ରାଜ୍ୟରେ ବେଆଇନ ଗୋରୁ ଚାଲାଣ ବଢିଛି । ବାଲେଶ୍ଵର ଜିଲ୍ଲା ୧୬ ନମ୍ୱର ଜାତୀୟ ରାଜପଥ ଖନ୍ତାପଡାରେ ୮ଟି ଗୋରୁ ବୁଝେଇ ଟ୍ରକ ଜବତ ହୋଇଛି । ପୋଲିସ୍ ୧୧ ଜଣଙ୍କୁ ଅଟକ ରଖିଛି ପଚରା ଉଚରା କରୁଛି । ଏହି ରାସ୍ତା ପ୍ରତିଦିନ ଶହଶହ ଗୋରୁ ବୋଝେଇ ଗାଡି ଯାତାୟାତ କରୁଥିବା ନେଇ ଆଗରୁ ଆଭିଯୋଗ ହୋଇ ଆସୁଥିଲା ।
ଖନ୍ତାପଡା ଆଇଆଇସି ସଂଜୟ କୁମାର ପରିଡାଙ୍କ ନେତୃତ୍ୱରେ ଏକ ଟିମ ପାଟ୍ରୋଲିଂ କରିଥିଲା । ଏହି ସମୟରେ ୮ଟି ଗାଡି ଜବତ ହୋଇଛି । ଗାଡ଼ି ଭିତରୁ ୮0ରୁ ଅଧିକ ଗୋରୁଙ୍କୁ ଉଦ୍ଧାର କରାଯାଇଛି । ତେବେ ଗୋଚାଲାଣ ନେଇ ପୋଲିସ ସବିଶେଷ ତଥ୍ୟ ସଂଗ୍ରହ କରୁଛି ।
ଗାନ୍ଧିନଗର: ଦେଶରେ କରୋନା ଭାଇରସ ବ୍ୟାପିବାରେ ଲାଗୁଛି । ପ୍ରତ୍ୟେକ ଦିନ କରୋନା ଭାଇରସର ନୂଆ ନୂଆ ମାମଲା ସାମ୍ନାକୁ ଆସୁଛି । ଅନ୍ୟପଟେ କରୋନା ଭାଇରସ ପାଇଁ ବିଭିନ୍ନ ରାଜ୍ୟରେ ଲକଡାଉନ ଓ ସଟଡାଉନ୍ ଲାଗି ରହିଛି । ଏବଂ ଏଥିପାଇଁ ସ୍କୁଲ ମଧ୍ୟ ସବୁ ବନ୍ଦ ରହିଛି । ଏଭଳି ପରିସ୍ଥିତିରେ ଗୁଜୁରାଟ ହାଇକୋର୍ଟଙ୍କ ନିର୍ଦ୍ଦେଶ ପରେ ଗୁଜୁରାଟ ସରକାର ବଡ଼ ନିଷ୍ପତ୍ତି ନେଇ ଅଭିଭାବକଙ୍କୁ ସ୍କୁଲ ଫିସ୍ ନଦେବାକୁ ନିର୍ଦ୍ଦେଶ ଦେଇଛନ୍ତି ।
ଗୁଜୁରାଟ ସରକାର ବିଜ୍ଞପ୍ତି ଜାରି କରି ଅଭିଭାବକମାନଙ୍କୁ ଏହି ଖୁସି ଖବର ଦେଇଛନ୍ତି । ଗୁଜୁରାଟ ସରକାରଙ୍କ ବିଜ୍ଞପ୍ତି ଅନୁସାରେ ଯେବେ ପର୍ଯ୍ୟନ୍ତ ସ୍କୁଲ ଖୋଲିନାହିଁ ସେ ପର୍ଯ୍ୟନ୍ତ ସ୍କୁଲ୍ ଫିସ୍ ଦେବେ ନାହିଁ ଅଭିଭାବକ । ଅନ୍ୟପଟେ ଯଦି ସ୍କୁଲ ତରଫରୁ ଫିସ୍ ପାଇଁ ଦାବି କରାଯାଏ ତେବେ ଶିକ୍ଷା ଅଧିକାରୀ ତାଙ୍କ ଉପରେ ଆକ୍ସନ ନେବେ ।
ବିଜ୍ଞପ୍ତିରେ କୁହାଯାଇଛି ଯେ ଯେଉଁ ଅଭିଭାବକମାନେ ପିଲାମାନଙ୍କର ସ୍କୁଲ ଫିସ୍ ଜମା କରିଛନ୍ତି, ସେମାନେ ସ୍କୁଲ ଖୋଲିବା ପରେ ସେମାନଙ୍କୁ ଫିସ୍ ଫେରସ୍ତ କରାଯାଉ କିମ୍ବା ସେହି ଫିକୁ ଆସନ୍ତା ମାସରେ ଚଢାଯାଉ । ତେବେ ଗୁଜୁରାଟ ସରକାରଙ୍କ ଏହି ନିଷ୍ପତ୍ତିକୁ ବିରୋଧ କରି ଗୁଜୁରାଟର ଘରୋଇ ବିଦ୍ୟାଳୟଗୁଡ଼ିକ ପ୍ରତିବାଦ କରିଛନ୍ତି । ଗୁଜୁରାଟର ଘରୋଇ ସ୍କୁଲ ମଣ୍ଡଳ ବର୍ତ୍ତମାନଠାରୁ ଅନଲାଇନ୍ କ୍ଲାସ୍ ଦେବାକୁ ମନା କରିଦେଇଛି ।
ପ୍ରକୃତ ଘଟଣା କଣ?
