spot_img
Home Blog Page 5873

ରାତି ୮ଟାରେ ରାଜ୍ୟବାସୀଙ୍କୁ ବାର୍ତ୍ତା ଦେବେ ମୁଖ୍ୟମନ୍ତ୍ରୀ

ଭୁବନେଶ୍ୱର: ରାତି ୮ଟାରେ ରାଜ୍ୟବାସୀଙ୍କୁ ସମ୍ବୋଧନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗୋଟେପଟେ କୋଭିଡ ମହାମାରୀର ଦ୍ୱିତୀୟ ଲହରୀ ସମଗ୍ର ବିଶ୍ୱରେ ତାଣ୍ଡବ ରଚାଇଛି । ରାଜ୍ୟରେ ମଧ୍ୟ ଦୈନିକ ସଂକ୍ରମଣ ବୃଦ୍ଧି ଘଟିବାରେ ଲାଗିଛି । ଏଭଳି ସ୍ଥିତିରେ ରାଜ୍ୟବାସୀଙ୍କୁ ବାର୍ତ୍ତା ଦେବେ ମୁଖ୍ୟମନ୍ତ୍ରୀ ।

ଦେଶର ଅଧିକାଂଶ ରାଜ୍ୟରେ ଅକ୍ସିଜେନ ସଙ୍କଟ ଏବଂ କୋଭିଡ ମାମଲା ବୃଦ୍ଧି ନିୟନ୍ତ୍ରଣ ବାହାରକୁ ଚାଲିଯାଇଥିବା ବେଳେ ଓଡିଶାରେ ସ୍ଥିତି ଏବେ ବି ଆୟତରେ । ସରକାରଙ୍କ ଆଗୁଆ ପଦକ୍ଷେପ ଯୋଗୁଁ ରାଜ୍ୟରେ ସଂକ୍ରମଣକୁ ରୋକାଯାଇପାରିଛି । ଅଧିକ ଟେଷ୍ଟ ଯୋଗୁଁ ସଂକ୍ରମିତଙ୍କ ସଂଖ୍ୟା ବଢୁଥିବା ବେଳେ ନିୟନ୍ତ୍ରଣରେ ରହିଛି କରୋନା ।

କରୋନାର ଟ୍ରିପଲ ମ୍ୟୁଣ୍ଟାଟକୁ ସୀମାରେ ହି ଚେକ ଦେଇଛନ୍ତି ସରକାର । ଫଳରେ ଏବେ ସୁଦ୍ଧା ରାଜ୍ୟରେ ଗୋଟିଏ ବି ଟ୍ରିପଲ ମ୍ୟୁଟାଣ୍ଟ ସଂକ୍ରମିତ ଚିହ୍ନଟ ହୋଇନାହାନ୍ତି । ଅନ୍ୟପଟେ ରାଜ୍ୟର ସମସ୍ତ ସହରାଞ୍ଚଳରେ ଦୁଇ ଜିନିଆ ସଟଡାଉନ ମଧ୍ୟ ଜାରି କରିଛନ୍ତି ରାଜ୍ୟ ସରକାର । ଏଭଳି ସମୟରେ ମୁଖ୍ୟମନ୍ତ୍ରୀଙ୍କ ବାର୍ତ୍ତା ଗୁରୁତ୍ୱ ବହନ କରୁଛି ।

ପବଜି ଖେଳ ସାଜିଲା କାଳ, ଟ୍ରେନ ଧକ୍କାରେ ଛାତ୍ରଙ୍କ ମୃତ୍ୟୁ

ଖୋର୍ଦ୍ଧା: ପବଜି ଖେଳିବା ହେଲା କାଳ । ଅକାଳରେ ଟ୍ରେନ ଧକ୍କାରେ ଚାଲିଗଲା ଛାତ୍ରଙ୍କ ଜୀବନ । ସୂଚନା ମୁତାବକ ବାଲୁଗାଁ ଥାନା ଗଙ୍ଗାଧରପୁର ରେଳ ଷ୍ଟେସନରେ ପ୍ରଶାନ୍ତ ବେହେରା ନାମକ ଜଣେ ଛାତ୍ରଙ୍କ ମୃତ୍ୟୁ ହୋଇଛି । ପନ୍ଦର ବର୍ଷୀୟ ଶୁସାନ୍ତ ବେହେରା ମୋବାଇଲେ ପବଜି ଖେଳୁଥିବାବେଳେ ଅନ୍ୟ ମନସ୍କ ହୋଇ ରେଳ ଧାରଣା ନିକଟକୁ ଚାଲି ଆସିଥିଲେ । ଠିକ ସେତିକିବେଳେ ପଛପଟୁ ଆସୁଥିବା ଏକ ଟ୍ରେନ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ପ୍ରଶାନ୍ତ ବେହେରାଙ୍କ ପୁଅ ଶୁସାନ୍ତଙ୍କ ମୃତ୍ୟୁ ହୋଇଥିବା ଜଣାପଡିଛି ।

