spot_img
Home Blog Page 5308

ଚନ୍ନିଙ୍କ ନେତୃତ୍ୱରେ କ୍ୟାବିନେଟର ସମ୍ପ୍ରସାରଣ ଆରମ୍ଭ, ମନ୍ତ୍ରୀପଦର ଶପଥ ନେଉଛନ୍ତି ବିଧାୟକ

ଚଣ୍ଡିଗଡ଼: ପଞ୍ଜାବର ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନିଙ୍କ ନେତୃତ୍ୱରେ କ୍ୟାବିନେଟର ସମ୍ପ୍ରସାରଣ ଆରମ୍ଭ ହୋଇଛି। ନୂତନ ମନ୍ତ୍ରିମଣ୍ଡଳରେ ବ୍ରହ୍ମ ମୋହିନ୍ଦ୍ରା ଏବଂ ମନପ୍ରୀତ ସିଂ ବାଦଲଙ୍କୁ ସାମିଲ କରାଯାଇଛି। ଏହା ସହିତ ତୃପ୍ତ ରାଜିନ୍ଦର ବାଜୱା, ଅରୁଣା ଚୌଧୁରୀ, ସୁଖବିନ୍ଦର ସିଂ ସାର୍କରିଆ ଏବଂ ରାଣା ଗୁରୁଜିତ ସିଂ ମଧ୍ୟ ନୂତନ କ୍ୟାବିନେଟରେ ସ୍ଥାନ ପାଇଛନ୍ତି। ଚରଣଜିତ ସିଂ ଚନ୍ନିଙ୍କ ନୂଆ କ୍ୟାବିନେଟରେ ରଜିଆ ସୁଲତାନା, ବିଜୟ ଇନ୍ଦର ସିଙ୍ଗଲା, ଭାରତ ଭୂଷଣ ଆଶୁ, ରଣଦୀପ ସିଂ ନାଭାଙ୍କୁ ମଧ୍ୟ ସୁଯୋଗ ଦିଆଯାଇଛି। ଏହା ପରେ ରାଜକୁମାର ବେରକା, ସଙ୍ଗତ ଗିଲଜିଆନ୍ ଏବଂ ପରଗଟ୍ ସିଂ ମଧ୍ୟ ମନ୍ତ୍ରୀ ଭାବରେ ଶପଥ ଗ୍ରହଣ କରିଥିଛନ୍ତି।

କାର୍ଯ୍ୟସୂଚୀ ଅନୁଯାୟୀ ଅପରାହ୍ନ ୪ଟା ୩୦ରୁ ରାଜ ଭବନରେ ମନ୍ତ୍ରୀଙ୍କ ଶପଥ ଗ୍ରହଣ ସମାରୋହ ଆୟୋଜିତ ହୋଇଥିଲା। ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ଶନିବାର ଦିନ ନୂଆ କ୍ୟାବିନେଟରେ ଅନ୍ତର୍ଭୁକ୍ତ ହେବାକୁ ଥିବା ଚେହେରା ସମ୍ପର୍କରେ ଦିଲ୍ଲୀର ପାର୍ଟି ହାଇକମାଣ୍ଡଙ୍କ ସହ ଶେଷ ପର୍ଯ୍ୟାୟ ଆଲୋଚନା କରିଥିଲେ। ମନ୍ତ୍ରୀଙ୍କ ଅନ୍ତିମ ତାଲିକା ପ୍ରସ୍ତୁତ ହେବା ପରେ ମୁଖ୍ୟମନ୍ତ୍ରୀ ଚନ୍ନି ଶନିବାର ଅପରାହ୍ନ ପ୍ରାୟ ୧୨ଟା ୩୦ ମିନିଟ ସମୟରେ ରାଜ ଭବନରେ ରାଜ୍ୟପାଳ ବନୱାରିଲାଲ ପୁରୋହିତଙ୍କୁ ଭେଟିଥିଲେ। ଯାହା ପରେ ଶପଥ ଗ୍ରହଣ ତାରିଖ ସ୍ଥିର କରାଯାଇଥିଲା।

୧୬ ବର୍ଷ ପରେ ଅବସର ନେବେ ଚାନ୍ସଲର ଏଞ୍ଜେଲା ମର୍କେଲ, ଜାଣନ୍ତୁ ଭାରତ ପାଇଁ କେତେ ଗୁରୁତ୍ୱପୂର୍ଣ୍ଣ ଏହି ନିର୍ବାଚନ

ବର୍ଲିନ୍‌: ୧୬ ବର୍ଷ ପରେ ବଦଳିବାକୁ ଯାଉଛି ଶାସନ ଭାର। ୧୬ ବର୍ଷ କାଳ ଏକଛତ୍ର ଶାସନ ପରେ ଅବସର ନେବାକୁ ଯାଉଛନ୍ତି ଜର୍ମାନୀ ଚାନ୍ସଲର ଏଞ୍ଜେଲ ମର୍କେଲ। ତେବେ ଏହାରି ଭିତରେ ୨୬ ସେପ୍ଟେମ୍ବରରେ ଜର୍ମାନୀରେ ହେବାକୁ ଯାଉଛି ସାଧାରଣ ନିର୍ବାଚନ। ଏହି ନିର୍ବାଚନରେ ​​ଭୋଟରଙ୍କ ମନରେ ଏକମାତ୍ର ପ୍ରଶ୍ନ ଉଙ୍କି ମାରିବାରେ ଲାଗିଛି। ୟୁରୋପର ବୃହତ୍ତମ ଅର୍ଥନୀତି ଉପରେ କିଏ ଆସିବ ବୋଲି ସମସ୍ତଙ୍କ ମନରେ ଗୋଟିଏ ପ୍ରଶ୍ନ। ଜର୍ମାନୀର ଏହି ସାଧାରଣ ନିର୍ବାଚନ ଦେଶର ସ୍ଥିରତା ଏବଂ ୟୁରୋପୀୟ ସଂଘ ଉପରେ ମଧ୍ୟ ପ୍ରଭାବ ପକାଇବ। ଏଥର ନିର୍ବାଚନରେ ​​ଆଞ୍ଜେଲା ମର୍କେଲ ଛିଡା ହୋଇ ନାହାଁନ୍ତି। ଜର୍ମାନ ଇତିହାସରେ ପ୍ରଥମ ଥର ପାଇଁ ମର୍କେଲ ବୋର୍ପୋମର୍ନ-ରୁଗେନ-ବୋର୍ପୋମର୍ନ-ଗ୍ରିଫସୱାଲ୍ଡ ସଂସଦୀୟ ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀ ହେବେ ନାହିଁ। ଯଦି ଦେଖିବା ତେବେ ୧୯୯୦ରେ ପୂର୍ବ ଜର୍ମାନୀ ଯୋଡ଼ି ହେବା ପରେ ସେ କ୍ରମାଗତ ଭାବରେ ପ୍ରତିନିଧିତ୍ୱ କରିଆସୁଥିଲେ।

