ଭୁବନେଶ୍ୱର: ବଦଳି ଗଲାଣି ଓଡ଼ିଶାର ଚିତ୍ର। କ୍ରୀଡ଼ପାଇଁ ଓଡ଼ିଶାକୁ ମିଳିଛି ସ୍ୱତନ୍ତ୍ର ପରିଚୟ। ଅଲିମ୍ପିକ୍ସରେ ଦୁଇ ଓଡ଼ିଆ ହକି ଖେଳାଳି ପଦକ ଜିତିବା ପରେ ଓଡ଼ିଶା ହକିର ମାହୋଲ ବଦଳି ଯାଇଛି। ଅଧିକରୁ ଅଧିକ ହକି ଖେଳାଳି ଓଡ଼ିଶାରେ ବାହାର କରିବା ପାଇଁ ରାଜ୍ୟ ସରକାର ଅଣ୍ଟା ଭିଡିଛନ୍ତି। ଅନ୍ତର୍ଜାତୀୟ ସ୍ତରର କୋଚ୍ ନିଯୁକ୍ତି କରିବାକୁ ପ୍ରୟାସ କରାଯାଉଛି। ସେପଟେ ହକି ବିଶ୍ୱକପ୍‌ର ପୂର୍ବରୁ ରାଉରକେଲାର ହକି ଷ୍ଟାଡିୟମ ନିର୍ମାଣ ଶେଷ କରିବାକୁ ଦିଆଯାଇଛି ଡେଡଲାଇନ୍।

କ୍ରିକେଟ୍ ଓ ଫୁଟବଲକୁ ଛାଡ଼ି ଏବେ ହକି ପଛରେ ବାୟା ରାଜ୍ୟବାସୀ। ହକିର ଏନ୍ତୁଡ଼ିଶାଳ କୁହାଯାଉଥିବା ସୁନ୍ଦରଗଡ଼ରେ ଏବେ ହକିର କ୍ରେଜ୍ କାହିଁରେ କଣ। ଏହାରି ଭିତରେ ଓଡ଼ିଶା ହକିକୁ ଆହୁରି ଶାଣିତ କରିବା ପାଇଁ ରାଜ୍ୟସରକାର ଅଣ୍ଟା ଭିଡ଼ିଛନ୍ତି। ଓଡ଼ିଶା ହକି ପାଇଁ ଏକ ଅନ୍ତର୍ଜାତୀୟ ସ୍ତରର ଜଣାଶୁଣା କୋଚ୍ ନିଯୁକ୍ତି କରିବାକୁ ରାଜ୍ୟସରକାର ଚିନ୍ତା କରୁଛନ୍ତି। ମହାନ ହକି କିମ୍ବଦନ୍ତୀ ଜୁଡେ ଫେଲିକ୍ସ ଓଡ଼ିଶା ହକିର ମଙ୍ଗ ଧରିପାରନ୍ତି।

ଜୋରସୋର ଚାଲିଛି ଆଗମୀ ୨୦୨୩ ବିଶ୍ୱକପ୍‌ ପୂର୍ବରୁ ହକି ଷ୍ଟାଡିୟମର କାମ ଶେଷ ହେବ। ଏଥିପାଇଁ ଡେଡଲାଇନ୍ ରହିଛି ଜୁଲାଇ ୨୦୨୨। କାମର ଅଗ୍ରଗତି ନେଇ ବୈଠକ ଓ ସମୀକ୍ଷା ଜାରି ରହିଛି। ହକିକୁ ରାଜ୍ୟ ସରକାରଙ୍କ ପ୍ରୋତ୍ସାହନ ଜାରି ରହିଛି। ଏଭଳି ସମୟରେ କ୍ରୀଡାରେ କ୍ୟାରିୟର କରିବାକୁ ଅଧିକରୁ ଅଧିକ ଯୁବକ ଆଗ୍ରହ ପ୍ରକାଶ କଲେଣି।

