ପୁଣି ବଧୂ ହତ୍ୟା ଅଭିଯୋଗ । ବାଲେଶ୍ଵର ଜଳେଶ୍ଵରରେ ଘଟିଛି ଏହି ଘଟଣା । ମୃତକ ହେଲେ ମୋନାଲିସା ଦାସ । ମୋନାଲିସା ବରିଷ୍ଠ ଆଇନଜୀବୀ ତଥା କଂଗ୍ରେସ ନେତା ସତ୍ୟସୁନ୍ଦର ଦାସଙ୍କ ବୋହୂ । ମୋନାଲିସାଙ୍କୁ ସତ୍ୟଦାସଙ୍କ ବଡ ପୁଅ ସବ୍ୟସାଚୀ ଦାସ ବିବାହ କରିଥିଲେ । ଶାଶୂଘର ଲୋକଙ୍କ ବିରୋଧରେ ହତ୍ୟା ଅଭିଯୋଗ ଆଣିଲେ ବାପଘର ଲୋକେ। ଗତକାଲି ଜଳେଶ୍ଵର ପୁରୁଣା କୋର୍ଟ ବଜାରସ୍ଥିତ ଘରେ ମୋନାଲିସାଙ୍କୁ ଝୁଲନ୍ତା ଅବସ୍ଥାରେ ଦେଖିଥିଲେ ଶାଶୁ ଘର ଲୋକ । ସଙ୍ଗେସଙ୍ଗେ ତାଙ୍କୁ ଜଳେଶ୍ୱର ହସ୍ପିଟାଲକୁ ନେଇଥିଲେ। ହସ୍ପିଟାଲରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୂର୍ବରୁ ମୋନାଲିସାଙ୍କୁ ଯୌତୁକ, ଶାରୀରିକ ଓ ମାନସିକ ନିର୍ଯାତନା ଦିଆଯାଇଥିବା ଅଭିଯୋଗ କରିଛନ୍ତି ବାପଘର ଲୋକେ । ଅଭିଯୋଗ ପରେ ଜଳେଶ୍ୱର ପୋଲିସ ତଦନ୍ତ ଜାରି ରଖିଥିବା ବେଳେ ପରିବାରର ସମସ୍ତେ ଫେରାର ଅଛନ୍ତି। ଜଳେଶ୍ଵର ପୋଲିସ ଓ ଫରେନସିକ ଟିମର ୩ ଜଣିଆ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛନ୍ତି । ବର୍ତ୍ତମାନ ସୁଦ୍ଧା କୌଣସି ଅଭିଯୁକ୍ତଙ୍କୁ ପୋଲିସ ଗିରଫ କରିନାହିଁ।
ଆନ୍ଧ୍ରର ଦାଦାଗିରି ଯୋଗୁଁ ନଦୀ ଗର୍ଭରେ ଲୀନ ହେବାକୁ ବସିଲାଣି ଓଡ଼ିଶାର ଶହ ଶହ ଏକର ଜମି
ଆନ୍ଧ୍ରର କାଟ୍ରାଗଡ଼ ଆଡ଼ିବନ୍ଧ ଯୋଗୁ ଓଡ଼ିଶାର କାଶୀନଗରରେ ଦାଉ ସାଜିଲାଣି ବଂଶଧାରା ନଦୀର ବନ୍ୟାଜଳ । ଆଡ଼ିବନ୍ଧରେ ପାଣି ଅଟକି ରହିଥିବାରୁ ଓଡ଼ିଶାର ଶହଶହ ଏକର ଜମି ଏବେ ନଦୀ ଗର୍ଭରେ ଲୀନ ହେବାକୁ ବସିଲାଣି । ନଦୀ ଜଳ କୂଳ ଲଂଘି ମାଟି ଅତଡ଼ା ଖସୁଛି । ଭୟରେ କାଶୀନଗର ବାସିନ୍ଦା । ଧୀରେ ଧୀରେ ଦୁର୍ବଳ ହେବାରେ ଲାଗିଛି ନଦୀ ବନ୍ଧ। ଆଉ ଆତଙ୍କିତ ଅବସ୍ଥାରେ ନଦୀକୂଳିଆ ଲୋକେ । ବିପଦକୁ ଏଡାଇବା ପାଇଁ ନଦୀ ତଟରେ ବଡ ବଡ ପଥର ପକାଇ ମାଟି ଅବକ୍ଷୟକୁ ରୋକିବା ପାଇଁ ଉଦ୍ୟମ କରାଯାଇଛି । ବନ୍ୟାଜଳ ବଢୁଥିବାରୁ ଗ୍ରାମବାସୀ ଭୟରେ । ଏ ନେଇ ରାଜ୍ୟ ସରକାର ତୁରନ୍ତ ଦୃଷ୍ଟି ଦେବାକୁ ଦାବି ଉଠିଛି।
ବଂଶଧାରା ନଦୀ କୂଳରେ ଜିଲ୍ଲାର ବୁଦୁରା, ଗୌରୀ , ବାନ୍ନା, କିତିଙ୍ଗି, ବଥବା, ରାଧାକୃଷ୍ଣପୁର, ଆଦର୍ଶନଗର, ନୁଆ ବାଡ଼ିଙ୍ଗା, ପୁରୁଟିଗୁଡ଼ା, ସାରା,ବାଡିଙ୍ଗା, ପାଲସିଂ ଭଳି ଅନେକ ଗାଁର ହଜାର ହଜାର ଜନସାଧାରଣ ବସବାସ କରୁଛନ୍ତି । ହେଲେ ବଂଶଧାରାରେ ଅତଡା ଖାଉଥିବା ସ୍ଥାନରେ ପ୍ରଶାସନ ପକ୍ଷରୁ କିଛି ବି ପଦକ୍ଷେପ ନିଆଯାଉନି । ଆଗକୁ ବର୍ଷା ଥିବାରୁ ନଦୀଜଳ ବଢିବା ସମ୍ଭାବନା ରହିଛି। ତେବେ ଏ ଦିଗରେ ପ୍ରଶାସନ ଆବଶ୍ୟକ ପଦକ୍ଷେପ ଗ୍ରହଣ କରିବା ଜରୁରୀ ହୋଇପଡିଛି । କୂଳ ଖାଇ ନଦୀ ଗର୍ଭରେ ଲୀନ ହେଉଛି ଶହଶହ ଏକର ଜମି । ରାଜ୍ୟ ସରକାର ତୁରନ୍ତ ପଦକ୍ଷେପ ନ ନେଲେ କାଶୀନଗର ଅଞ୍ଚଳ ବଂଶଧାରା ଗର୍ଭରେ ଲୀନ ହୋଇଯିବା ନେଇ ଆଶଙ୍କା ସୃଷ୍ଟି ହୋଇଛି।
ଅସୁରକ୍ଷିତ ଅବସ୍ଥାରେ କେନ୍ଦ୍ରାପଡାର ସିଦ୍ଧ ବଳଦେବଜୀଉ ମନ୍ଦିର
ଅସୁରକ୍ଷିତ ଅବସ୍ଥାରେ କେନ୍ଦ୍ରାପଡାର ସିଦ୍ଧ ବଳଦେବଜୀଉ ମନ୍ଦିର । ଜଗମୋହନରେ ସୃଷ୍ଟି ହୋଇଛି ଫାଟ । ମନ୍ଦିର ସୁରକ୍ଷା ଉପରେ ପ୍ରଶ୍ନବାଚୀ । ସପ୍ତଦଶ ଶତାବ୍ଦୀର ଶେଷ ଭାଗରେ ନିର୍ମାଣ ହୋଇଥିଲା ବଳଦେବଜୀଉ ମନ୍ଦିର । ହେଲେ ମନ୍ଦିରର ରକ୍ଷଣାବେକ୍ଷଣ ଅଭାବରୁ ଏବେ ତାହା ଅସୁରକ୍ଷିତ ହୋଇପଡିଛି । ଜଗମୋହନର ଚାରୋଟି ଖମ୍ବ ମଧ୍ଯରୁ ବାମ ପଟ ଖମ୍ବରେ ଫାଟ ସୃଷ୍ଟି ହେବା ସହ ପିଲାର ଦୁର୍ବଳ ହୋଇଗଲାଣି । ବିଭିନ୍ନ ସ୍ଥାନରେ ଫାଟ ସୃଷ୍ଟି ହୋଇ ଟାଇଲ ଖସିଗଲାଣି । ଅନ୍ୟପଟରେ ଝୁଲଣ ମଣ୍ଡପରୁ ଖୋଳପା ଛାଡ଼ିବା ସହ ସିଡ଼ି ବିପଦପୂର୍ଣ୍ଣ ଭାବରେ ରହିଛି । ଯାହାକୁ ନେଇ ସେବାୟତଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
