ନନ୍ଦିଘୋଷ ବ୍ୟୁରୋ: ଭୁବନେଶ୍ବର ମେଟ୍ରୋ ରେଲ ପ୍ରକଳ୍ପ ଟେଣ୍ଡର ବାତିଲ ହେବାକୁ ନେଇ ଉଦବେଗ ପ୍ରକାଶ କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ସୋସିଆଲ ମିଡିଆ ଏକ୍ସରେ ପ୍ରତିକ୍ରିୟା ପ୍ରକାଶ କରି ସେ କହିଛନ୍ତି ଯେ, ଭୁବନେଶ୍ବରକୁ ଏକ ବିଶ୍ବସ୍ତରୀୟ ସହରରେ ପରିଣତ କରିବା ଥିଲା ବିଜେଡି ସରକାରର ସ୍ବପ୍ନ । ଭୁବନେଶ୍ବରରେ ବିଶ୍ବସ୍ତରୀୟ କ୍ରୀଡା ଭିତ୍ତିଭୂମୀ ସାଙ୍ଗକୁ ଆନ୍ତର୍ଜାତିକ ସ୍ତରର କାର୍ଯ୍ୟକ୍ରମର ଆୟୋଜନ କରାଯାଉଛି । ଏଥିସହିତ ଆଧୁନିକ ପରବହନ ସେବା ସାଙ୍ଗକୁ ଆଇଟି ଭିତ୍ତିଭୂମୀ ସୃଷ୍ଟି କରାଯାଇ ମନ୍ଦିରମାଳିନୀ ସହରକୁ ବିଶ୍ବସ୍ତରୀୟ ସହରରେ ପରିଣତ କରିବାକୁ ଉଦ୍ୟମ କରୁଥିଲା ବିଜେଡି ସରକାର । ଭୁବନେଶ୍ବର ମେଟ୍ରୋ ରେଳ ପ୍ରକଳ୍ପକୁ ସହରର ସମ୍ପ୍ରସାରଣ ଓ ମୋ ବସ ରୁଟ ସହ ତାଳ ଦେଇ ସମ୍ପ୍ରସାରିତ କରିବାର ଥିଲା । ସହର ମଧ୍ୟରେ ଭିଡ ବୃଦ୍ଧି କରିବା ପରିବର୍ତ୍ତେ ସହରର ସମ୍ପ୍ରସାରଣ ଜୁରୁରୀ । ମେଟ୍ରୋ ସହର ଭଳି ଆବଶ୍ୟକତାକୁ ଉପଲବ୍ଧୀ କରି ବିଜେଡି ସରକାର ୨୦୨୭ ସୁଦ୍ଧା ପ୍ରଥମ ପର୍ଯ୍ୟାୟ କାମ ସାରିବାକୁ ଟାର୍ଗେଟ କରିଥିଲା । କିନ୍ତୁ ଏବେ ଏହି ପ୍ରକଳ୍ପ ପାଇଁ ହୋଇଥିବା ଟେଣ୍ଡରକୁ ବାତିଲ କରିଦିଆଯାଇଛି । ଡବଲ ଇଂଜିନ ସରକାର ଓଡିଶାବାସୀଙ୍କୁ ଧୋକା ଦେଇଛି ବୋଲି ନବୀନ କହିଛନ୍ତି । ବିଜେପି ସରକାରଙ୍କ ଏହି ନିଷ୍ପତ୍ତି ସହରକୁ ଆହୁରି ୧୦ ବର୍ଷ ପଛକୁ ଠେଲିଦେବ ବୋଲି ନବୀନ କହିଛନ୍ତି ।
ରକ୍ଷାଣାବେକ୍ଷଣ ଅଭାବରୁ ଭାଙ୍ଗିରୁଜି ଗଲାଣି ଖେଳ ଉପକରଣ, ପରିତ୍ଯକ୍ତ ପୁରୀ ପୌରପାଳିକାରେ ଥିବା ଶିଶୁ ଉଦ୍ୟାନ
