ନୂଆଦିଲ୍ଲୀ: ଚେନ୍ନାଇ ସୁପର କିଙ୍ଗସର କ୍ରିକେଟର ସୁରେଶ ରୈନା ପାରିବାରିକ ସମସ୍ୟା କାରଣରୁ ଭାରତ ଫେରି ଆସିଛନ୍ତି । କିନ୍ତୁ ତାଙ୍କର ଏଭଳି ଆଇପିଏଲ ଛାଡ଼ି ଆସିବା ଦ୍ୱାରା ଦଳର ମାଲିକ ଏନ.ଶ୍ରୀନିବାସନ ରାଗି ଯାଇଛନ୍ତି । ତାଙ୍କ କହିବାନୁଯାୟୀ ରୈନା ହୋଟେଲର ରୁମକୁ ନେଇ ଅସନ୍ତୁଷ୍ଠ ଥିଲେ । ତେଣୁ ସେ ଟିମ୍ ଛାଡି ଭାରତକୁ ଫେରି ଆସିଛନ୍ତି ।
ରୈନାଙ୍କୁ ଦିଆଯିବ ନାହିଁ ଏହି ସିଜନର ବେତନ
ଏନ.ଶ୍ରୀନୀବାସନ ଚେନ୍ନାଇ ସୁପର କିଙ୍ଗସର ମାଲିକ । ରୈନା ସୁବେବେଳେ ଏହି ଦଳରେ ସାମିଲ ରହି ଆସିଛନ୍ତି । ଯେତେବେଳେ ଦଳ ଉପରେ ଦୁଇ ବର୍ଷର ବ୍ୟାନ ଲଗାଯାଇଥିଲା ସେହି ସମୟରେ ସେ ଗୁଜୁରାଟ ଲାୟନ୍ସର ପାଇଁ ଖେଳିଥିଲେ । କିନ୍ତୁ ରୈନାଙ୍କର ଏଭଳି ଫେରି ଆସିବା ଶ୍ରୀନିବାସନଙ୍କୁ ଆଘାତ ଦେଇଛି । ଏଭଳି ପଦକ୍ଷେପ ନେଇ ରୈନା ଭୁଲ କରିଛନ୍ତି ଏବଂ ଖୁବଶୀଘ୍ର ଭୁଲକୁ ଅନୁଭବ କରିବେ ବୋଲି କହିଛନ୍ତି ସି.ଏସ.କେର ମାଲିକ । ବିସିସିଆଇର ପୂର୍ବ ଅଧ୍ୟକ୍ଷ ଶ୍ରୀନିବାସନ ଏହା ମଧ୍ୟ କହିଛନ୍ତି କି ସିଜନ ଆରମ୍ଭ ହୋଇନାହିଁ, ଏବଂ ରୈନାଙ୍କୁ ଖୁବଶୀଘ୍ର ଏହାର ପରିଣାମ ଅନୁଭବ ହୋଇଯିବ । ଯଦି ସେ ଫେରିବେ ନାହିଁ ତେବେ ତାଙ୍କୁ ୧୧ କୋଟିର କ୍ଷତି ସହିବାକୁ ପଡ଼ିବ । ତେଣୁ ରୈନା ଫେରିବାକୁ ଚାହିଁବେ ବୋଲି ଆଶା ରଖିଛନ୍ତି ଶ୍ରୀନିବାସନ ।
କେବଳ ଏତିକିରେ ଶେଷ ହୋଇନାହିଁ ଶ୍ରୀନିବାସନଙ୍କ ବୟାନ୍ । ପରେ ସେ କହିଛନ୍ତି କି କିଛି କ୍ରିକେଟର୍ସ ନିଜକୁ କିଛି ଅଲଗା ବୋଲି ଭାବିଲେଣି, ଯେପରି ଆଗରୁ ଯେମିତି କିଛି ଷ୍ଟାର ନଖରା ଦେଖାଉଥିଲେ ସେମିତି ଏବେ କିଛି କ୍ରିକେଟର ନଖରା ଦେଖାଉଛନ୍ତି । ସିଏସକେ ସବୁବେଳେ ଏକ ପରିବାର ଭଳି ରହିଛି ଏବଂ ସମସ୍ତ ସିନିଅର କ୍ରିକେଟର ଏଥିରେ ରହିବା ଶିଖିଛନ୍ତି । ମୁଁ ଭାବେ କି ଯଦି ଆପଣ କୌଣସି କଥାକୁ ନେଇ ଜିଦ କରି ବସିଛନ୍ତି ବା ଖୁସି ନାହାଁନ୍ତି ତେବେ ଫେରି ଯାଆନ୍ତୁ । ମୁଁ କାହାକୁ କିଛି କରିବା ପାଇଁ ବାଧ୍ୟ କରିବି ନାହିଁ । କେବେକେବେ ସଫଳତା ମୁଣ୍ଡକୁ ଚଢିଯାଏ ।
ସୂଚନାଯୋଗ୍ୟ ସୁରେଶ ରୈନା ବ୍ୟକ୍ତିଗତ ସମସ୍ୟା ଦେଖାଇ IPL ଛାଡ଼ି ଫେରି ଆସିଛନ୍ତି । ପ୍ରଥମେ କୁହାଯାଉଥିଲା କି ସେ କରୋନା ସମସ୍ୟା କାରଣରୁ ହୁଏତ ଏଭଳି ପଦକ୍ଷେପ ନେଇଥାଇ ପାରନ୍ତି । କିନ୍ତୁ ପରେ କୁହାଗଲା ତାଙ୍କ ପିଉସାଙ୍କ ହତ୍ୟା ହୋଇଥିବା ଯୋଗୁଁ ସେ ଫେରି ଆସିଛନ୍ତି । ଏବେ କିନ୍ତୁ ଘଟଣା ଭିନ୍ନ ମୋଡ଼ ନେଇଥିବା ଦେଖିବାକୁ ମିଳିଛି ।
