spot_img
Home Blog Page 5306

ନିଅଣ୍ଟିଆ ବର୍ଷା ଭରଣା କଲା ‘ଗୁଲାବ’; ଉତ୍ତର ଓଡ଼ିଶାରେ ଘଡ଼ଘଡ଼ି ସହ ବର୍ଷା ସମ୍ଭାବନା

ଭୁବନେଶ୍ୱର: ଅବପାତର ରୂପ ନେଲା ବାତ୍ୟା ‘ଗୁଲାବ’ । ଆଉ ୬ ଘଣ୍ଟା ପରେ ଲଘୁଚାପରେ ପରିଣତ ହେବ। ଏବେ ଗୁଲାବର କେନ୍ଦ୍ରସ୍ଥଳ ମାଲକାନଗିରି ଜିଲ୍ଲାରୁ ୬୫ କିଲୋମେଟର ଓ ଛତିଶଗଡର ଜଗଦଲପୁର ଠାରୁ ୯୦ କିଲୋମେଟର ଦୂରରେ ଅଛି । ଧୀରେ ଧୀରେ ଏହା ପଶ୍ଚିମ ଦିଗକୁ ଗତି କରୁଛି। ଏହାର ପ୍ରଭାବରେ ଗତ ୨୪ ଘଣ୍ଟା ଭିତରେ କୋରାପୁଟ ଜିଲ୍ଲାରେ ଅତି ପ୍ରବଳ ହୋଇଛି । ଆଗକୁ ବି କୋରାପୁଟ ସମେତ ମାଲକାନଗିରି, ରାୟଗଡା, ନବରଙ୍ଗପୁର ଜିଲ୍ଲାରେ ଅତି ପ୍ରବଳହେବାର ସମ୍ଭାବନା ରହିଛି। ପ୍ରବଳ ବର୍ଷା ଥିବାରୁ ବଲାଙ୍ଗୀର, ନୂଆପଡା, ଗଜପତି ଓ କଳାହାଣ୍ଡି ଜିଲ୍ଲା ପାଇଁ ସତର୍କତା ଜାରି କରାଯାଇଛି। ନାଗବଳୀ ଅବବାହିକାରେ ବେଶି ବର୍ଷ ହୋଇଥିବା ଏସ୍ଆରସିଙ୍କ ପକ୍ଷରୁ ସୂଚିତ କରାଯାଇଛି ।

ଅନ୍ୟପକ୍ଷରେ ଆସନ୍ତା ୨୪ ଘଣ୍ଟାରେ ଉତ୍ତର ଓଡ଼ିଶାରେ ବଜ୍ରପାତ ସହ ବର୍ଷା ହୋଇପାରେ । ପୁଣି ଗୋଟିଏ ମିଆଁମାର ଉପକୂଳ ବାଙ୍ଗୋପସାଗରରେ ଆଉ ଗୋଟିଏ ଘୁର୍ଣ୍ଣିବଳୟ ସୃଷ୍ଟି ହଉଛି । ଏହର ପ୍ରଭାବରେ କେନ୍ଦୁଝର, ମୟୁରଭଞ୍ଜ, ବାଲେଶ୍ୱର, ଦେବଗଡ଼ରେ ପ୍ରବଳ ବର୍ଷା ବଜ୍ରପାତ ସମ୍ଭାବନା ରହିଛି । ସେପ୍ଟେମ୍ବରରେ ଓଡ଼ିଶାରେ ୭୦ ପ୍ରତିଶତ ଅଧିକ ବର୍ଷ ହୋଇଛି। ୩୬୦.୧ ମିଲିମିଟର ବର୍ଷ ରେକର୍ଡ ହୋଇଛି। ସ୍ୱାଭାବିକ ଭାବେ ଏହି ମାସରେ ୨୧୨ ମିଲିମିଟର ବର୍ଷା ହୋଇଥାଏ । ଯାହାଦ୍ୱାରା ଚଳିତବର୍ଷ ନିଆଣ୍ଟିଆ ବର୍ଷା ଭରଣା କରିଛି। ଗୁଲାବ ବାତ୍ୟା ବଳୟ ଟି ୩୦ ସେପ୍ଟେମ୍ବର ବେଳକୁ ଗୁଜୁରାଟରେ  ପହଞ୍ଚି ଆରବ ସଗାରକୁ ଚାଲିଯିବ।

ଭାରତ ବନ୍ଦ୍‌ରେ ଅଟକିଲା ଦିଲ୍ଲୀ, ଗୁରୁଗ୍ରାମ- ନୋଏଡା ରାସ୍ତାରେ ଅସମ୍ଭାଳ ଟ୍ରାଫିକ୍ ଜାମ୍

ନୂଆଦିଲ୍ଲୀ: କଳା କୃଷି ଆଇନ ବିରୋଧରେ ଆଜି ଭାରତ ବନ୍ଦ । ୨୧ ଦଫା ଦାବି ନେଇ ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ ଭାରତ ବନ୍ଦ ପାଳନ ହେଉଛି । ବନ୍ଦକୁ ବିଭିନ୍ନ ରାଜନୈତିକ ଦଳ ସମର୍ଥନ କରିଛନ୍ତି । ସକାଳ ୬ଟାରୁ ବନ୍ଦ ଆରମ୍ଭ ହୋଇଥିବା ବେଳେ, ଅପରାହ୍ନ ୪ଟା ପର୍ଯ୍ୟନ୍ତ ବନ୍ଦ ପାଳନ ହେବ । ଅତ୍ୟାବଶ୍ୟକ ସେବା ବନ୍ଦରୁ ବାଦ୍ ପଡିଥିବା ବେଳେ ସମସ୍ତ ଶିକ୍ଷାନୁଷ୍ଠାନ, ଦୋକାନ ବଜାର, ଶିଳ୍ପ ଏବଂ ବ୍ୟବସାୟ ପ୍ରତିଷ୍ଠାନ ବନ୍ଦ ରହିଛି । ଦିଲ୍ଲୀ ସୀମାରେ ଚାଷୀ ଧାରଣା ଦେବା ସହ ଗାଜିପୁର ସୀମା ପାଖରେ ବସିଥିବା ଚାଷୀମାନେ ରାସ୍ତାରୋକ କରିବା ସହିତ ଟ୍ରାଫିକ୍ ଜାମ କରିଛନ୍ତି ।

