କାବୁଲ: ମିଶନ ଆଫଗାନିସ୍ତାନ ପରେ ମିଶନ କାଶ୍ମୀର । ଇସଲାମିକ ଶତ୍ରୁମାନଙ୍କ ହାତରୁ କାଶ୍ମୀରକୁ ମୁକ୍ତ କରିବା ଲାଗି ଆହ୍ୱାନ ଦେଇଛି ଅଲ କାଏଦା । ଆମେରିକା ଟ୍ରେଡ ଟାଓ୍ୱାର ଉଡ଼ାଇଦେବା ଘଟଣାରେ ଚର୍ଚ୍ଚିତ ଅଲ କାଏଦାର ଏହି ଘୋଷଣା ପରେ ବଢିଛି ଚିନ୍ତା । ଆଫଗାନିସ୍ତାନକୁ କବଜା କରିଥିବା ତାଲିବାନକୁ ବି ଶୁଭେଚ୍ଛା ଜଣାଇଛି ଅଲ କାଏଦା । ଆଫଗାନ ମାଟିରୁ ଆମେରିକା ବିଦାୟ ନେବା ପରେ ଅଲ କାଏଦା କହିଛି- ଲେଭାଣ୍ଟ, ସୋମାଲିଆ, ୟେମେନ, କାଶ୍ମୀରକୁ ବର୍ତ୍ତମାନ ଇସଲାମିକ ବିରୋଧୀ ଶକ୍ତିମାନଙ୍କ କବଳରୁ ମୁକ୍ତ କରିବାର ସମୟ ଆସିଛି । ଆଲ୍ଲାଙ୍କ ଉଦ୍ଦେଶ୍ୟରେ ବି ସଂଗଠନ କହିଛି- ସାରା ବିଶ୍ୱରେ ବନ୍ଦୀ ଥିବା ମୁସଲିମ ବନ୍ଦୀମାନଙ୍କୁ ଆଲ୍ଲା ମୁକ୍ତି ଦିଅନ୍ତୁ । ଏକ ବିବୃତିରେ ଅଲ କାଏଦା କହିଛି ଆମେରିକାର ବିଦାୟ ପରେ ଆଫଗାନିସ୍ତାନ ସମ୍ପୂର୍ଣ୍ଣ ସ୍ୱାଧୀନତା ଲାଭ କରିଛି । ତୁରନ୍ତ କାଶ୍ମୀରକୁ ମୁକ୍ତ କରିବା ଲାଗି ଅଲକାଏଦା ଆହ୍ୱାନ ଦେଇଛି । କିଛି ଦିନ ତଳେ ଓସମା ବିନ୍ ଲାଡେନର ସହଯୋଗୀ ଅମିନ ଉଲ୍ ହକ ଆଫଗାନିସ୍ତାନର ନଙ୍ଗରହାର ପ୍ରଜାତନ୍ତ୍ରକୁ ଫେରିବା ପରେ କାଶ୍ମୀର ସମସ୍ୟା ଘନୀଭୂତ ହେବା ଆଶଙ୍କା କରାଯାଉଛି ।
ଗ୍ରାହକ ବେଶରେ ଯାଇ ବଜ୍ରକାପ୍ତା ଧରିଲେ ବନ କର୍ମଚାରୀ, ୪ ଗିରଫ
ବାଲିଗୁଡ଼ା: ବଜ୍ରକାପ୍ତା ଚୋରା ଚାଲାଣ ବେଳେ ମାଡ଼ି ବସିଲା ବନ ବିଭାଗ । କନ୍ଧମାଳ ଜିଲ୍ଲା ବାଲିଗୁଡ଼ା ବନ ବିଭାଗ ପକ୍ଷରୁ ଚଢ଼ାଉ କରାଯାଇଛି । ମିଡ଼ିଆକିଆ ଅଞ୍ଚଳରେ ଜଣେ ଲୋକଙ୍କ ପାଖରେ ବଜ୍ରକାପ୍ତା ଥିବା ବିଶ୍ୱସ୍ତ ସୂତ୍ରରୁ ଖବର ପାଇ ବନ ବିଭାଗ ଅଧିକାରୀ ଗ୍ରାହକ ବେଶରେ ଯାଇ ଚଢ଼ାଉ କରିଥିଲେଷ । ୧୦୫ ସେଣ୍ଟିମିଟର ଲମ୍ବର ଗୋଟିଏ ଜୀବନ୍ତ ବଜ୍ରକାପ୍ତା ଉଦ୍ଧାର କରିଛି ବନ ବିଭାଗ ।

