ନନ୍ଦିଘୋଷ ବ୍ୟୁରୋ : ଚଳିତ ବର୍ଷ ହିଟୱେଭ ଯୋଗୁଁ ନିର୍ଦ୍ଧାରିତ ସମୟ ପୂର୍ବରୁ ବନ୍ଦ ହୋଇଥିଲା ସ୍କୁଲ। ଟାଣ ଖରା ଆସିଲା ଓ ସ୍କୁଲ ୫ ମେ ପରିବର୍ତ୍ତେ ୨୩ ଏପ୍ରିଲରୁ ବନ୍ଦ ରଖାଯାଇଥିଲା। ଏହି ସମୟ ମଧ୍ୟରେ ୧୧ ଦିନ ମଧ୍ୟାନ୍ନ ଭୋଜନ ଦିଆଯାଇ ନଥିଲା। ସେହି ୧୧ ଦିନର ଚାଉଳ ସହ ୧୧ ଦିନର ଅର୍ଥ ରାଶି ପିଲାମାନଙ୍କୁ ଦେବାକୁ PM ପୋଷଣ ନୋଡାଲ ଅଧିକାରୀ ଭବାନୀ ପ୍ରସାଦ ମିଶ୍ର ସମସ୍ତ ଜିଲ୍ଲାପାଳଙ୍କୁ ଚିଠି କରିଛନ୍ତି। ଶିଶୁ ବାଟିକାରୁ ପଞ୍ଚମ ଶ୍ରେଣୀ ଯାଏଁ ଦୈନିକ ୧୧ଟଙ୍କା ୧୫ ପଇସା ସହ ଶହେ ଗ୍ରାମ ଚାଉଳ ଓ ଷଷ୍ଠରୁ ଦଶମ ଯାଏଁ ପ୍ରତି ପିଲାଙ୍କୁ ମିଳିବ ଦୈନିକ ୧୪ ଟଙ୍କା ୭୪ ପଇସା ସହ ଏବଂ ଦେଢ଼ ଶହ ଗ୍ରାମ ଲେଖାଏଁ ଚାଉଳ ମଧ୍ୟ ମିଳିବ। ଅର୍ଥ ରାଶି ପିଲା କି ସେମାନଙ୍କ ବ୍ୟାଙ୍କ ଆକାଉଣ୍ଟକୁ ପଠାଯିବ। ସମସ୍ତ ଅର୍ଥ ରାଶି ଓ ଚାଉଳ ଯେପରି ଦିଆଯିବ ଏହାକୁ ସୁନିଶ୍ଚିତ କରିବେ ପ୍ରଧାନ ଶିକ୍ଷକ ।
ଭାରତ ଗସ୍ତରେ ଥିବା ଚୀନ୍ ବୈଦେଶିକ ମନ୍ତ୍ରୀ ୱାଙ୍ଗ ୟି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିଛନ୍ତି
ନନ୍ଦିଘୋଷ ବ୍ୟୁରୋ : ଭାରତ ଗସ୍ତରେ ଥିବା ଚୀନ୍ ବୈଦେଶିକ ମନ୍ତ୍ରୀ ୱାଙ୍ଗ ୟି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିଛନ୍ତି। ଭାରତ-ଚୀନ୍ ସମ୍ପର୍କ ଉନ୍ନତ କରିବା ବିଷୟରେ ପ୍ରଧାନମନ୍ତ୍ରୀ ମୋଦିଙ୍କ ସହ ଆଲୋଚନା କରିଥିଲେ ୱାଙ୍ଗ। ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ନିମନ୍ତ୍ରଣରେ ୱାଙ୍ଗ ୟି ଚୀନ୍-ଭାରତ ସୀମାରେ ୨୪ତମ ସ୍ୱତନ୍ତ୍ର ପ୍ରତିନିଧି ସ୍ତରୀୟ ଆଲୋଚନା ପାଇଁ ଭାରତ ଆସିଛନ୍ତି। ସେ ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କ ସହ ମଧ୍ୟ କଥା ହୋଇଛନ୍ତି। ସେପଟେ ଏସସିଓ ଶିଖର ସମ୍ମିଳନୀରେ ନିମନ୍ତ୍ରଣ ପାଇଁ ରାଷ୍ଟ୍ରପତି ସି ଜିନପିଙ୍ଗଙ୍କୁ ଧନ୍ୟବାଦ ଜଣାଇଛନ୍ତି ପ୍ରଧାନମନ୍ତ୍ରୀ ମୋଦି।ଗତବର୍ଷ କାଜାନରେ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ସାକ୍ଷାତ ପରେ ଭାରତ-ଚୀନ୍ ସମ୍ପର୍କରେ ଉନ୍ନତି ଘଟିଛି ବୋଲି କହିଛନ୍ତି ପିଏମ ମୋଦି। ସାଂଘାଇ ସହଯୋଗ ସଂଗଠନ SCO ଶିଖର ସମ୍ମିଳନୀ ସମୟରେ ଟିଆନଜିନ୍ରେ ପରବର୍ତ୍ତୀ ସାକ୍ଷାତ ପାଇଁ ଅପେକ୍ଷା କରିଛି ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୩୧ ଅଗଷ୍ଟରୁ ୧ ସେପ୍ଟେମ୍ବର ପର୍ଯ୍ୟନ୍ତ ଚୀନ୍ର ତିଆନଜିନ୍ରେ ଅନୁଷ୍ଠିତ ହେବାକୁ ଥିବା ଏସସିଓ ସମ୍ମିଳନୀରେ ଯୋଗଦେବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଚୀନ୍ ଗସ୍ତ ବହୁତ ଗୁରୁତ୍ୱପୂର୍ଣ୍ଣ ହେବ ବୋଲି କହିଛନ୍ତି ଏନଏସଏ ଅଜିତ ଡୋଭାଲ। ..ସେପଟେ ରୁଷଗସ୍ତରେ ବୈଦେଶିକ ମନ୍ତ୍ରୀ ଏସ ଜୟଶଙ୍କର। ଭାରତ-ରୁଷ ସମ୍ପର୍କ ନେଇ ରାଷ୍ଟ୍ରପତି ବ୍ଲାଦିମିର ପୁଟିନଙ୍କୁ ସାକ୍ଷାତ କରିବେ ଜୟଶଙ୍କର। ଆମେରିକାର ଟାରିଫ ଆକ୍ସନ ପରେ ପୁଟିନ-ଜୟଶଙ୍କର ସାକ୍ଷାତକୁ ଅତି ଗୁରୁତ୍ଵ ଦିଆଯାଉଛି।
