ଭିଜିଲାନ୍ସ ରେ଼ଡ୍ ବେଳେ ଟଙ୍କା ବ୍ୟାଗ ଫୋପାଡୁଥିଲେ ଆସିଷ୍ଟାଣ୍ଟ ଇଞ୍ଜିନିୟର। ୧ ଲକ୍ଷ ଟଙ୍କା ସହ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ ଘର ବାହାରକୁ ଫୋପାଡୁଥିଲେ ବାବୁ। ଦ୍ୱିତୀୟ ଦିନରେ ମାରାଥନ ରେଡ଼ ବେଳେ ଅନେକ ସଙ୍ଗୀନ ଘଟଣା ସାମ୍ନାକୁ ଆସିଛି। ଭୁବନେଶ୍ଵର ଆର ଆଣ୍ଡ ବି ଡିଭିଜନ ଆସିଷ୍ଟାଣ୍ଟ ଇଞ୍ଜିନିୟର ରାଜକିଶୋର ଜେନାଙ୍କ ଫ୍ଲାଟ ସମେତ ଅନ୍ୟାନ୍ୟ ସ୍ଥାନରେ ମାରାଥନ ରେଡ଼ କରିଥିଲା। କାଲିଠାରୁ ୧୦ଟି ସ୍ଥାନରେ ଚାଲିଛି ଚଢାଉ। ରେଡ଼ ବେଳେ ଗତକାଲି ବାବୁଙ୍କର ଗୋଟିଏ ବହୁତଳ ପ୍ରାସାଦ, ୨ ଟି ଫ୍ଲାଟ, ୨ ଟି ମଲରେ ଦୁଇଟି କମର୍ସିଆଲ ଦୋକାନ, ୧୩ଟି ଦାମୀ ପ୍ଲଟ ଠାବ କରାଯାଇଥିଲା। ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ରାଜକିଶୋର ଜେନାଙ୍କୁ ଅଟକ ରଖି ଅଧିକ ପଚରାଉଚରା କରୁଛି ଭିଜିଲାନ୍ସ। ଭିଜିଲାନ୍ସର ଟେକ୍ନିକାଲ ଟିମ ଏବେବି ବାବୁଙ୍କ ଠୁଳ ସମ୍ପତ୍ତି, ବ୍ୟାଙ୍କ ବାଲାନ୍ସ, ଫରେନ ଟ୍ରିପରେ ଖର୍ଚ୍ଚ ନେଇ ଛାନଭିନ ଜାରି ରଖିଛି।
ଅଗଷ୍ଟ ୧ ତାରିଖରେ ପର୍ଯ୍ୟଟକଙ୍କ ପାଇଁ ଖୋଲିବ ଭିତରକନିକା ଜାତୀୟ ଉଦ୍ୟାନ
ଅଗଷ୍ଟ ୧ ତାରିଖରେ ପର୍ଯ୍ୟଟକ ମାନଙ୍କ ପାଇଁ ଖୋଲିବ ଭିତରକନିକା ଜାତୀୟ ଉଦ୍ୟାନ । ନୂଆ ରୂପରେ ସଜେଇ ହୋଇଛି ଭିତରକନିକା। ସବୁଠୁ ଆକର୍ଷଣୀୟ ଓ ନୂତନ ଭାବେ ନିର୍ମାଣ କରାଯାଇଛି ସଂଗ୍ରହାଳୟ । ପର୍ଯ୍ୟଟକମାନେ ଏହି ସଂଗ୍ରହାଳୟ ବୁଲି ଭିତରକନିକାର ଐତିହ୍ୟ, ବନ୍ୟଜନ୍ତୁ ଓ ପକ୍ଷୀ ମାନଙ୍କ ସମ୍ପର୍କରେ ଅଧିକ ତଥ୍ୟ ଜାଣିପାରିବେ। ଗବେଷକ ମାନେ ଗବେଷଣା କ୍ଷେତ୍ରରେ ଅଧିକ ତଥ୍ୟ ମଧ୍ୟ ଜାଣିପାରିବେ | ଏନେଇ ଭିତରକନିକା ସଂଗ୍ରହାଳୟ ପରିସରରୁ ଅଧିକ ସୂଚନା ଦେଉଛନ୍ତି ଆମ ରାଜନଗର ପ୍ରତିନିଧି ତ୍ରିଲୋଚନ ଦାସ ।
