କଟକ: ଜଗତପୁର ଭଏରପୁର ଠାରେ ଭୟଙ୍କର ଦୁର୍ଘଟଣା । ରାସ୍ତାକଡ଼ ଲସି ଦୋକାନରେ ବେପାର ଚାଲିଥିବା ବେଳେ ମାଡ଼ି ଯାଇଛି ତେଲ ଟ୍ୟାଙ୍କର । ଯାହାଫଳରେ ଜଣଙ୍କର ମୃତ୍ୟୁ ହୋଇଥିବବେଲେ ୩ ଜଣ ଆହତ ହୋଇଛନ୍ତି । ଗୁରୁତର ୩ ଜଣ ବ୍ୟକ୍ତିଙ୍କୁ କଟକ ଏସସିବି ମେଡିକାଲକୁ ସ୍ଥାନାନ୍ତର କରାଯାଇଛି ।
ଟ୍ୟାଙ୍କରଟି ଭାରସାମ୍ୟ ହରାଇ ରାସ୍ତା କଡ଼ରେ ଥିବା ଦୋକାନ ଘର ଭିତରକୁ ମାଡ଼ି ଯାଇଥିଲା । ଖବର ପାଇ ସ୍ଥାନୀୟ ପୋଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଆହତଙ୍କୁ ଉଦ୍ଧାର କରିବା ସହ ମେଡିକାଲରେ ଭର୍ତ୍ତି କରିଛନ୍ତି ।
ନୂଆଦିଲ୍ଲୀ: ଦେଶରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ୁଛି । ଅନ୍ୟପଟେ ମେ’ ମାସରେ ସିବିଏସଇ ବୋର୍ଡ ପରୀକ୍ଷା କରିବାକୁ ଧାର୍ଯ୍ୟ କରିଛି । ବୋର୍ଡଲ ପରୀକ୍ଷା ବାତିଲ୍ କିମ୍ବା ଅନଲାଇନ୍ ମୋଡରେ କରିବାକୁ ଦଶମ ଓ ଦ୍ୱାଦଶ ଶ୍ରେଣୀର ଲକ୍ଷେରୁ ଅଧିକ ଛାତ୍ରଛାତ୍ରୀ ଦାବି କରିଛନ୍ତି । ଏନେଇ ସେମାନେ ଏକ ପିଟିସନ୍ ସାଇନ୍ କରିବା ସହ ସରକାରଙ୍କୁ ଦେଇଛନ୍ତି ।
ଟ୍ୱିଟରରେ #CancelBoardExams2021 ଗତ ୨ ଦିନ ହେଲା ଟ୍ରେଣ୍ଡ କରୁଛି । ଯେତେବେଳକି CBSE, CISCE କହିଛନ୍ତି ପରୀକ୍ଷା ସମୟରେ ସମସ୍ତ କୋଭିଡ୍-୧୯ ନିର୍ଦ୍ଦେଶାବଳୀକୁ ଅନୁକରଣ କରାଯିବ । ଛାତ୍ରଛାତ୍ରୀଙ୍କ ସୁରକ୍ଷା ଦୃଷ୍ଟିରୁ ସମସ୍ତ କୋଭିଡ୍ ପ୍ରୋଟୋକଲ୍ ପାଳନ କରାଯିବ । ଏଥିସହ ପରୀକ୍ଷା କେନ୍ଦ୍ର ସଂଖ୍ୟା ବୃଦ୍ଧି କରାଯାଇଛି । ସାମାଜିକ ଦୂରତା ରକ୍ଷା କରିବାକୁ ସେଣ୍ଟର ସଂଖ୍ୟା ୪୦ରୁ ୫୦ ପ୍ରତିଶତ ବଢ଼ିଛି । ପରୀକ୍ଷା କେନ୍ଦ୍ରରେ ସମସ୍ତ କର୍ମଚାରୀଙ୍କୁ ସାନିଟାଇଜ୍ କରାଯିବ ବୋଲି ସିବିଏସଇର ଜଣେ ବରିଷ୍ଠ ଅଧିକାରୀ କହିଛନ୍ତି ।
ଦିନକୁ ଦିନ ଦେଶରେ କରୋନା ସଂକ୍ରମଣ ସ୍ଥିତି ବିଗିଡ଼ିବାରେ ଲାଗିଛି । ଦେଶରେ କରୋନା ସଂକ୍ରମଣ ମାମଲା ବହୁତ କମ୍ ଥିବାବେଳେ ବଳକା ଥିବା ପରୀକ୍ଷାକୁ ବାତିଲ୍ କରାଯାଇଥିଲା । ଏବେ ସଂକ୍ରମଣ ପିକରେ ଥିବାବେଳେ ସ୍କୁଲ୍ ଖୋଲିବାକୁ ଯୋଜନା କରାଯାଉଛି । ଶିକ୍ଷା ମନ୍ତ୍ରୀ ଦୟାକରି ଏହା ଉପରେ ଧ୍ୟାନ ଦେଇ ଛାତ୍ରଛାତ୍ରୀ ଚାପରେ ଥିବାରୁ ଚଳିତ ବର୍ଷର ସମସ୍ତ ପରୀକ୍ଷା ବାତିଲ୍ କରନ୍ତୁ ବୋଲି ପିଟିସନରେ କୁହାଯାଇଛି ।