ଭୁବନେଶ୍ୱର: ଚାଷୀଙ୍କ ପାଇଁ ଖୁସି ଖବର। ବଦଳିପାରେ ମରୁଡି ପରିସ୍ଥିତି। ବଙ୍ଗୋପସାଗରରେ ଦାନା ବାନ୍ଧୁଛି ଆଉ ଏକ ଲଘୁଚାପ। ଆସନ୍ତା ୨୮ରେ ଏକ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି। ଏହାର ପ୍ରଭାବରେ ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାରେ ବର୍ଷାର ପରିମାଣ ବୃଦ୍ଧି ପାଇବ। ଆସନ୍ତାକାଲି ଉତ୍ତର ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ଅଛି। ଯାହା ଘନୀଭୂତ ହୋଇ ୨୮ତାରିଖ ସନ୍ଧ୍ୟାରେ ଲଘୁଚାପରେ ପରିଣତ ହେବ।

ଏହାର ପ୍ରଭାବରେ ଖୋର୍ଦ୍ଧା, ପୁରୀ, କଟକ, ଜଗତସିଂହପୁର, କେନ୍ଦ୍ରାପଡା, ଯାଜପୁର, ବାଲେଶ୍ୱର, ଭଦ୍ରକ, ମୟୂରଭଞ୍ଜ ଓ କେନ୍ଦୁଝରରେ ବର୍ଷାର ପରିମାଣ ବଢିପାରେ। ଆସନ୍ତା ୨୪ଘଣ୍ଟା ମଧ୍ୟରେ ଏସବୁ ଜିଲ୍ଲା ସମେତ ଗଞ୍ଜାମ, ଗଜପତି, କନ୍ଧମାଳ, କଳାହାଣ୍ଡି, ନୟାଗଡ଼, ବୌଦ୍ଧ, ଅନୁଗୁଳରେ ପ୍ରବଳ ବର୍ଷା ହେବାର ସମ୍ଭାବନା ଅଛି। ଏସବୁ ଜିଲ୍ଲାଗୁଡିକୁ ୟେଲୋ ଆଲର୍ଟ ଜାରି କରିଛି ଭୁବନେଶ୍ୱର ପାଣିପାଗ କେନ୍ଦ୍ର।

ରାଜ୍ୟରେ ଜୁନ୍ ପହିଲାରୁ ଏବେ ସୁଦ୍ଧା ମୋଟ ୫୯୮ ଦଶମିକ ୬ମିଲିମିଟର ବର୍ଷା ହୋଇଛି। ଏହି ସମୟରେ ୮୬୯ମିଲିମିଟର ବର୍ଷା ହେବା କଥା। ରାଜ୍ୟରେ ଏବେ ୩୧ପ୍ରତିଶତ ନିଅଣ୍ଟିଆ ବର୍ଷା ହୋଇଥିବା ପାଣିପାଗ କେନ୍ଦ୍ର ସୂଚନା ଦେଇଛି। ତେବେ ଆଗକୁ ଲଘୁଚାପ ପ୍ରଭାବରେ ଭଲ ବର୍ଷା ହେବାର ସମ୍ଭାବନା ରହିଛି। ଏହା ଦ୍ୱାରା ନିଅଣ୍ଟିଆ ବର୍ଷା ପୂରଣ ହେବାର ଆଶା ରହିଛି।

ଭୁବନେଶ୍ୱର: ମେ’ ମାସରେ ହାତୀ ଗଣନା ଓ ଡିସେମ୍ବରରୁ ଜାନୁଆରୀ ଭିତରେ ବାଘ ଗଣନା। ୭୦ ଦଶକ ପରଠାରୁ ଏମିତି ହେଉଥିଲା ବାଘ ଓ ହାତୀ ଗଣନା। ହେଲେ ଏବେ ବଦଳିବ ପଦ୍ଧତି। ଡିସେମ୍ବରରେ ଏକାଠି ହାତୀ ଓ ବାଘ ଗଣନା କରିବାକୁ ପ୍ରସ୍ତାବ ଦେଇଛନ୍ତି କେନ୍ଦ୍ର ସରକାର। ହେଲେ ଏଯାଏ ଏକାଠି ଗଣନାର ପଦ୍ଧତି ବାହାରି ପାରିନାହିଁ। ୨୦୧୭ ଗଣନା ଅନୁସାରେ, ରାଜ୍ୟରେ ୧୯୭୬ ହାତୀ ଥିଲେ। ସେହିପରି ୨୦୧୮ ଗଣନାରେ ବାଘ ସଂଖ୍ୟା ୩୨ରୁ ୨୮କୁ ଖସିଥିଲା।

