ନନ୍ଦିଘୋଷ ବ୍ୟୁରୋ : ପାକିସ୍ତାନ ସେନାର ସ୍ପେଶାଲ୍ ସର୍ଭିସ୍ ଗ୍ରୁପ୍ର ଜଣେ ବରିଷ୍ଠ ଅଧିକାରୀଙ୍କ ହତ୍ୟା ଖବର ଆସିଛି। ଅଧିକାରୀଙ୍କ ନାମ ମେଜର ମୁଇଜ୍। ଦକ୍ଷିଣ ୱାଜିରିସ୍ତାନରେ ତେହେରିକ-ଏ-ତାଲିବାନ୍ ପାକିସ୍ତାନର ଆତଙ୍କବାଦୀମାନେ ତାଙ୍କୁ ହତ୍ୟା କରିଛନ୍ତି। ମେଜର ମୁଇଜ୍ଙ୍କ ହତ୍ୟା ପାକିସ୍ତାନ ସେନା ପାଇଁ ଏକ ବଡ଼ ଧକ୍କା। ମେଜର ମୁଇଜ୍ ଷଷ୍ଠ କମାଣ୍ଡୋ ବାଟାଲିୟନରେ ନିୟୋଜିତ ଥିଲେ। ସରଗୋଗା ନିକଟରେ ଆମ୍ବୁସରେ ପଡ଼ି ରହିଥିବା ଆତଙ୍କବାଦୀମାନେ ମୁଇଜ୍ ଉପରେ ଆକ୍ରମଣ କରିଥିଲେ। ଆକ୍ରମଣ ସମୟରେ ମୁଇଜଙ୍କ ମୃତ୍ୟୁ ହୋଇଥିଲା। ମେଜର ମୁଇଜ୍ ବ୍ୟତୀତ ଆତଙ୍କବାଦୀମାନେ ପାକିସ୍ତାନ ସେନାର ଲାନ୍ସ ନାୟକ ଜିବ୍ରାନୁଲ୍ଲାହଙ୍କୁ ମଧ୍ୟ ହତ୍ୟା କରିଥିଲେ।
୨୦୧୯ ମସିହାରେ ପାକିସ୍ତାନ ବିରୁଦ୍ଧରେ ଭାରତର ଅପରେସନ ସମୟରେ ମୁଇଜ୍ ଚର୍ଚ୍ଚାକୁ ଆସିଥିଲେ। ସେହି ସମୟରେ ମୁଇଜ୍ ଭାରତର ୱିଙ୍ଗ କମାଣ୍ଡର ଅଭିନନ୍ଦନଙ୍କୁ ବନ୍ଦୀ କରିଥିବା ଦାବି କରିଥିଲେ। ମେଜର ମୁଇଜ୍ ମୂଳତଃ ପାକିସ୍ତାନର ଚକୱାଲର ବାସିନ୍ଦା ଥିଲେ।
ପାକିସ୍ତାନ ସେନାର ସୂଚନା ଅନୁଯାୟୀ, ବିଶ୍ୱସ୍ତ ଗୁପ୍ତ ସୂଚନା ଆଧାରରେ, ଉଭୟ ଅଧିକାରୀ ଅପରେସନ ପାଇଁ ସରଗୋଗାରେ ପହଞ୍ଚିଥିଲେ। ସେଠାରେ ପହଞ୍ଚିବା ମାତ୍ରେ ଟିଟିପିର ଆତଙ୍କବାଦୀମାନେ ସେମାନଙ୍କୁ ହତ୍ୟା କରିଥିଲେ। ପାକିସ୍ତାନ ସେନା କହିଛି ଯେ ଏହି ଅଞ୍ଚଳରେ ଏକ ଅପରେସନରେ 11 ଜଣ ଆତଙ୍କବାଦୀଙ୍କୁ ନିହତ କରାଯାଇଛି। ତଥାପି, ଆତଙ୍କବାଦୀମାନେ ଯେଭଳି ଭାବରେ ମେଜର ମୁଇଜଙ୍କୁ ହତ୍ୟା କଲେ ତାହା ପାକିସ୍ତାନ ସେନା ପାଇଁ ଏକ ବଡ଼ ଆଘାତ। ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀ ଏବଂ ପ୍ରଧାନମନ୍ତ୍ରୀ ଶାହବାଜ ସରିଫ ମୁଇଜଙ୍କ ହତ୍ୟା ଉପରେ ଦୁଃଖ ପ୍ରକାଶ କରିଛନ୍ତି।