ଦିଲ୍ଲୀ-ଅମୃତସର ହାଇଓ୍ବେ ସହ ଦିଲ୍ଲୀ-ମେରଠ ହାଇଓ୍ବେକୁ ମଧ୍ୟ ଚାଷୀମାନେ ବନ୍ଦ କରିଛନ୍ତି । ଚାଷୀ ଆନ୍ଦୋଳନ ଯୋଗୁ ଟ୍ରେନ ଚଳାଚଳ ବାଧାପ୍ରାପ୍ତ ହୋଇଥିବା ବେଳେ ଦିଲ୍ଲୀରୁ ଯାଉଥିବା ଅନେକ ଟ୍ରେନକୁ ରେଳ ବିଭାଗ ପକ୍ଷରୁ ବାତିଲ କରିଦିଆଯାଇଛି । ହରିୟାଣାର ବାହାଦୂରଗଡ଼ରେ ଚାଷୀମାନେ ରେଳଧାରଣା ଉପରେ ବସି ଆନ୍ଦୋଳନ ଚଳାଇଛନ୍ତି । ସେପଟେ ସୁରକ୍ଷା ଦୃଷ୍ଟିରୁ ଦିଲ୍ଲୀ ମେଟ୍ରୋ ଟ୍ରେନ୍ କର୍ପୋରେସନ ପକ୍ଷରୁ ଏକ ମେଟ୍ରୋ ଷ୍ଟେସନ ବନ୍ଦ କରିଦିଆଯାଇଛି ।

ପଞ୍ଜାବ କଂଗ୍ରେସ ପକ୍ଷରୁ ଚାଷୀଙ୍କ ଭାରତ ବନ୍ଦକୁ ସମର୍ଥନ ଦିଆଯାଇଥିବା ବେଳେ ଉତ୍ତରପ୍ରଦେଶର ବହୁଜନ ସମାଜବାଦୀ ପାର୍ଟି ମଧ୍ୟ ଭାରତ ବନ୍ଦକୁ ସମର୍ଥନ ଜଣାଇଛି। ତିନି କୃଷି କାନୁନ ପ୍ରତ୍ୟାହାର ଦାବିରେ ବର୍ଷେ ଧରି ଚାଷୀ ଆନ୍ଦୋଳନ ଜାରି ରହିଛି । ଖରା, ବର୍ଷା, କାକରରେ ଚାଷୀ ଆନ୍ଦୋଳନ ଚଳାଇଥିବା ବେଳେ କେନ୍ଦ୍ର ସରକାର ଏହାକୁ ଅଣଦେଖା କରୁଛନ୍ତି । ତେବେ କଳା ଆଇନ ପ୍ରତ୍ୟାହାର ଦାବିରେ ଚାଷୀମାନେ ୧୦ବର୍ଷ ପର୍ଯ୍ୟନ୍ତ ଆନ୍ଦୋଳନ କରିବାକୁ ପ୍ରସ୍ତୁତ ଅଛନ୍ତି ବୋଲି କହିଛନ୍ତି ଭାରତୀୟ କିଷାନ ୟୁନିୟନ ନେତା ରାକେଶ ଟିକାଏତ କହିଛନ୍ତି ।

ଅନ୍ୟପଟେ ଭାରତ ବନ୍ଦ ପାଳନ ବେଳେ ଅଘଟଣ । ଦିଲ୍ଲୀ-ହରିୟାଣାର ସିଂଘୁ ସୀମାରେ ଜଣେ ଆନ୍ଦୋଳନରତ ଚାଷୀଙ୍କର ମୃତ୍ୟୁ ହୋଇଛି। କେନ୍ଦ୍ର ସରକାରଙ୍କ ୩ କଳା କୃଷି ଆଇନକୁ ବିରୋଧ କରି ଚାଷୀ ବର୍ଷେ ଧରି ଆନ୍ଦୋଳନ ଜାରି ରଖିଛନ୍ତି । ଆଜି ଦେଶ ବ୍ୟାପୀ ବନ୍ଦ ଡାକରା ଦିଆଯାଇଥିବା ବେଳେ ଆନ୍ଦୋଳନ ସ୍ଥଳରେ ହିଁ ଜଣେ ଚାଷୀଙ୍କର ମୃତ୍ୟୁ ହୋଇଛି । ହୃଦଘାତରେ ଚାଷୀଙ୍କର ମୃତ୍ୟୁ ହୋଇଥିବା ପୋଲିସ କହିଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁ ପ୍ରକୃତ କାରଣ ଜଣାପଡ଼ିବ ।