ଅଗଷ୍ଟ ୯ରେ ସୁଭଦ୍ରା ତୃତୀୟ କିସ୍ତି ଦେବେ ସରକାର, ଉପମୁଖ୍ୟମନ୍ତ୍ରୀଙ୍କ ସୂଚନା
ଅଗଷ୍ଟ ୯ରେ ସୁଭଦ୍ରା ତୃତୀୟ କିସ୍ତି ଦେବେ ସରକାର । ଏହାପରେ ପୁଣି ସୁଭଦ୍ରା ପୋର୍ଟାଲ ଖୋଲିବ । ୨୧ ବର୍ଷ ହୋଇଥିଲେ ମହିଳାମାନେ ଆବେଦନ କରିପାରିବେ ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । ଏବେ ୨ ଲକ୍ଷ ହିତାଧିକାରୀଙ୍କୁ ରଦ୍ଦ କରାଯାଇଛି । ପ୍ରଥମ କିସ୍ତି ନେଲା ପରେ କିଏ ଆଇଟି ରିଟର୍ଣ୍ଣ, କିଏ ଗାଡି କିଣି ଦେଇଛି । ୫ ଏକର ଜମି ଥିବା କାରଣରୁ ସେମାନଙ୍କୁ ବାଦ ବି ଦିଆଯାଇଛି । ଅଗଷ୍ଟ ୯ ପରେ ସେମାନଙ୍କୁ ଯୋଡିବା ପାଇଁ ପୁଣିଥରେ ସର୍ଭେ ହେବ । ଅର୍ଥାତ ତୃତୀୟ କିସ୍ତି ଅଗଷ୍ଟ ୯ ପରେ ଖୋଲିବ ସୁଭଦ୍ରା ସାଇଟ । ୯୩ ହଜାର ହିତାଧିକାରୀ ମହିଳାଙ୍କୁ ୬୦ ବର୍ଷ ପୂରିଥିବାରୁ ବିଭାଗ ସେମାନଙ୍କୁ ଭତ୍ତା ପାଇଁ SSEPDକୁ ପଠାଯାଇଛି ବୋଲି କହିଛନ୍ତି ପ୍ରଭାତୀ ।
ରୁଷିଆରେ ଭୟଙ୍କର ଭୂକମ୍ପ ପରେ ଆମେରିକାରେ ଭାରତୀୟ କନସୁଲେଟ୍ ଜାରି କଲେ ଆଡଭାଇଜରୀ
ନନ୍ଦିଘୋଷ ବ୍ୟୁରୋ : ଭୟଙ୍କର ଭୂକମ୍ପ ପରେ ଆମେରିକାରେ ଭାରତୀୟ କନସୁଲେଟ୍ ଜାରି କରିଛନ୍ତି ଆଡଭାଇଜରୀ । ଆମେରିକାର ସେନ ଫ୍ରାନ୍ସିସ୍କୋରେ ଥିବା ଭାରତୀୟ କନସୁଲେଟ୍ ଜେନେରାଲ କାଲିଫର୍ନିଆ ଏବଂ ହାୱାଇର ପଶ୍ଚିମ ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ରହୁଥିବା ଭାରତୀୟ ନାଗରିକଙ୍କ ପାଇଁ ଏକ ପରାମର୍ଶ ଜାରି କରିଛନ୍ତି। ଭାରତୀୟ କନସୁଲେଟ୍ ଜେନେରାଲ କହିଛନ୍ତି ଯେ, ରୁଷର କାମଚଟକା ଉପଦ୍ୱୀପରେ ହୋଇଥିବା ୮.୬ ତୀବ୍ରତା ବିଶିଷ୍ଟ ଭୂମିକମ୍ପ ପରେ ଆମେ ସମ୍ଭାବ୍ୟ ସୁନାମିର ବିପଦ ଉପରେ ନଜର ରଖିଛୁ। ତେବେ ଆହୁରି ମଧ୍ୟ ଆମେରିକାର ପଶ୍ଚିମ ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ରହୁଥିବା ଭାରତୀୟ ନାଗରିକମାନଙ୍କୁ ଭୂମିକମ୍ପ ଏବଂ ସୁନାମିର ବିପଦକୁ ଦୃଷ୍ଟିରେ ରଖି ଅନେକ ପଦକ୍ଷେପ ନେବାକୁ ପରାମର୍ଶ ଦିଆଯାଇଛି।