ରବିବାର ଦିନ ମତଦାନ ମର୍କେଲଙ୍କ ମଧ୍ୟ-ଦକ୍ଷିଣପନ୍ଥି ଦଳ ୟୁନିଅନ୍ ବ୍ଲକ୍ ଏବଂ ମଧ୍ୟ-ବାମପନ୍ଥି ଦଳ ସୋସିଆଲ୍ ଡେମୋକ୍ରାଟ୍ସ ମଧ୍ୟରେ ଏକ ବଡ଼ ପ୍ରତିଯୋଗିତା ହେବ ବୋଲି ପରିଲକ୍ଷିତ କରାଯାଇଛି। ୟୁନିଅନ ବ୍ଲକର ଚାନ୍ସଲର ପଦ ପାଇଁ ଆରମିନ ଲାସ୍କେଟ୍ ନିର୍ବାଚନୀ ଦୌଡ଼ରେ ରହିଛନ୍ତି। ଅନ୍ୟପଟେ ବିଦାୟୀ ଅର୍ଥମନ୍ତ୍ରୀ ତଥା ଉପ ଚାନ୍ସଲର ଓଲାଫ ସ୍କୋଲଜ ଅନ୍ୟ ପକ୍ଷରୁ ପ୍ରାର୍ଥୀ ହୋଇଛନ୍ତି।

ଏକ ସର୍ଭେରୁ ଜଣାପଡିଛି ଯେ ସୋସିଆଲ୍ ଡେମୋକ୍ରାଟ୍ସ ସାମାନ୍ୟ ଆଗରେ ରହିଛି। ପ୍ରାୟ ୮.୩ କୋଟି ଜନସଂଖ୍ୟା ବିଶିଷ୍ଟ ଦେଶରେ ପ୍ରାୟ ୬.୦୪ କୋଟି ଲୋକ ସଂସଦର ନିମ୍ନ ଗୃହର ସଦସ୍ୟ ଚୟନ କରିବାକୁ ଯୋଗ୍ୟ ଅଟନ୍ତି। ଯେଉଁମାନେ ସରକାରର ମୁଖ୍ୟଙ୍କ ଚୟନ କରିଥାନ୍ତି। ସେପଟେ ସର୍ଭେରେ ଜଣାପଡ଼ିଛି, ନିର୍ବାଚନରେ ​​କୌଣସି ଦଳ ସ୍ପଷ୍ଟ ସଂଖ୍ୟାଗରିଷ୍ଠତା ହାସଲ କରୁନାହିଁ। ଯଦି ସରକାର ହୁଏ ତେବେ ମିଳିତ ସରକାର ହିଁ ସମ୍ଭବ। ଏବଂ ଏହି କ୍ରମରେ ଏକ ନୂତନ ସରକାର ଗଠନ ପାଇଁ ଅନେକ ସପ୍ତାହ କିମ୍ବା ମାସ ସମୟ ମଧ୍ୟ ଲାଗିପାରେ। ତେଣୁ ନୂଆ ସରକାର ଗଠନ ନହେବା ପର୍ଯ୍ୟନ୍ତ ମର୍କେଲ କାର୍ଯ୍ୟନିର୍ବାହୀ ମୁଖ୍ୟ ରହିବେ।

ୟୁରୋପରେ ଜର୍ମାନୀ ହେଉଛି ଭାରତର ସବୁଠାରୁ ବଡ ବାଣିଜ୍ୟ ଭାଗିଦାରୀ। ଏହା ସବୁଠାରୁ ବଡ ବିଦେଶୀ ପ୍ରତ୍ୟକ୍ଷ ନିବେଶକମାନଙ୍କ ମଧ୍ୟରୁ ଅନ୍ୟତମ। ଭାରତରେ ୧୭୦୦ ରୁ ଅଧିକ ଜର୍ମାନ କମ୍ପାନୀ କାର୍ଯ୍ୟ କରୁଛନ୍ତି। ଜର୍ମାନୀ ପ୍ରତ୍ୟକ୍ଷ ଏବଂ ପରୋକ୍ଷ ଭାବରେ ପ୍ରାୟ ୪ଲକ୍ଷ ଲୋକଙ୍କୁ ଚାକିରି ପ୍ରଦାନ କରିଛି। ଜର୍ମାନୀରେ ଶହ ଶହ ଭାରତୀୟ ବ୍ୟବସାୟ ସକ୍ରିୟ ରହିଛି। ଆଇଟି, ଅଟୋମୋବାଇଲ୍ ଏବଂ ଫାର୍ମା କ୍ଷେତ୍ରରେ କୋଟି କୋଟି ୟୁରୋ ବିନିଯୋଗ କରିଛି। ଯଦି ଦେଖିବା ତେବେ ଏପର୍ଯ୍ୟନ୍ତ ୟୁରୋପୀୟ ସଂଘ ଏବଂ ଭାରତ ମଧ୍ୟରେ ଏକ ମୁକ୍ତ ବାଣିଜ୍ୟ ଚୁକ୍ତି ହୋଇନାହିଁ। ଚଳିତ ବର୍ଷ ମେ ମାସରେ ୟୁରୋପୀୟ କମିଶନ ଏବଂ ଭାରତ ସରକାର ୨୦୧୩ ମସିହାରୁ ଅଟକି ରହିଥିବା FTA ଉପରେ ଆଲୋଚନା ଆରମ୍ଭ କରିବାକୁ ଇଚ୍ଛା ପ୍ରକାଶ କରିଥିଲେ। ଅର୍ଥନୀତି ବ୍ୟତୀତ ଜର୍ମାନୀ ମଧ୍ୟ ଭାରତ ପାଇଁ ରଣନୈତିକ ଗୁରୁତ୍ୱପୂର୍ଣ୍ଣ ଅଂଶୀଦାର ଅଟେ।