ମନ୍ଦିର ଅବସ୍ଥା ସଂପର୍କରେ ମନ୍ଦିର ପ୍ରଶାସନ ରାଜ୍ୟ ପ୍ରତ୍ନତାତ୍ତ୍ଵିକ ବିଭାଗ ସହ ଜିଲ୍ଲାପାଳଙ୍କୁ ଚିଠି ଲେଖି ଅବଗତ କରାଇଛନ୍ତି । ମନ୍ଦିର ଉନ୍ନତିକରଣ କାମ ଆରମ୍ଭ ହେଲେ ସେ ସବୁ ସମସ୍ୟାର ସମାଧାନ କରାଯିବ ବୋଲି ଜିଲ୍ଲାପାଳ ଫୋନ ଯୋଗେ କହିଛନ୍ତି । ହେଲେ ଏ ପର୍ଯ୍ୟନ୍ତ ମନ୍ଦିରର ଉନ୍ନତିକରଣ କାମ ଆରମ୍ଭ ହୋଇନାହିଁ । ଲକ୍ଷଲକ୍ଷ ଭକ୍ତଙ୍କ ଭାବାବେଗ ସହ ଜଡିତ ଥିବା ପ୍ରଭୁ ସିଦ୍ଧବଳଦେବ ଜୀଉଙ୍କ ମନ୍ଦିରର ରକ୍ଷଣାବେକ୍ଷଣ ଓ ସୁରକ୍ଷା ପ୍ରତି ରାଜ୍ୟ ସରକାର ଦୃଷ୍ଟି ଦେବା ପାଇଁ ଦାବି ହୋଇଛି।
ମଦ ପାଇଁ ଅକାଳରେ ଯାଉଛି ଜୀବନ: କାୟା ମେଲାଇଛି ଦେଶୀ ଚୋରା ମଦ କାରବାର
କାୟା ମେଲାଇଛି ଦେଶୀ ଚୋରା ମଦ କାରବାର । ମଦ ପାଇଁ ଅକାଳରେ ଯାଉଛି ଜୀବନ । ବଢିବାରେ ଲାଗିଛି ବିଧବା ଓ ଅନାଥଙ୍କ ସଂଖ୍ୟା। ନିଇତି ଘଟୁଛି ଅସାମାଜିକ କାର୍ଯ୍ୟକଳାପ । ଦୃଷ୍ଟି ଦେଉନି ଅବକାରୀ ବିଭାଗ । କେନ୍ଦୁଝର ଜିଲ୍ଲା ଚମ୍ପୁଆ ବ୍ଲକ କରଞ୍ଜିଆ ଭୂମିଜ ସାହିରେ ରହୁଛନ୍ତି ୫୦ ରୁ ଉର୍ଦ୍ଧ୍ଵ ପରିବାର । ସମସ୍ତେ ପ୍ରାୟ ଦିନ ମଜୁରିଆ । ମୂଲ ମଜୁରୀ ଲାଗି ପରିବାର ଚଳାଉଥିବା ବେଳେ ଏହି ସାହି ପାଇଁ ଅଭିଷାପ ପାଲଟିଛି ବେଆଇନ ଭାବେ ଚାଲିଥିବା ଦେଶୀ ମଦ କାରବାର । ଅବାଧ ମଦ କାରବାର ପାଇଁ ସାହିରେ ବଢୁଛି ମଦୁଆଙ୍କ ସଂଖ୍ୟା । ମଦ ପିଇ ଦୈନିକ ବିଶୃଙ୍ଖଳା ଘଟୁଥିବା ବେଳେ ଅନେକଙ୍କ ଜୀବନ ଯାଉଥିବା ଅଭିଯୋଗ ହୋଇଛି ।
