ପିଇଓଙ୍କ ଦାଦାଗିରି। ପଞ୍ଚାୟତ କାର୍ଯ୍ୟାଳୟ ପରିସରରେ ଦେଉଛନ୍ତି ଧମକ। ଘରୁ ଉଠାଇ ନେବି. ମୋତେ ଚିହ୍ନିନ. ମୁଁ ବହୁତ ଖରାପ. ମୋ ସହିତ ଲାଗ ନାହିଁ .. ଏଭଳି କହି ଜଣେ ପିଇଓ ସ୍ଥାନୀୟ ବାସିନ୍ଦାଙ୍କୁ ଖୋଲାଖୋଲି ଧମକ ଦେଉଛନ୍ତି । ଯାହାର ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରଲ ହେବାରେ ଲାଗିଛି। କପ୍ତିପଦା ବ୍ଲକ ମାଙ୍କଡ଼ପଡା ପଞ୍ଚାୟତର ପିଇଓ ପ୍ରଶାନ୍ତ ପଟ୍ଟନାୟକ। ଯିଏ କି ଗତ ମାସ ସରକାରଙ୍କ ତରଫରୁ ଆରମ୍ଭ ହୋଇଥିବା ବିକାଶ ବାହାନ କାର୍ଯ୍ୟକ୍ରମରେ ନୋଡାଲ ଅଫିସର ଦାୟିତ୍ୱରେ ଥିଲେ। ବିକାଶ ବାହାନ ରଥ ଉଦଘାଟନ ଦିନ ମାଙ୍କଡ଼ପଡା ପଞ୍ଚାୟତ କାର୍ଯ୍ୟାଳୟ ପରିସରରେ ଏହି ଘଟଣା ଘଟିଥିଲା। ପିଇଓ ଜଣେ ବ୍ୟକ୍ତିଙ୍କୁ ଖୋଲାଖୋଲି ଧମକ ଦେଇଥିଲେ। ସମସ୍ତଙ୍କ ସାମ୍ନାରେ ପିଇଓ ଜଣକ ହିତାହିତ ଜ୍ଞାନ ଭୁଲି ଗାଳି ଗୁଲଜ କରିବା ସହ ପଦବୀର ଗରମ ଦେଖାଇବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏନେଇ ସମ୍ପୃକ୍ତ ପିଇଓଙ୍କ ପ୍ରତିକ୍ରିୟା ପାଇଁ ଯୋଗାଯୋଗ କରିବାରୁ କ୍ୟାମେରା ସାମ୍ନାରେ କିଛି କହିବାକୁ ମନା କରିଛନ୍ତି।
ଗୋପ ଥାନାରୁ ଦୁଇ ଅଭିଯୁକ୍ତ ଫେରାର: ପରିସ୍ରା ଯିବା ବାହାନାରେ ଲାଟିନ ଝରକା ଭାଙ୍ଗି ମାରିଲେ ଚମ୍ପଟ୍
ପୁରୀ ଜିଲ୍ଲା ଗୋପ ଥାନାରୁ ଦୁଇ ଅଭିଯୁକ୍ତ ଫେରାର । ପରିସ୍ରା ଯିବା ବାହାନାରେ ଲାଟିନ ଝରକା ଭାଙ୍ଗି ଚମ୍ପଟ ମାରିଛନ୍ତି । ଗୋପ ସୋରିଶିଆପଦା ଅଞ୍ଚଳର ଏକ ଦୋକାନରୁ ଚୋରି ଅଭିଯୋଗ ହୋଇଥିଲା । ସିସିଟିଭି ଯାଞ୍ଚ କରି ସୁଦରେଇ ଅଞ୍ଚଳରୁ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଥିଲା ପୋଲିସ। ଦୁଇଜଣ ପରିସ୍ରା ଯିବା ବାହାନା କରି ଲାଟିନ ଝରକା ଭାଙ୍ଗି ଫେରାର ହୋଇଯାଇଥିବା ଜଣାପଡ଼ିଛି। ତେବେ ଏତେ ଜଣ ପୋଲିସ ଥାନାରେ ଉପସ୍ଥିତ ଥାଇ କିଭଳି ଅଭିଯୁକ୍ତ ମାନେ ଫେରାର ହୋଇଗଲେ ତାକୁ ନେଇ ଗୋପ ପୋଲିସର ପାରିବା ପଣିଆ ଉପରେ ପ୍ରଶ୍ନ ସୃଷ୍ଟି ହୋଇଛି । ଘଟଣାଟି ଏବେ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିବା ବେଳେ ପୋଲିସ ବର୍ତ୍ତମାନ ସୁଦ୍ଧା ଫେରାର ଅଭିଯୁକ୍ତଙ୍କ ଟେର ପାଇନଥିବା ଜଣାପଡ଼ିଛି।
ନଦୀକୁ ଖସିଲା ITBP ଯବାନଙ୍କ ବସ୍
ନଦୀକୁ ଖସିଲା ITBP ଯବାନଙ୍କ ବସ୍ । ଜାମ୍ମୁ କାଶ୍ମୀରରେ ନଦୀକୁ ଖସିଲା ବସ । ସିନ୍ଧୁ ନଦୀର କୁଲାନ ଠାରେ ଖସିପଡ଼ିଲା ବସ୍ । SDRF ପକ୍ଷରୁ ଦୁର୍ଘଟଣାସ୍ଥଳରେ ଉଦ୍ଧାରକାର୍ଯ୍ୟ ଆରମ୍ଭ । ଯବାନଙ୍କ କିଛି ଅସ୍ତ୍ରଶସ୍ତ୍ରର ମିଳୁନି ପତ୍ତା । ଏବେଯାଏଁ ୩ଟି ଅସ୍ତ୍ରଶସ୍ତ୍ର ଉଦ୍ଧାର କରାଯାଇଛି । ଜୋରସୋରରେ ଚାଲିଛି ରେସକ୍ଯୁ ଅପରେସନ ।
ସୁନା ଅଳଙ୍କାର ଲୁଟ୍ ଘଟଣାରେ ୩ ଅଭିଯୁକ୍ତ ଗିରଫ
ରାଉରକେଲାରେ ୩ ଅଭିଯୁକ୍ତଙ୍କୁ ଗିରଫ କରିଛି ଉଦିତନଗର ଥାନା ପୋଲିସ। ୨ ଅଭିଯୁକ୍ତ ରାଉରକେଲା ସହରର ବିଭିନ୍ନ ସ୍ଥାନରୁ ସୁନା ଅଳଙ୍କାର ଲୁଟ୍ କରୁଥିଲେ। ଚୋରି ସୁନା ଅଳଙ୍କାର କିଣୁଥିବା ଅଭିଯୋଗରେ ଜଣେ ସୁନା ଦେକାନୀଙ୍କୁ ମଧ୍ୟ ଗିରଫ କରାଯାଇଛି। ଗିରଫ ଅଭିଯୁକ୍ତଙ୍କ ନିକଟରୁ ଦୁଇଟି ସୁନା ଚେନ ଓ ୮ ଟି ସୁନା ଲକେଟ ଜବତ କରାଯାଇଛି। ତିନି ଜଣଙ୍କୁ ଗିରଫ କରି ଘଟଣାର ତଦନ୍ତ ଆରମ୍ଭ କରିଛି ଉଦିତନଗର ଥାନା ପୋଲିସ। ସିସିଟିଭି ଫୁଟେଜକୁ ଆଧାର କରି ପୋଲିସ ଦୁଇ ଲୁଟେରା ଙ୍କୁ ଗିରଫ କରିବାରେ ସକ୍ଷମ ହୋଇଛି ।