ଭାରତୀୟ ନାଗରିକଙ୍କ ପାଇଁ ଜାରି ହୋଇଛି ଆଡଭାଇଜରୀ
ଭାରତୀୟ ନାଗରିକଙ୍କ ପାଇଁ ଜାରି କରାଯାଇଥିବା ଆଡଭାଇଜରୀରେ କୁହାଯାଇଛି ଯେ, ସ୍ଥାନୀୟ ସତର୍କତା ପାଳନ କରନ୍ତୁ। ଜରୁରୀକାଳୀନ ପରିଚାଳନା ଏବଂ ଆମେରିକାର ସୁନାମh ଚେତାବନୀ କେନ୍ଦ୍ର ସମେତ ଆମେରିକୀୟ କର୍ତ୍ତୃପକ୍ଷଙ୍କ ଦ୍ୱାରା ଜାରି କରାଯାଇଥିବା ଚେତାବନୀକୁ ସତର୍କତାର ସହ ନିରୀକ୍ଷଣ କରନ୍ତୁ। ସୁନାମୀ ଚେତାବନୀ ଜାରି ହେଲେ ଉଚ୍ଚ ସ୍ଥାନକୁ ଚାଲିଯାଆନ୍ତୁ।
ଜାରି ହେଲା ହେଲ୍ପଲାଇନ୍ ନମ୍ବର
ଆମେରିକାର ଉପକୂଳବର୍ତ୍ତୀ ଅଞ୍ଚଳକୁ ନଯିବା ପାଇଁ ଲୋକଙ୍କୁ ଅନୁରୋଧ କରାଯାଇଛି। ଏହା ବ୍ୟତୀତ, ଯେକୌଣସି ପ୍ରକାରର ଜରୁରୀକାଳୀନ ପରିସ୍ଥିତି ପାଇଁ ପ୍ରସ୍ତୁତ ରହିବାକୁ ଏବଂ ସେମାନଙ୍କର ସମସ୍ତ ଇଲେକ୍ଟ୍ରୋନିକ୍ ଉପକରଣକୁ ଚାର୍ଜ ରଖିବାକୁ କୁହାଯାଇଛି। ସାନ ଫ୍ରାନ୍ସିସ୍କୋରେ ଥିବା ଭାରତୀୟ କନସୁଲେଟ୍ ଜେନେରାଲ ଏକ ହେଲ୍ପଲାଇନ୍ ନମ୍ବର, +1-415-483-6629 ମଧ୍ୟ ଜାରି କରିଛନ୍ତି।
ସାପ କାମୁଡାରେ ଦୁଇଜଣଙ୍କ ମୃତ୍ୟୁ
ସାପ କାମୁଡାରେ ଦୁଇଜଣଙ୍କ ମୃତ୍ୟୁ । ମୃତକ ହେଲେ ଫୁଲବାଣୀ ଖଜୁରୀପଡ଼ା ଥାନା ନୂଆଗାଁ ପଞ୍ଚାୟତ ଖଲିବେଣି ଗାଁର ୨୫ ବର୍ଷିୟ ମାନସ ହଂସ । ଘରେ ଶୋଇଥିବା ବେଳେ ତାଙ୍କୁ ସାପ କମୁଡ଼ିଥିଲା । ଫୁଲବାଣୀ ମେଡ଼ିକାଲରେ ଚିକିତ୍ସିତ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ସେହିଭଳି ଗୋଛାପଡ଼ା ଥାନା ଅଞ୍ଚଳର ୩୫ ବର୍ଷିୟ ନିମା ବିନ୍ଧାଣିଙ୍କ ସାପ କାମୁଡ଼ାରେ ମୃତ୍ୟୁ ହୋଇଛି । ଘରେ ଶୋାଇଥିବା ବେଳେ ସାପ କମୁଡ଼ିଥିଲା l ସଙ୍ଗେ ସଙ୍ଗେ ତାଙ୍କୁ ପ୍ରଥମେ ଗୋଛପଡା ମେଡ଼ିକାଲ ଓ ପରେ ଅବସ୍ଥା ଗୁରୁତର ହେବାରୁ ଫୁଲବାଣୀ ମେଡ଼ିକାଲ ନିଆଯାଇଥିଲା l ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି।
