ନନ୍ଦିଘୋଷ ବ୍ୟୁରୋ : ସରକାର ଫେରାଇବେ କି ଚିଟଫଣ୍ଡ ଟଙ୍କା ? ନା କେବଳ ଘୋଷଣା ଆଉ ଘୋଷଣା ? ନିର୍ବାଚନ ବେଳେ ବିଜେପି ପ୍ରତିଶୃତି ଦେଇଥିଲା ଯେ, ସରକାର ଗଠନର ୨୪ ଘଣ୍ଟା ଭିତରେ କ୍ଷତିଗ୍ରସ୍ତ ଜମାକାରୀଙ୍କୁ ଅର୍ଡିନାନ୍ସ ଆଣି ଟଙ୍କା ଫେରସ୍ତ କରିବ। ଏହାରି ଭିତରେ ୧୩ ମାସ ବିତି ଗଲାଣି। ହେଲେ ସରକାର କ୍ଷତିଗ୍ରସ୍ତଙ୍କୁ ଟଙ୍କା ଫେରସ୍ତ କରିନାହାନ୍ତି ବୋଲି ଅଭିଯୋଗ କରିଛନ୍ତି ବିରୋଧୀ। ବିଜେଡି ବିଧାୟକ ସାରଦା ଜେନା କହିଛନ୍ତି, ସରକାର ଚିଟଫଣ୍ଡ ଟଙ୍କା ଫେରସ୍ତ ନେଇ ମିଛ ପରେ ମିଛ କହୁଛନ୍ତି। ବିଜେଡି ସରକାରରେ ଟଙ୍କା ଫେରସ୍ତ ପ୍ରକ୍ରିୟା ଆରମ୍ଭ ହୋଇଥିଲା। ତେଣୁ ଏବେର ସରକାର ସମସ୍ତ ଜମାକାରୀଙ୍କୁ ଟଙ୍କା ଫେରସ୍ତ କରନ୍ତୁ। କଂଗ୍ରେସ ବିଧାୟକ ଅଶୋକ ଦାସଙ୍କ କହିବା କଥା, ରାଜ୍ୟ ସରକାର କେତେ ଟଙ୍କା କ୍ଷତିଗ୍ରସ୍ତଙ୍କୁ ଫେରାଇଛନ୍ତି ତାହାର ହିସାବ ଦିଅନ୍ତୁ। ଶ୍ବେତପତ୍ର ଜାରି କରି ସରକାର ଓଡ଼ିଶାବାସୀଙ୍କ ପାଖରେ ଟଙ୍କା ଫେରାଇଥିବା ତଥ୍ୟ ରଖିବାକୁ ଦାବି କରିଛି କଂଗ୍ରେସ।
ସେପଟେ ବିଜେପି ରାଜ୍ୟ ସଭାପତି ମନମୋହନ ସାମଲ ଯୁକ୍ତି ବାଢିଛନ୍ତି ଯେ, ଚିଟଫଣ୍ଡ ଜମାକାରୀଙ୍କୁ ଟଙ୍କା ଫେରସ୍ତ କରାଯିବ ବୋଲି ନିର୍ବାଚନ ପୂର୍ବରୁ ଘୋଷଣା ହୋଇଥିଲା। ୧ ଲକ୍ଷ ୨୬ ହଜାର ୧୩୭ ଜଣ ଯୋଗ୍ୟ ହିତାଧିକାରୀଙ୍କୁ ଟଙ୍କା ଫେରସ୍ତ ହୋଇଛି। ଆସନ୍ତା ୫ ମାସ ମଧ୍ୟରେ ୫ ଲକ୍ଷ ହିତାଧିକାରୀଙ୍କୁ ଟଙ୍କା ଫେରସ୍ତ କରାଯିବ ବୋଲି କହିଛନ୍ତି ମନମୋହନ ସାମଲ। ପୁଣି ଥରେ ଚିଟଫଣ୍ଡ କ୍ଷତିଗ୍ରସ୍ତଙ୍କ ଟଙ୍କା ଫେରସ୍ତକୁ ନେଇ ଆରମ୍ଭ ହୋଇଛି ରାଜନୈତିକ ବୟାନବାଜି। ବର୍ଷ ବର୍ଷ ଧରି ଜମାକାରୀମାନେ ଆନ୍ଦୋଳନ କଲେ। କିନ୍ତୁ ଏବେ ସରକାରଙ୍କ ଘୋଷଣା କାର୍ଯ୍ୟକାରୀ ହେବ ନା ଘୋଷଣାରେ ରହିଯିବ ତାକୁ ଅପେକ୍ଷା କରିଛନ୍ତି ରାଜ୍ୟବାସୀ।