ଆପଣଙ୍କୁ କହି ରଖୁଛୁ ଯେ, କରୋନା ପାଇଁ ଯୋଗୁଁ ସ୍କୁଲଗୁଡ଼ିକ ବର୍ତ୍ତମାନ ବନ୍ଦ ରହିଛି । ଏଭଳି ପରିସ୍ଥିତିରେ, ବିଦ୍ୟାଳୟ ଆରମ୍ଭ ନହେବା ସତ୍ତ୍ୱେ ଅନେକ ସ୍କୁଲ ଅଭିଭାବକଙ୍କଠାରୁ ଶୁଳ୍କ ଆଦାୟ କରୁଥିଲେ। ଏହି ମାମଲାରେ ପିଆଇଏଲ ଦାଖଲ କରାଯାଇଥିଲା। ପିଆଇଏଲ ପରେ ଗୁଜୁରାଟ ହାଇକୋର୍ଟଙ୍କୁ ଗୁଜୁରାଟ ସରକାର ନିର୍ଦ୍ଦେଶ ଦେଇଛନ୍ତି । ଏହା ପରେ ଗୁଜୁରାଟ ସରକାର ଏ ବାବଦରେ ବିଜ୍ଞପ୍ତି ଜାରି କରିଛନ୍ତି।
କରୋନା ସଂକ୍ରମଣ ଜିଲ୍ଲାରେ ସକ୍ରିୟ ହେବା ପରେ ରାୟଗଡା ଜିଲ୍ଲା ସପ୍ତାହେ ପାଇଁ ସଟଡାଉନ ହୋଇଛି । ଆଜିଠୁ ୭ଦିନ ରାୟଗଡ଼ା ଜିଲ୍ଲା ବନ୍ଦ ରହିବ । ଜିଲ୍ଲାରୁ ୯୬ଜଣ କରୋନା ପଜିଟିଭ୍ ଚିହ୍ନଟ ହୋଇ ସାରିଲେଣି । ତେବେ ସଟଡାଉନ୍ ନିୟମାବଳୀ ନେଇ ଜିଲ୍ଲା ପ୍ରଶାସନ ଘୋଷଣା ମଧ୍ୟ କରିଛି । ଏହି ସାତ ଦିନିଆ ବନ୍ଦରେ ସମସ୍ତ ସହରରେ ଦୋକାନ ବଜାର ବନ୍ଦ ରହିବ ।
କେବଳ ପେଟ୍ରୋଲ୍ ପମ୍ପ ଖୋଲା ରହିବା ସହ ଜରୁରୀ ସେବା ଜାରି ରହିବ । ଔଷଧ ଦୋକାନ୍, ମେଡିକାଲ ଖୋଲା ରହିବ। ଅତି ଜରୁରୀ ନଥିଲେ ଘରୁ ବାହାରିବାକୁ ବାରଣ କରିଛି ପ୍ରଶାସନ । ପ୍ରତି ଛକରେ ପୋଲିସ ପକ୍ଷରୁ ଚେକିଂ କଡାକଡି କରାଯାଉଛି । ସେହିଭଳି ନିର୍ଦ୍ଦେଶନାମାକୁ ବେଖାତିର କରି ଅଯଥା ବାହାରେ ବୁଲିବାର ଦେଖିବାକୁ ମିଳିଲେ ପ୍ରଶାସନ କଡା କାର୍ଯ୍ୟାନୁଷ୍ଠାନ ନେବ ବୋଲି ପ୍ରଶାସନ ପକ୍ଷରୁ ଜଣାଇ ଦିଆଯାଇଛି ।
ଭୁବନେଶ୍ୱର ଓ ବ୍ରହ୍ମପୁର ପରେ ରାଉଲକେଲା ଆଇଜିଏଚରେ ମିଳିବ ପ୍ଲାଜମା । ପଶ୍ଚିମ ଓଡ଼ିଶାର ଗୁରୁତର ରୋଗୀଙ୍କୁ ସୁସ୍ଥ କରିବାରେ ଏହି ଥେରାପି ବରଦାନ ପାଲଟିବ । ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନ୍ଫରେନ୍ସିଂ ଜରିଆରେ ସୁନ୍ଦରଗଡ ଓ ଯାଜପୁର ଜିଲ୍ଲାର କୋଭିଡ ପରିଚାଳନା ବ୍ୟବସ୍ଥା ସମୀକ୍ଷା କରି କୋଭିଡ ଯୁଦ୍ଧ ରଣନୀତିକୁ ସୁଦୃଢ କରିବା ପାଇଁ କିଛି ଗୁରୁତ୍ବପୂର୍ଣ୍ଣ ଘୋଷଣା କରିଥିଲେ।