କରଞ୍ଜିଆ ଭୂମିଜ ସାହିରେ ଅଧକାଂଶ ଭୂମିହୀନ ପରିବାର ବସବାସ କରୁଛନ୍ତି । ପୁରୁଷମାନେ ଦିନ ମଜୁରିଆ ଭାବେ କାର୍ଯ୍ୟ କରୁଥିବା ଵେଳେ ମହିଳାମାନେ ପର ଘରେ ପାଇଟି କରି ପରିବାର ପ୍ରତିପୋଷଣ କରୁଛନ୍ତି । ଏହି ସାହିକୁ ଆଜି ଯାଏଁ ବିକାଶ ପହଞ୍ଚିପାରିନି । ହେଲେ ସାହିରେ ମିଳୁଥିବା ନକଲି ମଦ ପିଇ ଅନେକ ପୁରୁଷଙ୍କ ଜୀବନ ଗଲାଣି । ମଦ କାରବାର ବନ୍ଦ କରିବାକୁ ସ୍ଥାନୀୟ ଲୋକେ ପ୍ରଶାସନ ନିକଟରେ ବାରମ୍ବାର ଗୁହାରି କରୁଛନ୍ତି ହେଲେ କୌଣସି ପଦକ୍ଷେପ ନିଆଯାଉନଥିବା ଅଭିଯୋଗ ହୋଇଛି । ଭୂମିଜ ସାହିରେ ଶୀଘ୍ର ମଦ କାରବାର ବନ୍ଦ କରିବାକୁ ଦାବି ଜୋର ଧରିଛି ।
ଆଜି ନୂଆଁଖାଇ: ପାରମ୍ପରିକ ନୃତ୍ୟ ବାଦ୍ୟରେ ଦୁଲୁକୁଛି ପଶ୍ଚିମ ଓଡ଼ିଶା
ଆଜି ନୂଆଁଖାଇ । ସବୁଠି ଆନନ୍ଦ ଓ ଉଲ୍ଲାସ । ପାରମ୍ପରିକ ନୃତ୍ୟ ବାଦ୍ୟରେ ଦୁଲୁକୁଛି ପଶ୍ଚିମ ଓଡ଼ିଶା । ପିଠାପଣାରେ ମହକୁଛି ଗାଁ ଦାଣ୍ଡ । ଅତିଥି ଓ ଅଭ୍ୟାଗତଙ୍କ ଲାଗିଛି ଗହଳି । ମାଆ ସମଲେଶ୍ଵରୀଙ୍କ ପୀଠରେ ୧୦.୩୩ ରୁ ୧୦.୫୫ ମଧ୍ୟରେ ନବାନ୍ନ ଲାଗି ହୋଇଥିବା ବେଳେ ପଶ୍ଚିମ ଓଡିଶାର ଅଧିକାଂଶ ଜିଲ୍ଲାରେ ନିର୍ଦ୍ଧାରିତ ଲଗ୍ନ ଅନୁସାରେ ନୂଆଁଖାଇ ପାଳିତ ହୋଇଛି । ନୂଆପଡାରେ ଇଷ୍ଟଦେବୀଙ୍କୁ ନୂତନ ଶସ୍ୟ ଅର୍ପଣ ପରେ ତୁକୁଲା ଗାଁରେ ଶହେ ମେହର ପରିବାର ଏକାଠି ବସି ନୂଆ ଖାଇ ସମାଜକୁ ଏକତାର ବାର୍ତ୍ତା ଦେଇଛନ୍ତି । ଝାରସୁଗୁଡାରେ ରାଗରୋଷ ଭୁଲି ୨୦ରୁ ଉର୍ଦ୍ଧ୍ଵ ବ୍ୟକ୍ତି ନୂଆ ଖାଇଛନ୍ତି ।
ନୂଆଁଖାଇ ପାଇଁ ଚଳଚଞ୍ଚଳ ହୋଇପଡିଛି କଳାହାଣ୍ଡିର ଜୁନାଗଡ ସହର । ପ୍ରଥମେ ଦଧି ବାମନ ମନ୍ଦିରରେ ଓ ପରେ ଜୁନାଗଡ଼ର ଇଷ୍ଟ ଦେବୀ ଲଙ୍କେଶ୍ୱରିଙ୍କ ମନ୍ଦିରରେ ନବାନ୍ନ ଲାଗି ହେବା ପରେ କଳାହାଣ୍ଡି ଜିଲ୍ଲାରେ ପାଳିତ ହୋଇଛି ନୂଆଁଖାଇ । ପିଠା ପଣା ଖିରି ପୁରୀ ସମସ୍ତେ ଖାଇସାରିବା ପରେ ଚାଲିଛି ଜୁହାର ଭେଟ । ନାଚ ଗୀତରେ ମଧ୍ୟରେ ଗାଁ ରେ ସୃଷ୍ଟି ହୋଇଛି ବର୍ଣ୍ଣାଢ଼୍ୟ ପରିବେଶ l ସେପଟେ ବୌଦ୍ଧ ଜିଲ୍ଲା କଣ୍ଟାମାଳରେ ଇଷ୍ଟଦେବୀ ସମଲେଇଙ୍କ ଠାରେ ନବାନ୍ନ ଲାଗି ହେବା ପରେ ନୂଆ ଖାଇଛନ୍ତି ସମସ୍ତେ । ଉତ୍ସାହ, ଉଦ୍ଦୀପନାର ପର୍ବ ପାଇଁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝି ଓ ବିରୋଧୀ ଦଳ ନେତା ନବୀନ ପଟ୍ଟନାୟକ ।
ସମ୍ଭଲ ଦଙ୍ଗାକୁ ନେଇ ଗୋପନୀୟ ରିପୋର୍ଟରେ ଦାବି, ସହରରେ ଅଛନ୍ତି ମାତ୍ର ୧୫ ପ୍ରତିଶତ ହିନ୍ଦୁ
ଉତ୍ତରପ୍ରଦେଶର ସମ୍ଭଲର ଜନସଂଖ୍ୟାକୁ ନେଇ ଏକ ଆଶ୍ଚର୍ଯ୍ୟଜନକ ରିପୋର୍ଟ ସାମ୍ନାକୁ ଆସିଛି । ସମ୍ଭଲରେ ମାତ୍ର ୧୫ ପ୍ରତିଶତ ହିନ୍ଦୁ ରହିଥିବା ବେଳେ ଅବଶିଷ୍ଟ ପଳାୟନ କରିଛନ୍ତି । ସ୍ବାଧିନତା ପରେ ସମ୍ଭଲ ନଗରପାଳିକାରେ ୪୫ ପ୍ରତିଶତ ହିନ୍ଦୁ ଥିଲେ । ତା’ପରେ ସେଠାକାର ଜନସଂଖ୍ୟା ପରିବର୍ତ୍ତନ ହୋଇଥିଲା । ତିନି ସଦସ୍ୟ ବିଶିଷ୍ଟ ନ୍ୟାୟିକ ଯାଞ୍ଚ ଆୟୋଗର ରିପୋର୍ଟ ଆସିବା ପରେ ଏହା ସାମ୍ନାକୁ ଆସିଛି । ଆୟୋଗର ସଦସ୍ୟ ପୂର୍ବ ଡିଜିପି ଏକେ ଜୈନ କହିଛନ୍ତି, ସିଏମ ଯୋଗୀଙ୍କୁ ଆଜି ସକାଳ ୧୦ଟା ସମୟରେ ଏହି ରିପୋର୍ଟ ପ୍ରଦାନ କରାଯାଇଛି । ଏହା ସମ୍ପୂର୍ଣ୍ଣ ଭାବେ ଗୋପନୀୟ ରିପୋର୍ଟ ।
ସମ୍ଭଲ ହିଂସା ପରେ ନ୍ୟାୟିକା ଆୟୋଗ ଗଠନ କରାଯାଇଥିଲା । ଗତବର୍ଷ ନଭେମ୍ବର ୨୪ରେ ଉକ୍ତ କ୍ଷେତ୍ରରେ ହିଂସା ସୃଷ୍ଟି ହୋଇଥିଲା । ସମ୍ଭଲରେ ମସଜିଦରେ ସର୍ଭେ କରିବା ସମୟରେ ହିଂସା ହୋଇଥିଲା । ନ୍ୟାୟିକ ଆୟୋଗରେ ଆହ୍ଲାବାଦ ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ ଦେବେନ୍ଦ୍ର କୁମାର ଅରୋଡ଼ା ଓ ରିଟାୟାର୍ଡ IAS ଅମିତ ମୋହନ, ରିଟାୟାର୍ଡ IPS ଅରବିନ୍ଦ କୁମାର ଜୈନ ଥିଲେ । ଆଜି ନ୍ୟାୟିକ ଆୟୋଗର ଟିମ ସିଏମ ଯୋଗୀଙ୍କୁ ସାକ୍ଷାତ କରି ଗୋପନୀୟ ଯାଞ୍ଚ ରିପୋର୍ଟ ପ୍ରଦାନ କରିଛନ୍ତି ।
