ସୁବର୍ଣ୍ଣପୁର: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ। ଭିଜିଲାନ୍ସ ଜାଲରେ ସୁବର୍ଣ୍ଣପୁର ବିନିକା ରେଞ୍ଜର ଫରେଷ୍ଟର। ଫରେଷ୍ଟର ଜଗବନ୍ଧୁ ବାରିକଙ୍କ ଘରେ ଓ କାର୍ଯ୍ୟାଳୟରେ ଚାଲିଛି ଭିଜିଲାନ୍ସ ରେଡ। ସୋନପୁର ଓ ସମ୍ବଲପୁରର ଦୁଇଟି ଭିଜିଲାନ୍ସ ଟିମ ଆଜି ଏକକାଳୀନ ଭାବେ ସୋନପୁର ସହର ଶାନ୍ତି ନଗର ପଡାରେ ଥିବା ଘର, ଜିଲ୍ଲାପାଳଙ୍କ କାର୍ଯ୍ୟାଳୟ ପାଖରେ ଥିବା ଘର ଓ ବିନିକା ରେଞ୍ଜ ଅଫିସରେ ଚଢାଉ କରୁଛି। ଘରେ ସମସ୍ତ କାଗଜପତ୍ର , ଆସବାବପତ୍ରକୁ ଭିଜିଲାନ୍ସ ଟିମ ଟିକ ନିଖ କରି ତଲାସ ଜାରୀ ରଖିଛି। ଘରୁ ଏପର୍ଯ୍ୟନ୍ତ କିଛି ବ୍ୟାଙ୍କ ପାସବୁକ, ଜୀବନ ବୀମା ବଣ୍ଡ, ଜମିବାଡିର କାଗଜପତ୍ର ତଥା ନଗଦ ଟଙ୍କା ଜବତ କରିଥିବା ଜଣାପଡିଛି। ତେବେ ଭିଜିଲାନ୍ସ ଟିମ୍ ବର୍ତ୍ତମାନ ଚଢାଉ ଜାରୀ ରଖିଛି।
ନକଲି କୋଲ୍ଡ ଡ୍ରିଙ୍କସ ତିଆରି ମାମଲାରେ ମାଲିକ ଶ୍ରୀପତି ରଞ୍ଜନ ବେହେରା ଗିରଫ
ଭୁବନେଶ୍ୱର: ଭୁବନେଶ୍ୱରର ନକଲି କୋଲ୍ଡ ଡ୍ରିଙ୍କସ କାରଖାନାରେ ଚଢ଼ାଉ ଘଟଣା। କୋଲ୍ଡ ଡ୍ରିଙ୍କସ୍ କାରଖାନା ମାଲିକ ଶ୍ରୀପତି ରଞ୍ଜନ ବେହେରା ଗିରଫ। ଶ୍ରୀପତି ରଞ୍ଜନଙ୍କୁ ଗିରଫ କଲା ମଞ୍ଚେଶ୍ୱର ଥାନା ପୋଲିସ। ଏହା ସହିତ ଗୋଦାମ ପ୍ରୋସେସିଂ ୟୁନିଟ୍ ସିଲ୍ କଲା ପୋଲିସ। ଗୋଦାମରୁ ୧୦ହଜାର ଲିଟର ଅପମିଶ୍ରିତ ମୃଦୁ ପାନୀୟ ମଧ୍ୟ ଜବତ ହୋଇଛି। ଗତକାଲି ମଞ୍ଚଶ୍ୱରରର ଏକ ନକଲି ମୃଦୁ ପାନୀୟ କାରଖାନା ଉପରେ ଚଢାଉ କରିଥିଲା ମଞ୍ଚେଶ୍ୱର ପୋଲିସ, ସ୍ପେଶାଲ ସ୍କ୍ୱାଡ ଓ ଖାଦ୍ୟ ସୁରକ୍ଷା ଅଧିକାରୀଙ୍କ ମିଳିତ ଟିମ୍।
