spot_img
Home Blog Page 5988

ଟିଏମସି ଅଫିସରେ ବୋମାମାଡ଼, ସମର୍ଥକଙ୍କ ମଧ୍ୟରେ ଉତ୍ତେଜନା

କୋଲକାତା: ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ ମତଦାନ ପୂର୍ବରୁ ହିଂସାକାଣ୍ଡ ଦେଖାଦେଇଛି । ଟିଏମସି କାର୍ଯ୍ୟାଳୟରେ ଶୁକ୍ରବାର ଦିନ ବିସ୍ଫୋରଣ ଘଟିଛି । ବାଙ୍କୁରାର ଜୟପୁରରେ ଥିବା ଟିଏମସି କାର୍ଯ୍ୟାଳୟ ଭିତରେ ବୋମା ବିସ୍ଫୋରଣ ଯୋଗୁଁ ଆତଙ୍କ ଖେଳିଯାଇଛି । ଏନେଇ ଟିଏମସି ଲେଫ୍ଟ-କଂଗ୍ରେସ ଉପରେ ଅଭିଯୋଗ କରିଛି । ଏହାକୁ ନେଇ ବିଜେପି କହିଛି ଯେ ଟିଏମସି କାର୍ଯ୍ୟାଳୟ ଭିତରେ ବୋମା ତିଆରି ବେଳେ ଏହି ଅଘଟଣ ଘଟିଛି।

ଏହି ଘଟଣାରେ ତିନି ଜଣ ଆହତ ହୋଇଛନ୍ତି। ଏଥିସହିତ ଟିଏମସି କାର୍ଯ୍ୟାଳୟରେ ବିସ୍ଫୋରଣ ଖବର ମିଳିବା ମାତ୍ରେ ହିଂସାକାଣ୍ଡ ଘଟିଥିଲା। ଉଭୟ ପକ୍ଷ ମଧ୍ୟରେ ସଂଘର୍ଷ ହୋଇଥିଲା ବେଳେ ଏହାକୁ ଦୃଷ୍ଟିରେ ରଖି ଘଟଣାସ୍ଥଳରେ ବହୁ ସଂଖ୍ୟକ ପୋଲିସ ଫୋର୍ସ ମୁତୟନ କରାଯାଇଛି।

ତେବେ ଏହି ଘଟଣାରେ ତିନି ଜଣ ଆହତ ହୋଇଥିବା ବେଳେ ସେମାନଙ୍କୁ ଚିକିତ୍ସା ପାଇଁ ନିକଟସ୍ଥ ଡାକ୍ତରଖାନାକୁ ପଠାଯାଇଥିବା ନେଇ ସୂଚନା ମିଳିଛି।

ସୁପର ସ୍ପେଡର ହେଲେ IIM ଅହମ୍ମଦାବାଦର ଛାତ୍ର !

ଅହମ୍ମଦାବାଦ: ଇଣ୍ଡିଆ ଇନଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଣ୍ଟ ଅହମ୍ମଦାବାଦର କ୍ୟାମ୍ପସରେ ୨୨ ଜଣ ଛାତ୍ର କରୋନା ପଜିଟିଭ ଚିହ୍ନଟ ହୋଇଛନ୍ତି । ଏହି ମାମଲାଗୁଡ଼ିକ ଅନୁଷ୍ଠାନର ପ୍ରିମିୟର୍ ବି-ସ୍କୁଲରୁ ଚିହ୍ନଟ ହୋଇଥିବା ଜଣାପଡିଛି । ଗତ ମାର୍ଚ୍ଚ ୧୨ରେ ନରେନ୍ଦ୍ର ମୋଦି ଷ୍ଟାଡିୟମରେ ଭାରତ-ଇଂଲଣ୍ଡ ମଧ୍ୟରେ ଅନୁଷ୍ଠିତ ହୋଇଥିବା କ୍ରିକେଟ୍ ମ୍ୟାଚ୍ ଦେଖିବାକୁ ଯାଇଥିବା ୬ ଜଣ ଛାତ୍ର ସଂକ୍ରମିତ ଚିହ୍ନଟ ହୋଇଛନ୍ତି ବୋଲି ଆଧିକାରୀକ ସୁତ୍ରରୁ ପ୍ରକାଶ।

ସେହିପରି ଏଯାବତ୍ IIM ଅହମଦାବାଦରେ କରୋନା ରୋଗୀଙ୍କ ସଂଖ୍ୟା ୪୦କୁ ବୃଦ୍ଧି ପାଇଥିବା ବେଳେ ଉଭୟ ଛାତ୍ର ଓ ପ୍ରଫେସର ବି ସଂକ୍ରମିତ ହୋଇପଡିଛନ୍ତି ।