ଏଥିରେ ରାଉରକେଲାର IGHରେ ପ୍ଲାଜମା ବ୍ୟାଙ୍କ ଖୋଲିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି । ପଶ୍ଚିମ ଓଡିଶାର ବିଭିନ୍ନ ଜିଲ୍ଲାରେ ଚିକିତ୍ସିତ ଗୁରୁତର ରୋଗୀଙ୍କୁ ରାଉରକେଲାର IGH ହସ୍ପିଟାଲରୁ ପ୍ଲାଜମା ଥେରାପି ଯୋଗାଇ ଦିଆଯିବ। ଏଥିସହିତ ରାଉରକେଲାର କୋଭିଡ କେୟାର ସେଣ୍ଟର ଗୁଡିକର ଶଯ୍ୟା ସଂଖ୍ୟା ୭ଶହରୁ ୧୭ଶହକୁ ବୃଦ୍ଧି କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି।
ଏହାସହ ସୁନ୍ଦରଗଡ ଜିଲ୍ଲାରେ କୋଭିଡ ଯୋଦ୍ଧା ମାନଙ୍କର ନିରନ୍ତର ଉଦ୍ୟମ ଓ ସେବା ପାଇଁ ଜିଲ୍ଲାରେ ଆରୋଗ୍ୟ ହାର ୮୫ ପ୍ରତିଶତରେ ପହଞ୍ଚିଛି । ଏନେଇ ମୁଖ୍ୟମନ୍ତ୍ରୀ ସନ୍ତୋଷ ପ୍ରକାଶ କରିଥିଲେ ଏବଂ ଜିଲ୍ଲା ପ୍ରଶାସନକୁ ଧନ୍ୟବାଦ ଜଣାଇଥିଲେ। ଅନ୍ୟପଟେ ଜିଲ୍ଲାରେ କୋଭିଡ ପରିଚାଳନା ପାଇଁ ବର୍ତ୍ତମାନ ସୁଦ୍ଧା DMFରୁ ସୁନ୍ଦରଗଡରେ ୨୦ କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ କୋଭିଡ ହସ୍ପିଟାଲ ଓ କୋଭିଡ କେୟାର ସେଣ୍ଟର ଗୁଡିକର ଭିତ୍ତିଭୂମି ବିକାଶ ପାଇଁ ଆଉ CMRFରୁ ୫ କୋଟି ଟଙ୍କା ମଞ୍ଜୁର କରାଯିବା ବିଷୟ ମୁଖ୍ୟମନ୍ତ୍ରୀ ଘୋଷଣା କରିଥିଲେ।
ଚଣ୍ଡିଖୋଲ: ଲୋକଙ୍କୁ ଜଳ ସଙ୍କଟରୁ ମୁକ୍ତି ଦେବା ପାଇଁ ପାନୀୟ ଜଳ ପ୍ରକଳ୍ପ ନିର୍ମାଣ କରାଯାଇଥିଲା । ଯେଉଁ ଲକ୍ଷ୍ୟ ନେଇ ଏହି ପ୍ରକଳ୍ପ ହୋଇଥିଲା ତାହା ଏବେ ସ୍ଥାଣୁ ପାଲଟିଯାଇଛି । ସେପଟେ ପୁରୁଣା ପ୍ରକଳ୍ପ କାର୍ଯ୍ୟକାରୀ ନେଇ ପଦକ୍ଷେପ ନିଆ ଯାଉନଥିବାବେଳେ ନୂଆ ପ୍ରକଳ୍ପକୁ ନେଇ ଉଠିଛି ବିରୋଧର ସ୍ୱର ।