ସାଧାରଣତଃ ପ୍ରାକ୍ଟିକାଲ୍ ପରୀକ୍ଷା ଜାନୁଆରୀରେ ଏବଂ ଲିଖିତ ପରୀକ୍ଷା ଫେବ୍ରୁଆରୀରେ ଆରମ୍ଭ ହୋଇ ମାର୍ଚ୍ଚ ମାସରେ ସରିଥାଏ । ଯେତେବେଳେ କି ମହାମାରୀ କରୋନା ପାଇଁ ପରୀକ୍ଷା ବିଳମ୍ବିତ ହେବା ସହ ମେ’-ଜୁନରେ କରିବାକୁ ଧାର୍ଯ୍ୟ କରାଯାଇଛି । ଦେଶବ୍ୟାପୀ ଗତବର୍ଷ ମାର୍ଚ୍ଚ ଶେଷରୁ ସ୍କୁଲ୍ ବନ୍ଦ ରହିଛି । ଏକାଧିକ ରାଜ୍ୟ ଗତବର୍ଷ ଅକ୍ଟୋବରରେ ଆଂଶିକ ଭାବେ ବିଦ୍ୟାଳୟରେ ପାଠପଢ଼ା ଆରମ୍ଭ କରିଥିଲେ । ତେବେ ଶ୍ରେଣୀଗୃହ ଶିକ୍ଷାଦାନ ପରେ ମାମଲା ବଢ଼ିବାରୁ ପୁଣି କ୍ଲାସ୍ ବାତିଲ୍ କରାଯାଇଥିଲା ।
ଗତବର୍ଷ ମାର୍ଚ୍ଚ ଅଧାରୁ ସ୍ଥଗତି ରହିଥିବା ବୋର୍ଡ ପରୀକ୍ଷା ପରେ ବାତିଲ୍ ହୋଇଥିଲା । ବିକଳ୍ପ ଆସେସମେଣ୍ଟ ସ୍କିମ୍ ମାଧ୍ୟମରେ ପ୍ରକାଶ ପାଇଥିଲା ପରୀକ୍ଷା ଫଳ । ଉଭୟ CBSE ଓ CISCE ଗତବର୍ଷ ମେରିଟ୍ ଲିଷ୍ଟ ପ୍ରକାଶ କରିନଥିଲେ ।
ନୂଆଦିଲ୍ଲୀ: ସୋସିଆଲ ମିଡିଆରେ ଓଡ଼ିଶାର ମହିଳାଙ୍କୁ ପକିସ୍ତାନୀ ପୁଅ ସହ ହେଲା ପ୍ରେମ । ସେ ପାକିସ୍ତାନୀ ଯୁବକଙ୍କୁ ଏତେ ପ୍ରେମ କରି ବସିଲେ ଯେ ନିଜ ସ୍ୱାମୀ ଓ ପିଲାକୁ ଛାଡ଼ି ବାହାରିଥିଲେ ପାକିସ୍ତାନ ଯିବାକୁ । ଆଉ ପହଞ୍ଚିଥିଲେ ପଞ୍ଜାବର ଡେରା ବାବା ନାନକ କରତାରପୁର କରିଡରରେ। ହେଲେ ଏଥିରେ ସଫଳ ହୋଇପାରିଲେ ନାହିଁ।
ବର୍ଡରରେ ମହିଳା ଜଣଙ୍କୁ ଦେଖି ବିଏସଏଫ ଯବାନଙ୍କର ସନ୍ଦେହ ହୋଇଥିଲା ଓ ସେମାନେ ତାଙ୍କୁ ଧରି ଡେରା ବାବା ନାନକ ପୋଲିସକୁ ହସ୍ତାନ୍ତର କରିଥିଲେ। ତେବେ ଡିଏସପି କମଲପ୍ରୀତଙ୍କ ମୁତାବକ ମହିଳା ଜଣଙ୍କୁ ୨୫ ବର୍ଷ ଓ ତାଙ୍କର ୬ ବର୍ଷ ପୂର୍ବେ ବିବାହ ହୋଇସାରିଛି। ତାଙ୍କର ଏକ ୬ ବର୍ଷିୟା ଝିଅ ମଧ୍ୟ ଅଛି। ପୋଲିସ ଦେଇଥିବା ସୂଚନା ମୁତାବକ ମହିଳା ଜଣକ ୨ ବର୍ଷ ପୂର୍ବେ ‘ଆଜାଦ’ ନାମକ ଏକ ଆପ୍ ଡାଉନଲୋଡ କରିଥିଲେ। ଆଉ ଏହି ଆପରେ ମହମ୍ମଦ ମାନ ନାମକ ଜଣେ ବ୍ୟକ୍ତିଙ୍କ ସହ ତାଙ୍କର ବନ୍ଧୁତା ହୋଇଥିଲା । ଆଉ ତାଙ୍କ ସହ ସେ ଚ୍ୟାଟିଂ କରିବା ଆରମ୍ଭ କରିଥିଲେ । ତେବେ ଧୀରେ ଧୀରେ ଉଭୟଙ୍କୁ ପରସ୍ପର ସହ ପ୍ରେମ ହୋଇଯାଇଥିଲା । ଯାହାପରେ ମହମ୍ମଦ ତାଙ୍କୁ କରତାରପୁର ସାହେବ କରିଡର ରାସ୍ତାରେ ପାକିସ୍ତାନ ଆସିବାକୁ କହିଥିଲେ । ଯେଉଁଥିରେ କି ମହିଳା ଜଣକ ରାଜି ହୋଇଯାଇଥିଲେ।
ସୂଚନାମୁତାବକ ମହିଳା ଜଣକ ୫ ଏପ୍ରିଲରେ ଓଡ଼ିଶାରୁ ବିମାନ ଯୋଗେ ଦିଲ୍ଲୀରେ ପହଞ୍ଚିଥିଲେ । ସେଠୁ ବସରେ ଅମୃତସରରେ ପହଞ୍ଚିଥିଲେ ଓ ସେଠି ଏକ ଗୁରୁଦ୍ୱାରାରେ ରାତି କଟାଇବା ପରେ ଏପ୍ରିଲ ୬ରେ ସେ ଅଟୋ ଯୋଗେ ଡେରା ବାବା ନାନକରେ ପହଞ୍ଚିଥିଲେ । ସେଠାରେ ତାଙ୍କୁ ବିଏସଫ ଯବାନ କହିଥିଲେ ଯେ କରୋନା ପାଇଁ କରତାରପୁର କରିଡର ବନ୍ଦ ଅଛି ଓ ବିନା ପାସପୋର୍ଟରେ ସେ ପାକିସ୍ତାନ ଯାଇପାରିବେ ନାହିଁ। ଏହାପରେ ବିଏସଏଫ୍ ମହିଳାଙ୍କୁ ଡେରା ବାବା ନାନକ ପୋଲିସକୁ ହସ୍ତାନ୍ତର କରିଦେଇଥିଲା।