ବିସ୍ଫୋରଣ ଆଡ଼କୁ ଗତି କରୁଛି HIV, ସମଲିଙ୍ଗୀ ଅପ୍ରାକୃତିକ ଯୌନ ସମ୍ପର୍କରୁ ବଢୁଛି ସଂକ୍ରମଣ
ନନ୍ଦିଘୋଷ ବ୍ୟୁରୋ: ରାଜ୍ୟକୁ ଏଚଆଇଭି ବିପଦ । ଘାଣ୍ଟି ହେଉଛନ୍ତି ଯୁବ ଗୋଷ୍ଠୀ । ଓଡ଼ିଶା ରାଜ୍ୟ ଏଡସ୍ ନିୟନ୍ତ୍ରଣ ସୋସାଇଟିର ରିପୋର୍ଟ ଅନୁସାରେ ପୁରୁଷ ସହ ପୁରୁଷଙ୍କ ଅପ୍ରାକୃତିକ ଯୌନ ସମ୍ପର୍କ ଯୋଗୁଁ ଏଚଆଇଭି ପଜିଟିଭଙ୍କ ସଂଖ୍ୟା ବଢିବାରେ ଲାଗିଛି । ଯେଉଁଥିରୁ ପାଖାପାଖି ଅଧା ହେଉଛନ୍ତି ଯୁବ ଗୋଷ୍ଠୀ । ସେପଟେ ପଞ୍ଜିକୃତ ଏଡସ୍ ରୋଗୀଙ୍କ ଭିତରୁ ୩ ହଜାରରୁ ଅଧିକଙ୍କ ପତ୍ତା ନ ମିଳୁଥିବାରୁ ସଂକ୍ରମଣ ବୃଦ୍ଧିର ଭୟ ଦେଇ ଗତି କରୁଛି ଓଡ଼ିଶା ।
ସଂକ୍ରମଣରୁ ବିସ୍ଫୋରଣ ଆଡ଼କୁ ଗତି କରୁଛି ଏଚଆଇଭି । ତା’ କବଳରେ ପଡ଼ିଯାଇଛନ୍ତି ଯୁବ ଗୋଷ୍ଠୀ । କାରଣ ଯୁବ ଗୋଷ୍ଠୀ ଏବେ ସମଲିଙ୍ଗୀ ଅପ୍ରାକୃତିକ ଯୌନ ସମ୍ପର୍କରେ ବ୍ୟସ୍ତ । ୧୭ରୁ ୩୫ ବର୍ଷ ବୟସର ୪୧ ପ୍ରତିଶତ ଯୁବଗୋଷ୍ଠୀ ଏଚଆଇଭି ପଜିଟିଭ ଥିବା ଓଡ଼ିଶା ରାଜ୍ୟ ଏଡସ୍ ନିୟନ୍ତ୍ରଣ ସୋସାଇଟିର ରିପୋର୍ଟ କହୁଛି । ଶିକ୍ଷାନୁଷ୍ଠାନ ଗୁଡ଼ିକରେ ଏପରି ଅପ୍ରାକୃତିକ ଯୌନ ସମ୍ପର୍କ ମାମଲା ବଢୁଛି । ଗତ ଜୁଲାଇ ସୁଦ୍ଧା ୬୫ ହଜାର ୨୧୪ ଏଚଆଇଭି ପଜିଟିଭ ଚିହ୍ନଟ ହୋଇଛନ୍ତି । ଏଥିରୁ ପାଖାପାଖି ୨୬ ହଜାର ୭୩୭ ସଂକ୍ରମିତଙ୍କ ବୟସ ୧୭ରୁ ୩୫ ଭିତରେ । ଶିକ୍ଷାନୁଷ୍ଠାନ ହଷ୍ଟେଲରେ ଏପରି ଅପ୍ରାକୃତିକ ଯୌନ ସମ୍ପର୍କ ରଖିବାର ସମ୍ଭାବନା କମ ରହୁଥିବାରୁ ଅଧିକାଂଶ ପିଲାମାନେ ଘରୋଇ ମେସ୍ ବା ରୁମ୍ ଭଡ଼ା ନେଇ ରହୁଛନ୍ତି । ଯୁବ ବର୍ଗଙ୍କ ମଧ୍ୟରେ ଅପ୍ରାକୃତିକ ଯୌନ ସମ୍ପର୍କ ଯାହା ଏଚଆଇଭିକୁ ଆମନ୍ତ୍ରଣ ଦେଉଛି । ଯେଉଁମାନଙ୍କ ଭିତରେ ପ୍ରତିଶେଧକ ଶକ୍ତି କମ୍ ରହିଥାଏ ସେମାନେ ଏଡସ୍ ଆଡ଼କୁ ଠେଲି ହୋଇ କଲବଲରେ ଜୀବନ ହାରନ୍ତି । ୧୩ ହଜାର ୧୭୭ ଏଚଆଇଭି ପଜିଟିଭଙ୍କ ମୃତ୍ୟୁ ହୋଇଥିବା ସରକାରୀ ସ୍ତରରେ ରିପୋର୍ଟ ହୋଇଛି ।
ବିପଦ ଏତିକିରେ ସରିନି। ପଞ୍ଜିକୃତ ୬୫ ହଜାର ୨୧୪ ଏଚଆଇଭି ପଜିଟିଭଙ୍କ ଭିତରୁ ୩୯୯୮ ସଂକ୍ରମିତଙ୍କ ପତ୍ତା ମିଳୁନି । ଏମାନଙ୍କ ଭିତରୁ ଅନେକ ରାଜ୍ୟ ବାହାରକୁ ଚାଲି ଯାଇଛନ୍ତି ବା କିଛି ଲୋକ ବାହାର ରାଜ୍ୟରୁ ଆସି ଓଡ଼ିଶାରେ ଟେଷ୍ଟିଂ କରିଛନ୍ତି । ଏପରିକି କିଛି ଲୋକ ସମାଜ ବାସନ୍ଦ ଭୟରେ ନିଜ ଭୁଲ ପରିଚୟ ଦେଇଥିବା କଥା ଯାଞ୍ଚ ପରେ ଜଣାପଡ଼ିଛି । ଏହି ନିଖୋଜ ଏଚଆଇଭି ପିଜିଟିଭ ସଂକ୍ରମିତଙ୍କ ସହ ଅଜାଣତରେ ଯଦି କେହି ଶାରୀରିକ ସଂପର୍କ ରଖନ୍ତି ପରିସ୍ଥିତି ସଙ୍ଗୀନ ହୋଇଯିବ ।
ଏଚଆଇଭ ପିଜିଟିଭରୁ ଏଡସ୍ । ଏହାର କୌଣସି ଚିକତ୍ସା ନାହିଁ। ହେଲେ ଏଚଆଇଭି ପିଜିଟିଭ ଜଣାପଡ଼ିବା ମାତ୍ରେ ସଂକ୍ରମିତଙ୍କୁ ଆଣ୍ଟି ରେଟ୍ରୋଭାଇରାଲ ଥେରାପି ଏଆରଟି ଦେବା କଥା । ତେବେ ୬୫ ହଜାର ୨୧୪ ସଂକ୍ରମିତଙ୍କ ମଧ୍ୟରୁ ୫୫ ହଜାର ୧୪୨ ଜଣ ଏଆରଟି ପଞ୍ଜିକରଣ କରିଛନ୍ତି । ବାକି ୧୦ ହଜାର ୧୨୯ ଏଆରଟି ପଞ୍ଜିକରଣ କରି ନଥିବାରୁ ଚିନ୍ତା ଆହୁରି ବଢିଛି ।
ଓଡ଼ିଶାରେ ଆରମ୍ଭ ହେବ SIR: କଂଗ୍ରେସର ବିରୋଧ, ବିଜେଡିର ସ୍ବାଗତ
