ନନ୍ଦିଘୋଷ ବ୍ୟୁରୋ : ଭାରତର ବଢିବ ପ୍ରତିରକ୍ଷା ବଳ । ପ୍ରାୟ ୬୭ ହଜାର କୋଟି ଟଙ୍କାର ସାମରିକ ପ୍ରକଳ୍ପକୁ ମଞ୍ଜୁରୀ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଅଧ୍ୟକ୍ଷତାରେ ପ୍ରତିରକ୍ଷା ଅଧିଗ୍ରହଣ ପରିଷଦ (DAC) ମଙ୍ଗଳବାର ଏହି ଏମଓୟୁକୁ ମଞ୍ଜରୀ ଦେଇଛି । ଏଥିରେ କ୍ଷେପଣାସ୍ତ୍ର ପ୍ରଣାଳୀ, ବାୟୁ ପ୍ରତିରକ୍ଷା ନେଟୱାର୍କ, ଦୀର୍ଘ ଦୂରଗାମୀ ଡ୍ରୋନ୍ ଏବଂ ରାଡାର ଭଳି ଅନେକ ଅତ୍ୟାଧୁନିକ ଅସ୍ତ୍ରଶସ୍ତ୍ର ଅନ୍ତର୍ଭୁକ୍ତ ରହିଛି । ଯାହାକୁ ଭାରତୀୟ ସେନା, ବାୟୁସେନା ଏବଂନୌସେନାର ଶକ୍ତିକୁ ଏକ ନୂତନ ସ୍ତରକୁ ନେଇଯିବ। ନୌସେନାକୁ ବ୍ରହ୍ମୋସ ଏବଂ ବାରାକ-୧ର ସମର୍ଥନ ମିଳିବ। ପ୍ରକଳ୍ପ ଅଧୀନରେ ଭାରତୀୟ ନୌସେନା ବ୍ରହ୍ମୋସ ଅଗ୍ନି ନିୟନ୍ତ୍ରଣ ପ୍ରଣାଳୀ, ବ୍ରହ୍ମୋସ ଲଞ୍ଚର ଏବଂ ବାରାକ-୧ ପଏଣ୍ଟ ପ୍ରତିରକ୍ଷା କ୍ଷେପଣାସ୍ତ୍ର ପ୍ରଣାଳୀର ଉନ୍ନତିକରଣକୁ ଅନୁମୋଦନ କରାଯାଇଛି। ଏହା ସହିତ, ନୌସେନା ପାଇଁ କମ୍ପାକ୍ଟ ସ୍ୱୟଂଚାଳିତ ସରଫେସ୍ କ୍ରାଫ୍ଟ ମଧ୍ୟ କିଣାଯିବ। ଏହି ରୋବୋଟିକ୍ ଡଙ୍ଗାଗୁଡ଼ିକ ସବମେରିନ୍-ବିରୋଧୀ ଯୁଦ୍ଧରେ ଶତ୍ରୁ କାର୍ଯ୍ୟକଳାପକୁ ଟ୍ରାକ୍ ଏବଂ ନିରପେକ୍ଷ କରିବାରେ ସାହାଯ୍ୟ କରିବ।
ଆଜିଠୁ ଚାରି ଦିନ ଯାଏଁ ପ୍ରବଳ ବର୍ଷା ସମ୍ଭାବନା
ଭୁବନେଶ୍ବର : କାଲି ସୃଷ୍ଟି ହୋଇପାରେ ଘୂର୍ଣ୍ଣିବଳୟ। ପ୍ରଭାବରେ ଆଜିଠୁ ରାଜ୍ୟରେ ହୋଇପାରେ ପ୍ରବଳ ବର୍ଷା । କେନ୍ଦୁଝର, ମୟୂରଭଞ୍ଜ, ଗଜପତି, ଗଞ୍ଜାମ ଓ ରାୟଗଡ଼ାରେ ପ୍ରବଳ ବର୍ଷା ହେବାର ସମ୍ଭାବନା ଅଛି। ଆଭ୍ୟନ୍ତରୀଣ ଓଡ଼ିଶା ଓ ଦକ୍ଷିଣ ଓଡ଼ିଶାରେ ବି ଘଡ଼ଘଡ଼ି ସହ ବର୍ଷା ହୋଇପାରେ। ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ସମେତ ପଶ୍ଚିମ ଓଡ଼ିଶା ଓ ଦକ୍ଷିଣ ଓଡ଼ିଶାର ବିଭିନ୍ନ ଜିଲ୍ଲାରେ ଘଡ଼ଘଡ଼ି ସହ ବର୍ଷା ହୋଇପାରେ । କାଲି କେନ୍ଦୁଝର, ମୟୂରଭଞ୍ଜ, ସୁନ୍ଦରଗଡ଼, ଗଜପତି, ଗଞ୍ଜାମ, ରାୟଗଡ଼ା, କୋରାପୁଟରେ ଅଧିକ ବର୍ଷା ହୋଇପାରେ ବୋଲି ପାଣିପାଗ ବିଭାଗ ଆକଳନ କରିଛି । ୯ ତାରିଖ ପର୍ଯ୍ୟନ୍ତ ବର୍ଷା ଲାଗି ରହିବ ବୋଲି ଆକଳନ କରାଯାଇଛି ।
ଉତ୍ତରକାଶୀ ବାଦଲ ଫଟା ବର୍ଷାରେ ମୃତାହତଙ୍କୁ ନେଇ ନବୀନ ଓ ମୋଦିଙ୍କ ଦୁଃଖ ପ୍ରକାଶ
ନନ୍ଦିଘୋଷ ବ୍ୟୁରୋ: ଉତ୍ତରାଖଣ୍ଡ ଉତ୍ତରକାଶୀରେ ବାଦଲ ଫଟା ବର୍ଷା ବିତ୍ପାତ ନେଇ ଗଭୀର ଦୁଃଖ ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଓଡ଼ିଶାର ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ।