ତେବେ ପଚରାଉଚରା କରିବାପରେ ଜଣାପଡ଼ିଥିଲା ଯେ ମହିଳା ଜଣକ ସାଥି୍ରେ ୬୦ ଗ୍ରାମର ସୁନା ଗହଣା ପାକିସ୍ତାନ ନେଇଯିବାକୁ ଆଣିଥିଲେ। ଏହାପରେ ପଞ୍ଜାବ ପୋଲିସ ଓଡ଼ିଶାରେ ମହିଳାଙ୍କ ଅଞ୍ଚଳର ଥାନା ସହ ସମ୍ପର୍କ କରିଥିଲେ। ସେଠାରୁ ଜଣାପଡ଼ିଥିଲେ ଯେ ମହିଳାଙ୍କ ସ୍ୱାମୀ ଥାନାରେ ତାଙ୍କ ନାଁରେ ଏକ ନିଖୋଜ ମାମଲା ଦାୟର କରିଥିଲେ। ସମ୍ପୂର୍ଣ୍ଣ ଘଟଣା ସମ୍ପର୍କରେ ଜାଣିବା ପରେ ପୋଲିସ୍ ମହିଳାଙ୍କ ପରିବାରକୁ ଡକାଇଥିଲା। ଏବଂ ମହିଳାଙ୍କୁ ହସ୍ତାନ୍ତର କରିଥିଲା। ତେବେ ଡେରା ବାବା ନାନକ ପୋଲିସର ଏହି ମହତ କାମକୁ ସବୁଆଡ଼େ ପ୍ରଶଂସା କରାଯାଉଛି।
ଭୁବନେଶ୍ୱର: ପରୀକ୍ଷାର୍ଥୀଙ୍କୁ କରୋନା ଭୟ । ମେ’ରେ ହେବାକୁ ଥିବା ଦଶମ ଓ ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷା ବାତିଲ କରିବାକୁ ଛାତ୍ରଛାତ୍ରୀଙ୍କ ଦାବି । ନହେଲେ ବିକଳ୍ପ ଭାବେ ଅନଲାଇନ ମୋଡ୍ରେ କରିବାକୁ ଟ୍ରେଣ୍ଡ କରୁଛି #CancelBoardExam_2021 । ଟୁଇଟରରେ ଟ୍ରେଣ୍ଡ କରୁଥିବା ଏହି ହାସ୍ଟ୍ୟାଗ୍ରେ ସାମିଲ ହୋଇଛନ୍ତି ଲକ୍ଷାଧିକ ପରୀକ୍ଷାର୍ଥୀ । ଆସନ୍ତା ମେ’ରେ ସିବିଏସଇ ଓ ସିଆଇଏସିଇ ଦଶମ ଓ ଦ୍ୱାଦଶ ପିଲାଙ୍କ ପରୀକ୍ଷା ହେବ । ସମସ୍ତ କରୋନା କଟକଣାରେ ପରୀକ୍ଷା କରିବାକୁ ବୋର୍ଡ ପକ୍ଷରୁ ପ୍ରସ୍ତୁତି କରାଯାଇଛି ।
ପରୀକ୍ଷା ସେଣ୍ଟର ସଂଖ୍ୟା ପ୍ରାୟ ୫୦ ପ୍ରତିଶତ ବଢ଼ାଇ ଦିଆଯାଇଥିବା ବେଳେ ହଲ୍ ଭିତରେ ସାମାଜିକ ଦୂରତା ରକ୍ଷା କରାଯାଇ ସିଟ୍ ବ୍ୟବସ୍ଥା କରାଯାଇଛି । ଏହାସହ ସମସ୍ତ ଷ୍ଟାଫଙ୍କୁ ସାନିଟାଇଜ୍ କରାଯିବା ପରେ ପରୀକ୍ଷା ସେଣ୍ଟରରେ ପ୍ରବେଶ ଅନୁମତି ଦିଆଯିବ ବୋଲି ସିବିଏସଇର ଜଣେ ବରିଷ୍ଠ ଅଫିସର ସୂଚନା ଦେଇଛନ୍ତି । ହେଲେ ଦେଶରେ କରୋନା ସଂକ୍ରମଣ ଶିଖର ଛୁଇଁଥିବା ବେଳେ ପରୀକ୍ଷା ହଲରେ ସଂକ୍ରମଣ ବ୍ୟାପିବା ଭୟ ଥିବାରୁ ଏହାକୁ ବାତିଲ ବା ଅନଲାଇନରେ କରିବାକୁ ଦାବି କରିଛନ୍ତି ପରୀକ୍ଷାର୍ଥୀ ।
ଅଲବର: ଗ୍ୟାଙ୍ଗଷ୍ଟର ସହ ପ୍ରେମ ପଡ଼ିଲା ମହଙ୍ଗା । ୨ ମାସ ଜେଲରେ ରହିଲେ ଯୁବତୀ । ଏମିତି ଏକ ଅଭାବନୀୟ ଘଟଣା ରାଜସ୍ଥାନର ଅଲବର ଜିଲ୍ଲାରେ ଘଟିଛି । ଜିଆ ସିକଲଗର ନାମକ ଜଣେ ଯୁବତୀ କୁକ୍ଷାତ ଗ୍ୟାଙ୍ଗଷ୍ଟର ବିକ୍ରମ ଉର୍ଫ ପପଲା ଗୁଜ୍ଜରଙ୍କୁ ପ୍ରେମ କରି ଫସିଯାଇଛନ୍ତି । ରାଜସ୍ଥାନ ହାଇକୋର୍ଟରୁ ଜାମିନ ମିଳିବା ପରେ ଜିଆ ବୁଧବାର ସେଣ୍ଟ୍ରାଲ୍ ଜେଲରୁ ବାହାରକୁ ଆସିଛନ୍ତି । ତେବେ ବାହାରକୁ ଆସିବା ପରେ ସେ ବହୁତ କାନ୍ଦିଛନ୍ତି ଏବଂ ଅଭିଯୋଗ କରିଛନ୍ତି ଯେ ପପଲା ଗୁଜ୍ଜର ତାଙ୍କୁ ଧୋକା ଦେଇଛି ।