ଝାଡ଼ଖଣ୍ଡରେ ମିଳିଲା ସୁନାର ଖଣି, ଭାରତ ପୁଣି ହେବାକୁ ଯାଉଛି ସୁନାର ଚିଡ଼ିୟା

0

ରାଞ୍ଚି: ପ୍ରାଚୀନ କାଳରେ ଭାରତକୁ ସୁନାର ପକ୍ଷୀ କୁହାଯାଉଥିଲା କାରଣ ସେହି ସମୟରେ ଭାରତରେ ବହୁ ପରିମାଣର ସୁନା ଥିଲା । ଧିରେ ଧିରେ, ବାହାରୁ ଆସୁଥିବା ବିଦେଶୀମାନେ ଭାରତକୁ ଶାସନ କରିବାକୁ ଚେଷ୍ଟା କଲେ ଏବଂ ଏଠାରୁ ଅନେକ ଥର ଲୁଟ୍ କରି ସମ୍ପତ୍ତି ନିଜ ଦେଶକୁ ନେଇଗଲେ । ଆଜି ବି ଭାରତ ଦେଶରେ ଅନେକ ଖଣିଜ ସମ୍ପଦ ଲୁକ୍କାଇତ ଅବସ୍ଥାରେ ରହିଛି । କିଛି ସମୟ ପୂର୍ବରୁ ଆପଣ ନିଶ୍ଚୟ ଶୁଣିଥିବେ ଯେ ଉତ୍ତରପ୍ରଦେଶର ସୋନଭଦ୍ରରେ ଏକ ବିରାଟ ସୁନା ଖଣି ମିଳିଛି ଯାହାର ମୂଲ୍ୟ ଅନେକ ଲକ୍ଷ କୋଟି ଟଙ୍କା ଥିଲା । କିନ୍ତୁ ଏହା ପରେ ଏହି ଖବର ମନ୍ଥର ହୋଇଗଲା । ନିକଟରେ ଆଉ ଏକ ଖବର ଆସିଛି ଯେ ଝାଡଖଣ୍ଡରେ ସୁନା ଖଣି, ବିହାରରେ କ୍ରୋମିୟମ ଏବଂ ପୋଟାସିୟମ ଖଣି ସନ୍ଧାନ କରାଯାଇଛି ।

କେନ୍ଦ୍ର ଖଣି ମନ୍ତ୍ରଣାଳୟ ବିହାରର ୪ ଟି କ୍ଷେତ୍ର ଚିହ୍ନଟ କରିଛି ଯେଉଁଠାରେ କ୍ରୋମିୟମ ଏବଂ ପୋଟାସିୟମର ଭଣ୍ଡାର ଅଛି । ଏହି ଖଣିଟି ସାସାରାମ ରୋହତାସ୍ ଗୟା ଏବଂ ଔରଙ୍ଗାବାଦରେ ଅବସ୍ଥିତ । ନିକଟରେ FICCI ବୈଠକରେ କେନ୍ଦ୍ର କୋଇଲା ଏବଂ ଖଣି ମନ୍ତ୍ରୀ ପହଲାଦ୍ ଯୋଶୀ ଖଣିଜ ପଦାର୍ଥ ସହ ଜଡିତ ଏକ ସର୍ଭେ କରିବା ପାଇଁ ବିହାରର ଖଣି ମନ୍ତ୍ରୀ ଜନକ ରାମଙ୍କୁ କିଛି ଦଲିଲ ଦେଇଛନ୍ତି । କେବଳ ବିହାର ନୁହେଁ ବରଂ ଅନ୍ୟ କିଛି ରାଜ୍ୟର ମନ୍ତ୍ରୀ ଏବଂ ପ୍ରତିନିଧୀମାନଙ୍କୁ ମଧ୍ୟ ଖଣିଜ ସର୍ବେକ୍ଷଣ ସହ ଜଡିତ ଡକ୍ୟୁମେଣ୍ଟ ପଠାଯାଇଛି ।

ବିଭିନ୍ନ ଖଣିଜ ପଦାର୍ଥ ପାଇଁ କେନ୍ଦ୍ର ମୋଟ ୧୪ ଟି ରାଜ୍ୟକୁ ୧୦୦ ରୁ ଅଧିକ ବ୍ଲକ ପ୍ରଦାନ କରିଛି ଏବଂ ଏହିସବୁ ବ୍ଲକକୁ ଶୀଘ୍ର ନିଲାମ କରିବାକୁ ମଧ୍ୟ ଅନୁରୋଧ କରିଛି । ବିହାରର ଖଣି ଏବଂ ଭୂବିଜ୍ଞାନ ମନ୍ତ୍ରୀ ଜନକ ରାମ ସୂଚନା ଦେଇଛନ୍ତି ଯେ ବିହାରକୁ ତିନୋଟି ବ୍ଲକ ପୋଟାସିୟମ ଏବଂ ଗୋଟିଏ କ୍ରୋମିୟମ ଦିଆଯାଇଛି ।

ପୋଟାସିୟମ ବ୍ୟତୀତ ଔରଙ୍ଗାବାଦ ଏବଂ ଗୟାରେ କ୍ରୋମିୟମର ବ୍ଲକ ମିଳିଛି, ଏହି ଅଞ୍ଚଳ ୮ ବର୍ଗ କିଲୋମିଟରର ଅଟେ । କ୍ରୋମିୟମର ବ୍ୟବହାର ମୋବାଇଲ ତଥା ହିଟରର ତାର ପ୍ରସ୍ତୁତ କରିବାରେ ବ୍ୟବହାର କରାଯାଏ । ଏହା ବ୍ୟତୀତ ଝାଡ଼ଖଣ୍ଡର ସରାୟକେଲା ଜିଲ୍ଲାରେ ଦୁପଇଟି ସୁନାର ବ୍ଲକ ମିଳିଛି । ଏହା ଖୁବ ଅଧିକ ମାତ୍ରାରେ ସୁନା ଥିବା ଅନୁମାନ କରାଯାଉଛି । କେନ୍ଦ୍ର ସରକାର ଝାଡ଼ଖଣ୍ଡ ବ୍ୟତୀତ ଛତିଶଗଡ଼ର ଜଶପୁର ଜିଲ୍ଲାରେ ମଧ୍ୟ ସୁନାର ଭଣ୍ଡାର ଥିବା ଆଶା କରାଯାଉଛି । ଯଦି ସେପରି ହୁଏ ତେବେ ଭାରତ ପୁଣି ଥରେ ସୁନାର ଭଣ୍ଡାରକୁ ନେଇ ବିଶ୍ୱରେ ନିଜ ସ୍ଥାନ ସୁଦୃଢ଼ କରିପାରିବ ।