ଏଯାଏ ମେ’ ମାସ ଖରାଦିନରେ ହାତୀ ଗଣନା ହୋଇଆସୁଛି। କାରଣ ଖରାରେ ପାଣି ସନ୍ଧାନରେ ଗୋଟାଏ ସ୍ଥାନରେ ଏକାଠି ହୁଅନ୍ତି ହାତୀ ପଲ। ପୂର୍ବରୁ ନିୟୋଜିତ ବନ କର୍ମଚାରୀ, ସେମାନଙ୍କ ଗଣନା କରନ୍ତି। ଅନ୍ୟପଟେ ଥଣ୍ଡାରେ ଘଞ୍ଚ ବଣରେ ଅଧିକ ବାଟ ବୁଲେ ନାହିଁ ବାଘ। ପାଦ ଚିହ୍ନ ଓ କ୍ୟାମେରା ଟ୍ରାପିଂରେ ବାଘ ଗଣନା ହୁଏ। ହେଲେ ଥଣ୍ଡା ଦିନରେ ପାଣିର ଅଭାବ ନଥିବାରୁ ହାତୀ ଗୋଟାଏ ସ୍ଥାନରେ ଏକାଠି ହେବା କଷ୍ଟକର। ଯେଉଁଥି ପାଇଁ ଗଣନାରେ ସମସ୍ୟା ଉପୁଜିପାରେ।

ଜଙ୍ଗଲ ଭିତରେ ବୁଲୁଥିବା ସ୍ଥାନ ବାଘ ଓ ହାତୀଙ୍କ ୯୦ ପ୍ରତିଶତ ସମାନ। ତାକୁ ଭିତ୍ତି କରି ଗଣନା କଲେ ବି ସମସ୍ୟା ଦେଖା ଦେଇପାରେ। କାରଣ ବିଭିନ୍ନ ସମୟରେ ହାତୀ ପାଦ ତଳେ ବାଘ ପାଦ ଚିହ୍ନ ଲିଭିବାର ସମ୍ଭାବନା ରହିଛି।

ଗୁଣୁପୁର: କିଷାନ ସଭା କାର୍ଡ ନାଁରେ ଲୁଟ୍। ଉପାନ୍ତ ଅଞ୍ଚଳରେ ମାତିଛନ୍ତି ଦଲାଲ୍। ଲୁଟ୍‌ର ଚକ୍ରବ୍ୟୂହରେ ନିରୀହ ଚାଷୀ। ବ୍ୟାଙ୍କ ଫ୍ରଡ, ସାଇବର ଠକଙ୍କ କଥା ଶୁଣିଥିବେ। ଏବେ ନିରୀହ ଚାଷୀଙ୍କୁ ଲୁଟର ଚକ୍ରବ୍ୟୂହରେ ଫସାଇବାକୁ ଦଲାଲ ରଚୁଛନ୍ତି ଷଡ଼ଯନ୍ତ୍ର। ଆଦିବାସୀ ଇଲାକା ଓ ଗ୍ରାମାଞ୍ଚଳକୁ ମୁହାଁଇଛନ୍ତି ଠକ। କିଷାନ ସଭା କାର୍ଡରେ ନାଁରେ ଲୋକଙ୍କୁ ଲୁଟିବାକୁ ଚାଲ୍‌ ଖେଳିଛନ୍ତି। ଏଭଳି ଅଭିଯୋଗ ରାୟଗଡ଼ା ଜିଲ୍ଲା ଗୁଣପୁରରୁ ଆସିଛି। ଚାଷୀଙ୍କୁ ଲୋଭ ଦେଖାଇ କିଷାନ ସଭା କାର୍ଡ ନାଁରେ ଅର୍ଥ ଲୁଟୁଥିବା ଅଭିଯୋଗ ହୋଇଛି।

