ବଡମ୍ବା : ଶିକୁଳିରେ ବନ୍ଧା ଜୀବନ । ଦୀର୍ଘ ବର୍ଷ ଧରି ଶିକୁଳିରେ ବନ୍ଧା ହୋଇ ପଡିଛନ୍ତି ନରସିଂହପୁର ବ୍ଳକ ବନ୍ଧହୁଡା ଗାଁର ୩୭ ବର୍ଷୀୟ ଯୁବକ ବିଭୂତି ଭୂଷଣ ସାହୁ । ପୁଅର ଚିକିତ୍ସା ପାଇଁ ଅନେକ ମେଡିକାଲକୁ ନେଇ ବହୁ ଖର୍ଚ୍ଚାନ୍ତ ହେଲେଣି ବାପା ସନାତନ । ହେଲେ କୌଣସି ସୁଫଳ ମିଳି ପାରୁନାହିଁ । ବିଭୂତି ପୂରା ମାନସିକ ବିକାରଗ୍ରସ୍ତ ହୋଇଥିବା ବେଳେ ତାଙ୍କର ଅନଲାଇନ ଭିନ୍ନକ୍ଷମ ସାର୍ଟିଫିକେଟ ହୋଇପାରୁ ନାହିଁ । ଫଳରେ ତାଙ୍କୁ ୩୫ ଶହ ଟଙ୍କା ଭତ୍ତା ମିଳୁନାହିଁ । ସରକାରୀ ସୁବିଧା ଯୋଗାଇ ଦେବାକୁ ସନାତନ ବହୁବାର ସ୍ଥାନୀୟ ପ୍ରଶାସନ ନିକଟରେ ଗୁହାରି କରିଥିଲେ ବି କେହି ଶୁଣୁନଥିବା ଅଭିଯୋଗ ହୋଇଛି । ଚିକିତ୍ସା ନିମନ୍ତେ ସମସ୍ତ ସୁବିଧା ସୁଯୋଗ ଯୋଗାଇ ଦେବାକୁ ସରକାରଙ୍କ ନିକଟରେ ନିବେଦନ କରିଛନ୍ତି ପରିବାର ।
କଳାହାଣ୍ଡି କର୍ଲାମୁଣ୍ଡା ବ୍ଲକ ଧଅଁରାଖମନ ଗାଁରେ ଡରାଉଛି କିଡନୀ ରୋଗ
ଏମ. ରାମପୁର : ଡରାଉଛି କିଡନୀ ରୋଗ । କଳାହାଣ୍ଡି ଜିଲ୍ଲା କର୍ଲାମୁଣ୍ଡା ବ୍ଳକ ଗଜବାହାଲ ପଞ୍ଚାୟତ ଧଅଁରାଖମନ ଗାଁରେ କିଡନୀ ରୋଗ ଆତଙ୍କ । ୧୪ରୁ ଉର୍ଦ୍ଧ୍ଵ ମହିଳା ଓ ପୁରୁଷଙ୍କ ଘଟିଲାଣି ମୃତ୍ଯୁ । ଏବେବି ୧୯ ଜଣ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି । ଚିକିତ୍ସା ପାଇଁ ଆକ୍ରାନ୍ତ ହୋଇଥିବା ରୋଗୀ ଲକ୍ଷାଧିକ ଟଙ୍କା ଖର୍ଚ୍ଚ କରି ସୁଦ୍ଧା ମୃତ୍ୟୁ ସହ ସଂଗ୍ରାମ କରୁଛନ୍ତି । ଯାହାକୁ ନେଇ ଚିନ୍ତାରେ ୯୦ ପରିବାର ।
ଧଅଁରାଖମନ ଗାଁରେ କିଡନୀ ଜନିତ ରୋଗ ବଢୁଥିବା ବେଳେ କର୍ଲାମୁଣ୍ଡା ଗୋଷ୍ଠୀ କେନ୍ଦ୍ର ପକ୍ଷରୁ ତଦନ୍ତ କରାଯାଇଛି । ଗାଁରେ ଥିବା ନଳକୂପର ପାଣିକୁ ପରୀକ୍ଷା ପାଇଁ ନିଆଯାଉଛି । ହେଲେ ରିପୋର୍ଟ ଦିଆଯାଉନି । ଫଳରେ କେଉଁ କାରଣରୁ ଗ୍ରାମବାସୀ କିଡନୀ ଜନିତ ରୋଗରେ ଆକ୍ରାନ୍ତ ହେଉଛନ୍ତି ତାହା ଜାଣି ପାରୁନାହାନ୍ତି । ଯଦି ସ୍ଵାସ୍ଥ୍ଯ ବିଭାଗ ପକ୍ଷରୁ ଏବେ ଠାରୁ ଦୃଷ୍ଟି ଦିଆ ନଯାଏ ତାହାଲେ ଆଗାମୀ ଦିନରେ ରୋଗୀ ସଂଖ୍ୟା ବଢିବା ସହ ମୃତ୍ଯୁ ସଂଖ୍ଯା ବଢିବା ସମ୍ଭାବନା ରହିଛି । ଏନେଇ କର୍ଲାମୁଣ୍ଡା ବିଡ଼ିଓଙ୍କୁ ପଚାରିବାରୁ ସେ ଫୋନ ଯୋଗେ କହିଛନ୍ତି, ମେଡିକାଲ ଟିମ ସେହି ଗାଁକୁ ଯାଇଥିଲେ ହେଲେ ପାଣି ଯୋଗୁଁ ଏଭଳି ହୋଇନାହିଁ ଅନ୍ୟ କାରଣ କିଛି ଅଛି ବୋଲି କହିଛନ୍ତି।
