ବାଲେଶ୍ୱର: କରୋନା ମହାମାରୀ ସାରା ବିଶ୍ୱକୁ ନୟାନ୍ତ କରିଦେଇଛି । ଅନେକ ଦେଶର ଅର୍ଥନୈତିକ ମେରୁଦଣ୍ଡକୁ ଦୋହଲାଇ ଦେଇଛି । ଭାରତର ଅର୍ଥନୈତିକ ସ୍ଥିତି ଉପରେ ମଧ୍ୟ କରୋନାର ପ୍ରଭାବ ପଡ଼ିଛି । ଅନେକ ଚାକିରିଆଙ୍କୁ ଚାକିରି ହରାଇବାକୁ ପଡ଼ିଛି । ବ୍ୟବସାୟୀଙ୍କୁ ମଧ୍ୟ ଘରେ ହାତ ବାନ୍ଧି ବସିବାକୁ ବାଧ୍ୟ କରିଛି ଏହି କରାଳ ରୂପି କରୋନା ମାହାମାରୀ । କେବଳ ବ୍ୟବାସାୟୀ କିମ୍ବା ଚାକିରିଆ ନୁହଁନ୍ତି ବରଂ ଛାତ୍ରଛତ୍ରୀଙ୍କଠାରୁ ଆରମ୍ଭ କରି ପ୍ରତ୍ୟେକ ବର୍ଗର ବ୍ୟକ୍ତିଙ୍କୁ ଘରେ ବନ୍ଦି କରିଦେଇଥିଲା ମହାମାରୀ କରୋନା । ଯୁବକମାନେ ମଧ୍ୟ ଘରୁ ବାହାରିପାରି ନଥିଲେ । ତେବେ ଏହି ଲକ୍ଡାଉନ୍ ଭିତରେ ସମସ୍ତେ ଘରେ ରହୁଥିବା ବେଳେ ଇଣ୍ଟରନେଟ୍ର ବ୍ୟବହାର ବହୂଳ ମାତ୍ରାରେ ବୃଦ୍ଧି ପାଇଛି । ଯୁବକ ଯୁବତୀଙ୍କଠାରୁ ଠାରୁ ଆରମ୍ଭ କରି ବୃଦ୍ଧ ବୃଦ୍ଧାମାନେ ମଧ୍ୟ ଇଣ୍ଟରନେଟ୍ ସହ ଜଡ଼ିତ ହୋଇଗଲେ । ଖାସ୍ କରି ସୋସିଆଲ ମିଡିଆ ଓ ୟୁଟ୍ୟୁବ୍ରେ ଲୋକମାନେ ବୁଡ଼ି ରହିଲେ ।
କରୋନା ମାହାମରୀ ଅନେକଙ୍କ ରୋଜଗାର ଛଡ଼ାଇ ନେଇଥିବା ବେଳେ ଅନେକ ଏହି ଲକ୍ଡାଉନ୍ କାରଣରୁ ନିଜକୁ ସ୍ୱାବଲମ୍ବି ମଧ୍ୟ କରିପାରିଛନ୍ତି । କରେନା ସମୟରେ ଘରେ ବସି ସମୟ ନଷ୍ଟ ନକରି କିଛି ଯୁବକ ଯୁବତୀ ସୋସିଆଲ ମିଡିଆ ଓ ୟୁଟ୍ୟୁବ୍ରୁ ଅନେକ କିଛି ଶିକ୍ଷା ଲାଭ କରିଛନ୍ତି । ସେଥିରୁ ସେମାନେ ନିଜକୁ ସ୍ୱାବଲମ୍ବି ମଧ୍ୟ କରିଛନ୍ତି । ନିଜେ ଭଲ ରୋଜଗାର କରିବା ସହ ଅନ୍ୟମାନଙ୍କୁ ରୋଜଗାର ମଧ୍ୟ ଦେଇଛନ୍ତି ।