ବିଭିନ୍ନ ବ୍ରାଣ୍ଡର ନାଁକୁ ସାମାନ୍ୟ ପରିବର୍ତ୍ତନ କରି ବଜାରକୁ ନକଲି ମାଲ୍ ଛାଡୁଥିଲା ଏହି କାରଖାନା। ଅସ୍ୱାସ୍ଥ୍ୟକର ପରିବେଶରେ ତିଆରି ହେଉଥିଲା ମୃଦୁ ପାନୀୟ। କୃତ୍ରିମ ରଙ୍ଗ, ସାକାରିନ, ଫ୍ଲେଭରକୁ ମିଶାଇ ମୃଦୁ ପାନୀୟ ତିଆରି କରୁଥିଲେ। କମ୍ପାନୀର ପ୍ରୋସେସିଂ ଓ ବଟଲିଂ ୟୁନିଟ ବେଆଇନ ଭାବରେ ଚାଲିଥିଲା। ଫୁଡ ସେଫ୍ଟି ଓ ଟ୍ରେଡ ଲାଇସେନ୍ସ ମଧ୍ୟ ନଥିଲା। ବିନା ଟେକ୍ନିସିଆନରେ ଚାଲିଥିଲା କମ୍ପାନୀର ଲାବ୍ରୋଟୋରୀ ଏବଂ ଏଫଏସ୍ଏସ୍ଏଆଇର ନିୟମକୁ ମଧ୍ୟ ଉଲ୍ଲଂଘନ କରାଯାଇଥିଲା।
କୃଷକ ଆନ୍ଦୋଳନକୁ ରୋକିବା ପାଇଁ ରାସ୍ତା ମଝିରେ ଠିଆ ହେଲା କଂକ୍ରିଟ ପଚେରୀ
ନୂଆଦିଲ୍ଲୀ: ଚାଷୀଙ୍କ ପାଇଁ ଦିଲ୍ଲୀ ସୀମାରେ ସମରସଜ୍ଜା। ଆନ୍ଦୋଳନସ୍ଥଳରେ ୪-୫ ଫୁଟ ଉଚ୍ଚର କଂକ୍ରିଟ ପାଚେରୀ ନିର୍ମାଣ କରିଛି ପୋଲିସ। କଂକ୍ରିଟ ପାଚେରୀ ଯୋଗୁ ଏବେ ଦିଲ୍ଲୀ-ଚଣ୍ଡିଗଡ଼ ଜାତୀୟ ରାଜପଥ ଦେଇ ଚଳାଚଳ ସମ୍ପୂର୍ଣ୍ଣ ଠପ୍ ହୋଇଯାଇଛି। କାନ୍ଥର ଦୁଇ ପାର୍ଶ୍ୱରେ ପ୍ରାୟ ଦେଢ କିଲୋମିଟର ପର୍ଯ୍ୟନ୍ତ ବ୍ୟାରିକେଡ୍ ନିର୍ମାଣ ହୋଇଛି। ଏହାଛଡ଼ା ଆନ୍ଦୋଳନସ୍ଥଳରେ ରଖାଯାଇଥିବା ଅସ୍ଥାୟୀ ଶୌଚାଳୟ ଓ ପିଇବା ପାଣି ବ୍ୟବସ୍ଥା ମଧ୍ୟ ବନ୍ଦ କରିଦେଇଛି ପୋଲିସ। ଯାହାକୁ ନେଇ ଅସନ୍ତୋଷ ବଢୁଛି।
ସେପଟେ ଗାଜିପୁର, ଟିକିରି ଓ ସିଂଘୁ ସୀମାରେ ଚାଷୀଙ୍କ ଉପରେ ନଜର ରଖିବାକୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ଆସନ୍ତା ଅକ୍ଟୋବର ମଧ୍ୟରେ ଚାଷୀଙ୍କ ଦାବି ନମାନିଲେ ଦେଶବ୍ୟାପୀ ଟ୍ରାକ୍ଟର ରାଲି କରାଯିବ ବୋଲି ଚାଷୀ ଚେତାବନୀ ଦେଇଛନ୍ତି। ଚାଷୀଙ୍କ ପ୍ରତି ଦିଲ୍ଲୀ ପୋଲିସ ଅତ୍ୟଧିକ କଠୋର ବ୍ୟବହାର କରୁଥିବା ବେଳେ ସହାୟତାର ହାତ ବଢ଼ାଇଛନ୍ତି ସ୍ଥାନୀୟ ଲୋକେ। ଗତ କିଛିଦିନ ତଳେ ଚାଷୀଙ୍କୁ ସୀମାରୁ ହଟେଇବାକୁ କେତେକ ଦୁର୍ବୃତ୍ତ ଆନ୍ଦୋଳନ ସ୍ଥଳରେ ହିଂସା ଭିଆଇଥିଲେ।
