ଭୁବନେଶ୍ୱର: ରାଜ୍ୟର ଭୟ ବଢାଉଛି ଲଘୁଚାପ ବର୍ଷା । ଉତ୍ତର-ପଶ୍ଚିମ ବଙ୍ଗୋପସାଗରରେ ସୃଷ୍ଟି ଲଘୁଚାପ କ୍ଷେତ୍ରରେ ବର୍ଷା ସମ୍ଭାବନା । ପଶ୍ଚିମବଙ୍ଗ ଓ ଝାଡ଼ଖଣ୍ଡ ନିକଟବର୍ତ୍ତୀ ଉତ୍ତର ଓଡ଼ିଶାର ଜିଲ୍ଲାରେ ପ୍ରବଳ ବର୍ଷା ହେବା ସମ୍ଭାବନା ରହିଛି । ଆଜି ବାଲେଶ୍ୱର, ଭଦ୍ରକ, ମୟୂରଭଞ୍ଜ, କେନ୍ଦ୍ରାପଡା ଓ ଯାଜପୁର ଜିଲ୍ଲାରେ ତୁହାକୁ ତୁହା ବର୍ଷା ଜାରି ରହିବ । ଆଜି ପାଇଁ ଏହି ସବୁ ଜିଲ୍ଲାକୁ ୟେଲୋ ଓ୍ୱାର୍ଣ୍ଣିଂ ଜାରି କରାଯାଇଛି । ଆସନ୍ତାକାଲି ପର୍ଯ୍ୟନ୍ତ ଅନ୍ୟ ଜିଲ୍ଲାରେ ସ୍ୱଳ୍ପରୁ ମଧ୍ୟମ ବର୍ଷା ହେବା ନେଇ ଆକଳନ କରାଯାଇଛି । ଉପରମୁଣ୍ଡରେ ବର୍ଷା ଯୋଗୁ ବୁଢାବଳଙ୍ଗ ଏବଂ ସୁବର୍ଣ୍ଣରେଖା ନଦୀର ଜଳସ୍ତର ବଢିବ । ବନ୍ୟା ଆଶଙ୍କା ନେଇ କେଦ୍ରୀୟ ଜଳ ଆୟୋଗଙ୍କୁ ଅବଗତ କରାଯାଇଛି । ଆସନ୍ତାକାଲି ଯାଏ ସମୁଦ୍ର ଅଶାନ୍ତ ରହୁଥିବାରୁ ମତ୍ସ୍ୟଜୀବୀମାନଙ୍କୁ ସମୁଦ୍ର ଯିବାକୁ ବାରଣ କରାଯାଇଛି ।
ନିୟମକୁ ଫୁ, ସ୍କୁଲ ବନ୍ଦ ନିର୍ଦ୍ଦେଶ ସତ୍ତ୍ୱେ ଗୋଟିଏ ହଲରେ ବସିଲେ ପ୍ରଥମରୁ ଅଷ୍ଟମ ଶ୍ରେଣୀ ପିଲା
ଜଗତସିଂହପୁର: କୋଭିଡ୍ ନିୟମର ଖୋଲାଖୋଲି ଉଲ୍ଲଂଘନ । କଟକଣାକୁ ବେଖାତିର କରି ସ୍କୁଲ ଖୋଲି ଦେଲେ ପ୍ରଧାନଶିକ୍ଷକ । ବିନା କୌଣସି ଅନୁମତିରେ ଜଗତସିଂହପୁର ଜିଲ୍ଲା ତିହଡ଼ା ଉପର ପ୍ରାଇମେରୀ ସ୍କୁଲ ଆଜି ଖୋଲା ଯାଇଥିଲା । ଗୋଟିଏ ହଲରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପିଲାଙ୍କ ବସାଯାଇ ପାଠପଢା ଯାଉଥିଲା । ଛାତ୍ରଛାତ୍ରୀମାନଙ୍କ ମଧ୍ୟରେ କୌଣସି ସାମାଜିକ ଦୂରତା ରହିନଥିବା ଦେଖିବାକୁ ମିଳିଥିଲା ।