ଜିଆଙ୍କ କହିବା କଥା ଯେ ବିକ୍ରମ ତାଙ୍କୁ କହିଥିଲେ ଯେ ସେ ଦିଲ୍ଲୀର ଜଣେ ଧନୀ ବିଜନେସ ମ୍ୟାନ୍ । ଲକଡାଉନ ପାଇଁ ରାଜସ୍ଥାନରେ ଫସିଯାଇଛନ୍ତି । ସେ ଆଦୌ ଜାଣିନଥିଲେ ଯେ ସେ ଜଣେ କୁକ୍ଷାତ ଗ୍ୟାଙ୍ଗଷ୍ଟର ବୋଲି। ଅଲବର ପୁଲିସ୍ ପପଲା ଗୁଜ୍ଜର ଓ ଗର୍ଲଫ୍ରେଣ୍ଡ ଜିଆଙ୍କୁ ମହାରାଷ୍ଟ୍ରର କୋହ୍ଲାପୁରରୁ ଗିରଫ କରିଥିଲା । ୭ ଦିନିଆ ରିମାଣ୍ଡ ପରେ ଫେବୃଆରୀ ୪ରେ ଜିଆଙ୍କୁ ଜେଲ ପଠାଇଦିଆଯାଇଥିଲା ।
ଜିଆଙ୍କ ଓକିଲ ଅଙ୍କିତ ଗର୍ଗଙ୍କ ମୁତାବକ କୋହ୍ଲାପୁରର ଏକ ଜିମରେ ଜିଆ ଟ୍ରେନର ଭାବେ କାମ କରନ୍ତି। ତେବେ ସେହି ଜିମରେ ପପଲା ଗୁଜ୍ଜର ବି ଆସୁଥିଲା । ଓ ନିଜକୁ ବିଜନେସ ମ୍ୟାନର ପରିଚୟ ଦେଇଥିଲା। ପପଲା ନିଜର ନକଲି ଆଧାରକାର୍ଡ଼ ମଧ୍ୟ ବନେଇଛି । ଯେଉଁଥରେ ତା’ର ନାଁ ମାନ ସିଂ ଲେଖାହୋଇଛି। ପପଲା ଜିଆଙ୍କୁ ନିଜର ଜିମ୍ ଖୋଲିବାକୁ ପରାମର୍ଶ ଦେଇଥିଲା । ଏବଂ ଏଥିରେ ସେ ତାଙ୍କୁ ଆର୍ଥିକ ସହଯୋଗ କରିବ ବୋଲି ମଧ୍ୟ କହିଥିଲା । ଏହାପରଠୁ ଦୁହିଁଙ୍କ ମଧ୍ୟରେ କଥାବର୍ତ୍ତା ବଢ଼ିଥିଲା ଓ ପ୍ରେମ ସମ୍ପର୍କ ଗଢ଼ି ଉଠିଥିଲା।
ଜିଆଙ୍କ ପିତା ଚାନ୍ଦ ସିକଲଗର ଜଣେ ଡାକ୍ତର ଓ ମା ହେଉଛନ୍ତି ହାଉସ ୱାଇଫ୍ । ଜିଆଙ୍କର ଜଣେ ସାନ ଭଉଣୀ ବି ଅଛନ୍ତି, ସେ ଏବେ ପଢ଼ୁଛନ୍ତି | ଜିଆ ୨୦୧୪ରେ ଭୋପାଳର ଏକ ନୱାବ ପରିବାରରେ ବିବାହ କରିଥିଲେ। କିନ୍ତୁ ତାଙ୍କ ସ୍ୱାମୀଙ୍କର ଅନ୍ୟ ଝିଅ ସହିତ ସମ୍ପର୍କ ଥିବାରୁ ସେ ତାଙ୍କୁ ଛାଡ଼ପତ୍ର ଦେଇଥିଲେ। ଏବେ ତାଙ୍କ ପରିବାର ହିଁ ତାଙ୍କ ବିବାହ ସ୍ଥିର କରିବେ।
ସୂଚନାଯୋଗ୍ୟ, ପପଲା ଗୁଜ୍ଜରକୁ ଅଲବର ଜିଲ୍ଲାର ବେହେରୋର ପୋଲିସ ସେପ୍ଟେମ୍ବର ୫ରେ ୩୧ ଲକ୍ଷ ୯୦ ହଜାର ଟଙ୍କା ସହ ଗିରଫ କରିଥିଲା। ହେଲେ ପରଦିନ ତାର ଜଣେ ସାଥି ବେହେରୋର ଥାନାରେ ଅଚାନକ ଗୁଳି ବର୍ଷଣ କରି ପପଲାକୁ ହାଜତରୁ ବାହାରକୁ ନେଇଯାଇଥିଲା।
ଭୁବନେଶ୍ୱର: ଆଜି ସନ୍ଧ୍ୟା ସୁଦ୍ଧା ଟିକା ନ ଆସିଲେ ଶନିବାରଠାରୁ ବନ୍ଦ ହେବ ଟିକାକରଣ । କେନ୍ଦ୍ରକୁ ଚିଠି ପରେ ବି କୌଣସି ଉତ୍ତର ମିଲୁନଥିବାରୁ ଏପରି ପ୍ରତିକ୍ରିୟା ରଖିଛନ୍ତି ସ୍ୱାସ୍ଥ୍ୟମନ୍ତ୍ରୀ ନବ ଦାସ । ଗତକାଲି କେନ୍ଦ୍ରମନ୍ତ୍ରୀଙ୍କୁ ୨୫ ଲକ୍ଷ ଟିକା ପାଇଁ ସେ ଚିଠି ଲେଖିଛନ୍ତି । ପୂର୍ବର ACSବି ଚିଠି ଲେଖିଥିଲେ । ଦିନକୁ ୨.୫ ଲକ୍ଷ ଟୀକା ଦରକାର । ଓଡ଼ିଶାରେ ମାତ୍ର ୦.୫ ଟିକା ନଷ୍ଟ ହୋଇଛି ।