କଳିଙ୍ଗାପାଟନମ୍-ଗୋପାଳପୁର ଦେଇ ଗତି କରିବ ଗୁଲାବ: ପବନର ବେଗ ସର୍ବାଧିକ ୯୫ କିମି ରହିପାରେ

ଭୁବନେଶ୍ୱର: ଗୋପାଳପୁରର ନିକଟତର ହେଉଛି ବାତ୍ୟା ଗୁଲାବ । ପାଣିପାଗ ବିଭାଗର ଅପଡେଟ ଯାହା ରହିଛି ଏବେ ଗୋପାଳପୁର ଠାରୁ ପୂର୍ବ ଦକ୍ଷିଣ ପୂର୍ବ ଦିଗକୁ ୧୦୦କିଲୋମିଟର ଦୂରରେ ରହିଛି । ସେହିପରି କଳିଙ୍ଗପଟନମର ପୂର୍ବ ଓ ଉତ୍ତର ପୂର୍ବ ଦିଗକୁ 105 କିଲୋମିଟର ଦୂରରେ ରହିଛି ।24 କିଲୋମିଟର ବେଗରେ ଉତ୍ତରପଶ୍ଚିମ ଦିଗରେ ଗତି କରୁଛି ବାତ୍ୟା ।କାଲିଙ୍ଗାପାଟନମ୍ ଏବଂ ଗୋପାଳପୁର ମଧ୍ୟରେ ଅତିକ୍ରମ କରିବାର ସମ୍ଭାବନା ରହିଛି। ଆଂଚଳିକ ପାଣିପାଗ ବିଜ୍ଞାନ କେନ୍ଦ୍ରର ତାଜା ବୁଲେଟିନ ମୁତାବକ, ସନ୍ଧ୍ୟା ସମୟରେ ଆରମ୍ଭ ହେବ ‘ବାତ୍ୟା ଗୁଲାବ’ର ଲ୍ୟାଣ୍ଡଫଲ ପ୍ରକ୍ରିୟା । ଲ୍ୟାଣ୍ଡଫଲ ପ୍ରଭାବରେ ପବନର ବେଗ ୭୫ରୁ ୮୫ କିଲୋମିଟର ରହିବ । ସମୟ ସମୟରେ ୯୫ କିଲୋମିଟର ବେଗରେ ଝଟକା ଅନୁଭୁତ ହେବ । ଏହାର ପ୍ରଭାବ ଗଜପତି ଓ ଗଂଜାମ ଉପରେ ପବନର ବେଗ ଅଧିକ ରହିବ ।ଗୋପାଳପୁର ବନ୍ଦର ପାଇଁ ବିପଦ ସଂକେତ ୭ , ପୁରୀ ପାଇଁ ବିପଦ ସଂକେତ ୬ ଓ ପାରାଦ୍ୱୀପ ଏବଂ ଧାମରା ବନ୍ଦର ଗୁଡିକ ପାଇଁ ବିପଦ ସଂକେତ ୩ ଜାରି କାରାଯାଇଛି।

 

ଅକ୍ଷୟ କୁମାରଙ୍କ ଫଟୋ ଦେଖି ରାଗିଗଲେ IPS ଅଧିକାରୀ, କହିଲେ ‘ଏସେ ନେହିଁ ହୋତା ହେ ଜନାବ’

ମହାରାଷ୍ଟ୍ର: ମହାରାଷ୍ଟ୍ର ମୁଖ୍ୟମନ୍ତ୍ରୀ ସିନେମା ହଲ ଖୋଲିବା ନେଇ ଘୋଷଣା ପରେ ସୋସିଆଲ ମିଡିଆରେ ଟ୍ୱିଟ୍‌ ଝଡ଼। ବଲିଉଓ ଅଭିନେତା ଅକ୍ଷୟ କୁମାରଙ୍କ ଟ୍ୱିଟ୍‌କୁ ଟାର୍ଗେଟ କରିଛନ୍ତି ଛତିଶଗଡର ସ୍ପେଶାଲ୍ ଡିଜିପି ଆର.କେ ବିଜ। ଆସନ୍ତା ଅକ୍ଟୋବର୨୨ରୁ ପୁରା ମହାରାଷ୍ଟ୍ରରେ ଖୋଲିବାକୁ ଯାଉଛି ସିନେମା ହଲ। ଏହି ଘୋଷଣା ପରେ କେବଳ ସିନେମା ପ୍ରେମୀ ନୁହଁନ୍ତି ତାରକା ଏବଂ ଚଳଚ୍ଚିତ୍ର ନିର୍ମାତା ମଧ୍ୟ ବହୁତ ଖୁସି। ବର୍ତ୍ତମାନ ଆସନ୍ତା ମାସରୁ ବକ୍ସ ଅଫିସରେ ପୁରା ଧମାଲ ହେବାକୁ ଯାଉଛି।

ଏଭଳି ଘୋଷଣା ପରେ ବଲିଉଡ ହିରୋ ଚଳଚ୍ଚିତ୍ର ନିର୍ମାତା ରୋହିତ ଶେଟ୍ଟୀ ସୋସିଆଲ ମିଡିଆରେ ଏକ ପୋଷ୍ଟ ଲେଖି ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି। ଏହା ପରେ ଅକ୍ଷୟ କୁମାର ତାଙ୍କ ଫିଲ୍ମ ‘ସୂର୍ଯ୍ୟବଂସି’ ବିଷୟରେ ଏକ ଟ୍ୱିଟ୍ କରିଛନ୍ତି। ଯାହାକୁ ଦେଖିବା ପରେ ଛତିଶଗଡର ସ୍ପେଶାଲ୍ ଡିଜିପି ଆର.କେ ବିଜ ଅକ୍ଷୟଙ୍କ ପୋଷ୍ଟରେ ତାତ୍ସଲ୍ୟ କରିଛନ୍ତି। ସେ ରି ଟୁଇଟ କରି ତାତ୍ସଲ୍ୟ କରି ଲେଖିଛନ୍ତି ଯେ ‘ଏସେ ନେହିଁ ହୋତାହେ ଜନାବ’। ଏହା ପରେ ଅକ୍ଷୟ କୁମାର ମଧ୍ୟ ତାଙ୍କ ଟ୍ୱିଟ୍‌ର ଉତ୍ତର ଦେଇଛନ୍ତି।

ମହାରାଷ୍ଟ୍ର ଖୋଲିବା ଘୋଷଣା ହେବା ପରେ ଅକ୍ଷୟ କୁମାର ଏକ ଟ୍ୱିଟ୍ କରି ଲେଖିଛନ୍ତି, ‘ଅନେକ ପରିବାର ଆଜି ଉଦ୍ଧବ ଠାକରେଙ୍କୁ ଧନ୍ୟବାଦ ଦେବେ! ୨୨ ଅକ୍ଟୋବରରୁ ମହାରାଷ୍ଟ୍ରର ସିନେମା ହଲ୍ ଖୋଲିବାକୁ ଅନୁମତି ଦେଇଥିବାରୁ ସମସ୍ତେ କୃତଜ୍ଞ। ଏହି ଟ୍ୱିଟ୍ ମାଧ୍ୟମରେ ସେ ଏକ ଫଟୋ ସେୟାର କରିଛନ୍ତି ଯେଉଁଥିରେ ଅକ୍ଷୟ କୁମାର, ଅଜୟ ଦେବଗନ୍, ରଣଭୀର ସିଂ ଏବଂ ନିର୍ଦ୍ଦେଶକ ରୋହିତ ଶେଟ୍ଟୀ ନଜର ଆସିଛନ୍ତି। ଫଟୋରେ ସ୍ପଷ୍ଟ ଜଣାପଡୁଛି ଯେ ଇନ୍ସପେକ୍ଟର ଭୂମିକାରେ ଅଭିନୟ କରୁଥିବା ରଣଭୀର ସିଂ ଟେବୁଲ ଉପରେ ବସିଥିବାବେଳେ ବରିଷ୍ଠ ଅଧିକାରୀ ଭୂମିକାରେ ଅଭିନୟ କରୁଥିବା ଅକ୍ଷୟ କୁମାର ଏବଂ ଅଜୟ ଦେବଗାନ୍ ଠିଆ ହୋଇଛନ୍ତି।

ସେପଟେ ଏହି ଫଟୋକୁ ଦେଖି ଡିଜିପି ଆର.କେ ବିଜ ଟ୍ୱିଟକୁ ରିଟ୍ୱିଟ କରି ଅକ୍ଷୟ କୁମାରଙ୍କୁ ଏକ ମଜାଦାର କ୍ୟାପସନ୍‌ ଲେଖିଛନ୍ତି। ସ୍ୱତନ୍ତ୍ର ଡିଜିପି ଆର.କେ ବିଜଙ୍କ ଟ୍ୱିଟକୁ ଜବାବ ଦେଇ ଅଭିନେତା ଅକ୍ଷୟ କୁମାର କହିଛନ୍ତି- ‘ଜନାବ, ଏହା ହେଉଛି ସୁଟିଂ ପଛର ଫଟୋ। ଆମ କଳାକାରମାନଙ୍କ ପାଇଁ, କ୍ୟାମେରା ଅନ୍ ହେବା ମାତ୍ରେ ଆମେ ଆମ ପ୍ରୋଟୋକଲକୁ ଫେରିଆସୁ। ଆମ ହିରୋ ପୋଲିସ୍‌ ମାନଙ୍କୁ ଆମର ସର୍ବଦା ନମସ୍କାର। ଆଶା କରେ ଯେତେବେଳେ ତୁମେ ଫିଲ୍ମ ଦେଖିବ ତୁମେ ଏହାକୁ ପସନ୍ଦ କରିବ। ବର୍ତ୍ତମାନ ଅକ୍ଷୟଙ୍କ ଏହି ଟ୍ୱିଟ୍ ମଧ୍ୟ ବହୁତ ଭାଇରାଲ ହେବାରେ ଲାଗିଛି।

ଗୋପାଳପୁର ଠାରୁ ୧୧୦ କିମି ଦୂରରେ ବାତ୍ୟା ‘ଗୁଲାବ’

ଭୁବନେଶ୍ୱର: ଉତ୍ତରପଶ୍ଚିମ ଓ ତତସଂଲଗ୍ନ ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟ ସାମୁଦ୍ରିକ ଝଡ଼ ’ଗୁଲାବ’ ମାଡ଼ି ଆସୁଛି । ’ଗୁଲାବ’ ପାଇଁ ଉତ୍ତର ଆନ୍ଧ୍ରପ୍ରଦେଶ ଓ ଦକ୍ଷିଣ ଓଡ଼ିଶା ଉପକୂଳକୁ ରେଡ୍ ଆଲର୍ଟ ଜାରି କରାଯାଇଛି । ବାତ୍ୟା ’ଗୁଲାବ’ ଏବେ ପଶ୍ଚିମ ଆଡ଼କୁ ଘଣ୍ଟା ପ୍ରତି ୧୯ କିଲୋମିଟର ବେଗରେ ବିଗତ ୬ ଘଣ୍ଟା ହେଲା ଗତି କରୁଛି ।

ଗୋପାଳପୁର ଠାରୁ ପୂର୍ବ-ଦକ୍ଷିଣ ପୂର୍ବରେ ୧୧୦ କିମି ଦୂରରେ ବାତ୍ୟା ’ଗୁଲାବ’ରହିଥିବା ବେଳେ କଳିଙ୍ଗପାଟଣମ ଠାରୁ ପୂର୍ବ-ଉତ୍ତର ପୂର୍ବରେ ୧୩୦ କିମି ଦୂରରେ ରହିଛି । ଏହା କ୍ରମଶଃ ପଶ୍ଚିମ ଦିଗରେ ଗତି କରି ବିଳମ୍ବିତ ରାତିରେ କଳିଙ୍ଗପାଟଣମ ଓ ଗୋପାଳପୁର ମଧ୍ୟରେ ସ୍ଥଳଭାଗ ଛୁଇଁପାରେ । ବାତ୍ୟା ’ଗୁଲାବ’ ଅତିକ୍ରମ କଲା ବେଳେ ପବନର ବେଗ ଘଣ୍ଟାପ୍ରତି ୭୫ରୁ ୮୫ କିଲୋମିଟର ରହିବ । ଝଟକା ପବନର ଘଣ୍ଟାପ୍ରତି ବେଗ ୯୫ କିଲୋମିଟର ରହିପାରେ । ଲ୍ୟାଣ୍ଡଫଲ୍ ପ୍ରକ୍ରିୟା ସନ୍ଧ୍ୟା ପରେ ଆରମ୍ଭ ହେବ ।

ବାତ୍ୟା ନେଇ ଦକ୍ଷିଣ ଓଡ଼ିଶାର ୭ଟି ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି କରାଯାଇଛି । ଗଞ୍ଜାମ, ଗଜପତି, କନ୍ଧମାଳ, ରାୟଗଡ଼ା, ନବରଙ୍ଗପୁର, କୋରାପୁଟ ଓ ମାଲକାନଗିରି ଜିଲ୍ଲାରେ ଗତ ରାତିରୁ ବର୍ଷା ଆରମ୍ଭ ହୋଇଯାଇଛି । ସେହିଭଳି ପୁରୀ, ଖୋର୍ଦ୍ଧା, ନୟାଗଡ଼ ଓ କଳାହାଣ୍ଡି ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଦିଆଯାଇଛି । ପ୍ରବଳ ବର୍ଷା ନେଇ ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, ଯାଜପୁର, କଟକ, ବୌଦ୍ଧ, ସୋନପୁର, ବଲାଙ୍ଗିର ଓ ନୂଆପଡ଼ା ଜିଲ୍ଲାକୁ ୟେଲୋ ଆଲର୍ଟ ଦିଆଯାଇଛି ।

ସମୁଦ୍ର ଅଶାନ୍ତ ରହୁଥିବାରୁ ୨୭ ତାରିଖ ଯାଏଁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି । ଗୋପାଳପୁର ବନ୍ଦରରେ ୭ ନମ୍ବର ବିପଦ ସଂକେତ ଦିଆଯାଇଛି । ପୁରୀ ବନ୍ଦରରେ ୬ ନମ୍ବର ବିପଦ ସଂକେତ ଦିଆ ଯାଇଥିବା ବେଳେ ପାରାଦୀପ ଓ ଧାମରାରେ ୩ ନମ୍ବର ବିପଦ ସଂକେତ ରହିଛି । ବାତ୍ୟା ସ୍ଥଳଭାଗ ଛୁଇଁବା ବେଳେ ୦.୫ ମିଟରର ଜୁଆର ଆସିବାର ଆଶଙ୍କା ରହିଛି ।