ନନ୍ଦିଘୋଷ ବ୍ୟୁରୋ: ପୁରୀ ପୌରପାଳିକାରେ ଥିବା ଶିଶୁ ଉଦ୍ୟାନ ଗୁଡ଼ିକର ଅବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ । ପରିଚାଳନାଗତ ତ୍ରୁଟି ଏବଂ ରକ୍ଷଣାବେକ୍ଷଣ ଅଭାବରୁ ପାର୍କରେ ଥିବା ଖେଳ ଉପକରଣ ସବୁ ଭାଙ୍ଗିରୁଜି ଅନାବନା ଗଛ ଉଠିଲାଣି । ଶିଶୁମାନଙ୍କ ବୌଦ୍ଧିକ, ଶାରୀରିକ ଏବଂ ମାନସିକ ବିକାଶ ନିର୍ମିତ ଏହି ପାର୍କ ଏବେ ପରିତ୍ଯକ୍ତ । ଏଗୁଡ଼ିକୁ ପୁନଃ କାର୍ଯ୍ଯକ୍ଷମ କରିବା ସହ ଦାୟିତ୍ବରେ ଥିବା ଅଧିକାରୀଙ୍କ ବିରୋଧରେ କାର୍ଯ୍ଯାନୁଷ୍ଠାନ ପାଇଁ ଉଠିଛି ଦାବି ।
ଖେଳଣା ଅଛି । ହେଲେ ଯିବାକୁ ରାସ୍ତା ନାହିଁ । ଜଙ୍ଗଲ ଭିତରେ ଲୁଚିଲାଣି ପିଲାଙ୍କ ପ୍ରମୋଦ ସାମଗ୍ରୀ । କଣ୍ଟା ସାଙ୍ଗକୁ ପଡ଼ିଛି ବୋତଲ, ପ୍ଲାଷ୍ଟିକ ଗ୍ଲାସ । ପାର୍କ ନୁହେଁ ତ, ଲାଗୁଛି ଯେପରି ସରୀସୃପଙ୍କ ବାସସ୍ଥଳୀ । ପାଦଚଲା ପେଭର ବ୍ଲକ ଉପରେ ଉଠିଲାଣି ଗଛ । ପୁରୀ ସହରରେ ଥିବା ଅଧିକାଂଶ ଶିଶୁ ଉଦ୍ୟାନର ଅବସ୍ଥା ଏବେ ଏପରି । ଶିଶୁମାନଙ୍କର ଶାରୀରିକ, ମାନସିକ ଏବଂ ବୌଦ୍ଧିକ ବିକାଶ ଉଦ୍ଦେଶ୍ୟ ନିର୍ମାଣ ହୋଇଥିବା ଏହି ପାର୍କ ଏବେ ପିଲାଙ୍କ କାମରେ ଆସୁନି । ପାର୍କ ନିର୍ମାଣ ଆଳରେ ନିମ୍ନମାନର କାର୍ଯ୍ୟକରି କୋଟି କୋଟି ଟଙ୍କା ହରିଲୁଟ୍ କରିଥିବା ଅଭିଯୋଗ ହୋଇଛି । ଯାହାକୁ ନେଇ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇବା ସହ ଏହାର ଦାୟିତ୍ବରେ ଥିବା ଅଧିକାରୀଙ୍କ ବିରୋଧର କାର୍ଯ୍ଯାନୁଷ୍ଠାନ ପାଇଁ ଦାବି କରିଛନ୍ତି।
୨୦୨୧ ରେ ମୁକ୍ତା ଯୋଜନାରେ ପୁରୀ ପୌରାଞ୍ଚଳରେ ୨୫ ଟି ଶିଶୁ ଉଦ୍ୟାନ ସହ ଅନ୍ୟାନ୍ୟ ପ୍ରକଳ୍ପ ପାଇଁ ୭.୧୭ କୋଟି ଟଙ୍କା ମଞ୍ଜୁର ହୋଇଥିଲା । ତେବେ ପୌରପାଳିକାର ପରିଚାଳନାଗତ ତ୍ରୁଟି ଏବଂ ରକ୍ଷଣାବେକ୍ଷଣ ଅଭାବରୁ ପାର୍କ ଗୁଡ଼ିକ ଏବେ ପରିତ୍ୟକ୍ତ । ସେପଟେ ପୁରୀ ପୌରପାଳିକାର କାର୍ଯ୍ୟନିର୍ବାହୀ ଅଧିକାରୀ କହିଛନ୍ତି ସହରରେ ଥିବା ୩୧ ଟି ପାର୍କ ମଧ୍ୟରୁ ୧୮ ଟି ଏବେ କାର୍ଯ୍ୟକ୍ଷମ ଅଛି । ଅନ୍ୟ ପାର୍କ ଗୁଡ଼ିକ ସ୍ଥାନୀୟ ଅଞ୍ଚଳରେ କମିଟି ଗଠନ କରାଯାଇ ପରିଚାଳନା ପାଇଁ ଦାୟିତ୍ବ ଦିଆଯିବ । ପାର୍କଗୁଡ଼ିକ କାର୍ଯ୍ଯାକ୍ଷମ ହେଲେ ସ୍ଥାନୀୟ ବାସିନ୍ଦାଙ୍କ ସହ ପର୍ଯ୍ଯଟକ ମଧ୍ଯ ଉପକୃତ ହୋଇ ପାରନ୍ତେ ବୋଲି କହିଛନ୍ତି ଲୋକେ ।
ଆଇନ୍ ଶୃଙ୍ଖଳା ପରିସ୍ଥିତିକୁ ନେଇ ନୀତିଶଙ୍କୁ ଟାର୍ଗେଟ କଲେ ଚିରାଗ ପାଶଓ୍ବାନ
ନନ୍ଦିଘୋଷ ବ୍ୟୁରୋ: ଆଗକୁ ବିହାର ନିର୍ବାଚନ ହେବାକୁ ଥିବାବେଳେ ରାଜନୈତିକ ମାହୋଲ ବେଶ ସରଗରମ ହେବାରେ ଲାଗିଛି । ପ୍ରତିଦିନ ନୂଆ ନୂଆ ଖବରମାନ ନଜର ଆସୁଥିବାବେଳେ ଏବେ କେନ୍ଦ୍ରମନ୍ତ୍ରୀ ଚିରାଗ ପାଶଓ୍ବାନ ନୀତିଶ କୁମାରଙ୍କ ସରକାରକୁ ଟାର୍ଗେଟ କରିଛନ୍ତି । ଆଇନ ଶୃଙ୍ଖଳା ପରିସ୍ଥିତିକୁ ନେଇ ସେ ଟାର୍ଗେଟ କରିଥିବା ଦେଖିବାକୁ ମିଳିଛି । ସେ କହିଛନ୍ତି କି, ବିହାରରେ ଗୋଟିଏ ପରେ ଗୋଟିଏ ଅପରାଧିକ ଘଟଣାମାନ ଘଟୁଛି । କିନ୍ତୁ ପ୍ରଶାସନ ଅପରାଧୀଙ୍କ ସାମ୍ନାରେ ମୁଣ୍ଡ ନୁଆଁଇବା ଭଳି ହେଉଛି । କାହିଁକି ବିହାରରେ ବାରମ୍ବାର ଏଭଳି ଘଟଣା ଘଟୁଛି ବୋଲି ସେ ପ୍ରଶ୍ନ ଉଠାଇଛନ୍ତି ।
ବିହାରରେ ଗୋଟିଏ ପରେ ଗୋଟିଏ ଅପରାଧିକ ଘଟଣାମାନ ଘଟିବାରେ ଲାଗିଛି । ତଥାପି ପ୍ରଶାସନ ଏହାକୁ ରୋକିବାରେ ବିଫଳ ହେଉଛି । ଯେଉଁମାନେ ତାଙ୍କ ପରିବାର ଲୋକଙ୍କୁ ହରାଇଛନ୍ତି କେତେ କଷ୍ଟରେ ରହିଥିବେ ତାହା ସମସ୍ତଙ୍କୁ ଜଣା । ପ୍ରଶାସନ ନିଜର ଦୋଷ ମାନୁନଥିବାବେଳେ ଆଇନ ଶୃଙ୍ଖଳା ପରିସ୍ଥିତିକୁ ସୁଧାରି ପାରୁନି । ଏହାସହ ଚିରାଗ କହିଛନ୍ତି କି, ମୁଁ ଦୁଃଖିତ କି, ଏଭଳି ଏକ ସରକାରକୁ ସମର୍ଥନ କରୁଥିଲି । ବିହାରୀମାନେ ସୁରକ୍ଷିତ ନୁହଁନ୍ତି, ସରକାର ସମୟ ଥାଉ ଥାଉ ସଜାଗ ହୁଅନ୍ତୁ । ନିକଟରେ ବିହାରରେ ଦୁଇଟି ବଡ଼ ଘଟଣା ଘଟିଛି । ଜଣେ ବ୍ୟବସାୟୀଙ୍କୁ ଗୁଳିକରି ହତ୍ୟା କରାଯାଇଥିବାବେଳେ ଅନ୍ୟଜଣେ ଗ୍ୟାଙ୍ଗଷ୍ଟାରଙ୍କୁ ମେଡିକାଲରେ ମଧ୍ୟ ଗୁଳି କରାଯାଇଛି । ଯାହାକୁ ନେଇ ପ୍ରଶାସନର ପାରିବାପଣିଆ ଉପରେ ପ୍ରଶ୍ନବାଚୀ ଉଠିଛି ।