ନନ୍ଦିଘୋଷ ବ୍ୟୁରୋ: ଓଡ଼ିଶାରେ ଲାଗୁ ହେବ SIR ବା ଭୋଟର ତାଲିକାରେ ସ୍ବତନ୍ତ୍ର ସଂଶୋଧନ ପ୍ରକ୍ରିୟା । ୭ ଜାନୁଆରୀ ୨୦୨୬ରେ ପ୍ରକାଶ ପାଇବ ଚୂଡ଼ାନ୍ତ ଭୋଟର ତାଲିକା । ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ଏଭଳି ସୂଚନା ପରେ ଆରମ୍ଭ ହୋଇଛି ରାଜନୈତିକ ବୟାନବାଜି । କଂଗ୍ରେସ ସ୍ବାଭାବିକ ଭାବେ ଏହାକୁ ବିରୋଧ କରିଥିବା ବେଳେ, ପଦକ୍ଷେପକୁ ସ୍ବାଗତ କରିଛି ବିଜେଡି । ସଂଶୋଧନ ଆଳରେ କୌଣସି ଭୋଟରଙ୍କୁ ମତଦାନରୁ ବଞ୍ଚିତ କରା ନଯାଉ ବୋଲି ବିଜେଡି କହିଥିବା ବେଳେ, ବିଜେପି ମଧ୍ୟ ସ୍ବତନ୍ତ୍ର ସଂଶୋଧନକୁ ସ୍ବାଗତ କରିଛି । ଅନ୍ୟପଟେ ଆଇନ ମନ୍ତ୍ରୀ କଂଗ୍ରେସର ଆଭିମୁଖ୍ୟକୁ କରିଛନ୍ତି କଡ଼ା ସମାଲୋଚନା ।
ଓଡ଼ିଶାରେ ଆରମ୍ଭ ହେବ ସ୍ବତନ୍ତ୍ର ଭୋଟର ସଂଶୋଧନ ପ୍ରକ୍ରିୟା । ବିହାରରେ ଏସଆଇଆରକୁ ନେଇ ଦେଶବ୍ୟାପୀ ଚର୍ଚ୍ଚା ହେଉଥିବା ବେଳେ ଓଡ଼ିଶାରେ ଏହି ପ୍ରକ୍ରିୟା ଆରମ୍ଭ ହେବ । ମୁଖ୍ୟ ନିର୍ବାଚନ ଅଧିକାରୀଙ୍କ ସୂଚନା ପରେ ଏହା ଉପରେ ପ୍ରତିକ୍ରିୟା ରଖିଛନ୍ତି ବିଭିନ୍ନ ରାଜନୈତିକ ଦଳ । କଂଗ୍ରେସ ସ୍ବାଭାବିକ ଭାବେ ଏହାକୁ ବିରୋଧ କରିଥିବା ବେଳେ, ବିଜେପି ଓ ବିଜେଡି ଏହାକୁ ସ୍ବାଗତ କରିଛନ୍ତି । ୪୨ ଲକ୍ଷ ଭୋଟରଙ୍କୁ ନେଇ ଓଡ଼ିଶାରେ ସନ୍ଦେହ ଅଛି ବୋଲି କଂଗ୍ରେସ ଅଭିଯୋଗ କରିଛି । ଆଗକୁ ଦଳ ପକ୍ଷରୁ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ । ଏହି ପ୍ରସଙ୍ଗରେ କଂଗ୍ରେସର ଅଭିଯୋଗକୁ ଆଇନମନ୍ତ୍ରୀ କଡ଼ା ଭାଷାରେ ସମାଲୋଚନା କରିଛନ୍ତି । ଅନେକ ମୃତ ଓ ଗୋଟିଏ ଜାଗାରୁ ଅନ୍ୟ ଜାଗାକୁ ସ୍ଥାନାନ୍ତର ହୋଇଥିବା ଭୋଟରଙ୍କ ବାବଦରେ ସଠିକ ତଥ୍ୟ ପାଇଁ ଏସଆଇଆର ଲାଗୁ ହେବା ଗଣତନ୍ତ୍ର ପାଇଁ ଶୁଭଙ୍କର ବୋଲି କହିଛନ୍ତି ଆଇନମନ୍ତ୍ରୀ ।
ଗଣତନ୍ତ୍ରରେ ସବୁ କିଛି ଠିକ୍ ଚାଲିବାର ଅଛି । ସମସ୍ତଙ୍କ ଭୋଟ ଦେବାର ଅଧିକାର ଅଛି । ସ୍ବତନ୍ତ୍ର ଭୋଟର ସଂଶୋଧନ ପ୍ରକ୍ରିୟାକୁ ବିଜେଡି ସ୍ବାଗତ କରିଛି । ସେହିପରି କୌଣସି ଭୋଟର ଯେପରି ମତଦାନରୁ ବଞ୍ଚିତ ନ ହୁଅନ୍ତି, ସେଥିପ୍ରତି ନିର୍ବାଚନ କମିଶନ ଯତ୍ନବାନ ହେବା ଉଚିତ ବୋଲି କହିଛି ବିଜେଡି । ସେପଟେ ବିଜେପି କହିଛି, ଏସଆଇଆରକୁ ଆମେ ବିରୋଧ କରୁନାହୁଁ । ଭୋଟର ତାଲିକା ସଂଶୋଧନ ହେବା କଥା । ଅନେକ ଦିନ ଧରି ରାଜ୍ୟରେ ସ୍ବତନ୍ତ୍ର ସଂଶୋଧନ ହୋଇ ନଥିଲା । କଂଗ୍ରେସ କେବଳ ବିଭ୍ରାନ୍ତ କରୁଛି କହିଛି ବିଜେପି । ରାଜ୍ୟରେ ପ୍ରାୟ ୭ ହଜାର ୨ଟି ଜାଗାରେ ଥିବା ଭୋଟର ଓ ମୃତ ଭୋଟରଙ୍କ ନାମ ତାଲିକାରୁ ହଟାଯାଇଛି । ଜାନୁଆରୀ ମାସରେ ପ୍ରକାଶ ପାଇବ ଚୂଡ଼ାନ୍ତ ଭୋଟର ତାଲିକା ।
ଦେଶରେ ବଢିଲା ଉପରାଷ୍ଟ୍ରପତି ନିର୍ବାଚନ ପାରା, ଶାସକ ଓ ବିରୋଧୀ ଦଳର ପ୍ରାର୍ଥୀ ଚୂଡାନ୍ତ
ନନ୍ଦିଘୋଷ ବ୍ୟୁରୋ: ଉପରାଷ୍ଟ୍ରପତି ନିର୍ବାଚନ ଲାଗି ଏନଡିଏ ଓ ଇଣ୍ଡିମେଣ୍ଟ ପ୍ରାର୍ଥୀ ଘୋଷଣା ପରେ ସଂଖ୍ୟା ଗଣିତକୁ ନେଇ ଆରମ୍ଭ ହୋଇଛି ରାଜନୀତି । ଉପରାଷ୍ଟ୍ରପତି ନିର୍ବାଚନ ପାଇଁ ୩୯୨ ସାଂସଦଙ୍କ ଭୋଟ ଆବଶ୍ୟକ । ନିର୍ବାଚନ ସମୀକରଣ ଓ ସଂଖ୍ୟା ଦୃଷ୍ଟିରୁ ଏନଡିଏ ପଲ୍ଲା ଭାରି ରହିଛି । ଉଭୟ ଏନଡିଏ ଓ ଇଣ୍ଡିମେଣ୍ଟ ପ୍ରାର୍ଥୀ ଘୋଷଣା ପରେ ନିଜ ପ୍ରାର୍ଥୀ ପାଇଁ ସମର୍ଥନ ଯୋଗାଡ କରିବାରେ ଲାଗିଛନ୍ତି । ବିଜେଡି କହିଛି ଦଳର ସଭାପତି ନବୀନ ପଟ୍ଟନାୟକ ଉପରାଷ୍ଟ୍ରପତି ନିର୍ବାଚନ ନେଇ ନିଷ୍ପତ୍ତି ନେବେ ।