ଭଉଣୀ ଉପରେ ଚିଲେଇବାରୁ ରାଗରେ ଭିଣେଇଙ୍କ ଚୁଟି ଉପାଡି ଦେଲା ଶଳା
ନନ୍ଦିଘୋଷ ବ୍ୟୁରୋ : ବେଳେ ବେଳେ ସମ୍ପର୍କ ସମାଧାନ କରିବା ବେଳେ ତାହା ଝଗଡ଼ାରେ ପରିଣତ ହୋଇଯାଏ । ଏମିତି କିଛି ଘଟିଛି ଦେବରିଆର ମହିଳା ଥାନା ବାହାରେ । ଯେଉଁଠି ସ୍ୱାମୀ- ସ୍ତ୍ରୀ ମଧ୍ୟରେ ଝଗଡ଼ା ସମାଧାନ କରିବାକୁ ଚେଷ୍ଟା କରୁଥିଲେ ପୋଲିସ । ହେଲେ ଥାନାରୁ ବାହାରିବା କ୍ଷଣି ଆରମ୍ଭ ହୋଇଗଲା ପାରିବାରିକ କଳହ । ନିଜ ଭଉଣୀ ଉପରେ ଚିଲେଇ କରି କଥା ହେଉଥିବା ଦେଖି ରାଗରେ ଶଳା ଭିଣେଇର କେଶ ଭିଡି ଉପାଡି ନିସ୍ତୁକ ମାଡ଼ ମାରିଲା ।
ଏହି ମାମଲାଟି ବାହୋର ଗ୍ରାମର ସୁରଜ ସୋନକର ଏବଂ ତାଙ୍କ ପତ୍ନୀଙ୍କ ମଧ୍ୟରେ ଏକ ପାରିବାରିକ ବିବାଦକୁ ନେଇ ଘଟିଛି । କିଛି ଦିନ ପୂର୍ବେ ଝଗଧା ପରେ ପତ୍ନୀ ତାଙ୍କ ମାଆଙ୍କ ଘରକୁ ଫେରି ଆସିଥିଲେ । ଏବଂ ସେ ମହିଳା ଥାନାରେ ସ୍ୱାମୀଙ୍କ ନାଁରେ ନିର୍ଯାତନା କରୁଥିବା ନେଇ ଲିଖିତ ଅଭିଯୋଗ କରିଥିଲେ । ମାମଲାର ଗମ୍ଭୀରତା ଦେଖି ପୋଲିସ ମଙ୍ଗଳବାର ଉଭୟ ପକ୍ଷଙ୍କୁ ଥାନାକୁ ସମାଧାନ ପାଇଁ ଡାକିଥିଲା । ପୋଲିସର ମଧ୍ୟସ୍ଥତା ପରେ ସୁରଜଙ୍କ ସ୍ତ୍ରୀ ଶ୍ୱଶୁର ଘର ଯିବାକୁ ରାଜି ହୋଇଯାଇଥିଲେ । ଥାନା ଭିତରେ ଶାନ୍ତିପୂର୍ଣ୍ଣ ଭାବେ କଥାବାର୍ତ୍ତା ହୋଇଥିଲେ । ହେଲେ ଥାନା ବାହାରକୁ ଆସିବା ମାତ୍ରେ ସୁରଜ ତାଙ୍କ ସ୍ତ୍ରୀଙ୍କ ଉପରେ ଉଚ୍ଚ ସ୍ୱରରେ ଚିଲେଇ କରି କିଛି କହିଲେ , ଯାହା ଶୁଣି ମହିଳାଙ୍କ ବାପା , ଭାଇ ଏବଂ ଅନ୍ୟ ପରିବାର ସଦସ୍ୟମାନେ ରାଗିଗଲେ । ଏହା ପରେ ସୁରଜଙ୍କ ଉପରେ ଆକ୍ରମଣ କରିଥିଲେ । ତାଙ୍କୁ ନିର୍ମମ ଭାବ ମାଡ଼ ମାରିଥିଲେ । ମହିଳାଙ୍କ ଭାଇ ରାଗିକରି ସୁରଜଙ୍କ ଓ୍ୱିଗ ଟାଣି ବାହାର କରି ଦେଇଥିଲେ , ଏହା ସହ ଲାତ, ଗୋଇଠା ମାରିଥିଲେ ।