ଘଟଣାରେ ୪ ଜଣ ଚାଲାଣକାରୀଙ୍କୁ ଗିରଫ କରିବା ସହ ଗୋଟିଏ ବାଇକ୍ ଓ ଗୋଟିଏ ସ୍କୁଟି ଜବତ କରିଛି ବନ ବିଭାଗ । ଗିରଫ ୪ ଜଣଙ୍କ ମଧ୍ୟରେ ମହାସିଙ୍ଗି ଗାଁର ମହାଦେବ ବେହେରା ଦଳାଇ, ପାରିଗଡ଼ର ଭିମସେନ ବଡ଼ସେଠ୍, କ.ନୂଆଗାଁ ଥାନା ଅଞ୍ଚଳର ସୁକଦେବ ଦିଗାଳ ଓ ଟିକାବାଲି ପଣସପଦର ଗାଁର ସିତାଂଶୁ ମୁଖି । ଏହି ରାକେଟରେ ଆଉ କିଏ କିଏ ସମ୍ପୃକ୍ତ ଅଛନ୍ତି, ସେନେଇ ଅଧିକ ଖୋଳତାଡ଼ କରୁଛି ବନ ବିଭାଗ ।
ମୌସୁମୀ ବର୍ଷାରେ ଉବୁଟୁବୁ ରାଜଧାନୀ: ୧୨ ବର୍ଷର ରେକର୍ଡ ଭାଙ୍ଗିଲା ବର୍ଷା
ନୂଆଦିଲ୍ଲୀ: ଦିଲ୍ଲୀ-ଏନସିଆରରେ ଅବିଶ୍ରାନ୍ତ ବର୍ଷା । ମୌସୁମୀ ବର୍ଷାରେ ଉବୁଟୁବୁ ରାଜଧାନୀ । ରାସ୍ତାଘାଟ ଜଳମଗ୍ନ । ଆଜି ସକାଳୁ ୬ଘଣ୍ଟା ଧରି ଲଗାଣ ବର୍ଷା ଯୋଗୁ ଅନେକ ଅଞ୍ଚଳ ଜଳମଗ୍ନ । ରାସ୍ତା ଉପରେ ପାଣି ଜମି ରହିଥିବାରୁ ଗାଡ଼ିମୋଟର ଚଳାଚଳ ବାଧାପ୍ରାପ୍ତ ହୋଇଛି । ସେପ୍ଟେମ୍ବରରେ ରାଜଧାନୀରେ ବର୍ଷା ଗତ ୧୨ବର୍ଷର ରେକର୍ଡ ଭାଙ୍ଗିଛି । ଆସନ୍ତା ୨୪ ଘଣ୍ଟା ପ୍ରବଳ ବର୍ଷା ସମ୍ଭାବନା ଥିବାରୁ ଦିଲ୍ଲୀର ବିଭିନ୍ନ ଅଞ୍ଚଳରେ ଅରେଞ୍ଜ ଆଲର୍ଟ ଜାରି କରିଛି ପାଣିପାଗ ବିଭାଗ । ଆସନ୍ତା ୨ ଓ ୩ ତାରିଖ ମଧ୍ୟ ପ୍ରବଳରୁ ଅତିପ୍ରବଳ ବର୍ଷା ହେବା ଆଶଙ୍କା ରହିଛି । ମଙ୍ଗଳବାର ରାତିରୁ ବର୍ଷା ଜାରି ରହିଥିବାରୁ ମିଣ୍ଟୋ ବ୍ରିଜ୍, ଦିଲ୍ଲୀ ଆଇଟିଓ ଉପରେ ଆଣ୍ଠୁଏ ଉଚ୍ଚର ପାଣି ଭରି