ମାଲକାନାଗିରି: ସୀମାନ୍ତରେ ପୁଣି ବିସ୍ଫୋରଣ। ୨ ସିଆରପିଏଫ୍ ଯବାନ ଆହତ। ଆହତ ଯବାନଙ୍କୁ ଛତିଶଗଡ଼ର ବିଜାପୁର ଜିଲ୍ଲା ଚିକିତ୍ସାଳୟରେ ଭର୍ତ୍ତି କରାଯାଇଛି। ଆହତ ଯବାନମାନେ ହେଲେ ବାଲକିଶନ ଓ ସାନିଦୁଲ ଇସଲାମ। ପ୍ରେସର ବୋମା ବିସ୍ଫୋରଣ ଯୋଗୁ ଦୁଇ ଯବାନ ଆହତ ହୋଇଥିବା ସୂଚନା ମିଳିଛି। ରୋଡ୍ ଅପରେସନରେ ଡ୍ୟୁଟି କରିବା ବେଳେ ଅଘଟଣ ଘଟିଛି। ମୋଡ଼କପାଲ ଥାନା ହଲବାପାରା ନିକଟରେ ବିସ୍ଫୋରଣ ହୋଇଥିବା ବେଳେ ଯବାନ ସାମାନ୍ୟ ଆହତ ହୋଇଛନ୍ତି। ବସ୍ତର IG ସୁନ୍ଦରରାଜ ପି ଏହି ସୂଚନା ଦେଇଛନ୍ତି। ତେବେ ଯଦି ଦେଖିବା କିଛି ଦିନ ହେବ ଛତିଶଗଡ଼ ସୀମାନ୍ତରେ ବାରମ୍ବର ଆକ୍ରମଣ ହେବାରେ ଲାଗିଛି।
ଓଡ଼ିଶା ହାଇକୋର୍ଟକୁ ଆସିବେ ୪ ନୂଆ ବିଚାରପତି
କଟକ: ଓଡ଼ିଶା ହାଇକୋର୍ଟ ପାଇବ ୪ନୂଆ ବିଚାରପତି। ୪ଜଣଙ୍କ ନାଁ ସୁପାରିସ କରିଛନ୍ତି ସୁପ୍ରିମକୋର୍ଟ କଲେଜିୟମ। ବାର୍ରୁ ୨ଜଣ ଓ ୨ ଜଣ ଜୁଡିସିଆଲ ଅଫିସରଙ୍କ ନାଁ ସୁପାରିସ କରାଯାଇଛି। ବାର୍ରୁ ଆଦିତ୍ୟ କୁମାର ମହାପାତ୍ର ଓ ମୃଗାଙ୍କ ଶେଖର ସାହୁଙ୍କ ନାଁ ସୁପାରିସ କରାଯାଇଥିବାବେଳେ ଜୁଡିସିଆଲ ଅଧିକାରୀ ହେଲେ ରାଧାକୃଷ୍ଣ ପଟ୍ଟନାୟକ ଓ ଶଶିକାନ୍ତ ମିଶ୍ର। ଏନେଇ ସୁପ୍ରିମକୋର୍ଟ କଲେଜିୟମର ବୈଠକ ବସି ନିଷ୍ପତ୍ତି ନିଆଯାଇଛି। ଏହି ଚାରି ଜଣଙ୍କୁ ନିଯୁକ୍ତି ମିଳିଲେ ଓଡ଼ିଶା ହାଇକୋର୍ଟରେ ଜଜ୍ଙ୍କ ସଂଖ୍ୟା ୧୯ ବୃଦ୍ଧି ପାଇବ।
ଜାତୀୟ ଗ୍ରାମ୍ୟ ଉନ୍ନୟନ ମାନ ନିର୍ଦ୍ଧାରଣ ଅଧିକାରୀଙ୍କ ଦୁର୍ଘଟଣାରେ ମୃତ୍ୟୁ, ରାସ୍ତା କାମ ତଦାରଖ ପାଇଁ ଆସିଥିଲେ କେନ୍ଦୁଝର