ଯୋଜନାରୁ ବଞ୍ଚିତ ଯୋଗ୍ୟ ହିତାଧିକାରୀ, ମିଳୁନି ବର୍ଦ୍ଧିତ ଭତ୍ତା କି ଆବାସ ଗୃହ
ସୁବର୍ଣ୍ଣପୁର : ଅସଜଡା, ଅବ୍ୟବସ୍ଥିତ ଜରି ପାଲ ଭିତରେ ପଡି ରହିଛନ୍ତି ଦମ୍ପତି । ଘରର ଅବସ୍ଥା ଏମିତି ସଂକଟାପନ୍ନ ଯେ କେତେବେଳେ କାନ୍ଥରୁ ମାଟି ଖସି ପଡିବ ଠିକଣା ନାହିଁ । ଘର ଭିତରୁ ଜଳଜଳ ହୋଇ ଦିଶୁଛି ଆକାଶ । ଏପରି ଘରେ ଜୀବନ ବିତାଉଛନ୍ତି ସୁବର୍ଣ୍ଣପୁର ଜିଲ୍ଲା ପାଳିଗାଁର ନକୁଳ ପ୍ରଧାନ ଏବଂ ତାଙ୍କ ସ୍ତ୍ରୀ ବେଦୀ ପ୍ରଧାନ । ଦୁଃଖ ଓ ପରିତାପର ବିଷୟ ଆଧାର କାର୍ଡ ଅନୁଯାୟୀ ନକୁଳଙ୍କୁ ୮୫ ବର୍ଷ ହୋଇଥିଲେ ସୁଦ୍ଧା ତାଙ୍କୁ ବର୍ଦ୍ଧିତ ଭତ୍ତା ୩୫ ଶହ ଟଙ୍କା ମିଳୁନାହିଁ । ଘର ଖଣ୍ଡେ ପାଇଁ ସେ ସମସ୍ତଙ୍କ ପାଖରେ ଗୁହାରି କରିସାରିଲେଣି । ହେଲେ କେହି କର୍ଣ୍ଣପାତ କରୁନାହାନ୍ତି । ଏପଟେ ଗରିବଙ୍କ ସରକାର କହି କେବଳ ବାହାସ୍ଫୋଟ ମାରୁଛନ୍ତି ନୂଆ ସରକାର ।
ସରକାରଙ୍କ ନିୟମ ଅନୁସାରେ ୮୦ ବର୍ଷରୁ ଉର୍ଦ୍ଧ୍ଵ ହିତାଧିକାରୀଙ୍କୁ ମିଳୁଛି ୩୫ ଶହ ଟଙ୍କା । କିନ୍ତୁ ନକୁଳ ଏବଂ ତାଙ୍କ ସ୍ତ୍ରୀଙ୍କୁ ୮୦ ବର୍ଷରୁ ଉର୍ଦ୍ଧ୍ଵ ହେଲେବି ମିଳୁନି ବର୍ଦ୍ଧିତ ଭତ୍ତା । ଆଜି ବି ହଜାରେ ଟଙ୍କା ଭତ୍ତାରେ ଦିନ କାଟୁଛନ୍ତି ଦୁଇ ପ୍ରାଣୀ । ଏହି ପରିବାରକୁ ଘର ଖଣ୍ଡେ ସହ ବର୍ଦ୍ଧିତ ଭତ୍ତା ପ୍ରଦାନ କରିବାକୁ ଦାବି କରିଛନ୍ତି ଗ୍ରାମବାସୀ । କେବଳ ଯେ ଏମାନେ ତା ନୁହେଁ, ଏମିତି ଆହୁରି ଅନେକ ବୃଦ୍ଧବୃଦ୍ଧା ବର୍ଦ୍ଧିତ ଭତ୍ତା ନପାଇ ହନ୍ତସନ୍ତ ହେଉଛନ୍ତି । ଅପରପକ୍ଷେ ଏବେ ଆବାସ ଗୃହ ପାଇଁ ସର୍ଭେ ଚାଲିଛି ବୋଲି କହି ଦୋଷ ଛଡାଇଛନ୍ତି ବୀରମହାରାଜପୁର ବିଧାୟକ । ବୃଦ୍ଧ ଦମ୍ପତିଙ୍କୁ କେବେ ବର୍ଦ୍ଧିତ ଭତ୍ତା ସହ ଆବାସ ଯୋଜନାରେ ଘର ଯୋଗାଇ ଦିଆଯାଉଛି ତାହା ଦେଖିବାକୁ ବାକି ରହିଲା ।
୩ ବର୍ଷ ହେଲା ସରିଲାନି କାମ, ପ୍ରଶାସନ ଓ ଠିକାଦାରଙ୍କ ମଧୂଚନ୍ଦ୍ରିକାରୁ ହନ୍ତସନ୍ତ ଲୋକେ
କଣ୍ଟାମାଳ : ୩ ବର୍ଷ ବିତିଲା । ନିର୍ମାଣ ଅବଧି ବି ସରିଲା । ଅଥଚ ସରିଲାନି କାମ । ନାଳ ଉପରେ ଅଧପନ୍ତରିଆ ଭାବେ ଠିଆ ହୋଇଛି ପୋଲ । ଏ ହେଉଛି ବୌଦ୍ଧ ଜିଲ୍ଲା ମନମୁଣ୍ଡା ଠାରୁ କଣ୍ଟାମାଳ ଦେଇ ଖୁଣ୍ଟିଗୋରାକୁ ସଂଯୋଗ କରୁଥିବା ମଲିକୁଦ ଠାରେ ଥିବା ଚିଚେଡ ନାଳ ଉପରେ ନିର୍ମାଣଧୀନ ପୋଲ । ଏହି ପୋଲ ପାଇଁ ପୂର୍ବ ସରକାରଙ୍କ ସମୟରେ କାର୍ଯ୍ଯାଦେଶ ହୋଇଥିଲା । ଚବିଶରେ ସରକାର ବଦଳିଲେ ସିନା ପୋଲ କାମ ସଂପୂର୍ଣ୍ଣ କିନ୍ତୁ ହୋଇ ପାରିଲାନାହିଁ । ଲୋକଙ୍କ ଗମନାଗମନ ପାଇଁ ଏକ ଡାଇଭର୍ସନ ରାସ୍ତା ନିର୍ମାଣ ହୋଇଛି ସତ କିନ୍ତୁ ତାହା ବି ବିପଦପୂର୍ଣ୍ଣ ଅବସ୍ଥାରେ । ଏହି ରାସ୍ତା ଦେଇ ପ୍ରତିଦିନ ଶହ ଶହ ଗାଡି ଯିବା ଆସିବା କରୁଥିବା ବେଳେ ବର୍ଷା ଦିନେ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।…
ପୋଲ ନିର୍ମାଣ ପାଇଁ ୭ କୋଟି ୮୬ ଲକ୍ଷ ଟଙ୍କା ବ୍ୟୟ ଅଟକଳ ହୋଇଥିଲା । ପୋଲ ନିର୍ମାଣ ଦାୟିତ୍ଵ ଶ୍ୟାମଜୀ କନଷ୍ଟ୍ରକସନ ପ୍ରାଇଭେଟ ଲିମିଟେଡ଼କୁ ଦିଆଯାଇଥିଲା । ହେଲେ ପ୍ରଶାସନିକ ଅବହେଳା ଓ ଠିକାଦାରଙ୍କ ମନମାନି ଯୋଗୁଁ ପୋଲ କାମ ଆଗେଇ ପାରୁନି । ଶୀଘ୍ର ପୋଲ କାର୍ଯ୍ଯ ସାରିବାକୁ ସାଧାରଣରେ ଦାବି ଜୋର ଧରିଛି । ଅନ୍ଯପଟେ କାମ ବିଳମ୍ୱକୁ ସ୍ୱୀକାର କରିବା ସହ ଏହି ବର୍ଷ ଶେଷ ସୁଦ୍ଧା କାମ ସରିବ ଓ ଲୋକେ ଯିବା ଆସିବା କରିବେ ବୋଲି କହିଛନ୍ତି କନିଷ୍ଠ ଯନ୍ତ୍ରୀ l ପୋଲ ନିର୍ମାଣ କାମ କେବେ ସରୁଛି, ଲୋକେ ତାର କେବେ ସୁବିଧା ପାଉଛନ୍ତି । ତାହା ଉପରେ ସମସ୍ତଙ୍କ ରହିଛି ନଜର ।
ସୁଆଁରି ଗାଁରେ ଝାଡାବାନ୍ତି ଆତଙ୍କ । ଜଣେ ମୃତ, ୧୫ ଆକ୍ରାନ୍ତ
ଚୌଦ୍ବାର : କଟକ ଟାଙ୍ଗୀ-ଚୌଦ୍ବାର ବ୍ଲକ ସୁଆଁରି ଗାଁରେ ଝାଡାବାନ୍ତି ଆତଙ୍କ । ୧୫ଜଣ ଝାଡ଼ାବାନ୍ତିରେ ଆକ୍ରାନ୍ତ ହେବା ସହିତ ଜଣଙ୍କର ମୃତ୍ୟୁ ହୋଇଛି । ମୃତକ ଜଣକ ହେଲେ ଉର୍ମିଳା ବଳ । ଏବେବି କିଛି ପୀଡିତ କଟକ ବଡ଼ ଡାକ୍ତରଖାନାରେ ଓ କିଛି ଘରୋଇ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ନିର୍ମଳ ଗଉଡ଼ ନାମକ ଜଣେ ୬୨ବର୍ଷୀୟ ବୃଦ୍ଧଙ୍କ ଅବସ୍ଥା ଗୁରୁତର ହୋଇଥିବା ସୂଚନା ମିଳିଛି । ଖବର ପାଇ ଟାଙ୍ଗୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସୁପରିଣ୍ଡେଣ୍ଟ ଡା.ମଧୁସ୍ମିତା ନାୟକ, ବ୍ଲକସ୍ୱାସ୍ଥ୍ୟ ଅଫିସର ଡାକ୍ତର ଜ୍ୟୋତି ପ୍ରକାଶ ସାହୁ, ଅତିରିକ୍ତ ବିଡ଼ିଓ ଶାଶ୍ବତ କୁମାର ଜେନା ଓ Rwss je ସ୍ଵର୍ଣ୍ଣମୟୀ ସାହୁ ପ୍ରମୁଖ ଗ୍ରାମ ପରିଦର୍ଶନ ପୂର୍ବକ ଜଳଉତ୍ସ ଗୁଡିକର ସ୍ଥିତି ଯାଞ୍ଚ କରିଛନ୍ତି । ସରପଞ୍ଚ ନିବାସ ଚନ୍ଦ୍ର ପାଣ୍ଡବଙ୍କ ସମେତ ସ୍ଥାନୀୟ ଆଶା ଏବଂ ଅଙ୍ଗନବାଡ଼ି କର୍ମୀ ସ୍ଥାନୀୟ ବାସିନ୍ଦାଙ୍କୁ ସ୍ବାସ୍ଥ୍ୟ ସଂକ୍ରାନ୍ତରେ ସଚେତନତା କରୁଥିବା