ସେମାନଙ୍କ ମଧ୍ୟରୁ ୫ ଜଣ ଛାତ୍ର ପଜିଟିଭ ଚିହ୍ନଟ ହୋଇଥିଲା ବେଳେ ପରୀକ୍ଷାକୁ ଦେଖି ଏଘଟଣାକୁ ସେମାନେ ଲୁଚାଇଥିବା ଅଭିଯୋଗ ହୋଇଥିଲା । ତେବେ ଭାଇରସ ଦ୍ୱାରା ସଂକ୍ରମିତ ହୋଇଥିବା ଛାତ୍ରମାନେ ଆଇସୋଲେସନରେ ନ ରହିବା ସହ ମାର୍ଚ୍ଚ ୧୮-୧୯ ତାରିଖରେ ଅଫଲାଇନରେ ଅନୁଷ୍ଠିତ ପରୀକ୍ଷା ମଧ୍ୟ ଦେଇଥିଲେ ବୋଲି ଅଭିଯୋଗ ହୋଇଛି । ଯାହାକୁ ନେଇ ଉତ୍ତେଜନା ଦେଖାଦେଇଥିଲା।

ଅପରପକ୍ଷେ, ଆଇଆଇଏମ୍ ଅଧିକାରୀମାନେ ଏହାକୁ ଖଣ୍ଡନ କରି କହିଛନ୍ତି ଯେ କରୋନା ସଂକ୍ରମିତ ହୋଇଥିବା କୌଣସି ପିଲାଙ୍କୁ ପରୀକ୍ଷାରେ ବସିବାକୁ ଦିଆଯାଇନଥିଲା, ଯଦିଓ ସେମାନେ ଅନୁରୋଧ କରିଥିଲେ ତଥାପି ମଧ୍ୟ ଛାତ୍ରମାନଙ୍କ ଅନୁରୋଧ ପ୍ରତ୍ୟାଖ୍ୟାନ କରାଯାଇଥିଲା। ଅଧିକାରୀମାନେ ଆହୁରି ମଧ୍ୟ କହିଛନ୍ତି ଯେ ଛାତ୍ରମାନେ ପଜିଟିଭ୍ ଚିହ୍ନଟ ପରେ ହଷ୍ଟେଲ ୱାର୍ଡେନଙ୍କୁ ତୁରନ୍ତ ସେହି ସମସ୍ତ ଛାତ୍ରଙ୍କୁ କ୍ୱାରେଣ୍ଟାଇନରେ ରଖିବାକୁ ସୂଚନା ଦିଆଯାଇଥିଲା।

 

ମାସ୍କ ଓ ପିପିଇ କିଟ୍ ଦୁର୍ନୀତି ଅଭିଯୋଗ; ରାଜ୍ୟ ସରକାରଙ୍କୁ ଲୋକାୟୁକ୍ତଙ୍କ କ୍ଲିନଚିଟ୍‌

ଭୁବନେଶ୍ବର: ମାସ୍କ ଓ ପିପିଇ କିଟ୍ କିଣା ମାମଲାରେ ରାଜ୍ୟ ସରକାରଙ୍କୁ କ୍ଲିନଚିଟ୍‌ ଦେଲେ ଲୋକାୟୁକ୍ତ । ଏହା ସହିତ ଲୋକାୟୁକ୍ତରେ ମାମଲାର ଶୁଣାଣି ଶେଷ ହୋଇଛି । ଭିଜିଲାନ୍ସର ପ୍ରାଥମିକ ତଦନ୍ତ ରିପୋର୍ଟରେ ତ୍ରୁଟି ନଥିବା ଲୋକାୟୁକ୍ତ କହିଛନ୍ତି । ମାସ୍କ ଓ ପିପିଇ କିଣିବାରେ କୌଣସି ପ୍ରକାର ତ୍ରୁଟି ବିଚ୍ୟୁତି ହୋଇନବା ସ୍ପଷ୍ଟ କରିଛନ୍ତି ଲୋକାୟୁକ୍ତ ।

କୋଭିଡ ପରିଚାଳନାରେ ତ୍ରୁଟି ଦର୍ଶାଇ ଲୋକାୟୁକ୍ତରେ ଅଭିଯୋଗ ଦାଖଲ ହୋଇଥିଲା । ଅଭିଯୋଗ ପରେ ଲୋକାୟୁକ୍ତ ଭିଜିଲାନ୍ସକୁ ତଦନ୍ତ ନିର୍ଦ୍ଦେଶ ଦେଇଥିଲେ । ପରେ ଭିଜିଲାନ୍ସ ଏହାର ତଦନ୍ତ ଜାରି ରଖିଥିଲେ । ଶେଷରେ ଆଜି ଲୋକାୟୁକ୍ତଙ୍କ ନିକଟରେ ତଦନ୍ତ ରିପୋର୍ଟ ଦାଖଲ କରିଥିଲେ ଭିଜିଲାନ୍ସ ଟିମ ।