ଆନନ୍ଦପୁର: କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଜାତୀୟ ରାଜପଥ ୨୦ର ଦରଖଳା ଛକ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା। ଦିଲ୍ଲୀର ଜାତୀୟ ଗ୍ରାମ୍ୟ ଉନ୍ନୟନ ମାନ ନିର୍ଦ୍ଧାରଣ ଅଧିକାରୀ ଗୁହାର ଚନ୍ଦ ପନୱାରଙ୍କ ମୃତ୍ୟୁ। କେନ୍ଦୁଝର ଜିଲ୍ଲାରେ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ନିର୍ମିତ ରାସ୍ତାଗୁଡିକର ତଦାରଖ କରିବାକୁ ସେ ଆସିଥିଲେ।

କାମ ସାରି କାର ଯୋଗେ ଗତକାଲି ବିଳମ୍ବିତ ରାତିରେ ଭୁବନେଶ୍ବର ଫେରିବା ବେଳେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଥିଲା। ଘଷିପୁରା ଥାନା ଦରଖଳା ନିକଟରେ ଛିଡା ହୋଇଥିବା ଏକ ଟ୍ରକକୁ କାରଟି ପଛପଟୁ ଧକ୍କା ଦେଇଥିଲା। ଘଟଣାସ୍ଥଳରେ ପୋଲିସ ପହଞ୍ଚି ଉଦ୍ଧାର କରି ଆମ୍ବୁଲାନ୍ସ ଯୋଗେ ଆନନ୍ଦପୁର ମେଡିକାଲରେ ଭର୍ତ୍ତି କରିଥିଲେ। ଚିକିତ୍ସାଧୀନ ଅବସ୍ଥାରେ ଆଜି ସକାଳୁ ଅଧିକାରୀ ଗୁହାର ଚନ୍ଦ ପନୱାରଙ୍କର ମୃତ୍ୟୁ ହୋଇଛି। ସେ ପୂର୍ବରୁ ପୂର୍ତ୍ତ ବିଭାଗର ଅତିରିକ୍ତ ମୁଖ୍ୟ ଯନ୍ତ୍ରୀ ଭାବେ ରାଜସ୍ଥାନରେ କାର୍ଯ୍ୟରତ ଥିଲେ।
ରାଜ୍ୟ ଲୋକସେବା ଭବନରେ ପୁଣି ବାହାରିଲା ୪ ଫୁଟ ଲମ୍ବର ଢମଣା ସାପ
ଭୁବନେଶ୍ୱର: ରାଜ୍ୟ ଲୋକସେବା ଭବନରେ ପୁଣି ବାହାରିଲା ସାପ। ହୋମ ଡିପାର୍ଟମେଣ୍ଟର କୋର୍ଡିନେସନ ସେକ୍ସନରୁ ୪ ଫୁଟ ଲମ୍ବର ଢମଣା ସାପ ଉଦ୍ଧାର ହୋଇଛି। ଆଜି ସକାଳ ପ୍ରାୟ ୯ ଟା ୧୫ ସମୟରେ ଗୃହ ବିଭାଗ କର୍ମଚାରୀ ମାନେ ଅଫିସ ଖୋଲିବା ବେଳେ କୋର୍ଡିନେସନ ସେକ୍ସନର ଟେବୁଲ ତଳକୁ ଏକ ସାପ ପସିଯିବାର ଦେଖିଥିଲେ। ଖବର ପାଇ ସ୍ନେକ ହେଲ୍ପ ଲାଇନ ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ପହଞ୍ଚି ସାପ ଉଦ୍ଧାର କରି ତାର ପ୍ରାକୃତିକ ଆବାସ ସ୍ଥଳୀରେ ଛାଡି ଦେଇଛନ୍ତି। ତେବେ ଯଦି ଦେଖିବା ବିଗତ ଦିନରେ ମଧ୍ୟ ଅନେକ ଥର ଲୋକସେବା ଭବନରୁ ସାପ ବାହାରିଥିବା ଦେଖିବାକୁ ମିଳିଛି।
ବାଘ ସହ ଲଢ଼ିଲେ ବୃଦ୍ଧା, ଆଶାବାଡ଼ିରେ ବାଘକୁ ବାଡ଼େଇ ନିଜକୁ ବଞ୍ଚାଇଲେ