ବେଳେ ପାଣି ଜନିତ ଏହି ରୋଗ ବ୍ୟାପୁଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି । ଏନେଇ ବ୍ଲକ ପକ୍ଷରୁ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଣ କରାଯାଉଥିବା ଦେଖିବାକୁ ମିଳିଛି । ଏହା କିପରି ଆଗକୁ ଅନ୍ୟ ଗାଁକୁ ନ ବ୍ୟାପିବ ଏନେଇ ପ୍ରଶାସନ ସଜାଗ ଥିବା ଅତିରିକ୍ତ ବିଡ଼ିଓ କହିଛନ୍ତି ।
ଭୁବନେଶ୍ଵରର କଳିଙ୍ଗନଗର ଅଞ୍ଚଳରେ ଅନେକ ଡାଇରିଆ ଆକ୍ରାନ୍ତ
ଭୁବନେଶ୍ୱର : ଭୁବନେଶ୍ୱର ଡାଇରିଆ ଆତଙ୍କ । କଳିଙ୍ଗ ନଗରର ଏକ ଆପାର୍ଟମେଣ୍ଟରେ ଆକ୍ରାନ୍ତ ସୂଚନା ପରେ ମେୟର ସୁଲୋଚନା ଦାସ, ଷ୍ଟାଣ୍ଡିଂଙ୍ଗ କମିଟି ଅଧ୍ୟକ୍ଷ, ସ୍ଥାନୀୟ କର୍ପୋରେଟର, ୱାଟକୋ, ସ୍ବାସ୍ଥ୍ଯ ଓ ଜେଡିସି ସମୀକ୍ଷା କରିଛନ୍ତି । ଦୂଷିତ ଜଳରୁ ବ୍ଯାପିଛି ଝାଡାବାନ୍ତି । ପିଇବା ପାଣି ପାଇପ ଲାଇନରେ ସ୍ବେରେଜ ପାଣି ଲିକ ହୋଇ ମିଶୁଥିବା ଜଣାପଡିଛି । ପାଣି ପରୀକ୍ଷା ପାଇଁ ସାମ୍ପଲ ପଠା ଯାଇଛି। ଏବେ ସୁଦ୍ଧା ୬୨ ଜଣ ଆକ୍ରାନ୍ତ ହୋଇ ବିଭିନ୍ନ ହସ୍ପିଟାଲରେ ଚିକିତ୍ସିତ ହେଉଛନ୍ତି । ବିଲଡର ଆପାର୍ଟମେଣ୍ଟକୁ ପିଇବା ପାଣି ସଂଯୋଗ କରି ନଥିବାରୁ ନୋଟିସ କରିଛି ବିଏମସି । ସେପଟେ ରାଜଧାନୀରେ ଝାଡ଼ାବାନ୍ତି ଆତଙ୍କ ପରେ ବିଏମସି ଖାଦ୍ଯ ସୁରକ୍ଷା ଟିମ ଚଢାଉ କରିଛି । ଖାଦ୍ଯ ନାଁରେ ହୋଟେଲରେ ଗ୍ରାହକଙ୍କ ଆଖିରେ ଆଙ୍ଗୁଠି ଗେଞ୍ଜି ବାସି ଖାଦ୍ଯ ଦିଆଯାଉଥିବା ଦେଖିବାକୁ ମିଳିଥିଲା । ସମ ହସ୍ପିଟାଲ ଛକ ଓ ପଟିଆ ଅଞ୍ଚଳର ଏକାଧିକ ହୋଟେଲ ଯାଞ୍ଚ ବେଳେ ଏହା ସାମ୍ନାକୁ ଆସିଛି । ବାସୀ ମଟନ, ସିଝା ଆଳୁ, ଅଟା, ଚାଉମିନି ଫ୍ରିଜରୁ ଜବତ କରି ନଷ୍ଟ କରିଛି ବିଏମସି । ଯାଞ୍ଚ ବେଳେ ଏକାଧିକ ହୋଟେଲରୁ ୧୦ ରୁ ହଜାରରୁ ଉର୍ଦ୍ଧ୍ଵ ଟଙ୍କା ଫାଇନ ଆଦାୟ କରାଯାଇଛି । ଆଗକୁ ନିୟମ ଉଲ୍ଲଂଘନ କଲେ ହୋଟେଲେ ସିଲ କରିବାକୁ ଚେତାବନୀ ଦେଇଛି ସ୍କ୍ବାଡ ।
ପାକିସ୍ତାନୀ ନାଗରିକ ବିରୋଧରେ କଡା ଆଭିମୁଖ୍ୟ ଗ୍ରହଣ କଲା ଇଡି
ନନ୍ଦିଘୋଷ ବ୍ୟୁରୋ : ପାକିସ୍ତାନୀ ନାଗରିକ ଆଜାଦ ମଲିକ ଓରଫ ମହମଦ ହୁସେନ ଆଜାଦ ବିରୋଧରେ ଇଡି କୋଲକାତା ପିଏମଏଳଏ କୋର୍ଟରେ ଚାର୍ଜସିଟ୍ ଦାଖଲ କରିଛି । କୋର୍ଟ ଅଭିଯୁକ୍ତଙ୍କୁ ନୋଟିସ ଜାରି କରି ଆଗାମୀ ତାରିଖ ସ୍ଥିର କରିଛନ୍ତି । ଇଡିର ଏହି ତଦନ୍ତ ପଶ୍ଚିମବଙ୍ଗ ପୋଲିସ ଦ୍ବାରା ବିଶେଷ ଅଧିନିୟମ ୧୯୪୬ର ଧାରା ୧୪ ଓ ୧୪ଏ ଆଧାରରରେ ମାମଲା ରୁ୍ଜୁ କରିଛି ।
