ନୂଆଦିଲ୍ଲୀ: କୋଭିଡ ଗହଳରେ ହଜି ଯାଇଛି ସାରା ବିଶ୍ୱ । ମୁକ୍ତି ପାଇଁ ସବୁଠି ଶୁଭୁଛି ଚିତ୍କାର । ଏହାରି ଭିତରେ କୋଭିଡର କାଳ କୋଠରୀରୁ ମାନବ ସମାଜକୁ ମୁକ୍ତ କରିବାକୁ ଅନେକ ଟିକା ପ୍ରସ୍ତୁତକାରୀ କମ୍ପାନୀ ଅଣ୍ଟା ଭିଡିଥିବାବେଳେ ଅନେକ ଭ୍ୟାକ୍ସିନ ପ୍ରସ୍ତୁତ କରିଥିବା ନେଇ ଘୋଷଣା କରିଛନ୍ତି । ଶତପ୍ରତିଶତ ଫଳପ୍ରଦ ନହୋଇଥିଲେ ବି ୮୦ ପ୍ରତିଶତ ଗ୍ୟାରେଣ୍ଟିର ଯୁକ୍ତି ବାଢିଛନ୍ତି ଅନେକ କମ୍ପାନୀ । ସେପଟେ ପ୍ରଥମ ଦେଶ ଭାବେ ବ୍ରିଟେନରେ ଆରମ୍ଭ କରାଯିବ ଟୀକାକରଣ ।
ଖୁବଶୀଘ୍ର ବଜାରକୁ ଆସୁଛି କୋଭିଡ-୧୯ ଭ୍ୟାକ୍ସିନ ‘ଫାଇଜର’ । ବ୍ରିଟେନରେ ଏହାର ଜରୁରୀ ବ୍ୟବହାର ନିମନ୍ତେ ଅନୁମତି ଦେଇସାରିଛି ବାୟୋଟେକନିକ । ଫାଇଜର ଅଧିକାରୀ କିନ୍ତୁ ଭ୍ୟାକ୍ସିନର ଫଳପ୍ରଦ ନେଇ ସୁନିଶ୍ଚିତ ନୁହଁନ୍ତି । ଭ୍ୟାକ୍ସିନ ନେବା ପରେ ଫାଇଜର ପାର୍ଶ୍ୱ ପ୍ରତିକ୍ରିୟା ଦେଖାଇବ କି ନାହିଁ, ଏନେଇ ଗ୍ୟାରେଣ୍ଟି ଦେଇନାହିଁ କମ୍ପାନୀ । ଯଦି ବା ସଂକ୍ରମିତ ବ୍ୟକ୍ତି ଭ୍ୟାକ୍ସିନ ନେଲା ପରେ ସାଇଡ ଇଫେକ୍ଟ ସୃଷ୍ଟି କରେ କିମ୍ବା ଲାଭଦାୟକ ନ ହୁଏ, ତେବେ ଏହାର କ୍ଷତିପୂରଣ ଦେବାକୁ ପ୍ରତିଶ୍ରୁତି ଦେଇଛି ଫାଇଜର ।
