ପୁରୀ: ସାରୁଅ ଜମି କେଳେଙ୍କାରି ପରେ ଏବେ ପୁରୀ ଜିଲ୍ଲା ଅସ୍ତରଙ୍ଗରେ ମଧ୍ୟ ସମାନ ଅଭିଯୋଗ । ଶିଶୁଆ ପଞ୍ଚାୟତର ବିଭିନ୍ନ ଗାଁରେ ଏକର ଏକର ଜମି ଓଡିଶା ଇନଫ୍ରାଟେକ କିଣିଥିବା ଅଭିଯୋଗ ହୋଇଛି । ଅସ୍ତରଙ୍ଗରେ ତଣ୍ଡାହାର, ଛେନୁ, ଉଦୟକଣି ଗାଁର ଶହ ଶହ ଏକର ଜମି ବୈଜୟନ୍ତ ପଣ୍ଡା ଓ ତାଙ୍କ ସହଯୋଗୀମାନେ ଓଡିଶା ଇନଫ୍ରାଟେକ କମ୍ପାନୀ ନାଁରେ କିଣିଛନ୍ତି । ଉପକୂଳବର୍ତୀ ଗାଁକୁ ସମୁଦ୍ର ମାଡ଼ି ଆସୁଥିବାରୁ ଗାଁ ଲୋକେ ବୈଜୟନ୍ତଙ୍କୁ ଶାଗ ମାଛ ଦରରେ ଜମି ବିକିଛନ୍ତି ।

ସମୁଦ୍ର ଭିତରେ ଲୁଚି ଯାଇଥିବା ଗାଁର ଅଧିକାଂଶ ଅଂଶ ଏବେ ବୈଜୟନ୍ତ ଓ ତାଙ୍କ କମ୍ପାନୀ ନାଁରେ ରହିଛି । ଚିଙ୍ଗୁଡ଼ି ଘେରି କରିବା ନାଁରେ ଜମି କିଣିବା ପରେ ନିଜେ ବୈଜୟନ୍ତ ପଣ୍ଡା ଆସି ଜମି ମାପ କରିବାରୁ ଜମିର ଅସଲି କ୍ରେତା ବୈଜୟନ୍ତ ପଣ୍ଡା ବୋଲି ଜଣାପଡିଥିଲା । ତେବେ ସାରୁଅ ଭଳି ଏଠି ମଧ୍ୟ ଦଳିତଙ୍କ ଜମିକୁ ଚଞ୍ଚକତା କରି କିଣିଥିବା ଅଭିଯୋଗ ହୋଇଛି  ।

ଭୁବନେଶ୍ୱର: ଆସିଲା ନୂଆ ଧାନ କିଣା ନୀତି । ଏଥିରେ ଚାଷୀ ଚାହିଁଲେ ନିଜ ବ୍ୟବହାର ବା ଖୋଲାରେ ବିକ୍ରି କରିବା ପାଇଁ କିଛି ପରିମାଣର ଧାନ ରଖିପାରିବେ । ପୂର୍ବରୁ ଜଳସେଚିତ ଜମିରୁ ୧୯ କ୍ବିଣ୍ଟାଲ ଓ ଅଣଜଳସେଚିତ ଜମିରୁ ୧୩ କ୍ବିଣ୍ଟାଲ ଧାନ ସଂଗ୍ରହ ହେଉଥିଲା । ଏହା ଜରିଆରେ ଚାଷୀଙ୍କ ଅଧିକାର ଉପରେ ରୋକ ଲାଗିବ ନାହିଁ ।

ଚଳିତ ବର୍ଷ ପଞ୍ଜିକୃତ ଚାଷୀଙ୍କୁ ହିସାବ କରି ୭୧ ଲକ୍ଷ ମେଟ୍ରିକ ଟନ୍ ଧାନ ସଂଗ୍ରହ ଲକ୍ଷ୍ୟ ରଖିଛନ୍ତି ରାଜ୍ୟ ସରକାର । ତେବେ ଯଦି ଧାର୍ଯ୍ୟ ଲକ୍ଷ୍ୟରୁ ଧାନର ପରିମାଣ ବଢେ, ତାହା କିଣିବାର ନିଷ୍ପତ୍ତି ନେବା ପାଇଁ ଖାଦ୍ୟ ଯୋଗାଣ ମନ୍ତ୍ରୀଙ୍କ ମିଳିଛି ସ୍ବତନ୍ତ୍ର ଅଧିକାର । ତେବେ ଯେଉଁ ମଣ୍ଡିରୁ ଟୋକନ ପାଇଛନ୍ତି ଚାଷୀ, ସେଠାରେ ହି ବିକି ପାରିବେ ଧାନ ।