ରହିଥିଲା । ରାସ୍ତା ଘାଟ ଜଳମଗ୍ନ ଯୋଗୁ ଟ୍ରାଫିକ ସମସ୍ୟା ଉପୁଜି ଥିବାବେଳେ ତୁରନ୍ତ ଜଳ ନିଷ୍କାସନ ସହ ଟ୍ରାଫିକ ବ୍ୟବସ୍ଥା ସ୍ୱାଭାବିକ କରିବାକୁ ପ୍ରଶାସନ ପକ୍ଷରୁ ଉଦ୍ୟମ ଜାରି ରହିଛି । ଅନ୍ୟପଟେ ପ୍ରାୟ ଦେଢ଼ ବର୍ଷ ପରେ ଦିଲ୍ଲୀରେ ଆଜିଠାରୁ ସ୍କୁଲ ଖୋଲିଛି । ସକାଳୁ ପ୍ରବଳ ବର୍ଷା ଜାରି ରହିଥିବାରୁ ଅନେକ ସ୍କୁଲ ବସ ରାସ୍ତା ଉପରେ ଅଟକି ରହିଥିବା ଦେଖାଯାଇଥିଲା ।
ଏଥିସହିତ ପଢ଼ନ୍ତୁ: ପୁଣି ଫେଲ୍ ମାରିଲା ପଞ୍ଜଶୀରରେ ପ୍ରବେଶ ଉଦ୍ୟମ: ୩୫୦ ଜଣ ତାଲିବାନୀ ନିପାତ
ଆଫଗାନିସ୍ତାନରେ ଚାଲିବ ଇରାନ୍ ମଡେଲ: ହିବାତୁଲ୍ଲା ଅଖୁନ୍ଦଜାଦା ହେବେ ରାଜନୈତିକ ଓ ଧାର୍ମିକ ମୁଖ୍ୟ
କାବୁଲ: ଆଫଗାନିସ୍ତାନରେ ଚାଲିବ ଇରାନ ମଡେଲ ଶାସନ । ଆଫଗାନ ମାଟିରୁ ଆମେରିକାର ବିଦାୟ ପରେ ଦେଶରେ ଶାସନ ବ୍ୟବସ୍ଥା କିପରି ହେବ ଏନେଇ ଆଲୋଚନା ହୋଇଛି । ଇରାନରେ ଯେପରି ଜଣେ ସୁପ୍ରିମ ଲିଡର ଦେଶର ମୁଖ୍ୟ ହୁଅନ୍ତି ଠିକ୍ ସେପରି ଆଫଗାନିସ୍ତାନରେ ହିବାତୁଲ୍ଲା ଅଖୁନ୍ଦଜାଦା ସୁପ୍ରିମ ଲିଡର ହେବେ ଏବଂ ତାଙ୍କ ନେତୃତ୍ୱରେ ଶାସନ ଚାଲିବ । ଏପରିକି ସେ ଦେଶର ରାଜନୈତିକ ଓ ଧାର୍ମିକ ମୁଖ୍ୟ ବି ହେବେ । ତାଙ୍କ କ୍ଷମତା ସର୍ବଶକ୍ତିଶାଳୀ ହେବ । ବର୍ତ୍ତମାନ ସୁଦ୍ଧା ଲୋକଲୋଚନକୁ ନ ଆସି ତାଲିବାନର ରିମୋଟ କଣ୍ଟ୍ରୋଲର ଥିବା ଅଖୁନ୍ଦଜାଦା ଖୁବ୍ ଶୀଘ୍ର ଦାୟିତ୍ୱ ନେବାର ସମ୍ଭାବନା ରହିଛି । ଅଖୁନ୍ଦଜାଦା କାନ୍ଦହାରରେ ରହି ଏବେ ତାଲିବାନକୁ ନିୟନ୍ତ୍ରଣ କରୁଥିବା କୁହାଯାଉଛି । ଆଫଗାନିସ୍ତାନରେ ସରକାର କିପରି ଗଠନ ହେବ, କାହାକୁ କେଉଁ ମନ୍ତ୍ରୀ ପଦ ମିଳିବ ସେନେଇ ପାକିସ୍ତାନ ନିବିଡ ଯୋଗସୂତ୍ରରେ ରହିଛି । ପ୍ରଚ୍ଛଦପଟରେ ତାଲିବାନ ନେତାଙ୍କ ସହ ପାକିସ୍ତାନ ସରକାରଙ୍କ ସମସ୍ତ ପରାମର୍ଶ କାର୍ଯ୍ୟକାରୀ ହେଉଥିବା ସୂଚନା ମିଳିଛି । ସେପଟେ ଯେଉଁମାନ ଦେଶ ଛାଡି ଚାଲିଯିବାକୁ ଚାହାଁନ୍ତି ସେମାନଙ୍କୁ ନିରାପଦରେ ଯିବା ଲାଗି ଅନୁମତି ଦିଆଯିବ। ଯିଏ ଯେଉଁ ପକ୍ଷର ହେଉ ନା କାହିଁକି ସମସ୍ତଙ୍କୁ ଏହି ଅନୁମତି ମିଳିବ ବୋଲି କହିଛି ତାଲିବାନ ।
ଏଥିସହିତ ପଢ଼ନ୍ତୁ: ପୁଣି ଫେଲ୍ ମାରିଲା ପଞ୍ଜଶୀରରେ ପ୍ରବେଶ ଉଦ୍ୟମ: ୩୫୦ ଜଣ ତାଲିବାନୀ ନିପାତ
ଜିଲ୍ଲା ଚିକିତ୍ସାଳୟର ତୃତୀୟ ମହଲା ଝରକା ତାଜାକୁ ଚଢ଼ି ଆତ୍ମହତ୍ୟା ଉଦ୍ୟମ
ଅନୁଗୁଳ: ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟର ତୃତୀୟ ମହଲା ଝରକା ତାଜାକୁ ଚଢି ଯୁବକଙ୍କ ଆତ୍ମହତ୍ୟା ଉଦ୍ୟମ । ଉଦ୍ଧାର କରିବାକୁ ଯାଇ ଅଗ୍ନିଶମ ବିଭାଗ ଓ ଡାକ୍ତରଖାନା କର୍ମଚାରୀ ନକେଦମ୍ । ପ୍ରାୟ ଦେଢ଼ ଘଣ୍ଟାର ଉଦ୍ୟମ ପରେ ଯୁବକଙ୍କୁ ଉଦ୍ଧାର କରାଯାଇଛି । ସକାଳ ପ୍ରାୟ ୧୦ଟା ବେଳେ ହଠାତ ଜଣେ ଯୁବକ ପ୍ରସ୍ତାବିତ ଆଇସିୟୁ ବିଲ୍ଡିଂର ତୃତୀୟ ମହଲା ଉପରେ ଚଢ଼ି ସେଠାରେ ଥିବା ଝରକା ତାଜା ଉପରୁ ଡେଇଁ ଆତ୍ମହତ୍ୟା ଉଦ୍ୟମ କରୁଥିଲେ ।

ଚିକିତ୍ସାଳୟ କର୍ତ୍ତୃପକ୍ଷ ଅଗ୍ନିଶମ ବାହିନୀକୁ ଡାକିବା ପରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ତଳେ ଏକ ଜାଲ ବିଛାଯିବା ସହ ଉପରକୁ ସିଡ଼ି ପକାଇ ଉଦ୍ଧାର କାର୍ଯ୍ୟ ହୋଇଥିଲା । ଅନ୍ୟ ଏକ ଟିମ ସମ୍ପୃକ୍ତ ଯୁବକଙ୍କୁ ବୁଝାସୁଝା ଉଦ୍ୟମ କରିଥିଲେ । ଶେଷରେ ଏକ ରଶି ସାହାଯ୍ୟରେ ସମ୍ପୃକ୍ତ ଯୁବକଙ୍କୁ ଉଦ୍ଧାର କରାଯାଇଛି ।