୧୦ ଦିନରେ ୨୫ ଲକ୍ଷ ଟିକା ଦେବାକୁ ଚିଠିରେ ଉଲ୍ଲେଖ କରାଯାଇଛି । ହେଲେ ଏ ଯାଏ ଟିକା ଆସିନି। ଆଜି ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କ ଭିତରେ ଆଲୋଚନା ଅଛି । ଆଶା କରୁଛି ଯେ ମୁଖ୍ୟମନ୍ତ୍ରୀ ଟିକା ପାଇଁ ଦାବି କରିବେ। ପଡୋଶୀ ରାଜ୍ୟରୁ ଆସୁଥିବା ଲୋକଙ୍କ ଆରଟି-ପିସିଆର ଟେଷ୍ଟ ନେଇ ଖୁବଶୀଘ୍ର ନିଷ୍ପତ୍ତି ନିଆଯିବ ବୋଲି ମନ୍ତ୍ରୀ ନବ ଦାସ ସୂଚନା ଦେଇଛନ୍ତି । ୭ ଦିନ ସଂଗରୋଧର ବ୍ୟବସ୍ଥା ବି ହେବ । ପଶ୍ଚିମବଙ୍ଗ ଫେରନ୍ତାଙ୍କର ବି ପରୀକ୍ଷା କରାଯିବ । ଏଯାଏ ବିଶେଷ କଟକଣା ଜାରି ହୋଇନି । ସରକାରୀ ଓ ଘରୋଇ ହସ୍ପିଟାଲ ପ୍ରସ୍ତୁତ ରଖିବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି ।
ଆଜମେର: ଶିଶୁ ଜନ୍ମ ହେବାମାତ୍ରେ ବର୍ଥ ସାର୍ଟିଫିକେଟ୍ବା ଜନ୍ମପ୍ରମାଣ ମିଳିଥାଏ । ଯେଉଁଥିରେ ନବଜାତ ଶିଶୁର ଜନ୍ମସ୍ଥାନ ଉଲ୍ଲେଖ ଥାଏ । କିନ୍ତୁ ଏହା ଶିଶୁ ଜନ୍ମ ହୋଇଥିବା ସ୍ଥାନକୁ ଆଧାର କରି ହୋଇଥାଏ । ଏହା ମଧ୍ୟରେ ସବୁଠାରୁ ବଡ଼ ପ୍ରଶ୍ନ ହେଉଛି ଯଦି ଶିଶୁର ଜନ୍ମ ଫ୍ଲାଇଟ୍ମଧ୍ୟରେ ହୋଇଥିବ ତେବେ ନବଜାତକୁ କିଭଳି ଜନ୍ମ ପ୍ରମାଣ ମିଳିବ? ନିକଟରେ ସେହିଭଳି ଏକ ଘଟଣା ସାମ୍ନାକୁ ଆସିଛି, ଯେଉଁଥିରେ ନବଜାତକୁ ୨୨ ଦିନ ବିତି ଯାଇଥିଲେ ମଧ୍ୟ ବର୍ଥ ସାର୍ଟିଫିକେଟ୍ଦେବାରେ ବିଳମ୍ବ ହେଉଛି । ଏହାର ଏକମାତ୍ର କାରଣ ହେଉଛି ଶିଶୁଟିର ଜନ୍ମ ଫ୍ଲାଇଟ ଉଡ଼ାଣ ସମୟରେ ହୋଇଛି ।
ଆଜିଠାରୁ ୨୨ ଦିନ ପୂର୍ବେ ୧୭ ମାର୍ଚ୍ଚରେ ଇଣ୍ଡିଗୋ ଫ୍ଲାଇଟରେ ଜନ୍ମ ହୋଇଥିବା ଏକ ନିରୀହ ନବଜାତକୁ ଏପର୍ଯ୍ୟନ୍ତ ଜନ୍ମ ପ୍ରମାଣ ମିଳିନାହିଁ । ସରକାରଙ୍କ ଯନ୍ତ୍ରପାତି ଜାଲରେ ଫସିଥିବା ନବଜାତର ବାପା ଅଧିକ ଶିକ୍ଷିତ ହୋଇନଥିବାରୁ ସରକାରୀ କାର୍ଯ୍ୟାଳୟର ଚକ୍କର କାଟୁଛନ୍ତି । ଏହାକୁ ନେଇ ସେ ସୋସିଅଲ ମିଡିଆରେ ଏକ ଭିଡ଼ିଓ ମଧ୍ୟ ଶେୟାର କରିଛନ୍ତି ଯାହା ଖୁବ୍ଭାଇରାଲ ହେଉଛି ।
ଆଜମେର ଜିଲ୍ଲାର ବ୍ୟାଓ୍ୱର ଅଞ୍ଚଳର ଜାଲିୟା ରୂପବାସ ଗାଁର ଭିରୁ ସିଂ ଧର୍ମପତ୍ନିଙ୍କ ସହ ବାଙ୍ଗାଲୋରରେ ରୁହନ୍ତି । ପେଶାରେ ଭିରୁ ଜଣେ ଅଟୋ ଚାଳକ । ଅଚାନକ ଭିରୁଙ୍କ ବାପାଙ୍କ ଶରୀର ଅସୁସ୍ଥ ହେବା ଖବର ପାଇ ଗର୍ଭବତୀ ଥିବା ପତ୍ନି ଲଳିତା ସହ ଗତ ମାର୍ଚ୍ଚ ମାସରେ ଫ୍ଲାଇଟରେ ବାଙ୍ଗାଲୁରୁରୁ ଜୟପୁର ସ୍ଥିତ ଗାଁକୁ ଫେରିବା ବେଳେ ଫ୍ଲାଇଟରେ ଲଳିତା ଏକ ଶିଶୁକୁ ଜନ୍ମ ଦେଇଥିଲେ ।
ଗାଁକୁ ଫେରିବା ପରେ ଜନ୍ମ ପ୍ରମାଣ ବାବଦରେ ସରପଞ୍ଚକୁ ଜଣାଇଥିଲେ ଭୀରୁ । କିନ୍ତୁ ଶିଶୁର ଜନ୍ମ ପ୍ରମାଣ ଜୟପୁରରୁ ମିଳିବ ବୋଲି କହିଥିଲେ ସରପଞ୍ଚ । ଏହାପରେ ବାରମ୍ବାର ଭୀରୁ ନବଜାତର ଜନ୍ମ ପ୍ରମାଣ ପାଇଁ ଜୟପୁର ଏୟାରପୋର୍ଟ ସହିତ ଫୋନ୍ମାଧ୍ୟମରେ ଯୋଗାଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ଜୟପୁର ଏୟାରପୋର୍ଟ କର୍ମଚାରୀଙ୍କ ସହ କୌଣସି ଯୋଗାଯୋଗ ହୋଇପାରିଲା ନାହିଁ । ଅନେକ ଚେଷ୍ଟା ପରେ ମଧ୍ୟ ନବଜାତଙ୍କୁ ଏପର୍ଯ୍ୟନ୍ତ ଜନ୍ମ ପ୍ରମାଣ ମିଳିପାରି ନାହିଁ । ଅନ୍ୟପଟେ ଫ୍ଲାଇଟରେ ଲଳିତାଙ୍କ ଡେଲିଭରି କରାଇଥିବା ଡାକ୍ତର ଏହି ମାମଲାରେ ସାହାଯ୍ୟ କରିବେ ବୋଲି ଭିରୁକୁ ପ୍ରତିଶୃତି ଦେଇଛନ୍ତି ।
ତେବେ ନବଜାତର ଜନ୍ମ ପ୍ରମାଣ ପାଇଁ ବାରମ୍ବାର ଚକ୍କର କାଟୁଥିବା ଭିରୁ ଶେଷରେ ସୋସିଅଲ ମିଡିଆରେ ଏକ ଭିଡ଼ିଓ ଶେୟାର ସମସ୍ୟା ଜଣାଇଛନ୍ତି । ଭିରୁଙ୍କ ଏହି ଭିଡ଼ିଓ ସୋସିଅଲ ମିଡିଆରେ ଖୁବ୍ଭାଇରାଲ ହେଉଛି ।
ଛତିଶଗଡ଼: ବିଜାପୁରରେ ନନ୍ଦିଘୋଷ ଟିଭି । ଛତିଶଗଡ଼ରେ ମାଓ ଆକ୍ରମଣରେ ଆହତ ଯବାନଙ୍କୁ ଭେଟିଛନ୍ତି ନନ୍ଦିଘୋଷ ପ୍ରତିନିଧି । ମେଡିକାଲରେ ଚିକିତ୍ସାଧୀନ ଯବାନମାନଙ୍କୁ ସ୍ୱାସ୍ଥ୍ୟାବସ୍ଥା ପଚାରି ବୁଝିବା ସହ କେମିତି ଥିଲା ସେଦିନର ଲୋମହର୍ଷକାରୀ ଘଟଣା ତଥ୍ୟ ସଂଗ୍ରହ କରିଛି ନନ୍ଦିଘୋଷ ଟିଭି । ଅନ୍ୟପଟେ ଆଜି ମିଳିବ କି ମାଓବାଦୀଙ୍କ ନିକଟରେ ବନ୍ଧକ ଥିବା ଯବାନଙ୍କୁ ମୁକ୍ତି ? ଆଜି ଘୋଷଣା କରାଯିବ କି ମଧ୍ୟସ୍ଥିଙ୍କ ନାଁ ? ଗତକାଲି ଛତିଶଗଡ଼ ସରକାର ମଧ୍ୟସ୍ଥି ପ୍ରସଙ୍ଗରେ ରାଜ୍ୟ କ୍ୟାବିନେଟ ବୈଠକରେ ଆଲୋଚନା କରିଛନ୍ତି । ମାଓବାଦୀଙ୍କ ସହ କଥାବାର୍ତ୍ତା ପାଇଁ କିଏ କିଏ ମଧ୍ୟସ୍ଥି ହେବେ ସେନେଇ ଖୁବ୍ଶୀଘ୍ର ଘୋଷଣା କରାଯିବ ବୋଲି ସୂଚନା ମିଳିଛି ।
ସିଆରପିଏଫ ଡିଜି କୁଲଦୀପ ସିଂହଙ୍କ କହିବା କଥା, ଯବାନଙ୍କୁ ମାଓବାଦୀମାନେ ଅପହରଣ କରି ନେଇଥିବା ବେଳେ ତାଙ୍କୁ ମୁକୁଳାଇବା ପାଇଁ ଯୋଜନା କରାଯାଉଛି । ବିଜାପୁରରେ ମାଓ ହମଲା ବେଳେ ସିଆରପିଏଫ କୋବ୍ରା ବାଟାଲିୟନର ଯବାନ ରାକେଶ୍ବର ସିଂହଙ୍କୁ ଅପହରଣ କରିନେଇଛନ୍ତି ମାଓବାଦୀ । ତେବେ ସେ ସୁରକ୍ଷିତ ଥିବା ଏକ ଫଟୋ ଜାରି କରି କହିଛନ୍ତି ମାଓବାଦୀ ।
ରାକେଶ୍ୱର ଜଙ୍ଗରଗୁଣ୍ଡା ଜଙ୍ଗଲରେ ଥିବା ଜଣାପଡିଛି । ଏଥିସହ ଯବାନ ଥିବା ଅଞ୍ଚଳ ପାହାଡିଆ ବୋଲି ଅନୁମାନ କରାଯାଇଛି । ଯବାନଙ୍କୁ ଛାଡିବା ପାଇଁ ମଧ୍ୟସ୍ଥତା ମାଧ୍ୟମରେ ଆଲୋଚନା କରିବେ ବୋଲି ମାଓବାଦୀମାନେ ଏକ ପ୍ରେସ ରିଲିଜ ଜାରି କରିଥିଲେ । ଏଥିସହ ମଧ୍ୟସ୍ଥିଙ୍କ ନାଁ ମଧ୍ୟ ଘୋଷଣା କରିବାକୁ କହିଥିଲେ । ପୂର୍ବରୁ ହ୍ୱାଟ୍ସଆପରେ ଭିଡିଓ କଲ୍ କରି ମଧ୍ୟ ଯବାନ ସୁରକ୍ଷିତ ଥିବା ମାଓବାଦୀ କହିଥିଲେ ।