ରାଜ୍ୟରେ ମାସ୍କ ଏବଂ ପିପିଇ କିଟ କିଣାରେ ଦୁର୍ନୀତି ହୋଇଥିବା ଅଭିଯୋଗ କରିଥିଲେ କଂଗ୍ରେସ ସମେତ ବିରୋଧି ବିଜେପି । ଶେଷରେ ରାଜ୍ୟ ସପରକାରଙ୍କୁ ଆଜି କ୍ଲିନଚିଟ ଦେଇଛି ଲୋକାୟୁକ୍ତ । ଭିଜିଲାନ୍ସ ରିପୋର୍ଟ ଆଧାରରେ ଲୋକାୟୁକ୍ତରେ ମାସ୍କ ଓ ପିପିଇ କିଟ୍ କିଣା ମାମଲାରେ ରାଜ୍ୟ ସରକାର କୌଣସି ପ୍ରକାର ଦୁର୍ନୀତି କରିନଥିବା କୁହାଯାଇଛି ।

ମାସ୍କ ଓ ପିପିଇ କିଟ୍‌ କିଣାରେ ତ୍ରୁଟି ହୋଇଥିବା ନେଇ ଲୋକାୟୁକ୍ତଙ୍କ ପାଖରେ ଅଭିଯୋଗ ହୋଇଥିଲା । ଘଟଣାର ତଦନ୍ତ କରିବା ପାଇଁ ଭିଜିଲାନ୍ସକୁ ନିର୍ଦ୍ଦେଶ ଦେଇଥିଲେ ଲୋକାୟୁକ୍ତ । ଏନେଇ ମାର୍ଚ୍ଚ ୧୬ ତାରିଖରେ ଲୋକାୟୁକ୍ତଙ୍କ ପାଖରେ ତଦନ୍ତ ରିପୋର୍ଟ ଦାଖଲ କରିଥିଲା ଭିଜିଲାନ୍ସ । ସାରା ବିଶ୍ବରେ କୋଭିଡ ନିୟନ୍ତ୍ରଣରେ ନିଆରା ଉଦାହରଣ ସୃଷ୍ଟି କରିଥିଲେ ରାଜ୍ୟ ସରକାର । ଜାତିସଂଘର ସାର୍ଟିଫିକେଟ ମିଳିଥିଲା । ଅଭିଯୋଗକାରୀ ମିଥ୍ୟା ପ୍ରଚାର କରି ଲୋକଙ୍କୁ ଭ୍ରମିତ କରିବାକୁ ଚେଷ୍ଟା କରୁଥିବା କହିଛି ଶାସକ ଦଳ  ।

ଅଞ୍ଜନାଙ୍କ ଘରେ ସିବିଆଇ ଟିମ, ୪୫ମିନିଟ୍ ଆଲୋଚନା

ଭୁବନେଶ୍ବର: ବହୁଚର୍ଚ୍ଚିତ ଅଞ୍ଜନା ମିଶ୍ର ଗଣଦୁଷ୍କର୍ମ ଓ ବିବନ ବିଶ୍ବାଳ ଗିରଫ ମାମଲାରେ ସିବିଆଇର ପଚରାଉଚରା। ଅଞ୍ଜନା ମିଶ୍ରଙ୍କ ଘରେ ପହଞ୍ଚିଛି ସିବିଆଇର ୨ଜଣିଆ ଟିମ୍ । ଗଣଦୁଷ୍କର୍ମ ଘଟଣାର ମୁଖ୍ୟ ଅଭିୁଯୁକ୍ତ ବିବନ ବିଶ୍ବାଳ ଗିରଫ ହେବାପରେ ପୁଣି ଥରେ ଫାଇଲ ଖୋଲିଥିଲା ସିବିଆଇ ।

ଭୁବନେଶ୍ବରସ୍ଥିତ ଅଞ୍ଜନା ମିଶ୍ରଙ୍କ ଘରେ ସିବିଆଇର ଦୁଇ ଜଣିଆ ଟିମ ପହଁଚିବା ସହ ଦୁଷ୍କର୍ମ ମାମଲା ବିଷୟରେ ଅଞ୍ଜନାଙ୍କ ସହ ଆଲୋଚନା କରିଛି ସିବିଆଇ ଟିମ । ଅଞ୍ଜନାଙ୍କ ସହ ସିବିଆଇ ୪୫ମିନିଟ୍ ଆଲୋଚନା କରିଥିବା ବେଳେ ସିବିଆଇକୁ ଅଞ୍ଜନା କିଛି ତଥ୍ୟ ଦେଇଥିବା ସୂଚନା ମିଳିଛି ।