କୋହଲିଙ୍କ ବିରୋଧରେ ଟିମ୍ ଇଣ୍ଡିଆରେ ଆରମ୍ଭ ହୋଇସାରିଥିଲା ବିଦ୍ରୋହ

ନୂଆଦିଲ୍ଲୀ: ଗତ କିଛି ଦିନ ପୂର୍ବେ ଟି-୨୦ ଅଧିନାୟକ ଦାୟିତ୍ୱରୁ ଓହରିବା ନେଇ ଘୋଷଣା କରିଛନ୍ତି ବିରାଟ କୋହଲି । ଟି-୨୦ ବିଶ୍ୱକପ୍ ପରେ ଅଧିନାୟକ ଦାୟିତ୍ୱରୁ ଓହରିବା ନେଇ ଘୋଷଣା କରିଛନ୍ତି । ଇଂଲଣ୍ଡ ଗସ୍ତରୁ ଫେରିବା ପରେ କୋହଲିଙ୍କ ଏହି ଘୋଷଣା ତାଙ୍କ ପ୍ରଶଂସକ ସମେତ ଅନ୍ୟ କ୍ରିକେଟ ପ୍ରେମୀଙ୍କୁ ଚକିତି କରିଥିଲା । ମାତ୍ରାଧିକ କାର୍ଯ୍ୟଭାର ଯୋଗୁଁ କୋହଲି ଅଧିନାୟକ ପଦରୁ ଓହରିଥିବା କହିଥିଲେ । ତେବେ ସମ୍ପ୍ରତି ଯାହା ଖବର ଆସୁଛି ତଦନୁଯାୟୀ, ଇଂଲଣ୍ଡ ଗସ୍ତରେ  କାଳରେ କ୍ୟାପଟେନ୍ କୋହଲିଙ୍କ କିଛି ଖେଳାଳିଙ୍କୁ ଦୁର୍ବ୍ୟବହାର କରିଥିଲେ । ଏ ନେଇ ଭାରତୀୟ ଦଳର ଜଣେ ସିନିୟର ସଦସ୍ୟ ବିସିସିଆଇଙ୍କ ନିକଟରେ ଅଭିଯୋଗ କରିଥିଲେ ।

ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ କୋହଲୀଙ୍କୁ ଅଧିନାୟକ ପଦରୁ ହଟାଇବା ନେଇ ବିସିସିଆଇ ପୂର୍ବରୁ ଯୋଜନା କରିଆସୁଥିଲା । କୋହଲିଙ୍କ ଅଧିନାୟକତ୍ୱରେ ଟିମ୍ ଇଣ୍ଡିଆ ଗୋଟିଏ ବି ଆଇସିସି ଟ୍ରଫି ଜିତିପାରିନଥିବାରୁ ବିସିସିଆଇ ପକ୍ଷରୁ ଏଭଳି ନିଷ୍ପତ୍ତି ନିଆଯାଉଥିବା କୁହାଯାଉଛି । ଅନ୍ୟ କିଛି ସୂଚନା ଅନୁଯାୟୀ ଟିମ୍ ଭିତରେ କୋହଲିଙ୍କୁ ନେଇ ଅସନ୍ତୋଷ ଦେଖାଦେଇଛି । ବହୁ ସିନିୟର ଖେଳାଳି ଡ୍ରେସିଂ ରୁମ୍‌ରେ ତାଙ୍କ ବ୍ୟବହାରକୁ ନେଇ ଅସନ୍ତୁଷ୍ଟ ଥିଲେ । ଏହି ସିନିୟର ଖେଳାଳିଙ୍କ ମଧ୍ୟରେ ଆର ଅଶ୍ୱିନଙ୍କ ନାମ ଆଗରେ ରହିଛି । ତେବେ ଏ ନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ ।

ଏଥିସହିତ ପଢ଼ନ୍ତୁ: IPL 2021: ଜାଡେଜାଙ୍କ ଜବରଦସ୍ତ ପ୍ରଦର୍ଶନ: ଶେଷ ବଲ୍‌ରେ ଚେନ୍ନାଇ ବିଜୟୀ

୧୦୦ ଥର ରିଜେକ୍ଟ ହୋଇଥିବା ମହିଳା କେମିତି ହେଲେ ୪୦୦ ବିଲିୟନର ମାଲିକାଣୀ…

ନୂଆଦିଲ୍ଲୀ: ଅନେକ ଥର ଜୀବନରେ ବିଫଳତାର ସାମ୍ନା କରିବାକୁ ପଡେ । କିଛି ଲୋକ ଏହା ଦ୍ୱାରା ନିରାଶ ହୁଅନ୍ତି ତ ଆଉ କିଛି ବିଫଳତାକୁ ଅସ୍ତ୍ର କରି ସଫଳତା ହାସଲ କରନ୍ତି । ଏହିପରି ଜଣେ ମହିଳା ହେଉଛନ୍ତି ମେଲାନି ପର୍କିନ୍ସ, ଯିଏ ମାତ୍ର ୩୧ ବର୍ଷ ବୟସରେ ୪୦୦ ବିଲିୟନ ସମ୍ପତ୍ତିର ମାଲିକାଣୀ ଅଟନ୍ତି । ଯଦିଓ ପ୍ରାରମ୍ଭିକ ପର୍ଯ୍ୟାୟରେ ତାଙ୍କର ବିଚାରଧାରାକୁ ବାରମ୍ବାର ପ୍ରତ୍ୟାଖ୍ୟାନ କରାଯାଇଥିଲା, କିନ୍ତୁ ସେ କେବେହେଲେ ହାର ମାନିନଥିଲେ । ତେବେ ଆସନ୍ତୁ ଜାଣିବା ୧୦୦ ଥର ପ୍ରତ୍ୟାଖ୍ୟାନ ହୋଇଥିବା ମହିଳା କିପରି ୪୦୦ ବିଲିୟନର ମାଲିକାଣୀ ହୋଇଗଲେ ?