ସେମାନେ ରାଜନୈତିକ ଗୁଣ୍ଡା ବୋଲି ଚାଷୀ କହିଛନ୍ତି। ସେପଟେ ହରିୟାଣାର ଜିନ୍ଦରେ ଆଜି ଚାଷୀଙ୍କ ମହାପଞ୍ଚାୟତ ବସୁଛି। ଏଥିରେ ଚାଷୀ ନେତା ରାକେଶ ଟିକାୟତ ସାମିଲ ହେବେ। ସେଠାରେ ଚାଷୀ ଆନ୍ଦୋଳନ ନେଇ ଆଗାମୀ ରଣନୀତି ପ୍ରସ୍ତୁତ ହେବ। ସେପଟେ ଆଜି ଗଣତନ୍ତ୍ର ଦିବସରେ ଚାଷୀଙ୍କ ଟ୍ରାକ୍ଟର ରାଲି ବେଳେ ହୋଇଥିବା ହିଂସାକାଣ୍ଡ ନେଇ ସୁପ୍ରିମକୋର୍ଟରେ ଶୁଣାଣି ହେବ।
ଅପରାହ୍ନ ୪ଟାରୁ ରାତି ୮ଟା ପର୍ଯ୍ୟନ୍ତ ବନ୍ଦ ରହିବ ମହାପ୍ରଭୁଙ୍କ ଦର୍ଶନ, ଶ୍ରୀବିଗ୍ରହଙ୍କ ମୁଖମଣ୍ଡଳ ଶୃଙ୍ଗାର କରିବେ ସେବାୟତ
ପୁରୀ: ଆଜି ଚାରି ଘଣ୍ଟା ପାଇଁ ଶ୍ରୀମନ୍ଦିରରେ ବନ୍ଦ ରହିବ ଶ୍ରୀଜିଉଙ୍କ ଦର୍ଶନ। ଅପରାହ୍ନ ୪ଟାରୁ ରାତି ୮ଟା ପର୍ଯ୍ୟନ୍ତ ବନ୍ଦ ରହିବ ମହାପ୍ରଭୁଙ୍କ ଦର୍ଶନ। ଶ୍ରୀଜିଉ ମାନଙ୍କର ବନକ ଲାଗି ନୀତି ଅନୁଷ୍ଠିତ ହେବ। ମହାପ୍ରଭୁଙ୍କର ଏହି ସ୍ୱତନ୍ତ୍ର ଗୁପ୍ତ ନୀତି ଅପରାହ୍ନ ୪ଟାରୁ ସଂଧ୍ୟା ୮ଟା ମଧ୍ୟରେ ଅନୁଷ୍ଠିତ ହେବ। ଶ୍ରୀଜିଉ ମାନଙ୍କର ଶ୍ରୀମୁଖ ଶୃଙ୍ଗାର ନୀତି ଦତ୍ତ ମହାପାତ୍ର ସେବାୟତ ଏହା ସମ୍ପାଦନ କରିବେ। ପାରମ୍ପରିକ ରଙ୍ଗରେ ଶ୍ରୀଜିଉମାନଙ୍କର ଶୃଙ୍ଗାର କରାଯିବ । ସେହି ସମୟରେ ସାଧାରଣ ଦର୍ଶନ ୪ ଘଣ୍ଟା ପାଇଁ ବନ୍ଦ ହେବ ।