୧୫ ଅପ୍ରିଲ ୨୦୨୫ରେ ହୋଇଥିବା ତଦନ୍ତ ବେଳେ ମଲିକ ଭାରତରେ ଅବୈଧ ଭାବେ ରହୁଥିବା ଜଣାପଡିଥିଲା । ମଲିକ ଭାରତରେ ଅବୈଧ ଭାବେ ରହିବା ସହ ଜାଲ ପାସପୋର୍ଟ ଓ ଜାଲ ଦସ୍ତାବିଜ ତିଆରି କରୁଥିବା ଗ୍ୟାଙ୍ଗର ମୁଖ୍ୟ ଥିଲା । ଏହାରି ମାଧ୍ୟମରେ ଟଙ୍କା ରୋଜଗାର କରୁଥିଲା । ମଲିକ ପାକିସ୍ତାନୀ ନାଗରିକ ହୋଇ ଭାରତରେ ଜାଲ ପ୍ରମାଣ ପତ୍ର ପ୍ରସ୍ତୁତ କରି ରହୁଥିଲା ।
ତାର ମୋବାଇଲରୁ ମିଳିଥିବା ୧୯୯୪ ମସିହାର ଡ୍ରାଇଭିଙ୍ଗ ଲାଇସେନ୍ସରୁ ଜଣାପଡିଲା ଯେ ତାର ନାମ ଆଜାନ ହୁସେନ ଓ ସେ ପାକିସ୍ତାନର ନାଗରିକ । ତାର ବପାଙ୍କ ନାମ ମୁମତାଜ ଉଲ ହୁକ । ତାର ଜନ୍ମ ତାରିଖ ୧୪ ଅଗଷ୍ଟ ୧୯୭୧ ବୋଲି ମଧ୍ୟ ସେଥିରୁ ଜଣାପହିଛି । ଏହି ଲାଇସେନ୍ସ ତାକୁ ପାକିସ୍ତାନର ହାଇଦ୍ରାବାଦରୁ ମିଳିଥିଲା । ତାର ନାଁକୁ ଲୁଚେଇବା ପାଇଁ ସେ ତାର ନାମ ଆଜାଦ ମଲିକ ରଖିଥିଲା । ସେହି ନାମରେ ଚାଲ ପ୍ରମାଣ ପତ୍ର ତିଆରି କରି ସେ ରହୁଥିଲା ।
ଇଡି ତଦନ୍ତ କରିବା ସମୟରେ ଜାଣିବାକୁ ପାଇଲା କି ସେ ବାଂଲାଦେଶ ଓ ଭାରତ ସୀମାରେ ତାର କାରବାର ଚଲାଉଥିଲା । ୟୁପିଆଇ ମାଧ୍ୟମରେ ଟଙ୍କା କାରବାର କରୁଥିଲା । Bkash ଭଳି ଏକ ପ୍ଲାଟଫର୍ମ ମାଧ୍ୟମରେ ବାଂଲାଦେଶରେ ଟଙ୍କା ଟ୍ରାନ୍ସଫର କରୁଥିଲା । ବାଂଲାଦେଶ ନାଗରିକ ବିଦେଶ ଯିବା ପାଇଁ ଭିସା ପ୍ରସ୍ତୁତ କରୁଥିଲା । ବାଂଲାଦେଶ ଟଙ୍କା, ଆମେରିକା ଡଲାର ଓ ଭାରତୀୟ ମୁଦ୍ରା ମାଧ୍ୟମରେ ଟଙ୍କା ନେଣଦେଣ କରୁଥିଲା । ଅପରାଧୀକୁ ନ୍ୟାୟିକ ହେପାଜତକୁ ନିଆଯାଇଛି । ତା’ର ବିରୋଧରେ ତଦନ୍ତ ଏବେ ବି ଜାରି ରହିଛି ।
ରାଜାଙ୍କୁ ବଳି ଦିଆଯାଇଥିଲା କି ? ଭାଇର ଦାବି, ସୋନମ ତନ୍ତ୍ର ଶକ୍ତି ସହିତ ଫେରି ଆସିଥିଲେ
ନନ୍ଦିଘୋଷ ବ୍ୟୁରୋ : ଇନ୍ଦୋର ରାଜା ରଘୁବଂଶୀ ହତ୍ୟା ମାମଲାରେ ଏକ ନୂଆ ମୋଡ ଆସିଛି । ଏନେ ତାଙ୍କ ପରିବାର ଏହି ଘଟଣାକୁ ନେଇ ନରବଳି କିମ୍ବା ତନ୍ତ୍ର-ମନ୍ତ୍ର ହୋଇଥାଇପାରେ ବୋଲି ଆଶଙ୍କା କରୁଛନ୍ତି । ରାଜା ରଘୁବଂଶୀର ଭାଇ ସଚିନ ରଘୁବଂଶୀ କହିଛନ୍ତି, ସୋନମଙ୍କ ପରିବାର ଲୋକ ତନ୍ତ୍ର-ମନ୍ତ୍ର ଉପରେ ବିଶ୍ବାସ କରନ୍ତି । ତେଣୁ ରାଜା ରଘୁବଂଶୀଙ୍କ ହତ୍ୟା ଏହି କାରଣରୁ ହୋଇଥାଏ ପାରେ ବୋଲି ସନ୍ଦେହ କରିଛନ୍ତି । କିଛି ପୁରୁଣା ଘଟଣାକୁ ନେଇ ସଚିନ କହିଛନ୍ତି । ଯେତେବେଳେ ସୋନମ ନିଖୋଜ ଥିଲେ । ସେତେବେଳେ ତାଙ୍କ ପରିବାର ଲୋକ ତନ୍ତ୍ର-ମନ୍ତ୍ର ସାହାରା ନେଇ ତାଙ୍କ ଫଟୋ ଓଲଟା ଟାଙ୍ଗିଥିଲେ । ଏମିତି କରିବା ଫଳରେ ସୋମନ ଫେରି ଆସିଥିଲେ । ଯାହ ଦ୍ବାରା ତାଙ୍କ ମନରେ ତନ୍ତ୍ର-ମନ୍ତ୍ରର ବିଶ୍ବାସ ରହିଛି ।