ଟ୍ବିଟ କରି ନବୀନ କହିଛନ୍ତି, ଧରାଲି ଗାଁରେ ଜଳପ୍ରଳୟରେ ଅନେକ ମୂଲ୍ୟବାନ ଜୀବନ ଓ ଧନହାନୀ ହୋଇଛି । ଅନେକ ଲୋକ ନିଖୋଜ ହୋଇଯାଇଥିବା ନେଇ ସୂଚନା ରହିଛି । ଏପରି ଏକ ଦୁର୍ଦ୍ଦିନରେ ମୃତକ ଓ ବିପନ୍ନଙ୍କ ପରିବାରକୁ ସମବେଦନା ଜଣାଉଛି । ଏପରି ଅକଳ୍ପନୀୟ ବିପର୍ଯ୍ୟୟ ବେଳେ ମୋର ଭାବାବେଗ ସେମାନଙ୍କ ସହ ଅଛି ବୋଲି କହିଛନ୍ତି ନବୀନ । ପ୍ରଭୁ ଶ୍ରୀଜଗନ୍ନାଥ ବିପନ୍ନଙ୍କ ପରିବାରଙ୍କୁ ଶକ୍ତି ଓ ସୁରକ୍ଷା ଦିଅନ୍ତୁ । ଏପରି ପ୍ରତିକୂଳ ପରିସ୍ଥିତିରେ ଉଦ୍ଧାର କାର୍ଯ୍ୟରେ ଲାଗିଥିବା ଉଦ୍ଧାରକାରୀ ଦଳକୁ ମଧ୍ୟ ସେମାନଙ୍କ ସାହସିକ କାମକୁ ମଧ୍ୟ ସାଲ୍ୟୁଟ କରୁଛି ବୋଲି ନବୀନ ନିଜ ପୋଷ୍ଟରେ ଉଲ୍ଲେଖ କରିଛନ୍ତି ।
ସେହିପରି ଜଳ ପ୍ରଳୟକୁ ନେଇ ଉଦବେଗ ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଉଦ୍ଧାର କାର୍ଯ୍ୟ ଲାଗି କେନ୍ଦ୍ର ସମସ୍ତ ପ୍ରକାର ସହଯୋଗ କରିବ ବୋଲି କହିଛନ୍ତି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ବିରୋଧୀ ଦଳ ନେତା ରାହୁଲ ଗାନ୍ଧି ପ୍ରମୁଖ ଉଦବେଗ ପ୍ରକାଶ କରିଛନ୍ତି ।
ଦୁଇ ମାସରେ ସରିବ କଂଗ୍ରେସର ସାଂଗଠନିକ ନିର୍ବାଚନ ପ୍ରକ୍ରିୟା, ତୃଣମୂଳ ସ୍ତରରେ ଦଳ ସଜାଡ଼ିବାକୁ ଉଦ୍ୟମ
ନନ୍ଦିଘୋଷ ବ୍ୟୁରୋ: ୨ ମାସ ମଧ୍ୟରେ ସରିବ କଂଗ୍ରେସର ସାଂଗଠନିକ ନିର୍ବାଚନ ପ୍ରକ୍ରିୟା । ଫେବୃୟାରୀ ମାସରୁ ପିସିସି ସଭାପତି ଦାୟିତ୍ବ ନେଇଥିବା ଭକ୍ତଚରଣ ଦାସ ସଂଗଠନକୁ ସଂପୂର୍ଣ୍ଣ ନବକଳେବର କରିପାରି ନାହାନ୍ତି । ତୃଣମୂଳ ସଂଗଠନକୁ ସଜାଡିବା ପାଇଁ କଂଗ୍ରେସ ବ୍ଲକ ସଭାପତି ଚୟନ ପ୍ରକ୍ରିୟା ଆରମ୍ଭ କରିଥିବା ବେଳେ ଜିଲ୍ଲା ସଭାପତି ବାଛିବାର ଗୁରୁ ଦାୟିତ୍ବ ନେଇଛି ଏଆଇସିସି । ସଂଗଠନ ସଜାଡିବା ସହ ଦଳକୁ ଆଗକୁ ନେବାକୁ ଅଣ୍ଟା ଭିଡିଛନ୍ତି ନେତା ।
ପିସିସି ସଭାପତି ନିଜ ଟିମ ଗଠନ କରିବା ପରେ ଜିଲ୍ଲା ସଂଗଠନକୁ ଫୋକସ କରିଛନ୍ତି । ଆରମ୍ଭ ହୋଇଛି ବ୍ଲକ ସଭାପତି ଚୟନ ପ୍ରକ୍ରିୟା । ତୃଣମୂଳସ୍ତରରେ ଅସଜଡ଼ା ସଂଗଠନକୁ ନୂଆ ରୂପ ଦେବାକୁ ଅଣ୍ଟା ଭିଡିଛନ୍ତି ପିସିସି ସଭାପତି ଭକ୍ତଚରଣ ଦାସ । ଦୁଇମାସ ଭିତରେ ସାଂଗଠନିକ ନିର୍ବାଚନ ପ୍ରକ୍ରିୟା ଶେଷ କରିବାକୁ ଲକ୍ଷ୍ୟ ରଖିଛି ଦଳ । ପ୍ରଥମ ଥର ଲାଗି ଏଆଇସିସି ଜିଲ୍ଲା ସଂଗଠନକୁ ଅଧିକ ଶକ୍ତିଶାଳୀ କରିବା ପାଇଁ ସୁପାରିସ ନୁହେଁ, ବରଂ ଏଆଇସିସି ସଦସ୍ୟ ଜିଲ୍ଲାଗସ୍ତ କରି ସଭାପତି ଚୟନ କରିବେ । ସେଠାରେ ତୃଣମୂଳ ନେତାଙ୍କ ସହ ଆଲୋଚନା କରି ଜିଲ୍ଲା ସଭାପତି ଚୟନ କରାଯିବ ।