ପ୍ରତିମାସରେ ହାରାହାରି ଦୁଇଥର ଶ୍ରୀଜୀଉମାନଙ୍କର ମୁଖଶ୍ରୀର ପ୍ରସାଧନ (ରଙ୍ଗଲାଗି) ବା ବନକଲାଗି ହୋଇଥାଏ। ବନକଲାଗି ରୀତି ‘ଦତ୍ତ ମହାପାତ୍ର’ ଗୋଷ୍ଠୀର ସେବକମାନଙ୍କ ଦ୍ୱାରା କରାଯାଇଥାଏ। ନିୟମ ଅନୁଯାୟୀ ବୁଧବାର ଦିନ ବନକଲାଗି ହୋଇଥାଏ। ଦି’ପ୍ରହର ଧୂପ ସରିବାପରେ ମନ୍ଦିରର ସମସ୍ତ ଦରଜା ବନ୍ଦ କରାଯାଇ ଏହି ନୀତି କରାଯାଇଥାଏ। ଦତ୍ତମହାପାତ୍ର ରତ୍ନ ସିଂହାସନ ଉପରକୁ ଯାଇ ଦେବତାମାନଙ୍କର ମୁଖସିଂହାର କରନ୍ତି। ଏହି ନୀତି ସମାପନ ହେବା ପର୍ଯ୍ୟନ୍ତ ଶ୍ରୀମନ୍ଦିରର ସମସ୍ତ ଦ୍ୱାର ସମ୍ପୂର୍ଣ୍ଣ ବନ୍ଦ ରହେ। ତିନି ଦାରୁମୂର୍ତ୍ତିଙ୍କ ମୁଖମଣ୍ଡଳରେ ଶୃଙ୍ଗାରକୁ ମନ୍ଦିର ଭାଷାରେ ବନକଲାଗି କୁହାଯାଏ ।
କବି ସାଲବେଗ ମହାପ୍ରଭୁଙ୍କ ଶ୍ରୀମୁଖ ଦେଖି ଲେଖିଛନ୍ତି ‘ଝଲମଲ ଦିଶୁଥାଇ ମୁକୁତାର ଝଟକ’। କୌଣସି ଆଭୂଷଣ ନଥାଇ ମହାପ୍ରଭୁଙ୍କ ମୁଖମଣ୍ଡଳ ଭକ୍ତଙ୍କୁ ଆକର୍ଷିତ କରେ। ଏହି ଆକର୍ଷଣର କାରଣ ମୁହଁର ରଙ୍ଗବିନ୍ୟାସ। ଏହି ରଙ୍ଗବିନ୍ୟାସ ବା ବନକଲାଗି ନୀତି ପାଇଁ ଏକ ସ୍ୱତନ୍ତ୍ର ସେବାୟତ ଗୋଷ୍ଠୀ ଅଛନ୍ତି। ଏମାନଙ୍କୁ ଦତ୍ତ ମହାପାତ୍ର କୁହାଯାଏ। ଏମାନଙ୍କ କାମ ହେଲା ରଙ୍ଗପ୍ରସ୍ତୁତ କରିବା ଓ ବିଗ୍ରହରେ ଲଗାଇବା। ରଙ୍ଗ ସହିତ କସ୍ତୁରୀ ଓ କେଶର ଭଳି ଦାମୀ ସୁବାସିତ ପଦାର୍ଥ ବ୍ୟବହୃତ ହେଉଥିବାରୁ, ବିଧିମତେ ଥରେ ବନକଲାଗି ପାଇଁ ୭ ହଜାରରୁ ଅଧିକ ଟଙ୍କା ଖର୍ଚ୍ଚ ହୁଏ।
ବଜାରରେ ମିଳୁଥିବା ରଙ୍ଗ ବନକଲାଗିରେ ବ୍ୟବହାର ହୁଏ ନାହିଁ। ମହାପ୍ରଭୁଙ୍କ ଲାଗି ଉର୍ଦ୍ଦିଷ୍ଟ ରଙ୍ଗଗୁଡିକ ପ୍ରସ୍ତୁତ ପାଇଁ ଭିତର ବେଢାର ଉତ୍ତର ପଟେ ଗୋଟିଏ କୋଠରୀ ରହିଛି। ଏହାକୁ ବନକଲାଗି ଘର କୁହାଯାଏ। ଶଙ୍ଖକୁ ଚୂର୍ଣ୍ଣ କରି ଧଳାରଙ୍ଗ, ହରିତାଳରୁ ହଳଦିଆ ଓ ହିଙ୍ଗୁଳରୁ କଳା ପ୍ରସ୍ତୁତ ହୁଏ। ଏସବୁ ରଙ୍ଗରେ କର୍ପୁର ଓ କସ୍ତୁରୀ ମିଶେ। କସ୍ତୁରୀ ଯୋଗୁଁ ମହାପ୍ରଭୁଙ୍କ ମୁଖମଣ୍ଡଳ ଉଜ୍ଜଳ ଓ ମସୃଣ ରହେ। ରତ୍ନସିଂହାସନ ଆଗରେ ଯେଉଁ ଭୋଗ ବଢାହୁଏ ତା’ର ଗରମବାଷ୍ପ ଯୋଗୁଁ ମୁଖମଣ୍ଡଳର ଉଜ୍ଜଳତା କମିଯାଏ। କସ୍ତୁରୀ ବ୍ୟବହାର ଯୋଗୁଁ ରଙ୍ଗ ଦୀର୍ଘସ୍ଥାୟୀ ହୁଏ।
ଆରମ୍ଭ ହେଲା ଅନ୍ତରାଷ୍ଟ୍ରୀୟ ଏୟାର ଶୋ, ଦର୍ଶକଙ୍କ ପାଇଁ କୋଭିଡ ରିପୋର୍ଟ ବାଧ୍ୟତାମୂଳକ
ବାଙ୍ଗାଲୋର: ଆଜିଠୁ ଆରମ୍ଭ ହେଉଛି ଅନ୍ତରାଷ୍ଟ୍ରୀୟ ଏୟାର ଶୋ। ବାଙ୍ଗାଲୋରଠାରେ ଆୟୋଜିତ ହେବାକୁ ଥିବା ଏହି ଏରୋ-ଇଣ୍ଡିଆ-୨୦୨୧ ଶୋ’ ଆସନ୍ତା ୩ଦିନ ଧରି ଚାଲିବ। ଏଥିରେ ଭାରତ ସମେତ ଅନ୍ୟ ରାଷ୍ଟ୍ରର ଯୁଦ୍ଧବିମାନ, ଅସ୍ତ୍ରଶସ୍ତ୍ର ଓ ଟେକ୍ନୋଲୋଜୀ ପ୍ରଦର୍ଶିତ ହେବ। ଏରୋ-ଇଣ୍ଡିଆ ଶୋ’ରେ ସାରା ବିଶ୍ୱର ପ୍ରତିରକ୍ଷା ବିଭାଗର ଅଧିକାରୀ ଓ କମ୍ପାନୀମାନେ ପରସ୍ପର ମଧ୍ୟରେ ବୈଠକ ଓ ଆଲୋଚନା କରିଥାନ୍ତି। ଏଠାରେ ଅନେକ ଡିଲ୍ ମଧ୍ୟ ହୋଇଥାଏ। ଏଥର କରୋନା ମହାମରୀକୁ ଦୃଷ୍ଟିରେ ରଖି କିଛି ନୂଆ ନିୟମ ଲାଗୁ କରାଯାଇଛି। ମାସ୍କ ପିନ୍ଧିବା ସହ ସାମାଜିକ ଦୂରତ୍ୱ ବଜାୟ ରଖିବା ଓ ସାନିଟାଇଜେଶନକୁ ଏଠାରେ ଅଧିକ ଗୁରୁତ୍ୱ ଦିଆଯାଇଛି। ଏହାସହ ଶୋ’ ଦେଖିବାକୁ ଆସୁଥିବା ଦର୍ଶକଙ୍କୁ ୭୨ ଘଣ୍ଟା ମଧ୍ୟରେ କରୋନା ନେଗେଟିଭ୍ ରିପୋର୍ଟ ବାଧ୍ୟତାମୂଳକ କରାଯାଇଛି।
ଉଗ୍ରରୂପ ନେଉଛି ଚାଷୀ ଆନ୍ଦୋଳନ, କୃଷକଙ୍କୁ ସମର୍ଥନ କରୁଛନ୍ତି ହଲିଉଡ୍ ସେଲିବ୍ରିଟି