ପିପିଲି ଉପ-ନିର୍ବାଚନ; ମହାରଥୀଙ୍କ ପୁଅକୁ ବିଜେଡି ଟିକେଟ

ଭୁବନେଶ୍ବର: ପିପିଲି ଉପନିର୍ବାଚନ ନେଇ ପ୍ରାର୍ଥୀ ଘୋଷଣା କରିଛି ବିଜୁ ଜନତା ଦଳ । ଦିବଙ୍ଗତ ବିଧାୟକ ପ୍ରଦୀପ ମହାରଥିଙ୍କ ପୁଅ ରୁଦ୍ର ପ୍ରତାପ ମହାରଥୀଙ୍କୁ ପ୍ରାର୍ଥୀ ଭାବେ  କରିଛି ବିଜେଡ଼ି । ଗତକାଲି ବିଳମ୍ବିତ ରାତିରେ ବିଜେପି ଆଶ୍ରିତ ପଟ୍ଟନାୟକଙ୍କୁ ଦଳୀୟ ପ୍ରାର୍ଥୀ ଭାବେ ଘୋଷଣା କରିଥିଲା । ଆଜି ବିଜେଡ଼ି ପିପିଲି ପାଇଁ ରୁଦ୍ର ପ୍ରତାପ ମହାରଥୀଙ୍କୁ ପ୍ରାର୍ଥୀ ହେବା ନେଇ ମୋହର ମାରିଛନ୍ତି ଦଳର ସଭାପତି ନବୀନ ପଟ୍ଟନାୟକ  ।

ପ୍ରଦୀପ ମହାରଥୀଙ୍କ ମୃତ୍ୟୁ ପରେ ଖାଲି ପଡିଥିଲା ପିପିଲି ଆସନ । ଏପ୍ରିଲ ୧୭ରେ ନିର୍ବାଚନ ହେବା ନେଇ ପୂର୍ବରୁ ନିର୍ବାଚନ କମିସନ ତାରିଖ ଘୋଷଣା କରିସାରିଛନ୍ତି । ରାଜ୍ୟ ନିର୍ବାଚନ ଅଧିକାରୀ ମଧ୍ୟ ପିପିଲିରେ ଉପନିର୍ବାଚନ ହେବା ନେଇ ସବିଶେଷ ତର୍ଜମା କରିଛନ୍ତି । କୋଭିଡ ଗାଇଡଲାଇନକୁ କିପରି ପାଳନ କରି ଭୋଟର ମତଦାନ କରିପାରିବେ ସେନେଇ ମଧ୍ୟ ପ୍ରସ୍ତୁତି ସରିଛି ।

ସେପଟେ ବିଜେପି ପ୍ରାର୍ଥୀ ଘୋଷଣା କରିସାରିବା ପରେ ବିଜେଡ଼ିର ପ୍ରାର୍ଥୀ କିଏ ହେବ ସେନେଇ କଳ୍ପନା ଜାରି ରହିଥିଲା । ପୁଅ ରୁଦ୍ର ମହାରଥି କିମ୍ବା ପ୍ରତିଭା ମହାରଥୀ କାହାକୁ ଟିକେଟ ମିଳିବ ସେନେଇ ଦଳରେ ମଧ୍ୟ ଚର୍ଚ୍ଚା ସୃଷ୍ଟି ହୋଇଥିଲା । ଗୋଟେପଟେ ନିର୍ବାଚନକୁ ମାତ୍ର ହାତରେ ଅଳ୍ପ ଦିନ । ଏନେଇ ମୈଦାନକୁ ବିଜେପି ନିଜ ପ୍ରାର୍ଥୀଙ୍କୁ ଓହ୍ଲାଇ ସାରିଥିବାବେଳେ ବିଜେଡି ମଧ୍ୟ ରୁଦ୍ର ମହାରଥୀଙ୍କୁ ଅବତୀର୍ଣ୍ଣ କରିଛି । କିନ୍ତୁ ବର୍ତ୍ତମାନ ସୁଦ୍ଧା କଂଗ୍ରେସ ନିଜ ପ୍ରାର୍ଥୀ ନାମ ଘୋଷଣା କରିନାହିଁ ।

ଉତ୍କଳ ଦିବସ ପାଳନ ନେଇ ପ୍ରଶାସନର ଗାଇଡଲାଇନ୍ ଜାରି

ଭୁବନେଶ୍ୱର: ଉତ୍କଳ ଦିବସ ସମାରୋହ ପାଳନ ନେଇ ଜାରି ହେଲା କଟକଣା । ଉତ୍କଳ ଦିବସ ପାଳନ ସମୟରେ ସାଂସ୍କୃତିକ କାର୍ଯ୍ୟକ୍ରମକୁ ଦିଆଯିବନି ଅନୁମତି । ସର୍ବାଧିକ ୨୦୦ ଜଣଙ୍କୁ ନେଇ ଉତ୍କଳ ଦିବସ ପାଳନ କରାଯିବ ।