ଏହି ଘଟଣାଟି ମହିଳା ପୋଲିସ ଷ୍ଟେସନ ବାହାରେ ଘଟିଥିଲା, ଯେଉଁଠାରେ କିଛି ପୋଲିସ କର୍ମଚାରି ମଧ୍ୟ ଉପସ୍ଥିତ ଥିଲେ, ହେଲେ କେହି ଏଥିରେ ହସ୍ତକ୍ଷେପ କରିନଥିଲେ । ଆକ୍ରମଣ ପରେ ଆକ୍ରମଣକାରୀମାନେ ଦୌଡ଼ି ପଳାଇଥିଲେ ଏବଂ ପୋଲିସ ନୀରବ ଦର୍ଶକ ହୋଇ ରହିଥିଲା
ଲଗାଣ ବର୍ଷା ପାଇଁ ୩ଟି ବ୍ଲକରେ ସ୍କୁଲ ଛୁଟି ଘୋଷଣା
ଭଦ୍ରକର ଧାମନଗର, ତିହିଡି, ବାସୁଦେବପୁର ବ୍ଲକର ସ୍କୁଲ ଗୁଡିକ ଆଜି ଦିନକ ପାଇଁ ଛୁଟି ଘୋଷଣା କରାଯାଇଛି । ଭଦ୍ରକରେ ଲଗାଣ ବର୍ଷା ଜାରି ରହିଛି । ଲଗାଣ ବର୍ଷା ଯୋଗୁଁ ଧାମନଗର, ତିହିଡି, ବାସୁଦେବପୁର ବ୍ଲକ ପ୍ରଭାବିତ ହୋଇଛି । ଏହି ବ୍ଲକ ମାନଙ୍କରେ ଥିବା ସ୍କୁଲ ଗୁଡିକୁ ଆଜି ଦିନଟିକୁ ବନ୍ଦ ଘୋଷଣା କରାଯାଇଛି । ଏନେଇ ଭଦ୍ରକ ଜିଲ୍ଲାପାଳଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ।
ବିନା ଅସ୍ତ୍ରୋପଚାରରେ ଶିଶୁର ଶ୍ବାସ ନଳୀରୁ ବାହାରିଲା ଦେଢ ଇଞ୍ଚ ଲମ୍ବର ଏକ ଲୁହା କଣ୍ଟା
କଟକ ଶିଶୁଭବନରେ ବିନା ଅସ୍ତ୍ରୋପଚାରରେ ବ୍ରୋଙ୍କୋସ୍କୋପି ପଦ୍ଧତିରେ ଏକ ଶିଶୁର ଶ୍ବାସ ନଳୀରୁ ଦେଢ ଇଞ୍ଚ ଲମ୍ବ ଏକ ଲୁହା କଣ୍ଟା ବାହାର କରାଯାଇଛି। ଯାଜପୁର ଜିଲ୍ଲାର କାଳିଆପାଣି ଅଂଚଳର ଏକ ୬ ବର୍ଷର ଶିଶୁ ଖେଳୁଥିବା ବେଳେ ରାସ୍ତାରେ ପଡିଥିବା ଏକ କଳଙ୍କି କଣ୍ଟା ଢୋକିଦେଇଥିଲା। ପରେ ବାରମ୍ବାର କାଶ ହେବାରୁ ତାକୁ ଶିଶୁଭବନରେ ଭର୍ତ୍ତି କରାଯାଇଥିଲା। ପରୀକ୍ଷାରୁ ଶ୍ବାସ ନଳୀରେ କଣ୍ଟା ଥିବା ଜଣାପଡିଥିଲା। ଫଳରେ ବ୍ରୋଙ୍କୋସ୍କୋପିର ସହାୟତାରେ କଣ୍ଟା କଢ଼ାଯାଇଛି। ଶିଶୁଟି ଏବେ ସୁସ୍ଥ ଅଛି।
ପାକିସ୍ତାନ ସହ ଭାରତ ଖେଳିବ କି ସେମିଫାଇନାଲ ? ନା ବିନା ଖେଳି ପାଇବ ଫାଇନାଲ ଟିକେଟ୍ ?