ନୂଆଦିଲ୍ଲୀ: ଚାଷୀ ଆନ୍ଦୋଳନ ପ୍ରତି ବଢୁଛି ଅନ୍ତରାଷ୍ଟ୍ରୀୟ ସମର୍ଥନ। ଚାଷୀଙ୍କ ସମର୍ଥନରେ ବାହାରିଛନ୍ତି ଗ୍ଲୋବାଲ ସେଲିବ୍ରିଟି। ୨ମାସରୁ ଊର୍ଦ୍ଧ୍ୱ ସମୟ ଧରି ରାଜରାସ୍ତାରେ ବସିଥିବା ଚାଷୀଙ୍କ ସମ୍ପର୍କରେ କାହିଁକି ଆଲୋଚନା କରାଯାଉନି ବୋଲି ଟୁଇଟ କରିଛନ୍ତି ହଲିଉଡ୍ ଗାୟିକା ରିହାନା। ପୂର୍ବରୁ ବି ଅନେକ ଦେଶରୁ ଚାଷୀଙ୍କୁ ସମର୍ଥନ ମିଳିଥିବା ବେଳେ ଅନ୍ତରାଷ୍ଟ୍ରୀୟସ୍ତରର ସେଲିବ୍ରିଟିମାନେ ଚାଷୀ ଆନ୍ଦୋଳନକୁ ନେଇ ସୋସିଆଲ୍ ମିଡିଆରେ ସମର୍ଥନ ଦେଉଛନ୍ତି।
ପରିବେଶ ସୁରକ୍ଷା ପାଇଁ କାର୍ଯ୍ୟ କରୁଥିବା ସମାଜସେବୀ ଲିସିପ୍ରିୟା କାଙ୍ଗଜୁଜାମ ଟ୍ୱିଟରରେ କୃଷକ ଆନ୍ଦୋଳନକୁ ଖୋଲାଖୋଲି ସମର୍ଥନ କରିଛନ୍ତି। ଏହାସହ ଅନ୍ୟମାନେ ମଧ୍ୟ ଏହାକୁ ସମର୍ଥନ କରିବାକୁ ସେ ଆହ୍ୱାନ ଦେଇଛନ୍ତି। ସେପଟେ ଚାଷୀ ଆନ୍ଦୋଳନକୁ ନିଜର ସମର୍ଥନ ଜଣାଇଛନ୍ତି ଗ୍ରେଟା ଥନ୍ବର୍ଗ।
ଅନ୍ୟପଟେ ଚାଷୀଙ୍କ ବିରୋଧରେ ବିବାଦୀୟ ଟୁଇଟ୍ କରି ପୁଣି ଟ୍ରୋଲ ହୋଇଛନ୍ତି ଅଭିନେତ୍ରୀ କଙ୍ଗନା ରାଣାଓ୍ୱତ। ଚାଷୀଙ୍କ ସମର୍ଥନରେ ବାହାରିଥିବା ହଲିଉଡ୍ ଗାୟିକା ଟୁଇଟ୍ କରିଥିବା ଟୁଇଟ୍ର ଜବାବ ଦେବାକୁ ଯାଇ କଙ୍ଗନା ଚାଷୀଙ୍କୁ ଆତଙ୍କବାଦୀ ବୋଲି କହିଛନ୍ତି। ଏହାକୁ ନେଇ ସୋସିଆଲ୍ ମିଡିଆରେ କଙ୍ଗନାଙ୍କୁ ଜବରଦସ୍ତ ଟ୍ରୋଲ୍ କରାଯାଉଛି।
କଟକ ସନ୍ ହସ୍ପିଟାଲରେ ସର୍ଟ ସର୍କିଟରୁ ନିଆଁ ଲାଗିଥିଲା, ପ୍ରାଥମିକ ତଦନ୍ତରୁ ସୂଚନା
କଟକ: କଟକ ସନ ହସପିଟାଲ ଅଗ୍ନୀକାଣ୍ଡ ଘଟଣା। ସର୍ଟ ସର୍କିଟରୁ ନିଆଁ ଲାଗିଥିବା ପ୍ରାଥମିକ ତଦନ୍ତରୁ ଜଣାପଡିଛି। ଅଗ୍ନିଶମ ବିଭାଗର ତଦନ୍ତକାରୀ ଟିମ ପ୍ରଥମ ଦିନ ତଦନ୍ତ ପରେ ଏହି ସୂଚନା ଦେଇଛନ୍ତି। ଏଥି ସହିତ ହସପିଟାଲକୁ କିଛି ସର୍ତ୍ତ ପୂରଣ ପାଇଁ ପୂର୍ବରୁ କୁହାଯାଉଥିବା ବେଳେ ତାହା ସେମାନେ ପୁରଣ କରି ନଥିବା ତଦନ୍ତକାରୀ ଟିମ ଜାଣିବାକୁ ପାଇଛି। ଖୁବଶୀଘ୍ର