ଭୁବନେଶ୍ୱର: ଭୁବନେଶ୍ୱର ୟୁନିଟ-୧ ସ୍ଥିତ ଭାରତୀୟ ଷ୍ଟେଟ ବ୍ୟାଙ୍କ ମୁଖ୍ୟ କାର୍ଯ୍ୟାଳୟ ଆଉ ୪ଦିନ ବନ୍ଦ ରହିବ । କାର୍ଯ୍ୟାଳୟରୁ ଅଧିକ ସଂଖ୍ୟକ ସଂକ୍ରମିତ ଚିହ୍ନଟ ପରେ ବିଏମସି ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି । ଭୁବନେଶ୍ୱର ୟୁନିଟ-୧ ସ୍ଥିତ ଭାରତୀୟ ଷ୍ଟେଟ ବ୍ୟାଙ୍କ ମୁଖ୍ୟ କାର୍ଯ୍ୟାଳୟର ଉଭୟ ତଳ ଓ ପ୍ରଥମ ମହଲାକୁ ଆଜିଠୁ ୧୧ତାରିଖ ପର୍ଯ୍ୟନ୍ତ ବନ୍ଦ ରହିବ । ପୂର୍ବରୁ ବ୍ୟାଙ୍କରୁ ଏକାଧିକ ପଜିଟିଭ ଚିହ୍ନଟ ପରେ ଦୁଇ ଦିନ ପାଇଁ ବ୍ୟାଙ୍କକୁ ସିଲ କରିଥିଲା ବିଏମସି । ବିଭିନ୍ନ ପର୍ଯ୍ୟାୟରେ ଟେଷ୍ଟିଂରେ ୨୪ ପଜିଟିଭ ଚିହ୍ନଟ ହୋଇଛନ୍ତି ।
ଅନ୍ୟପଟେ କଟକରେ ଆଜି ସିଏମସି ଏନ୍ଫୋର୍ସମେଣ୍ଟ ଟିମ ପକ୍ଷରୁ ଅରୁନଦୟ ନଗରରେ ଥିବା ମହେନ୍ଦ୍ର କୋଚିଂ ସେଣ୍ଟରକୁ ସିଲ କରାଯାଇଛି । କୋଚିଂ ସେଣ୍ଟରରେ ସାମାଜିକ ଦୂରତା ଓ ମାକ୍ସ ପିନ୍ଧିବାର ନିୟମକୁ ଉଲଙ୍ଘନ କରାଯାଇଥିଲା । ବହୁ ସଂଖ୍ୟାରେ ବିଦ୍ୟାର୍ଥୀ ପାଠ ପଢୁଥିଲେ ।
ଶିକ୍ଷକ ବା ବିଦ୍ୟାର୍ଥୀ କେହି ନିୟମ ପ୍ରତି ସଚେତନ ନଥିବା ଦେଖିବାକୁ ମିଳିଥିଲା । ତେଣୁ କୋଚିଂ ସେଣ୍ଟର ସିଲ କରାଗଲା ବୋଲି ସିଏମସି ଡେପୁଟି କମିଶନର ଅବିନାଶ ରାଉତ ସୂଚନା ଦେଇଛନ୍ତି । ଆଗକୁ ମଧ୍ୟ ସଚେତନତା ଓ ଚଢ଼ାଉ ଉଭୟ ଜାରି ରହିବ ।
ନୂଆଦିଲ୍ଲୀ: ଛତିଶଗଡ଼ରେ ସୁରକ୍ଷାବାହିନୀ ଉପରେ ବଡ଼ ଧରଣର ଆକ୍ରମଣ ପରେ ନକ୍ସଲମାନେ ପୁଣି ଚର୍ଚ୍ଚାକୁ ଆସିଛନ୍ତି । ଥରେ ନୁହେଁ କି ଦୁଇ ଥର ନୁହେଁ ବରଂ ବାରମ୍ବାର ଏଭଳି ଆକ୍ରମଣ କରୁଥିବା ନକ୍ସଲଙ୍କୁ ନେଇ ଚର୍ଚ୍ଚା ତ ହୁଏ କିନ୍ତୁ ଅଧିକ ଚର୍ଚ୍ଚା ହୁଏ ସେମାନଙ୍କ ଫଣ୍ଡିଂକୁ ନେଇ । ସବୁଠାରୁ ବଡ଼ ପ୍ରଶ୍ନ ହେଉଛି ସୁରକ୍ଷା ବାହିନୀ ସହିତ ଲଢିବା ପାଇଁ ଆଧୁନିକ ଅସ୍ତ୍ରଶସ୍ତ୍ର ରଖୁଥିବା ନକ୍ସଲଙ୍କ ନିକଟରେ ଏତେ ଫଣ୍ଡ୍ ଆସେ କେଉଁଠୁ? ଏହି ପ୍ରଶ୍ନର ଉତ୍ତର ହୁଏତ ନାହିଁ । କିନ୍ତୁ ଏହାର ଏକାଧିକ ଦିଗ ରହିଛି । ଖାଲି ସେତିକି ନୁହେଁ ବରଂ ସମସ୍ତେ ଏହା ଜାଣିବା ପାଇଁ ଚାହାଁନ୍ତିଯେ, ନକ୍ସଲମାନେ ଟଙ୍କା କେଉଁଠୁ ଆଣନ୍ତି ଏବଂ ଏହାକୁ ଖର୍ଚ୍ଚ କିଭଳି କରନ୍ତି? ସେମାନେ କ’ଣ ନିବେଶ ପାଇଁ ଆଗ୍ରହୀ? ତେବେ ନକ୍ସଲଙ୍କ ଆର୍ଥିକ ସଙ୍କଟ କ’ଣ ?