ଦାୟିତ୍ବ ନେବାର ୬ ମାସ ପରେ ଦଳୀୟ ସଂଗଠନକୁ ଚଳଚଞ୍ଚଳ କରିବାକୁ ବିଭିନ୍ନ କାର୍ଯ୍ୟକ୍ରମ ହାତକୁ ନେଇଛନ୍ତି ପିସିସି ସଭାପତି । ତୃଣମୂଳ ସଂଗଠନ ସଜାଡିବା ସହ ସରକାରଙ୍କ ବିରୋଧରେ ଲମ୍ବା ଲଢେଇ କରିବାକୁ ଦଳ ଆହ୍ବାନ ଦେଇଛି । ଆଗକୁ ନାରୀ ନିର୍ଯାତନା, ବିପର୍ଯ୍ୟସ୍ତ ଆଇନ ଶୃଙ୍ଖଳା ନେଇ ଦୁଇଟି ପଦଯାତ୍ରା କରିବା ସହ ବିଧାନସଭା ଘେରାଓ କରିବାକୁ ଯୋଜନା କରିଛି ଦଳ । ତା’ପୂର୍ବରୁ ତୃଣମୂଳ ସଂଗଠନକୁ କ୍ରିୟାଶୀଳ କରିବାକୁ ପିସିସି ସଭାପତି ଅଣ୍ଟା ଭିଡିଛନ୍ତି ।
ପ୍ରଥମ ଥର ଲାଗି ଓଡିଶା କଂଗ୍ରେସକୁ ଫୋକସ କରିଛି ଏଆଇସିସି । ଓଡିଶାର ବିଭିନ୍ନ ପ୍ରସଙ୍ଗକୁ ରାହୁଲ ଗାନ୍ଧି, ପ୍ରିୟଙ୍କା ଗାନ୍ଧି, ଏଆଇସିସି ସ୍ବର ଉଠାଉଛନ୍ତି । ସଂଗଠନକୁ ଫୋକସ କରି ଦଳ କିପରି ଆଗକୁ ବଢିବ ସେ କସରତ ଓଡିଶାରୁ ଦିଲ୍ଲୀ ଚାଲିଛି । ଦୁର୍ବଳ ସଂଗଠନକୁ କ୍ରିୟାଶୀଳ କରିବା ଦଳର ମଙ୍ଗୁଆଳଙ୍କ ଲାଗି ସୃଷ୍ଟି କରିଛି ଚାଲେଞ୍ଜ ।
କାମ ନକଲେ ଚାକିରି ନାହିଁ, ଅପାରଗ ଅଧିକାରୀଙ୍କୁ ବିଦା କରିବେ ସରକାର
ନନ୍ଦିଘୋଷ ବ୍ୟୁରୋ: ଅପାରଗ ଅଧିକାରୀଙ୍କୁ ବିଦା କରିବେ ସରକାର । କେଉଁ ବିଭାଗରେ କେତେ ଅପାରଗ ଅଧିକାରୀ ଅଛନ୍ତି ଓ ସେମାନଙ୍କ ମଧ୍ୟରୁ କେତେ ଜଣଙ୍କୁ ବାଧ୍ୟତାମୂଳକ ଅବସର ପ୍ରଦାନ କରାଯାଇଛି ତାହାର ତଥ୍ୟ ସଂଗ୍ରହ କରାଯାଉଛି । ଯେଉଁମାନେ ସରକାରୀ କାମ ଠିକ୍ ଢଙ୍ଗରେ କରୁନାହାନ୍ତି, ସେମାନଙ୍କୁ ସରକାର ବାହାର ରାସ୍ତା ଦେଖାଇବେ । ଏନେଇ ସମସ୍ତ ବିଭାଗକୁ ମୁଖ୍ୟ ଶାସନ ସଚିବଙ୍କ ଦପ୍ତରରୁ ନିର୍ଦ୍ଦେଶ ଯାଇଛି । ଅଗଷ୍ଟ ୭ ତାରିଖ ସୁଦ୍ଧା ସମସ୍ତ ତଥ୍ୟ ଦେବାକୁ ନିର୍ଦ୍ଦେଶ ରହିଛି । ଅଧିକାରୀଙ୍କ ଦକ୍ଷତା ଜାଣିବା ସହିତ ସରକାର ମଧ୍ୟ ନିଜ ଦକ୍ଷତା ପରଖନ୍ତୁ ବୋଲି କଂଗ୍ରେସ କହିଥିବା ବେଳେ ବିଜେପି କହିଛି, ସରକାରଙ୍କ ଧାରାରେ ଲୋକଙ୍କ ପାଇଁ କାମ କରିବାକୁ ପଡ଼ିବ। ବିଜେଡି କହିଛି, ସରକାର ରାଜ୍ୟବାସୀଙ୍କୁ ଆଗ ନିଜ ପ୍ରଦର୍ଶନ ଜଣାନ୍ତୁ ।
୧୨ଟି ପଏଣ୍ଟରେ ତଥ୍ୟ ମାଗିଛି ମୁଖ୍ୟ ସଚିବଙ୍କ କାର୍ଯ୍ୟାଳୟ । ବିଭାଗୀୟ କାର୍ଯ୍ୟାନୁଷ୍ଠାନର ସ୍ଥିତି କ’ଣ ? ଅଫିସକୁ କର୍ମଚାରୀ ଓ ଅଧିକାରୀ ଠିକ୍ ସମୟରେ ଆସୁଛନ୍ତି କି ନାହିଁ ? ଜନସେବା ଅଧିକାର ଆଇନ ଠିକ୍ ଢଙ୍ଗରେ କାର୍ଯ୍ୟକାରୀ ହେଉଛି କି ନାହିଁ ? ସବୁ ସ୍ତରର ସମସ୍ତ କର୍ମଚାରୀ ଓ ଅଧିକାରୀଙ୍କ ପ୍ରଦର୍ଶନର ସମୀକ୍ଷା କର । ଯିଏ କାମ କରୁନାହାନ୍ତି, ତାଙ୍କୁ ବାଧ୍ୟତାମୂଳକ ଅବସର ଦେବାକୁ ପଦକ୍ଷେପ ନିଅ । ଲୋକାଭିମୁଖୀ ସରକାର, ସରକାରୀ କାମରେ ଟେକ୍ନୋଲୋଜିର ବ୍ୟବହାର ବାବଦରେ ବିସ୍ତୃତ ତଥ୍ୟ ମାଗିଛନ୍ତି ମୁଖ୍ୟ ସଚିବ । ଅବସର ଦିନ ପେନସନ୍ ଦେବା ସୁନିଶ୍ଚିତ କରିବା, ତୃଣମୂଳ ସ୍ତରକୁ ଯାଇ ସରକାରୀ ଯୋଜନାର ରୂପାୟନ ତଦାରଖ କରିବା ବାବଦରେ ଅଗଷ୍ଟ ୭ ତାରିଖ ସୁଦ୍ଧା ତଥ୍ୟ ଦେବାକୁ ନିର୍ଦ୍ଦେଶ ଦିଆଯାଇଛି ।