କେବଳ ମାସ୍କ ଲଗାଇ ପିଲାମାନେ ଗୋଟିଏ ହଲରେ ବସି ପଢୁଥିବାର ଦୃଶ୍ୟ କ୍ୟାମେରାରେ କଏଦ ହୋଇଛି । କରୋନାର ତୃତୀୟ ଲହରକୁ ନେଇ ସମସ୍ତ ଚିନ୍ତିତ ଥିବାବେଳେ ଜଗସିଂହପୁର ଜିଲ୍ଲାର ଏଭଳି ଘଟଣା ସମସ୍ତଙ୍କୁ ଚକିତ କରିଛି । ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ସ୍କୁଲ ଖୋଲିବା ନେଇ କୌଣସି ନିର୍ଦ୍ଦେଶାନାମା ଜାରି ହୋଇନଥିବା ବେଳେ କିଭଳି ବିଦ୍ୟାଳୟ ଖୋଲା ଯାଇଛି ତାକୁ ନେଇ ସାଧାରଣରେ ଉଠିଛି ପ୍ରଶ୍ନ । ଅନ୍ୟପଟେ ଏବାବଦରେ ବିଦ୍ୟାଳୟର ଶିକ୍ଷୟିତ୍ରୀଙ୍କୁ ପଚାରିବାରୁ ପ୍ରଧାନଶିକ୍ଷକଙ୍କ ଅନୁମତି କ୍ରମେ ସ୍କୁଲ ଖୋଲାଯାଇଥିବା କହିଛନ୍ତି ।
୭୨ ଦିନର ସଭାପତି ସିଦ୍ଧୁ: ଅମରିନ୍ଦର କହିଲେ, ମୁଁ ଆଗରୁ କହୁଥିଲି ନା….
ନନ୍ଦିଘୋଷ ବ୍ୟୁରୋ: ୭୨ ଦିନ ତଳେ ସଭାପତି ହୋଇଥିଲେ । ୭୩ ଦିନ ନପୂରୂଣୁ ପଦ ଛାଡିଲେ । କାହିଁକି… ? ଆଉ ଏପରି ସୁଯୋଗର ହାତ ଛଡ଼ା ନକରି କ୍ୟାପେଟନ କହିଛନ୍ତି, ମୁଁ ଆଗରୁ କହୁଥିଲି ନା….
ସିଦ୍ଧୁଙ୍କ ରାସ୍ତାରେ କଣ୍ଟା ଥିଲେ କ୍ୟାପଟେନ । ଅମରିନ୍ଦରଙ୍କ ଅନିଛା ସ୍ୱତେ ହାଇକମାଣ୍ଡଙ୍କ ଯଥେଷ୍ଟ ଆଶୀର୍ବାଦରେ ପଞ୍ଜାବ କଂଗ୍ରେସ ମୁଖିଆ ହେଲେ । ପରେ କ୍ୟାପଟେନ ଅମରିନ୍ଦରଙ୍କୁ ହଟାଇବାରେ ସକ୍ଷମ ହେଲେ । କିନ୍ତୁ କ୍ୟାପଟେନଙ୍କ ଆସନରେ ବସିବାକୁ ଚାହୁଁଥିବା ନବଜ୍ୟୋତ ସିଂ ସିଦ୍ଧୁ ସେଇଠି ଅଟକି ଗଲେ । ମାନେ ଅମରିନ୍ଦରଙ୍କ ଇସ୍ତଫା ପରେ ସିଦ୍ଧୁ ନୁହେଁ ଚରଣ ଜିତ ଚନ୍ନି ହେଲେ ପଞ୍ଜାବ ମୁଖ୍ୟମନ୍ତ୍ରୀ । ଆଉ ପେଟରେ ପିଡ଼ାକୁ ରଖି ହସିବାର ବାହାନା କରିଥିଲେ ପଞ୍ଜାବ ପିସିସି ପ୍ରେସିଡେଣ୍ଟ । କିନ୍ତୁ 26 ତାରିଖରେ ମନ୍ତ୍ରୀମଣ୍ଡଳ ସମ୍ପ୍ରସାରଣ ହେବା ପରେ ପିଡାକୁ ଆଉ ଅଟକାଇ ପାରିନଥିଲେ ସିଦ୍ଧୁ । ନିଜ ସମର୍ଥକଙ୍କୁ କ୍ୟାବିନେଟରେ ସ୍ଥାନ ନମିଳିବାରୁ ଶେଷରେ ଆଜି ପିସିସି ପଦରୁ ଇସ୍ତଫା ପ୍ରଦାନ କରିଛନ୍ତି ।
କ୍ରିକେଟରୁ ରାଜନୀତିକୁ ପ୍ରବେଶ କରିଥିବା ସିଦ୍ଧୁ ସର୍ବଦା ଚର୍ଚ୍ଚାରେ । କେତେବେଳେ ନିଜ ପ୍ରତିକ୍ରିୟାରେ ତ, ଆଉ କେତେବେଳେ ପତିଆରାରେ । କେତେବେଳେ ବିବାଦୀୟ ବୟାନରେ ତ କେତେବେଳେ ଶତ୍ରୁର ଘରେ । ଆଉ ଏବେ ନିଜ ଘରେ । ମାନେ କଂଗ୍ରେସରେ ରହି କଂଗ୍ରେସରେ ପୁରାଇଛନ୍ତି କେଁ । ସବୁକିଛି ଠିକ ଚାଲିଥିବା ପଞ୍ଜାବ କଂଗ୍ରେସରେ 2017 ମସିହାରେ ସିଦ୍ଧୁଙ୍କ ଏଣ୍ଟ୍ରି ହୁଏ । ଆଉ ବିବାଦର ବି । କଂଗ୍ରେସ ଟିକେଟରୁ ପୂର୍ବ ଅମୃତସରରୁ ବିଧାୟକ ନିର୍ବାଚିତ ହୁଅନ୍ତି । ମୁଖ୍ୟମନ୍ତ୍ରୀ ହୁଅନ୍ତି ଦଳର ବରିଷ୍ଠ ନେତା କ୍ୟାପଟେନ ଅମରିନ୍ଦର ସିଂ । ଆଉ କଳା ଏବଂ ପର୍ଯ୍ୟଟନ ମନ୍ତ୍ରୀ ସାଜନ୍ତି ସିଦ୍ଧୁ । କିନ୍ତୁ ମନ୍ତ୍ରୀ ହେବାର କିଛି ମାସ ପରେ ସିଦ୍ଧୁ ଭାରତର ଶତ୍ରୁ ରାଷ୍ଟ୍ରକୁ ଗସ୍ତ କରନ୍ତି । ଯେଉଁ ସମୟରେ ଭାରତ ପାଇଁ ବମର ସୁତୁଲି ଭିଡୁଥିଲା ପାକିସ୍ତାନ । ଠିକ ସେହି ସମୟରେ ପାକିସ୍ତାନର ନବନିର୍ବାଚିତ ପ୍ରଧାନମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବରେ ଅତିଥି ସାଜିଥିଲେ ସିଦ୍ଧୁ ।
