ଭୁବନେଶ୍ୱର: ରୂପାନ୍ତର ହେଉଛି ସ୍କୁଲ। ଆଜି ତୃତୀୟ ପର୍ଯ୍ୟାୟରେ ୧୦ଟି ବିଦ୍ୟାଳୟର ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ୫-ଟି ସଚିବ ଭିକେ ପାଣ୍ଡିଆନ୍ କାର୍ଯ୍ୟକ୍ରମ ପରିଚାଳନା କରିଥିଲେ। ଭିଡିଓ କନଫରେନ୍ସିଂ ଜରିଆରେ ମୁଖ୍ୟମନ୍ତ୍ରୀ ଏହି ସ୍କୁଲର ଉଦଘାଟନ କରିଛନ୍ତି। କାର୍ଯ୍ୟକ୍ରମରେ ବହୁ ମନ୍ତ୍ରୀ ଓ ବିଧାୟକ ସାମିଲ ହୋଇଛନ୍ତି। ହିଞ୍ଜିଳିକାଟୁ ଓ ଶେରଗଡ ବ୍ଲକ ଅଞ୍ଚଳର ୫୦ଟି ବିଦ୍ୟାଳୟର ହୋଇଛି ରୂପାନ୍ତର। ଶ୍ରେଣୀ ଗୃହ ସାଙ୍ଗକୁ ଇ-ଲାଇବ୍ରେରୀ ନିର୍ମାଣ ହୋଇଛି। ଯେଉଁଥିରେ ଛାତ୍ର ଛାତ୍ରୀମାନେ ଅନଲାଇନରେ ପାଠ ପଢିବାର ସୁଯୋଗ ପାଇବେ।

ସ୍ୱପ୍ନ ଓ ସମ୍ଭାବନା ହେଉଛି ଛାତ୍ର ଜୀବନର ପରିଚୟ। ତୁମେମାନେ ବଡ ବଡ ସ୍ୱପ୍ନ ଦେଖ। ନିଜ ଭିତରେ ଥିବା ବିପୁଳ ପ୍ରତିଭାକୁ ଉପଯୋଗ କରି ସ୍ୱପ୍ନକୁ ସାକାର କର ଏବଂ ଜୀବନର ଲକ୍ଷ୍ୟ ପୂରଣ ହେବା ପର୍ଯ୍ୟନ୍ତ ପରିଶ୍ରମ ଜାରି ରଖ ବୋଲି ସ୍କୁଲକୁ ଲୋକାର୍ପିତ କରିବା ଅବସରରେ ଛାତ୍ରଛାତ୍ରୀ ମାନଙ୍କୁ ଉଦ୍‌ବୋଧନ ଦେଇ ମୁଖ୍ୟମନ୍ତ୍ରୀ ଏହା କହିଛନ୍ତି।

ସମସ୍ତ ବିଦ୍ୟାଳୟକୁ ଏବେ ପର୍ଯ୍ୟାୟକ୍ରମେ ଉଦଘାଟନ କରାଯାଉଥିବା ବେଳେ, ଆଜି ଆଉ ୧୦ଟି ବିଦ୍ୟାଳୟକୁ ମୁଖ୍ୟମନ୍ତ୍ରୀ ଭିଡ଼ିଓ କନଫରେନ୍ସିଂ ଜରିଆରେ ଉଦଘାଟନ କରିଛନ୍ତି। ସମସ୍ତ ସ୍କୁଲ ଛାତ୍ରଛାତ୍ରୀ ମାନଙ୍କ ସହ ଭିଡିଓ କନଫରେନ୍ସିଂ ମାଧ୍ୟମରେ କଥା ହୋଇଛନ୍ତି ମୁଖ୍ୟମନ୍ତ୍ରୀ। ତେବେ ଛାତ୍ରଛାତ୍ରୀ ମାନେ ସେମାନଙ୍କ ସ୍କୁଲର ଏଭଳି ରୂପାନ୍ତର ପାଇଁ ବହୁତ ଖୁସି ଥିବା କହିଛନ୍ତି। ପ୍ରାଇଭେଟ ସ୍କୁଲ ଠାରୁ ବହୁ ଉନ୍ନତ ଧରଣର ସ୍କୁଲରେ ପଢ଼ିବାର ସୁଯୋଗ ପାଇଁ ସେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି।

ଛାତ୍ରଛାତ୍ରୀ ମାନେ କହିଛନ୍ତି ଯେ ଇ-ଲାଇବ୍ରେରୀ, ଉନ୍ନତମାନର ଶ୍ରେଣୀଗୃହ, ଭଲ ଖେଳପଡ଼ିଆ ଆଗରୁ ନଥିଲା। କିନ୍ତୁ ସ୍କୁଲର ରୂପାନ୍ତର ହେବା ପରେ ଏସବୁ ଆମକୁ ମିଳିପାରିଛି। ଏହା ଦ୍ୱାରା ଆଗକରୁ ଯାହା ପଢ଼ିବାକୁ କଷ୍ଟ ହେଉଥିଲା ଏବେ ତାହା ପଢ଼ିବାକୁ ସହଜ ଲାଗୁଛି ଏବଂ ଆମେ ଭଲରେ ବୁଝି ପଢ଼ିପାରୁଛୁ ବୋଲି ଛାତ୍ରଛାତ୍ରୀମାନେ କହିଛନ୍ତି। ସେହିଭଳି ସେରଗଡ଼ ଅନ୍ତର୍ଗତ ଗୋବିନ୍ଦପୁର ହାଇସ୍କୁଲର ୧୦ମ ଶ୍ରେଣୀର ଛାତ୍ରୀ ନିକିତା ଜେନା ମୁଖ୍ୟମନ୍ତ୍ରୀଙ୍କ ସହ କଥା ହୋଇଛନ୍ତି।

ପୂର୍ବରୁ ବିଦ୍ୟାଳରେ ବସିବା ପାଇଁ ବେଞ୍ଚର ସୁବିଧା ନଥିଲା ପଢ଼ିବା ପାଇଁ ଉପଯୁକ୍ତ ଆଲୋକର ବ୍ୟବସ୍ଥା ନଥିଲା। ଲାଇବ୍ରେରୀ ଠାରୁ ଆରମ୍ଭ କରି ଲାବ୍ରୋଟାରୀ ଏବଂ ପିଇବା ପାଣି କି ଉନ୍ନତମାନର ଖେଳ ପଡ଼ିଆର ସୁବିଧା ନଥିଲା। କିନ୍ତୁ ବର୍ତ୍ତମାନ ୫-ଟି ଅନ୍ତର୍ଗତ କରାଯାଇଥିବା ସ୍କୁଲର ନବିକରଣ ହୋଇଛି। ଯେଉଁଥିପାଇଁ ଏବେ ସ୍କୁଲ ଆମର ସ୍ମାର୍ଟ ହୋଇଛି। ଇ- ଲାଇବ୍ରେରୀ, ଅତ୍ୟାଧୁନିକ ଲାବ୍ରୋଟାରୀ, ଉନ୍ନତମାନର ଶ୍ରେଣୀଗୃହ, ୬୫ ଇଞ୍ଚର ସ୍ମାର୍ଟ ଟିଭି, ଇଣ୍ଟର ନେଟ୍‌, ଉନ୍ନତମାନର ଖେଳପଡ଼ିଆ, ସ୍ୱଚ୍ଛ ଶୌଚାଳୟ ଆଜି ଆମ ସ୍କୁଲରେ ରହିଛି। ଏଥିପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ନିକିତା। ଏହାପରେ ମୁଖ୍ୟମନ୍ତ୍ରୀ ନିକିତାଙ୍କୁ ତାଙ୍କ ଜୀବନରେ କଣ କରିବାକୁ ଇଚ୍ଛା ବୋଲି ପଚାରିଥିଲେ। ନିକିତା ଜଣେ ଭଲ ଡାକ୍ତର ହେବେ ବୋଲି କହିଥିଲେ। ଏମିତି ୧୦ ଟି ସ୍କୁଲର ପିଲା ମାନଙ୍କ ସହ ଜଣ ଜଣ କରି କଥା ହୋଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

ଆଜି ଲୋକାର୍ପିତ ହୋଇଥିବା ବିଦ୍ୟାଳୟ ଗୁଡିକ ହେଉଛି ଗଣ୍ଡୋଳ ପଞ୍ଚାୟତ ଗଣେଷ ବିଦ୍ୟାପୀଠ, କୃଷ୍ଣଛାଇ ପଞ୍ଚାୟତର କୃଷ୍ଣଛାଇ ହାଇସ୍କୁଲ, ରଲବା ପଞ୍ଚାୟତର ଅଲପୁର ହାଇସ୍କୁଲ, ଅଲାରିଗଡା ପଞ୍ଚାୟତର ପଞ୍ଚାୟତ ହାଇସ୍କୁଲ, କଞ୍ଚୁରେ ପଞ୍ଚାୟତର ସରକାରୀ ହାଇସ୍କୁଲ, ଧବଳପୁର ପଞ୍ଚାୟତର ଧବଳପୁର ହାଇସ୍କୁଲ, ବୁରୁପଡା ପଞ୍ଚାୟତର ସମଲାଇ ବିଦ୍ୟାପୀଠ, ଗୋବିନ୍ଦପୁର ପଞ୍ଚାୟତର ଗୋବିନ୍ଦପୁର ହାଇସ୍କୁଲ,  କୁରୁଲା ପଞ୍ଚାୟତର କୁରୁଲା ସରକାରୀ ହାଇସ୍କୁଲ ଏବଂ  ସାରୁ ପଞ୍ଚାୟତର ସାରୁ ହାଇସ୍କୁଲ।

ଏହି ଅବସରରେ ମନ୍ତ୍ରୀଶ୍ରୀ ବିକ୍ରମ କେଶରୀ ଆରୁଖ, ମନ୍ତ୍ରୀ ଅରୁଣ ସାହୁ , ମନ୍ତ୍ରୀ ତୁଷାର କାନ୍ତି ବେହେରା ସରକାରୀ ମୁଖ୍ୟ ସଚେତକ ପ୍ରମିଳା ମଲ୍ଲିକ। ଏମ୍ ପି ପ୍ରମିଳା ବିଶୋଇ, ବିଧାୟକଗଣ, ସରପଞ୍ଚ, ପଞ୍ଚାୟତ ସଦସ୍ୟ, ସ୍କୁଲର ପୁରାତନ ଛାତ୍ରଛାତ୍ରୀ, ବର୍ତ୍ତମାନର ଛାତ୍ରଛାତ୍ରୀ, ଅଭିଭାବକ ଓ ସ୍ଥାନୀୟ ଜନସାଧାରଣ ଯୋଗ ଦେଇଥିଲେ ।

ଭୁବନେଶ୍ୱର: ଭୁବନେଶ୍ୱର ବଢ଼େଇବାଙ୍କ ଛକ ଏସବିଆଇ ଏଟିଏମ୍ ଲୁଟ ଉଦ୍ୟମ ଘଟଣା। ମୁଖ୍ୟ ଅଭିଯୁକ୍ତକୁ ଗିରଫ ସହ ଜବତ ହେଲା ବହୁମୂଲ୍ୟର କାର୍‌। ଗିରଫ ଲୁଟେରା ଠାରୁ ବିପୁଲ ପରିମାଣର ଟଙ୍କା ଜବତ ହୋଇଛି। ଲୁଟ ଟଙ୍କାରେ ଲୁଟେରା ଚଢ଼ୁଥିଲେ ୨୫ଲକ୍ଷ ଟଙ୍କାର ହେକଟର ଗାଡି। ଦାମୀ ଗାଡିରେ କରୁଥିଲେ ଏଟିଏମ୍ ଲୁଟ୍। ଲୁଟ ଟଙ୍କାରେ ଆଲିସାନ ଲାଇଫଷ୍ଟାଇଲରେ ଜୀବନକୁ ଅତିବାହିତ କରୁଥିଲେ। ଦିନରେ ବ୍ଲ୍ୟୁପ୍ରିଂଟ କରି  ରାତିରେ ଲୁଟର ଅପରେସନ କରୁଥିଲେ।