ଟ୍ରେନ୍ ଚାଳକଙ୍କ ଠାରୁ ଖବର ପାଇ ଗଙ୍ଗାଧରପୁର ଅଗ୍ନିଶମ ବାହିନୀ ଘଟଣା ସ୍ଥଳରେ ପହଁଚିଥିଲା । ଗୁରୁତର ଅବସ୍ଥାରେ ଛାତ୍ରଙ୍କୁ ଉଦ୍ଧାର କରିବା ସହ ଟାଙ୍ଗୀ ମେଡିକାଲରେ ଭର୍ତ୍ତି କରିଥିଲା । ଡାକ୍ତରଙ୍କ ଆପ୍ରାଣ ଉଦ୍ୟମ ସ୍ୱତେ ଶୁସାନ୍ତ ବଞ୍ଚି ପାରିନଥିଲେ । ମେଡିକାଲରେ ଟାଙ୍ଗୀ ପୋଲିସ ପହଁଚିବା ସହ ଶବ ଜବତ କରି ତଦନ୍ତ ଚଳାଇଥିବା ଜଣାପଡିଛି ।

କରୋନା ନେଇଥିଲା ଝିଅ ଜୀବନ, ଏବେ ତା’ ୧୫ ଲକ୍ଷ ଏଫଡି ଟଙ୍କାରେ କରୁଛନ୍ତି କୋଭିଡ ରୋଗୀଙ୍କ ଚିକିତ୍ସା

ଅହମଦାବାଦ: କରୋନା ଭାଇରସ ସହ ଲଢୁଥିବା ରୋଗୀଙ୍କୁ ସହାୟତାର ହାତ ବଢ଼ାଇଛନ୍ତି ଅହମଦାବାର ଦମ୍ପତ୍ତି । ଗୁଜୁରାଟର ଅହମଦାବାଦରେ ବାସ କରୁଥିବା ରସିକ ମେହତା ଏବଂ ତାଙ୍କ ସ୍ତ୍ରୀ କଳ୍ପନା ଜୀବନ ସହ ସଂଘର୍ଷ କରୁଥିବା କରୋନା ରୋଗୀଙ୍କୁ ସାହାଯ୍ୟ କରୁଛନ୍ତି । ବିଗତ ବର୍ଷ ୨୦୨୦ରେ କରୋନା ଭାଇରସର ପ୍ରଥମ ପର୍ଯ୍ୟାୟରେ ତାଙ୍କ ଏକମାତ୍ର ଝିଅର ମୃତ୍ୟୁ ହୋଇଥିଲା । କିନ୍ତୁ ଏବେ କେହି ଯେମିତି କରୋନାରେ ମୃତ୍ୟୁବରଣ ନକରନ୍ତୁ ସେଥିପାଇଁ ଝିଅ ପାଇଁ କରିଥିବା ୧୫ ଲକ୍ଷଟଙ୍କାର ଏଫଡି କରୋନା ରୋଗୀଙ୍କ ଚିକିତ୍ସାରେ ଲଗାଉଛନ୍ତି । ସୂଚନା ମୁତାବକ ସେ ଏଯାବତ ୨୦୦ ଆଇସୋଲେଟେଡ ରୋଗୀଙ୍କୁ କରୋନା କିଟ୍ ପ୍ରଦାନ କରିସାରିଛନ୍ତି । କେବଳ ସେତିକି ନୁହେଁ, ନିଜ ଖର୍ଚ୍ଚରେ ୩୫୦ରୁ ଅଧିକ ଲୋକଙ୍କୁ ସେ କରୋନା ଟିକା ମଧ୍ୟ ଲଗାଇସାରିଛନ୍ତି ।

ମେହେତା ଦମ୍ପତ୍ତିଙ୍କ କହିବା ଅନୁଯାୟୀ, ନିଜ ଏକମାତ୍ର ଝିଅକୁ ହରାଇବା ପରେ, କରୋନା ଭାଇରସ କାରଣରୁ ଅସୁବିଧାର ସମ୍ମୁଖୀନ ହେଉଥିବା ଲୋକଙ୍କୁ ସହାୟତା କରିବାକୁ ଚିନ୍ତା କଲେ । ଏହା ପରେ ସେ ପ୍ରତିଦିନ ସକାଳେ ଏଭଳି ଲୋକଙ୍କ ସନ୍ଧାନରେ ବାହାରିପଡ଼ନ୍ତି, ଯେଉଁମାନେ ଟିକା ନେବାରୁ ବଞ୍ଚିତ ଅଛନ୍ତି । ଏହାପରେ ଏମିତି ଲୋକଙ୍କୁ ନିଜ କାରରେ ଭାକସିନ ଲଗାଇବା ପାଇଁ ଟିକାକରଣ କେନ୍ଦ୍ରକୁ ନେଇଯାଆନ୍ତି । ତାଙ୍କ କହିବା ଅନୁଯାୟୀ, କରୋନା ମହାମାରୀ ଯୋଗୁଁ କେହି ଯେମିତି କୌଣସି ପ୍ରକାର ଅସୁବିଧାର ସମ୍ମୁଖୀନ ନହୁଅନ୍ତୁ ଏହା ତାଙ୍କର ପ୍ରୟାସ ।