ଏହି ସମୟରେ ସାମାଜିକ ଦୂରତା ଓ ମାସ୍କ ପରିଧାନକୁ ବାଧ୍ୟତାମୂଳକ କରାଯାଇଛି । ଘରୋଇ ଅନୁଷ୍ଠାନ ପକ୍ଷରୁ ଉତ୍କଳ ଦିବସ ପାଳନ ନେଇ ଜିଲ୍ଲାପାଳ କିମ୍ବା ପୌର ପ୍ରଶାସନ ପକ୍ଷରୁ ଅନୁମତି ନିଆଯିବ । କୋଭିଡ ଗାଇଡଲାଇନ୍ ମଧ୍ୟରେ ଉତ୍କଳ ଦିବସ ପାଳନ ପାଇଁ ଏସଆରସି ଜାରି କରିଛନ୍ତି ଗାଇଡଲାଇନ୍ । ଏଥିସହ ଧାର୍ମିକ ଓ ସାଂସ୍କୃତିକ ଜନସମାବେଶକୁ ବାରଣ କରାଯାଇଛି।

ଗୁଡ୍ ଫ୍ରାଇଡେ, ଇଷ୍ଟର, ପଣାସଂକ୍ରାନ୍ତି, ଝାମୁଯାତ୍ରାରେ ସମାବେଶକୁ ମନା କରାଯାଇଛି । ସେହିପରି ଏପ୍ରିଲରେ ପାଳନ ହେଉଥିବା ଦଣ୍ଡଯାତ୍ରା ଓ ଶ୍ରୀରାମ ନବମୀରେ ମଧ୍ୟ ସମାବେଶକୁ ବାରଣ କରାଯାଇଛି । ମନ୍ଦିର, ଚର୍ଚ୍ଚ ଓ ଅନ୍ୟ ଧର୍ମସ୍ଥଳୀରେ ପୂର୍ବଭଳି ନୀତିକାନ୍ତି ଜାରିରହିବ । ବହୁ କମ୍ ଲୋକରେ ଧାର୍ମିକ ରୀତିନୀତି ଚାଲିବ ବୋଲି ନିର୍ଦ୍ଦେଶ ଦିଆଯାଇଛି । କେତେ ଲୋକ ସାମିଲ ହୋଇପାରିବେ ସେ ନେଇ ନିଷ୍ପତ୍ତି ନେବେ ଜିଲ୍ଲାପାଳ ବୋଲି ବୋଲି ଏସଆରସି ନୂଆ ଗାଇଡଲାଇନରେ କହିଛନ୍ତି ।

ପିପିଲି ଉପନିର୍ବାଚନ: ନାମାଙ୍କନ ପତ୍ର ଦାଖଲ କଲେ ଆଶ୍ରିତ ପଟ୍ଟନାୟକ

ପିପିଲି: ପିପିଲି ଉପନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ। ପିପିଲି ସଙ୍କଟମୋଚନ ମନ୍ଦିରରୁ ଦଳୀୟ ନେତା ଓ ସମର୍ଥକଙ୍କ ସହ ସେ ଶୋଭାଯାତ୍ରାରେ ବାହାରିଥିଲେ ।

ପୁରୀ ଏଡିଏମ୍‌ଙ୍କ ନିକଟରେ ଆଶ୍ରିତ ପଟ୍ଟନାୟକ ନାମାଙ୍କନ ପତ୍ର ଦାଖଲ କରିଛନ୍ତି । ନାମାଙ୍କନ ଦାଖଲ ବେଳେ ବ୍ରହ୍ମଗିରି ବିଧାୟକ ଲଳିଟେନ୍ଦୁ ବିଦ୍ୟାଧର ମହାପାତ୍ର, ବିଜେପି ନେତ୍ରୀ ପ୍ରଭାତୀ ପରିଡା ଓ ସତ୍ୟବାଦୀ ବିଜେପି ନେତା ଓମ୍‌ ପ୍ରକାଶ ମିଶ୍ର ପ୍ରମୁଖ ଉପସ୍ଥିତ ରହିଥିଲେ।