ବ୍ଲୁମବର୍ଗଙ୍କ ଅନୁଯାୟୀ, ଅଷ୍ଟ୍ରେଲିଆର ୩୧ ବର୍ଷିୟ ମେଲାନି ପର୍କିନ୍ସ, ଲୋକପ୍ରିୟ ଡିଜାଇନ ପ୍ଲାଟଫର୍ମ ‘କାନଭା’ର ସହ-ପ୍ରତିଷ୍ଠାତା ତଥା ସିଇଓ ଅଟନ୍ତି । ସେ ତାଙ୍କ ପ୍ରଥମ ବ୍ୟବସାୟ ମାତ୍ର ୧୪ ବର୍ଷ ବୟସରେ ଆରମ୍ଭ କରିଥିଲେ । ୨୨ ବର୍ଷ ବୟସରେ, ମେଲାନି ତାଙ୍କର ପରବର୍ତ୍ତୀ କମ୍ପାନୀ (ଫ୍ୟୁଜନ୍ ବୁକ୍) ପ୍ରତିଷ୍ଠା କରିଥିଲେ । ଆଜି, ଫ୍ୟୁଜନ୍ ବୁକ୍ ଅଷ୍ଟ୍ରେଲିଆର ସର୍ବବୃହତ ବର୍ଷିକ ପୁସ୍ତକ ପ୍ରକାଶକ ଅଟେ ଏବଂ ଫ୍ରାନ୍ସ ଏବଂ ନ୍ୟୁଜିଲ୍ୟାଣ୍ଡରେ ମଧ୍ୟ ଏହାର ଉପସ୍ଥିତି ରହିଛି ।

୨୦୧୩ ମସିହାରେ, ପର୍କିନ୍ସ ତାଙ୍କ ବ୍ୟବସାୟ ‘କାନଭା’ ଆରମ୍ଭ କରିଥିଲେ । ଏହା ଏକ ପ୍ଲାଟଫର୍ମ ଯାହା ଯେକୌଣସି ବ୍ୟକ୍ତିଙ୍କୁ ସେମାନଙ୍କର ବୃତ୍ତିଗତ ସ୍ତର ନିର୍ବିଶେଷରେ ବୃତ୍ତିଗତ-ଗୁଣାତ୍ମକ ଡିଜାଇନ୍ ସୃଷ୍ଟି କରିବାକୁ ଅନୁମତି ଦିଏ । ଆଜି କାନଭା ପାଖରେ  ୧୯୦ ଟି ବିଭିନ୍ନ ଦେଶରେ ୧୦ ମିଲିୟନରୁ ଅଧିକ ପଞ୍ଜୀକୃତ ଉପଭୋକ୍ତା ଅଛନ୍ତି । ଯେଉଁଥିରେ ୨୫୦ ରୁ ଅଧିକ କର୍ମଚାରୀଙ୍କ ଏକ ଟିମ୍ ରହିଛି ଯାହାର ଜାନୁଆରୀ ୨୦୧୮ ସୁଦ୍ଧା ମୂଲ୍ୟ ୧ ବିଲିୟନ ଡ଼ଲାର୍ ଥିଲା ।

ଏଥି ପାଇଁ ପର୍କିନ୍ସଙ୍କୁ କଠିନ ପରିଶ୍ରମ କରିବାକୁ ପଡ଼ିଥିଲା । ୱେବସାଇଟ୍ ଏଣ୍ଟରପ୍ରାଇଜର୍ ସହିତ ସାକ୍ଷାତକାରରେ ମେଲାନି ପର୍କିନ୍ସ କହିଛନ୍ତି ଯେ, ‘ମୁଁ ବିଫଳତାରୁ ଖୁବ ଶୀଘ୍ର ଶିଖିଲି । ନିଜ ଲକ୍ଷ୍ୟ ଉପରେ ଧ୍ୟାନ ଦେବା ଏବଂ କ୍ରମାଗତ ଭାବରେ କିଛି କରିବା ଶିଖିଲି ।’ ଏକ ବର୍ଷ ଭିତରେ ୧୦୦ରୁ ଅଧିକ ଥର ରିଜେକ୍ଟ କରାଯାଇଥିଲା । ଲୋକେ ୧୦୦ ଥର ରିଜେକ୍ଟ ହେବା ପରେ ପ୍ରୟାସ କରିବା ବନ୍ଦ କରିଦିଅନ୍ତି । କିନ୍ତୁ ଆପଣଙ୍କୁ ଧୈର୍ଯ୍ୟ ଧରି ରହିବାକୁ ପଡ଼ିବ ।

ଅନୁସନ୍ଧାନକାରୀ ସଂସ୍ଥା ସିବି ଇନସାଇଟ୍ସର ତଥ୍ୟ ଅନୁଯାୟୀ ପେର୍କିନ୍ସର ସିଡନୀ ଭିତ୍ତିକ ସଂସ୍ଥା ବିଶ୍ୱର ପଞ୍ଚମ ବୃହତ୍ତମ ଷ୍ଟାର୍ଟଅପ୍ ଅଟେ । କେବଳ ଏତିକି ନୁହେଁ, ପର୍କିନ୍ସ ହେଉଛନ୍ତି ୪୦ ବର୍ଷରୁ କମ୍ ଧନୀ ମହିଳା ବିଲିୟନେୟାର । ସେ ପ୍ରାୟ ୪୦୦ ବିଲିୟନର ମାଲିକ ଅଟନ୍ତି ।

ବାତ୍ୟା ଗୁଲାବ ନେଇ ଏସ୍‌ଆରସିଙ୍କ ପ୍ରେସମିଟ୍: ଅପରାହ୍ଣ ସୁଦ୍ଧା ଓଡ଼ିଶା ଛାଡ଼ିବ ବାତ୍ୟା

ଭୁବନେଶ୍ୱର: ବର୍ତ୍ତମାନ ବାତ୍ୟାର କେନ୍ଦ୍ରବିନ୍ଦୁ ମାଲକାନଗିରି ଜିଲ୍ଲାରେ ରହିଛି । ୨ ରୁ ୩ ଘଣ୍ଟା ଭିତରେ ଏହା ସମ୍ପୂର୍ଣ୍ଣ ଭାବେ ଓଡ଼ିଶା ଅତିକ୍ରମ କରିବ । ତେବେ ପବନରବେଗ କେଉଁଠି ବି ଅଧିକ ହୋଇନାହିଁ । ଗଜପତି ଓ କୋରାପୁଟରେ କେବଳ ଦୁଇଟି ତିନୋଟି ସ୍ଥାନରେ ମାଟି ଅତଡ଼ା ଖାସିଥିଲା । ୨୧ଟି ବ୍ଲକରେ ୫୦ ପ୍ରତିଶତରୁ ଅଧିକ ବର୍ଷା ହୋଇଛି । କୋରାପୁଟର ପଟାଙ୍ଗୀରେ ୧୪୮ ମିଲି ମିଟର ବର୍ଷା ହୋଇଥିବା ସାମ୍ୱାଦିକ ସମ୍ମିଳନୀରେ ସୂଚନା ଦେଇଛନ୍ତି ଏସ୍‌ଆରସି ପ୍ରଦୀପ ଜେନା ।