ପାଣି ସଙ୍କଟରୁ ମୁକ୍ତି ପାଇଁ ଯାଜପୁର ଜିଲ୍ଲା ବଡଘୁମୁରି ପଞ୍ଚାୟତରେ ତିଆରି ହୋଇଥିଲା ପାନୀୟ ଜଳ ପ୍ରକଳ୍ପ । ବସୁଧା ଯୋଜନାରେ ଆରମ୍ଭ ହୋଇଥିବା ପ୍ରକଳ୍ପ ଆରମ୍ଭ ଦିନରୁ ଲୋକଙ୍କୁ ପାଣି ଟୋପାଏ ମିଳୁନଥିବା ଅଭିଯୋଗ ହୋଇଛି । ରକ୍ଷଣାବେକ୍ଷଣ ଅଭାବରୁ ପାଣି ପାଇପ ଭାଙ୍ଗିବାକୁ ବସିଲାଣି । ପରିତ୍ୟକ୍ତ ହୋଇ ପଡି ରହିଛି ଟ୍ରାନ୍ସଫରମର ।
ଗୋଟିଏ ପଟେ ପୁରୁଣା ପ୍ରକଳ୍ପ ଲୋକଙ୍କ କାମରେ ଆସୁନଥିବାବେଳେ ନୂଆ ପ୍ରକଳ୍ପକୁ ନେଇ ଉଠିଛି ବିରୋଧର ସ୍ୱର । ଗୋଚର ଜମିରେ ନିର୍ମାଣ ହେଉଥିବା ପ୍ରକଳ୍ପ ଅନ୍ୟତ୍ର ସ୍ଥାନାନ୍ତର କରିବାକୁ ଗ୍ରାମବାସୀ ଦାବି କରିଛନ୍ତି ।
ଖୁବଶୀଘ୍ର ମରାମତି ହେବ ପୁରୁଣା ପ୍ରକଳ୍ପ । ଏବଂ ନୂଆ ପ୍ରକଳ୍ପ ସଠିକ ସ୍ଥାନରେ ହେଉଥିବା କହିଛନ୍ତି ସ୍ଥାନୀୟ ସରପଞ୍ଚ । ଲୋକଙ୍କ ସମସ୍ୟାର ସମାଧାନ ହେବବୋଲି ପ୍ରତିଶ୍ରୁତି ଦେଇଛନ୍ତି ନିର୍ବାହୀ ଯନ୍ତ୍ରୀ ।
ଭୁବନେଶ୍ୱର: ରାଜ୍ୟରେ ଗୁରୁବାର ସର୍ବାଧିକ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଏଥିସହ ରାଜଧାନୀ ଭୁବନେଶ୍ୱରରେ ମଧ୍ୟ ଗୁରୁବାର ରେକଡ ସଂଖ୍ୟକ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । କରୋନା ସଂକ୍ରମଣ ରାଜ୍ୟ ଏବଂ ରାଜଧାନୀରେ କମିବାର ନା ହିଁ ଧରୁନାହିଁ । ତେବେ ଗୁରୁବାର ରାଜଧାନୀରୁ ୧୨୬ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଆଜି ୮୧ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ୧୨୬ ଜଣ ସଂକ୍ରମିତଙ୍କ ମଧ୍ୟରୁ ୯୩ ଜଣ କ୍ୱାରେଣ୍ଟାଇନ ସେଣ୍ଟରରୁ ଚିହ୍ନଟ ହୋଇଥିବା ବେଳେ ୩୩ ଜଣଙ୍କର ରହିଛି ଲୋକାଲ କଣ୍ଟାକ୍ଟ । ରାଜଧାନୀରେ ଏବେ ମୋଟ ସଂକ୍ରମିତଙ୍କ ସଂଖ୍ୟା ୧୪୬୯ ରହିଥିବା ବେଳେ ସୁସ୍ଥ ହୋଇଛନ୍ତି ୮୦୫ ଜଣ । ସେପଟେ ୧୧ ଜଣଙ୍କର ମୃତ୍ୟୁ ହୋଇଥିବା ବେଳେ ୬୫୧ ଜଣ ଏବେ ରାଜଧାନୀରେ ସକ୍ରିୟ ରହିଛନ୍ତି ।