ସୂଚନାଯୋଗ୍ୟ, ନିକଟ ଅତୀତରେ ୨୦୧୯ରେ ଦଳର ପ୍ରାର୍ଥୀ ହୋଇଥିବା ଆଶ୍ରିତ ପଟ୍ଟନାୟକଙ୍କୁ ବିଜେପି ପୁଣିଥରେ ଉପନିର୍ବାଚନରେ ପ୍ରାର୍ଥୀ କରିଛି। ଆଶ୍ରୀତ ଏବେ ବିଜେପିର ପୁରୀ ଜିଲ୍ଲା ସଭାପତି ଅଛନ୍ତି। କଂଗ୍ରେସ ଦଳରୁ ନିଜର ରାଜନୈତିକ ଜୀବନ ଆରମ୍ଭ କରିଥିବା ଆଶ୍ରିତ ୨୦୧୪ ନିର୍ବାଚନ ପରେ ବିଜେପିରେ ସାମିଲ ହୋଇଥିଲେ। ୨୦୧୪ରେ ଆଶ୍ରିତ ସ୍ୱାଧୀନ ଭାବେ ନିର୍ବାଚନ ଲଢ଼ି ୧୮ ହଜାର ଭୋଟ୍ ହାତେଇଥିଲେ।

ପରେ ୨୦୧୯ରେ ବିଜେପି ତାଙ୍କୁ ଟିକେଟ୍ ଦେଇଥିଲା। ୨୦୧୯ରେ ଆଶ୍ରିତ ୭୨ ହଜାର ୭୩୧ ଖଣ୍ଡ ଭୋଟ୍ ପାଇ ଦ୍ୱିତୀୟ ସ୍ଥାନରେ ରହିଥିଲେ। ବିଜେଡିର ପ୍ରଦୀପ ମହାରଥି ୮୮ ହଜାର ୫୧୮ ଖଣ୍ଡ ଭୋଟ୍ ପାଇ ୧ ନମ୍ବର ସ୍ଥାନରେ ରହିଥିଲେ। ତେବେ ଆସନ୍ତା ଏପ୍ରିଲ ୧୭ ତାରିଖରେ ପିପିଲିରେ ଉପ ନିର୍ବାଚନ ଅନୁଷ୍ଠିତ ହେବାକୁ ଥିବା ବେଳେ, ମାର୍ଚ୍ଚ ୩୦ ତାରିଖ ରହିଛି ପ୍ରାର୍ଥୀ ପତ୍ର ଦାଖଲର ଶେଷ ଦିନ।

ଟାଟା-ମିସ୍ତ୍ରି ମାମଲା: ଟାଟା ସପକ୍ଷରେ ରାୟ ଦେଲେ ସୁପ୍ରିମକୋର୍ଟ

ନୂଆଦିଲ୍ଲୀ: ସାଇରସ୍ ମିସ୍ତ୍ରିଙ୍କ କ୍ରସ ଆବେଦନର ଶୁଣାଣିରେ ଟାଟା ସପକ୍ଷରେ ଆସିଛି ସୁପ୍ରିମକୋର୍ଟଙ୍କ ରାୟ । ଏମିତିକି ସାଇରସ୍ ମିସ୍ତ୍ରିଙ୍କ ପିଟିସନ ସୁପ୍ରିମକୋର୍ଟରେ ଖାରଜ ମଧ୍ୟ ହୋଇଯାଇଛି। ସଲ୍ଟ ଟୁ ସଫ୍ଟୱେର କନଗ୍ଲୋମିରେଟ ଚେୟାରମ୍ୟାନ ଭାବେ ସାଇରମ ମିସ୍ତ୍ରିଙ୍କୁ ବରଖାସ୍ତ କରିବା ନିଷ୍ପତ୍ତିକୁ ସମର୍ଥନ କରିଛନ୍ତି କୋର୍ଟ ।

ସୂଚନା ଅନୁଯାୟୀ, ଟାଟା ସନ୍ସ ଏବଂ ସାଇରସ୍ ଇନଭେଷ୍ଟମେଣ୍ଟ ଦ୍ୱାରା ଦାଏର କ୍ରସ ଆବେଦନ ଉପରେ କୋର୍ଟ ଏହି ରାୟ ଶୁଣାଇଛନ୍ତି। ୨୦୧୯ ଡିସେମ୍ବର ୧୮ରେ ନ୍ୟାସନାଲ କମ୍ପାନୀ ଆଇନ ଆପିଲେଟ ଟ୍ରୁବ୍ୟୁନାଲ ବା NCLAT ସାଇରମ ମିସ୍ତ୍ରିଙ୍କୁ ଟାଟା ସନ୍ସର କାର୍ଯ୍ୟନିର୍ବାହୀ ପଦରୁ ବରଖାସ୍ତ କରିଥିଲେ । NCLATର ବରଖାସ୍ତ ଅର୍ଡରକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ସାଇରସ୍ ମିସ୍ତ୍ରି । ଏହା ଛଡ଼ା ଟାଟା ସନ୍ସରେ ଇକ୍ୱିଟି ସେୟାରର ଉଚିତ କ୍ଷତିପୂରଣ ଦାବି କରି କୋର୍ଟରେ ଶାପୁରଜୀ ପାଲୋଞ୍ଜୀ କରିଥିବା ଆବେଦନକୁ ମଧ୍ୟ କୋର୍ଟ ଖାରଜ କରିଛନ୍ତି ।