କାମ ନ କଲେ ବାଧ୍ୟତାମୂଳକ ଅବସର ଦେବାକୁ ୨୦୧୯ରେ ସରକାର ନିର୍ଦ୍ଦେଶନାମା ଜାରି କରିଥିବା ବେଳେ ଏବେ ଏହାକୁ ପାଳନ କରିବା ଉପରେ ଗୁରୁତ୍ବ ଦିଆଯାଇଛି । ସରକାରଙ୍କ ଏପରି ନିଷ୍ପତ୍ତିକୁ ବିଜେପି ସ୍ବାଗତ କରିଛି । ବିରୋଧୀ ବିଜେଡି ଓ କଂଗ୍ରେସ କହିଛି, ଅଧିକାରୀଙ୍କ ଦକ୍ଷତା ମାପିବା ସହ ସରକାର ମଧ୍ୟ ନିଜ ଦକ୍ଷତା ଦେଖାନ୍ତୁ । ୧୪ ମାସ ଭିତରେ ସରକାର କ’ଣ କରିଛନ୍ତି ଲୋକଙ୍କୁ ଜଣାନ୍ତୁ । ସରକାରଙ୍କ ପ୍ରଦର୍ଶନକୁ ନେଇ ଲୋକେ ଅସନ୍ତୁଷ୍ଟ ଅଛନ୍ତି ବୋଲି ବିରୋଧୀ ବିଜେଡି ଓ କଂଗ୍ରେସ କହିଛନ୍ତି ।
ଦୁର୍ନୀତି ବିରୋଧରେ ଶୂନ୍ୟ ସହନଶୀଳତା ସରକାରଙ୍କ ସ୍ଲୋଗାନ ହୋଇଥିବା ବେଳେ ଏବେ ଅଧିକାରୀଙ୍କ ଦକ୍ଷତା ମାପିବେ ସରକାର । ଲୋକଙ୍କ ପାଇଁ କାମ ନ କଲେ ଚାକିରି ଚାଲି ଯିବାର ଭୟ ଦେଖାଇଛନ୍ତି ସରକାର ।
ସାଙ୍ଗଠିନକ ପ୍ରକ୍ରିୟାକୁ ତ୍ବରାନ୍ବିତ କରି ତୃଣମୂଳ ସ୍ତରରେ ସଶକ୍ତ ହେଉଛି ବିଜେଡି
ନନ୍ଦିଘୋଷ ବ୍ୟୁରୋ: ଲୋକଙ୍କ ସହ ଅଛି ବିଜେଡି । ସାଂଗଠନିକ ପ୍ରକ୍ରିୟାକୁ ତ୍ବରାନ୍ବିତ କରି ଦଳ ତୃଣମୂଳସ୍ତରରେ ହେବାରେ ଲାଗିଛି ସଶକ୍ତ । ରାଜ୍ୟସ୍ତରୀୟ କମିଟି ଗଠନ ପରେ ବାକିଥିବା ଜିଲ୍ଲା ସଭାପତି ଚୟନ ପର୍ଯ୍ୟାୟ କ୍ରମେ ଘୋଷଣା କରିଚାଲିଛି ଦଳ । ଦଳର ଛାମୁଆ ସଂଗଠନକୁ ଅଧିକ କ୍ରିୟାଶୀଳ କରି ପଞ୍ଚାୟତ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଛି ବିଜେଡି । ଶାସକ ଦଳ ଲୋକଙ୍କ ସମସ୍ୟା ଦୂର କରିବାରେ ବିଫଳ ହୋଇଥିବାରୁ ବିଜେଡି ଲୋକଙ୍କ ଆସ୍ଥା ଓ ବିଶ୍ବାସ ପୁଣି ଜିତିବ ବୋଲି ବିରୋଧୀ ଦଳ ମୁଖ୍ୟ ସଚେତନ ପ୍ରମିଳା ମଲ୍ଲିକ କହିଛନ୍ତି । ବିଜେଡି ସଭାପତି ନବୀନ ପଟ୍ଟନାୟକଙ୍କ ନେତୃତ୍ବରେ ଦଳ ପୁଣି ପଞ୍ଚାୟତରେ ଏକପାଖିଆ ପ୍ରଦର୍ଶନ କରିବାକୁ କସରତ ଆରମ୍ଭ କରିଛି । ଯାହାକୁ ନେଇ ବିଜେଡି ନେତା ଓ କର୍ମୀ ଉତ୍ସାହିତ ଅଛନ୍ତି ।
ନବୀନଙ୍କ ଫୋକସରେ ସଂଗଠନ । ଆଉ ୪ ଜିଲ୍ଲା ସଭାପତି ନାଁ ଘୋଷଣା କରିଛନ୍ତି । ପୁରୁଣା ଢାଞ୍ଚାରେ ଚାଲିଛି ନିର୍ବାଚନୀ ପ୍ରସ୍ତୁତି । ଅଧିକ କ୍ରିୟାଶୀଳ ହୋଇଛି ଛାମୁଆ ସଂଗଠନ । ଚବିଶ ନିର୍ବାଚନ ପରେ ବି ବିଜେଡି ଜାରି ରଖିଛି ସାଂଗଠନିକ କାମ । ରାଜ୍ୟ କାର୍ଯ୍ୟକାରିଣୀ, ରାଜ୍ୟ ପରିଷଦ, ରାଜନୈତିକ ବ୍ୟାପାର କମିଟି, ଛାମୁଆ ସଂଗଠନ ଓ ଜିଲ୍ଲା ସଂଗଠନକୁ ନୂଆ ରୂପ ଦେଇଛି । ଏବେ ପଞ୍ଚାୟତ ନିର୍ବାଚନୀ ପ୍ରସ୍ତୁତିକୁ ଜୋରଦାର କରିଛି ଦଳ । ପ୍ରତ୍ୟେକ ଦିନ ସାଂଗଠନିକ ସ୍ଥିତିର ସମୀକ୍ଷା କରି ନେତାଙ୍କୁ ସଂଗଠନର ଗୁରୁ ଦାୟିତ୍ବ ଦେଉଛି ଦଳ । ସୋମବାର ଗଞ୍ଜାମ, କଟକ, କଳାହାଣ୍ଡି ଓ କେନ୍ଦ୍ରାପଡାର ଜିଲ୍ଲା ସଭାପତି ନାଁ ଘୋଷଣା କରିଛି ଦଳ । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ଯୁକ୍ତି, ବିଜେପିକୁ ଭୋଟ ଦେଇ ଅନୁତାପ କରୁଛନ୍ତି ଲୋକେ । ବିଜେପି ଯାହା ପ୍ରତିଶ୍ରୁତି ଦେଇଥିଲା ତାହା ପୂରଣ କରିନାହିଁ । ଆଗକୁ ପଞ୍ଚାୟତ ନିର୍ବାଚନ ପାଇଁ ଦଳ ଏବେଠାରୁ ପ୍ରସ୍ତୁତି ଆରମ୍ଭ କରିଛି । ଗତଥର ପରି ଦଳ କିପରି ଅଧିକ ଆସନ ଦଖଲ କରିବ ସେ କାମରେ ଲାଗିପଡିଛନ୍ତି ଦଳୀୟ କର୍ମୀ ଓ ନେତା ।
ମୁଖ୍ୟ ବିରୋଧୀ ଦଳ ଭାବେ ବିଜେଡି ସରକାରଙ୍କ ବିଭିନ୍ନ ବିଫଳତାକୁ ନେଇ ରାଜରାସ୍ତାକୁ ଓହ୍ଲାଇବା ସହ ପ୍ରତିବାଦ ଓ ବିକ୍ଷୋଭ କରିଛି । ନିର୍ବାଚନର ବର୍ଷେ ପରେ ପୁଣି ଥରେ ବିଜେଡି ପୁରୁଣା ଢାଞ୍ଚାରେ ନିର୍ବାଚନୀ ପ୍ରସ୍ତୁତି ଆରମ୍ଭ କରିଛି ବୋଲି ରାଜନୈତିକ ସମୀକ୍ଷକ କେ. ରବି କହିଛନ୍ତି । ଶାସନରେ ଥିବା ବେଳେ ବିଜେଡି ନିର୍ବାଚନର ପରଦିନ ଆଗମୀ ନିର୍ବାଚନ ଲାଗି ପ୍ରସ୍ତୁତି ଆରମ୍ଭ କରେ । ବିରୋଧୀ ଦଳରେ ଥାଇ ମଧ୍ୟ ସେପରି ପ୍ରସ୍ତୁତି ଆରମ୍ଭ କରିଛି । ବିରୋଧୀ ଦଳରେ ଥାଇ ଦଳ ଏଥିରେ କେତେ ସଫଳ ହେଉଛି ତାହା ଆଗାମୀ ଦିନରେ ଜଣାପଡିବ ବୋଲି ବୋଲି କହିଛନ୍ତି ସମୀକ୍ଷକ ।
ନବୀନ ନବମ ଥର ବିଜେଡିର ସଭାପତି ହେବା ପରେ ଦଳୀୟ ସଂଗଠନର ନବକଳେବର କରି କର୍ମୀ ବିଭିନ୍ନ ନେତାଙ୍କ ସାଂଗଠନିକ ଦାୟିତ୍ବରେ ନିୟୋଜିତ କରିଛନ୍ତି । ଯାହା ଦଳୀୟ କର୍ମୀ ଓ ନେତାଙ୍କ ମନରେ ଉତ୍ସାହ ଭରିଛି । ଆଗକୁ ଦଳ ଓଡିଶାବାସୀଙ୍କ ହକ ପାଇଁ ଲଢେଇକୁ ଜୋରଦାର କରିବାକୁ ଅଣ୍ଟା ଭିଡିଛି ଦଳ ।
ରାଜ୍ୟରେ ପୋଷ୍ଟାଲ ବ୍ୟବସ୍ଥା ଠପ୍: ସ୍ଲୋ ହୋଇଯାଇଛି ସ୍ପିଡ ପୋଷ୍ଟ, ନା ଚିଠି ଯାଇଛି ନା ଆସୁଛି
ନନ୍ଦିଘୋଷ ବ୍ୟୁରୋ: ଜିପିଓରେ ଲାଗିଛି ଲମ୍ବା ଲାଇନ । ବରିଷ୍ଠଙ୍କ ଠାରୁ ଆରମ୍ଭ କରି ଯୁବ ବର୍ଗ, ମହିଳା ସମସ୍ତେ ଗରମରେ ହେଉଛନ୍ତି ଛଟପଟ । କାହାର ବ୍ୟାଙ୍କ କାଗଜପତ୍ର ଦେବାର ଅଛି ତ କାହାର ସ୍ପିଡପୋଷ୍ଟ ପଠାଇବାର ଶେଷ ତାରିଖ । ପୁଣି କିଏ କିଏ ଦୂରଦୂରାନ୍ତକୁ ରାକ୍ଷୀ ପଠାଇବା ପାଇଁ ଘଣ୍ଟା ଘଣ୍ଟା ଅପେକ୍ଷା କରିଛନ୍ତି । ଧାଡି ସିନା ଲମ୍ବୁଛି, କାମ କିନ୍ତୁ ହେଉନାହିଁ । ନୂଆ ସଫ୍ଟୱେର ଅପଡେଟ ଯୋଗୁଁ ପୋଷ୍ଟ ଅଫିସ ଗୁଡିକରେ କୌଣସି କାମ ହୋଇପାରୁ ନଥିବାରୁ ତିନି ଦିନରୁ ଅଧିକ ହେବ ଏଭଳି ଅବସ୍ଥା ଲାଗି ରହିଛି । ଯାହାକୁ ନେଇ ସାଧାରଣ ଲୋକେ ଅସନ୍ତୋଷ ପ୍ରକାଶ କରିଛନ୍ତି ।