ଗରାରେ ପଶିଗଲା ଛୋଟ ପିଲାର ମୁଣ୍ଡ, ବାହାର କରିବାକୁ…
ନନ୍ଦିଘୋଷ ବ୍ୟୁରୋ: ଗରାରେ ପଶିଗଲା ଛୋଟ ପିଲାର ମୁଣ୍ଡ । ମାଲକାନଗିରି ଜିଲ୍ଲା କୋରୁକୋଣ୍ଡା ଗାଁର ପ୍ରଦୀପ ବିଶ୍ୱାସଙ୍କ ପୁଅ ତନ୍ମୟ ବିଶ୍ୱାସ ଏକ ଗରା ସହ ଖେଳୁଥିଲେ । ଖେଳୁ ଖେଳୁ ପିଲାଟି ହଠାତ ମୁଣ୍ଡକୁ ଗରା ମଧ୍ୟରେ ପୁରାଇ ଦେଇଥିଲା । ପରିବାର ଲୋକେ ପୁଅର ମୁଣ୍ଡରୁ ଗରାକୁ ବାହାର କରିବା ପାଇଁ ଚେଷ୍ଟ କରିଥିଲେ ମଧ୍ୟ ବାହାରି ନଥିଲା । ଏନେଇ ତୁରନ୍ତ ଦମକଳ ବାହିନୀକୁ ପରିବାର ଲୋକ ଯୋଗାଯୋଗ କରିଥିଲେ । ଦମକଳ ବାହିନୀ ଏକ କଟର ସାହାର୍ଯ୍ୟରେ ଗରାକୁ କାଟି ପିଲାର ମୁଣ୍ଡକୁ ବାହାର କରିଥିଲେ । ପିଲାଟିର ଅବସ୍ଥା ଭଲ ଥିବା ଜଣାପଡିଛି ।
ମେଟ୍ରୋ ଟେଣ୍ଡର ବାତିଲ:ବର୍ଷିଲା ବିଜେଡି
ନନ୍ଦିଘୋଷ ବ୍ୟୁରୋ: ମେଟ୍ରୋ ରେଳ ଟେଣ୍ଡର ବାତିଲ ପରେ ରାଜ୍ୟର ବିଜେପି ସରକାରକୁ କଡ଼ା ସମାଲୋଚନା କରିଛି ବିଜେଡି। ବିଧାୟକ ସାରଦା ଜେନା କଡ଼ା ଭାଷାରେ ଭର୍ତ୍ସନା କରି କହିଛନ୍ତି, ଏହି ସରକାର ଗୋଟିଏ ମିଛୁଆ ସରକାର। ମେଟ୍ରୋ ନେଇ ଲୋକଙ୍କୁ ଭୁଆଁ ବୁଲାଉଛି। ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ଥିବା ବେଳେ ସର୍ଭେ କରି ପ୍ରକଳ୍ପ କାମ ଆରମ୍ଭ କରାଯାଇଥିଲା। ଭୁବନେଶ୍ଵରରେ କାମ ଆରମ୍ଭ ହୋଇଥିଲା। ନିଜସ୍ଵ ଅର୍ଥରେ ଓଡ଼ିଶାରେ ମେଟ୍ରୋ ହୋଇଥାନ୍ତା। ହେଲେ ସରକାର ବଦଳିଗଲା। ବିଜେପି ମେଟ୍ରୋ ନେଇ ମିଛ କହିଲା ଓଡିଶାବାସୀଙ୍କୁ।
ବାଇକ୍ ଚୋରର ଅଜବ ଜିଦ୍, ଥାନା ହାଜତରେ କହିଲା ଆଳୁଭଜା ନଦେଲେ ଖାଇବିନି ଭାତ..