ଭୁବନେଶ୍ୱର ବଢ଼େଇବାଙ୍କ ଛକ ନିକଟରେ ଥିବା ଏସବିଆଇ ଏଟିଏମ୍ ଲୁଟ ବେଳେ ଧରାପଡିଥିବା  ଲୁଟେରାଙ୍କ ଠାରୁ ଜବତ ହୋଇଛି , ନାଲି ରଙ୍ଗର ହେକ୍ଟର କାର। ଏହି କାର୍‌ରେ ବୁଲି ବୁଲି ରାଜଧାନୀର ସମସ୍ତ ପୁରୁଣା ଏଟିଏମ୍‌କୁ ଟାର୍ଗେଟ କରୁଥିଲେ ଲୁଟେରା। ତେବେ ଏଭଳି ଘଟଣା ପାଇଁ ବ୍ୟାଙ୍କ କତୃପକ୍ଷ ଦାୟୀ। କାରଣ କେଉଁଠି ସିକ୍ୟୁରିଟି ଗାର୍ଡ ନାହାନ୍ତି ତ ଆଉ କେଉଁଠି ସିସିଟିଭି ଅଚଳ ହୋଇ ପଡ଼ିଛି। ଆରବିଆଇ ଗାଇଡ ମାନିବାକୁ କମିଶନରେଟ ପୋଲିସ ପକ୍ଷରୁ ବ୍ୟାଙ୍କ ମାନଙ୍କୁ ନୋଟିସ କରାଯାଉଛି।

ତଫାପି ଚେତୁ ନାହାନ୍ତି ବ୍ୟାଙ୍କ କତୃପକ୍ଷ। ତେଣୁ ଆରବିଆଇ ଗାଇଡ ଲାଇନ୍‌କୁ କଡାକଡି କରିବାକୁ ମତ ରଖିଛନ୍ତି ପୂର୍ବତନ ବ୍ୟାଙ୍କ ଅଧିକାରୀ। ସେପେଟେ ମୂଖ୍ୟ  ଅଭିଯୁକ୍ତ ଗିରଫ ନେଇ ମୁଁହ ଖୋଲିନି ପୋଲିସ। ଲୁଟେରା ମାନେ କିଭଳି ସ୍ୱତନ୍ତ୍ର ଡ଼ିଭାଇସ ଲଗାଇ ଟେକନିକରେ ଲୁଟ କରୁଥିଲେ ତାକୁ ନେଇ ଡେମୋ ଦେଖାଇବ ପୋଲିସ। ଏହା ପରେ ପ୍ରେସମିଟ କରି ପୁରା ସୂଚନା ଦିଆଯିବ ବୋଲି ପୋଲିସ କହଛି।

ଭୁବନେଶ୍ୱର: ପେଶାଦାର ଅପରାଧୀଙ୍କ ବିରୋଧରେ ଓଡ଼ିଶା ପୋଲିସର ଜିରୋ ଟଲରାନ୍ସ। ଜାମିନ ବିହୀନ ଗିରଫ ପରୱାନା ଜାରି ହେବା ସତ୍ତ୍ୱେ ଖୁଲାମଖୁଲା ବୁଲୁଥିବା ଅପରାଧୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେଇଛି ଓଡ଼ିଶା ପୋଲିସ। ଗତ ୧୬ ତାରିଖରୁ ୨୫ ତାରିଖ ମଧ୍ୟରେ ଆରମ୍ଭ ହୋଇଥିବା ସ୍ପେଶାଲ ଡ୍ରାଇଭରେ କୋର୍ଟ ନିର୍ଦ୍ଦେଶ ମୁତାବକ ୪୯୪୫ ଜଣଙ୍କୁ ଗିରଫ କରାଯାଇଥିବା ସୂଚନା ଦେଇଛନ୍ତି ପୋଲିସ ଡିଜି ଶ୍ରୀ ଅଭୟ।

ସେସନ୍ସ ଟ୍ରାଏଲ କେସ ରେ ୪୬୭, ଜିଆର କେସରେ ୩୫୧୭ ଓ ଅନ୍ୟାନ୍ୟ କେସ ରେ ୯୬୧ ଜଣଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଛି । ଗଞ୍ଜାମ ଜିଲ୍ଲାରୁ ସର୍ବାଧିକ ୮୫୦ ଜଣଙ୍କୁ ଗିରଫ କରାଯାଇଛି । ଏହାପରେ ବାଲେଶ୍ଵରରୁ ୬୪୫ ଓ ଖୋର୍ଦ୍ଧା ରୁ ୫୪୭ ଜଣଙ୍କୁ ଗିରଫ କରାଯାଇଥିବା ସୂଚନା ଦେଇଛନ୍ତି ଡିଜିପି।