ବଡ଼ଚଣା ଥାନାର ଜଣେ ବରିଷ୍ଠ ପୋଲିସ ଅଧିକାରୀଙ୍କ ବିରୋଧରେ ଆସିଛି ସଙ୍ଗୀନ ଅଭିଯୋଗ
ଯାଜପୁର ଜିଲ୍ଲା ବଡ଼ଚଣା ଥାନାର ଜଣେ ବରିଷ୍ଠ ଅଧିକାରୀଙ୍କ ବିରୋଧରେ ଆସିଛି ସଙ୍ଗୀନ ଅଭିଯୋଗ। ସମ୍ପୃକ୍ତ ବରିଷ୍ଠ ଅଧିକାରୀ ନିଜ କ୍ଷମତା ପରିସର ବାହାରେ ଅନ୍ୟ ଏକ ଥାନା ଅଞ୍ଚଳରୁ ଜଣେ ବ୍ୟକ୍ତିଙ୍କୁ ଉଠାଇ ଆଣି ଥାନାରେ ତିନି ଦିନ ଅଟକ ରଖି ନିଜ କ୍ଷମତାର ଅପବ୍ୟବହାର କରିଥିବା ଅଭିଯୋଗ ହୋଇଛି। ସମ୍ପୃକ୍ତ ଅଧିକାରୀ ବିନା କୌଣସି ଅଭିଯୋଗ ବା ମାମଲାରେ କଟକ ଜିଲ୍ଲା ନିଶ୍ଚିନ୍ତକୋଇଲି ଅଞ୍ଚଳର ଜଣେ ବ୍ୟବସାୟୀଙ୍କୁ ଉଠାଇ ଆଣି ୩ ଦିନ ଥାନାରେ ଅଟକ ରଖିବା ସହ ଲକ୍ଷାଧିକ ଟଙ୍କା ଲାଞ୍ଚ ନେଇଥିବା ଅଭିଯୋଗ ହୋଇଛି। ଏହି ଲାଞ୍ଚ କାରବାରରେ ୨ ଜଣ ସାମ୍ବାଦିକ ମଧ୍ୟ ସାମିଲ ଥିବା ଜଣାପଡିଛି। ଏନେଇ ଅନଲାଇନ ମାଧ୍ୟମରେ ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠ ଓ ରାଜ୍ୟ ପୋଲିସ ମହାନିର୍ଦ୍ଦେଶକଙ୍କ ନିକଟରେ ଅଭିଯୋଗ ହେବା ପରେ ଘଟଣା ସମ୍ପର୍କରେ ଜଣାପଡିଛି। ବୁଧବାର ଅଭିଯୋଗକାରୀଙ୍କ ପୁଅ ଯାଜପୁର ଏସପିଙ୍କ ଦ୍ବାରସ୍ଥ ହୋଇ ବଡ଼ଚଣା ଥାନା ଅଧିକାରୀ ଓ ଦୁଇ ଗଣମାଧ୍ୟମ ପ୍ରତିନିଧିଙ୍କ ବିରୋଧରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ମୁତାବକ କଟକ ଜିଲ୍ଲା ଭଦ୍ରେଶ୍ବର ଥାନା କୁରୁଜଙ୍ଗା ଗ୍ରାମର ପ୍ରଫୁଲ୍ଲ କୁମାର ସାହୁଙ୍କ ନିଶ୍ଚିନ୍ତକୋଇଲି ଥାନା କଟିକଟା ବଜାରରେ ଏକ ଔଷଧ ଦୋକାନ ରହିଛି। ଗତ ଜୁନ ୨୪ ତାରିଖରେ ବଡ଼ଚଣା ଥାନାର ସମ୍ପୃକ୍ତ ବରିଷ୍ଠ ଅଧିକାରୀ ଜଣକ ପ୍ରଫୁଲ୍ଲଙ୍କ ଔଷଧ ଦୋକାନରେ ପହଞ୍ଚି ଡାକ୍ତର ଏ.