ରାଜ୍ୟକୁ ଆସିବ କରୋନା ଟିକା। ଏଥିପାଇଁ ରାଜ୍ୟ ସରକାର ସମସ୍ତ ପ୍ରସ୍ତୁତିକୁ ଠିକ୍ ଭାବରେ ତୁଲାଇଛନ୍ତି। ଏହାରି ଭିତରେ କେନ୍ଦ୍ର ସରକାର ଟୀକାକରଣ ପାଇଁ ପ୍ରସ୍ତୁତ ରହିବାକୁ ଚିଠି ଲେଖିଛନ୍ତି। ଖୁବଶୀଘ୍ର ଓଡ଼ିଶାକୁ ଟିକା ଆସିବ ବୋଲି ଚିଠିରେ ଉଲ୍ଲେଖ ରହିଛି। ହେଲେ ଟିକା କେବେ ଆସିବ ସେନେଇ କୌଣସି ନିର୍ଦ୍ଦିଷ୍ଟ ତାରିଖ ଉଲ୍ଲେଖ ହୋଇନାହିଁ। କିନ୍ତୁ ଯଦି ଟିକା ଆସେ ତେବେ କିଭଳି ସୁରୁଖୁରୁରେ ସମସ୍ତ କାର୍ଯ୍ୟ ସମ୍ପାଦନ ହୋଇପାରିବ ବା ପ୍ରତ୍ୟେକ ଜିଲ୍ଲାରେ କିଭଳି ଏହି ଟିକା ପହଞ୍ଚି ପାରିବ, ତାହାକୁ ନେଇ ଓଡ଼ିଶା ପୁରା ପ୍ରସ୍ତୁତ ରହିଛି ବୋଲି କହିଛନ୍ତି ସ୍ୱାସ୍ଥ୍ୟ ଓ ପରିବାର କଲ୍ୟାଣ ନିର୍ଦ୍ଦେଶକ ଡାକ୍ତର ବିଜୟ ପାଣିଗ୍ରାହୀ ।
ଟିକା ତିଆରି କରୁଥିବା କମ୍ପାନୀ ପାଖରୁ ଓଡ଼ିଶାକୁ ସିଧା ଟିକା ଆସିବ । ଟିକା ଆସିବା ପରେ ତାକୁ ଭୁବନେଶ୍ୱରରେ ଥିବା ଟିକା କେନ୍ଦ୍ରରେ ରଖାଯିବ। ଏହା ପରେ ରାଜ୍ୟର ବିଭିନ୍ନ ଜିଲ୍ଲାକୁ ପଠାଯିବ । ଜିଲ୍ଲାରେ ଟିକା ପହଞ୍ଚିଲା ପରେ ସେଠାରେ ଥିବା ‘ଜିଲ୍ଲା ଟିକା କେନ୍ଦ୍ର’ରେ ଟିକା ରଖାଯିବ। ଟୀକାକରଣ ପାଇଁ ଯେଉଁ ସରଞ୍ଜାମ ରହିଛି ତାହା ଟୀକାକରଣ ପାଇଁ ଯଥେଷ୍ଟ ବୋଲି କହିଛନ୍ତି ଡାକ୍ତର ବିଜୟ ପାଣିଗ୍ରାହୀ ।
ଡାଟାବେସକୁ ଆଧାର କରି ଟିକା ମଗାଯାଇଛି। କେତେ ପରିମାଣର ଟିକା ପଠାଯିବ ତାହା ଦିଆଯାଇଥିବା ତଥ୍ୟ ଉପରେ ନିର୍ଭର କରେ । । ରାଜ୍ୟରେ ଟିକା ପହଞ୍ଚିଲା ପରେ କେଉଁଠି ଟୀକାକରଣ ବ୍ୟବସ୍ଥା କରାଯିବ, ତାହାକୁ ନେଇ ୮ ତାରିଖ ସୁଦ୍ଧା ଜିଲ୍ଲାପାଳମାନେ ରିପୋର୍ଟ ଦେବେ । ସମସ୍ତ ପ୍ରକ୍ରିୟା ୧୦ ତାରିଖ ସୁଦ୍ଧା ଶେଷ ହେବ ବୋଲି କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ। ରାଜ୍ୟ ଭ୍ୟାକସିନ ଷ୍ଟୋରକୁ ଟିକା ଆସିଲେ ସେଠାରୁ ୯ଟି ଆଞ୍ଚଳିକ ଟିକା ଷ୍ଟୋରକୁ ଟିକା ପଠାଯିବ । ଭୁବନେଶ୍ୱର, କଟକ, ଗଞ୍ଜାମ, ସୁନ୍ଦରଗଡ଼, ସମ୍ବଲପୁର, କୋରାପୁଟ, କନ୍ଧମାଳ, ବଲାଙ୍ଗୀର ଏବଂ ବାଲେଶ୍ୱରକୁ ଏଥିପାଇଁ ଚିହ୍ନଟ କରାଯାଇଛି। ସେଠାରୁ ୩୨ ଟି ଜିଲ୍ଲାରେ ଥିବା ଶୀତଳ ଭଣ୍ଡାରକୁ ଟିକା ଯିବ। ସେଠାରୁ 1222 କୋଲ୍ଡ ଚେନ ପଏଣ୍ଟକୁ ଯିବ । ଏଠାରୁ 29 ହଜାର 272 ସେସନ ସାଇଟକୁ ପଠାଯିବ। ଏହାପରେ ଭ୍ୟାକସିନେସନ ରୁମରେ ଷ୍ଟୋର ହେବ ।
ତେବେ ଟୀକାକରଣ କେନ୍ଦ୍ରରେ କେଉଁସବୁ ବ୍ୟବସ୍ଥା କରାଯିବ:
ଟିକା ବଣ୍ଟନ ଏବଂ ପ୍ରଶାସନ ସମ୍ବନ୍ଧରେ ଜାରି କରାଯାଇଥିବା SOPରେ କେନ୍ଦ୍ର ରାଜ୍ୟମାନଙ୍କୁ ଅନେକ କିଛି ନିର୍ଦ୍ଦେଶ ଦେଇଛି। ପ୍ରଥମେ ଟିକା ପାଇଁ ପଞ୍ଜୀକୃତ କରିବା ବାଧ୍ୟତାମୂଳକ। ଏହା ପରେ ସେମାନଙ୍କୁ ଏକ ତାରିଖ ଦିଆଯିବ । ଧାର୍ଯ୍ୟ ହୋଇଥିବା ତାରିଖରେ ସେମାନଙ୍କୁ ଟିକାକରଣ କେନ୍ଦ୍ରରେ ପହଞ୍ଚିବାକୁ ପଡ଼ିବ। ଏହି କେନ୍ଦ୍ରଗୁଡିକରେ ଅତି କମରେ ତିନୋଟି ଭିନ୍ନ କୋଠରୀ ରହିବା ଉଚିତ ବୋଲି କେନ୍ଦ୍ର ପରାମର୍ଶ ଦେଇଛି।
କେନ୍ଦ୍ର ଦେଇଥିବା ପରାମର୍ଶ ଅନୁସାରେ ଟିକା ଦିଆଯାଉଥିବା ସ୍ଥାନରେ ତିନୋଟି କୋଠରୀ ରହିବ। ଏହି ତିନୋଟିରୁ ପ୍ରଥମଟି ଅପେକ୍ଷା କକ୍ଷ, ଦ୍ୱିତୀୟଟି ଟୀକାକରଣ କକ୍ଷ ଏବଂ ତୃତୀୟଟି ପର୍ଯ୍ୟବେକ୍ଷଣ କକ୍ଷ ।
ଅପେକ୍ଷା କକ୍ଷ:
ଅପେକ୍ଷା କକ୍ଷରେ ଟିକା ନେବାକୁ ଯାଇଥିବା ବ୍ୟକ୍ତିଙ୍କୁ ନିଜ ପାଳି ଆସିବା ପର୍ଯ୍ୟନ୍ତ ଅପେକ୍ଷା କରିବାକୁ ହେବ। ସେଠାରେ ଉକ୍ତ ବ୍ୟକ୍ତିଙ୍କ ପରିଚୟ ଯାଞ୍ଚ କରାଯିବ। ଯାଞ୍ଚ ସମୟରେ ପରିଚୟପତ୍ର, ଫଟୋ ପ୍ରଭୃତି ପୈଠ କରିବା ବାଧ୍ୟତାମଳୂକ ହେବ । ସେହି କକ୍ଷରେ ହ୍ୟାଣ୍ଡୱସ୍ ଓ ସାନିଟାଇଜରର ସୁବିଧା ରହିବ ।
ଟିକାକରଣ କକ୍ଷ:
