ବ୍ୟୁରୋ: ସେଦିନ ଥିଲା ଭାରତ ଅଷ୍ଟ୍ରେଲିଆ ପ୍ରଥମ ଟେଷ୍ଟର ତୃତୀୟ ଦିନ । ସକାଳୁ ଟିଭି ଖୋଲିଲା ବେଳକୁ ଖେଳ ପ୍ରାୟ ସରିଯାଇଥାଏ । ଭାରତ ମାତ୍ର ୩୬ ରନ କରି ଅଲ୍ଆଉଟ୍ ହେଇଥିଲା ଓ ଅଷ୍ଟ୍ରେଲିଆ ଅତି ସହଜରେ ପ୍ରଥମ ଟେଷ୍ଟ ଜିତି ସାରିଥିଲା । ଆଉ ସବୁ ଟିଭି ବନ୍ଦ ହେଇଯାଇଥିଲା । ହେଲେ ଚତୁର୍ଥ ଟେଷ୍ଟର ପଞ୍ଚମ ଦିନରେ ସମସ୍ତଙ୍କ ନଜର ଟିଭି ଉପରେ ଥାଏ, କାରଣ ଭାରତ ଐତିହାସିକ ବିଜୟରୁ ମାତ୍ର ୨ ରନ ପଛରେ ଥିଲା । ବୋଲିଂ କରୁଥିଲେ ହାଜେଲଉଡ୍ ଓ କ୍ରିଜ୍ରେ ଥିଲେ ଋଷଭ ପନ୍ଥଙ୍କ ସହ ନବଦ୍ୱୀପ ସାଇନି ।
ଭାରତ ଏବଂ ଅଷ୍ଟ୍ରେଲିଆ ବର୍ଡ଼ର-ଗାଭାସ୍କର ସିରିଜ୍ ଆରମ୍ଭ ପୂର୍ବରୁ ଅଷ୍ଟ୍ରେଲିଆର ଦୁଇ ମହାନ ଖେଳାଳି ରିକି ପଣ୍ଟିଂ ଓ ଗ୍ଲେନ୍ ମାକଗ୍ରାଥ୍ କହିଥିଲେ ଯେ ଅଷ୍ଟ୍ରେଲିଆ ଏହି ସିରିଜ ୪-୦ ରେ ଜିତିବ । ପ୍ରଥମ ଟେଷ୍ଟ ସରିଲା ପରେ ପୁରା ବିଶ୍ୱ ତାଙ୍କ କଥା ସତ ହେବ ବୋଲି ମାନି ନେଇଥିଲା । ସାରା ବିଶ୍ୱ, ଭାରତୀୟ ଖେଳାଳିଙ୍କୁ ସୋସିଆଲ ମେଡିଆରେ ଟ୍ରୋଲ କରିବା ଆରମ୍ଭ କରିଦେଇଥିଲା । ତାର କାରଣ ମଧ୍ୟ ଥିଲା, ଟିମରେ ବିରାଟ କୋହଲି ନଥିଲେ ଓ ଟିମ୍ର କିଛି ଖେଳାଳି ମଧ୍ୟ ଆହତ ଥିଲେ । କେବଳ ପଣ୍ଟିଂ ଓ ଗ୍ଲେନ୍ ନୁହଁନ୍ତି ବରଂ ବ୍ରାଡ୍ ହାଡିନ୍, ମାଇକେଲ କ୍ଲାର୍କ, ମାର୍କ ଓ୍ୱାଗ୍, ମାଇକେଲ ଭନ୍ ମଧ୍ୟ ସୋସିଆଲ ମିଡିଆରେ ଭାରତୀୟ ଟିମ୍କୁ ତାତ୍ସଲ୍ୟ କରିଥିଲେ ।
ହେଲେ ଦ୍ୱିତୀୟ ଟେଷ୍ଟ ପରଠାରୁ ପୁରା ଚିତ୍ର ପରିବର୍ତ୍ତନ ହୋଇଯାଇ ଥିଲା । ଏହି ଟେଷ୍ଟରେ ଭାରତର ଚମତ୍କାର ପ୍ରଦର୍ଶନ ସମସ୍ତଙ୍କ ମନରେ ଉନ୍ମାଦନା ସୃଷ୍ଟି କରିଥିଲା । ଭାରତୀୟଙ୍କ ମନରେ ଜିତିବାର ଆଶା ସଂଚାର କରିଥିଲା । ବିଦେଶ ମାଟିରେ କ୍ୟାପଟେନ୍ ଆଜିଙ୍କ୍ୟ ରାହାଣେ ଓ ଅନ୍ୟ ଖେଳାଳିଙ୍କ ଉଚ୍ଚ କୋଟିର ପ୍ରଦର୍ଶନ ପୁରା ବିଶ୍ୱକୁ ଦେଖାଇଥିଲା ଯେ ଭାରତ ବିଦେଶ ମାଟିରେ ବି ଭଲ ପ୍ରଦର୍ଶନ କରିପାରିବ ।