 

ଶାପୁରଜୀ ପାଲୋଞ୍ଜୀ ସେୟାରର ମୂଲ୍ୟ ଟାଟା ସନ୍ସଙ୍କ ଇକ୍ୱିଟିର ମୂଲ୍ୟ ଉପରେ ନିର୍ଭର କରିବ, ଉଚିତ ମୂଲ୍ୟ କ’ଣ ହେବା ଉଚିତ ତାହା ସୁପ୍ରିମକୋର୍ଟ ସ୍ଥିର କରିପାରିବେ ନାହିଁ । ପ୍ରଧାନ ବିଚାରପତି ଏସ୍ ଏ ବୋବଡେଙ୍କ ଗଠିତ ଏକ ବେଞ୍ଚ ଏହି ରାୟ ଶୁଣାଇଛନ୍ତି । ଜଷ୍ଟିସ୍ ଏ ଏସ୍ ବୋପାନ୍ନା ଏବଂ ଭି ରାମାସୁବ୍ରମଣ୍ୟନଙ୍କୁ ନେଇ ଗଠିତ ବେଞ୍ଚ ଗତ ଡିସେମ୍ବର ୧୭ ତାରିଖରେ ଏହି ମାମଲାର ରାୟ ସଂରକ୍ଷିତ ରଖିଥିଲେ ।

‘ଭୁବନେଶ୍ୱରକୁ ସମସ୍ତ ସ୍ଥାନରୁ ଲୋକ ଆସୁଛନ୍ତି, ତେଣୁ ସଂକ୍ରମିତଙ୍କ ସଂଖ୍ୟା ବଢୁଛି’

ଭୁବନେଶ୍ବର: କୋଭିଡ ସ୍ଥିତିକୁ ନେଇ ବିଏମସି ପ୍ରତିକ୍ରିୟା ରଖିଛନ୍ତି କମିଶନର। ସେ କହିଛନ୍ତି କାଲିର ସବୁ ଟେଷ୍ଟର ରିପୋର୍ଟ ଆସିନାହିଁ। ଏବଂ ହୋଲିକୁ ନେଇ ମଧ୍ୟ ସେ କହିଛନ୍ତି, ପୂର୍ବରୁ ଏନେଇ ହୋଲି କଟକଣା ଜାରି କରାଯାଇଛି। SRC ଙ୍କ ଗାଇଡ଼ଲାଇନ ଅନୁଧ୍ୟାନ ପରେ ପୁଣି ଆଲୋଚନା କରି ପରବର୍ତ୍ତୀ ପଦକ୍ଷେପ ନିଆଯିବ ବୋଲି କହିଛନ୍ତି କମିଶନର ପ୍ରେମଚନ୍ଦ୍ର ଚୌଧୁରୀ ।

ବର୍ତ୍ତମାନର ସ୍ଥିତିକୁ ଦୃଷ୍ଟିରେ ରଖି କଟକଣା ଦୃଢ କରାଯିବ। ଭୁବନେଶ୍ବରକୁ ରାଜ୍ୟ ଓ ଦେଶ ବାହାରୁ ଲୋକଙ୍କ ଯାତାୟାତ ରହୁଛି, ଏଣୁ ଏଠାରେ ସ୍ଥିତି ଉପରେ ନଜର ରଖାଯାଇଛି। ପୋଲିସ ଓ ବିଏମସି ପକ୍ଷରୁ ଉଭୟ ସଚେତନତା ଓ କାର୍ଯ୍ୟାନୁଷ୍ଠାନ ଉପରେ ଗୁରୁତ୍ୱ ଦିଆଯାଇଛି। ଭ୍ୟାକ୍ସିନକୁ ଅଧିକ ତ୍ୱରାନ୍ୱିତ କରାଯାଉଛି, କୋଭିଡ ସଚେତକଙ୍କୁ ପୁନଃ ନିୟୋଜିତ କରାଯିବ। ଏପ୍ରିଲ ପହିଲାରୁ 45ବର୍ଷରୁ ଅଧିକ ଲୋକଙ୍କୁ ଟୀକାକରଣ କରାଯିବ ବୋଲି କହିଛନ୍ତି କିମିଶନର।