ନକ୍ସଲଙ୍କ ଫଣ୍ଡିଂ ବିଷୟରେ ଆଲୋଚନା କଲେ ଶିଳ୍ପକ୍ଷେତ୍ରରୁ ଜବରଦସ୍ତି ବଟି ଆଦାୟ ଘଟଣା ସାମ୍ନାକୁ ଆସେ । ଝାଡ଼ଖଣ୍ଡ ଏବଂ ବିହାରରୁ ଗତ ଏକ ଦଶକ ମଧ୍ୟରେ ମାଓବାଦୀ ସଙ୍ଗଠନର କିଛି ସଦସ୍ୟଙ୍କୁ ଗିରଫ କରିବା ପରେ ଏହି କଥା ବାରମ୍ବାର କୁହାଯାଇଛିଯେ, ମାଓବାଦୀ ପ୍ରଭାବିତ ଅଞ୍ଚଳରେ କର୍ପୋରେଟ୍ ବିଜନେସ କରୁଥିବା ବ୍ୟକ୍ତିଙ୍କ ଠାରୁ ମାଓବାଦୀ ସଙ୍ଗଠନ ଜବରଦସ୍ତି ବଡ଼ ରକମର ଫଣ୍ଡ୍ ଆଦାୟ କରିଥାନ୍ତି ।
ଅନ୍ୟପଟେ କର୍ପୋରେଟ୍ ଠାରୁ ଅଧିକ ବଟି ଆଦାୟ ହୋଇଥାଏ ମାଇନିଙ୍ଗ ବା ଖଣିରୁ। ନକ୍ସଲ ପ୍ରଭାବିତ ଅଞ୍ଚଳରେ ନକ୍ସଲଙ୍କୁ ବଟି ନ ଦେଲେ ବାଣିଜ୍ୟ କାରବାରରେ ବାଧା ସୃଷ୍ଟି ହୋଇଥାଏ । ଏଭଳି ଅଞ୍ଚଳରେ ଏମାନଙ୍କ ଆଧିପତ୍ୟ ଯଥେଷ୍ଟ ଅଧିକ । ଅବୈଧ ଖନନରେ ମଧ୍ୟ ନକ୍ସଲ ମାନଙ୍କର ଏକ ବିଶେଷ ଭୂମିକା ରହିଛି । ମାର୍ଚ୍ଚ ୨୦୧୦ କେନ୍ଦ୍ର ଖଣିମନ୍ତ୍ରୀ ହାଣ୍ଡିକ ଦେଇଥିବା ବୟାନ ଅନୁସାରେ ଛତିଶଗଡ଼, ଝାଡ଼ଖଣ୍ଡ ଏବଂ ଓଡ଼ିଶାର ନକ୍ସଲ ପ୍ରଭାବିତ ଅଞ୍ଚଳରେ ଏକ ଲକ୍ଷ ୬୧ ହଜାର ୪୦ ଅବୈଧ ମାଇନ୍ସ ରହିଛି ।
ରିପୋର୍ଟ କହୁଛି ୨୦୧୮ ଶେଷ ବେଳକୁ ନ୍ୟାସନାଲ ଇନଭେଷ୍ଟିଗେସନ ଏଜେନ୍ସି ଏନଆଇଏ ଏକ ବଡ଼ ଖୁଲାସା କରିଥିଲା । ଏହି ରିପୋର୍ଟ ଅନୁସାରେ ନକ୍ସଲମାନେ କେବଳ କର୍ପୋରେଟ୍ ବିଜନେସମ୍ୟାନ ବା ମାଇନିଙ୍ଗ୍ ରୁ ନୁହେଁ ବରଂ ନିଜ ଅଞ୍ଚଳର ଲୋକଙ୍କ ଠାରୁ ମଧ୍ୟ ଜୋର ଜବରଦସ୍ତି ବଟି ଆଦାୟ କରିଥାନ୍ତି । ଖାଲି ସେତିକି ନୁହେଁ ବରଂ ଏମାନେ ଅପରେଟିଭ୍ ସୋସାଇଟି ଏବଂ ମ୍ୟୁଚୁଆଲ ଫଣ୍ଡସରେ ମଧ୍ୟ ପୁଞ୍ଜିନିବେଶ କରନ୍ତି । ଏନଆଇଏ ଅନୁସାରେ ଗିରଫ ହୋଇଥିବା ଏକ ମାଓବାଦୀ ଠାରୁ ୧୨ ଲକ୍ଷ ଟଙ୍କାର ପଣ୍ଡ୍ସ ମିଳିଥିଲା ।
ନକ୍ସଲଙ୍କ ଫଣ୍ଡିଂର ଆଉ ଏକ ଉତ୍ସ ହେଉଛି ପାକିସ୍ତାନ ଏବଂ ଆତଙ୍କବାଦୀ ସଙ୍ଗଠନ । ବିବେକାନନ୍ଦ ଇଣ୍ଟରନ୍ୟାସନାଲ ସୋସାଇଟି ଦ୍ୱାରା ହୋଇଥିବା ଏକ ଅଧ୍ୟୟନ ଅନୁସାରେ ମାଓବାଦୀଙ୍କ ଲିଙ୍କ୍ ପାକିସ୍ତାନର ଆଇଏସଆଇ ଏବଂ ଅଣ୍ଡରଓ୍ୱର୍ଲଡ ନେତାଙ୍କ ସହିତ ରହିଛି । ଅଧ୍ୟୟନ ଏହା ମଧ୍ୟ କହୁଛିଯେ, ମାଓବାଦୀଙ୍କ ଫଣ୍ଡିଂର ଆଉ ଏକ ସୋର୍ସ ହେଉଛି ବ୍ଲାକମେଲିଂ ଏବଂ ରବରୀ । ତେବେ ଏହି ଫଣ୍ଡ୍ କୁ ଅସ୍ତ୍ରଶସ୍ତ୍ର କିଣିବା ଓ ଆନ୍ଦୋଳନ ପାଇଁ ବ୍ୟବହାର କରୁଥିବା ମାଓବାଦୀଙ୍କ ସ୍ଥିତି ପୂର୍ବାପେକ୍ଷା ଦୁର୍ବଳ ହୋଇପଡ଼ିଛି ।
