପଡ଼ି ଗୋଟିଏ ପରିବାରର ତିନିଜଣଙ୍କ ମୃତ୍ୟୁ ହୋଇଛି । ଆଜି ଆନନ୍ଦପୁର ଗାଁର ସାଧୁ କାଲେସେ, ପୁଅ ଆଲୋକ ରଞ୍ଜନ କାଲସେ ଓ ଜ୍ୱାଇଁ ନବୀନ ମୋଟାରୀ ଗାଁରେ ଥିବା ଏକ ପରିତ୍ୟକ୍ତ କୂଅକୁ କଇଁଛ ମାରିବାକୁ ଯାଇଥିଲେ ।
କୂଅ ଭିତରକୁ ଯାଇଥିବା ବେଳେ ଶ୍ୱାସରୁଦ୍ଧ ହୋଇ ୩ଜଣଙ୍କର ମୃତ୍ୟୁ ହୋଇଛି । ଗାଁ ଲୋକ ଜାଣିବା ପରେ ବିନିକା ଅଗ୍ନଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଚି ବାପ, ପୁଅ ଓ ଜ୍ୱାଇଁଙ୍କ ମୃତଦେହ କୂଅ ଭିତରୁ ଉଦ୍ଧାର କରିଛି ।
କ୍ରିକେଟର ସବୁ ଫର୍ମାଟରୁ ଅବସର ଘୋଷଣା କଲେ ମାଲିଙ୍ଗା
କଲୋମ୍ବ: କ୍ରିକେଟକୁ ବାଏ ବାଏ କଲେ ଶ୍ରୀଲଙ୍କାର ଦ୍ରୁତ ବୋଲର୍ ଲାସିତ୍ ମାଲିଙ୍ଗା । ସେ ସବୁ ଫର୍ମାଟରୁ ଅବସର ନେଇଥିବା ନେଇ ସୋସିଆଲ ମିଡିଆରେ ଜଣାଇଛନ୍ତି । ମାଲିଙ୍ଗାଙ୍କ ଅନେକ ଫ୍ୟାନ, ଫୋଲର୍ସ ରହିଥିବାବେଳେ ତାଙ୍କ ଅବସର କ୍ରିକେଟପ୍ରେମୀଙ୍କୁ ନିରାଶ କରିଛି । ମାଲିଙ୍ଗା ତାଙ୍କର କ୍ରିକେଟ୍ କ୍ୟାରିୟର ମଧ୍ୟରେ ୩୦ଟି ଟେଷ୍ଟ ମ୍ୟାଚ, ୨୨୬ଟି ଦିନିକିଆ ଓ ୮୪ଟି ଟି-୨୦ ମ୍ୟାଚ୍ ଖେଳି ମୋଟ ୫୪୬ଟି ଓ୍ବିକେଟ୍ ହାସଲ କରିଛନ୍ତି ।
ମାଲିଙ୍ଗା ନିଜର ଶେଷ ମ୍ୟାଚ୍ ୨୦୨୦ ମାର୍ଚ୍ଚ ମାସରେ ୱେଷ୍ଟଇଣ୍ଡିଜ୍ ବିପକ୍ଷରେ ଖେଳିଥିଲେ । ଅନେକ ବିଶ୍ବକପ ମଧ୍ୟ ଶ୍ରୀଲଙ୍କା ଟିମ୍ ପାଇଁ ଖେଳିଛନ୍ତି ମାଲିଙ୍ଗା । ଅବସର ଘୋଷଣା ସମୟରେ ନିଜର ସାଥୀ ଖେଳାଳି ଓ ଫ୍ୟାନମାନଙ୍କୁ ଧନ୍ୟବାଦ ଦେଇଛନ୍ତି ।
Hanging up my #T20 shoes and #retiring from all forms of cricket! Thankful to all those who supported me in my journey, and looking forward to sharing my experience with young cricketers in the years to come.https://t.co/JgGWhETRwm #LasithMalinga #Ninety9
— Lasith Malinga (@malinga_ninety9) September 14, 2021