ନନ୍ଦିଘୋଷ ବ୍ୟୁରୋ: ଥାନାର ହାଜତରେ ରହିଛି ଚୋର । ହେଲେ ଖାଇବା ପାଇଁ ଦେଖାଉଛି ନଖରା । ରଖୁଛି ନିଜର ଡିମାଣ୍ଡ । କହୁଛି ଆଳୁଭଜା ନହେଲେ ମୁଁ ଭାତ ଖାଇବି ନାହିଁ । ଯେତେପ୍ରକାର ଖାଦ୍ୟ ଦେଲେ ମଧ୍ୟ ମନା କରି ଦେଉଛି । ଆଉ ସେହି ଗୋଟିଏ ଜିଦ୍ ରହିଛି ଆଳୁଭଜା ଦିଅ ନହେଲେ ଖାଇବି ନାହିଁ । ଯେଉଁ କାରଣରୁ ପୋଲିସ କର୍ମଚାରୀମାନେ ବଡ଼ ଅସୁବିଧାରେ ପଡ଼ିଲେ। ଥାନାରେ ମୋଟର ସାଇକେଲ ଚୋରକୁ ଖାଇବାକୁ ଦେବାରେ ହନ୍ତ ସନ୍ତ ପଡିଯାଇଛି। ହଜାର ଚେଷ୍ଟା ସତ୍ତ୍ୱେ, ଚୋର କିଛି ଖାଦ୍ୟ ମୁହଁରେ ଦେଇ ନଥିଲେ। ଶେଷରେ, ହୋଟେଲରୁ ଭଜା ଆଳୁ ଆଣି ଲକ୍ ଅପ୍ ରେ ଥିବା ଚୋରକୁ ଖାଇବା ଦେଲା ପରେ ଶାନ୍ତିରେ ରହିଛି ପୋଲିସ। ତେବେ ଏଭଳି ଏକ ଘଟଣା ପଶ୍ଚିମବଙ୍ଗର ଶାନ୍ତିପୁର ଥାନାରୁ ଆସିଛି ।
ସୂଚନା ମିଳିଛି ଯେ ପଶ୍ଚିମବଙ୍ଗର ନଦିଆ ଜିଲ୍ଲା ସ୍ଥିତ ତାହେରପୁର ଥାନା ସମେତ ଅନେକ ଅଞ୍ଚଳରେ ବାଇକ୍ ଚୋରି ବୃଦ୍ଧି ପାଉଥିଲା। ତଦନ୍ତ ପରେ, ତାହେରପୁର ଥାନା ଅଞ୍ଚଳର ତନ୍ମୟ ରାୟ ନାମକ ଜଣେ ଯୁବକଙ୍କୁ ଚୋରି ସନ୍ଦେହରେ ପୋଲିସ ପଚରାଉଚରା କରିବା ପାଇଁ ଆଣିଥିଲା। ସେବେଠାରୁ, ପୋଲିସ ଚୋରର ଦାବି ପୂରଣ କରିବାକୁ ସଂଘର୍ଷ କରୁଛି। ଚୋରର ଏକମାତ୍ର ଦାବି ହେଉଛି ମୁଁ ଆଳୁଭଜା ଖାଇବାକୁ ଚାହୁଁଛି। ମୁଁ ଆଳୁଭଜା ବିନା ଭାତ କିମ୍ବା ରୁଟି କିଛି ଖାଇବି ନାହିଁ। ଯେପର୍ଯ୍ୟନ୍ତ ଆଳୁ ଭଜା ଖାଦ୍ୟ ବ୍ୟବସ୍ଥା କରାଯାଉନାହିଁ, ସେପର୍ଯ୍ୟନ୍ତ ଚୋର ମୁହଁ ଆଗରେ ଖାଦ୍ୟ ରଖି ବସିଥାଏ, ଏବଂ ଯେତେବେଳେ ପୋଲିସ ତାକୁ ପଚାରେ ଯେ ସେ କାହିଁକି ଖାଉନାହିଁ, ଚୋର କେବଳ କହେ, “ମୁଁ ଆଳୁଭଜା ଚାହୁଁଛି।
