ମୁମ୍ୱାଇ: ସୋମବାର ଧାରଣାରେ ବସିବେ ଅଭିନେତ୍ରୀ ପାଏଲ ଘୋଷ । ଫିଲ୍ମ ନିର୍ଦ୍ଦେଶକ ଅନୁରାଗ କଶ୍ୟପଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ଅଭିଯୋଗରେ ପୋଲିସ ଷ୍ଟେସନ୍ ଆଗରେ ଧାରଣାରେ ବସିବେ । ପୂର୍ବରୁ ଫିଲ୍ମ ନିର୍ଦ୍ଦେଶକ ଅନୁରାଗ କଶ୍ୟପଙ୍କ ବିରୋଧରେ ଯୌନ ଶୋଷଣର ଅଭିଯୋଗ ଆଣି ପୂରା ବଲିଉଡରେ ଚହଳ ପକାଇଥିଲା ଅଭିନେତ୍ରୀ ପାଏଲ ଘୋଷ ।
ସୂଚନା ମୁତାବକ ପାଏଲ ସୋମବାର ବର୍ସିବା ପୋଲିସ ଷ୍ଟେସନ୍ ଯାଇ କାର୍ଯ୍ୟାନୁଷ୍ଠାନ ଦାବିରେ ଧାରଣାରେ ବସିବେ । ତେବେ ପୂର୍ବରୁ ଅଭିନେତ୍ରୀ ପାଏଲ ଘୋଷ ଅନୁରାଗ କଶ୍ୟପଙ୍କ ବିରୋଧରେ ଅଭିଯୋଗ କରି ସତ୍ତ୍ୱେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ହୋଇନଥିବାରୁ ଏ ନେଇ ମୁମ୍ୱାଇ ପୋଲିସର ଆଭିମୁଖ୍ୟ ଉପରେ ପ୍ରଶ୍ନ ଉଠାଇଛନ୍ତି ପାଏଲ ।
ଅଭିନେତ୍ରୀ ପାଏଲ ଟ୍ୱିଟ୍ କରି କହିଛନ୍ତି ଯେ, ମୁଁ ଜଣେ ଅପରାଧୀଙ୍କ ବିରୋଧରେ ମାମଲା ଦାୟର କରିଛି । କିନ୍ତୁ ଅଭିଯୁକ୍ତ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପରିବର୍ତ୍ତେ ମୋତେ ହିଁ ପ୍ରଶ୍ନ ପଚରାଯାଉଛି ଆଉ ଅଭିଯୁକ୍ତ ଘରେ ଆରାମ କରୁଛନ୍ତି । ପାଏଲ ଘୋଷ ସୋସିଆଲ୍ ମିଡିଆରେ ଅନୁରାଗ କଶ୍ୟପଙ୍କ ବିରୋଧରେ ଅନେକ ଗମ୍ଭୀର ଅଭିଯୋଗ ଆଣିଛନ୍ତି । ଅଭିନେତ୍ରୀ ଟ୍ୱିଟ୍ କରି ଅନୁରାଗଙ୍କ ବିରୋଧରେ ଜବରଦସ୍ତି କରିଥିବା ଅଭିଯୋଗ ଆଣିଥିଲେ । ପାଏଲ ଘୋଷ ଏହି ଅଭିଯୋଗ ଉପରେ ଅନୁରାଗ ସଫେଇ ମଧ୍ୟ ରଖିଥିଲେ । ଆଉ ଅଭିନେତ୍ରୀଙ୍କ ବିରୋଧରେ ଆଇନତଃ କାର୍ଯ୍ୟାନୁଷ୍ଠାନ ଗ୍ରହଣ କରିବି ବୋଲି କହିଛନ୍ତି ।