ଇଂରାଜୀ ଶିକ୍ଷୟତ୍ରୀଙ୍କ ଆତ୍ମହତ୍ୟା, ପ୍ରଥମେ ଦେଖିଲେ ବୟଫ୍ରେଣ୍ଡ..

ଭୁବନେଶ୍ୱର: ଇଂରାଜୀ ଶିକ୍ଷୟତ୍ରୀଙ୍କ ଝୁଲନ୍ତା ମୃତ ଦେହ ଉଦ୍ଧାର । ଭୁବନେଶ୍ୱରର ସିଦ୍ଧେଶ୍ୱର ନଗରର ଏକ ବନ୍ଦ କଠୋରୀରେ ଶବନମ ବର୍ମା ନାମକ ଯୁବତୀ ବେକରେ ପ୍ଲାଷ୍ଟିକ ରାଶି ଦେଇ ଆତ୍ମହତ୍ୟା କରିଥିବା ନେଇ ଅଭିଯୋଗ ହୋଇଛି । ସେପଟେ କୋଠରୀରେ ଯୁବତୀ ଜଣଙ୍କ ମୃତଦେହକୁ ପ୍ରଥମେ ଝଲନ୍ତା ଅବସ୍ଥାରେ ଦେଖିଥିଲେ ତାଙ୍କ ପୁରୁଷ ବନ୍ଧୁ ।

ପରେ ପୁରୁଷ ବନ୍ଧୁ ଜଣଙ୍କ ଏନେଇ ଘର ମାଲିକଙ୍କୁ ଜଣାଇଥିଲେ । ଘର ମାଲିକ ପୋଲିସକୁ ଜଣାଇବା ପରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ପୋଲିସ ବୟଫ୍ରେଣ୍ଡକୁ ଥାନାରେ ଅଟକ ରଖି ପଚରାଉଚରା କରୁଛି । ଯୁବତୀ ଜଣଙ୍କ ଇଂରାଜୀ ଶିକ୍ଷୟତ୍ରୀ ଥିବା ବେଳେ ସେ ତାଙ୍କ ପୁରୁଷ ବନ୍ଧୁଙ୍କ ସହ ରହୁଥିବା ଜାଣିବାକୁ ମିଳିଛି  । ସେପଟେ କେଉଁ କାରଣରୁ ଯୁବତୀ ଆତ୍ମହତ୍ୟା କରିଛନ୍ତି କିମ୍ବା ତାଙ୍କୁ ହତ୍ୟା କରାଯାଇଛି ସେନେଇ ପୋଲିସ ତଦନ୍ତ ଜାରି ରଖିଛି  ।

ବାହାର ଜିଲ୍ଲାର ଲୋକଙ୍କୁ ସ୍ୱର୍ଗଦ୍ୱାର ମନା, ସଂସ୍କାର ହେବନାହିଁ ମୃତଦେହ

ପୁରୀ: ଆସନ୍ତାକାଲି ଅର୍ଥାତ ସୋମବାରୁ ଠାରୁ ପୁରୀ ବାହାର ଜିଲ୍ଲାର ଲୋକଙ୍କୁ ସ୍ୱର୍ଗଦ୍ୱାର ମନା । ଦିନକୁ ଦିନ ରାଜ୍ୟ ରେ କୋଭିଡ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବାକୁ ପୁରୀ ପ୍ରଶାସନ ନେଇଛି ଏହି ପଦକ୍ଷେପ । ପୁରୀକୁ ଅଧିକ ରୁ ଅଧିକ ଶବ ସଂସ୍କାର ପାଇଁ ବିଭିନ୍ନ ଜିଲ୍ଲାରୁ ଲୋକେ ଆସୁଛନ୍ତି । ତେଣୁ କୋଭିଡ ବ୍ୟାପିବାର ଆଶଙ୍କା ଦେଖି ପୁରୀ ପ୍ରଶାସନ ଏହି ନିଷ୍ପତି ନେଇଛି ।