ତଦନ୍ତ ରିପୋର୍ଟ ପ୍ରଦାନ କରାଯିବ ବୋଲି ତଦନ୍ତକାରୀ ଟିମର ମୁଖ୍ୟ କହିଛନ୍ତି। ସୋମବାର ମଧ୍ୟାହ୍ନରେ ହଠାତ୍ ସନ ହସ୍ପିଟାଲର ପଞ୍ଚମ ମହଲାରେ ଲାଗିଥିଲା ନିଆଁ। ହସ୍ପିଟାଲର ଅଫିସ ଓ କ୍ୟାଣ୍ଟିନ ଉପର ଫ୍ଲୋରରେ ଥିବା ବେଳେ ତଳ ଫ୍ଲୋରରେ ଥିବା ସମସ୍ତ ୮ ରୋଗୀଙ୍କୁ ସୁରକ୍ଷିତ ଭାବେ ସରକାରୀ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ହସ୍ପିଟାଲର ସମସ୍ତ ଷ୍ଟାଫ ମଧ୍ୟ ସୁରକ୍ଷିତ ଉଦ୍ଧାର ହୋଇଥିଲେ।
ଭାରସାମ୍ୟ ହରାଇ ରାସ୍ତା କଡ଼କୁ ଓଲଟିପଡ଼ିଲା ଇଟା ବୋଝେଇ ଟ୍ରକ୍
ନୟାଗଡ଼: ନୟାଗଡ଼ ଜିଲ୍ଲା ଖଣ୍ଡପଡା ସୁନାମୁହିଁ ଠାରେ ଓଲଟିଲା ଇଟା ବୋଝେଇ ଟ୍ରକ୍। ଭାରସାମ୍ୟ ହରାଇ ରାସ୍ତା କଡ଼କୁ ଓଲଟି ପଡ଼ିଲା ଟ୍ରକ୍। ଦୁର୍ଘଟଣାରେ ଜଣେ ଶ୍ରମିକ ମୃତ, ଦୁଇ ଗୁରୁତର। ମୃତକ ହେଲେ ଅଭୟ ସ୍ୱାଇଁ। ଟ୍ରକଟି ଶିଖରପୁରରୁ ଇଟା ନେଇ ଭୁବନେଶ୍ୱର ଯାଉଥିବାବେଳେ ସୁନାମୁହିଁ ନିକଟରେ ଭାରସାମ୍ୟ ହରାଇ ଓଲଟି ପଡିଥିଲା। ଫଳରେ ଘଟଣାସ୍ଥଳରେ ଜଣେ ଶ୍ରମିକଙ୍କର ମୃତ୍ୟୁ ହୋଇଥିବାବେଳେ ଡ୍ରାଇଭରଙ୍କ ସମେତ ୨ଜଣ ଆହତ ହୋଇଛନ୍ତି। ଘଟଣାସ୍ଥଳରେ ପୋଲିସ୍ ପହଞ୍ଚି ଶବକୁ ଉଦ୍ଧାର କରିବା ସହିତ ଗରୁତରଙ୍କୁ ଖଣ୍ଡପଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛି।
ବିଳମ୍ବିତ ରାତିରେ ରୋଲରକୁ ପିଟିଲା ବୁଲେରୋ, ୩ ବର୍ଷ ପୁଅର ମୃତ୍ୟୁ, ପୁରା ପରିବାର ଗୁରୁତର
