ସୀମା ବିବାଦକୁ ନେଇ ଚୀନ୍ ବାରମ୍ବାର ହୀନ ଚକ୍ରାନ୍ତ କରିବାରେ ଲାଗିଛି । ଗୋଟିଏ ପଟେ କହୁଛି ଆଲୋଚନାରେ ସବୁ ସମସ୍ୟାର ସମାଧାନ କରାଯିବ । ହେଲେ ଅପରପକ୍ଷେ ସୀମା ଅନୁପ୍ରବେଶ କରିବାକୁ ପଛାଉନାହିଁ। ଏଭଳି ଏକ ଘଟଣା ପୁଣି ନଜରକୁ ଆସିଛି ଉତ୍ତରାଖଣ୍ଡର ବାରାହୋତି ସେକ୍ଟର ନିକଟ ସୀମାରେ।
ଯେଉଁଠି ଗତ ମାସରେ ଚୀନର ସୈନ୍ୟବାହିନୀ LAC ଅତିକ୍ରମ କରିଥିଲା ବେଳେ ଘଟଣା ଏବେ ଲୋକଲୋଚନକୁ ଆସିଛି। ଏକ ନ୍ୟୁଜ ଏଜେନ୍ସିର ରିପୋର୍ଟ ଅନୁଯାୟୀ, ଅଗଷ୍ଟ ୩୦ ତାରିଖରେ ଚୀନ୍ ସେନା LAC ଅତିକ୍ରମ କରିବା ସହ ସେଠାରେ ୩ ଘଣ୍ଟା ରହିବା ପରେ ଫେରିଆସିଥିଲେ। ତେବେ ଏନେଇ ଭାରତୀୟ ସେନା ପକ୍ଷରୁ ଆଧିକାରିକ ଭାବେ କୗେଣସି ସୂଚନା ଦିଆଯାଇନାହିଁ ।

ଅନ୍ୟ ଏକ ରିପୋର୍ଟ ଅନୁଯାୟୀ, ଚୀନ୍ ସେନା ଘୋଡାରେ ଆସି ସୀମାରେ ଅନୁପ୍ରବେଶ କରିବା ସହ ଭଙ୍ଗାରୁଜା କରିଥିଲେ । ଆଉ ଯିବା ବେଳେ ଗୋଟିଏ ପୋଲକୁ ମଧ୍ୟ ଭାଙ୍ଗିଦେଇଥିଲେ । ୧୯୬୨ ମସିହା ଯୁଦ୍ଧ ପୂର୍ବରୁ ଏହି ସ୍ଥାନରେ ଚୀନ୍ ଅନୁପ୍ରବେଶ କରିଥିଲା । ଉତ୍ତରାଖଣ୍ଡର ବାରାହୋତି ସେକ୍ଟରରେ LACକୁ ନେଇ ଅନେକ ସମୟରେ ଭାରତ ଓ ଚୀନ୍ ମଧ୍ୟରେ ମତଭେଦ ହୋଇଥାଏ । କିନ୍ତୁ ଏଥର ବହୁ ସଂଖ୍ୟାରେ ଚୀନ୍ ସେନା ଆସିଥିଲେ ।
ଖାଲି ଏତିକି ନୁହେଁ ଚୀନ ପକ୍ଷରୁ ପୂର୍ବ ଲଦାଖରେ (LAC) ନିକଟରେ ପ୍ରାୟ ୮ଟି ସ୍ଥାନରେ ଅସ୍ଥାୟୀ ଟେଣ୍ଟ କରାଯାଇଛି । ଗଣମାଧ୍ୟମ ରିପୋର୍ଟ ଅନୁଯାୟୀ, ପିପୁଲ୍ସ ଲିବରେସନ୍ ଆର୍ମି ଉତ୍ତରପଟେ କାରାକୋରମ ନିକଟ ୱାହାବ୍ ଜିଲ୍ଗା ଠାରୁ ପିୟୁ, ହଟ୍ ସ୍ପ୍ରିଙ୍ଗସ୍, ଚାଙ୍ଗ୍ ଲା, ତାସିଗୋଙ୍ଗ, ମଞ୍ଜା ଏବଂ ଚରୁପ ପର୍ଯ୍ୟନ୍ତ ଆଶ୍ରୟସ୍ଥଳ ନିର୍ମାଣ କରିଛି। ଏଠାରେ ପ୍ରତ୍ୟେକ ସ୍ଥାନରେ ସାତଟି କ୍ଲଷ୍ଟରରେ ୮୦ରୁ ୮୪ ପର୍ଯ୍ୟନ୍ତ କଣ୍ଟେନର୍ସ ତିଆରି କରାଯାଇଛି |