ଏନଡିଏର ଉପରାଷ୍ଟ୍ରପତି ପ୍ରାର୍ଥୀ ସିପି ରାଧାକ୍ରିଷ୍ଣନ ଓ ବିରୋଧୀ ଇଣ୍ଡିମେଣ୍ଟର ଉପରାଷ୍ଟ୍ରପତି ପ୍ରାର୍ଥୀ ହୋଇଛନ୍ତି ଜଷ୍ଟିସ ସୁଦର୍ଶନ ରେଡ୍ଡୀ । ଅଗଷ୍ଟ ୨୧ରେ ପ୍ରାର୍ଥିପତ୍ର ଦାଖଲର ଶେଷ ତାରିଖ ଥିବା ବେଳେ ପ୍ରାର୍ଥୀ ଘୋଷଣା ପରେ ଆରମ୍ଭ ହୋଇଛି ସଂଖ୍ୟା ଗଣିତର ଅଙ୍କକଷା । ଉପରାଷ୍ଟ୍ରପତି ନିର୍ବାଚନ ପାଇଁ ୩୯୨ ସାଂସଦଙ୍କ ଭୋଟ ଆବଶ୍ୟକ । ମୋଟ ୭୮୨ ଜଣ ସାଂସଦ ଉପରାଷ୍ଟ୍ରପତି ନିର୍ବାଚନ ପାଇଁ ମତଦାନ କରିବେ । ଯେଉଁଥିରେ ଲୋକସଭାର ୫୪୨ ଓ ରାଜ୍ୟସଭାର ୨୪୦ ସାଂସଦ ଭୋଟ ଦେବେ । ସଂଖ୍ୟା ଗଣିତର ହିସାବ ଅନୁସାରେ ଲୋକସଭାରେ ୫୪୨ ଜଣ ସାଂସଦଙ୍କ ମଧ୍ୟରେ ଏନଡିଏ ପାଖରେ ୨୯୩ ଜଣ ଓ ଇଣ୍ଡିମେଣ୍ଟ ପାଖରେ ୨୪୯ ଜଣ ସାଂସଦ ରହିଛନ୍ତି । ସେହିପରି ରାଜ୍ୟସଭାରେ ୨୪୦ ଜଣ ସାଂସଦଙ୍କ ମଧ୍ୟରୁ ୧୩୪ ଜଣ ସରକାରଙ୍କ ସହ ଥିବା ବେଳେ ବିରୋଧୀଙ୍କ ସହ ୧୦୬ ଜଣ ଅଛନ୍ତି । ଏନଡିଏ ପାଖରେ ମୋଟ ୪୨୩ ଜଣ ସାଂସଦ ଥିବା ବେଳେ ଇଣ୍ଡିମେଣ୍ଟ ପାଖରେ ୩୧୩ ଜଣ ସାଂସଦ ଅଛନ୍ତି । ବିଜେଡି କିନ୍ତୁ ଏଯାଏଁ କାହାକୁ ସମର୍ଥନ କରିବ ସେନେଇ ସସପେନ୍ସ ଜାରି ରହିଛି । ବିଜେଡି ବିଧାୟକ ଧୃବ ସାହୁ କହିଛନ୍ତି ବିଜେଡି ସଂସଦୀୟ ଦଳ ଅଧ୍ୟକ୍ଷ ନବୀନ ପଟ୍ଟନାୟକ ଏ ସଂପର୍କରେ ଚୂଡାନ୍ତ ନିଷ୍ପତ୍ତି ନେବେ ।
ସଂଖ୍ୟା ଗଣିତରେ ଏନଡିଏ ଆଗରେ ରହିଛି । ସେପ୍ଟେମ୍ବର ୯ ତାରିଖରେ ଉପରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବ । ଯିଏ ବି ଉପରାଷ୍ଟ୍ରପତି ଭାବେ ନିର୍ବାଚିତ ହେବେ ୨୦୩୦ ଯାଏଁ କାର୍ଯ୍ୟକାଳ ରହିବ । ବିଜେପି କହିଛି ବିଜେଡି କ’ଣ ନିଷ୍ପତ୍ତି ନେବ ତାହା ତାଙ୍କ ଦଳର ନିଷ୍ପତ୍ତି । ବିଜେପି ପାଖରେ ଆବଶ୍ୟକ ସଂଖ୍ୟା ରହିଛି । ତେଣୁ ବିଜେଡି ନିଷ୍ପତ୍ତି ନେଇ କିଛି କହିବା ଠିକ ନୁହେଁ ବୋଲି ବରିଷ୍ଠ ବିଜେପି ବିଧାୟକ ଜୟ ନାରାୟଣ ମିଶ୍ର କହିଛନ୍ତି । କଂଗ୍ରେସ କହିଛି ସଂଖ୍ୟା ଯାହା ଥାଉ ଇଣ୍ଡିମେଣ୍ଟ କଡା ଟକ୍କର ଦେବ । ଅଣ ଏନଡିଏ ଦଳ ଗୁଡ଼ିକ ଉପରାଷ୍ଟ୍ରପତି ନିର୍ବାଚନ ନେଇ ଇଣ୍ଡିମେଣ୍ଟକୁ ସମର୍ଥନ କରିବେ ।
ଉପରାଷ୍ଟ୍ରପତି ନିର୍ବାଚନ ଯେତିକି ପାଖେଇ ଆସୁଛି ରାଜନୈତିକ ଉଷ୍ମତା ସେତିକି ବଢିବାରେ ଲାଗିଛି । ଉଭୟ ଏନଡିଏ ଓ ଇଣ୍ଡିମେଣ୍ଟ ନାମାଙ୍କନ ଦାଖଲ ପୂର୍ବରୁ ସମର୍ଥନ ଯୋଗାଡ କରିବାରେ ଲାଗିଛନ୍ତି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ କେନ୍ଦ୍ରମନ୍ତ୍ରୀ ରାଜନାଥ ସିଂହ ଏନଡିଏକୁ ସହଯୋଗର ପ୍ରସ୍ତାବ ଦେଇଥିବା ଚର୍ଚ୍ଚା ହେଉଛି ।
ପୋଲାଭରମ ପ୍ରକଳ୍ପ ଓଡ଼ିଶା ପାଇଁ ବଢାଇଲାଣି ବିପଦ, ବାରମ୍ବାର ତ୍ରୁଟିପୂର୍ଣ୍ଣ ନିର୍ମାଣ କରିବ ବ୍ୟାପକ କ୍ଷତି