ନନ୍ଦିଘୋଷ ବ୍ୟୁରୋ : ବିଶ୍ୱ ଚାମ୍ପିଅନସିପ୍ ଅଫ୍ ଲିଜେଣ୍ଡସ୍ (WCL) ୨୦୧୫ ଆଜି ପୁଣି ୨୦ ଜୁଲାଇ ପରି ସମାନ ପରିସ୍ଥିତିରେ ପହଞ୍ଚିଛି । ୨୦ ଜୁଲାଇରେ ଭାରତ ଏବଂ ପାକିସ୍ତାନ ମଧ୍ୟରେ ଏକ ମ୍ୟାଚ୍ ଅନୁଷ୍ଠିତ ହେବାର ଥିଲା, କିନ୍ତୁ ଭାରତୀୟ ଖେଳାଳିମାନେ ଏହି ମ୍ୟାଚ୍ ଖେଳିବାକୁ ମନା କରିଦେଇଥିଲେ, ଯାହା ପରେ ଏହି ମ୍ୟାଚ୍ ବାତିଲ ହୋଇଗଲା। ବର୍ତ୍ତମାନ ୧୦ ଦିନ ପରେ, WCL ସମ୍ମୁଖରେ ପୁଣି ଥରେ ସମାନ ସମସ୍ୟା ଉପୁଜିଛି । କାରଣ ଭାରତ ଏବଂ ପାକିସ୍ତାନର ଦଳ ଏହି ଲିଗର ସେମିଫାଇନାଲରେ ପ୍ରବେଶ କରିଛନ୍ତି ଏବଂ ୩୧ ଜୁଲାଇରେ ଉଭୟଙ୍କ ମଧ୍ୟରେ ପ୍ରଥମ ସେମିଫାଇନାଲ ଖେଳାଯିବ, କିନ୍ତୁ ପୁଣି ଥରେ ସମାନ ପ୍ରଶ୍ନ ଉଠିଛି ଯେ, ଭାରତ ପାକିସ୍ତାନ ବିପକ୍ଷରେ ମ୍ୟାଚ୍ ଖେଳିବ କି? ନା ପାକିସ୍ତାନ ନ ଖେଳି ଫାଇନାଲରେ ଟିକେଟ୍ ପାଇଯିବ ?
ପ୍ରଥମ ସେମିଫାଇନାଲ କ’ଣ ହେବ?
୨୨ ଏପ୍ରିଲରେ ପହଲଗାମରେ ଆତଙ୍କବାଦୀ ଆକ୍ରମଣ ପରେ, ଭାରତ ଅପରେସନ ସିନ୍ଦୂର ଆରମ୍ଭ କରିଥିଲା ଏବଂ ପାକିସ୍ତାନରେ ଆତଙ୍କବାଦୀ ଆଡ୍ଡାଗୁଡ଼ିକୁ ଧ୍ୱଂସ କରିଥିଲା। ଏହା ପରେ, ଦୁଇ ଦେଶ ମଧ୍ୟରେ ସମ୍ପର୍କ ଖରାପ ହୋଇଥିଲା, ଏହା କ୍ରୀଡ଼ାକୁ ମଧ୍ୟ ପ୍ରଭାବିତ କରିଥିଲା। WCL ୨୦୨୫ର ଲିଗ୍ ମ୍ୟାଚ୍ ରେ ଭାରତୀୟ ଖେଳାଳିମାନେ 20 ଜୁଲାଇରେ ପାକିସ୍ତାନ ବିପକ୍ଷରେ ଖେଳିବାକୁ ମନା କରିଦେଇଥିଲେ। ଏହା ପରେ, WCL ର ଆୟୋଜକମାନଙ୍କୁ ଏହି ମ୍ୟାଚ୍ ବାତିଲ କରିବାକୁ ପଡିଥିଲା ଏବଂ ଭାରତୀୟ ପ୍ରଶଂସକଙ୍କୁ କ୍ଷମା ମାଗିବାକୁ ପଡିଥିଲା।
ଏବେ ଉଭୟ ଦଳ ପୁଣି ଥରେ ମୁହାଁମୁହିଁ ହୋଇଛନ୍ତି। ଏହି ଦୁଇ ଦଳ ମଧ୍ୟରେ WCLର ପ୍ରଥମ ସେମିଫାଇନାଲ ମ୍ୟାଚ୍ ୩୧ ଜୁଲାଇରେ ବର୍ମିଂହାମରେ ଖେଳାଯିବାକୁ ଅଛି। ଏବେ ସବୁଠାରୁ ବଡ଼ ପ୍ରଶ୍ନ ହେଉଛି ଯେ ଭାରତ ଏହି ମ୍ୟାଚ୍ ପାକିସ୍ତାନ ବିପକ୍ଷରେ ଖେଳିବ କି? ଯଦି ଏହି ମ୍ୟାଚ୍ ନଖେଳିବ ତେବେ ପାକିସ୍ତାନ ନଖେଳି ଫାଇନାଲରେ ପହଞ୍ଚିଯିବ। ତଥାପି, ଇଣ୍ଡିଆ ଚାମ୍ପିଅନ୍ସ ଓପନର ଶିଖର ଧାୱନ କିଛି ଦିନ ପୂର୍ବରୁ ଏହି ପ୍ରସଙ୍ଗରେ ନିଜର ମତ ସ୍ପଷ୍ଟ କରିସାରିଛନ୍ତି।
ଶିଖର ଧାୱନ କ’ଣ କହିଲେ?