ଗତ ବର୍ଷ ଟୋକନ ବ୍ୟବସ୍ଥାକୁ ନେଇ ଚାଷୀଙ୍କ ଅସନ୍ତୋଷ ଥିଲା । ଚଳିତ ବର୍ଷ ବି ଟୋକନ ବ୍ୟବସ୍ଥା ରହିଛି । ହେଲେ ଧାନ କିଣା ନୀତିରେ ବିଭିନ୍ନ ସଂଶୋଧନ ଆସିଥିବାରୁ, ସ୍ବଚ୍ଛ ପ୍ରକ୍ରିୟା ନେଇ ଚାଷୀ ଆଶା କରିଛନ୍ତି ।

ଗତବର୍ଷ  ଆଦାୟଯୋଗ୍ୟ ଚାଉଳକୁ ଶତପ୍ରତିଶତ ଫେରସ୍ତ କରିଥିବା ମିଲର ହି ଧାନ ସଂଗ୍ରହ ପ୍ରକ୍ରିୟାରେ ଭାଗ ନେଇ ପାରିବେ । ଅଭାବୀ ଧାନ ବିକ୍ରିକୁ ପ୍ରତିହତ କରିବାକୁ ଜିଲ୍ଲା ପ୍ରଶାସନ ଓ ସଂଗ୍ରହକାରୀ ସଂସ୍ଥା ଆବଶ୍ୟକୀୟ ପଦକ୍ଷେପ ନେଇ ପାରିବେ ।

ଭୁବନେଶ୍ୱର: ସ୍ୱଚ୍ଛତା ଓ ପରିବେଶକୁ ସବୁବେଳେ ଗୁରୁତ୍ୱ ଦେଇ ଆସିଛି ଭୁବନେଶ୍ୱର ମହାନଗର ନିଗମ । ତେବେ କରୋନା କଟକଣା ଯୋଗୁଁ ଅଟକି ରହିଥିଲା ବହୁ ପ୍ରକଳ୍ପ । ଗତବର୍ଷ ଜାତୀୟ ସ୍ତରରେ ହେଉଥିବା ସ୍ୱଚ୍ଛ ସର୍ବେକ୍ଷଣରେ ପଛରେ ପଡ଼ିଯାଇଥିଲା ସ୍ମାର୍ଟସିଟି ଭୁବନେଶ୍ୱର । ଚଳିତ ଥର ଆରମ୍ଭ ହୋଇଛି ସ୍ୱଚ୍ଛ ସର୍ବେକ୍ଷଣ ପ୍ରକ୍ରୀୟା । ଘର ଘର ବୁଲି ଲୋକଙ୍କୁ କରାଯାଉଛି ସଚେତନ । ଶେଷ ହୋଇଛି ବର୍ଜ୍ୟବସ୍ତୁ ପରିଚାଳନା ପାଇଁ ୪୩ଟି ମାଇକ୍ରୋ କମ୍ପୋଷ୍ଟ ସେଣ୍ଟର । ବର୍ଜ୍ୟବସ୍ତୁ ପ୍ରକ୍ରୀୟା କରଣ ସହିତ ନିୟୋଜିତ କରାଯାଇଛି ସ୍ୱଚ୍ଛସାଥୀଙ୍କୁ ଓ ମହିଳା ସ୍ୱୟଂସହାୟିକା ଗୋଷ୍ଠୀଙ୍କୁ ।