ମାଟି ଅତଡ଼ା ଖସି ରାସ୍ତା ଅବରୋଧ, ସେପଟେ ଜାରି ରହିଛି ସ୍ଥାନାନ୍ତରଣ

ପାରଳାଖେମୁଣ୍ଡି: ବାତ୍ୟା ‘ଗୁଲାବ’ ମାଡ଼ି ଆସୁଛି । ପ୍ରଭାବରେ ଦକ୍ଷିଣ ଓଡ଼ିଶାରେ ପ୍ରବଳରୁ ଅତିପ୍ରବଳ ବର୍ଷା ହେଉଛି । ଗଜପତି ଜିଲ୍ଲା ଗୁମ୍ମା ବ୍ଲକର ନାମନଗଡ଼ ଠାରୁ ଅଜୟଗଡ଼ ରାସ୍ତାରେ ମାଟି ଅତଡ଼ା ଧସିଛି । ଫଳରେ ରାସ୍ତା ଅବରୋଧ ହୋଇଛି । ନାମନଗଡ଼ ଠାରୁ ଅଜୟଗଡ଼ ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଥିବା ବେଳେ ପ୍ରଶାସନ ନଜର ରଖିଛି ।

Cyclone Gulab, Namangarh To Ajaygarh Road Blocked After Landslide

ବାତ୍ୟାରେ ଗୋଷାଣୀ ଓ ରାୟଗଡ଼ ବ୍ଲକ ବେଶି ପ୍ରଭାବିତ ହେବା ସମ୍ଭାବନା ରହିଛି । ଜିଲ୍ଲାର ୩୮ ପ୍ରଭାବିତ ଗାଁରୁ ୧୬ ଶହ ୩୭ ଜଣଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି । ଗୋଷାଣୀରୁ ୪୦ ଜଣ, ଗୁମ୍ମାରୁ ୧୮୫ ଜଣ, କ୍ରିଷ୍ଣାନଗରରୁ ୯୦ ଜଣ, ମୋହନାରୁ ୩୫୭ ଜଣ, ନୂଆଗଡ଼ରୁ ୯୩ ଜଣ, ରାୟଗଡ଼ରୁ ୮୪୦ ଜଣ ଲୋକଙ୍କୁ ସ୍ଥାନାନ୍ତର କରାଯାଇଛି ।

Cyclone Gulab, Namangarh To Ajaygarh Road Blocked After Landslide

ବାତ୍ୟା ‘ଗୁଲାବ’ପାଇଁ ଗଜପତି ଜିଲ୍ଲାରେ ୩ ଓଡ୍ରାଫ ଟିମ୍ ପହଞ୍ଚି ମୁକାବିଲା ପାଇଁ ପ୍ରସ୍ତୁତ ହୋଇଛନ୍ତି । ଜରୁରୀକାଳୀନ ସ୍ଥିତିର ମୁକାବିଲା ପାଇଁ ୩ଟି ଓଡ୍ରାଫ୍ ଟିମକୁ ପ୍ରଶାସନ ପକ୍ଷରୁ ମୁତୟନ କରାଯାଇଛି । ଜିଲ୍ଲାର ସମ୍ବେଦନଶୀଳ ଅଞ୍ଚଳରେ ଏହି ଟିମ୍ ଗୁଡ଼ିକୁ ମୁତୟନ କରାଯିବ । ଜିଲ୍ଲାର ସମସ୍ତ ସ୍କୁଲ, ଅଙ୍ଗନୱାଡ଼ି କେନ୍ଦ୍ର ଖୋଲି କର୍ମଚାରୀ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି ।

ଆଉ ମାତ୍ର ୧୩ ରନ୍‌ ହାସଲ କରିବା ପରେ ବିରାଟ କୋହଲି ହୋଇଯିବେ ଏହି ବଡ଼ ସଫଳତାର ଅଧିକାରୀ…

ନୂଆଦିଲ୍ଲୀ: ବିରାଟ କୋହଲିଙ୍କ ଅଧିନାୟକତ୍ୱରେ ଆରସିବି ଏପର୍ଯ୍ୟନ୍ତ ଆଇପିଏଲ୍ ୨୦୨୧ର ଦ୍ୱିତୀୟ ପର୍ଯ୍ୟାୟରେ କିଛି ବିଶେଷ ପ୍ରଦର୍ଶନ କରିବାରେ ସକ୍ଷମ ହୋଇ ନାହିଁ। ଚଳିତ ବର୍ଷ IPLରେ କୋଲକାତା ନାଇଟ୍ ରାଇଡର୍ସ ଏବଂ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ଆରସିବି ପରାଜୟର ସମ୍ମୁଖୀନ ହୋଇଛି। କୋହଲି କେକେଆର ବିପକ୍ଷରେ ମାତ୍ର ୫ ରନ୍ ସ୍କୋର କରିବାରେ ସକ୍ଷମ ହୋଇଥିବାବେଳେ ଚେନ୍ନାଇ ବିପକ୍ଷରେ ସେ ୫୩ ରନର ଚମତ୍କାର ଇନିଂସ ଖେଳିଥିଲେ।

ତେବେ ବିରାଟ ଏବେ ଟି -୨୦ କ୍ରିକେଟରେ ଏକ ବଡ଼ ସଫଳତା ହାତେଇବାକୁ ଯାଉଛନ୍ତି। କୋହଲି ଆଉ ମାତ୍ର ୧୩ ରନ୍‌ କରିଲେ ହୋଇଯିବ ଭାରତୀୟ ଭାବରେ ପ୍ରଥମ ବ୍ୟାଟ୍ସମ୍ୟାନ୍ ଯିଏକି ପ୍ରଥମ ଥର  ୧୦ ହଜାର ରନ୍ ପୂରଣ କରିବେ। ରବିବାର ଦିନ ସେ ସବୁଠାରୁ ସଫଳ ଆଇପିଏଲ୍ ଦଳ ତଥା ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ସହ ମୁହାଁମୁହିଁ ହେବେ।

କୋହଲି ବର୍ତ୍ତମାନ ୩୧୩ ଟି -୨୦ ମ୍ୟାଚରେ ୯ ହଜାର ୯୮୭ ରନ୍ କରିଛନ୍ତି। ଏପର୍ଯ୍ୟନ୍ତ କେବଳ ଚାରିଜଣ କ୍ରିକେଟର ଏହି ସଫଳତା ହାସଲ କରିବାରେ ସକ୍ଷମ ହୋଇଛନ୍ତି। ଟି -୨୦ କ୍ରିକେଟରେ କ୍ରିସ ଗେଲ, କିରନ ପୋଲାର୍ଡ, ଶୋଏବ ମଲିକ ଏବଂ ଡେଭିଡ ୱାର୍ନର ୧୦ ହଜାରରୁ ଅଧିକ ରନ୍ ସଂଗ୍ରହ କରିଛନ୍ତି। ୩୧୩ ଟି  ଟି -୨୦ ମ୍ୟାଚରେ କୋହଲି ଭାରତ ପାଇଁ ୯୦ ଟି ଆଇପିଏଲ୍ ମ୍ୟାଚ୍ ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ୨୦୧ଟି ଆଇପିଏଲ୍ ମ୍ୟାଚ୍ ଖେଳିଛନ୍ତି।