” ଚୋରର ଇଚ୍ଛା ପୂରଣ କରିବାକୁ ଚେଷ୍ଟା କରିବାକୁ ଯାଇ ପୋଲିସ ହତାଶ ହୋଇଯାଉଛି। ଯେଉଁଠାରେ ଆଳୁଭଜା ବ୍ୟବସ୍ଥା କରାଯାଉଛି, ସେଠାରେ ସକାଳ, ମଧ୍ୟାହ୍ନ ଏବଂ ରାତିରେ ଆଳୁଭଜା ଚାହିଦା ପାଇଁ ପୋଲିସକୁ ବାରମ୍ବାର ହଇରାଣ କରାଯାଉଛି। ଯଦିଓ ଘଟଣାଟି ହାସ୍ୟାସ୍ପଦ, ପୋଲିସକୁ ଚୋରର ଇଚ୍ଛା ପୂରଣ କରିବାକୁ ପଡିବ। ଏପରି ପରିସ୍ଥିତିରେ, ଚୋରର ପେଟକୁ ଶାନ୍ତ କରିବା ପାଇଁ ଆଳୁଭଜା ଯୋଗାଇବା ହିଁ ଏକମାତ୍ର ଆଶା।
ପାଣିରେ ବୁଡ଼ି ୨ ଛାତ୍ରଛାତ୍ରୀ ମୃତ
ନନ୍ଦିଘୋଷ ବ୍ୟୁରୋ: ପାଣିରେ ବୁଡ଼ି ମେଡିକାଲ ପଢୁଥିବା ଜଣେ ଛାତ୍ର ଓ ଜଣେ ଛାତ୍ରୀ ମୃତ। ବୁର୍ଲା ଭିମସାରରେ ପଢୁଥିଲେ ଦୁଇ ଛାତ୍ରଛାତ୍ରୀ। ଉଭୟେ ଶେଷ ବର୍ଷର ଛାତ୍ରଛାତ୍ରୀ। ଦେବଝରନ ନିକଟରେ ପାଣିରେ ବୁଡି ଯାଇଥିବା ସୂଚନା। ଉଭୟ ମୃତକ ହେଲେ ଛାତ୍ର ସନ୍ଦୀପ ପୁରୀ ଓ ଛାତ୍ରୀ ମୋନିକା ମୀନା। ସାଙ୍ଗମାନଙ୍କ ସହ ଗାଧୋଇବାକୁ ଯାଇଥିବା ବେଳେ ଉଭୟଙ୍କ ପାଣିରେ ବୁଡି ମୃତ୍ୟୁ ହୋଇଛି।
ଫ୍ଲିଣ୍ଟଫଙ୍କ ଏହି ଗୋଟିଏ ଭୁଲ୍, ଭାରତୀୟ ପ୍ରଶଂସକମାନେ କରୁଥିଲେ ଘୃଣା
ନନ୍ଦିଘୋଷ ବ୍ୟୁରୋ: ଭାରତ ଏବେ ଇଂଲଣ୍ଡ ବିପକ୍ଷରେ ଟେଷ୍ଟ ସିରିଜ ଖେଳୁଥିବାବେଳେ ଆସନ୍ତାବର୍ଷ ଜାନୁଆରୀରେ ଇଂଲଣ୍ଡ ଭାରତ ଗସ୍ତରେ ଆସିବ । ଦିନିକିଆ ଏବଂ ଟି-୨୦ ଖେଳିବା ପାଇଁ ଗସ୍ତରେ ଆସିବ । ତେବେ ଉଭୟ ଦେଶ ମଧ୍ୟରେ ଯେତେବେଳେ ଖେଳ ହୁଏ ସେତେବେଳେ କିଛି କଥା ଏବଂ ଖେଳ ସମୟର କିଛି ଭୁଲ୍ ସବୁବେଳେ ଚର୍ଚ୍ଚାରେ ରହିଥାଏ । ତେବେ ଭାରତ-ଇଂଲଣ୍ଡ ମ୍ୟାଚର ବିବାଦୀୟ କଥା ଯଦି କହିବା ତାହେଲେ ଫ୍ଲିଣ୍ଟଫ ସବୁବେଳେ ଭାରତୀୟ ଦଳକୁ ଟାର୍ଗେଟ କରିଥାନ୍ତି । ସେ ଯୁବରାଜଙ୍କୁ ଚିଡ଼ାଇବା ହେଉ କିମ୍ବା ଭାରତରେ ଜର୍ସି ଖୋଲିବା । ସବୁବେଳେ ଭାରତ ସହ ମ୍ୟାଚ ସମୟରେ ଚର୍ଚ୍ଚାରେ ରହିଥାନ୍ତି ।