ଭାରତ ସୀମା ଭିତରକୁ ପଶିଲେ ଚୀନ୍ ସେନା, ଭାଙ୍ଗିଲେ ପୋଲ
ଭାରତକୁ ଚିଠି ଲେଖିଲା ତାଲିବାନ; ଆଫଗାନିସ୍ତାନକୁ ବିମାନ ଉଡାଣ ଲାଗି କଲା ଅନୁରୋଧ
କାବୁଲ: ପ୍ରଥମ ଥର ଲାଗି ଭାରତକୁ ଅନୁରୋଧ କରିଛି ତାଲିବାନ। ଆଫଗାନିସ୍ତାନ ସହ ବିମାନ ସେବା ଆରମ୍ଭ କରିବା ଲାଗି ଡିଜିସିଏଙ୍କୁ ଲେଖିଲା ଚିଠି । ଆଫଗାନିସ୍ତାନରେ ତାଲିବାନ ଶାସନ ପରଠାରୁ ଦୁଇ ଦେଶ ମଧ୍ୟରେ ବିମାନ ସେବା ବାତିଲ ରହିଛି ।
ଭାରତର ବେସାମରିକ ବିମାନ ଚଳାଚଳ ମହାନିର୍ଦ୍ଦେଶକ ଅରୁଣ କୁମାରଙ୍କ ନିକଟକୁ ଏସଂକ୍ରାନ୍ତରେ ପତ୍ର ଦେଇଛନ୍ତି ତାଲିବାନ ବିମାନ ଚଳାଚଳ ମନ୍ତ୍ରୀ ଅହ୍ଲାଜା ହମିଦୁଲ୍ଲା ଅଖୁନ୍ଦଜାଦା। ଏଥିସହ ଦୁଇ ଦେଶ ମଧ୍ୟରେ ବିମାନସେବା ଚାଲୁ କରିବାକୁ ଅନୁରୋଧ କରାଯାଇଛି ।

ସେହିପରି ଆଫଗାନ ମାଟିରେ ଆମେରିକୀୟ ଡ୍ରୋନ ଉଡିବନି ବୋଲି ଚେତାବନୀ ଦେଇଛି ତାଲିବାନ। ଡ୍ରୋନ ଜରିଆରେ ଯଦି ଆଫଗାନ ଆକାଶକୁ ଆମେରିକା ବ୍ୟବାହାର କରେ ତେବେ ପରିଣତି ଖରାପ ହେବ ବୋଲି କହିଛି ତାଲିବାନ । ଆଫଗାନ ଆକାଶକୁ କୌଣସି ପ୍ରକାର କାର୍ଯ୍ୟରେ ବ୍ୟବହାର ନ କରିବା ଲାଗି ତାଲିବାନ ଦେଇଥିବା ପୂର୍ବର ଚେତାବନୀକୁ ପୁଣି ଥରେ ଦୋହରାଇଛି ।

ତାଲିବାନ ମୁଖପାତ୍ର ଜବିଉଲ୍ଲା ମୁଜାହିଦ୍ଦ କହିଛନ୍ତି- ଆମେରିକାର କିଛି ଡ୍ରୋନ ଆଫଗାନିସ୍ତାନରେ ଉଡିବା ଦେଖାଯାଉଛି । ଏହାଦ୍ବାରା ଦେଶର ଜାତୀୟ ନିରାପତ୍ତାରେ ବ୍ୟାଘାତ ସୃଷ୍ଟି ହେଉଛି । ଭବିଷ୍ୟତରେ ଏହାକୁ ନେଇ ଯେପରି କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହେବ ନାହିଁ ସେଥିଲାଗି