ଯାହାକୁ ଖୁଲମ ଖୋଲା ବିରୋଧ କରିଥିଲେ ପଞ୍ଜାବର ମୁଖ୍ୟମନ୍ତ୍ରୀ ଅମରିନ୍ଦର ସିଂ । ଦେଶବାସୀଙ୍କ ନିକଟରେ ଭୁଲ ମାଗିବା ପାଇଁ ମଧ୍ୟ ବାଧ୍ୟ କରିଥିଲେ ସିଦ୍ଧୁଙ୍କୁ । ଆଉ କ୍ୟାପଟେନଙ୍କ ଏଭଳି ଚରମ ବାଣୀ ହିଁ ସିଦ୍ଧୁଙ୍କୁ ଶତ୍ରୁ ସଜାଇଦେଇଥିଲା । ସେହି ଠାରୁ ହିଁ ପଞ୍ଜାବ କଂଗ୍ରେସରେ ଆସିଥିଲା ଟ୍ୱିଷ୍ଟ । ଗୋଟେପଟେ ଅନଭିଜ୍ଞତା ସ୍ୱତେ ହାଇକମାଣ୍ଡଙ୍କ ନିକଟତର ହେବାକୁ ଲାଗିଥିଲେ ସିଦ୍ଧୁ । ମିଠା ଭାଷଣ ଏବଂ ଯୋସ ଭରା ଆହ୍ୱାନରେ ଗାନ୍ଧୀ ପରିବାରର ମନ କିଣିଥିବା ସିଦ୍ଧୁ କିନ୍ତୁ ଅମରିନ୍ଦରଙ୍କ ପାଇଁ ଜାଲ ବିଛାଇ ସାରିଥିଲେ । ମୁଖ୍ୟମନ୍ତ୍ରୀ ଅମରନ୍ଦିର ସିଂଙ୍କ ବିରୋଧ ସ୍ୱତେ ମଧ୍ୟ ୧୮ ଜୁଲାଇରେ ସିଦ୍ଧୁଙ୍କୁ ପିସିସି ଘୋଷଣା କରିଥିଲା ଏଆଇସିସି । ଆଉ ଏହାର ପରବର୍ତ୍ତୀ ସମୟରେ ଅର୍ଥାତ ଏକ ମାସ ଅନ୍ତରରେ ସେପ୍ଟେମ୍ବର ୧୮ରେ ମୁଖ୍ୟମନ୍ତ୍ରୀ ପଦରୁ ଇସ୍ଥଫା ଦେଇଥିଲେ କ୍ୟାପଟେନ । ଯାଉ ଯାଉ ଏକଥା ମଧ୍ୟ କହିଥିଲେ, Sidhau Always Unfit । ନା ତାଙ୍କ ପାଖରେୱ ନେତୃତ୍ୱ ନବାର ଦକ୍ଷତା ଅଛି, ନା ନେତା ହେବାର । ବଂର କଂଗ୍ରେସ ପ୍ରତି ସେ ବିପଦ ବୋଲି କହିଥିଲେ କ୍ୟାପଟେନ ।
ସେଇୟା ହିଁ ହେଲା । ମାତ୍ର ୧୦ ଦିନର ବ୍ୟବଧାନରେ ହିଁ କ୍ୟାପଟେନଙ୍କ କଥା ସତ ପ୍ରମାଣିତ ହୋଇଛି । ସିଦ୍ଧୁ ନିଜ ପଟୁ କଂଗ୍ରେସ ସଭାପତି ପଦରୁ ଇସ୍ତଫା ଦେଇଛନ୍ତି । ଯୋଗ୍ୟଙ୍କୁ ଯାଗା ନମିଳିବାର କାରଣ ଦର୍ଶାଇ ପଦ ଛାଡିଛନ୍ତି । ସେପଟେ କ୍ୟାବିନେଟରେ ସ୍ଥାନ ପାଇଥିବା ସିଦ୍ଧୁଙ୍କ ଗୋଷ୍ଠୀର ରାଜିଆ ସୁଲତାନା ମଧ୍ୟ ଇସ୍ତଫା ପ୍ରଦାନ କରିଛନ୍ତି । ଆଉ ଦୂରରେ ଥାଇ କ୍ୟାପଟେନ କହିଛନ୍ତି, ମୁଁ ଆଗରୁ କହୁଥିଲି ନା….