ପ୍ରତି କାର୍ଡ ପିଛା ୨୦୦ ଟଙ୍କା ଲେଖାଏ ସଂଗ୍ରହ କରୁଛନ୍ତି ଦଲାଲ। ବର୍ତ୍ତମାନ ସୁଦ୍ଧା ୪ ହଜାର କାର୍ଡ ବଣ୍ଟା ଯାଇଥିବା ଲୋକ କହିଛନ୍ତି। ଚଳିତ ବର୍ଷ ମରୁଡି ପରିସ୍ଥିତି ସୃଷ୍ଟି ହୋଇଛି। ମରୁଡି ଘୋଷଣା ହେଲେ ସହାୟତା ରାଶି ଏହି କାର୍ଡ ଦ୍ୱାରା ମିଳିବ, ବ୍ୟାଙ୍କରୁ ମଧ୍ୟ ଋଣ ମିଳିବ ଏହି ଲୋଭ ଦେଖାଇ ଚାଷୀଙ୍କୁ ଦଲାଲ ଠକୁଛନ୍ତି। ସେପଟେ କିଷାନ ସଭା କାର୍ଡ ବାବଦରେ ଜିଲ୍ଲା କୃଷି ଅଧିକାରୀଙ୍କୁ ପଚାରିବାରୁ ସେ ଏ ବିଷୟ କିଛି ଜାଣିନାହାନ୍ତି। ତଦନ୍ତ କରି ଦଲାଲଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।

ଭୁବନେଶ୍ୱର: ରୂପାନ୍ତର ହେଉଛି ସ୍କୁଲ। ଆଜି ତୃତୀୟ ପର୍ଯ୍ୟାୟରେ ୧୦ଟି ବିଦ୍ୟାଳୟର ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ୫-ଟି ସଚିବ ଭିକେ ପାଣ୍ଡିଆନ୍ କାର୍ଯ୍ୟକ୍ରମ ପରିଚାଳନା କରିଥିଲେ। ଭିଡିଓ କନଫରେନ୍ସିଂ ଜରିଆରେ ମୁଖ୍ୟମନ୍ତ୍ରୀ ଏହି ସ୍କୁଲର ଉଦଘାଟନ କରିଛନ୍ତି। କାର୍ଯ୍ୟକ୍ରମରେ ବହୁ ମନ୍ତ୍ରୀ ଓ ବିଧାୟକ ସାମିଲ ହୋଇଛନ୍ତି। ହିଞ୍ଜିଳିକାଟୁ ଓ ଶେରଗଡ ବ୍ଲକ ଅଞ୍ଚଳର ୫୦ଟି ବିଦ୍ୟାଳୟର ହୋଇଛି ରୂପାନ୍ତର। ଶ୍ରେଣୀ ଗୃହ ସାଙ୍ଗକୁ ଇ-ଲାଇବ୍ରେରୀ ନିର୍ମାଣ ହୋଇଛି। ଯେଉଁଥିରେ ଛାତ୍ର ଛାତ୍ରୀମାନେ ଅନଲାଇନରେ ପାଠ ପଢିବାର ସୁଯୋଗ ପାଇବେ।

ସ୍ୱପ୍ନ ଓ ସମ୍ଭାବନା ହେଉଛି ଛାତ୍ର ଜୀବନର ପରିଚୟ। ତୁମେମାନେ ବଡ ବଡ ସ୍ୱପ୍ନ ଦେଖ। ନିଜ ଭିତରେ ଥିବା ବିପୁଳ ପ୍ରତିଭାକୁ ଉପଯୋଗ କରି ସ୍ୱପ୍ନକୁ ସାକାର କର ଏବଂ ଜୀବନର ଲକ୍ଷ୍ୟ ପୂରଣ ହେବା ପର୍ଯ୍ୟନ୍ତ ପରିଶ୍ରମ ଜାରି ରଖ ବୋଲି ସ୍କୁଲକୁ ଲୋକାର୍ପିତ କରିବା ଅବସରରେ ଛାତ୍ରଛାତ୍ରୀ ମାନଙ୍କୁ ଉଦ୍‌ବୋଧନ ଦେଇ ମୁଖ୍ୟମନ୍ତ୍ରୀ ଏହା କହିଛନ୍ତି।