କୋହଲି ଅନ୍ତର୍ଜାତୀୟ ସ୍ତରରେ ୩ ହଜାର ୧୫୯ ରନ୍ ସଂଗ୍ରହ କରିଥିବାବେଳେ ଆଇପିଏଲରେ ସେ ୬ ହଜାରରୁ ଅଧିକ ରନ୍ କରିଛନ୍ତି। ଟି -୨୦ କ୍ରିକେଟରେ କୋହଲିଙ୍କ ନାମରେ ୫ଟି ଶତକ ଏବଂ ୭୩ଟି ଅର୍ଦ୍ଧଶତକ ରହିଛି। ଯଦିଓ ଅନ୍ତର୍ଜାତୀୟ ସ୍ତରରେ ସେ ଏପର୍ଯ୍ୟନ୍ତ ଟି -୨୦ କ୍ରିକେଟରେ ଗୋଟିଏ ଶତକ ହାସଲ କରିବାରେ ସକ୍ଷମ ହୋଇନାହାଁନ୍ତି।

UNରେ ଆମେରିକା ରାଷ୍ଟ୍ରପତି ଏବଂ ମୁଜାହିଦ୍ଦିନଙ୍କୁ ନେଇ ଇମ୍ରାନଙ୍କ ବିସ୍ଫୋରକ ବୟାନ, ସାମ୍ନାକୁ ଆସିଲା ୩୮ ବର୍ଷର ପୁରୁଣା ଭିଡିଓ

ନୂଆଦିଲ୍ଲୀ: ଆନ୍ତର୍ଜାତିକ ସ୍ତରରେ ବି ଆତଙ୍କବାଦୀ ଗୋଷ୍ଠୀ ତାଲିବାନକୁ ପାକିସ୍ତାନର ସମର୍ଥନ। ମିଳିତ ଜାତିସଂଘ ସାଧାରଣ ସଭାକୁ ସମ୍ବୋଧିତ କରୁଥିବା ବେଳେ ପାକିସ୍ତାନୀ ପ୍ରଧାନମନ୍ତ୍ରୀ ଇମ୍ରାନ ଖାନ ତାଲିବାନକୁ ଦୃଢ଼ ସମର୍ଥନ କରିଛନ୍ତି। ତାଲିବାନ ସରକାରକୁ ମଜବୁତ କରିବାକୁ ଆଫଗାନିସ୍ତାନରେ ଶାନ୍ତି ପ୍ରତିଷ୍ଠା କରିବାକୁ ସେ ବିଶ୍ୱ ସମୁଦାୟକୁ ନିବେଦନ କରିଛନ୍ତି। ତାଲିବାନକୁ ସମର୍ଥନ କରୁଥିବାବେଳେ ସେ ଆମେରିକାର ପୂର୍ବତନ ରାଷ୍ଟ୍ରପତିଙ୍କ ସହ ଜଡିତ ଏକ ତଥ୍ୟକୁ ସମସ୍ତଙ୍କ ସାମ୍ନାକୁ ଆଣିଛନ୍ତି।

ସେ କହିଛନ୍ତି ଯେ ୧୯୮୩ ମସିହାରେ ତତ୍କାଳୀନ ଆମେରିକାର ରାଷ୍ଟ୍ରପତି ରୋନାଲ୍ଡ ରେଗାନ ତାଲିବାନ ମୁଜାହିଦ୍ଦିନଙ୍କୁ ଆମେରିକାର ପ୍ରତିଷ୍ଠାତାଙ୍କ ସହ ତୁଳନା କରିଥିଲେ। ଇମ୍ରାନଙ୍କ ଏହି ବିବୃତ୍ତି ପରେ ବିଶ୍ୱରେ ଏକ ପ୍ରକାରର ଚର୍ଚ୍ଚା ଆଲୋଡ଼ନ ସୃଷ୍ଟି କରିଛି। ବିଶ୍ୱ ଏଭଳି ଯୁକ୍ତିକୁ ସହଜରେ ଗ୍ରହଣ କରିପାରୁନାହିଁ, ଏବଂ ଏଭଳି ତଥ୍ୟ ପ୍ରକାଶ କରିବା ପାଇଁ ତାଙ୍କ ଉପରେ ଅଭିଯୋଗ ଲାଗିବା ଆରମ୍ଭ ହୋଇସାରିଲାଣି। ସେପଟେ PML-Nର ଉପରାଷ୍ଟ୍ରପତି ମରିୟମ ନୱାଜ ଏହା ମଧ୍ୟ କହିଛନ୍ତି ଯେ ଇମ୍ରାନଙ୍କ ଭାଷଣ ଲେଖିଥିବା ବ୍ୟକ୍ତି କିଏ ? ଏଭଳି ମନ୍ତବ୍ୟ ପରେ ଇମରା ନିଜେ ପଦରୁ ବରଖାସ୍ତ କରାଯିବା ଉଚିତ।

ଜାତିସଂଘ ସାଧାରଣ ସଭାରେ ଇମ୍ରାନ ଖାନ କହିଛନ୍ତି ଯେ ଆଫଗାନିସ୍ତାନରେ “ବେଆଇନ ଦଖଲ” ବିରୋଧରେ ୧୯୮୦ ଦଶକରେ ପାକିସ୍ତାନ ଆଗରେ ଥିଲା ଏବଂ ଆମେରିକା ସହିତ ମୁଜାହିଦ୍ଦିନ ଗୋଷ୍ଠୀକୁ ତାଲିମ ଦେଉଥିଲା। ସ୍ୱାଧୀନତା ପାଇଁ ଲଢ଼ୁଥିବା ଏହି ସଂଗ୍ରାମୀମାନଙ୍କୁ ହିରୋ ଭାବରେ ବିବେଚନା କରାଯାଉଥିଲା ଏବଂ ପରେ ରାଷ୍ଟ୍ରପତି ରୋନାଲ୍ଡ ରେଗାନ୍ ସେମାନଙ୍କୁ ୧୯୮୩ ରେ ହ୍ୱାଇଟ ହାଉସକୁ ମଧ୍ୟ ଡାକିଥିଲେ। ରେଗାନ୍ ଏହି ମୁଜାହିଦ୍ଦିନ ଯୋଦ୍ଧା ମାନଙ୍କୁ ଆମେରିକାର ମୂଳଦୁଆ ପକାଇଥିବା ନେତାଙ୍କ ସହ ତୁଳନା କରିଥିଲେ।

ସେପଟେ ଇମ୍ରାନଙ୍କ ଏଭଳି ମନ୍ତବ୍ୟକୁ ମଛ ବୋଲି କୁହାଯାଇଛି। ମୁଜାହିଦ୍ଦିନ ଗୋଷ୍ଠୀରୁ ତାଲିବାନ ପର୍ଯ୍ୟନ୍ତ ଆଫଗାନିସ୍ତାନର ବୃଦ୍ଧି ପାଇଁ ଏହାର ଇତିହାସକୁ ମନେ ପକାଇ ଆମେରିକାକୁ ଟାର୍ଗେଟ କରିବା ପାଇଁ ରେଗାନଙ୍କ ମନ୍ତବ୍ୟକୁ ସେ ଟାମ୍ପରିଂ କରିଥିବା ଅଭିଯୋଗ ହୋଇଛି। ଏହା ମଧ୍ୟ କୁହାଯାଉଛି ଯେ ରେଗାନ୍ ତାଙ୍କ ଭାଷଣରେ ମୁଜାହିଦ୍ଦିନ ମାନଙ୍କୁ ଆମେରିକାର ‘ପ୍ରତିଷ୍ଠାତା’ଙ୍କ ସହିତ ତୁଳନା କରିନାହାଁନ୍ତି। ଅଭିଯୋଗ ହୋଇଛି ଯେ ଏକ ଏଡିଟ୍ ହୋଇଥିବା ଭିଡିଓ ମଧ୍ୟ ସେୟାର କରାଯାଉଛି, ଯେଉଁଥିରେ ରେଗାନଙ୍କ ଭାଷଣ ଏଡିଟ୍ କରାଯାଇଛି।