ଭାରତ ଓ୍ବାଖଡେ ଷ୍ଟାଡିୟମରେ ଖେଳାଯାଉଥିବା ଏକ ମ୍ୟାଚର ଶେଷ ଓଭର ବୋଲିଂ କରିଥିଲେ ଫ୍ଲିଣ୍ଟଫ । ଆଉ ଏହି ମ୍ୟାଚକୁ ସେ ଜିତାଇବା ପରେ ଜର୍ସି ଖୋଲି ବିଜୟର ଉତ୍ସାହ ମନାଇଥିଲେ । ୨୦୦୨ ମସିହାରେ ଏହି ଘଟଣାଟି ଘଟିଥିବାବେଳେ ସୌରଭ ଗାଙ୍ଗୁଲି ଏହାର ଜବାବ ଦେଇଥିଲେ । ଲର୍ଡରେ ଭାରତର ବିଜୟ ପରେ ବାଲକୋନୀରେ ସେ ମଧ୍ୟ ସମାନ ଢ଼ଙ୍ଗରେ ଜର୍ସି ଖୋଲି ଖୁସି ମନାଇଥିଲେ ଏବଂ ଉଚିତ୍ ଜବାବ ଦେଇଥିଲେ । ସେପଟେ ୨୦୦୭ ଟି-୨୦ ବିଶ୍ବକପରେ ଯୁବରାଜଙ୍କୁ ଦେଇଥିବା ଖରାପ ମନ୍ତବ୍ୟର ଉତ୍ତର ମଧ୍ୟ ସେ ରଖିଥିଲେ । ଇଂଲଣ୍ଡର ବୋଲରଙ୍କୁ ୬ ବଲରୁ ୬ ଛକା ମାରି ଇତିହାସ ରଚିଥିଲେ । ତେବେ ସବୁବେଳେ ଭାରତ ବିପକ୍ଷ ମ୍ୟାଚରେ ଏଭଳି ବ୍ୟବହାର ଜାରି ରଖୁଥିବା ଫ୍ଲିଣ୍ଟଫଙ୍କୁ ଭାରତୀୟ ପ୍ରଂଶସକମାନେ ଭଲ ପାଇନଥାନ୍ତି ।
ଟିମ ଇଣ୍ଡିଆର ଲଜ୍ଜାଜନକ ରେକର୍ଡ, ୧୦ ବର୍ଷ ପରେ…
ନନ୍ଦିଘୋଷ ବ୍ୟୁରୋ: ଇଂଲଣ୍ଡ ବିପକ୍ଷରେ ଏକ ଲଜ୍ଜାଜନକ ରେକର୍ଡ କରିଛି ଭାରତ । ଚତୁର୍ଥ ଟେଷ୍ଟ ଜାରି ରହିଥିବାବେଳେ ଏହି ମ୍ୟାଚର ଫଳାଫଳ କେଉଁ ଦିଗକୁ ଯିବ ତାହା ଆଜି ଏକପ୍ରକାର ସ୍ପଷ୍ଠ ହୋଇପାରେ । ତୃତୀୟ ଦିନର ଖେଳ ଶେଷ ସୁଦ୍ଧା ଇଂଲଣ୍ଡ ୫୪୪ ରନ କରିଥିବାବେଳେ ୭ ଓ୍ବିକେଟ ହରାଇଛି । ଇଂଲଣ୍ଡ ଭାରତଠାରୁ ୧୮୬ ରନରେ ଆଗୁଆ ରହିଛି । ତେବେ ଏହି ମ୍ୟାଚରେ ଭାରତ ନାମରେ ଏକ ଲଜ୍ଜାଜନକ ରେକର୍ଡ ଯୋଡ଼ି ହୋଇଛି । ଭାରତ ବିପକ୍ଷରେ ବିଦେଶରେ ୧୦ ବର୍ଷ ପରେ ୫୦୦ ରନ ଅତିକ୍ରମ କରିଛି ଇଂଲଣ୍ଡ । ୨୦୧୫ ମସିହାରେ ଅଷ୍ଟ୍ରେଲିଆ ୫୭୨ ରନ କରିଥିଲା । ସୌଭାଗ୍ୟବଶତଃ ଏହି ମ୍ୟାଚଟି ଡ୍ର ହୋଇଯାଇଥିଲା । ତେବେ ଇଂଲଣ୍ଡ ଏବେ ୨-୧ରେ ଆଗୁଆ ରହିଥିବାବେଳେ ଏହି ମ୍ୟାଚଟି ଭାରତ ଜିତିବା ପାଇଁ ପ୍ରୟାସ କରିବ ।