୧୧ ବିଇଓଙ୍କ ଦରମା ବନ୍ଦ: ଜୁଲାଇ ମାସର ଦରମା ବନ୍ଦ କଲେ ଜିଲ୍ଲା ଶିକ୍ଷାଧିକାରୀ
ବଲାଙ୍ଗୀର ଜିଲ୍ଲାର ୧୧ ବିଇଓଙ୍କ ଦରମା ବନ୍ଦ। ଜୁଲାଇ ମାସର ଦରମା ବନ୍ଦ କଲେ ଜିଲ୍ଲା ଶିକ୍ଷାଧିକାରୀ । ବନୀକରଣ ଟାର୍ଗେଟ ପୂରଣ ନହେବାରୁ ଦରମା ବନ୍ଦ ନିର୍ଦ୍ଦେଶ। ଏକ ପେଡ୍ ମା କେ ନାମ କାର୍ଯ୍ୟକ୍ରମରେ ବୃକ୍ଷରୋପଣ ପାଇଁ ଥିଲା ଟାର୍ଗେଟ। କାର୍ଯ୍ୟରେ ଅବହେଳା ଯୋଗୁଁ ଦରମା ବନ୍ଦ କଲେ ଡିଇଓ। ଆଗଲପୁର, ସଇଁତଳା, ଟିଟିଲାଗଡ଼, ଦେଓଗାଁ, ଗୁଡଭେଲା, ବଙ୍ଗୋମୁଣ୍ଡା, ମୁରିବାହାଲ, ତୁରେକେଲା, ବେଲପଡା,ପାଟଣାଗଡ଼, ପୁଇଁତଳା ବ୍ଲକର ବିଇଓଙ୍କ ଉପରେ ହୋଇଛି କାର୍ଯ୍ୟାନୁଷ୍ଠାନ।
ରୁଷରେ ଶକ୍ତିଶାଳୀ ଭୂକମ୍ପ ଝଟକା: ରିକ୍ଟର ସ୍କେଲରେ ୮.୭ ତୀବ୍ରତାର ଭୂମିକମ୍ପ ଅନୁଭୂତ
ରୁଷରେ ଶକ୍ତିଶାଳୀ ଭୂକମ୍ପର ଝଟକା। ରିକ୍ଟର ସ୍କେଲରେ ୮.୭ ତୀବ୍ରତାର ଭୂମିକମ୍ପ ଅନୁଭୂତ। ଭୂକମ୍ପର କେନ୍ଦ୍ରସ୍ଥଳ କୈମଚଟକା ବୋଲି ଜଣାପଡିଛି। ବଡ଼ଧରଣର ଭୂକମ୍ପ ଅନୁଭୂତ ହୋଇଥିବାରୁ ସୁନାମୀ ଆଲର୍ଟ ଜାରି କରାଯାଇଛି। ଜାପାନ ଓ ଆମେରିକା ଉପକୂଳ ଲାଗି ସୁନାମୀ ଆଲର୍ଟ ଜାରି କରାଯାଇଛି। ଆମେରିକାର ହାୱାଇ ଏବଂ କାଲିଫର୍ଣ୍ଣିଆ ଉପକୂଳକୁ ସୁନାମି ଚେତାବନୀ ଜାରି କରାଯାଇଛି। ସ୍ଥାନୀୟ ସମୟ ସନ୍ଧ୍ୟା ୭ଟା ସମୟରେ ପ୍ରଥମ ଲହଡ଼ି ଆସିବା ଆଶଂକା କରଯାଇଛି। ୨ରୁ ୩ ମିଟର ଉଚ୍ଚର ଆସିପାରେ ଲହଞ୍ଚି। ଜାପାନର ପାଣିପାଗ ସଂସ୍ଥା ଅନୁସାରେ ଭୂକମ୍ପର ପ୍ରାଥମିକ ତୀବ୍ରତା ୮ ରହିଥିଲା। ଆମେରିକାର ଭୂତତ୍ତ୍ୱ ସର୍ବେକ୍ଷଣ ସଂସ୍ଥା ଅନୁସାରେ ୧୯.୩ କିଲୋମିଟର ଭିତରେ ଏହାର କେନ୍ଦ୍ରସ୍ଥଳ ରହିଛି।
ପୋଲିସ ଆପଣଙ୍କର ଡ୍ରାଇଭିଂ ଲାଇସେନ୍ସ ସସପେଣ୍ଡ କରିପାରିବ କି?