ସେପଟେ କୋଭିଡ ସଂକ୍ରମିତଙ୍କ ଶବସଂସ୍କାର ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି। ଏହା ସହ ଅସ୍ତିବିର୍ସଜନ ଉପରେ ମଧ୍ୟ କଟକଣା ଲଗାଯାଇଛି। ବିଶେଷକରି ମହୋଦଧିରେ ଅସ୍ତି ବିର୍ସଜନ ଏବଂ ଶ୍ରାଦ୍ଧ କରିବାପାଇଁ ବିଭିନ୍ନ ଜିଲ୍ଲାରୁ ଲୋକମାନେ ଆସିଥାନ୍ତି । ତେଣୁ କୋଭିଡ ସମୟରେ ଏତେ ସଂଖ୍ୟକ ଲୋକଙ୍କୁ ଦୂରରେ ରଖିବାପାଇଁ ପ୍ରଶାସନ ପକ୍ଷରୁ ଏଭଳି ପଦକ୍ଷେପ ନିଆଯାଇଛି ।

ମନ୍ତ୍ରୀଙ୍କ ଆକାଉଣ୍ଟରୁ ମିଥ୍ୟା ଖବର, ସୋସିଆଲ ସାଇଟ ହ୍ୟାକ ହୋଇଥିବା ଅଭିଯୋଗ

ଭୁବନେଶ୍ୱର: ଗଣଶିକ୍ଷା ମନ୍ତ୍ରୀଙ୍କ ସୋସିଆଲ ମିଡିଆ ସାଇଟକୁ ହ୍ୟାକ କରିନେଲେ ଦୁର୍ବୁତ୍ତ । ଫେସବୁକ ଏବଂ ଟ୍ୱିଟର ଉଭୟ ସାଇଟ ହ୍ୟାକ ହୋଇଥିବା ନେଇ ସୂଚନା ଦେଇଛନ୍ତି ମନ୍ତ୍ରୀ ସମୀର ରଞ୍ଜନ ଦାସ । ମନ୍ତ୍ରୀଙ୍କ ଟ୍ୱିଟର ଆକାଉଣ୍ଟରୁ ଏକ ଖବର ପୋଷ୍ଟ କରାଯାଇଥିଲା । ଦଶମ ଶ୍ରେଣୀ ବୋର୍ଡ ପରୀକ୍ଷା ପୁନର୍ବାର ହେବା ନେଇ କୁହାଯାଇଥିଲା । ଏହି ପୋଷ୍ଟ ସତ୍ୟ ନୁହେଁ, ଏହାକୁ ଜଣେ ହ୍ୟାକର ପୋଷ୍ଟ କରିଥିବା ନେଇ କହିଛନ୍ତି ମନ୍ତ୍ରୀ ।

ଦଶମ ଶ୍ରେଣୀ ବୋର୍ଡ ପରୀକ୍ଷାକୁ ଗଣଶିକ୍ଷା ବିଭାଗ ପକ୍ଷରୁ ବାତିଲ କରାଯାଇଥିବାବେଳେ ଏହି ନିଷ୍ପତ୍ତିରେ ପରିବର୍ତ୍ତନ ହୋଇଥିବା ନେଇ ଟ୍ବିଟ କରାଯାଇଥିଲା । ଯାହାକୁ ନେଇ ପୁନର୍ବାର ଦ୍ୱନ୍ଦରେ ପଡିଥିଲେ ଛାତ୍ରଛାତ୍ରୀ । ସେପଟେ ଏ ବିଷୟରେ ମନ୍ତ୍ରୀ ସମୀର ଦାସ ଜାଣିବା ପରେ ତୁରନ୍ତ ସ୍ପଷ୍ଟୀକରଣ ରଖିଥିଲେ ।

କେହି ଜଣେ ଦୁର୍ବୁତ୍ତ ତାଙ୍କ ଆକାଉଣ୍ଟକୁ ହ୍ୟାକ କରିବା ସହ ପୋଷ୍ଟ କରାଯାଇଥିବା ଉକ୍ତ ଖବର ମିଥ୍ୟା ଏବଂ ଭିତ୍ତିହୀନ ବୋଲି ମନ୍ତ୍ରୀ କହିଥିଲେ । ଏଭଳି ଖବରରୁ ଦୂରେଇ ରୁହନ୍ତୁ, ସରକାରଙ୍କ ପକ୍ଷରୁ ଯାହା ଗୁରୁତ୍ୱପୂର୍ଣ୍ଣ ଘୋଷଣା କରାଯିବ ତାହା ଉଚିତ ମାଧ୍ୟମରେ ଜଣାଇ ଦିଆଯିବ ବୋଲି କହିଛନ୍ତି ଗଣ ଶିକ୍ଷାମନ୍ତ୍ରୀ ।

