ସୋର: ଜମି ବିବାଦକୁ କେନ୍ଦ୍ର କରି ବାପ ପୁଅଙ୍କୁ ଗୋଡାଇ ଗୋଡାଇ ହାଣିବା ଘଟଣାରେ ଜୀବନ ହାରିଲେ ବାପ ପୁଅ । ଘଟଣା ଦିନ ପୁଅ ଆଜି ହସପିଟାଲରେ ଚାରିଦିନର ସଂଘର୍ଷ ପରେ ଜୀବନ ହାରିଲା ବାପା । ଘଟଣାରେ ୩ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ସୋର ପୋଲିସ । ଗତ ୧୯ ତାରିଖରେ ବାଲେଶ୍ୱର ଜିଲ୍ଲା ସୋର ଥାନା ନିଶ୍ଚିନ୍ତପୁର ଗାଁରେ ବାପ ଓ ପୁଅଙ୍କୁ ଗୋଡାଇ ଗୋଡାଇ ଭୁଜାଲିରେ ଆକ୍ରମଣ କରିଥିଲେ ।

ଏହି ଆକ୍ରମଣରେ ପୁଅ କାର୍ତ୍ତିକ ବେହେରା ଘଟଣା ଦିନ ହିଁ ମୁତ୍ୟୁ ବରଣ କରିଥିଲେ । କିନ୍ତୁ ବାପା ଇଶ୍ୱର ବେହେରାଙ୍କୁ ଗୁରୁତର ଅବସ୍ଥାରେ କଟକ ଏସିବିରେ ଭର୍ତ୍ତି କରାଯାଇଥିଲା । କିନ୍ତୁ ଚାରିଦିନ ହେବ ମେଡ଼ିକାଲରେ ଚିକିତ୍ସା ହେଉଥିବା ବେଳେ ଆଜି ମୁତ୍ୟୁ ବରଣ କରିଛନ୍ତି । ଘଟଣାରେ ସୋର ପୁଲିସ ଗାଁର ଅଭିଯୁକ୍ତ ମାନଙ୍କୁ ଗିରଫ କରି କୋର୍ଟ ଚାଲାଣ କରିଛି ।   ଗିରଫଙ୍କ ମଧ୍ୟରେ ଦୁଇ ଭାଇ ରମେଶ ବେହେରା, ଶଶିକାନ୍ତ ବେହେରା ସହ ସେମାନଙ୍କ ମାଆ ସାବିତ୍ରୀ ବେହେରା ରହିଛନ୍ତି ।

ସୂଚନାରୁ ଅନୁସାରେ, ଗତ ୧୯ ତାରିଖ ନିଶ୍ଚନ୍ତପୁର ଗାଁର ଇଶ୍ୱର ବେହେରା ଓ ତାଙ୍କ ପୁଅ କାର୍ତ୍ତିକ ବେହେରାଙ୍କୁ ସେହି ଗାଁର ରମେଶ ବେହେରା ଓ ଶଶିକାନ୍ତ ବେହେରା ଜମି ଜମା ବିବାଦକୁ ନେଇ ଗୋଡାଇ ଗୋଡାଇ ଭୁଜାଲିରେ ଆକ୍ରମଣ କରିଥିଲେ । ଘଟଣା ଦିନ କାର୍ତ୍ତିକଙ୍କର ବାଲେଶ୍ୱର ଡାକ୍ତରଖାନାରେ ଚିକିତ୍ସିତ ଅବସ୍ଥାରେ ମୃତ୍ୟୁ ହୋଇଥିଲା । ତେବେ କାର୍ତ୍ତିକ ରେଳ ବିଭାଗର ୪ର୍ଥ ଶ୍ରେଣି କର୍ମଚାରୀ ଭାବରେ କାର୍ଯ୍ୟ କରୁଥିଲେ । ଏବଂ ଛୁଟିରେ ଘରେ ଥିବା ବେଳେ ବାପାଙ୍କୁ ଚାଷ କାମରେ ସାହାଯ୍ୟ କରିଵା ପାଇଁ ଯାଇଥିଲା ଯେଉଁଠି ପଡୋଶୀ ଆକ୍ରମଣ କରିଥିଲେ । ତେବେ ସୋର ପୋଲିସ ଗ୍ରାମବାସୀଙ୍କ ସହଯୋଗରେ  ଆକ୍ରମଣକାରୀ ଶଶିକାନ୍ତ ଓ ରମେଶ ସମେତ ସାବିତ୍ରୀ ବେହେରଙ୍କୁ ସେହିଦିନ ଘଟଣାସ୍ଥଳରୁ କାବୁ କରିଥିଲା । ଅଭିଯୁକ୍ତମାନଙ୍କୁ ଆଜି  ପୁଲିସ ଗିରଫ କରି   କୋର୍ଟ ଚାଲାଣ କରିଥିବା ଜଣାପଡିଛି । ଘଟଣାସ୍ଥଳରୁ ପୁଲିସ ଅଭିଯୁକ୍ତମାନେ ବ୍ୟବହାର କରିଥିବା ଭୁଜାଲି, ଦୁଇ କୋଦାଳ ଓ ବାଡିକୁ ଜବତ କରିଛି ।