ରାସ୍ତାରେ ଗାଡ଼ି ଚଳାଉଥିବା ସମୟରେ ଟ୍ରାଫିକ ଚାଲାଣ କଟିବା ଏକ ସାଧାରଣ କଥା । ସେଥିପାଇଁ ଟ୍ରାଫିକ୍ ନିୟମ ମାନିବାକୁ ପରାମର୍ଶ ଦିଆଯାଇଥାଏ । ତେବେ କିଛି ଗମ୍ଭୀର ମାମଲାରେ ଗାଡ଼ି ଚାଳକଙ୍କ ଡ୍ରାଇଭିଂ ଲାଇସେନନ୍ସ ସସପେଣ୍ଡ ବା ରଦ୍ଦ କରିଦିଆଯାଇଥାଏ । କୋର୍ଟଙ୍କ ଅନୁସାରେ, ପୋଲିସ ପାଖରେ ଏହି ଅଧିକାର ନାହିଁ ଯେ, ସେ ଗାଡ଼ି ଚାଳକଙ୍କର ଡ୍ରାଇଭିଂ ଲାଇସେନ୍ସ ରଦ୍ଦ କରିପାରିବେ । ମାତ୍ର ପୋଲିସ ଆପଣଙ୍କର ଡିଏଲ ଜବତ କରିପାରେ ।
ନିକଟରେ କୋଲକାତା ହାଇକୋର୍ଟ ଏକ ମାମଲାର ଶୁଣାଣି କରି କହିଛନ୍ତି, ଟ୍ରାଫିକ ପୋଲିସ ପାଖରେ ଡିଏଲ ଜବତ କରିବା, ନିଲମ୍ବିତ କରିବା, ରଦ୍ଦ କରିବାର ଅଧିକାର ନାହିଁ । ମୋଟର ବାହନ ଅଧିନିୟମ, ୧୯୯୮ର ଧାରା (୨୦୬(୪) ଓ ସମ୍ବନ୍ଧିତ ଧାରା ଅନୁସାରେ, କୌଣସି ଠୋସ୍ କାରଣ ପାଇଁ ଡିଏଲ ଜବତ କରିବାର ଅଧିକାର ପୋଲିସର ଅଛି । ସେଥିରେ ବିପଜ୍ଜନକ ଡ୍ରାଇଭିଂ, ନିଶାରେ ଗାଡ଼ି ଚଳାଇବା ବା ଦ୍ରୁତ ଗତିରେ ଗାଡ଼ି ଚଳାଇବା ଆଦି ସାମିଲ ରହିଛି । ଗତ ୨୪ ତାରିଖରେ କୋଲକାତା ହାଇକୋର୍ଟ ଏକ ମାମଲାରେ ନିଷ୍ପତ୍ତି ଶୁଣାଇଥିଲେ ଯେ, ପୋଲିସ ଅଧିକାରୀଙ୍କ ପାଖରେ ଡିଏଲ ଜବତ କରିବାର ଅଧିକାର ନାହିଁ । ଏହାର ପ୍ରୟୋଗ କେବଳ ମୋଟର ଯାନ ଅଧିନିୟମର ଅନୁସାରେ କିଛି ଖାସ୍ ପରିସ୍ଥିତିରେ କରାଯାଇପାରେ ।
ମହିଳାଙ୍କ ଠାରୁ ଲକ୍ଷାଧିକ ଟଙ୍କା ଠକେଇ ଅଭିଯୋଗ: ସୁରତରୁ ୩ ଠକ ଗିରଫ