୩୩ ଜଣ ଲୋକାଲ କଣ୍ଟାକ୍ଟଙ୍କ ମଧ୍ୟରୁ ପଟିଆର ଏକ ଘରୋଇ ଡାକ୍ତରଖାନାରୁ ୧, ଆଇଆର୍ସି ଭିଲେଜରୁ ୧, ୟୁନିଟ ୧ରୁ ୨, ନୟାପଲି ନୂଆସାହିରୁ ୧, ଆଇଆରସି ଭିଲେଜରୁ ୧, ୟୁନିଟ ୯ ଗ୍ରିଡକୋ କଲୋନୀରୁ ୧, ୟଚନିଟ ୨ରୁ ୧, ୟୁନିଟ ୪ ଏମ୍ଏଲ୍ଏ କରୋନୀରୁ ୨ଜଣ ଚିହ୍ନଟ ହୋଇଛନ୍ତି । ସେହିପରି ୟୁନିଟ ୩ ଚନ୍ଦ୍ରମା ଆପାର୍ଟମେଣ୍ଟ ପାଖରୁ ୧, ପୋଖରୀପୁଟ ଲିଙ୍ଗରାଜ ଆପାର୍ଟମେଣ୍ଟରୁ ୧, ଚକେଇସିଆଣିରୁ ୧, ପଳାଶୁଣି ପ୍ରାଚି ବିହାରରୁ ୧, ସେଣ୍ଟ୍ରାଲ ସରକାରୀ ଡାକ୍ତରଖାନାରୁ ୧, ଲୁଇସ୍ ରୋଡରୁ ୧, ଏକ ଘରୋଇ ଡାକ୍ତରଖାନାରୁ ୪, ଭରତପୁରରୁ ୧, ବୁଧେଶ୍ୱରୀ କଲୋନୀରୁ ୧, ସହିଦ ନଗରରୁ ୧, ମଞ୍ଚେଶ୍ୱରରୁ ୨, ଅଶୋକ ନଗରରୁ ୧, ନ୍ୟୁ ଫରେଷ୍ଟା ପାର୍କ ଅଞ୍ଚଳରରୁ ୧, ଆଉ ଏକ ଘରୋଇ ଡାକ୍ତରଖାନାରୁ ୨, ଗୋପବନ୍ଧୁ ନଗର ବସ୍ତିରୁ ୧, ୟୁନିଟ ୮ ସିବିଆଇ କଲୋନୀରୁ ୧, ଭୋଇ ନଗରରୁ ୧ ଚିହ୍ନଟ ହୋଇଛନ୍ତି ।
ରାଜ୍ୟ ସରକାରଙ୍କ ବିଜ୍ଞପ୍ତି ଅନୁଯାୟୀ ସାରା ରାଜ୍ୟରେ ଜୁଲାଇ ୨୨ ତାରିଖରେ ୧୨୬୪ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ଏହା ରାଜ୍ୟରେ ହୋଇଥିବା ଏପର୍ଯ୍ୟନ୍ତର ସର୍ବାଧିକ ସଂକ୍ରମଣ । ଏମାନଙ୍କ ମଧ୍ୟରୁ କ୍ୱାରେଣ୍ଟାଇନ୍ ସେଣ୍ଟରରୁ ୮୪୭ ଜଣ ଚିହ୍ନଟ ହୋଇଥିବା ବେଳେ ସ୍ଥାନୀୟ ସଂକ୍ରମିତଙ୍କ ସଂଖ୍ୟା ୪୧୭ । ତେବେ ସବୁଦିନ ଭଳି ବୁଧବାରର ସଂକ୍ରମିତଙ୍କ ତାଲିକାରେ ଗଞ୍ଜାମ ସବୁଠାରୁ ଆଗରେ ରହିଛି ।
ରାଜ୍ୟରେ ବୁଧବାର ଚିହ୍ନଟ ହେଲେ ସର୍ବାଧିକ ସଂକ୍ରମିତ, ଚିନ୍ତା ବଢାଉଛି ଗଞ୍ଜାମ….