ଆମେରିକା ପଦକ୍ଷେପ ନେବା ଆବଶ୍ୟକ । ଇସଲାମିକ ଷ୍ଟେଟ ଅଫ ଆଫଗାନିସ୍ତାନ ପକ୍ଷରୁ କୁହାଯାଇଛି- ନିଜ ନିଜ ଦେଶର ସୀମାନ୍ତ ଅଞ୍ଚଳରେ ନିଜ ନିଜର ଅଧିକାର ରହିଛି । ଅନ୍ୟକାହାର ହସ୍ତକ୍ଷେପକୁ ବରଦାସ୍ତ କରାଯିବ ନାହିଁ । ଦୁଇ ଦଶନ୍ଧି ପରେ ଆଫଗାନ ମାଟିରୁ ଆମେରିକାର ବିଦାୟ ପରେ ଏବେ ତାଲିବାନ ସହ ଆମେରିକାର ସମ୍ପର୍କ ଆଦୌ ଅନୁକୂଳ ନାହିଁ ।
ଟିକାକରଣ କ୍ଷେତ୍ରରେ ରାଜ୍ୟରେ ଆଉ ଏକ ମାଇଲଷ୍ଟୋନ୍: ୩କୋଟି ଭ୍ୟାକ୍ସିନ୍ ଡୋଜ୍ ଦିଆଗଲା
ଭୁବନେଶ୍ୱର: ଟିକାକରଣ କ୍ଷେତ୍ରରେ ରାଜ୍ୟର ପୁଣି ଆଉ ଏକ ମାଇଲଷ୍ଟୋନ୍ । ଓଡ଼ିଶାରେ ୩ କୋଟି ଡୋଜରୁ ଅଧିକ କରୋନା ଟିକାକରଣ ହୋଇଛି । ଏନେଇ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଟୁଇଟ୍ ଜରିଆରେ ସୂଚନା ଦେଇଛି । ରାଜ୍ୟରେ ଟିକାକରଣକୁ ଅପୂର୍ବ ସଫଳତା ମିଳିଥିବାରୁ ସରକାର ପକ୍ଷରୁ ସ୍ୱାସ୍ଥ୍ୟ ବିଭାଗର ଟିମ୍କୁ ଧନ୍ୟବାଦ ଜଣାଯାଇଛି । ଟିକାକରଣରେ ରାଜ୍ୟକୁ ଏପରି ସଫଳତାର ଶ୍ରେୟ ମୁଖ୍ୟମନ୍ତ୍ରୀ ସ୍ୱାସ୍ଥ୍ୟକର୍ମୀଙ୍କୁ ଦେବା ସହ ସେମାନଙ୍କୁ ପ୍ରଶଂସା କରିଛନ୍ତି । ସେହିଭଳି ଏହି କାମରେ ଓଡ଼ିଶାରବାସୀ ମଧ୍ୟ ଯଥେଷ୍ଟ ସହଯୋଗ କରିଥିବାରୁ ସମସ୍ତଙ୍କୁ ରାଜ୍ୟ ସରକାରଙ୍କ ପକ୍ଷରୁ ଧନ୍ୟବାଦ ଦିଆଯାଇଛି । ରାଜ୍ୟରେ ୩ କୋଟି ଭ୍ୟାକ୍ସିନେସନ ନେଇ ରେକର୍ଡ ପରେ ଟ୍ୱିଟ୍ କରି ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କୋଭିଡ ସମୟରେ ଏଭଳି ସଫଳତା ପାଇଁ ରାଜ୍ୟବାସୀଙ୍କୁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ ।