ନନ୍ଦିଘୋଷ ବ୍ୟୁରୋ: ପୋଲଭରମ ପ୍ରକଳ୍ପକୁ ନେଇ ଓଡିଶା ପ୍ରତି ବିପଦ ବଢୁଥିବା ଅଭିଯୋଗ । ପ୍ରଥମେ ଡ୍ୟାମ ଉଚ୍ଚତା ବଢାଇ ଓଡିଶା ପ୍ରତି ବିପଦ ବଢ଼ାଇଥିବା ଆନ୍ଧ୍ର ସରକାର ପରେ ଡିୱାଲ ଓ ଏବେ ତ୍ରୁଟିପୂର୍ଣ୍ଣ କୋଫର ଡ୍ୟାମ ଭାଙ୍ଗିବା ପରେ ବଢିଛି ବିପଦ । ପୋଲଭରମ ପ୍ରକଳ୍ପ ନିର୍ମାଣକୁ ସମ୍ପୂର୍ଣ୍ଣ ତ୍ରୁଟିପୂର୍ଣ୍ଣ ବୋଲି କହିବା ସହ ଏହାକୁ ରାଜ୍ୟ ସରକାର ତୁରନ୍ତ ତଦାରଖ କରିବାକୁ ଦାବି ରଖିଛନ୍ତି ଜଳ ବିଶେଷଜ୍ଞ ଓ ଗଣ ସଂଗଠନ। ଆନ୍ଧ୍ର କ’ଣ କରୁଛି ତାକୁ ଅନୁସରଣ କରିବା ନିହାତି ଦରକାର । ନ ହେଲେ ଆନ୍ଧ୍ରର ମନଇଚ୍ଛା କାମ ଓଡିଶାକୁ ଆହୁରି ପ୍ରଭାବିତ କରିବ ବୋଲି ଆଶଙ୍କା ପ୍ରକାଶ କଲେ ଜଳ ବିଶେଷଜ୍ଞ ।
ପ୍ରକଳ୍ପର କୋଫର ଡ୍ୟାମ ଭାଙ୍ଗିବା ପରେ ବଜ୍ର ମାଡି ଆସୁଥିବା କହିଛନ୍ତି ବିଶେଷଜ୍ଞ । ଯୁଦ୍ଧକାଳୀନ ଭିତ୍ତିରେ ଆନ୍ଧ୍ର ସରକାର ପୋଲାଭରମ ପ୍ରକଳ୍ପ କାମ କରୁଛନ୍ତି । ଦିନକୁ ଦିନ ନୂଆ ନୂଆ ପଦକ୍ଷେପ ଓଡ଼ିଶା ପାଇଁ ଚିନ୍ତାର କାରଣ ପାଲଟିଛି । ପୋଲଭରମ ପ୍ରକଳ୍ପ ନିର୍ମାଣକୁ ସମ୍ପୂର୍ଣ୍ଣ ତ୍ରୁଟିପୂର୍ଣ୍ଣ ବୋଲି କହିବା ସହ ଏହାକୁ ରାଜ୍ୟ ସରକାର ତୁରନ୍ତ ତଦାରଖ କରିବାକୁ ଦାବି ରଖିଛନ୍ତି ଜଳ ବିଶେଷଜ୍ଞ । ମୁଖ୍ୟ ଡ୍ୟାମକୁ ସୁରକ୍ଷା ଦେବା ପାଇଁ କୋଫର ଡ୍ୟାମ କାମ କରେ । ପୋଲଭରମ ପ୍ରକଳ୍ପର ସମ୍ପୂର୍ଣ୍ଣ ଡିଜାଇନରେ ତ୍ରୁଟି ରହିଥିବା ଅଭିଯୋଗ ଆଣିଛନ୍ତି ଜଳ ବିଶେଷଜ୍ଞ । ପ୍ରକଳ୍ପର ଡିୱାଲ ମଧ୍ୟ ତ୍ରୁଟିପୂର୍ଣ୍ଣ ବୋଲି ଅଭିଯୋଗ ହୋଇଛି । ପ୍ରକଳ୍ପ କିଭଳି ନିର୍ମାଣ ହେଉଛି ? କ’ଣ ତ୍ରୁଟି ରହୁଛି ? ଆମ ସରକାର ଏସବୁ ଜାଣିବା ଆବଶ୍ୟକ ବୋଲି ଦାବି ହୋଇଛି । ପୋଲାଭରମ ଡ୍ୟାମ ୪୫ ମିଟର ଉଚ୍ଚତାରେ ନିର୍ମାଣ ହେଉଛି । ୫୦ ଲକ୍ଷ କ୍ୟୁସେକ ବନ୍ୟା ଜଳ ପ୍ରବାହିତ ହେବ । ପଛୁଆ ବନ୍ୟା ଜଳ ଆସିବା ଫଳରେ ୧୪୫ ମିଟର ପର୍ଯ୍ୟନ୍ତ ପର୍ଯ୍ୟନ୍ତ ସାବେରୀ ନଦୀରେ ଜଳ ଆସିବ । ତେଣୁ ଏସବୁକୁ ପୁଙ୍ଖାନୁପୁଙ୍ଖ ଦେଖିବା ଆବଶ୍ୟକ । ଆନ୍ଧ୍ରର ମନଇଚ୍ଛା କାମ ଓଡିଶାକୁ ଆହୁରି ପ୍ରଭାବିତ କରିବ ବୋଲି ଆଶଙ୍କା ବଢିଛି ।
ସେପଟେ ପୋଲାଭରମ ଓଡିଶା ପାଇଁ ଏକ ଅଭିଶାପ ବୋଲି ଅଭିଯୋଗ ହୋଇଛି । ରାଜ୍ୟର ୨୦ ସାଂସଦ ଶାସକ ଦଳର କିନ୍ତୁ ଓଡିଶା ଭାଗ୍ୟ କଳା ବାଦଲ ତଳେ ଚାପି ହୋଇଯାଇଛି ବୋଲି କହିଛି ଆମ ଜନତା ଅଧିକାର । ବର୍ତ୍ତମାନ ରାଜନୈତିକ ବାଧ୍ୟବାଧକତା ଓ ଚାପ ପକାଇ ତ୍ରୁଟିପୂର୍ଣ୍ଣ କାମ କରି ନେଉଛନ୍ତି ଆନ୍ଧ୍ର ସରକାର, କିନ୍ତୁ ଓଡିଶା ଚୁପ । ଏନେଇ ରାଜ୍ୟ ସରକାର ଶ୍ବେତପତ୍ର ପ୍ରକାଶ କରନ୍ତୁ ବୋଲି ଦାବି ହୋଇଛି । ପୋଲଭରମ ପ୍ରକଳ୍ପରେ କୋଫର ଡ୍ୟାମ ଭାଙ୍ଗିବା ପରେ ବି ସରକାର ନିରବ କାହିଁକି ବୋଲି ପ୍ରଶ୍ନ ଉଠାଇଛି ସିଟିଜେନସ ଫୋରମ ।
ପୋଲାଭରମ ପ୍ରକଳ୍ପକୁ ନେଇ ପୂର୍ବ ସରକାର ବହୁ ଆନ୍ଦୋଳନ କରିଥିବା ବେଳେ ରାଜ୍ୟର ସ୍ୱାର୍ଥ ରକ୍ଷା ପାଇଁ ଦାବି କରୁଥିଲେ । କିନ୍ତୁ ଏବେକା ସରକାର କାହିଁକି ଚୁପ ତାକୁ ନେଇ ପ୍ରଶ୍ନ ଉଠାଇଛନ୍ତି ବହୁ ସଂଗଠନ ଓ ବିଶେଷଜ୍ଞ ।
ମାଗଣାରେ କେହି କାହାକୁ କିଛି ଦିଏନି: ପାକିସ୍ତାନ ସମ୍ପତ୍ତି ଉପରେ କବଜା କଲା IMF