ସେପଟେ ସମସ୍ତଙ୍କୁ ଟିକା ନେବା ପ୍ରତି ଆଗ୍ରହ ପ୍ରକାଶ କରିବାକୁ ଅନୁରୋଧ କରାଯାଉଛି। ଖୁବଶୀଘ୍ର ନିର୍ଦେଶନାମା ଜାରିହେବ ସ୍ଥିତି ସଙ୍ଗୀନ ଥିବା ରାଜ୍ୟରୁ ଆସୁଥିବା ଯାତ୍ରୀଙ୍କୁ 3ଦିନର ନେଗେଟିଭ ରିପୋର୍ଟ ସାଙ୍ଗରେ ନେଇ ଆସିବାକୁ ହେବ। ଭୁବନେଶ୍ୱରରେ ପ୍ରତିଦିନ ଆକ୍ରାନ୍ତଙ୍କ ସଂଖ୍ୟା ବଢୁଛି କିନ୍ତୁ ଏହାର କାରଣ ସ୍ଥାନୀୟ ସଂକ୍ରମଣ ନୁହେଁ। ରାଜ୍ୟ ରାଜଧାନୀ ହୋଇଥିବାରୁ ବାହାରୁ ଆସୁଥିବା ଲୋକଙ୍କ ଉପରେ ନଜର ରଖାଯାଉଥିବା ପ୍ରତିକ୍ରିୟାରେ କହିଛନ୍ତି କମିଶନର।

ଗୀତ ପ୍ରସ୍ତୁତ ଲାଗି କଣ୍ଠଶିଳ୍ପୀ ସୁସ୍ମିତା ଦାସଙ୍କ ସହ ଚୁକ୍ତି କଲା ଆଇୟୁସିଏନ୍

ଭୁବନେଶ୍ୱର: ଓଡିଶାର ଘରେ ଘରେ ପରିଚିତ କଣ୍ଠଶିଳ୍ପୀ ସୁସ୍ମିତା ଦାସଙ୍କୁ ନିକଟରେ ଇଣ୍ଟରନ୍ୟାସନାଲ୍ ୟୁନିଅନ୍ ଫର୍ କନଜରଭେସନ୍ ଅଫ୍ ନେଚର (ଆଇୟୁସିଏନ୍) ଦ୍ୱାରା ସମ୍ମାନିତ କରାଯାଇଛି। ଯାହା ପରେ ଇଣ୍ଟରନ୍ୟାସନାଲ୍ ୟୁନିଅନ୍ ଫର୍ କନଜରଭେସନ୍ ଅଫ୍ ନେଚର ସହ ସୁସ୍ମିତାଙ୍କ ଚୁକ୍ତିନାମା ହୋଇଛି।

ସୂଚନା ଅନୁଯାୟୀ, ସୁସ୍ମିତାଙ୍କ ସମସ୍ତ ଗୀତ ଗୁଡିକ ଓଡ଼ିଆ ଭାଷା, ସଂସ୍କୃତି ଏବଂ ଅନେକ ସମୟରେ ସାମାଜିକ ଚେତନାକୁ ନେଇ ହେଉଥିବାରୁ ଆଇୟୁସିଏନ୍ ତାଙ୍କୁ ସମ୍ମାନିତ କରିଛି । ଏହାଛଡା ଆଇୟୁସିଏନ୍ ପକ୍ଷରୁ ସୁସ୍ମିତାଙ୍କୁ ବିଶ୍ୱ ପର୍ଯ୍ୟାବରଣ ଦିବସ ଉପଲକ୍ଷେ “ପୃଥିବୀ ମନ୍ଥନ” ବିଷୟବସ୍ତୁ ଆଧାରିତ ଏକ ଗୀତ ପ୍ରସ୍ତୁତ କରିବା ପାଇଁ ଅନୁରୋଧ କରାଯାଇଛି ।

ଏହି ଗୀତରେ ଆଇୟୁସିଏନ୍ ମିଳିତ ଭାବେ ସୁସ୍ମିତାଙ୍କ ସହ କାମ କରିବାକୁ ଥିବା ବେଳେ ଜୁନ ୫ ବିଶ୍ୱ ପର୍ଯ୍ୟାବରଣ ଦିବସରେ ଏହି ଗୀତଟିକୁ ଉନ୍ମୋଚନ କରାଯିବ । ଏହା ସମଗ୍ର ଓଡିଶା ବାସୀଙ୍କ ପାଇଁ ଗୌରବର ପରିଭାଷା ହୋଇଥିବା ବେଳେ ଏହି ସଫଳତା ପାଇଁ ସୁସ୍ମିତା ଆଇୟୁସିଏନ୍ ସହ ସମସ୍ତ ଶ୍ରୋତା ମାନଙ୍କୁ ଧନ୍ୟବାଦ ଜଣାଇଛନ୍ତି ।