ଦେଶଦ୍ରୋହ ମାମଲାରେ ଗିରଫ ହୋଇଥିବା କହ୍ନେୟା କୁମାରଙ୍କ ଉପରେ ରାହୁଲଙ୍କ ଭରସା କ’ଣ ପାଇଁ, ଜାଣନ୍ତୁ…

ନୂଆଦିଲ୍ଲୀ: ସବୁବେଳେ କେନ୍ଦ୍ର ସରକାରକୁ ବିରୋଧ କରୁଥିବା କହ୍ନେୟାକୁମାର ଏବେ ବିରୋଧୀ ଦଳରେ ସାମିଲ ହେବାକୁ ଯାଉଛନ୍ତି। ବିନା ଦଳରେ ସବୁବେଳେ କେନ୍ଦ୍ର ସରକାରକୁ ଟାର୍ଗେଟ କରୁଥିବା କହ୍ନେୟା ଏବେ ଦଳରେ ରହି ଟାର୍ଗେଟ କରିବେ। ଜବାହରଲାଲ ନେହେରୁ ବିଶ୍ୱବିଦ୍ୟାଳୟ ଛାତ୍ର ସଂଗଠନର ପୂର୍ବତନ ସଭାପତି କହ୍ନେୟା କୁମାର କଂଗ୍ରେସ ସହ ଏକ ନୂଆ ଇନିଂସ ଆରମ୍ଭ କରିବାକୁ ଯାଉଛନ୍ତି। ଯିଏ ନିଜ ଭାଷଣରେ ଦେଶର ସବୁ ଯୁବପିଢ଼ିଙ୍କୁ ନିଜ ଆଡ଼କୁ ଟାଣି ନିଅନ୍ତି ସେ ୨୮ ସେପ୍ଟେମ୍ବରରେ କଂଗ୍ରେସ ଦଳରେ ଯୋଗଦେବେ।

ତେବେ ଯୁବ ଗୋଷ୍ଠୀଙ୍କ ମାନଙ୍କ ସାହାରାକୁ ହରାଉଥିବା କଂଗ୍ରେସ ଦଳ ଏବେ କହ୍ନେୟାଙ୍କୁ ପାଇ ନୂଆ ଆଶା ସଞ୍ଚାରିବାକୁ ଲାଗିଲାଣି। କହ୍ନେୟା ଦଳକୁ ଆସିବା ପରେ ଦଳରେ ଯୁବ ଗୋଷ୍ଠୀଙ୍କ ସମର୍ଥନ ଅହେତୁକ ବଢ଼ିବ ବୋଲି ଆଶା କରିଛନ୍ତି ରାହୁଲ। କିନ୍ତୁ ବିହାରରେ କହ୍ନେୟାଙ୍କ ରାଜନୈତିକ କ୍ୟାରିୟର ଏତେ ସଫଳ ନଥିଲେ ମଧ୍ୟ ତାଙ୍କ ଭାଷଣ ଦେବାର ଶୈଳି ବହୁତ ଭଲ ରହିଛି। ଯେଉଁଥି ପାଇଁ ସେ ଦର୍ଶକଙ୍କୁ ଏକଯୁଟ କରି ରଖିପାରନ୍ତି। ହେଲେ ଏବେ ଠାରୁ ତାଙ୍କର ଜିତିବା କଥା କହିବା ଠିକ ହେବ ନାହିଁ ବୋଲି ରାଜନୈତିକ ପଣ୍ଡିତ ମାନେ ସେମାନଙ୍କର ମତ ବାଢ଼ିଛନ୍ତି।

ଚଳିତ ମାସରେ କହ୍ନେୟା କୁମାର ରାହୁଲ ଗାନ୍ଧିଙ୍କୁ ଭେଟିଥିଲେ। ସେବେଠାରୁ କହ୍ନେୟା କଂଗ୍ରେସରେ ଯୋଗଦେବା ନେଇ କଳ୍ପନା ଜଳ୍ପନା ତୀବ୍ର ହେବାରେ ଲାଗିଥିଲା। କିନ୍ତୁ ଯଦି ଆମେ ରାଜନୀତିର ପୁରୁଣା ପୃଷ୍ଠାକୁ ଲେଉଠାଇବା ତେବେ ଦେଖିବା କଂଗ୍ରେସ ଏବଂ କହ୍ନେୟାଙ୍କ ମଧ୍ୟ ସମ୍ପର୍କ ଏତେଟା ଭଲ ନଥିଲା। ଅନେକ ସମୟରେ ଗୋଡ଼ ଘୋଷଡ଼ା ଘୋଷଡ଼ି ହୋଇ ଚାଲିଥିଲେ ଉଭୟ କଂଗ୍ରେସ୍‌ ଏବଂ କହ୍ନେୟା।

ଦେଶଦ୍ରୋହ ମାମଲାରେ ଥାନାରେ ଥିବା କହ୍ନେୟା ଜାମିନରେ ମୁକୁଳିବା ପରେ ରାଜନୀତିରେ ଧିରେ ଧିରେ ପାଦ ଥାପିବାକୁ ଆରମ୍ଭ କରିଥିଲେ। ମାର୍ଚ୍ଚ ୨୦୧୬ରେ ରାହୁଲ ଗାନ୍ଧୀଙ୍କ ନିକଟକୁ ଯାଇଥିଲେ କହ୍ନେୟା। ଥାନାରେ ଥିବା ସମୟରେ ତାଙ୍କୁ ସମର୍ଥନ ଦେଇଥିବାକୁ ରାହୁଲଙ୍କୁ ଧନ୍ୟବାଦ ଜଣାଇଥିଲେ କହ୍ନେୟା। ଫେବୃଆରୀ ୨୦୧୬ରେ ଛାତ୍ର ସମାବେଶରେ ଦେଶ ବିରୋଧୀ ସ୍ଲୋଗାନ ଦେଇଥିବା ଅଭିଯୋଗରେ କହ୍ନେୟାଙ୍କୁ ଦେଶଦ୍ରୋହ ଅଭିଯୋଗରେ ଗିରଫ କରାଯାଇଥିଲା। ଏହାର ଠିକ ଗୋଟେ ଦିନ ପରେ ରାହୁଲ ଗାନ୍ଧି ଛାତ୍ରଛାତ୍ରୀଙ୍କୁ ସମର୍ଥନ ଜଣାଇବା ପାଇଁ ଜେଏନୟୁ କ୍ୟାମ୍ପସ ପରିଦର୍ଶନ କରିଥିଲେ। ଖାଲି ସେତିକି ନୁହେଁ ଛାତ୍ରମାନଙ୍କ ବିରୋଧରେ ନିଆଯାଇଥିବା କାର୍ଯ୍ୟାନୁଷ୍ଠାନ ପାଇଁ ରାହୁଲ କେନ୍ଦ୍ରକୁ ଟାର୍ଗେଟ ମଧ୍ୟ କରିଥିଲେ।