(ସୋରରୁ ତପୋ ଧନ ବାରିକ)

ମୟୂରଭଞ୍ଜ: ଶବକୁ ମିଳିଲାନି କାନ୍ଧ । କରୋନା ଭୟରେ ପାଖକୁ ଆସିଲେନି ସମ୍ପର୍କୀୟ । କରୋନା ରୋଗ ଯେତେ ବିସ୍ତାର ହେଉଛି ସେତେ କରୋନା ଡ଼ର ଲୋକଙ୍କୁ ମାଡ଼ି ବସୁଛି । କରୋନା ଭୟରେ ହଜୁଛି ମାନବିକତା । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲାର ରାସଗୋବିନ୍ଦପୁର ଥାନା ଅନ୍ତର୍ଗତ ପୂର୍ଣ୍ଣଚନ୍ଦ୍ରପୁର ଗାଁରେ । କରୋନା ଭୟରେ ଶବକୁ କେହି କାନ୍ଧେଇ ନଥିଲେ । ଫଳରେ ପୁଅ ଜ୍ୱାଇଁ ମିଶି ବାଇକରେ ମଶାଣିକୁ ନେଇଥିଲେ ।

ପୁଅ ଓ ଜ୍ୱାଇଁ ଶବକୁ ମଶାଣିକୁ ନେଇ ମୃତ ଶରୀରକୁ ଜେସିବି ଦ୍ୱାରା ଖୋଳି ପୋତିଥିବା ସୂଚନା ମିଳିଛି । ମୃତକ ଜଣକ ହେଉଛନ୍ତି ପୂର୍ଣ୍ଣଚନ୍ଦ୍ର ପୁର ଗାଁର ରାଜେନ୍ଦ୍ର ଜେନା । ମୃତ ଜଣକ ଭୂବନେଶ୍ୱରର ଏକ ଘରୋଇ ହସ୍ପିଟାଲରେ କୋଭିଡ୍ ଚିକିତ୍ସା ପରେ ସୁସ୍ଥ ହୋଇ ଘରକୁ ଫେରିଥିଲେ । କିନ୍ତୁ ବିଡମ୍ବନାର ବିଷୟ ରାସ୍ତାରେ ବାଲେଶ୍ଵର ଜିଲ୍ଲାର ବସ୍ତା ନିକଟରେ ଅସ୍ୱସ୍ଥ ଅନୁଭବ କରିଥିଲେ । ସଙ୍ଗେ ସଙ୍ଗେ ବସ୍ତା ଡ଼ାକ୍ତରଖାନାରେ ତାଙ୍କୁ ଭର୍ତ୍ତି କରଯାଇଥିଲା । ଏବଂ ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ ।

ଅନ୍ୟପଟେ ତାଙ୍କର ପରିବାରରେ ଅନ୍ୟ ତିନି ଜଣ ସଂକ୍ରମିତ ହୋଇ ବାରିପଦାର କୋଭିଡ଼ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଏହି କାରଣରୁ ଭୟରେ କେହି ରାଜେନ୍ଦ୍ରଙ୍କୁ କାନ୍ଧ ଦେବାକୁ ଆସି ନଥିଲେ । ଏହାପରେ ପରିବାର ଲୋକେ ଏମିତି ଏକ ନିଷ୍ପତ୍ତି ନେଇଥିବା ସୂଚନା ମିଳିଛି ।