Glad to share that #Odisha has crossed yet another significant milestone in the fight against #COVID19 by administering 3 crore vaccine doses. Commend the hard work & commitment of our healthcare workers in ensuring a swift vaccination to save precious lives. #OdishaCares pic.twitter.com/FJt0tvKapz
— Naveen Patnaik (@Naveen_Odisha) September 29, 2021
IPL 2021: ଗୋଟିଏ ସମୟରେ ଖେଳାଯିବ ଦୁଇଟି ମ୍ୟାଚ୍
ୟୁଏଇ: ପ୍ରଥମଥର ପାଇଁ ଫଟାଫଟ କ୍ରିକେଟ ମ୍ୟାଚରେ ଗୋଟିଏ ସମୟରେ ଖେଳାଯିବ ୨ଟି ମ୍ୟାଚ୍ । ୟୁଏଇରେ ଚାଲିଥିବା ଆଇପିଏଲ୍ ମ୍ୟାଚ୍ ଆୟୋଜନର ବଦଳିଛି ସମୟ । ଚଳିତ ଆଇପିଏଲର ଶେଷ ଦୁଇ ଲିଗ୍ ମ୍ୟାଚ୍ ସମାନ ସମୟରେ ଖେଳାଯିବ । ପୂର୍ବରୁ ଡବଲ ହେଡର୍ରେ ଗୋଟିଏ ମ୍ୟାଚ୍ ଅପରାହ୍ନ ସାଢେ ୩ଟାରେ ଓ ଆଉ ଗୋଟିଏ ମ୍ୟାଚ୍ ସନ୍ଧ୍ୟା ୭.୩୦ରୁ ଆରମ୍ଭ ହେଉଥିଲା । କିନ୍ତୁ ବିସିସିଆଇ ହଠାତ୍ ଶେଷ ଦୁଇ ଲିଗ୍ ମ୍ୟାଚ୍ ସମୟ ସାରଣୀରେ ପରବର୍ତ୍ତନ କରିଛି ।
ବିସିସିଆଇର ଘୋଷଣା ଅନୁସାରେ ଅକ୍ଟୋବର ୮ ଅର୍ଥାତ ଲିଗ୍ ମ୍ୟାଚ୍ର ଶେଷ ଦିନରେ ଦୁଇଟି ମ୍ୟାଚ୍ ହେବ । ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୋର ଓ ଦିଲ୍ଲୀ କ୍ୟାପିଟାଲ୍ସ ସନ୍ଧ୍ୟାରେ ପରସ୍ପରକୁ ଭେଟିବାକୁ ଥିବା ବେଳେ ଅପରାହ୍ନରେ ମୁମ୍ବାଇ ଇଣ୍ଡିଆନ୍ସ ଓ ସନରାଇଜର୍ସ ହାଇଦ୍ରାବାଦ ମଧ୍ୟରେ ଲଢ଼େଇ ହୋଇଥାଆନ୍ତା । ହେଲେ ଏବେ ନୂଆ ସମୟ ସାରଣୀ ଅନୁଯାୟୀ ୨ଟି ଯାକ ମ୍ୟାଚ୍ ଅକ୍ଟୋବର ୮ରେ ଗୋଟିଏ ସମୟରେ ଅନୁଷ୍ଠିତ ହେବ । ଦୁଇଟି ଯାକ ମ୍ୟାଚ୍ ଭାରତୀୟ ସମୟ ୭.୩୦ରେ ଆରମ୍ଭ ହେବ । କୌଣସି ବି ଦଳ ଅନୈତିକ ଆଡଭାନଟେଜ୍ ଦେବା ଲାଗି ଏଭଳି ନିଷ୍ପତ୍ତି ନେଇ ଆଇପିଏଲ୍ ପରିଚାଳନା କମିଟି ।