ଯଦି ଆମେ ଦେଖିବା ଯେତେବେଳେ କହ୍ନେୟାଙ୍କୁ ଦେଶଦ୍ରୋହ ଅଭିଯୋଗରେ ଦିଲ୍ଲୀ ପୋଲିସ ୨୦୧୯ରେ ଏକ ଚାର୍ଜସିଟ୍ ଦାଖଲ କରିଥିଲା, ସେତେବେଳେ ରାହୁଲ ଏବଂ ତାଙ୍କ ଦଳ ପୁରା ଚୁପ୍ ରହିଥିଲେ। ଯିଏ ୨୦୧୬ରେ କହ୍ନେୟାଙ୍କୁ ସମର୍ଥନ କରିଥିଲେ ସିଏ କଣ ପାଇଁ ୨୦୧୯ରେ ଚୁପ ରହିଲେ। ତାକୁ ନେଇ ରାହୁଲଙ୍କ ଚୁପ ପଛରେ ବିଜେପିର ଚାପ ରହିଛି ଏବହ ରାହୁଲ ଭୟ କରୁଛନ୍ତି ବୋଲି ରାଜନୈତିକ ପଣ୍ଡିତ ମାନେ ମତ ରଖିଥିଲେ। ଯେଉଁଥିପାଇଁ ୨୦୧୯ରେ କହ୍ନେୟା କୁମାରଙ୍କୁ କଂଗ୍ରେସର ସମର୍ଥନ ମିଳିନଥିଲା।

୨୦୧୯ ଲୋକସଭା ନିର୍ବାଚନରେ ​​କହ୍ନେୟା କୁମାର ବିହାରର ବେଗୁସରାୟରୁ ନିର୍ବାଚନ ଲଢ଼ୁଥିଲେ। ସେତେବେଳେ କଂଗ୍ରେସ ଏବଂ ଆରଜେଡି ତାଙ୍କୁ ସମର୍ଥନ କରିନଥିଲେ। ତେଣୁ ୨୦୧୯ ନିର୍ବାଚନରେ କହ୍ନେୟାଙ୍କୁ ୪.୨ ଲକ୍ଷ ଭୋଟରେ ବିଜେପିର ଗିରିରାଜ ସିଂଙ୍କ ଠାରୁ ପରାଜୟ ଗ୍ରହଣ କରିବାକୁ ପଡ଼ିଥିଲା।

ବାତ୍ୟା ପାଇଁ ବନ୍ଦ ରହିବ ୧୧ ଜିଲ୍ଲାର ସବୁ ଶିକ୍ଷାନୁଷ୍ଠାନ

ଭୁବନେଶ୍ୱର: ବାତ୍ୟା ‘ଗୁଲାବ’ ପରିସ୍ଥିତିକୁ ଦୃଷ୍ଟିରେ ରଖି ବନ୍ଦ ରହିବ ଶିକ୍ଷାନୁଷ୍ଠାନ । ଆସନ୍ତାକାଲି ପ୍ରଭାବିତ ସମସ୍ତ ୧୧ ଗୋଟି ଜିଲ୍ଲାର ସବୁ ଶିକ୍ଷାନୁଷ୍ଠାନ ବନ୍ଦ ରଖିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ପରବର୍ତ୍ତୀ ସମୟରେ ଜିଲ୍ଲାପାଳମାନେ ସ୍ଥାନୀୟ ପରିସ୍ଥିତିକୁ ବିଚାରକୁ ନେଇ ସ୍କୁଲ ଖୋଲିବା ସମ୍ପର୍କରେ ନିଷ୍ପତ୍ତି ଗ୍ରହଣ କରିବେ । ରେଡ୍ ଓ ଅରେଞ୍ଜ ୱାର୍ଣ୍ଣିଂରେ ଥିବା ଗଞ୍ଜାମ, ଗଜପତି, କନ୍ଧମାଳ, ରାୟଗଡ଼ା, ନବରଙ୍ଗପୁର, କୋରାପୁଟ, ମାଲକାନଗିରି, ପୁରୀ, ଖୋର୍ଦ୍ଧା, ନୟାଗଡ଼ ଓ କଳାହାଣ୍ଡି ଜିଲ୍ଲାରେ ଆସନ୍ତାକାଲି ଶିକ୍ଷାନୁଷ୍ଠାନ ବନ୍ଦ ରହିବ ।

ଅନ୍ୟପଟେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ କହିଛନ୍ତି, ବର୍ଷା ହେଲେ ପିଲାମାନେ ଘରୁ ନ ବାହାରନ୍ତୁ । ସ୍କୁଲ ଆସନ୍ତୁ ନାହିଁ । ତେବେ ଆସନ୍ତାକାଲି ସକାଳର ପରିସ୍ଥିତି ଦେଖି ଜିଲ୍ଲାପାଳମାନଙ୍କୁ ସ୍କୁଲ ବନ୍ଦ ନିଷ୍ପତ୍ତି ନେବାକୁ କ୍ଷମତା ଦିଆଯାଇଥିବା କହିଛନ୍ତି ଗଣଶିକ୍ଷା ମନ୍ତ୍ରୀ ।

ବାତ୍ୟା ନେଇ ଦକ୍ଷିଣ ଓଡ଼ିଶାର ୭ଟି ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି କରାଯାଇଛି । ଗଞ୍ଜାମ, ଗଜପତି, କନ୍ଧମାଳ, ରାୟଗଡ଼ା, ନବରଙ୍ଗପୁର, କୋରାପୁଟ ଓ ମାଲକାନଗିରି ଜିଲ୍ଲାରେ ଗତ ରାତିରୁ ବର୍ଷା ଆରମ୍ଭ ହୋଇଯାଇଛି । ସେହିଭଳି ପୁରୀ, ଖୋର୍ଦ୍ଧା, ନୟାଗଡ଼ ଓ କଳାହାଣ୍ଡି ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଦିଆଯାଇଛି । ପ୍ରବଳ ବର୍ଷା ନେଇ ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, ଯାଜପୁର, କଟକ, ବୌଦ୍ଧ, ସୋନପୁର, ବଲାଙ୍ଗିର ଓ ନୂଆପଡ଼ା ଜିଲ୍ଲାକୁ ୟେଲୋ ଆଲର୍ଟ ଦିଆଯାଇଛି ।