ଭୁବନେଶ୍ୱର: କମିବ କେନ୍ଦ୍ର ଅନୁଦାନ । ସାରା ଦେଶ ସମେତ ରାଜ୍ୟ ମଧ୍ୟ କରୋନା ଆତଙ୍କରେ ଆତଙ୍କିତ ରହିଛି । ଏଭଳି ପରିସ୍ଥିତିରେ କରୋନା ମୁକାବିଲା ପାଇଁ ରାଜ୍ୟ ସରକାର କଡ଼ା ପଦକ୍ଷେପ ନେଉଛନ୍ତି । କରୋନା ସଂକ୍ରମଣକୁ ରୋକିବା ପାଇଁ ରାଜ୍ୟ ସରକାର ବିଭିନ୍ନ କ୍ଷେତ୍ରରେ ଅନେକ ପଦକ୍ଷେପ ଗ୍ରହଣ କରୁଛନ୍ତି । ଏମିତିକି ରାଜସ୍ୱ ଆଦୟରେ ମଧ୍ୟ ରାଜ୍ୟ ସରକାର କୋହଳ କରିଛନ୍ତି ।
ତେବେ ଗୋଟିଏ ପଟେ ରାଜ୍ୟ ସରକାର ରାଜସ୍ୱ ଆଦାୟରେ କୋହଳ ମନୋଭାବ ପୋଷଣ କରିଥିବା ବେଳେ ସେପଟେ କେନ୍ଦ୍ର ସରକାର ମଧ୍ୟ ଏଥର କମ୍ ଅନୁଦାନ ଦେବେ ବୋଲି ସୂଚନା ମିଳିଛି ।
ଚଳିତ ବର୍ଷ ରାଜ୍ୟକୁ ଆସୁଥିବା କେନ୍ଦ୍ରୀୟ ଅନୁଦାନ ହ୍ରାସ ପାଇବ । ରାଜ୍ୟର ନିଜସ୍ୱ ଟିକସ ଆଦାୟ ମଧ୍ୟ ହ୍ରାସ ପାଇଛି । ଏପ୍ରିଲ ମାସ ପର୍ଯ୍ୟନ୍ତ ୮୦ ପ୍ରତିଶତ ଟିକସ କମିଥିବା ବେଳେ ଏବେ ୨୦ ପ୍ରତିଶତ ଟିକସ ଆଦାୟ କମିଛି । ତେଣୁ ସରକାର ଖୋଲା ବଜାରରୁ ଋଣ ଆଣିବେ ବୋଲି ଚିନ୍ତା କରୁଛନ୍ତି । ରାଜ୍ୟ ଏଫଆରବିଏମ ଆଇନ ଅନୁଯାୟୀ ରାଜ୍ୟ ସରକାର ଖୋଲାବଜାରରୁ ୩ ପ୍ରତିଶତ ଋଣ ଉଠାଇ ପାରିବେ ।
କେନ୍ଦ୍ର ସରକାର ଆଉ ୦.୫ ପ୍ରତିଶତ ଋଣ ଉଠାଇବାକୁ ସର୍ତ୍ତମୂଳକ ଅନୁମତି ଦେଇଛନ୍ତି । ତେଣୁ ସରକାର କାମ୍ପା ଓ ଓମବାଡସି ପାଣ୍ଠିରୁ ଋଣ କରିବେ । କାରଣ ଏଠାରେ ସୁଧର ହାର ମାତ୍ର ୩ ପ୍ରତିଶତ ରହିଛି । ବର୍ତ୍ତମାନ ସୁଦ୍ଧା ହଜାରେ କୋଟି ଟଙ୍କା ଋଣ କରିସାରିଛନ୍ତି ସରକାର । ଋଣ ପାଇଁ ସିଏଜିଙ୍କ ଅନୁମତି ମଧ୍ୟ ମିଳିଛି । ଆରଆଇଡିଏଫ ଭଳି ଯୋଜନା ପାଇଁ ରାଜ୍ୟ ସରକାର ଋଣ କରିବେ । ଭୁବନେଶ୍ବର ଓ ବ୍ରହ୍ମପୁର ପରେ ରାଉଲକେଲା ଆଇଜିଏଚରେ ପ୍ଲାଜମା ଥେରାପୀ ଆରମ୍ଭ କରିବାକୁ ମନ୍ତ୍ରୀ ପରିଷଦରେ ନିଷ୍ପତ୍ତି ହୋଇଛି ।
ଭୁବନେଶ୍ୱର: ହାତୀ ମୃତ୍ୟୁ ନେଇ ସରକାରଙ୍କ କଡ଼ା ଆଭିମୁଖ୍ୟ । ବୌଦ୍ଧ ଓ କେନ୍ଦୁଝର ସଂରକ୍ଷିତ ଜଙ୍ଗଲ ଡିଭିଜନରେ ଦନ୍ତା ହାତୀଙ୍କୁ ହତ୍ୟା ଘଟଣା । ଉଭୟ ଘଟଣାର ତଦନ୍ତ କରିବ ରାଜ୍ୟ କ୍ରାଇମବ୍ରାଞ୍ଚ । ଏ ନେଇ କ୍ରାଇମବ୍ରାଞ୍ଚକୁ ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର ।