ସଚିନ ରଘୁବଂଶୀ କହିଛନ୍ତି, ଯେତେବେଳେ ରାଜାଙ୍କ ମୃତଦେହକୁ ଇନ୍ଦୋର ଅଣାଯାଇଥିଲା, ସୋନମଙ୍କ ବାପାଙ୍କ ଆଚରଣ ବହୁତ ଅସାଧାରଣ ଥିଲା। ପ୍ରଥମେ ସେ ଶାନ୍ତ ଓ ନିଷ୍କ୍ରିୟ ଥିଲେ, କୌଣସି ବିଶେଷ ପ୍ରତିକ୍ରିୟା ଦେଖାଇ ନଥିଲେ। ତଥାପି, ରାଜାଙ୍କ ମୃତ୍ୟୁ ମାମଲାରେ ସୋନମଙ୍କୁ ଅଭିଯୁକ୍ତ କରାଯିବା ମାତ୍ରେ, ବାପା ଦେବୀ ସିଂହ ଗଣମାଧ୍ୟମ ପ୍ରତିନିଧିଙ୍କ ସହ ଝଗଡ଼ା କରିବା ଆରମ୍ଭ କଲେ। ସଚିନ କୁହନ୍ତି ଯେ ଏହି ହଠାତ୍ ପରିବର୍ତ୍ତନ ଓ ଆକ୍ରମଣାତ୍ମକ ଆଚରଣ ଅନେକ ଜିନିଷକୁ ଇଙ୍ଗିତ କରେ, ଯାହା ତାଙ୍କୁ ତନ୍ତ୍ର-ମନ୍ତ୍ର ପ୍ରତି ସନ୍ଦେହ ପ୍ରକାଶ କରିବାକୁ ବାଧ୍ୟ କରେ। ଏହି ସମ୍ପୂର୍ଣ୍ଣ ମାମଲାର ସତ୍ୟ ଉନ୍ମୋଚନ ପାଇଁ ସଚିନ ରଘୁବଂଶୀ ଅଭିଯୁକ୍ତଙ୍କ ନାର୍କୋ ଟେଷ୍ଟ ଦାବି କରିଛନ୍ତି। ସୋନମଙ୍କ ଭାଇ ଗୋବିନ୍ଦ ମଧ୍ୟ ନାର୍କୋ ଟେଷ୍ଟ ଦାବି କରିଛନ୍ତି।
ଗୋବିନ୍ଦ କହିଛନ୍ତି ଯେ ଶିଲଂ ପୋଲିସ ମୋତେ ଡାକିଛି, ମୁଁ କିଛି ଦିନ ମଧ୍ୟରେ ଯିବି। ଯଦି ଆମେ ରାଜ ଓ ସୋନମଙ୍କ ବିଷୟରେ କିଛି ଜାଣିଥାନ୍ତୁ, ତେବେ ଆମେ ପରିବାର ସହିତ ବସି କଥା ହୋଇଥାନ୍ତୁ। ସବୁଠି ଜାତି ବିଷୟରେ ଏକ ପ୍ରସଙ୍ଗ ଅଛି, କିନ୍ତୁ ପ୍ରେମ ବିବାହ ଅପରାଧ ନୁହେଁ। ଯଦି ଆମେ ଜାଣିଥାନ୍ତୁ, ତେବେ ଆମେ ନିଶ୍ଚିତ ଭାବରେ ଏହା ବିଷୟରେ ଚିନ୍ତା କରିଥାନ୍ତୁ। ଆମେ ସୋନମଙ୍କ ଆକାଉଣ୍ଟ ଯାଞ୍ଚ କରିଛୁ, ଆମେ ସେଥିରେ ଥିବା ଟଙ୍କା ପାଇଛୁ।
ଗୋବିନ୍ଦ କହିଥିଲେ ଯେ ସୋନମ ରାଜାଙ୍କୁ ବିବାହ କରିବାକୁ ସହଜରେ ରାଜି ହୋଇଯାଇଥିଲେ, ଆମେ ଉଭୟଙ୍କ ମଧ୍ୟରେ ଏକ ସାକ୍ଷାତ ମଧ୍ୟ ଆୟୋଜନ କରିଥିଲୁ। ଗୋବିନ୍ଦଙ୍କ ଅନୁସାରେ, ଏପର୍ଯ୍ୟନ୍ତ ରାଜଙ୍କ ପରିବାର ସହିତ କୌଣସି ସାକ୍ଷାତ ହୋଇନାହିଁ। ବିବାହ ପରେ ମୁଁ ନିଜେ ସୋନମଙ୍କ ପାସପୋର୍ଟ କରିବାକୁ ଯାଉଥିଲି। ସୋନମ ଏବଂ ରାଜାଙ୍କର ବିବାହ ୧୧ ମଇରେ ହୋଇଥିଲା। ବିବାହ ପରେ, ଦୁହେଁ ହନିମୁନ ପାଇଁ ସିଲଂ ଯାଇଥିଲେ, ଯେଉଁଠାରେ ରାଜାଙ୍କୁ ହତ୍ୟା କରାଯାଇଥିଲା। ସୋନମ ଓ ତାଙ୍କ ପ୍ରେମିକଙ୍କ ଉପରେ ହତ୍ୟା ଅଭିଯୋଗ ଆସିଛି।