ଏହି କକ୍ଷରେ ଆପଣଙ୍କୁ ଟୀକାର ଡୋଜ୍ ଦିଆଯିବ। ଏକ ସମୟରେ କେବଳ ଜଣେ ବ୍ୟକ୍ତି ହିଁ ଏହି କକ୍ଷରେ ପ୍ରବେଶ କରିପାରିବେ। ମହିଳା ଟିକା ଗ୍ରହଣ କରିବାବେଳେ ଟୀକାକରଣ କକ୍ଷରେ ଜଣେ ମହିଳା କର୍ମଚାରୀଙ୍କ ଉପସ୍ଥିତି ବାଧ୍ୟତାମୂଳକ ହେବ ।
ପର୍ଯ୍ୟବେକ୍ଷଣ କକ୍ଷ:
ଟିକା ନେବା ପରେ ଉକ୍ତ ବ୍ୟକ୍ତିଙ୍କୁ ଏହି କକ୍ଷକୁ ପଠାଇ ଦିଆଯିବ। ଏଠାରେ ୩୦ ମିନିଟ୍ ପର୍ଯ୍ୟନ୍ତ ମନିଟରିଂ କରାଯିବ । ଟୀକାର କିଛି ପ୍ରତିକୂଳ ପ୍ରଭାବ ପଡ଼ୁଛି କି ନାହିଁ ତାହା ଅନୁଧ୍ୟାନ କରାଯିବ। ଟୀକାକରଣ ଟିମ୍ ସନ୍ତୁଷ୍ଟ ହେବା ପରେ ଯାଇ ଟିକା ନେଇଥିବା ବ୍ୟକ୍ତିଙ୍କୁ ଘରକୁ ପଠାଯିବ।
ସମସ୍ତ ତିନୋଟି ସ୍ଥାନରେ ସାମାଜିକ ଦୂରତା ଅନୁସରଣ କରିବାକୁ ପଡ଼ିବ। ଏହି ଟିକା ବିତରଣ ଦଳରେ ଜଣେ ଟିକା ଅଧିକାରୀ ଏବଂ ଚାରି ଜଣ ଟୀକାକରଣ ଅଧିକାରୀ ରହିବେ। ନିର୍ଦ୍ଦେଶାବଳୀ ଅନୁଯାୟୀ, ଟୀକାକରଣ ସ୍ଥାନରେ ଦିନକୁ ମାତ୍ର ୧୦୦ ଜଣ ଲୋକଙ୍କୁ ଟିକା ଦିଆଯିବ। ଯଦି ସୁବିଧା ଥିବ ତେବେ ଏହାକୁ ୨୦୦କୁ ମଧ୍ୟ ବୃଦ୍ଧି କରାଯାଇପାରେ ।
ଟୀକାକରଣ ପାଇଁ ମତଦାନ ବୁଥ, କଲେଜ ଏବଂ କମ୍ୟୁନିଟି ହଲ୍ ବ୍ୟବହାର କରାଯାଇପାରିବ। ଏହା ବ୍ୟତୀତ ମ୍ୟୁନିସିପାଲିଟି କର୍ପୋରେସନ୍ ବିଲ୍ଡିଂ, ପଞ୍ଚାୟତ ବିଲଡିଂ, କ୍ୟାଣ୍ଟ ହସ୍ପିଟାଲ୍, ରେଳ ହସ୍ପିଟାଲ୍, ପାରାମିଲିଟାରୀ ଫୋର୍ସର ଶିବିରକୁ ଟିକାକରଣ ସ୍ଥାନ ଭାବରେ ବ୍ୟବହାର କରିବାର ଯୋଜନା ରହିଛି।
ଏନେଇ ଲୋକାୟୁକ୍ତଙ୍କ ନିକଟରେ ଲିଖିତ ଅଭିଯୋଗ ହୋଇଥିଲା । ଏହି ମାମଲାର ଶୁଣାଣି କରି ଲୋକାୟୁକ୍ତ ଘଟଣାର ତଦନ୍ତ କରିବାକୁ ଅନୁଗୁଳ ଭିଜିଲାନ୍ସ ଅଧିକାରୀ ଙ୍କୁ ନିର୍ଦ୍ଦେଶ ଦେଇଥିଲେ। ଲୋକାୟୁକ୍ତ ଙ୍କ ନିର୍ଦ୍ଦେଶ ପରେ ଆଜି ଭିଜିଲାନ୍ସର ୪୦ ଜଣିଆ ଟିମ୍ ଏହି ଚଢାଉ ଜାରି ରଖିଛନ୍ତି ।