ସମସ୍ତ ବିଦ୍ୟାଳୟକୁ ଏବେ ପର୍ଯ୍ୟାୟକ୍ରମେ ଉଦଘାଟନ କରାଯାଉଥିବା ବେଳେ, ଆଜି ଆଉ ୧୦ଟି ବିଦ୍ୟାଳୟକୁ ମୁଖ୍ୟମନ୍ତ୍ରୀ ଭିଡ଼ିଓ କନଫରେନ୍ସିଂ ଜରିଆରେ ଉଦଘାଟନ କରିଛନ୍ତି। ସମସ୍ତ ସ୍କୁଲ ଛାତ୍ରଛାତ୍ରୀ ମାନଙ୍କ ସହ ଭିଡିଓ କନଫରେନ୍ସିଂ ମାଧ୍ୟମରେ କଥା ହୋଇଛନ୍ତି ମୁଖ୍ୟମନ୍ତ୍ରୀ। ତେବେ ଛାତ୍ରଛାତ୍ରୀ ମାନେ ସେମାନଙ୍କ ସ୍କୁଲର ଏଭଳି ରୂପାନ୍ତର ପାଇଁ ବହୁତ ଖୁସି ଥିବା କହିଛନ୍ତି। ପ୍ରାଇଭେଟ ସ୍କୁଲ ଠାରୁ ବହୁ ଉନ୍ନତ ଧରଣର ସ୍କୁଲରେ ପଢ଼ିବାର ସୁଯୋଗ ପାଇଁ ସେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି।

ଛାତ୍ରଛାତ୍ରୀ ମାନେ କହିଛନ୍ତି ଯେ ଇ-ଲାଇବ୍ରେରୀ, ଉନ୍ନତମାନର ଶ୍ରେଣୀଗୃହ, ଭଲ ଖେଳପଡ଼ିଆ ଆଗରୁ ନଥିଲା। କିନ୍ତୁ ସ୍କୁଲର ରୂପାନ୍ତର ହେବା ପରେ ଏସବୁ ଆମକୁ ମିଳିପାରିଛି। ଏହା ଦ୍ୱାରା ଆଗକରୁ ଯାହା ପଢ଼ିବାକୁ କଷ୍ଟ ହେଉଥିଲା ଏବେ ତାହା ପଢ଼ିବାକୁ ସହଜ ଲାଗୁଛି ଏବଂ ଆମେ ଭଲରେ ବୁଝି ପଢ଼ିପାରୁଛୁ ବୋଲି ଛାତ୍ରଛାତ୍ରୀମାନେ କହିଛନ୍ତି। ସେହିଭଳି ସେରଗଡ଼ ଅନ୍ତର୍ଗତ ଗୋବିନ୍ଦପୁର ହାଇସ୍କୁଲର ୧୦ମ ଶ୍ରେଣୀର ଛାତ୍ରୀ ନିକିତା ଜେନା ମୁଖ୍ୟମନ୍ତ୍ରୀଙ୍କ ସହ କଥା ହୋଇଛନ୍ତି।