କେନାଲରୁ ମିଳିଲା ମଡେଲଙ୍କ ମୃତଦେହ, କଟା ଯାଇଛି ଗଳା
ନନ୍ଦିଘୋଷ ବ୍ୟୁରୋ: କେନାଲରେ ମିଳିଲା ହରିୟାଣାର ଜଣେ ମଡେଲଙ୍କ ମୃତଦେହ । ହରିୟାଣାର ସୋନିପତର ଖାରଖୋଡା ଅଞ୍ଚଳରେ ସଙ୍ଗୀତ ଜଗତର ମଡେଲ ଶୀତଲଙ୍କୁ କେହି ନିର୍ମମ ଭାବରେ ହତ୍ୟା କରିଛନ୍ତି। ରିପୋର୍ଟ ଅନୁସାରେ, ତାଙ୍କ ଗଳା କାଟି ହତ୍ୟା କରାଯାଇ ମୃତଦେହ ଖଣ୍ଡା ଗାଁ ନିକଟ ରିଲାଏନ୍ସ କେନାଲ ନିକଟରେ ପକାଇ ଦିଆଯାଇଛି ।
ଶୀତଲଙ୍କୁ ତାଙ୍କ ପରିବାର ପକ୍ଷରୁ ନିଖୋଜ ହୋଇଥିବା ରିପୋର୍ଟ କରାଯାଇଥିଲା। ପାନିପତ ପୋଲିସ ଏକ ନିଖୋଜ ରିପୋର୍ଟ ପଞ୍ଜିକୃତ କରିଥିଲା। ଗତକାଲି ବିଳମ୍ବିତ ରାତିରେ ସୋନିପତ ପୋଲିସ ମୃତଦେହକୁ ଜବତ କରି ପୋଷ୍ଟମର୍ଟମ ପାଇଁ ସିଭିଲ ହସ୍ପିଟାଲକୁ ପଠାଇଛି।
ସୋନିପତ ପୋଲିସ ଏହି ହତ୍ୟାକାଣ୍ଡର ପୁଙ୍ଖାନୁପୁଙ୍ଖ ତଦନ୍ତ ଆରମ୍ଭ କରିଛି। ବର୍ତ୍ତମାନ ପର୍ଯ୍ୟନ୍ତ କୌଣସି ଗିରଫଦାରୀ ହୋଇନାହିଁ, ଏବଂ ପୋଲିସ ଏହି ଘୃଣ୍ୟ ଅପରାଧ ପଛରେ ଥିବା ଅପରାଧୀଙ୍କୁ ଚିହ୍ନଟ କରିବା ପାଇଁ କାମ କରୁଛି।
ଶୀତଲ, ଯାହାଙ୍କୁ ସିମ୍ମି ନାମରେ ମଧ୍ୟ ଜଣାଯାଉଥିଲା, ସେ ପାନିପତର ବାସିନ୍ଦା ଥିଲେ। ଶୀତଲ ଆହାର ଗାଁରେ ଏକ ହରିୟାଣଭି ଆଲବମ୍ ସୁଟିଂରୁ ଘରକୁ ନ ଫେରିବା ପରେ ତାଙ୍କ ଭଉଣୀ ଜୁନ୍ ୧୪ ତାରିଖରେ ନିଖୋଜ ବ୍ୟକ୍ତିଙ୍କ ରିପୋର୍ଟ ଦାଖଲ କରିଥିଲେ।
ପୋଲିସ ସୂତ୍ର ଅନୁଯାୟୀ, ଶୀତଲ ଦୁଇ ଦିନ ପୂର୍ବରୁ ସୁନିଲ ନାମକ ଜଣେ ପୁରୁଷ ସାଥୀଙ୍କ ସହିତ ଏକ କାରରେ ବାହାରିଥିଲେ। ସନ୍ଦେହଜନକ ପରିସ୍ଥିତିରେ ଗାଡ଼ିଟି କେନାଲରେ ପଡ଼ିଥିବା ଜଣାପଡ଼ିଛି। ସୁନିଲଙ୍କୁ ଉଦ୍ଧାର କରାଯାଇ ବର୍ତ୍ତମାନ ପାଣିପତର ଏକ ଘରୋଇ ହସ୍ପିଟାଲରେ ଚିକିତ୍ସା କରାଯାଉଛି, କିନ୍ତୁ ଗାଡ଼ିର ପୁନରୁଦ୍ଧାର କାର୍ଯ୍ୟ ସମୟରେ ଶୀତଲଙ୍କ ମୃତଦେହ ଉଦ୍ଧାର କରାଯାଇଥିଲା।
ସୋନିପତ ଏବଂ ପାନିପତ ପୋଲିସ ଏବେ ମିଳିତ ତଦନ୍ତ କରୁଛନ୍ତି। ଶରୀରରେ ଆଘାତ ଚିହ୍ନ ଅଛି ବୋଲି ଡିଏସପି ରାଜବୀର ସିଂହ କହିଛନ୍ତି।
ଏହି ସମୟରେ, ଶୀତଲଙ୍କ ପରିବାର ତାଙ୍କସହ ଦୁର୍ବ୍ୟବହାର ହୋଇଥିବା ଅଭିଯୋଗ ଆଣିଛନ୍ତି ତାଙ୍କର ବୁଡ଼ିବା ଯୋଗୁ ନୁହେଁ ବରଂ ତାଙ୍କୁ ହତ୍ୟା କରାଯାଇଛି ବୋଲି ପରିବାର ଲୋକେ ଅଭିଯୋଗ କରିଛନ୍ତି ।
ବଡ଼ଭାଇକୁ ଡାକ୍ତର କରିବାକୁ ସାନ ଭାଇ ହୋଇଥିଲା ମୁଲିଆ !