ମୁମ୍ବାଇ: ମୁମ୍ବାଇରେ କଲରାପତରିଆ ବାଘ ଆତଙ୍କ। ବାଘ ଆକ୍ରମଣରୁ ଅଳ୍ପକେ ବର୍ତ୍ତିଲେ ବୃଦ୍ଧା। ଉପସ୍ଥିତ ବୁଦ୍ଧି ଯୋଗୁ ବାଘ ମୁହଁରୁ ନିଜକୁ ବଞ୍ଚାଇବାରେ ସକ୍ଷମ ହେଲେ ଏହି ସାହସୀ ବୃଦ୍ଧା। ଦେଖନ୍ତୁ ବାଘ ଆକ୍ରମଣର ସିସିଟିଭି ଦୃଶ୍ୟ। ମହିଳା ଗୋରେଗାଁଓର ଏହି ବୃଦ୍ଧା ନିଜ ଘର ବାଡିରେ ବସିଥିଲେ। ହାତରେ ଥିଲା ତାଙ୍କର ଆଶାବାଡି। ବସିବା ବେଳେ ପୂର୍ବରୁ ଜଗିରହିଥିବା ବାଘ ହଠାତ୍ ତାଙ୍କ ଉପରକୁ ଲମ୍ଫ ମାରିଥିଲା।
ମହିଳା ଜଣଙ୍କୁ ନିଜକୁ ବଞ୍ଚାଇବାକୁ ଶତ ଚେଷ୍ଟ ଜାରି କଲେ। ନିଜକୁ ବଞ୍ଚାଇବାକୁ ହାତ ଦେକାଇବା ପରେ ନିଜ ଆସା ବାଡିରେ ବାଘ ଉପରକୁ ପ୍ରତି ଆକ୍ରମଣ କରିଥିଲେ। ଗୋଟେ ମୁହୁର୍ତ୍ତରେ ସେ ତଲେ ପଡି ଉଠି ପାରିନଥିଲେ , କିନ୍ତୁ ବାଡି ଚାଲିଥିଲା। ଶେଷରେ ବାଘ ମହିଳାଙ୍କ ସାହସିକତା ଆଗରେ ହାର୍ ମାନି ସେଠାରୁ ପଳାଇଯାଇଥିଲା। ଏ ପୁରା ଦୃଶ୍ୟ ସିସିଟିଭିରେ କଏଦ ହୋଇଛି। ମହିଳା ଜଣଙ୍କ ଗୁରୁତର ଅବସ୍ଥାରେ ହସ୍ପିଟାଲରେ ଚିକିତ୍ସିତ ହେଉଛନ୍ତି।
ରାଜ୍ୟରେ ଗତ ୨୪ ଘଣ୍ଟା ମଧ୍ୟରେ ଚିହ୍ନଟ ହେଲେ ୬୦୨ ଜଣ ସଂକ୍ରମିତ
ଭୁୂବନେଶ୍ୱର: ରାଜ୍ୟରେ କରୋନା ସଂକ୍ରମଣ କମୁଥିବା ବେଳେ ଆଜି ପୁଣି ନୂଆ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଗତ ୨୪ ଘଣ୍ଟା ମଧ୍ୟରେ ରାଜ୍ୟରୁ ଚିହ୍ନଟ ହୋଇଛନ୍ତି ୬୦୨ ଜଣ କରୋନା ସଂକ୍ରମିତ । ଶୂନରୁ ୧୮ ବର୍ଷ ମଧ୍ୟରେ ୯୬ ଜଣ ଶିଶୁ ସଂକ୍ରମିତ ହୋଇଥିବା ଜଣାପଡ଼ିଛି। ତେବେ କ୍ୱାରେଣ୍ଟାଇନ୍ ସେଣ୍ଟରରୁ ୩୫୩ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ଲୋକାଲ କଣ୍ଟାକ୍ଟ ରହିଛି ୨୪୯। ଖୋର୍ଦ୍ଧାରୁ ୨୮୩ ଜଣ ସର୍ବାଧିକ ସଂକ୍ରମିତ ଚିହ୍ନଟ ହୋଇଛନ୍ତି। ସେହିପରି ଅନୁଗୁଳରୁ ୧୧, ବାଲେଶ୍ୱରରୁ ୨୧, ବରଗଡ଼ରୁ ୨, ଭଦ୍ରକରୁ ୫, କଟକରୁ ୫୪, ଦେବଗଡ଼ରୁ ୧, ଗଞ୍ଜାମରୁ ୧, ଜଗତସିଂହପୁରରୁ ୧୮, ଯାଜପୁରରୁ ୨୪, ଝାରସୁଗୁଡ଼ାରୁ ୨, କଳାହାଣ୍ଡିରୁ ୧, କେନ୍ଦ୍ରାପଡ଼ାରୁ ୬, କେନ୍ଦୁଝରରୁ ୭, କୋରାପୁଟରୁ ୪, ମୟୂରଭଞ୍ଜରୁ ୩୧, ନୟାଗଡ଼ରୁ ୧, ନୂଆପଡ଼ାରୁ ୧, ପୁରୀରୁ ୨୧, ରାୟଗଡ଼ାରୁ ୪, ସମ୍ବଲପୁରରୁ ୧୩, ସୋନପୁରରୁ ୧, ସୁନ୍ଦରଗଡ଼ରୁ ୯, ଏବଂ ଷ୍ଟେଟପୁଲରୁ ୬୭ ଜଣ ସଂକ୍ରମିତ ଚିହ୍ନଟ ହୋଇଛନ୍ତି।
କିଛି ବର୍ଷା ହେଲେ ଟଳିନି ବିପଦ, ଜଳକା ନଦୀର ବିପଦ ସଂକେତ ଟପିଲା ଜଳସ୍ତର
ଜଳେଶ୍ୱର: କମିଛି ବର୍ଷା ହେଲେ ଟଳିନି ବିପଦ। ବିପଦ ସଂକେତ ଉପରେ ରହିଛି ଜଳକା ନଦୀ। ଲଗାଣ ବର୍ଷା ଫଳରେ ବିପଦ ସଂକେତ ଉପରେ ପ୍ରବାହିତ ହେଉଛି ଜଳକାର ଜଳସ୍ତର। ବସ୍ତା ବ୍ଲକ ମଥାନୀ ଠାରେ ବିପଦ ସଂକେତ ୫.୫୦ ମିଟର ଥିବା ବେଳେ ସକାଳା ୮ଟା ସୁଧା ଜଳସ୍ତର ବୃଦ୍ଧି ପାଇ ୫.୭୭ ମିଟରରେ ପ୍ରବାହିତ ହେଉଛି। ଜଳକା ନଦୀର ଉପର ମୁଣ୍ଡରେ ଲଗାଣ ବର୍ଷା ଯୋଗୁଁ ଜଳସ୍ତର କ୍ରମଶଃ ବୃଦ୍ଧି ପାଇବାରେ ଲାଗିଛି। ବିଭିନ୍ନ ସ୍ଥାନରେ ନଦୀବନ୍ଧ ଦୁର୍ବଳ ଥିବାରୁ ନଦୀ ତଟବର୍ତ୍ତି ଅଞ୍ଚଳବାସୀ ଆତଙ୍କିତ ଅବସ୍ଥାରେ ରହିଛନ୍ତି। ନଦୀର ଉପର ମୁଣ୍ଡ ମୟୁରଭଞ୍ଜ ଜିଲ୍ଲାର ସୁଳିଆପଦା, ମୋରଡା, ଚିତ୍ରଡା, ରାସଗୋବିନ୍ଦପୁର ଅଞ୍ଚଳରେ ପ୍ରବଳ ବର୍ଷା କାରଣରୁ ବଢୁଛି ନଦୀର ଜଳସ୍ତର।
ଆଜି ଆସିପାରେ କରୋନା ନୂଆ ଗାଇଡଲାଇନ୍, ବଦଳିପାରେ ପାର୍ବଣର ଗାଇଡଲାଇନ୍
ଭୁବନେଶ୍ୱର: ଆଜି ସରୁଛି ସେପ୍ଟେମ୍ବର ଗାଇଡଲାଇନ। ଆଜି ଆସିପାରେ ଅକ୍ଟୋବର ଗାଇଡଲାଇନ। ପୂର୍ବରୁ ସନ୍ଧ୍ୟା ୮ଟା ପରେ ନାଇଟକର୍ଫ୍ୟୁ ଲାଗୁଥିବା କାରଣରୁ ଦୋକାନ ବଜାର ସନ୍ଧ୍ୟା ୮ଟା ଯାଏଁ ଖୋଲା ରହୁଥିଲା। କିନ୍ତୁ ନୂଆ ଗାଇଡଲାଇନରେ ନାଇଟକର୍ଫ୍ୟୁର ସମୟସୀମା ବଦଳିଥିଲା। ନାଇଟ କର୍ଫ୍ୟୁକୁ ଉଠାଇ ଦିଆଯାଇଥିଲା। ସେହିଭଳି ପାର୍ବଣ ଋତୁକୁ ନଜରରେ ରଖି ସରକାର