ମାଲକାନଗିରିର ଗୋଟିଏ ବ୍ଲକରେ ୧୦୭ ମିଲିମିଟର ବର୍ଷା ହୋଇଛି । ଗଜପତିର ଗୋଶାଣୀରେ ୮୩ ମିଲିମିଟର, ମୋହନାରେ ୩୩ ମିଲିମିଟର, ରାୟଗଡ ବ୍ଳକରେ ୬୦ ମିଲିମିଟର ଓ ନୂଆଗଡ଼ରେ ୩୩ ମିଲିମିଟର ବର୍ଷା ରେକର୍ଡ ହୋଇଛି । ବିଦ୍ୟୁତ ଭିତ୍ତିଭୂମି କେଉଁଠି କ୍ଷୟକ୍ଷତି ହୋଇନାହିଁ । ଖୁଣ୍ଟ କେଉଁଠି ଉପୁଡି ନାହିଁ । ବର୍ଷା ପ୍ରଭାବରେ କୋରାପୁଟର ଶୁଙ୍କି ଘାଟିରେ ଭୁସ୍ଖଳନ ଯୋଗୁ ରାସ୍ତା ଅବରୋଧ ହୋଇଛି । ବର୍ଷା କମିଲେ ତାହା ମରାମତି କରାଯିବ । ପାହାଡିଆ ସ୍ଥାନରେ କିଛି ଜାଗାରେ ପାଣି ଚାଲୁଥିଲା ତାହା ଏବେ ବନ୍ଦ ହୋଇଗଲାଣି । ମୋଟାମୋଟି ଭାବେ ପାଣି ପାଗ ବିଭାଗ ବାତ୍ୟା ଦ୍ୱାରା ଯେତିକି ବର୍ଷା ହେବ ବୋଲି ଆକଳନ କରିଥିଲା ସେମିତି ବର୍ଷା କି ପବନ ହୋଇ ନାହିଁ । କୌଣସି ବଡ଼ କ୍ଷୟକ୍ଷତି ବି ହୋଇନାହିଁ । ଜିଲ୍ଲାପାଳ ମାନଙ୍କୁ କ୍ଷୟକ୍ଷତି ରିପୋର୍ଟ ଦେବାକୁ କୁହାଯାଇଛି । ସମସ୍ତ ଜିଲ୍ଲାପାଳ ମାନଙ୍କୁ ନିର୍ଦେଶ ଦିଆଯିବ ସେମାନେ ୫ ଦିନରେ କ୍ଷୟକ୍ଷତି ରିପୋର୍ଟ ଦେବେ ।  ସର୍ବମୋଟ ୪୬ ହଜାର ୭୫ଲୋକଙ୍କୁ ସ୍ଥାନାନ୍ତର କରାଯାଇଥିଲା । ୧୧୮୯ଟି ସେଲଟର ସେମାନଙ୍କୁ ରଖାଯାଇଥିଲା । ୧୫୩୩ ଆସନ୍ନ ପ୍ରସବାଙ୍କୁ ସ୍ଥାନାନ୍ତର କରାଯାଇଥିଲା । ମାଲକାନଗିରି ଜିଲ୍ଲାରେ ବର୍ଷା ଟିକିଏ ଜାରି ରହିଛି ଆଶା କରୁଛୁ ସେମିତି କିଛି ସମସ୍ୟା ହେବ ନାହିଁ । କେବଳ ମାଲକାନଗିରି ରେ ୫୦ ରୁ ୬୦ ଗଛ ଭାଙ୍ଗିଥିବା କହିଛନ୍ତି ଏସ୍‌ ଆରସି  ।

ଗୋପୀନାଥପୁର ଗାଁରେ ବୁଲୁଛି ଭାଲୁ: ୨ଜଣଙ୍କୁ କଲା ଆକ୍ରମଣ

ନୀଳଗିରି: ବାଲେଶ୍ୱର ଜିଲ୍ଲା ନୀଳଗିରି ରେଞ୍ଜ ଗୋପୀନାଥପୁର ଗାଁରେ ଭାଲୁ ଆତଙ୍କ। ଭାଲୁ ଆକ୍ରମଣରେ ଦୁଇ ଜଣ ଗୁରୁତର ହୋଇଥିବା ବେଳେ ସେମାନଙ୍କୁ ମେଡ଼ିକାଲରେ ଭର୍ତ୍ତି କରାଯାଇଛି । ଗୁରୁତରମାନେ ହେଲେ ଗୋପୀନାଥପୁର ଗାଁର ମୁକୁନ୍ଦ ରାଉତ ଓ ଚଣ୍ଡୀପୁର ଅଞ୍ଚଳର ପ୍ରଭାକର ମହାନ୍ତି। ଗାଁରେ ଭାଲୁ ବୁଲୁଥିବା ବେଳେ ହିଂସ୍ର ହୋଇ  ପାଳଭୂତକୁ ମଧ୍ୟ ଆକ୍ରମଣ କରୁଛି । ଯାହାକୁ ନେଇ ଗାଁରେ ଭୟର ବାତାବରଣ ଦେଖାଦେଇଛି । ଏନେଇ ବନ ବିଭାଗକୁ ଖବର ଦେବା ପରେ ବନ ବିଭାଗ ପକ୍ଷରୁ ଭାଲୁଟିକୁ ସ୍ଵର୍ଣ୍ଣଚୁଡ଼ ପାହାଡକୁ ଘଉଡ଼ାଇବା ପାଇଁ ଉଦ୍ୟମ କରାଯାଉଛି । ପ୍ରତିବର୍ଷ ଜଙ୍ଗଲି ଜନ୍ତୁ ଖାଦ୍ୟ ଅନ୍ୱେଷଣଣେ ଆସି କ୍ଷତି ପହଞ୍ଚାଉଥିବା ବେଳେ ବନ ବିଭାଗ ଏଥିପ୍ରତି ପଦକ୍ଷେପ ନେବାକୁ ଦାବି ହୋଇଛି।

ଏଥିସହିତ ପଢ଼ନ୍ତୁ: ଆଇପିଏଲ୍‌ ବେଟିଂ ଅଭିଯୋଗରେ ୬ ଗିରଫ: ୧ଲକ୍ଷ ୬୦ ହଜାର ଟଙ୍କା ଜବତ

ଆଇପିଏଲ୍‌ ବେଟିଂ ଅଭିଯୋଗରେ ୬ ଗିରଫ: ୧ଲକ୍ଷ ୬୦ ହଜାର ଟଙ୍କା ଜବତ

ଦିଗପହଣ୍ଡି: ଆଇପିଏଲ ବେଟିଂ ବେଳେ ପୋଲିସର ଚଢ଼ାଉ । ଆସିକା ପାଟପୁର ଥାନା ଅଞ୍ଚଳରେ ଏକ ବଡ଼ ଧରଣର ଆଇପିଏଲ ବେଟିଂକୁ ପଣ୍ଡ କରିଛି ପୋଲିସ । ବେଟିଂ ମାମଲାରେ ପାଟପୁର ପୋଲିସ ୬ ଜଣ ଜୁଆଡିଙ୍କୁ ଗିରଫ କରିଛି । ସେମାନଙ୍କ ଠାରୁ ୧ ଲକ୍ଷ ୬୦ ହଜାରରୁ ଅଧିକ ଟଙ୍କା ସହ ୮ଟି ମୋବାଇଲ ଜବତ ହୋଇଛି । ଏନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଆସିକା ଏସଡିପିଓ ଉମାଶଙ୍କର ସିଂ । ଡେଙ୍ଗାଉସ୍ତା ସିଙ୍ଗିପୁର ରାସ୍ତାର ଏକ କଲଭର୍ଟରେ କିଛି ଯୁବକ ଆଇପିଏଲରେ ବେଟିଂ କରୁଥିବା ବେଳେ ଚଢ଼ାଉ କରିଥିଲା ପୋଲିସ । ସୂଚନା ପାଇ ପାଟପୁର ଆଇଆଇସିଙ୍କ ନେତୃତ୍ୱରେ ଏକ ଟିମ୍ ଚଢ଼ାଉ କରିଥିଲା । ଘଟଣାସ୍ଥଳରୁ ୬ ଜଣଙ୍କୁ ଗିରଫ କରାଯାଇଥିବା ବେଳେ, ଅନ୍ୟମାନଙ୍କୁ ଧରିବାକୁ ପୋଲିସ ଛାନବିନ୍ କରୁଛି ।

ଏଥିସହିତ ପଢ଼ନ୍ତୁ: କଳାହାଣ୍ଡିର ସୁନା ଝିଅ ସଲୋନୀ: ବାପାଙ୍କ ପାଇଁ କଲେ କିଡ଼ନୀ ଦାନ

 

ରାଜ୍ୟରେ ଆଉ ୪୪୪ଜଣ ସଂକ୍ରମିତ ଚିହ୍ନଟ: ୫ ଜଣଙ୍କ ଜୀବନ ନେଲା କରୋନା

ଭୁବନେଶ୍ୱର: ରାଜ୍ୟରେ ଆଉ ୪୪୪ ଜଣ କରୋନା ସଂକ୍ରମିତ ଚିହ୍ନଟ । ତେବେ ଗତ ୨୪ ଘଣ୍ଟା ମଧ୍ୟରେ ୫ ଜଣ କରୋନା ଆକ୍ରାନ୍ତ ପ୍ରାଣ ହରାଇଛନ୍ତି । ଏହାକୁ ମିଶାଇ ରାଜ୍ୟରେ ମୋଟ କରୋନା ଜନିତ ମୃତ୍ୟୁ ସଂଖ୍ୟା ୮୧୮୦ରେ ପହଞ୍ଚିଛି । ଏନେଇ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଟ୍ୱିଟ୍ ଯୋଗେ ସୂଚିତ କରାଯାଇଛି । ମୃତକଙ୍କ ମଧ୍ୟରେ ସୁନ୍ଦରଗଡ଼ ଜିଲ୍ଲାରୁ ୩ଜଣ ରହିଥିବା ବେଳେ ନବରଙ୍ଗପୁର ଜିଲ୍ଲାରୁ ୨ଜଣ ରହିଛନ୍ତି । ସୂଚନାଯୋଗ୍ୟ ଯେ, ରାଜ୍ୟରେ ବର୍ତ୍ତମାନ ସୁଦ୍ଧା ମୋଟ୍ ୧୦ ଲକ୍ଷ ୨୪ ହଜାର ୭୬୪ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏଥି ମଧ୍ୟରୁ ୫ ହଜାର ୭୦୨ଟି ଆକ୍ଟିଭ୍‌ କେସ୍‌ ରହିଥିବା ବେଳେ ୧ ଲକ୍ଷ ୧୦ ହଜାର ୮୨୯ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ଏବେ ସୁଦ୍ଧା ରାଜ୍ୟରେ ୧୯୭୮୯୨୨୨ ସାମ୍ପୁଲ ଟେଷ୍ଟ୍ ହୋଇଛି।