ଏଥିସହିତ ପଢ଼ନ୍ତୁ: ଦିଲ୍ଲୀ ବିଜୟ ଯାତ୍ରାରେ ଲାଗିଲା ବ୍ରେକ୍: ୩ ଓ୍ୱିକେଟରେ କୋଲକାତା ନାଇଟ ରାଇଡର୍ସ ବିଜୟୀ
ଉଦ୍ଧାର ବିରଳ ବୌଦ୍ଧ ମୂର୍ତ୍ତିକୁ ସଂଗ୍ରହାଳୟକୁ ହସ୍ତାନ୍ତର
ଭଦ୍ରକ: ନଦୀ ଶଯ୍ୟାରୁ ଉଦ୍ଧାର ହୋଇଥିବା ବିରଳ ବୁଦ୍ଧ ମୂର୍ତ୍ତିକୁ ହସ୍ତାନ୍ତର । ସୁରକ୍ଷିତ ଭାବେ ରଖିବା ପାଇଁ ଷୋଳମପୁର ସ୍ଥିତ ବୌଦ୍ଧ ସଂଗ୍ରହାଳୟକୁ ହସ୍ତାନ୍ତର କରିଲେ ଯୁବକ । ଭଦ୍ରକ ଭଣ୍ଡାରିପୋଖରୀ ବ୍ଲକ ଅନ୍ତର୍ଗତ ଷୋଳମପୁର ପଞ୍ଚାୟତର ମୁଢାପଦା ଗାଁ ନିକଟ ବୈତରଣୀ ନଦୀ ଶଯ୍ୟାରୁ ଅଷ୍ଟମ ଶତାବ୍ଦୀର ୨ଟି ବିରଳ ବୌଦ୍ଧ ମୁର୍ତ୍ତି ଉଦ୍ଧାର ହୋଇଥିଲା । ତେବେ ବୁଦ୍ଧ ମୂର୍ତ୍ତି ଦୁଇଟି ମଧ୍ୟରୁ ପ୍ରଥମଟି ହର୍ସମୁଖ ବୁଦ୍ଧ ମୂର୍ତ୍ତି ହୋଇଥିବା ବେଳେ ଦ୍ୱିତୀୟଟି ଗଜମୂଖ ସିଂହାସନ ବିରଳ ବୌଦ୍ଧ ଦେବୀଙ୍କ ଏକ ଭଗ୍ନ ପ୍ରତିମା ଉଦ୍ଧାର କରାଯାଇଥିଲା ।

ମୁଢାପଦା ଅଞ୍ଚଳରେ ପ୍ରୀତମ ମହାନ୍ତି ନାମକ ଯୁବକ ବୈତରଣୀ ନଦୀ ପଠାରୁ ବାଲି ଉଠାଣ ସମୟରେ ଏଇ ମୂର୍ତ୍ତି ପାଇ ନିଜ ଘରେ ରଖିଥିବା ବେଳେ, ଗତକାଲି ଷୋଳମପୁର ସ୍ଥିତ ବୌଦ୍ଧ ବିହାରର ଗବେଷକ ବିଶ୍ୱମ୍ୱର ରାଉତଙ୍କୁ ଯୋଗାଯୋଗ କରିଥିଲେ । ପରେ ଷୋଳମପୁର ର ବୌଦ୍ଧ ସଂଗ୍ରହାଳୟକୁ ଏହି ଦୁଇଟି ମୂର୍ତ୍ତି ହସ୍ତାନ୍ତର କରାଯାଇଛି। ତେବେ ଏହି ବିରଳ ବୁଦ୍ଧି ମୁର୍ତ୍ତିକୁ ଦେଖିବାକୁ ଷୋଳମପୁର ବୌଦ୍ଧ ବିହାରକୁ ସ୍ଥାନୀୟ ଲୋକଙ୍କ ଭିଡ ଦେଖିବାକୁ ମିଳିଛି । ରକ୍ଷଣାବେକ୍ଷଣ ଅଭାବରୁ ଉକ୍ତ ଅଞ୍ଚଳରେ ବୌଦ୍ଧ ମୂର୍ତ୍ତି ଗୁଡିକ ଅବହେଳିତ ଅବସ୍ଥାରେ ପଡ଼ିରହୁଥିବାରୁ, ସ୍ଥାନୀୟ ଲୋକଙ୍କ ମଧ୍ୟରେ ପୂର୍ବରୁ ଅସନ୍ତୋଷ ମଧ୍ୟ ଦେଖାଯାଇଥିଲା ।