କିଛି କଟକଣା ଲଗାଇପାରନ୍ତି। ସଂକ୍ରମଣ କମୁଥିଲେ ମଧ୍ୟ ସମ୍ଭାବ୍ୟ ତୃତୀୟ ଲହର ପାଇଁ ସତର୍କ ରହିବା ଦରକାର। ସେଥିପାଇଁ ପୁର୍ବରୁ ନିର୍ଧାରିତ ହୋଇଥିବା ପାର୍ବଣ ପାଇଁ ଗାଇଡଲାଇନର ପୁଣିଥରେ ପରିବର୍ତ୍ତନ ହୋଇପାରେ। ସେପ୍ଟେମ୍ବର ଗାଇଡଲାଇନ୍ରେ ସାମାନ୍ୟ ପରିବର୍ତ୍ତନ କରାଯାଇପାରେ। ପାର୍ବଣ ସମୟରେ ଭିଡକୁ ନିୟନ୍ତ୍ରଣ କରିବା ପାଇଁ ସରକାର କିଛି ସ୍ବତନ୍ତ୍ର ଗାଇଡଲାଇନ୍ ଆଣିପାରନ୍ତି।
ମିଠା ବିକ୍ରି ପାଇଁ ଯାଉଥିବା ସମୟରେ ହେଲା ଦୁର୍ଘଟଣା, ୨ ଜଣଙ୍କର ମୃତ୍ୟୁ ୨ ଗୁରୁତର
ବଲାଙ୍ଗୀର: ବଲାଙ୍ଗୀର ଜିଲ୍ଲା ସଇଁନ୍ତଳା ଥାନା ୨୬ନଂ ଜାତୀୟ ରାଜପଥର ଲୁହୁରାପାଲି ଛକ ନିକଟରେ ସଡ଼କ ଦୁର୍ଘଟଣା। ୨ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ହୋଇ ମେଡିକାଲରେ ଭର୍ତ୍ତି ହୋଇଛନ୍ତି। ସିସକେଲା ଗାଁର ମିଠା ବ୍ୟବସାୟୀ ସୁବଳ ସାହୁ, ବଡ଼ମୁଡ଼ିଆ ମାଝୀ ଓ ଦେବାଶିଷ ସାହୁ ଏକ ଡାଲାଅଟୋରେ ସିସକେଲାରୁ କୁଇକେଡା ବଜାରକୁ ମିଠା ବିକ୍ରି କରିବା ପାଇଁ ଯାଉଥିଲେ।

ଭୋର ପ୍ରାୟ ୫ଟା ସମୟରେ ଲୁହୁରାପାଲି ନିକଟରେ ବଲାଙ୍ଗୀର ପଟୁ କଳାହାଣ୍ଡି ଅଭିମୁଖେ ଯାଉଥିବା ଏକ ମାଲବୋଝେଇ ଟ୍ରକ ସହ ଅଟୋ ମୁହାଁମୁହିଁ ହୋଇଛି। ଘଟଣାସ୍ଥଳରେ ମିଠା ବ୍ୟବାସୀଙ୍କ ମଧ୍ୟରୁ ଦୁଇ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣକୁ ଓ ଟ୍ରକ ଡ୍ରାଇଭରକୁ ସଇଁନ୍ତଳା ଡାକ୍ତରଖାନାରେ ଭର୍ତ୍ତି କରାଯାଇଛି। ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି। ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ୨୬ ନମ୍ବର ଜାତୀୟରାଜପଥକୁ ଅବରୋଧ କରିଛନ୍ତି। ବଡମାଳ ଫାଣ୍ଡି ଓ ସଇଁନ୍ତଳା ଥାନା ପୋଲିସ ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରୁଛି।