ଜନସାଧାରଣଙ୍କ ସହଯୋଗ ବିନା ବିକାଶ ଅସମ୍ଭବ । ଏଥିପାଇଁ ଲୋକଙ୍କ ମଧ୍ୟରେ ସଚେତନତା ସୃଷ୍ଟି ସହିତ ବିଭିନ୍ନ ପ୍ରକଳ୍ପ କାର୍ଯ୍ୟକାରୀ କରିବାର ଆବଶ୍ୟକତା ରହିଛି । ଏସବୁ ଦିଗରେ ଗୁରୁତ୍ୱ ଦେଉଛି ବିଏମସି । ଦେଶର ମୋଟ ୩୮୨ଟି ସହରକୁ ନେଇ ଚାଲିଥିବା ସର୍ଭେକ୍ଷଣରେ ଗତବର୍ଷ ଭୁବନେଶ୍ୱରର ସ୍ଥାନ ୨୩୩ରେ ଥିଲା । କିନ୍ତୁ ବର୍ଷକ ମଧ୍ୟରେ ବିଏମ୍ସି ପକ୍ଷରୁ ପରିମଳ ଓ ପରିବେଶ କ୍ଷେତ୍ରରେ ନିଆଯାଇଥିବା ବିଭିନ୍ନ ପଦକ୍ଷେପ ବିଏମ୍‌ସିକୁ ସହାୟକ ହେବ ବୋଲି କହିଛନ୍ତି ପରିବେଶବିତ । ସ୍ୱଚ୍ଛ ସର୍ବେକ୍ଷଣ ପ୍ରତିଯୋଗିତାରେ ରାଜ୍ୟର କଟକ, ଭୁବନେଶ୍ୱର, ବ୍ରହ୍ମପୁର ଓ ରାଉରକେଲା ଭଳି ୪ଟି ସହର ସାମିଲ ହୋଇଛି ।

ଭୁବନେଶ୍ୱର: ହାତୀ ଓ ମଣିଷର ଲଢେଇ ଏକ ନିତି ଦିନିଆ ଘଟଣାରେ ପରିଣତ ହୋଇଛି । ବିଶେଷ କରି ଜଙ୍ଗଲ ନିକଟରେ ଥିବା ଗ୍ରାମବାସୀଙ୍କ ପାଇଁ ଏହା ଜୀବନ ମରଣର ପ୍ରଶ୍ନ ହୋଇ ଛିଡ଼ା ହୋଇଛି । ତେବେ ଏହି ହାତୀ ଉପଦ୍ରବ ରୋକିବା ପାଇଁ ରାଜ୍ୟ ସରକାର ଗଠନ କରିଛନ୍ତି ସ୍ୱତନ୍ତ୍ର ଟାସ୍କଫୋର୍ସ । ଏଥିପାଇଁ ଦାୟିତ୍ୱରେ ରହିବେ ସମ୍ବଲପୁର ଡିଏଫଓ ।

ଧୀରେ ଧୀରେ ଜଙ୍ଗଲ ଛାଡ଼ି ସହର ଓ ଗାଁ ମୁହାଁ ହେଉଛନ୍ତି ହାତୀ । ଅନେକ ସମୟରେ ହାତୀପଲଙ୍କ ଉତ୍ପାତ ଯୋଗୁଁ ଲୋହଙ୍କ ଜୀବନହାନି ବି ହେଉଛି । ତେବେ ସରକାର ଏହାକୁ ରୋକିବା ପାଇଁ ଗଠନ କରିଛନ୍ତି ଟାସ୍କଫୋର୍ସ । ଏହାର ଦାୟିତ୍ୱରେ ରହିବେ ସମ୍ବଲପୁର ଡିଏଫଓ । ସ୍ଥାନୀୟ ଲୋକଙ୍କ ଅଭିଯୋଗ ସହ କଣ ପଦକ୍ଷେପ ନେବାକୁ ଜରୁରୀ ସେସବୁର ରିପୋର୍ଟ ଦେବ ଟାସ୍କଫୋର୍ସ ।

ଟାସ୍କଫୋର୍ସ ଆସନ୍ତା  ତିନି ବର୍ଷ ଭିତରେ କଣ ସବୁ ପଦକ୍ଷେପ ନିଆଯାଇ ପାରିବ ତାର ରିପୋର୍ଟ ପ୍ରଦାନ କରିବ । ଏଥିପାଇଁ କେତେ ଟଙ୍କା ଖର୍ଚ୍ଚ ହେବ ଆକଳନ କରି ରିପୋର୍ଟ ଦିଆଯିବ । ଆସନ୍ତା ନଭେମ୍ବର ୨୫ ତାରିଖ ସୁଦ୍ଧା ପିସିସିଏଫଙ୍କୁ  ରିପୋର୍ଟ ଦିଆଯିବ ବୋଲି ସମ୍ବଲପୁର ଡିଏଫଓ ସୂଚନା ଦେଇଛନ୍ତି ।