ସେହିଭଳି ଏକ ଉଦାହରଣ ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ରେମୁଣାରେ । ସଞ୍ଜୟ କୁମାର ଦାସ ଜଣେ ଇଲେକ୍ଟ୍ରିକ୍ ଇଞ୍ଜିନିୟର । କିନ୍ତୁ ଏବେ ସେ ପାଲଟିଛନ୍ତି ଜଣେ ସଫଳ ଚାଷୀ । ଇଣ୍ଟରନେଟ୍ରୁ ଭିଡିଓ ଦେଖି ଏବଂ ଅନକେ କିଛି ବୈଷୟିକ ପ୍ରଣାଳି ଶିଖି ସେ ଆରମ୍ଭ କରିଛନ୍ତି ଚାଷ କରିବା । ଜୈବିକ ପ୍ରଣାଳୀ ଓ ବୈଜ୍ଞାନିକ ପଦ୍ଧତିକୁ ବ୍ୟବହାର କରି ସେ ସବୁଜ ପରିବା ଚାଷ କରୁଛନ୍ତି । ଯେଉଁଥିରେ ସେ ସଫଳ ମଧ୍ୟ ହୋଇଛନ୍ତି । ଇଞ୍ଜିନିୟରିଂରୁ ସିଧାସଳଖ ସେ ଜଣେ ସଫଳ ଚାଷୀ ପାଲଟିଯାଇଛନ୍ତି ।
ସାଧାରଣ ପାଇପ୍ ଓ କମ୍ପୋଷ୍ଟ ଖତରେ ଫଳାଇଛନ୍ତି ସବୁଜ ପନିପରିବା । ଏଥିପାଇଁ ତାଙ୍କୁ ଅଧିକ ପାଣି ମଧ୍ୟ ଖର୍ଚ୍ଚ କରିବାକୁ ପଡ଼ୁନାହିଁ । ସଞ୍ଜୟଙ୍କ ବଗିଚାରେ ଧାଡ଼ି କି ଧାଡ଼ି ପାଇପ୍ ଗୁଡ଼ିକ ବିଛାଯାଇଛି । ଗୋଟିଏ ସହିତ ଆଉ ଗୋଟଏ ଛନ୍ଦା ହୋଇଛି । ଆଉ ସେହି ପାଇପ୍ରେ ଖଞ୍ଜା ଯାଇଛି ପରିବା ମଞ୍ଜି ପୋତାଥିବା ଏକ ସ୍ୱତନ୍ତ୍ର ଆକାରର କପ୍ । ମୋଟର ଯୋଗେ ଏକ କୁଣ୍ଡରୁ ପାଣି ପାଇପ୍ ମାଧ୍ୟମରେ ସବୁ ଗଛ ମୂଳକୁ ପହଞ୍ଚୁଛି । ଗଛ ପାଇଁ ଆବଶ୍ୟକ ଥିବା ପାଣି ଗଛ ପାଉଛି, ଆଉ ବଳକା ପାଣି କୁଣ୍ଡକୁ ଫେରି ଆସୁଛି । ସେହି ପାଣି ପୁଣି ଗଛ ମୂଳକୁ ଯାଇ ଫେରୁଛି ।
ସେହି ସ୍ୱତନ୍ତ୍ର ଆକାରର କପ୍ରେ ରହିଛି କରତଗୁଣ୍ଡ ଓ କମ୍ପୋଷ୍ଟ ଖତ । ଯାହା ଗଛଗୁଡ଼ିକୁ ଖୁବ୍ ଶୀଘ୍ର ବଢିବାରେ ସହାୟ ହେଉଛି । ଖାଲି ସେତିକି ନୁହେଁ ଗଛ ଉପରେ ସିଧାସଳଖ ସୂର୍ଯ୍ୟାଲୋକ ନପଡ଼ିବା ପାଇଁ ତିଆରି କରାଯାଇଛି ଗ୍ରୀନ୍ ହାଉସ୍ । ଏଥିରେ କାକୁଡ଼ି, ଲଙ୍କା, କଲରା, ସିମଳାମିର୍ଚ୍ଚି, ଟମାଟୋ, ଲାଉ, ତରୁଭୁଜ, ଧଣିଆପତ୍ର, ପାଳଙ୍ଗ ସାଗ ଭଳି ସବୁଜ ପନି ପରିବା ଲଗାଯାଇଛି । ଏହି ପରିବାରେ ରାସାୟନିକ ସାର କିମ୍ବା କୀଟନାଶକ ବ୍ୟବହାର କରାଯାଉ ନାହିଁ । ଫସଲ ପାଇଁ କମ୍ପୋଷ୍ଟ ଖତ ଓ ନିମ୍ବତେଲ ପାଣି ବ୍ୟବହାର କରୁଛନ୍ତି ସଞ୍ଜୟ ।
ସୂଚନାଯୋଗ୍ୟ, ସଞ୍ଜୟଙ୍କ ବାପା କାର୍ତ୍ତିକଚନ୍ଦ୍ର ଦାସ ରେମୁଣା ଅଞ୍ଚଳର ଜଣେ ପ୍ରତିଷ୍ଠିତ ପରିବା ଚାଷୀ । ହେଲେ ରେମୁଣାର କାକବରାଇ ଗାଁ ବନ୍ୟାଞ୍ଚଳ ହୋଇଥିବାରୁ ପ୍ରତ୍ୟେକ ବର୍ଷ ଚାଷ ପ୍ରଭାବିତ ହୋଇଥାଏ । ତେଣୁ ବାରମ୍ବାର କ୍ଷତି ସହୁଥିବାରୁ ସଞ୍ଜୟ ନୂଆ ବିକଳ୍ପ ଖୋଜିଥିଲେ ।
ଗତ ଜାନୁଆରୀରେ ୧୫ ହଜାର ଟଙ୍କା ଖର୍ଚ୍ଚ କରି ସେ ଉତ୍ତରପ୍ରଦେଶରୁ ଏହି ଚାଷ ସମ୍ପର୍କରେ ତାଲିମ ଗ୍ରହଣ କରିଥିଲେ । ତା’ପରେ ୟୁଟ୍ୟୁବ୍ରୁ ଭିଡିଓ ଦେଖି ଅନେକ ଶିକ୍ଷା ଲାଭ କରିଥିଲେ । ଗାଁରେ ଥିବା ତାଙ୍କ ବାଡ଼ିରେ ଆରମ୍ଭ କରିଥିଲେ ଗ୍ରୀନ୍ ହାଉସ୍ । ବାହାର କ୍ଷେତରୁ ଆସୁଥିବା କୀଟ ଯୋଗୁ ସଂକ୍ରମଣକୁ ଗ୍ରୀନ୍ ହାଉସ୍ ସୂରକ୍ଷା ଯୋଗାଇଥାଏ । ଏହି ପ୍ରଣାଳୀର ଚାଷକୁ କୃଷକମାନେ ପସନ୍ଦ କରିଥିବାବେଳେ, ଏଠାରେ ଉତ୍ପାଦିତ ପନି ପରିବା ଗ୍ରାହକଙ୍କୁ ବେଶ୍ ଆକୃଷ୍ଟ କରିଛି ।
ରୋଜଗାରର ମାଧ୍ୟମ ଯେ କେବଳ ଚାକିରି, ସେ କଥାକୁ ଭୁଲ ପ୍ରମାଣିତ କରିଛନ୍ତି ବାଲେଶ୍ୱରର ସଞ୍ଜୟ । ଇଲେକ୍ଟ୍ରିକାଲ ଇଞ୍ଜିନିୟର ହୋଇ ମଧ୍ୟ ଅତ୍ୟାଧୁନିକ ପ୍ରଣାଳୀରେ ପରିବା ଚାଷ କରି ସେ ଖୋଜି ପାଇଛନ୍ତି ରୋଜଗାରର ଆଉ ଏକ ମାଧ୍ୟମ ।