ଜଗତସିଂହପୁର କଟକ-ପାରାଦୀପ ରାସ୍ତାରେ ସଡକ ଦୁର୍ଘଟଣା। ଜଇପୁର ନିକଟ ଖଣ୍ଡତରୀରେ ରୋଲର୍କୁ ଧକ୍କା ଦେଲା ବୋଲେରୋ। ବୋଲୋରେ ଥିବା ଗୋଟିଏ ପରିବାରର ୩ବର୍ଷ ପୁଅର ଘଟଣାସ୍ଥଳରେ ମୃତ୍ୟୁ ହୋଇଛି। ବଡ଼ ପୁଅ, ବାପା, ମାଆଙ୍କ ସମେତ ଡ୍ରାଇଭର ଗୁରୁତର ହୋଇଛନ୍ତି। ଗୁରୁତରଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଛି। ଏରସମା କୋଠି ଗଙ୍ଗାଧରପୁର ଫେରୁଥିବା ବେଳେ ବିଳମ୍ବିତ ରାତିରେ ଦୁର୍ଘଟଣା ଘଟିଛି। ରୋଲରକୁ ପିଟିବା ପରେ ପୁରା ବୁଲେରୋ ନଷ୍ଟ ହୋଇଯାଇଛି। ରାସ୍ତା କଡ଼ରେ ପୁରା ଭାଙ୍ଗି ଦବିଯାଇଛି। ସାନ ପୁଅକୁ ହରାଇ ଏବେ ପୁରା ପରିବାର ନିସ୍ତବ୍ଦ ହୋଇପଡ଼ିଛି।
ବରଗଡ଼ ଜିଲ୍ଲା ଗସ୍ତ କରି ଉନ୍ନତିମୂଳକ କାର୍ଯ୍ୟର ସମୀକ୍ଷା କରିବେ 5t ସଚିବ ଭିକେ ପାଣ୍ଡିଆନ୍
ବରଗଡ଼: ଆଜି ବରଗଡ଼ ଜିଲ୍ଲା ଗସ୍ତ କରିବେ 5t ସଚିବ ଭିକେ ପାଣ୍ଡିଆନ୍। ଫୋକସ୍ରେ ପଶ୍ଚିମ ଓଡ଼ିଶା। ବରଗଡ଼ ଓ ବଲାଙ୍ଗୀର ଗସ୍ତରେ 5tସଚିବ ଭିକେ ପାଣ୍ଡିଆନ୍। ପାଇକମାଲରେ ନୃସିଂହନାଥ ମନ୍ଦିର ପରିଦର୍ଶନ ସହ ଉନ୍ନତି କାର୍ଯ୍ୟର ସମୀକ୍ଷା କରିବା କାର୍ଯ୍ୟକ୍ରମ ରହିଛି । ବରଗଡ ସତିଭଟା ଏୟାରଷ୍ଟ୍ରିପରେ ପହଞ୍ଚିବା ରେ ସେଠାରୁ ମନ୍ଦିର ଯିବାର କାର୍ଯ୍ୟକ୍ରମ ରହିଛି। 5t ସଚିବଙ୍କ ସହିତ ମୁଖ୍ୟଶାସନ ସଚିବ ସୁରେଶ ମହାପାତ୍ର, ପଶ୍ଚିମ ଓଡ଼ିଶା ବିକାଶ ପରିଷଦ ଅଧ୍ୟକ୍ଷ ଅସିତ ତ୍ରିପାଠୀ, ଜଳ ସମ୍ପଦ ସଚିବ ଅନୁ ଗର୍ଗ, ସ୍ୱତନ୍ତ୍ର ସଚିବ ଭିନିଲ କ୍ରିଷ୍ଣା ପ୍ରମୁଖ ବରଗଡ ଯାଇ ଉନ୍ନତିମୂଳକ କାର୍ଯ୍ୟର ସମୀକ୍ଷା କରିବେ। ଏଥିପାଇଁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି। ବରଗଡ଼ ପରେ ବଲାଙ୍ଗୀରର ପ୍ରସିଦ୍ଧ ହରିଶଙ୍କର ପୀଠ ବୁଲିବା କାର୍ଯ୍ୟକ୍ରମ ରହିଛି। ଲୋୟର ସୁକତେଲ ଜଳ ସେଚନ ପ୍ରକଳ୍ପର ମଧ୍ୟ ତଦାରଖ କରିବେ।