ଘଟଣାର କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ ଦେବା ଲାଗି ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ କେଶରୀ ଆରୁଖ ଦେଇଥିବା ପ୍ରସ୍ତାବକୁ ଅନୁମୋଦନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦୁଇଟି ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରି ମାଷ୍ଟରମାଇଣ୍ଡଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ଲାଗି ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ।
ଜୁନ୍ ୧୭ ତାରିଖରେ ବୌଦ୍ଧ ଡିଭିଜନ୍ ମାଧପୁର୍ ରେଞ୍ଜ ଅନ୍ତର୍ଗତ ମୁକ୍ତେଶ୍ୱର ସଂରକ୍ଷିତ ଜଙ୍ଗଲରେ ଗୋଟେ ହାତୀଙ୍କୁ ୯ଟି ଗୁଳି ମାରି ହତ୍ୟା କରି ଦାନ୍ତ ଚୋରି ଉଦ୍ୟମ ହୋଇଥିଲା । ଜୁନ ୨୨ରେ ଉକ୍ତ ଘଟଣାରେ ବନ ବିଭାଗ ୪ ଜଣଙ୍କୁ ଗିରଫ କରିଥିଲା । ସେହିପରି ଜୁନ୍ ୧୪ରେ କେନ୍ଦୁଝର ଚମ୍ପୁଆ ରେଞ୍ଜ ବୈତରଣୀ ‘କ‘ ସଂରକ୍ଷିତ ଜଙ୍ଗଲରେ ୨ଟି ହାତୀଙ୍କ ମୃତ୍ୟୁ ଦେହ ଉଦ୍ଧାର କରିଥିଲା ବନ ବିଭାଗ ।
ବିଦ୍ୟୁତ ତାର ବିଛାଇ ହାତୀଙ୍କୁ ହତ୍ୟା କରି ଦାନ୍ତ ଚୋରି ଅଭିଯୋଗରେ ୩ ଜଣଙ୍କୁ ଗିରଫ କରିଥିଲା ବନ ବିଭାଗ । ତେବେ ଉଭୟ ଘଟଣାର ଉଚ୍ଛସ୍ତରୀୟ ତଦନ୍ତ ଲାଗି ମୁଖ୍ୟମନ୍ତ୍ରୀଙ୍କୁ ପ୍ରସ୍ତାବ ଦେଇଥିଲେ ଜଙ୍ଗଲ ଓ ପରିବେଶ ମନ୍ତ୍ରୀ ।
ବରଗଡ଼: ଆସନ୍ତା ୨୩ ତାରିଖ ବରଗଡ଼ ସଟ୍ଡାଉନ୍ । ଗୁରୁବାର ରାତି ୯ ଟାରୁ ୨୬ ତାରିଖ ରାତି ୯ଟା ପର୍ଯ୍ୟନ୍ତ ବରଗଡ଼ରେ ପ୍ରଥମ ପର୍ଯ୍ୟାୟ ସଟ୍ଡାଉନ୍ ଘୋଷଣା କରାଯାଇଛି । ଏନେଇ ଜିଲ୍ଲାପାଳ ଜ୍ୟୋତି ରଞ୍ଜନ ପ୍ରଧାନ ଘୋଷଣା କରିଛନ୍ତି । ଏହା ପରେ ଦ୍ୱିତୀୟ ପର୍ଯ୍ୟାୟ ସଟ୍ଡାଉନ୍ ୨୬ ତାରିଖ ରାତି ୯ଟାରୁ ୨୮ ତାରିଖ ରାତି ୯ଟା ପର୍ଯ୍ୟନ୍ତ ସଟ୍ଡାଉନ୍ ପାଇଁ ନିଷ୍ପତି ହୋଇଛି ।
ବରଗଡ଼ ସବଡିଭିଜନର ବରପାଲି, ବରଗଡ଼, ଅମ୍ବାଭୋନା, ଅତାବିରା, ଭଟଲି ଓ ଭେଡେନ୍ ଆଦି ବ୍ଲକ୍ ଓ ତହସିଲ ଅଂଚଳକୁ ପ୍ରଥମେ ସଟଡାଉନ୍ ଘୋଷଣା କରାଯାଇଛି । ଏହାସହ ବରଗଡ଼ ମୁନିସିପାଲିଟି, ଅତାବିରା NAC ଓ ବରପାଲି NAC ଅଞ୍ଚଳକୁ ମଧ୍ୟ ସଟଡାଉନ କରାଯିବ ବୋଲି କହିଛନ୍ତି ଜିଲ୍ଲାପାଳ ।