ଉଦ୍ଧାର ହୋଇଥିବା ଯୁବକ ଜଣକ ହେଉଛନ୍ତି ଅନୁଗୁଳ ସଦର ଥାନା ଅନ୍ତର୍ଗତ କୁମଣ୍ଡର ଭଜମନ ଗୋଛାୟତ । ସେ ଦୁଇ ବର୍ଷ ପୂର୍ବେ ମୁଖ୍ୟ ଚିକିତ୍ସାଳୟରେ ସଫେଇ କର୍ମଚାରୀ ଭାବେ କାର୍ଯ୍ୟରତ ଥିଲେ । ମାନସିକ ବିକାରଗ୍ରସ୍ତ ହୋଇ ଦୁଇଦିନ ହେଲା ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଥିଲେ । ଉଦ୍ଧାର ପରେ ତାଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଛି ।
ଅନୁସନ୍ଧାନରେ ଉତ୍କର୍ଷତା ପାଇଁ ୬୪ ପୋଲିସ ଅଫିସରଙ୍କୁ ମିଳିବ ମୁଖ୍ୟମନ୍ତ୍ରୀ ମେଡାଲ
ଭୁବନେଶ୍ୱର: ୬୪ ପୋଲିସ ଅଫିସରଙ୍କୁ ମୁଖ୍ୟମନ୍ତ୍ରୀ ମେଡାଲ । 5T ଅଧିନରେ ଅନୁସନ୍ଧାନରେ ଉତ୍କର୍ଷତା ପାଇଁ ମିଳିବ ଏହି ମେଡାଲ । ରାଜ୍ୟରେ ପ୍ରଥମ ଥର ପାଇଁ ଏହି ମେଡାଲ ଦିଆଯିବ । ଗୃହ ବିଭାଗ ପକ୍ଷରୁ ବିଧିବଦ୍ଧ ନାମ ପ୍ରକାଶ ପାଇଛି । କ୍ରାଇମବ୍ରାଞ୍ଚ, ଏସଟିଏଫ୍, ଇଓଡବ୍ଲୁ, ଭିଜିଲାନ୍ସ ଓ ବିଭିନ୍ନ ଜିଲ୍ଲା ପୋଲିସ ଅଫିସର ମେଡାଲ ପାଇବେ ।

ଏଏସଆଇ, ଏସଆଇ, ଇନ୍ସପେକ୍ଟର, ଡିଏସପି, ଅତିରିକ୍ତ ଏସପି ରାଙ୍କର ଅଧିକାରୀଙ୍କୁ ମେଡାଲ ମିଳିବ । ୨୦୨୦ ଫେବ୍ରୁଆରୀ ୪ ରିଜୋଲ୍ୟୁସନ ଅନୁସାରେ ମେଡାଲ ଦିଆଯିବ । କ୍ରାଇମବ୍ରାଞ୍ଚ ଇନ୍ସପେକ୍ଟର ଅନୀଲା ଆନନ୍ଦଙ୍କୁ ମିଳିବ ମେଡାଲ । ସେହିପରି ଏସଟିଏଫ୍ ଏଏସପି ତେଜରାଜ ପଟେଲ୍ , ଇଓଡବ୍ଲୁ ଏଏସପି ଶିବରାମ ସାହୁ ଓ ଭିଜିଲାନ୍ସ ଇନସ୍ପେକ୍ଟର ପୁଲସତି ଛତ୍ରିଆଙ୍କୁ ମିଳିବ ସମ୍ମାନ ଜନକ ମେଡାଲ ।