ପୂର୍ବରୁ ବିଦ୍ୟାଳରେ ବସିବା ପାଇଁ ବେଞ୍ଚର ସୁବିଧା ନଥିଲା ପଢ଼ିବା ପାଇଁ ଉପଯୁକ୍ତ ଆଲୋକର ବ୍ୟବସ୍ଥା ନଥିଲା। ଲାଇବ୍ରେରୀ ଠାରୁ ଆରମ୍ଭ କରି ଲାବ୍ରୋଟାରୀ ଏବଂ ପିଇବା ପାଣି କି ଉନ୍ନତମାନର ଖେଳ ପଡ଼ିଆର ସୁବିଧା ନଥିଲା। କିନ୍ତୁ ବର୍ତ୍ତମାନ ୫-ଟି ଅନ୍ତର୍ଗତ କରାଯାଇଥିବା ସ୍କୁଲର ନବିକରଣ ହୋଇଛି। ଯେଉଁଥିପାଇଁ ଏବେ ସ୍କୁଲ ଆମର ସ୍ମାର୍ଟ ହୋଇଛି। ଇ- ଲାଇବ୍ରେରୀ, ଅତ୍ୟାଧୁନିକ ଲାବ୍ରୋଟାରୀ, ଉନ୍ନତମାନର ଶ୍ରେଣୀଗୃହ, ୬୫ ଇଞ୍ଚର ସ୍ମାର୍ଟ ଟିଭି, ଇଣ୍ଟର ନେଟ୍‌, ଉନ୍ନତମାନର ଖେଳପଡ଼ିଆ, ସ୍ୱଚ୍ଛ ଶୌଚାଳୟ ଆଜି ଆମ ସ୍କୁଲରେ ରହିଛି। ଏଥିପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ନିକିତା। ଏହାପରେ ମୁଖ୍ୟମନ୍ତ୍ରୀ ନିକିତାଙ୍କୁ ତାଙ୍କ ଜୀବନରେ କଣ କରିବାକୁ ଇଚ୍ଛା ବୋଲି ପଚାରିଥିଲେ। ନିକିତା ଜଣେ ଭଲ ଡାକ୍ତର ହେବେ ବୋଲି କହିଥିଲେ। ଏମିତି ୧୦ ଟି ସ୍କୁଲର ପିଲା ମାନଙ୍କ ସହ ଜଣ ଜଣ କରି କଥା ହୋଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

ଆଜି ଲୋକାର୍ପିତ ହୋଇଥିବା ବିଦ୍ୟାଳୟ ଗୁଡିକ ହେଉଛି ଗଣ୍ଡୋଳ ପଞ୍ଚାୟତ ଗଣେଷ ବିଦ୍ୟାପୀଠ, କୃଷ୍ଣଛାଇ ପଞ୍ଚାୟତର କୃଷ୍ଣଛାଇ ହାଇସ୍କୁଲ, ରଲବା ପଞ୍ଚାୟତର ଅଲପୁର ହାଇସ୍କୁଲ, ଅଲାରିଗଡା ପଞ୍ଚାୟତର ପଞ୍ଚାୟତ ହାଇସ୍କୁଲ, କଞ୍ଚୁରେ ପଞ୍ଚାୟତର ସରକାରୀ ହାଇସ୍କୁଲ, ଧବଳପୁର ପଞ୍ଚାୟତର ଧବଳପୁର ହାଇସ୍କୁଲ, ବୁରୁପଡା ପଞ୍ଚାୟତର ସମଲାଇ ବିଦ୍ୟାପୀଠ, ଗୋବିନ୍ଦପୁର ପଞ୍ଚାୟତର ଗୋବିନ୍ଦପୁର ହାଇସ୍କୁଲ,  କୁରୁଲା ପଞ୍ଚାୟତର କୁରୁଲା ସରକାରୀ ହାଇସ୍କୁଲ ଏବଂ  ସାରୁ ପଞ୍ଚାୟତର ସାରୁ ହାଇସ୍କୁଲ।

ଏହି ଅବସରରେ ମନ୍ତ୍ରୀଶ୍ରୀ ବିକ୍ରମ କେଶରୀ ଆରୁଖ, ମନ୍ତ୍ରୀ ଅରୁଣ ସାହୁ , ମନ୍ତ୍ରୀ ତୁଷାର କାନ୍ତି ବେହେରା ସରକାରୀ ମୁଖ୍ୟ ସଚେତକ ପ୍ରମିଳା ମଲ୍ଲିକ। ଏମ୍ ପି ପ୍ରମିଳା ବିଶୋଇ, ବିଧାୟକଗଣ, ସରପଞ୍ଚ, ପଞ୍ଚାୟତ ସଦସ୍ୟ, ସ୍କୁଲର ପୁରାତନ ଛାତ୍ରଛାତ୍ରୀ, ବର୍ତ୍ତମାନର ଛାତ୍ରଛାତ୍ରୀ, ଅଭିଭାବକ ଓ ସ୍ଥାନୀୟ ଜନସାଧାରଣ ଯୋଗ ଦେଇଥିଲେ ।