ନନ୍ଦିଘୋଷ ବ୍ୟୁରୋ: କାଳ କାଳରୁ କଥା ରହି ଆସିଛି । କେହି କେବେ କିଛି କାହାକୁ ଏମିତିରେ ମାଗଣାରେ ଦେଇ ନଥାଏ । ଯଦି ଏକଥା ବିଶ୍ବାସ ହେଉନି ତେବେ ପାକିସ୍ତାନ ଅବସ୍ଥାକୁ ଦେଖନ୍ତୁ । ଆଇଏମଏଫ ପାକିସ୍ତାନକୁ କୋଟି କୋଟି ଡଲାର ଦେବା ପରେ ଲାଗୁଥିଲା ପାକିସ୍ତାନର ୫ ଆଙ୍ଗୁଳି ଏବେ ଘିଅରେ ବୁଡ଼ିଛି । ହେଲେ ଏବେ ଜଣାପଡୁଛି, ଫଣ୍ଡ ଦେଇ ଆଇଏମଏଫ ପାକିସ୍ତାନର ଧନ, ସମ୍ପତ୍ତି ଉପରେ କବଜା କରି ନେଇଛି । ସ୍ଥିତି ଏବେ ଏମିତି ଆଇଏମଏଫ ତରଫରୁ ପ୍ରତିଦିନ ଗୋଟିଏ ପରେ ଗୋଟିଏ ଆଦେଶ ଦିଆଯାଉଛି ଓ ପାକିସ୍ତାନ ଆଣ୍ଡେଇ, ପେଟେଇ ତାହାକୁ ପୂରଣ କରୁଛି । ଆଇଏମଏଫ ଶହବାଜ ସରିଫ ସରକାରଙ୍କୁ ଆଦେଶ ଦେଇ କହିଛନ୍ତି, ପାକିସ୍ତାନ ସେଣ୍ଟ୍ରାଲ ବ୍ୟାଙ୍କ ବୋର୍ଡରୁ ଫାଇନାନ୍ସ ସେକ୍ରେଟାରୀଙ୍କୁ ତୁରନ୍ତ ହଟାଅ । ସେତିକି ନୁହେଁ, ଆଇନ ବଦଳାଇବାକୁ ବି ଆଇଏମଏଫ ଆଦେଶ ଦେଇଛି । ଯାହାଦ୍ବାରା କେନ୍ଦ୍ର ସରକାରଙ୍କ ଅଖିସର କମର୍ସିଆଲ ବ୍ୟାଙ୍କ ଯାଞ୍ଚ କରିପାରିବେନି ।
ଆଇଏମଏଫ ଶହବାଜ ସରକାରଙ୍କୁ ଷ୍ଟ୍ରଟ ବ୍ୟାଙ୍କ ଅଫ ପାକିସ୍ତାନରେ ଖାଲି ପଡିଥିବା ଦୁଇଟି ଡେପୁଟି ଗଭର୍ଣ୍ଣର ପଦବୀ ତୁରନ୍ତ ପୂରଣ କରିବାକୁ କହିଛି । ଏହାସହ ଷ୍ଟେଟ ବ୍ୟାଙ୍କ ଅଫ୍ ପାକିସ୍ତାନ ଆଇନରେ ପରିବର୍ତ୍ତନ କରିବାକୁ କହିଛନ୍ତି । ଗତ ତିନି ବର୍ଷ ମଧ୍ୟରେ ଦ୍ବିତୀୟ ଥର ଆଇଏମଏଫ ଫାଇନାନ୍ସ ସେକ୍ରେଟାରୀଙ୍କୁ ବାହାର କରିବାକୁ କହିଛି । ପାକିସ୍ତାନ ଷ୍ଟ୍ରେଟ ବ୍ୟାଙ୍କ ଉପରେ ସରକାରଙ୍କ ପୂର୍ଣ୍ଣ ନିୟନ୍ତ୍ରଣ ଥିବା ବେଳେ ଆଇଏମଏଫ ଏମିତି ଆଦେଶ ଦେଇଛି । ୨୦୨୨ରେ ଆଇଏମଏଫ ଚାପରେ ପାକିସ୍ତାନ ସରକାର SBPକୁ ପୂର୍ଣ୍ଣ ସ୍ବାୟତ୍ତତା ଦେବା ସହ ବୋର୍ଡର ଅର୍ଥ ସଚିବଙ୍କ ଭୋଟ ଦେବା ଅଧିକାର ହଟାଇଥିଲା ।
ଅର୍ଥ ସଚିବଙ୍କୁ ନେଇ କେଁ କାହିଁକି ?
ବର୍ତ୍ତମାନ ସ୍ଥିତିରେ ଅର୍ଥ ସଚିବ ବୋର୍ଡ ସଦସ୍ୟ ହୋଇଥିଲେ ବି ତାଙ୍କର ଭୋଟ ଦେବାର ଅଧିକାର ନାହିଁ । ଏକ୍ସଚେଞ୍ଜ ରେଟ ହେଉ କି ସୁଧ ସ୍ଥିର କରିବା ଭଳି ଗୁରୁତ୍ବପୂର୍ଣ୍ଣ ନିଷ୍ପତ୍ତି ପାକିସ୍ତାନ ଟେଷ୍ଟ ବ୍ୟାଙ୍କ ପାଖରେ ନଥାଇ ମୁଦ୍ରିତ ନୀତି ସମିତି ପାଖରେ ରହିଛି । ସୋମବାର ଅର୍ଥମନ୍ତ୍ରୀ କହିଥିଲେ, ସୁଧ ହାର ସ୍ଥିର କରିବାରେ ସରକାରଙ୍କ କୌଣସି ଭୂମିକା ନାହିଁ । ଏହା ପାକିସ୍ତାନ ଟେଷ୍ଟ ବ୍ୟାଙ୍କର ଅଧିକାରୀକ କ୍ଷେତ୍ର । ଏହାସହ ସେ କହିଥିଲେ ଏକ୍ସଚେଞ୍ଚ ରେଟ ବଜାର ସ୍ଥିର କରିଥାଏ । ହେଲେ ଆଇଏମଏଫକୁ ଲାଗୁଛି କି ଅର୍ଥ ସଚିବ ବ୍ୟାଙ୍କ କାମରେ ବାଧା ସୃଷ୍ଟି କରୁଛନ୍ତି ।
SIR ବିବାଦ: ବିହାରରେ ଭୋଟର ଲିଷ୍ଟରୁ ନାଁ କଟିବା ମିଛ, ରାହୁଲଙ୍କୁ ଅଭିଯୋଗ କରିଥିବା ମହିଳାଙ୍କ ସତ ଆସିଲା ପଦାକୁ