ଗଡ଼ିଲା ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ସଚେତନତା ରଥ
ପାରଳାଖେମୁଣ୍ଡି: ଗଜପତି ଜିଲ୍ଲାରେ ଗଡ଼ିଲା ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ସଚେତନତା ରଥ । ଜିଲ୍ଲାର ସମସ୍ତ ପଞ୍ଚାୟତରେ ସ୍ୱାସ୍ଥ୍ୟ ସେବା ସମ୍ବନ୍ଧୀୟ ସଚେତନ କରିବ ଏହି ରଥ । ପାରଳାଖେମୁଣ୍ଡି ରାଜପ୍ରସାଦ ସମ୍ମୁଖରେ ୧୦ଟି ସଚେତନତା ରଥକୁ ପତାକା ଦେଖାଇ ଶୁଭାରମ୍ଭ କରିଛନ୍ତି ଗଜପତି ଜିଲ୍ଲାପାଳ । ଜିଲ୍ଲାର ୭ଟି ବ୍ଲକ, ପୌର ପରିଷଦ ଓ ଏନଏସି ଅଞ୍ଚଳର ସମସ୍ତ ଗାଁ ଏହି ରଥ ଗୁଡ଼ିକ ପରିକ୍ରମା କରିବ ।

ଏହି ଯୋଜନାରେ ଜିଲ୍ଲାର ପ୍ରାୟ ୫ ଲକ୍ଷରୁ ଅଧିକ ହିତାଧିକାରୀ ଉପକୃତ ହେବେ । ଅକ୍ଟୋବର ମାସ ସୁଦ୍ଧା ସମସ୍ତ ଲୋକଙ୍କୁ କାର୍ଡ ଯୋଗାଇ ଦିଆଯିବ । ମହିଳାଙ୍କୁ ୧୦ ଲକ୍ଷ ଟଙ୍କା ଓ ପୁରୁଷଙ୍କ ନିମନ୍ତେ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣାରେ ସ୍ୱାସ୍ଥ୍ୟ ସେବା ଯୋଗାଇ ଦେବା ବ୍ୟବସ୍ଥା ରହିଛି । ଜିଲ୍ଲାରେ ୪ଟି ଘରୋଇ ସ୍ୱାସ୍ଥ୍ୟ କେନ୍ଦ୍ର ସହ ପଡ଼ୋଶୀ ଆନ୍ଧ୍ର ଓ ଓଡ଼ିଶାର ବହୁ ସ୍ୱାସ୍ଥ୍ୟ କେନ୍ଦ୍ରରେ ଏହି ସେବା ଉପଲବ୍ଧ ହେବା ବ୍ୟବସ୍ଥା କରାଯାଇଛି ବୋଲି ଜିଲ୍ଲାପାଳ କହିଛନ୍ତି ।
ପୂଜା ଚାନ୍ଦା ମାଗିବା ଅଭିଯୋଗରେ ୨ ଜଣ ଗିରଫ
କଟକ: ପୂଜା ଚାନ୍ଦା ମାଗି ଗିରଫ । ବେଆଇନ୍ ପୂଜା ଚାନ୍ଦା ମାଗିବା ଅଭିଯୋଗରେ ମାଲଗୋଦାମ ଥାନା ପୋଲିସ ୨ ଜଣଙ୍କୁ ଗିରଫ କରିଛି । ଗିରଫ ୨ ଜଣ କଲେଜ ଛକ ପୂଜା କମିଟିର ସଦସ୍ୟ ବୋଲି ଜଣାପଡ଼ିଛି । ଅଭିଯୋଗ ଅନୁସାରେ, ଜଣେ ବ୍ୟବସାୟୀଙ୍କୁ ୧୩ ହଜାର ଟଙ୍କା ଚାନ୍ଦା ମାଗିବା ସହ ଏହାକୁ ଶୀଘ୍ର ଦେବା ପାଇଁ ତାଗିଦ କରିଥିଲେ ପୂଜା କମିଟି ସଦସ୍ୟ ।

ଏନେଇ ବ୍ୟବସାୟୀ ଜଣଙ୍କ ମାଲଗୋଦାମ ଥାନା ପୋଲିସର ଦ୍ୱାରସ୍ଥ ହୋଇଥିଲେ । ପୋଲିସ କଲେଜ ଛକ ପୂଜା କମିଟିର ଦୁଇ ସଦସ୍ୟଙ୍କୁ ଗିରଫ କରିଛି । କମିଶନରେଟ ପୋଲିସର ଜିରୋ ଟଲରେନ୍ସ ଅଭିଯାନରେ ଜୋର ଜବରଦସ୍ତି ଚାନ୍ଦା ମାଗିବା ନେଇ ଅଭିଯୋଗ ଆସିଲେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି କଟକ ଜୋନ-୧ ଏସିପି ।