ପ୍ରଥମ ପାଳିରେ ଭାରତ ୩୫୮ ରନ କରିଥିବାବେଳେ ଇଂଲଣ୍ଡ ଏବେ ଭଲ ସ୍ଥିତିରେ ରହିଛି । ଏଣୁ ବଡ଼ ରନର ଲଇଡ୍ ଦେବ ବୋଲି କ୍ରିକେଟ ବିଶେଷଜ୍ଞମାନେ ମତ ଦେଇଛନ୍ତି । ଏବେ ଅଧିନାୟକ ବେନ୍ ଷ୍ଟୋକ୍ସ କ୍ରିଜରେ ମହଜୁଦ ରହିଛନ୍ତି । ଏଣୁ ଦଳ ଏକ ବିଶାଳ ସ୍କୋର କରିବ ବୋଲି ଆଶା କରାଯାଉଛି । ସେପଟେ ଏହି ମ୍ୟାଚରେ ଜୋ ରୁଟଙ୍କ ନାମରେ ଏକ ନୂଆ ରେକର୍ଡ ଯୋଡ଼ି ହୋଇ ଯାଇଛି । ୩୮ତମ ଶତକ ହାସଲ କରିଥିବାବେଳେ ଟେଷ୍ଟ କ୍ରିକେଟରେ ସର୍ବାଧିକ ଶତକ କରିଥିବା ତାଲିକାର ଦ୍ବିତୀୟ ସ୍ଥାନରେ ରହିଛନ୍ତି । ସେ ଦ୍ରାବିଡ,କାଲିସ ଏବଂ ପଣ୍ଟିଂଙ୍କୁ ପଛରେ ପକାଇ ଦେଇଛନ୍ତି ।
ନାରୀ ନିର୍ଯାତନା ପ୍ରତିବାଦରେ ଜୟପୁର DIG କାର୍ଯ୍ୟାଳୟ ଘେରାଉ କଲା ବିଜେଡି
ଜୟପୁର : ରାଜ୍ୟରେ ବଢିଛି ନାରୀ ନିର୍ଯାତନା। ରାତିପାହିଲେ ଘଟିଚାଲିଛି ଦୁଷ୍କର୍ମ ଘଟଣା। ରାଜ୍ୟରେ ନାରୀ ନୁହନ୍ତି ସୁରକ୍ଷିତ। ଏନେଇ ଆଜି ବିଜେଡି ପକ୍ଷରୁ ଜୟପୁରସ୍ଥିତ DIG କାର୍ଯ୍ୟାଳୟ ଘେରାଉ କରାଯାଇଛି। ୪ ଜିଲ୍ଲାର ବିଜେଡି ନେତା ଓ କର୍ମୀ ଆନ୍ଦୋଳନରେ ସାମିଲ ହୋଇ ପ୍ରତିବାଦ କରିଛନ୍ତି। ବର୍ଷା ସତ୍ତ୍ବେ ବିଜେଡି ନେତା ଓ କର୍ମୀ କରିଛନ୍ତି ଆନ୍ଦୋଳନ। ମହିଳାମାନଙ୍କ ସୁରକ୍ଷା ଲାଗି ବିଜେଡି ସଂଗ୍ରାମ ଜାରି ରଖିବ ବୋଲି ଆହ୍ବାନ ଦିଆଯାଇଛି। ଗତ ୧୩ ମାସ ଧରି ରାଜ୍ୟରେ ନାରୀ ନିର୍ଯାତନା ବଢିଚାଲିଥିବାରୁ ଦଳପକ୍ଷରୁ ଉଦବେଗ ପ୍ରକାଶ କରାଯାଇଛି। ବିକ୍ଷୋଭରେ ପୂର୍ବତନ ସାଂସଦ, ପୂର୍ବତନ ବିଧାୟକ, ବିଧାୟକଙ୍କ ସମେତ ବହୁ ନେତା ସାମିଲ ହୋଇଛନ୍ତି।…