ଦେଶବ୍ୟାପି ସ୍ୱାସ୍ଥ୍ୟ କେନ୍ଦ୍ରରେ ସ୍ଥାପନ ହେବ ୫୫୧ ପିଏସ୍‌ଏ ଅକ୍ସିଜେନ ପ୍ଲାଣ୍ଟ, ପିଏମ କେୟାର ଫଣ୍ଡରୁ ମିଳିଲା ମଞ୍ଜୁରୀ

ନୂଆଦିଲ୍ଲୀ: ଦେଶର ବିଭିନ୍ନ ଜନସ୍ୱାସ୍ଥ୍ୟ କେନ୍ଦ୍ରରେ ୫୫୧ଟି ‘ପ୍ରେସର୍‌ ସ୍ୱିଙ୍ଗ୍‌ ଆଡ୍‌ସର୍ପସନ୍‌’ (ପିଏସ୍‌ଏ) ସ୍ଥାପନ ନିମନ୍ତେ ‘ପିଏମ୍‌ କେୟାର୍ସ ଫଣ୍ଡ୍‌’ରୁ ଅର୍ଥ ମଞ୍ଜୁର କରାଯାଇଥିବା କଥା ଜଣାପଡ଼ିଛି। ଯେତେ ଶୀଘ୍ର ସମ୍ଭବ ଏହି ପ୍ଲାଣ୍ଟ୍‌ ସବୁକୁ କାର୍ଯ୍ୟକ୍ଷମ କରିବା ନିମନ୍ତେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ନିର୍ଦେଶ ଦେଇଛି। ଏହି ପ୍ଲାଣ୍ଟ୍‌ ସବୁ ଜିଲ୍ଲାସ୍ତରରେ ଅକ୍ସିଜେନ୍‌ ମିଳିବାରେ ସୁବିଧା କରାଇବ।

ଏ ସଂକ୍ରାନ୍ତରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଜାରି କରିଥିବା ବିବୃତିରେ ଉଲ୍ଲେଖ ଅଛି ଯେ, ଏହି ପ୍ଲାଣ୍ଟ୍‌ଗୁଡ଼ିକ ଚିହ୍ନିତ ସରକାରୀ ଡାକ୍ତରଖାନା ମାନଙ୍କରେ ସ୍ଥାପନ କରାଯିବ ଏବଂ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ଜରିଆରେ ଅକ୍ସିଜେନ୍‌ ଯୋଗାଡ଼ କରାଯିବ।

 

ଜିଲ୍ଲା ମୁଖ୍ୟାଳୟରେ ଥିବା ଡାକ୍ତରଖାନାମାନଙ୍କରେ ‘ପିଏସ୍‌ଏ ଅକ୍ସିଜେନ୍‌ ଜେନେରେସନ୍‌ ପ୍ଲାଣ୍ଟ୍‌’ ସ୍ଥାପନ କରାଯିବାର ମୁଖ୍ୟ ଉଦ୍ଦେଶ୍ୟ‌ ହେଉଛି ଜନସ୍ୱାସ୍ଥ୍ୟ ବିଭାଗକୁ ଆହୁରି ସୁଦୃଢ଼ କରିବା ଏବଂ ପ୍ରତ୍ୟେକ ହସ୍ପିଟାଲ୍‌ରେ ଅକ୍ସିଜେନ୍ ପ୍ରସ୍ତୁତି ସୁବିଧା ରହିଛି ବୋଲି ସୁନିଶ୍ଚିତ ହେବା। ଏହାଦ୍ୱାରା ଡାକ୍ତରଖାନା ଏବଂ ଜିଲ୍ଲାରେ ଦୈନନ୍ଦିନ ଦରକାର ହେଉଥିବା ଅକ୍ସିଜେନ୍‌ ଆବଶ୍ୟକତା ପୂରଣ କରିବା । ଏଥିସହ ‘ଲିକ୍ୟୁଇଡ୍‌ ମେଡିକାଲ୍‌ ଅକ୍ସିଜେନ୍‌’ ମଧ୍ୟ ‘କ୍ୟାପ୍ଟିଭ୍ ଅକ୍ସିଜେନ୍‌ ଜେନେରେସନ୍‌’ ବ୍ୟବସ୍ଥା ପୂରଣ କରିବାରେ ସହାୟକ ହେବ।

ଯୋଗୀ କହୁଛନ୍ତି ଅମ୍ଲଜାନ ଅଛି କିନ୍ତୁ ଗ୍ରାଉଣ୍ଡ ଜିରୋରେ ଅବସ୍ଥା ଏମିତି

ଲକ୍ଷ୍ନୌ: ଦୃତ ଗତିରେ ବଢ଼ୁଥିବା କରୋନା ଏବଂ ଅକ୍ସିଜେନ ସିଲିଣ୍ଡରର ଅଭାବ କାରଣରୁ ଉତ୍ତର ପ୍ରଦେଶର ଅବସ୍ଥା ଖୁବ ଦୟନୀୟ ହୋଇପଡ଼ିଛି । ଅକ୍ସିଜେନ ଏକ୍ସପ୍ରେସ ପହଞ୍ଚିବା ସତ୍ତ୍ୱେ ଅବସ୍ଥାରେ କିଛି ଖାସ ସୁଧାର ଦେଖିବାକୁ ମିଳିନି । ଏହି ଘଡ଼ିସନ୍ଧି ମୁହୂର୍ତ୍ତରେ କିଛି ସହୃଦୟ ବ୍ୟକ୍ତି ସହାୟତାର ହାତ ବଢ଼ାଉଥିବାବେଳେ ଆଉ କେହି କେହି ଅସହାୟଙ୍କୁ ଠକିବାରେ ପଛଘୁଞ୍ଚା ଦେଉନାହାନ୍ତି । ରାଜଧାନୀ ଲକ୍ଷ୍ନୌରେ ଅକ୍ସିଜେନ ଗ୍ୟାସ ଏଜେନ୍ସିର ଲାଇସେନ୍ସ ଏକ୍ସପାୟାର ହୋଇଯାଇଥିବା ସତ୍ତ୍ୱେ ଜଣେ ବ୍ୟବସାୟୀ ଏହାର ସପ୍ଲାଇ କରିଥିବା ସୂଚନା ମିଳିଛି । କେବଳ ସେତିକି ନୁହେଁ କୋଭିଡ ଭୟାବହତାର ଭାଇଦା ଉଠାଇବାକୁ ଯାଇ ଅକ୍ସିଜେନ ସିଲିଣ୍ଡରର ସିଫିଲିଙ୍ଗ୍ କରି ଚଢ଼ା ଦରରେ ବିକ୍ରି କରିଥିଲା । କୃଷ୍ଣା ନଗର ପୋଲିସ ଅଭିଯୁକ୍ତକୁ ଗିରଫ କରି ତା ପାଖରୁ ୫୪ ଅକ୍ସିଜେନ ସିଲିଣ୍ଡର ଏବଂ ରିଫିଲିଙ୍ଗ୍ କରୁଥିବା ଉପକରଣକୁ ଜବତ କରିଛି ।

ଜବତ ହେଲା ୫୪ ଅକ୍ସିଜେନ ସିଲିଣ୍ଡର

କୃଷ୍ଣାନଗର ପୋଲିସ ସୂଚନା ପାଇଥିଲା ଯେ ପାକରି ଅଞ୍ଚଳରେ ଥିବା ମାରୁତି ମେଡିକାଲର ମାଲିକ କୌଶଲ କଟିୟାର ଅକ୍ସିଜେନର ବ୍ଲାକ -ମାର୍କେଟିଂ କରୁଛି । ପୋଲିସ ଟିମ୍ ସେଠାରେ ଚଢ଼ାଉ କରି କୌଶଲଙ୍କୁ କାବୁ କରିଥିଲା । ପୋଲିସ ଘଟଣାସ୍ଥଳରୁ ୫୪ ଅମ୍ଳଜାନ ସିଲିଣ୍ଡର ଜବତ କରିଛି । ପଚରାଉଚରା ବେଳେ ଅଭିଯୁକ୍ତ କହିଛନ୍ତି ଯେ, ୨୦୧୯ ମସିହାରେ ତାର ଅମ୍ଳଜାନ ଗ୍ୟାସ ଏଜେନ୍ସିରୁ ଲାଇସେନ୍ସ ଥିଲା। ସେ ଡାକ୍ତରଖାନା ଏବଂ ଅନ୍ୟାନ୍ୟ ସ୍ଥାନକୁ ଅମ୍ଳଜାନ ସିଲିଣ୍ଡର ଯୋଗାଉଥିଲା | ସମ୍ପ୍ରତି ତାଙ୍କର ଲାଇସେନ୍ସ ଏକ୍ସପାୟର ହୋଇଯାଇଛି । ଏହାକୁ ଗୋପନ ରଖିସେ ଡାକ୍ତରଖାନା ଏବଂ ନର୍ସିଂହୋମରେ ଅମ୍ଳଜାନ ସିଲିଣ୍ଡର ଯୋଗାଉଥିବା କହିଛି ।