ନନ୍ଦିଘୋଷ ବ୍ୟୁରୋ: କଂଗ୍ରେସର ଭୋଟର ଅଧିକାର ଯାତ୍ରା ସମୟରେ ରାହୁଲ ଗାନ୍ଧିଙ୍କୁ ଭେଟି ଭୋଟର ଲିଷ୍ଟରୁ ନାଁ କଟିଥିବା ଅଭିଯୋଗ କରିଥିବା ରଞ୍ଜୁ ଦେବୀଙ୍କ ସତ ପଦାକୁ ଆସିଛି । ଯାଞ୍ଚରୁ ଜଣାପଡ଼ିଛି, ରଞ୍ଜୁ ଦେବୀ ଏବଂ ତାଙ୍କ ପରିବାରର ନାମ ଭୋଟର ଲିଷ୍ଟରେ ରହିଛି । ଅର୍ଥାତ, ତାଙ୍କ ପରିବାର ନାଁ ଲିଷ୍ଟରୁ କଟିନି । ରୋହତାସ ଜିଲ୍ଲା ବାସିନ୍ଦା ରଞ୍ଜ ଦେବୀ କହିଛନ୍ତି, ତାଙ୍କ ଓ୍ବାର୍ଡ ସଚିବ କହିଥିଲେ ତାଙ୍କର ଓ ତାଙ୍କ ପରିବାରର ନାଁ ଭୋଟର ଲିଷ୍ଟରେ ନାହିଁ । ସଚିବ ଏହା ମଧ୍ୟ କହିଥିଲେ, ରାହୁଲ ଗାନ୍ଧି ଯାତ୍ରାରେ ଆସିଛନ୍ତି । ତାଙ୍କୁ ଭେଟି ଏ ନେଇ ଅଭିଯୋଗ କର । ଏହାପରେ ସେ କଂଗ୍ରେସ ନେତାଙ୍କୁ ଭେଟି ତାଙ୍କୁ ନାଁ କଟିଥିବା କହିଥିଲି ।
ଡ୍ରାଫ୍ଟ ଭୋଟର ଲିଷ୍ଟରେ ରହିଛି ନାଁ
ରଞ୍ଜୁ ଦେବୀ ସ୍ପଷ୍ଟ କରିଛନ୍ତି, ସେ ନିଜେ ଲିଷ୍ଟ ଦେଖିଛନ୍ତି । ସେଥିରେ ତାଙ୍କର ଓ ତାଙ୍କ ପରିବାରର ନାଁ ରହିଛି । ଅର୍ଥାତ ତାଙ୍କ ନାଁ ଭୋଟର ଲିଷ୍ଟରୁ କଟିନି । ଏହାମଧ୍ୟ ସେ ସ୍ବୀକାର କରିଛନ୍ତି ଯେ, ଓ୍ବାର୍ଡ ସଚିବଙ୍କ କହିବାରୁ ସେ ରାହୁଲ ଗାନ୍ଧିଙ୍କୁ ଭେଟି ନିଜ ପକ୍ଷ ରଖିଥିଲେ ।
ରାହୁଲଙ୍କ ଅଭିଯୋଗ କରିବା ଭିଡିଓ ହୋଇଥିଲା ଭାଇରାଲ
ସୂଚନାଯୋଗ୍ୟ, ରାହୁଲ ଗାନ୍ଧି ବିହାରରେ ଭୋଟର ଅଧିକାର ଯାତ୍ରା କରିବା ସମୟରେ ରଞ୍ଚୁ ଦେବୀ ତାଙ୍କୁ ଭେଟି ଅଭିଯୋଗ କରିଥିଲେ । ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଏହାପରେ ଶାସକ ଦଳ ଏବଂ ବିପକ୍ଷଙ୍କ ମଧ୍ୟରେ ଆରୋପ-ପ୍ରତ୍ୟାରୋପ ଆରମ୍ଭ ହୋଇଯାଇଥିଲା । ବିରୋଧୀ ଦଳ ଏହାକୁ ଭୋଟ ଚୋରି କହିଥିଲେ । ଏବେ ପ୍ରକୃତ ସତ ପଦାକୁ ଆସିବା ପରେ ପୂରା ଘଟଣା ବଦଳି ଯାଇଛି ।
SIRକୁ ନେଇ ବିବାଦ ଚରମରେ
ବିହାରରେ SIRକୁ ନେଇ ରାଜନୈତିକ ବିବାଦ ଚରମରେ ପହଞ୍ଚିଛି । ଆରଜେଡି ଓ କଂଗ୍ରେସ ଅଭିଯୋଗ କରୁଛନ୍ତି କି ଏନଡିଏ ସରକାର ଭୋଟର ଲିଷ୍ଟରେ ଗଡବଡ଼ି କରି ଲୋକଙ୍କୁ ଭୋଟ ଦେବା ଅଧିକାରରୁ ବଞ୍ଚିତ କରିବାକୁ ଚାହୁଁଛନ୍ତି । ସେପଟେ ସରକାର କହୁଛନ୍ତି, SIR ଏକ ନିୟମିତ ପ୍ରକ୍ରିୟା, ଏଥିରେ ପାରଦର୍ଶିତା ବଜାଇ ରଖାଯାଉଛି । ରଞ୍ଜୁ ଦେବୀଙ୍କ ମାମଲାରେ ବିରୋଧୀଙ୍କ ଅଭିଯୋଗକୁ ଦୃର୍ବଳ କରିଦେଇଛି । ଯେଉଁଥିରେ ସେମାନେ ଲିଷ୍ଟରୁ ନାଁ କଟିବା ଓ ମତଦାନ ଅଧିକାର ଛଡ଼ାଇ ନେବା ଅଭିଯୋଗ କରି ଆସୁଥିଲେ । ଏବେ ଦେଖିବାକୁ ବାକି ରହିଛି କଂଗ୍ରେସ ଓ ଆରଜେଡି ଏହାକୁ ନେଇ କି ସଫେଇ ଦେଉଛନ୍ତି ।
କଟକ-ଭୁବନେଶ୍ବର କ୍ୟାପିଟାଲ ରିଜିଅନ ରିଂ ରୋଡକୁ କେନ୍ଦ୍ର କ୍ୟାବିନେଟ ମୋହର
ନନ୍ଦିଘୋଷ ବ୍ୟୁରୋ: ବହୁ ଥର ପ୍ରତିଶ୍ରୁତି ପରେ ମିଳିଲା ପ୍ରାଶାସନିକ ଅନୁମୋଦନ । କଟକ-ଭୁବନେଶ୍ବର କ୍ୟାପିଟାଲ ରିଜିଅନ ରିଂ ରୋଡକୁ ମିଳିଛି କେନ୍ଦ୍ର କ୍ୟାବିନେଟ ମୋହର । ଏହି ରିଂ ରୋଡଟି ୬ ଲେନ ବିଶିଷ୍ଟ ହେବ । ଏହାଦ୍ବାରା ଭୁବନେଶ୍ଵର-କଟକ ଦ୍ଵୈତ ନଗରୀର ଟ୍ରାଫିକ ସମସ୍ୟା ହେବ ଦୂର । ଏଥିଲାଗି ଖର୍ଚ୍ଚ ହେବ ୮ ହଜାର ୩୦୭ କୋଟି ୭୪ ଲକ୍ଷ ଟଙ୍କା ।
ଏଥିରେ, ୧୧୧ କି.ମି. ବାଇପାସ ରାସ୍ତା ନିର୍ମାଣ ହେବ । ଖୋର୍ଦ୍ଧା ରାମେଶ୍ଵରରୁ ଟାଙ୍ଗି ପର୍ଯ୍ୟନ୍ତ ରିଂ ରୋଡ୍ ନିର୍ମାଣ ହେବ ପୂର୍ବରୁ NHAI ଅନୁମୋଦନ ନଥାଇ ବାରମ୍ବାର କରୁଥିଲା ଟେଣ୍ଡର ଆହ୍ଵାନ । ୨୦୨୪ ଅକ୍ଟୋବରରେ ରିଂ ରୋଡ୍ କାମ ଆରମ୍ଭ ନେଇ ଘୋଷଣା କରିଥିଲେ କେନ୍ଦ୍ରମନ୍ତ୍ରୀ ନିତିନ ଗଡ଼କରୀ ।