ନୂଆ ସଫ୍ଟୱେର ଅପଡେଟ ଯୋଗୁଁ ପୋଷ୍ଟ ଅଫିସ ଗୁଡିକରେ ଏଭଳି ଅଚଳାବସ୍ଥା ସୃଷ୍ଟି ହୋଇଛି । ତିନି ଦିନରୁ ଅଧିକ ହେଲାଣି ସଫ୍ଟୱେର ଅପଡେଟ ନାଁରେ ବ୍ୟବସ୍ଥା କାମ କରୁ ନଥିବା ବେଳେ ହଜାର ହଜାର ଲୋକେ ଧାଡିରେ ଛିଡା ହୋଇଛନ୍ତି । ଛୋଟ ଛୋଟ ପୋଷ୍ଟ ଅଫିସ ସମେତ ଜିପିଓରେ ମଧ୍ୟ ସମାନ ଅବସ୍ଥା ଦେଖିବାକୁ ମିଳିଛି । କୌଣସି ସେକ୍ସନରେ ଲଗଇନ ହୋଇପାରୁ ନ ଥିବାରୁ ପୋଷ୍ଟାଲ ବ୍ୟବସ୍ଥାରେ କୌଣସି କାର୍ଯ୍ୟ ହୋଇପାରୁ ନାହିଁ । ଏପଟେ ଲୋକଙ୍କ ଅଧିକ ନୟାନ୍ତ କରିଛି ପ୍ରବଳ ଗୁଳୁଗୁଳି ଓ ଗରମ । ଏଭଳି ଅବ୍ୟବସ୍ଥାକୁ ନେଇ ବୟସ୍କ ବ୍ୟକ୍ତି ବିଶେଷ ଓ ମହିଳାମାନେ ନିଜର ଅସନ୍ତୋଷ ଝାଡିଛନ୍ତ ।
ପୋଷ୍ଟାଲ ବ୍ୟବସ୍ଥାରେ ନୂଆ ସଫ୍ଟୱେର ଲାଗୁ ହୋଇଥିବାରୁ କୌଣସି ସିଷ୍ଟମରେ ଲଗଇନ ହୋଇପାରୁ ନାହିଁ । ଶନିବାରଠାରୁ ଏଭଳି ସମସ୍ୟା ଲାଗି ରହିଛି । ଏନେଇ ଜିପିଓର ବିଭିନ୍ନ ସ୍ଥାନରେ ନୋଟିସ ମାରି କର୍ତ୍ତୃପକ୍ଷ ନିଜ ଦାୟିତ୍ୱ ସାରି ଦେଇଥିବା ଅଭିଯୋଗ ହୋଇଛି । ପ୍ରାୟ ସମସ୍ତ ପୋଷ୍ଟ ଅଫିସରେ ଏଭଳି ସ୍ଥିତି ଉପୁଜିଥିବା କୁହାଯାଇଛି । ଏଭଳି ସ୍ଥିତି ପାଇଁ ଜିପିଓ ଅଧିକାରୀ ଅସହାୟତା ପ୍ରକାଶ କରିଛନ୍ତି ।
ସଫ୍ଟୱେର ଅପଡେଟ ସମ୍ପର୍କରେ ଲୋକଙ୍କୁ ବ୍ୟାପକ ଭାବେ ଅବଗତ କରାଯାଇ ନଥିବା ବେଳେ ପୋଷ୍ଟାଲ ସେବା ପାଇଁ କୌଣସି ବିକଳ୍ପ ବ୍ୟବସ୍ଥା ମଧ୍ୟ ଗ୍ରହଣ କରାଯାଇ ନଥିଲା । ଯେଉଁଥିପାଇଁ ଲୋକେ ନାହିଁ ନ ଥିବା ହଇରାଣ ହୋଇଛନ୍ତି ।
ସ୍ବାସ୍ଥ୍ୟ ସୁରକ୍ଷା ପାଇଁ ନବୀନ ନେଇଥିଲେ ପଦକ୍ଷେପ, ସୁଫଳ ନେଉଛନ୍ତି ରାଜ୍ୟବାସୀ
ନନ୍ଦିଘୋଷ ବ୍ୟୁରୋ: ସ୍ବାସ୍ଥ୍ୟ ସୁରକ୍ଷା ପାଇଁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନେଇଥିଲେ ପଦକ୍ଷେପ । ଯାହାର ସୁଫଳ ନେଉଛନ୍ତି ରାଜ୍ୟବାସୀ । ୨୦୨୨ ମସିହାରୁ ବର୍ଷକୁ ଦୁଇ ଥର ଲଗାତାର ଭାବେ ଚାଲିଥିବା ମାସ୍ ଡ୍ରଗ୍ ଆଡମିନିଷ୍ଟ୍ରେସନ ବା ଏମଡିଏ ଯୋଗୁଁ ଓଡ଼ିଶାର ୧୧ ଜିଲ୍ଲା ହୋଇଛି ଫାଇଲେରିଆ ମୁକ୍ତ । ଏହାକୁ କେନ୍ଦ୍ର ସରକାର ବି ଦେଇଛନ୍ତି ସ୍ବୀକୃତି । ଫାଇଲେରିଆ ସ୍ଥିତି କମୁଥିଲେ ବି ୧୨ ଜିଲ୍ଲାକୁ ନେଇ ଚିନ୍ତା ରହିଛି । ଯେଉଁଥି ପାଇଁ ଏହି ଜିଲ୍ଲା ଗୁଡ଼ିକରେ ଅଗଷ୍ଟ ୧୦ରୁ ୧୯ ଯାଏଁ କରାଯିବ ଏମଡିଏ କାର୍ଯ୍ୟକ୍ରମ ।