ନିକଟରେ, ପୂର୍ବତନ ଭାରତୀୟ କ୍ରିକେଟର ଶିଖର ଧାୱନଙ୍କୁ ପଚରାଯାଇଥିଲା ଯେ ଯଦି ଦଳ ସେମିଫାଇନାଲରେ ପହଞ୍ଚି ପାକିସ୍ତାନ ସହିତ ମୁକାବିଲା କରେ, ତେବେ କ’ଣ ଦଳ ପୁଣି ଖେଳିବାକୁ ମନା କରିବ? ଏହା ଉପରେ ଶିଖର ଧାୱନ ନିଜର ଅସନ୍ତୋଷ ପ୍ରକାଶ କରି ଏକ ସ୍ପଷ୍ଟ ଉତ୍ତର ଦେଇଥିଲେ, ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା।ସେ କହିଥିଲେ ଯେ ତୁମେ ଏହି ପ୍ରଶ୍ନ ଭୁଲ ସମୟରେ ଏବଂ ଭୁଲ ସ୍ଥାନରେ ପଚାରୁଛ, ତୁମକୁ ଏହା ପଚାରିବା ଉଚିତ୍ ନଥିଲା, କିନ୍ତୁ ଯଦି ତୁମେ ପଚାରିଛ ତେବେ ମୁଁ ତୁମକୁ କହିଦେବି ଯେ ଯଦି ମୁଁ ପୂର୍ବରୁ ଖେଳି ନଥିଲି ତେବେ ମୁଁ ଏବେ ମଧ୍ୟ ଖେଳିବି ନାହିଁ। ପୂର୍ବରୁ, ତାଙ୍କ ବ୍ୟତୀତ ଦଳର ଅନ୍ୟ ଖେଳାଳିମାନେ ଲିଗ୍ ମ୍ୟାଚ୍ ରେ ପାକିସ୍ତାନ ବିପକ୍ଷରେ ଖେଳିବାକୁ ମନା କରିଦେଇଥିଲେ। ଯାହା ପରେ WCL ର ଆୟୋଜକମାନଙ୍କୁ କ୍ଷମା ମାଗିବାକୁ ପଡିଥିଲା।
ପ୍ରଶାସନର ଅବହେଳାରୁ ଚାଲିଗଲା ଜଣଙ୍କ ଜୀବନ: ଅଭିଯୋଗ ଆଣିଲେ ସ୍ଥାନୀୟ ଲୋକେ
ପ୍ରଶାସନର ଅବହେଳାରୁ ଚାଲିଗଲା ଜଣଙ୍କ ଜୀବନ। ବାଲେଶ୍ୱର ରେମୁଣା ସହର ଓରିପୋଲ ନିକଟରେ ଜଣଙ୍କ ମୃତ୍ୟୁ ହୋଇଛି । ରାସ୍ତାରେ କେବୁଲ ବିଛାଇବା ପାଇଁ ଖୋଳାଯାଇଥିବା ଗାତରେ ପଡ଼ି ମୃତ୍ୟୁ ହୋଇଛି । ରାସ୍ତା କଡ଼ରେ ଗାତ ଖୋଳାଯାଇଥିବା ନେଇ କୌଣସି ସୂଚନା ଫଳକ ନଥିବା ଯୋଗୁଁ ଅଘଟଣ ଘଟିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ମୃତକ ରେମୁଣା ଜାନୁଗଞ୍ଜ ଅଞ୍ଚଳର ଦାନ୍ତୁ କାଳନ୍ଦୀ ବୋଲି ଜଣାପଡ଼ିଛି। ରାସ୍ତା କଡ଼ରେ ଯାଉଥିବା ବେଳେ ଗାତରେ ଥିବା ପାଣିରେ ପଡିଯିବାରୁ ତାଙ୍କର ମୃତ୍ୟୁ ହୋଇଛି।