ମହଙ୍ଗା ଦରରେ କଳା ମାର୍କେଟିଂ

ଅଭିଯୁକ୍ତ ଜଣଙ୍କ ପୋଲିସକୁ କହିଛି ଯେ, ସେ ଦରୋଗାଖେଡାର ପରେହାଟ ଅମ୍ଳଜାନ ଫିଲ୍ଂ କେନ୍ଦ୍ରରେ ରିଫିଲିଂ କରୁଥିଲା । ସେ ଦୀର୍ଘ ଦିନ ଧରି ଅମ୍ଳଜାନ ଯୋଗାଉଥିଲେ, ତେଣୁ ପାରେହାଟ ଅମ୍ଳଜାନ ଫିଲିଂ କେନ୍ଦ୍ରର ଲୋକମାନେ ତାଙ୍କୁ କେବେ ତାଙ୍କ ଲାଇସେନ୍ସ ମାଗିନଥିଲେ। ପୋଲିସ କହିଛି ଯେ ଅଭିଯୁକ୍ତ ସିଲିଣ୍ଡର ବିକ୍ରି କରୁଥିଲେ, କିନ୍ତୁ ଲୋକଙ୍କୁ କେବେ ବିଲ୍ ଦେଉନଥିଲେ।

ଦିଲ୍ଲୀରେ ଦୟନୀୟ ସ୍ଥିତି, କରୋନାରେ ୪ ପ୍ରବାସୀ ଓଡିଆଙ୍କ ମୃତ୍ୟୁ

ନୂଆଦିଲ୍ଲୀ: ଦିନକୁ ଦିନ ଦିଲ୍ଲୀରେ ବଢି ଚାଲିଛି କରୋନା ସଂକ୍ରମଣ । ଏପଟେ ପରିସ୍ଥିତିକୁ ଅଧିକ ଜଟିଳ କରିଛି ମେଡିକାଲରେ ବେଡ ଓ ଅକ୍ସିଜେନ୍ ଅଭାବ । ସମସ୍ତ ଦିଲ୍ଲୀ ବାସୀ ଓ ପ୍ରବାସୀଙ୍କ ମଧ୍ୟରେ ସୃଷ୍ଟି ହୋଇଛି ଆତଙ୍କ । ଏହାରି ଭିତରେ ଚାରି ଜଣ ଓଡ଼ିଆଙ୍କ ମଧ୍ୟ ଦିଲ୍ଲୀରେ ମୃତ୍ୟୁ ହୋଇଛି । ଏନେଇ ଦିଲ୍ଲୀରେ ଓଡ଼ିଆଙ୍କ ସ୍ବାସ୍ଥ୍ୟ ସୁରକ୍ଷା ପାଇଁ ସ୍ଥାନୀୟ ସରକାର ପଦକ୍ଷେପ ନେବାକୁ ଦାବି ହୋଇଛି ।

କରୋନା ପାଇଁ ଦିଲ୍ଲୀର ଦୟନୀୟ ପରିସ୍ଥିତି । ଭୂତାଣୁ ଭୟରେ ସବୁଠି ହାହାକାର । ଦେଶର ରାଜଧାନୀରେ ଚାଲି ଗଲା ଚାରି ଚାରି ଜଣ ଓଡ଼ିଆ ପ୍ରବାସୀଙ୍କ ଜୀବନ । ଏହାକୁ ନେଇ ଉଦବେଗ ପ୍ରକାଶ କରିଛି ଦିଲ୍ଲୀ ଓଡ଼ିଆ ମହାମଞ୍ଚ ଏବଂ ବୁଦ୍ଧିଜୀବୀ ସଂଗଠନ । ଏଭଳି ପରିସ୍ଥିତିରେ ଓଡ଼ିଶା ସରକାର ଭଳି ଦିଲ୍ଲୀ ସରକାର ଓଡ଼ିଆଙ୍କ ସ୍ବାସ୍ଥ୍ୟ ସୁରକ୍ଷା ପାଇଁ ପଦକ୍ଷେପ ନେବାକୁ ଦାବି ହୋଇଛି ।

ସେପଟେ ସଂକ୍ରମଣ ରୋକିବାକୁ ପୁଣି ଦିଲ୍ଲୀ ସରକାରଙ୍କ ଆଉ ସପ୍ତାହେ ଲକଡାଉନ୍ ନିଷ୍ପତ୍ତି । ଆପ୍ରାଣ ଉଦ୍ୟମ ସତ୍ୱେ ପରିସ୍ଥିତିରେ ସୁଧାର ନ ଆସିବାରୁ ଏଭଳି ନିଷ୍ପତ୍ତି ନେଇଛନ୍ତି ସରକାର । ଦିଲ୍ଲୀରେ ଅକ୍ସିଜେନ୍ ଅଭାବ ରହିଛି । ଯଦି ପ୍ରଦୂଷଣ ବଢେ ତାହା ପରିସ୍ଥିତି ଆହୁରି ଅଧିକ ଜଟିଳ କରିବ । ଲକଡାଉନ୍ ହିଁ ଏହାକୁ ରୋକିବାର ଏକ ମାତ୍ର ବିକଳ୍ପ ବୋଲି ଦିଲ୍ଲୀରେ କାର୍ଯ୍ୟରତ ଡାକ୍ତର ନିହାର ପରିଡା ମତ ଦେଇଛନ୍ତି ।