ସେହିଭଳି ପଦ୍ମପୁର ସବଡିଭିଜନ୍ର ସୋହେଲା ଓ ବିଜେପୁର ତହସିଲକୁ ସଟ୍ଡାଉନ୍ କରାଯାଇଛି । ବିଜେପୁର NAC ଓ ପଦ୍ମପୁର NAC ଅଞ୍ଚଳକୁ ଜିଲ୍ଲାପାଳ ଜ୍ୟୋତି ରଞ୍ଜନ ପ୍ରଧାନ ସଟଡାଉନ ଘୋଷଣା କରିଛନ୍ତି । ଏହି ସଟଡାଉନ୍ ସମୟରେ ଅତ୍ୟାବଶ୍ୟକ ପନିପରିବା ଦୋକାନ, ଫଳ ଦୋକାନ, କ୍ଷୀର ଦୋକାନ, ମେଡ଼ିକାଲ ଦୋକାନ ଖୋଲା ରହିବ ବୋଲି କୁହାଯାଇଛି । ଏହାସହ ଜାତୀୟ ରାଜପଥ ଓ ରାଜ୍ୟ ରାଜପଥ କଡ଼ରେ ଥିବା ଢ଼ାବା ପାର୍ସଲ ପାଇଁ ଖୋଲା ରହିବ ବୋଲି ଅନୁମତି ଦିଆଯାଇଛି । ଅନ୍ୟପଟେ ଟ୍ରକ ଯାତାୟାତ ଉପରେ କୌଣସି ପ୍ରକାର କଟକଣା ଜାରି କରାଯାଇ ନାହିଁ ।
ଦିଲ୍ଲୀ: କମେଣ୍ଟ ମରାକୁ କେନ୍ଦକରି ସାମ୍ବାଦିକଙ୍କୁ ହତ୍ୟା । ରାଜଧାନୀ ଦିଲ୍ଲୀରେ ଘଟିଛି ଏଭଳି ଲୋମ ହର୍ଷଣକାରୀ ଘଟଣା । ଘଟଣାରେ ଗାଜିଆବାଦ୍ ପୋଲିସ୍ ୯ ଜଣ ଅଭିଯୁକ୍ତଙ୍କୁ ଗିରଫ କରିଛି । ଘଟଣା ଅନୁଯାୟୀ, ଗତ ୧୬ ଜୁଲାଇରେ ଜଣେ ସାମ୍ବାଦିକ ବିକ୍ରମ ଯୋଶୀଙ୍କ ଭାଣିଜୀଙ୍କୁ କମେଣ୍ଟ୍ ମାରିଥିଲେ କିଛି ଦୁର୍ବୃତ୍ତ । ଏନେଇ ଥାନାରେ ଏତଲା ଦେଇଥିଲେ ମାମୁଁ ବିକ୍ରମ ।
ପ୍ରତିଶୋଧ ପରାୟଣ ହୋଇ ସୋମବାର ବିକ୍ରମଙ୍କୁ ଗୁଳି କରିଥିଲେ ଦୁର୍ବୃତ୍ତ । ଘଟଣା ପରେ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ହେଲ ଚିକିତ୍ସାଧିନ ଅବସ୍ଥାରେ ଗତ ବୁଧବାର ଦିନ ବିକ୍ରମଙ୍କ ମୃତ୍ୟୁ ହୋଇଥିଲା । ତେବେ ଘଟଣା ବେଳର ସିସିଟିଭି ଫୁଟେଜ୍ ମଧ୍ୟ ସାମ୍ନାକୁ ଆସିଛି । ଯେଉଁଥିରେ ୫ ରୁ ୬ ଜଣ ଲୋକ ସାମ୍ବାଦିକଙ୍କୁ ମାରପିଟ୍ କରୁଥିବା ବେଳେ ଆଉ ଜଣେ ଯୁବକ ଆସି ମୁଣ୍ଡ ପାଖରୁ ତାଙ୍କୁ ଗୁଳି ମାରୁଥିବା ଦେଖାଯାଉଛି ।
ଗୁଳି ମାରିବା ପରେ ଅପରାଧି ସେଠାରୁ ଫେରାର୍ ହୋଇଯାଉଥିବା ବେଳେ ବିକ୍ରମଙ୍କ କୁନିଝିଅ ସମସ୍ତଙ୍କୁ ସାହାଯ୍ୟ ପାଇଁ ନେହୁରା ହେଉଥିବା ନଜର ଆସୁଛନ୍ତି । ତେବ ଏହି ହତ୍ୟା ଘଟଣାରେ ଗାଜିଆବାଦ୍ ପୋଲିସ୍ ୯ ଜଣ ଅଭିଯୁକ୍ତଙ୍କୁ ଗିରଫ କରିଛି । ଅନ୍ୟପକ୍ଷରେ ଘଟଣାକୁ ଚପାଇଦେବାକୁ ନେଇ ଥାନା ଇନଚାର୍ଜଙ୍କୁ ସସପେଣ୍ଡ ମଧ୍ୟ କରାଯାଇଛି ।
ଆଦିତ୍ୟ ଦାଶ ମୃତ୍ୟୁ ମାମଲାରେ ଆସିଲା ନୂଆ ଟ୍ୱିଷ୍ଟ,ଲାଏ ଡିଟେକ୍ସନ ଟେଷ୍ଟ ଦାବି କଲେ ବିଦ୍ୟାଶ୍ରୀ