କଳାହାଣ୍ଡିର ସୁନା ଝିଅ ସଲୋନୀ: ବାପାଙ୍କ ପାଇଁ କଲେ କିଡ଼ନୀ ଦାନ

କଳାହାଣ୍ଡି: ଅନେକ ସମୟରେ ପିଲାମାନେ ବାପାମାଆଙ୍କର ବୃଦ୍ଧାବସ୍ଥାରେ ସେମାନଙ୍କୁ ହତାଦାର କରୁଥିବାର ଦୃଶ୍ୟ ଆପଣ ଦେଖିଛନ୍ତି । କିଛି ଦିନ ପୂର୍ବେ ବରଗଡ଼ ଜିଲ୍ଲାରେ ମାଆ ମୁଣ୍ଡରେ ଘା ହୋଇଥିବାରୁ ତାକୁ ଜଙ୍ଗଲରେ ଛାଡିଦେଇଥିଲେ ଜନ୍ମ କଲା ପିଲା । ହେଲେ ସବୁ ସନ୍ତାନ ସମାନ ନୁହଁନ୍ତି । ଏମିତି ଅନେକ ଅଛନ୍ତି ଯେଉଁମାନେ ବାପାମାଆଙ୍କର ଜୀବନ ପାଇଁ ନିଜ ଜୀବନ ମଧ୍ୟ ଦେବାକୁ ପ୍ରସ୍ତୁତ ଥାଆନ୍ତି । ସେଭଳିଆ ଜଣେ ସୁଯୋଗ୍ୟ ସନ୍ତାନ ହେଉଛନ୍ତି କଳାହାଣ୍ଡି ଜିଲ୍ଲା କୋକସରା ବ୍ଳକ୍ ଲଡ଼ୁଗାଁର ଝିଅ ସାଲୋନୀ । ଯାହାଙ୍କ ବିଷୟରେ ଜାଣିଲା ପରେ ହୁଏ ତ ଆପଣ ବି କହିବେ ଝିଅ ହେବ ତ ଏମିତି ।

ସାଲୋନୀ କୁହନ୍ତି ଯେ, ମୁଁ ତ ବଞ୍ଚିଛି, ମୋ ବାପାଙ୍କର ଅସୁବିଧା କାହିଁ ହେବ ? ସେ ମୋ ଅଳି ଶୁଣିଛନ୍ତି, ଦାବିକୁ ମାନିଛନ୍ତି । କୁନି ହାତ ଧରି ଚାଲିବା ଶିଖେଇଛନ୍ତି । ମଣିଷଟିଏ କରି ଗଢି ତୋଳିଛନ୍ତି । ଆଜି କେମିତି ମୁଁ ତାଙ୍କ ପାଇଁ ଅସହାୟ ହେଇଯିବି ? କେମିତି ମୋ ବାପାଙ୍କୁ ଏକା ଏକା ଅବସାଦର ସାଗରରେ ଛାଡିଦେଇପାରିବି । ଯିଏ ଦିନେ କାନ୍ଧରେ ଧରି ବୁଲାଉଥିଲା ତା ପାଇଁ ମୁଁ କ’ଣ କିଡନୀ ଟିଏ ଦେଇପାରିବିନି ।

କଳାହାଣ୍ଡି ଜିଲ୍ଲା କୋକସରା ବ୍ଲକ ଲଡୁଗାଁର ଏ କାହାଣୀ ଶୁଣିଲେ ଆପଣବି କହିବେ, ସଲୋନି ତତେ ଶହେ ସଲାମ୍ । ୪୭ବର୍ଷୀୟ ବାପାଙ୍କୁ ନିଜ କୀଡନୀ ଦେଇ ଝିଅ ସଲୋନୀ ଦେଇଛି ସ୍ନେହଁ, ପ୍ରେମ ଆଉ ବନ୍ଧନର ନିଆରା ନିଦର୍ଶନ । ଆଉ ସମାଜ ପାଇଛି ପରିବାର ପ୍ରତି ଗୋଟେ ଝିଅର ପରାକାଷ୍ଠା ।  ଲଡୁଗାଁର ସୁନିଲ ଗର୍ଗଙ୍କ ଦୀର୍ଘଦିନ ଧରି କିଡନୀ ରୋଗରେ ପିଡୀତ ଥିଲେ । କିଛିମାସ ତଳେ ତାଙ୍କର ଉଭୟ କିଡନୀ ଖରାପ ହୋଇଥିବା ଜଣାପଡିବା ପରେ ଜୀବନ ବଞ୍ଚାଇବାକୁ କିଡନୀ ପ୍ରତ୍ୟାରୋପଣ କରିବାକୁ ଡାକ୍ତର ପରାମର୍ଶ ଦେଇଥିଲେ । ମାତ୍ର କିଡନୀ ଯୋଗାଡ ହୋଇପାରୁନଥିବାବେଳେ ବାପାଙ୍କ ଜୀବନ ପାଇଁ ଆଗକୁ ଆସିଥିଲେ ୨୨ବର୍ଷୀୟ ଝିଅ ସଲୋନୀ । ପରିବାରର ଲୋକଙ୍କ ବିରୋଧ ପରେ ମଧ୍ୟ ଶେଷରେ କିଡନୀ ଦେଇ ଜନ୍ମ ଦେଇଥିବା ବାପାଙ୍କୁ ନୂଆ ଜୀବନ ଦେଲେ ସଲୋନୀ । କିଡନୀ ପ୍ରତ୍ୟାରୋପଣ ପରେ ଏବେ ଉଭୟ ବାପ-ଝିଅ ସୁସ୍ଥ ଅଛନ୍ତି । ସମାଜରେ ଅନେକ ସମୟରେ ଝିଅଙ୍କୁ ଅବହେଳା କରାଯାଏ । ପରିବାରର ବୋଝ ଭାବି କେତେକ ଝିଅକୁ ହୀନ ଦୃଷ୍ଟିରେ ଦେଖନ୍ତି । ମାତ୍ର ସଲୋନୀଙ୍କ ଏ ମହାନ କାର୍ଯ୍ୟ ଆଜି ସମାଜକୁ ନୂଆ ବାର୍ତ୍ତା ଦେଇଛି ।