ଗାରମେଣ୍ଟ ଦେବା ବାହାନାରେ ମହିଳାଙ୍କ ଠାରୁ ଲକ୍ଷାଧିକ ଟଙ୍କା ଠକେଇ ଅଭିଯୋଗ। ଗୁଜୁରାଟର ସୁରତରୁ ୩ ଜଣଙ୍କୁ ଗିରଫ କଲା ସାଇବର ଥାନା ପୋଲିସ। ଫେକ ଆପରେ ୫୦ ପ୍ରତିଶତ ରିହାତିରେ ପୋଷାକ ଯୋଗାଇ ଦେବାକୁ ପ୍ରତିଶ୍ରୁତି ଦିଆଯାଇଥିଲା। ବିଭିନ୍ନ ଉପାୟରେ ୧୪ ଲକ୍ଷ ୫୫ ହଜାର ଟଙ୍କା ନେଇଥିଲା ଠକ। ଟଙ୍କା ନେବା ପରେ ମଧ୍ୟ ପୋଷାକ ମିଳି ନଥିଲା। ଏନେଇ ମହିଳା ବ୍ୟବସାୟୀ ଏପ୍ରିଲ ମାସରେ ସାଇବର ଥାନାରେ ଅଭିଯୋଗ କରିଥଲେ। ଟଙ୍କା ଯାଇଥିବା ଆକାଉଣ୍ଟକୁ ଟ୍ରାକ କରି ସାଇବର ପୋଲିସ ସୁରତରେ ପହଞ୍ଚିଥିଲା । ସୁରତର କାମରେଶ ଥାନା ପୋଲିସ ସହାୟତାରେ ୩ ଜଣଙ୍କୁ ଗିରଫ କରିଛି ପୋଲିସ । ଅଭିଯୁକ୍ତଙ୍କ ଶିକ୍ଷାଗତ ଯୋଗ୍ୟତା ପଞ୍ଚମ ଫେଲ । ତଦନ୍ତ ସମୟରେ ୮ ଟି ରାଜ୍ୟରେ ଅଭିଯୁକ୍ତମାନେ ଠକେଇ କରିଥିବା ସୂଚନା ପାଇଛି ସାଇବର ପୋଲିସ ।
ମହିଳା କର୍ମଚାରୀଙ୍କ ଆତ୍ମହତ୍ୟା ଉଦ୍ୟମ: ଅସୁସ୍ଥ ମହିଳା କର୍ମଚାରୀଙ୍କୁ ସାକ୍ଷାତ କଲା କଂଗ୍ରେସ ଟିମ୍
ରାଉରକେଲା ମହାନଗର ନିଗମ କାର୍ଯ୍ୟାଳୟ ଭିତରେ ଜଣେ ମହିଳା କର୍ମଚାରୀ କବାଟ ବନ୍ଦ କରି ଆତ୍ମହତ୍ୟା ଉଦ୍ୟମ କରିବା ଘଟଣାର ତଦନ୍ତ ଆରମ୍ଭ ହୋଇଛି । ସୁନ୍ଦରଗଡ଼ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ରାଉରକେଲା ମହାନଗର ନିଗମର ଜଏଣ୍ଟ କମିଶନର ଘଟଣାର ତଦନ୍ତ ଆରମ୍ଭ କରିଛନ୍ତି । ଆତ୍ମହତ୍ୟା ଉଦ୍ୟମ କରି ଅସୁସ୍ଥ ଥିବା ମହିଳା କର୍ମଚାରୀ ରାଉରକେଲା ସରକାରୀ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଅସୁସ୍ଥ ମହିଳା କର୍ମଚାରୀଙ୍କୁ କଂଗ୍ରେସର ଏକ ପ୍ରତିନିଧି ଦଳ ସାକ୍ଷାତ କରିଛନ୍ତି। ମହିଳା କର୍ମଚାରୀଙ୍କ ଦାବି ପୂରଣ କରିବା ପାଇଁ କଂଗ୍ରେସ ଦଳ ଲଢିବ ଵୋଲି ରାଉରକେଲା ଜିଲ୍ଲା କଂଗ୍ରେସ ସଂଯୋଜକ ଜ୍ଞାନେନ୍ଦ୍ର କୁମାର ଦାସ କହିଛନ୍ତି। ମହିଳା କର୍ମଚାରୀଙ୍କ ସ୍ବାମୀ RMCରେ ଲାଇନମ୍ୟାନ ଭାବେ କାର୍ଯ୍ୟ କରୁଥିବା ସମୟରେ ୨୦୧୬ରେ ମୃତ୍ୟୁ ହୋଇଥିଲା । ସ୍ଵାମୀଙ୍କ ମୃତ୍ୟୁ ପରେ ମହିଳା ଅସ୍ଥାୟୀ କର୍ମଚାରୀ ଭାବେ ରାଉରକେଲା ମହାନଗର ନିଗମରେ କାର୍ଯ୍ୟ କରୁଛନ୍ତି । ବିଭିନ୍ନ ସମସ୍ୟା ସମାଧାନ କରିବା ପାଇଁ ବାରମ୍ବାର ଦାବି କରି ଵିଫଳ ହେବା ପରେ ସୋସିଆଲ ମିଡିଆରେ ନିଜର ମନ୍ତବ୍ୟ ରଖି ଗତକାଲି ଆତ୍ମହତ୍ୟା ଉଦ୍ୟମ କରିଥିଲେ ।
ଆଜି ବି ରାଜ୍ୟରେ ପ୍ରବଳ ବର୍ଷା: ଆଲର୍ଟ ଜାରି କଲା ବିଭାଗ
ଆଜି ବି ରାଜ୍ୟରେ ପ୍ରବଳ ବର୍ଷା । ଦକ୍ଷିଣ ବାଂଲାଦେଶ ଏବଂ ତାହାର ଆଖପାଖ ଅଞ୍ଚଳର ବାୟୁ ମଣ୍ଡଳ ଉପରେ ଏକ ଘୂର୍ଣ୍ଣିବଳୟ ସକ୍ରିୟ ରହିଛି ଯାହାର ଉତ୍ତର ଆଭ୍ୟନ୍ତରଣ ଓ ଉପକୂଳ ଓଡ଼ିଶାରେ ପ୍ରବଳ ବର୍ଷା ନେଇ ଆଲର୍ଟ ଜାରି କରିଛି ବିଭାଗ। ସେପଟେ ଗତ ୨୪ ଘଣ୍ଟାରେ ଅନେକ ସ୍ଥାନରେ ବର୍ଷା ଅଧିକ ହୋଇଥିବା ବେଳେ, ରାଜ୍ୟରେ କଳାହାଣ୍ଡି ଜିଲ୍ଲା ୫୫ ମିଲି ମିଟର ବର୍ଷା ରେକର୍ଡ ହୋଇଛି । ସେପଟେ ଆସନ୍ତା ୨୪ ଘଣ୍ଟା ପାଇଁ ରାଜ୍ୟରେ ଅନେକ ସ୍ଥାନରେ ମଧ୍ୟମ ଧରଣର ବର୍ଷା ସହ ଗୋଟେ କିମ୍ବା ଦୁଇଟି ସ୍ଥାନରେ ପ୍ରବଳ ବର୍ଷା ହେବା ସମ୍ଭାବନା ରହିଛି। ବର୍ଷା ସହ ବିଜୁଳି ଘଡଘଡି ଓ ଘଣ୍ଟା ପ୍ରତି ୩୦ ରୁ ୩୫ କିମି ବେଗରେ ପବନ ବହିବା ନେଇ ଆକଳନ କରିଛି ପାଣିପାଗ ବିଭାଗ।