ଦିଲ୍ଲୀରେ କରୋନା ହାହାକାର: ଶ୍ମଶାନରେ ଜାଗାର ଅଭାବ, ପାର୍କରେ ହେବ ଅନ୍ତିମ ସଂସ୍କାର

ନୂଆଦିଲ୍ଲୀ: ଦେଶର ରାଜଧାନୀ ଦିଲ୍ଲୀରେ କରୋନା ଭାଇରସ ଆତଙ୍କ ଜାରି ରହିଛି । ପ୍ରତିଦିନ ନୂଆ ସଂକ୍ରମଣ ମାମଲା ସାମ୍ନାକୁ ଆସିବା ସହିତ କରୋନା କବଳରେ ଶହ ଶହ ଲୋକ ମୃତ୍ୟୁବରଣ କରୁଛନ୍ତି । ପରିସ୍ଥିତି ଏତେ ବିଗିଡ଼ିଲାଣି ଯେ, ଶବକୁ ଜାଳିବା ପାଇଁ ଶ୍ମଶାନରେ ଲମ୍ବା ଲାଇନ ଲାଗିଛି । ଦିଲ୍ଲୀର ସରାଇ କାଲେ ଖାନରେ ପରିସ୍ଥିତି ଏପରି ଅଛି ଯେ ମୃତ ଶରୀରଗୁଡ଼ିକର ପାର୍କରେ ଅନ୍ତିମ ସଂସ୍କାର କରାଯାଉଛି ।

ଦିଲ୍ଲୀର ସରାୟ କାଲେ ଖାନରେ ଶ୍ମଣାନ ଅଛି, କିନ୍ତୁ ପ୍ରତିଦିନ କରୋନାରେ ଏତେ ସଂଖ୍ୟାରେ ମୃତ୍ୟୁ ହେଉଛି ଯେ ସେଠାରେ ସମସ୍ତଙ୍କ ଶବ ସଂସ୍କାର କରିବା ସମ୍ଭବପର ହେଉନାହିଁ । ସେଥିପାଇଁ ସରାୟ କାଲେ ଖାନରେ ଥିବା ଏକ ସବୁଜୀମା ପାର୍କରେ ଯେଉଁଠାକୁ ଲୋକମାନେ ବୁଲିବା ପାଇଁ ଆସନ୍ତି, ସେଠାରେ ମୃତକଙ୍କ ଅନ୍ତିମ ସଂସ୍କାର କରିବା ପାଇଁ ବ୍ୟବସ୍ଥା କରାଯାଉଛି ।

ସରାୟ କାଲେ ଖାନରେ ଥିବା ପାର୍କରେ ଶବ ସଂସ୍କାର ପାଇଁ ନୂଆ ପ୍ଲାଟଫର୍ମ ପ୍ରସ୍ତୁତ କରାଯାଉଛି । ବର୍ତ୍ତମାନ ସେଠାରେ ୨୦ଟି ପ୍ଲାଟଫର୍ମ ପ୍ରସ୍ତୁତ କରାଯାଉଛି । ପାର୍କର ଅନ୍ୟ ପାଶ୍ୱରେ ୫୦ ପ୍ଲାଟଫର୍ମ ପ୍ରସ୍ତୁତ କରାଯାଉଛି । ପ୍ଲାଟଫର୍ମ ପ୍ରସ୍ତୁତ କରୁଥିବା ଠିକାଦାରଙ୍କ କହିବା ଅନୁଯାୟୀ, ଏତେ ମାତ୍ରାରେ ଶବ ଆସୁଛି ଯେ, ଶ୍ମଶାନ ଘାଟରେ ତାଙ୍କୁ ସଂସ୍କାର କରିବାକୁ ଜାଗାର ଅଭାବ ରହୁଛି । ସେଥିପାଇଁ ପାର୍କରେ ପ୍ଲାଟଫର୍ମ ପ୍ରସ୍ତୁତ କରାଯାଉଛି । ଏପରିକି ଶବ ସଂସ୍କାର କରିବା ପାଇଁ ପ୍ଲାଟଫର୍ମ ସହ ଏହାକୁ ଜାଳିବା ପାଇଁ କାଠର ମଧ୍ୟ ଘୋର ଅଭାବ ଥିବା ଠିକାଦାର ଜଣଙ୍କ କହିଛନ୍ତି ।