ରିଂରୋଡ ପାଇଁ ୧୫ ବର୍ଷ ତଳୁ ଦାବି ହୋଇଆସୁଥିଲା । କେତେବେଳେ ଡିପିଆର ପରିବର୍ତ୍ତନ ହେଉଥିଲା ତ ପୁଣି କେତେବେଳେ ଟେଣ୍ଡର ପ୍ରକ୍ରିୟା ପରିବର୍ତ୍ତନ ହେଉଥିଲା । ବିରୋଧୀ NHAI ଆଭିମୁଖ୍ୟକୁ ନେଇ ଅନେକ ବାର ପ୍ରଶ୍ନ ଉଠାଇଥିଲେ । ଏଥିପାଇଁ ହାଇବ୍ରିଡ ଆନୁଇଟି ମୋଡ ବା HAMରେ ଟେଣ୍ଡର ଆହ୍ଵାନ କରାଯିବ ବୋଲି କେନ୍ଦ୍ର ସରକାର ସ୍ପଷ୍ଟ କରିଛନ୍ତି ।
ଏସିଆ କପ୍: ଏହି ତାରିଖରେ ଦୁବାଇରେ ଭାରତ-ପାକିସ୍ତାନ ଟକ୍କର
ନନ୍ଦିଘୋଷ ବ୍ୟୁରୋ: ଏସିଆ କପ୍ ପାଇଁ ଟିମ୍ ଇଣ୍ଡିଆ ଘୋଷଣା ହେବା ପରେ ଏବେ ଚର୍ଚ୍ଚା ଭାରତ ଓ ପାକିସ୍ତାନ ମ୍ୟାଚକୁ ନେଇ । ନ୍ୟୁଟ୍ରାଲ ଭେନ୍ୟୁ ଦୁବାଇରେ ଦୁଇ ଦେଶ ପରସ୍ପରକୁ ଭେଟିବେ । ସବୁ ବେଳେ ଭାରତ ଓ ପାକିସ୍ତାନ ମ୍ୟାଚ୍ ହାଇ-ଭୋଲଟେଜ ହୋଇଥିବା ବେଳେ ସାରା ବିଶ୍ବର କ୍ରିକେଟ ପ୍ରେମୀ ଏହାକୁ ଅନାଇ ବସିଥାନ୍ତି । ତେବେ ଭାରତୀୟ ଟିମ୍ ଘୋଷଣା ସହ ଦୁବାଇରେ ଦୁଇ ଦେଶ ମଧ୍ୟରେ ଟକ୍କର ହେବାକୁ ଥିବା ବେଳେ ଏହାର ତାରିଖ ବି ସ୍ପଷ୍ଟ ହୋଇ ଯାଇଛି ।
ଆଜି ଟିମ୍ ଇଣ୍ଡିଆ ଘୋଷଣା ହୋଇଛି । ସୂର୍ଯ୍ୟକୁମାର ଯାଦବଙ୍କ ନେତୃତ୍ବରେ ପଡ଼ିଆକୁ ଓହ୍ଲାଇବ ମେନ୍ ଇନ୍ ବ୍ଲ୍ୟୁ । ସେହିପରି ଦୁଇଦିନ ପୂର୍ବରୁ ପାକିସ୍ତାନ ୧୭ ଜଣିଆ ଟିମ୍ ଘୋଷଣା କରିଥିଲା । ସଲମାନ ଅଲ୍ଲୀ ଆଗାଙ୍କ ନେତୃତ୍ବରେ ପାକିସ୍ତାନ ଟିମ୍ ଏସିଆ କପ୍ ଖେଳିବ । ତେବେ ଚର୍ଚ୍ଚାର କେନ୍ଦ୍ର ପାଲଟି ଥିବା ଭାରତ-ପାକିସ୍ତାନ ମ୍ୟାଚ୍ କେବେ ଅଛି ଜାଣିଛନ୍ତି କି ? ଯଦି ନା, ତେବେ ଆପଣଙ୍କ ପାଇଁ କହି ରଖୁଛୁ ଏସିଆ କପ୍ ସିଡ୍ୟୁଲ ଅନୁସାରେ ସେପ୍ଟେମ୍ବର ୧୪ ତାରିଖରେ ଦୁବାଇରେ ହେବ ଏହି ମହା-ମୁକାବିଲା । ତେବେ ରାଜନୈତିକ ଅସ୍ଥିରତା ମଧ୍ୟରେ ଭାରତ-ପାକିସ୍ତାନ ମୁକାବିଲା ହେବ ନାହିଁ ବୋଲି ମଧ୍ୟ ଚର୍ଚ୍ଚା ହେଉଥିଲା । ହେଲେ, ଟିମ୍ ଇଣ୍ଡିଆ ଘୋଷଣା ପରେ ଦର୍ଶକ ପୁଣି ଥରେ ଆଉ ଏକ ହାଇ-ଭୋଲଟେଜ୍ ମ୍ୟାଚ୍ ଦେଖିବାକୁ ଯାଉଥିବା ସ୍ପଷ୍ଟ ହୋଇଛି ।
ଟି-୨୦ ଫର୍ମାଟରେ ଖେଳାଯିବ ଏସିଆ କପ୍
୨୦୨୫ ଏସିଆ କପ୍ ଟି-୨୦ ଫର୍ମାଟରେ ଖେଳାଯିବ । ୨୦୨୨ରେ ଟି-୨୦ ଫର୍ମାଟରେ ହୋଇଥିବା ଏସିଆ କପ୍ ଜିତିଥିଲା । ଫାଇନାଲରେ ଶ୍ରୀଲଙ୍କା ପାକିସ୍ତାନକୁ ହରାଇଥିଲା ।
ଟିମ୍ ଇଣ୍ଡିଆ
ସୂର୍ଯ୍ୟକୁମାର ଯାଦବ (ଅଧିନାୟକ), ଶୁବମନ ଗିଲ (ଉପଅଧିନାୟକ), ଅଭିଶେକ ଶର୍ମା, ତିଲକ ବର୍ମା, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ଅକ୍ଷର ପଟେଲ, ଜିତେଶ ଶର୍ମା, ଜସପ୍ରିତ ବୁମ୍ରା, ବରୁଣ ଚକ୍ରବର୍ତ୍ତି, ଅର୍ଶଦୀପ ସିଂ, କୁଲଦୀପ ଯାଦବ, ସଞ୍ଜୁ ସ୍ୟାମସଙ୍ଗ ଏବଂ ହର୍ଷିତ ରାଣା ।
ପାକିସ୍ତାନ ଟିମ୍
ସଲମାନ ଅଲ୍ଲୀ ଆଗା (ଅଧିନାୟକ), ଅବରାର ଅହମଦ, ଫହିନ ଅଶରଫ, ଫଖର ଜମାର, ହାରିଶ ରଉଫ, ହସନ ଅଲ୍ଲୀ, ହସନ ନଓ୍ବାଜ, ହୁସେନ ତଲତ, ଖୁଶଦିଲ ଶାହ, ମୋହମ୍ମଦ ହାରିସ (ଓ୍ବିକେଟ କିପର), ମୋହମ୍ମଦ ନଓ୍ବାଜ, ମୋହମ୍ମଦ ଓ୍ବସିମ ଜୁନିୟର, ସାହିବଜାଦା ଫରହାନ, ସଇମ ଅୟୁବ, ସଲମାନ ମିର୍ଜା, ଶାହିନ ଶାହ ଅଫରିଦ ଏବଂ ସୁଫିୟାନ ମୋକିମ ।