ନନ୍ଦିଘୋଷ ବ୍ୟୁରୋ: କୁହାଯାଏ ପରିସ୍ଥିତି ଯାହା ହେଉନା କାହିଁକି, ଯଦି ମନୋବଳ ଉଚ୍ଚ ଥାଏ, ତେବେ ଜଣେ ନିଶ୍ଚିତ ଭାବରେ ଲକ୍ଷ୍ୟ ହାସଲ କରିପାରିବ। ବାପା ଜଣେ ଆଜମା ରୋଗୀ, ମାଆ ମାନସିକ ରୋଗୀ ଏବଂ ଘରର ଆର୍ଥିକ ଅବସ୍ଥା ବହୁତ ଖରାପ… ଏପରି ପରିସ୍ଥିତିରେ ମଧ୍ୟ, ତେଜେନ୍ଦ୍ର ହାର ମାନି ନଥିଲେ। ସାନ ଭାଇ ଶ୍ରମିକ ଭାବରେ କାମ କରି ତାଙ୍କୁ ପାଠ ପଢ଼ାଉଥିଲେ ଏବଂ ଏବେ ତେଜେନ୍ଦ୍ର NEET ରେ ମନୋନୀତ ହେବା ପରେ ଜଣେ ଡାକ୍ତର ହୋଇଛନ୍ତି। ତେଜେନ୍ଦ୍ର NEET ରେ 73788 ତମ ଏବଂ SC ବର୍ଗରେ 2202 ତମ ସ୍ଥାନ ହାସଲ କରିଛନ୍ତି।
ତେଜେନ୍ଦ୍ରଙ୍କ ଘରର ଅବସ୍ଥା ଏତେ ଖରାପ ଯେ ଦିନକୁ ଦୁଇଥର ଖାଇବା ମଧ୍ୟ କଷ୍ଟକର ଥିଲା। କିନ୍ତୁ ବାରମେର ଜିଲ୍ଲାର ବାୟତୁ ପାଞ୍ଜିର ପୁରୁଣା ଗାଁର ତେଜେନ୍ଦ୍ର କୁମାର ମେଘୱାଲଙ୍କ ସ୍ୱପ୍ନ ଥିଲା ଏବଂ ତାଙ୍କର ମନୋବଳ ମଧ୍ୟ ଦୃଢ଼ ଥିଲା। ଏପରି ପରିସ୍ଥିତିରେ, ସାନ ଭାଇ ଶ୍ରମିକ ଭାବରେ କାମ କରୁଥିଲା ଏବଂ ନିଜେ ଭୋକିଲା ରହୁଥିଲା, କିନ୍ତୁ ବଡ଼ ଭାଇ ତେଜେନ୍ଦ୍ରଙ୍କ ପାଠପଢ଼ାକୁ ବନ୍ଦ ହେବାକୁ ଦେଇ ନଥିଲେ ଏବଂ ତେଜେନ୍ଦ୍ର ପ୍ରଥମ ପ୍ରୟାସରେ NEET ରେ ମନୋନୀତ ହୋଇ ପ୍ରମାଣିତ କଲେ ଯେ କୁଡ଼ିଆରୁ ମଧ୍ୟ ସ୍ୱପ୍ନ ପୂରଣ କରାଯାଇପାରିବ।
ପୁରୁଣା ଗାଁ ବାୟତୁ ପାଞ୍ଜିମର ବାସିନ୍ଦା ଶେରାରାମ ଗତ ୧୦ ବର୍ଷ ଧରି ଶ୍ୱାସରୋଗରେ ପୀଡିତ ଥିବା ବେଳେ ତାଙ୍କ ସ୍ତ୍ରୀ ୨୨ ବର୍ଷ ଧରି ମାନସିକ ରୋଗୀ ଅଛନ୍ତି। ଏହା ସତ୍ତ୍ୱେ, ଶେରାରାମଙ୍କ ସାନ ପୁଅ କେବଳ ଶ୍ରମିକ ଭାବରେ କାମ କରି ପରିବାରର ଯତ୍ନ ନେଉନଥିଲେ ବରଂ ତାଙ୍କ ବଡ଼ ଭାଇ ତେଜେନ୍ଦ୍ର କୁମାରଙ୍କୁ ଡାକ୍ତର ମଧ୍ୟ କରିଥିଲେ। ତେଜେନ୍ଦ୍ର ତାଙ୍କର ପ୍ରାଥମିକ ଶିକ୍ଷା ଗ୍ରାମ ସରକାରୀ ସ୍କୁଲରୁ ପାଇଥିଲେ ଏବଂ ଦଶମ ଶ୍ରେଣୀରେ ୮୨.୩୩% ନମ୍ବର ପାଇଥିଲେ ଏବଂ ତା’ପରେ ଡାକ୍ତର ହେବାର ସ୍ୱପ୍ନ ଦେଖିଥିଲେ।
ପରିବାରର ଆର୍ଥିକ ଅବସ୍ଥା ଖରାପ ଥିବାରୁ ପୁସ୍ତକ କିଣିବା କିମ୍ବା କୋଚିଂ ପାଇଁ ଟଙ୍କା ନଥିଲା। ୫୦ ଜଣ ଗାଁ ଲୋକଙ୍କ ମଧ୍ୟରୁ ମନୋନୀତ ହେବା ପରେ, ତେଜେନ୍ଦ୍ର କଠିନ ପରିଶ୍ରମ କରିଥିଲେ ଏବଂ ପ୍ରଥମ ପ୍ରୟାସରେ NEET ରେ ମନୋନୀତ ହୋଇଥିଲେ। ତେଜେନ୍ଦ୍ର ୭୨୦ ରୁ ୪୮୩ ନମ୍ବର ପାଇଛନ୍ତି। ସେ ସର୍ବଭାରତୀୟ ସ୍ତରରେ ୭୩୭୮୮ ତମ ଏବଂ SC ବର୍ଗରେ ୨୨୦୨ ତମ ସ୍ଥାନ ପାଇଛନ୍ତି।
କେବଳ ଏତିକି ନୁହେଁ, ତେଜେନ୍ଦ୍ର ଛୁଟି ସମୟରେ ତାଙ୍କ ସାନ ଭାଇ ସହିତ ଶ୍ରମିକ ଭାବରେ କାମ କରିବାକୁ ଯାଉଥିଲେ। ତେଜେନ୍ଦ୍ର କୁହନ୍ତି ଯେ ୫୦ ଜଣ ଗାଁ ଲୋକ ତାଙ୍କର ଡାକ୍ତର ହେବାର ସ୍ୱପ୍ନକୁ ସାକାର କରିଛନ୍ତି। ତାଙ୍କ ବାପା ଜଣେ ଶ୍ୱାସରୋଗୀ ଏବଂ ତାଙ୍କ ମାଆ ମାନସିକ ରୋଗୀ। ଏପରି ପରିସ୍ଥିତିରେ, ସେ କେବଳ ଡାକ୍ତର ହୋଇ ଗାଁର ଲୋକଙ୍କ ସେବା କରିବାର ସ୍ୱପ୍ନକୁ ପୂରଣ କରିନାହାଁନ୍ତି, ବରଂ ଲୋକଙ୍କ ପାଇଁ ପ୍ରେରଣା ମଧ୍ୟ ହୋଇଛନ୍ତି। ତେଜେନ୍ଦ୍ର ପ୍ରମାଣ କରିଛନ୍ତି ଯେ ବଡ଼ ସ୍ୱପ୍ନ କେବଳ ମହଲଗୁଡ଼ିକରେ ନୁହେଁ, ବରଂ କୁଡ଼ିଆରେ ମଧ୍ୟ ସତ କରାଯାଇପାରେ ।