୨୦୦୪ରୁ ବର୍ଷକୁ ଥରେ ହେଉଥିଲା ଡ୍ରଗ୍ ଆଡମିନିଷ୍ଟ୍ରେସନ ବା ଏମଡିଏ କାର୍ଯ୍ୟକ୍ରମ । ୨୦୨୭ ସୁଦ୍ଧା ରାଜ୍ୟକୁ ଫାଇଲେରିଆ ମକ୍ତ କରିବାକୁ ରହିଥିଲା ଲକ୍ଷ୍ୟ । ଏହାକୁ ନେଇ ୨୦୨୨ରୁ ବର୍ଷକୁ ଦୁଇଥର ଏମଡିଏ କାର୍ଯ୍ୟକ୍ରମ କରିଥିଲେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନବୀନଙ୍କ ଏହି ସ୍ବାସ୍ଥ୍ୟ ସୁରକ୍ଷା ନୀତି ଯୋଗୁଁ କୋରାପୁଟ, ଗଜପତି, ମାଲକାନଗିରି, ରାୟଗଡ଼ା, ନବରଙ୍ଗପୁର, ବୌଦ୍ଧ, କେନ୍ଦ୍ରାପଡ଼ା, ଗଜପତି, ପୁରୀ, ଜଗତସିଂହପୁର ଓ ଦେବଗଡ଼ ପରି ୧୧ଟି ଜିଲ୍ଲା ହେଲେଣି ଫାଇଲେରିଆ ମୁକ୍ତ । ତେବେ ୧୨ ଜିଲ୍ଲାରେ ଏବେ ବି ଚିନ୍ତାଜନକ ସ୍ଥିତିରେ ରହିଛି ଫାଇଲେରିଆ । ଅନୁଗୁଳ, ବାଲେଶ୍ୱର, ବରଗଡ, ଢେଙ୍କାନାଳ, ଯାଜପୁର, ଝାରସୁଗୁଡା, କେନ୍ଦୁଝର, ମୟୂରଭଞ୍ଜ, ଗଞ୍ଜାମ, ସମ୍ବଲପୁର, ସୁବର୍ଣ୍ଣପୁର ଓ ସୁନ୍ଦରଗଡ଼ ଜିଲ୍ଲାର ୧୧୫ କାର୍ଯ୍ୟାନ୍ବୟନ ୟୁନିଟରେ ଅଗଷ୍ଟ ୧୦ରୁ ୧୯ ତାରିଖ ଯାଏଁ ଏମଡିଏ କାର୍ଯ୍ୟକ୍ରମ କରାଯିବ । ଏହା ଭିତରୁ ବରଗଡ଼, ଗଞ୍ଜାମ, ସମ୍ବଲପୁର, ମୟୂରଭଞ୍ଜ, ସୁବର୍ଣ୍ଣପୁର ଓ ସୁନ୍ଦରଗଡ଼ ପାଇଁ ଅଧିକ ପରିଶ୍ରମର ଆବଶ୍ୟକତା ରହିଛି ବୋଲି କହିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦୋଶକ ଡାକ୍ତର ନୀଳକଣ୍ଠ ମିଶ୍ର ।
ବିଶ୍ବରେ ଥିବା ଫାଇଲେରିଆ ରୋଗୀଙ୍କ ମଧ୍ୟରୁ ୪୦ ପ୍ରତିଶତ ହେଉଛନ୍ତି ଭାରତର । ଦେଶରେ ଓଡ଼ିଶା ସମେତ ପଶ୍ଚିମବଙ୍ଗ, ଛତିଶଗଡ଼, ବିହାର ଓ ଝାଡ଼ଖଣ୍ଡରେ ଫାଇଲେରିଆ ରୋଗୀ ଅଛନ୍ତି । ଏହି ୫ ରାଜ୍ୟ ମଧ୍ୟରୁ ଓଡ଼ିଶାରେ ଫାଇଲେରିଆ ରୋଗୀ ସଂଖ୍ୟା ଅଧିକ । ୨୦୨୨ରୁ ଯେଉଁଭଳି ଭାବେ ଏମଡିଏ କାର୍ଯ୍ୟକ୍ରମ ଚାଲିଛି, ତାହା ଓଡ଼ିଶାରୁ ଦୃତ ଗତିରେ ଫାଇଲେରିଆ ନିରାକରଣ କରୁଥିବା ନେଇ କେନ୍ଦ୍ର ସରକାରଙ୍କ ସ୍ବାସ୍ଥ୍ୟ ବିଭାଗ ବି ସ୍ବୀକାର କରିଛି ।
ମଶା ଦ୍ବାରା ଜଣଙ୍କ ଠାରୁ ଅନ୍ୟ ଜଣଙ୍କୁ ଫାଇଲେରିଆ ବ୍ୟାପିଥାଏ । ଆରମ୍ଭରୁ ଏହାର ଲକ୍ଷଣ ଜଣାପଡ଼ି ନଥାଏ । ଆଉ ୧୦ରୁ ୧୫ ବର୍ଷ ପରେ ଏହାର ଲକ୍ଷଣ ଦେଖା ଦେଇଥାଏ । ବିନା କୌଣସି ଲକ୍ଷଣରେ ବି ଫାଇଲେରିଆରେ କେହି ସଂକ୍ରମିତ ହୋଇପାରନ୍ତି । ତେବେ ଏମଡିଏ ଯୋଗୁଁ ୨୦୨୪ ଫେବୃଆରୀରେ ୭ ଜିଲ୍ଲାରେ ୮୯ ପ୍ରତିଶତ ଓ ଅଗଷ୍ଟରେ ୧୧ ଜିଲ୍ଲାରେ ୮୭ ପ୍ରତିଶତ ସଫଳତା ମିଳିଥିଲା ।
ରୋହିତ-କୋହଲିଙ୍କ ଦିନିକିଆ କ୍ୟାରିୟର ସମାପ୍ତ ? ୨୦୨୭ ବିଶ୍ବକପ୍ ଖେଳିବା ମୁସ୍କିଲ୍
ବିରାଟ କୋହଲି (୩୬) ଓ ରୋହିତ ଶର୍ମା (୩୮) ଉଭୟେ ଟି-୨୦ ଓ ଟେଷ୍ଟ କ୍ରିକେଟରୁ ସନ୍ନ୍ୟାସ ନେଇସାରିଛନ୍ତି । ଏବେ ସେମାନେ କେବଳ ଦିନିକିଆ ଓ ଆଇପିଏଲ ଖେଳିବେ । ଏହି ଦୁଇ ବରିଷ୍ଠ ଖେଳାଳି ସମ୍ଭବତଃ ଅଷ୍ଟ୍ରେଲିଆ ବିପକ୍ଷ ୩ ମ୍ୟାଚ ବିଶିଷ୍ଟ ଦିନିକିଆ ସିରଜ ଓ ତା’ ପରେ ଦକ୍ଷିଣ ଆଫ୍ରିକା ବିପକ୍ଷ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜ ଖେଳିବେ । ଏହାପରେ ଦୁହେଁ ଆସନ୍ତା ବର୍ଷ ଜାନୁଆରୀ-ଜୁଲାଇ ମଧ୍ୟରେ ନ୍ୟୁଜିଲାଣ୍ଡ ଓ ଇଂଲଣ୍ଡ ବିପକ୍ଷରେ ୬ଟି ଦିନିକିଆ ଖେଳିବାର ସୁଯୋଗ ପାଇବେ ।