ତୃତୀୟ ଟେଷ୍ଟରେ ହାରିବା ମ୍ୟାଚ୍କୁ ଡ୍ର ରଖିବାରେ ଭାରତୀୟ ଖେଳାଳି ସକ୍ଷମ ହୋଇଥିଲେ । ଏହି ଟେଷ୍ଟ ଡ୍ର ହେବା, ଅଷ୍ଟ୍ରେଲିଆବାସୀଙ୍କ ମନରେ ରାଗ ଭରିଦେଇଥିଲା । ଗୋଟେ ସମୟରେ ଅଷ୍ଟ୍ରେଲିଆର ବ୍ୟାଟ୍ସମ୍ୟାନ ସ୍ମିଥଙ୍କୁ ଋଷବ ପଂଥଙ୍କ ବ୍ୟାଟିଂ ଗାର୍ଡକୁ ଲିଭେଇବାର ଦେଖିବାକୁ ମିଳିଥିଲା । ଏମିତି କି ପଡିଆରେ ଅଷ୍ଟ୍ରେଲିଆ ଖେଳାଳିଙ୍କ ପରି ଅଷ୍ଟ୍ରେଲିଆରେ ଦର୍ଶକ ମାନେ ମଧ୍ୟ ଭାରତୀୟ ଖେଳାଳିଙ୍କୁ ଖରାପ ବ୍ୟବହାର କରିଥିଲେ । ହେଲେ ଏହି ସବୁ ଘଟଣା କିଛି ବି, ଭାରତୀୟ ଖେଳାଳିଙ୍କ ପ୍ରଦର୍ଶନ ଉପରେ ପ୍ରଭାବ ପକାଇପାରିନଥିଲା ବରଂ ଭାରତୀୟ ଖେଳାଳିଙ୍କୁ ଆହୁରି ଭଲ ପ୍ରଦର୍ଶନ କରିବା ପାଇଁ ଖୋରାକ ଯୋଗାଇଥିଲା ।
ହେଲେ ଏହି ଟେଷ୍ଟରେ କିଛି ସିନିଅର ଖେଳାଳିଙ୍କ ଆହତ ସମସ୍ୟା ଏକ ଚିନ୍ତାର କାରଣ ହୋଇଥିଲା । ଟିମ୍ରେ ହନୁମା ବିହାରୀ, ଅଶ୍ୱିନୀ କିମ୍ବା ରବୀନ୍ଦ୍ର ଜାଡେଜା ନଥିଲେ, ହେଲେ ସେତେବେଳକୁ ଭାରତୀୟ ଖେଳାଳିଙ୍କ ମନରେ ଉତ୍ସାହ ବଢ଼ି ସାରିଥିଲା ।
ଚତୁର୍ଥ ଟେଷ୍ଟ ବେଳକୁ ଟିମ୍ରେ କିଛି ନୂଆ ଖେଳାଳିଙ୍କୁ ନେଇ ଭାରତୀୟ ଦଳ ପଡିଆ ଓଲ୍ହାଇଥିଲା । ପୁଣି ଚତୁର୍ଥ ଟେଷ୍ଟ ଖେଳା ଯାଇଥିଲା ଅଷ୍ଟ୍ରେଲିଆର ଗାବାରେ, ଯେଉଁଠି ଅଷ୍ଟ୍ରେଲିଆ ବିଗତ ୩୩ ବର୍ଷ ମଧ୍ୟରେ କେବେ ହାରି ନଥିଲା । ହେଲେ ଭାରତ ର ପ୍ରଥମ ଇଂନିଙ୍ଗସରେ ଭାରତୀୟ ଖେଳାଳିଙ୍କ ଅଲରାଉଣ୍ଡ ପ୍ରଦର୍ଶନ ସମସ୍ତ ଅଷ୍ଟ୍ରେଲିଆବାସୀଙ୍କୁ ଚକିତ କରିଦେଇଥିଲା । ରିକି ପଣ୍ଟିଂ ପାରମ୍ପରିକ ଭାବରେ କହିଲେ ଯେ ଅଷ୍ଟ୍ରେଲିଆ ଯଦି ଏହି ସିରିଜ ଡ୍ର କରୁଛି ତେବେ ଏହା ଏକ ଲଜ୍ୟା ଜନକ ଘଟଣା ।
କିନ୍ତୁ ଭାରତୀୟ ଖେଳାଳିମାନେ ସିରିଜ ଜିତିବ ପାଇଁ ଖେଳୁଥିଲେ । ବ୍ୟାଟିଂ ଓ ବୋଲିଂରେ ଭାରତୀୟ ଖେଳାଳି ଧୂଆଁଧାର ପ୍ରଦର୍ଶନ ଜାରି ରଖିଲେ ଓ କଙ୍ଗାରୁ ଦଳକୁ ଅଷ୍ଟ୍ରେଲିଆ ଭିତରେ ଧୂଳି ଚଟେଇ ଦେଲେ । ନିଜର ଖରାପ ପ୍ରଦର୍ଶନ ପାଇଁ ସମାଲୋଚନାର ଶିକାର ହେଉଥିବା ପଂଥ ହିଁ ନାୟକ ହୋଇଥିଲେ ଏହି ଟେଷ୍ଟରେ । ପଂଥ ଖେଳିଥିବା ଶେଷ ୫୪ ବଲ ରେ ୫୫ ରନ କରି ଭାରତ ପାଇଁ ଇତିହାସ ରଚିଥିଲେ । ହେଲେ ଭାରତ ର ଏହି ବିଜୟ ପରେ ସେହି ଦୁଇ ମହାନ ଖେଳାଳି ରିକି ପଣ୍ଟିଂ ଓ ଗ୍ଲେନ୍ ମାକଗ୍ରାଥ ଙ୍କ ଟ୍ୱିଟର ଆକାଉଣ୍ଟ ପୁରା ନିସ୍ତବ୍ଦ ହୋଇଯାଇଛି ।