୩୮ ବର୍ଷୀୟ ମାଲିଙ୍ଗା ୨୦୧୪ରେ ଶ୍ରୀଲଙ୍କା ଟି-ଟ୍ୱେଣ୍ଟି ବିଶ୍ୱକପ୍ ଦଳର ଅଧିନାୟକ ଦାୟିତ୍ୱ ତୁଲାଇଥିଲେ । ମାଲିଙ୍ଗା ଅବସର ଘୋଷଣା ସହ ଟ୍ୱିଟ୍ କରି ଲେଖିଛନ୍ତି, ମୁଁ ଟି-ଟ୍ୱେଣ୍ଟି ଜୋତାକୁ କ୍ରିକେଟର ସବୁ ଫର୍ମାଟରୁ ଟାଙ୍ଗି ଦେଉଛି । ମୁଁ ଟି-ଟ୍ୱେଣ୍ଟି ବୋଲିଂ ଜୋତାକୁ ଶତପ୍ରତିଶତ ବିଶ୍ରାମ ଦେବାକୁ ଚାହୁଁଛି । ମୋ ଜୋତା ବିଶ୍ରାମ ନେବ, ଖେଳ ପ୍ରତି ଥିବା ଭଲ ପାଇବା କେବ ନୁହେଁ ।
ତାଳଚେରରେ ମେଡିକାଲ କଲେଜ ଶୀଘ୍ର କାର୍ଯ୍ୟକ୍ଷମ କରାଇବାକୁ ମୁଖ୍ୟ ଶାସନ ସଚିବଙ୍କ ଅନୁରୋଧ
ଭୁବନେଶ୍ୱର: ତାଳଚେର ଠାରେ ମହାନଦୀ ଭେଷଜ ବିଜ୍ଞାନ ଓ ଗବେଷଣା ପ୍ରତିଷ୍ଠାନ ଏବଂ ହସ୍ପିଟାଲକୁ ଶୀଘ୍ର କାର୍ଯ୍ୟକ୍ଷମ କରିବା ପାଇଁ ଚିଠି । କୋଇଲା ମନ୍ତ୍ରଣାଳୟର ଅତିରିକ୍ତ ଶାସନ ସଚିବ ଏମ୍ ନାଗାରାଜୁ ଏବଂ ମହାନଦୀ କୋଲ୍ଡଫିଲ୍ଡର ବରିଷ୍ଠ ଅଧିକାରୀମାନଙ୍କୁ ଏନେଇ ଅନୁରୋଧ କରିଛନ୍ତି ମୁଖ୍ୟ ଶାସନ ସଚିବ । ସଚିବାଳୟରେ କୋଇଲା ଉତ୍ତୋଳନ ଓ ପରିବହନ ସମ୍ବନ୍ଧିତ ସ୍ଥିତି ନେଇ ଆଲୋଚନା ବେଳେ ମୁଖ୍ୟ ଶାସନ ସଚିବ ଏହି ଅନୁରୋଧ କରିଛନ୍ତି ।
କେନ୍ଦ୍ରୀୟ ଅତିରିକ୍ତ ଶାସନ ସଚିବ ଜଣାଇଥିଲେ, ଇତିମଧ୍ୟରେ ତାଳଚେର ଠାରେ ଏହି ପ୍ରତିଷ୍ଠାନର ନିର୍ମାଣ କାର୍ଯ୍ୟ ପୂର୍ଣ୍ଣାଙ୍ଗ ହୋଇଛି । ୫୦୦ ଶଯ୍ୟା ବିଶିଷ୍ଟ ଏହି ଭେଷଜ ମହାବିଦ୍ୟାଳୟ ନିର୍ମାଣ, ଆନୁଷଙ୍ଗିକ ଆସବାବପତ୍ର, ଯନ୍ତ୍ରପାତି ଏବଂ ଚିକିତ୍ସା ଉପକରଣ ଆଦି ପାଇଁ ଏମସିଏଲ୍ ତରଫରୁ ୫୦୦ କୋଟି ଟଙ୍କା ପ୍ରାବଧାନ କରାଯାଇଛି ।
ଭେଷଜ ମହାବିଦ୍ୟାଳୟ ଦୈନନ୍ଦିନ ପରିଚାଳନା ଏ କ୍ଷେତ୍ରରେ ଅଭିଜ୍ଞତା ଥିବା ବୃତ୍ତିଗତ ସଂସ୍ଥାଙ୍କ ଦ୍ୱାରା କରାଯିବ ବୋଲି ଶ୍ରୀ ନାଗାରାଜୁ କହିଥିଲେ । ଏହି ସଂସ୍ଥା ଚୟନ ପାଇଁ ବିଭିନ୍ନ ସଂସ୍ଥାମାନଙ୍କ ଠାରୁ ଆଗ୍ରହ ପତ୍ର ଆହ୍ୱାନ କରାଯାଇଛି । ଖୁବଶୀଘ୍ର ଏ ବିଷୟରେ ନିଷ୍ପତ୍ତି ହେବ । ତାଳଚେର ମେଡିକାଲ କଲେଜ କାର୍ଯ୍ୟକ୍ଷମ ହେଲେ ଅନୁଗୁଳ, କେନ୍ଦୁଝର, ଢେଙ୍କାନାଳ ଏବଂ ଆଖପାଖ ଜିଲ୍ଲାର ଲୋକ ସୁବିଧାରେ ଉଚ୍ଚମାନର ସ୍ୱାସ୍ଥ୍ୟସେବା ପାଇ ପାରିବେ ।