ତେବେ ଏହି ସିରିଜ ସେମାନଙ୍କୁ ୨୦୨୭ ଦିନିକିଆ ବିଶ୍ବକପ୍ ପାଇଁ ପ୍ରସ୍ତୁତ କରିବ କି? ଏହି ଦୁଇ ଖେଳାଳି କ’ଣ କେବଳ ଗୋଟିଏ ଫର୍ମାଟ ଓ ଆଇପିଏଲ ଭରସାରେ ୨ ବର୍ଷ ପର୍ଯ୍ୟନ୍ତ ଖେଳ ଜାରି ରଖିବେ? ବିସିସିଆଇ ସୂତ୍ର ମୁତାବକ, ଏନେଇ ଖୁବଶୀଘ୍ର ଆଲୋଚନା ହେବ । ଆଗାମୀ ବିଶ୍ବକପ ବେଳକୁ ରୋ-କୋ ପାଖାପାଖି ୪୦ ବର୍ଷରେ ଉପନୀତ ହୋଇଯିବେ । ତେଣୁ ଏଥିପାଇଁ ସ୍ପଷ୍ଟ ରଣନୀତି ହେବ ଓ ଯୁବ ଖେଳାଳିଙ୍କୁ ସୁଯୋଗ ଦିଆଯିବ । ତେବେ ଏହି ଦୁଇ ଖେଳାଳି ନିଜେ ଦିନିକିଆରୁ ସନ୍ନ୍ୟାସ ନେବେ ନା ବୋର୍ଡ ସେମାନଙ୍କୁ ଧୀରେଧୀରେ ବାହାର କରିବ? ଭାରତୀୟ କ୍ରିକେଟ ପାଇଁ ଏହି ଦୁହିଁଙ୍କର ଅବଦାନ ବହୁତ ରହିଛି । ତେଣୁ ସନ୍ନ୍ୟାସ ପାଇଁ ସେମାନଙ୍କ ଉପରେ ଚାପ ଦିଆଯିବ ନାହିଁ । ସେମାନେ ନିଜର ଭବିଷ୍ୟତକୁ ନେଇ ଶାରୀରିକ –ମାନସିକ ଭାବେ କେତେ ପ୍ରସ୍ତୁତ, ଏ ବାବଦରେ ସେମାନଙ୍କ ସହ ଆଲୋଚନା କରାଯିବ ।
୧୯୭୧ ଯୁଦ୍ଧରେ ପାକିସ୍ତାନକୁ ଅସ୍ତ୍ର ଦେଉଥିଲା ଆମେରିକା: ଟ୍ରମ୍ପଙ୍କୁ ଆଇନା ଦେଖାଇଲା ଭାରତୀୟ ସେନା
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ ଧମକ ମଧ୍ୟରେ ଭାରତୀୟ ସେନା ୧୯୭୧ର ଏକ ପୁରୁଣା ପେପର କଟିଂ ଶେୟାର କରିଛି । ଉକ୍ତ ନ୍ୟୁଜ କଟିଂରେ କୁହାଯାଇଛି, ଦଶନ୍ଧି ଧରି ଆମେରିକା ପାକିସ୍ତାନକୁ ସମର୍ଥନ କରୁଥିଲା । ୧୯୫୪ ଠାରୁ ପାକିସ୍ତାନକୁ ହତିଆର ଯୋଗାଇବା ନେଇ ଆମେରିକାର ଭୂମିକା ବିଷୟରେ ସେଥିରେ କୁହାଯାଇଛି । ଟ୍ରମ୍ପଙ୍କ ଧମକର ଗୋଟିଏ ଦିନ ପରେ ସେନାର ପୂର୍ବ କମାଣ୍ଡ ସୋସିଆଲ ମିଡ଼ିଆରେ ଏକ ପୋଷ୍ଟ ଶେୟାର କରିଛନ୍ତି ।
୧୯୭୧ର ଭାରତ-ପାକ୍ ଯୁଦ୍ଧର କିଛି ମାସ ପୂର୍ବରୁ ଏହି ଖବର ପ୍ରକାଶ ପାଇଥିଲା । ଯୁଦ୍ଧର ପରିଣାମସ୍ବରୂପ ବାଂଲାଦେଶ ନିର୍ମାଣ ହୋଇଥିଲା । ଉକ୍ତ ଖବର ଠାରୁ ପାଖାପାଖି ଦୁଇ ଦଶନ୍ଧି ପର୍ଯ୍ୟନ୍ତ ଆମେରିକା ପାକିସ୍ତାନକୁ ଅସ୍ତ୍ର ଯୋଗାଣରେ ବଡ଼ ଭୂମିକା ନିଭାଇଥିଲା । ୧୯୫୪ ଠାରୁ ପାକିସ୍ତାନକୁ ୨ ଅରବ ଡଲାରର ଅସ୍ତ୍ର ପଠାଇଯାଇଥିବା କୁହାଯାଇଥିଲା । ଟ୍ରମ୍ପଙ୍କ ପକ୍ଷରୁ ଟାରିଫ ବୃଦ୍ଧି ଧମକର କିଛି ଘଣ୍ଟା ପରେ ଭାରତର ବିଦେଶ ମନ୍ତ୍ରଣାଳୟ ମସ୍କୋ ସହ ଉର୍ଜା ସମ୍ବନ୍ଧିତ ଆଲୋଚନାକୁ ଖାରଜ କରି ଏକ ବୟାନ ଜାରି କରିଥିଲା ।