କେ ଜୟସିଂହଙ୍କୁ ଖୋଜିଥିଲେ। ହେଲେ ଡକ୍ଟର ଆସି ନାହାନ୍ତି ବୋଲି ପ୍ରଫୁଲ୍ଲ କହିବାରୁ ତାଙ୍କୁ ବଡ଼ଚଣା ଥାନାକୁ ଉଠାଇ ଆଣିଥିଲେ। ପରେ ପ୍ରଫୁଲ୍ଲଙ୍କ ପୁଅ ଓ ତାଙ୍କର ଜଣେ ସମ୍ପର୍କୀୟ ଥାନାରେ ପହଞ୍ଚି ଉଠାଇ ଆଣିବାର କାରଣ ବା ଅଭିଯୋଗ ସମ୍ପର୍କରେ ପଚାରିଥିଲେ ମଧ୍ୟ ପୋଲିସ କିଛି କହିନଥିଲା। ପରେ ନିଶ୍ଚିନ୍ତକୋଇଲି ଅଞ୍ଚଳର ୨ ଜଣ ଗଣମାଧ୍ୟମ ପ୍ରତିନିଧି ଥାନାରେ ପହଞ୍ଚି ମଧ୍ୟସ୍ଥତା କରିଥିଲେ । ପ୍ରଫୁଲ୍ଲଙ୍କୁ ମୁକୁଳାଇବାକୁ ୫ ଲକ୍ଷ ଟଙ୍କା ଦାବି କରିଥିଲେ । ପ୍ରଫୁଲ୍ଲଙ୍କ ପୁଅ ପ୍ରଦୀପ୍ତ ସୁନା ଗହଣା ବିକିବା ସହ ଧାର କରଜ କରି ଅଢେଇ ଲକ୍ଷ ଟଙ୍କା ଦେବା ପରେ ୩ ଦିନ ଦିନ ଧରି ଥାନାରେ ବସିଥିବା ପ୍ରଫୁଲ୍ଲଙ୍କୁ ପୋଲିସ ଛାଡିଥିଲା। ଅଢେ଼ଇ ଲକ୍ଷ ଟଙ୍କାରୁ ୯୦ ହଜାର ଫୋନପେ ଓ ବଳକା ଟଙ୍କା ନଗଦ ଆକାରରେ ପ୍ରଦୀପ୍ତ ଦେଇଥିଲେ। ଘଟଣା ପରଠୁ ପ୍ରଫୁଲ୍ଲ ଭୟଭୀତ ହୋଇ ରହିଛନ୍ତି । ଏହା ପଛରେ ଏକ ରାକେଟ କାମ କରୁଥିବା ଚର୍ଚ୍ଚା ହେଉଛି ।
ଭୟଙ୍କର ବନ୍ୟା ଉଜାଡି ଦେଲା ଚାଷୀଙ୍କ ସୁନାର ଫସଲ
ଭୟଙ୍କର ବନ୍ୟା ଉଜାଡି ଦେଲା ସୁନାର ଫସଲ । ଚାଷୀଙ୍କ ମୁହଁରୁ ଛଡାଇ ନେଲା ବର୍ଷକର ଖାଦ୍ୟ । ଧାର ଉଦ୍ଧାର କରି ଚାଷ କରିଥିବା ଚାଷୀ ଆଜି ସ୍ବର୍ବଶାନ୍ତ । ମାସକ ତଳେ ରୁଆ ହୋଇଥିବା ଧାନ ବିଲରେ ଜମିଛି ପାଣି । ଯାଜପୁର ଦଶରଥପୁର ଅଂଚଳର ହେକ୍ଟର ହେକ୍ଟର ଚାଷ ନଷ୍ଟ ହୋଇଛି | ତୁରନ୍ତ ସହାୟତା ପାଇଁ ଦାବି କରିଛନ୍ତି ଚାଷୀ ।
ଆସନ୍ତାକାଲି ଠାରୁ ଓଡ଼ିଶାରେ ଆୟୋଜିତ ହେବ ୨ ଦିନିଆ SC/ST ସମ୍ମିଳନୀ
ଆସନ୍ତାକାଲି ଠାରୁ ଓଡ଼ିଶାରେ ଆୟୋଜିତ ହେବ ଦୁଇ ଦିନିଆ ଅନୁସୂଚିତ ଜାତି ଓ ଜନଜାତି ସଂସଦୀୟ କମିଟିର ଜାତୀୟ ସମ୍ମିଳନୀ। ଅଗଷ୍ଟ ୨୯ ଏବଂ ୩୦ ରେ ଏହି ଜାତୀୟ ସମ୍ମିଳନୀ ଅନୁଷ୍ଠିତ ହେବ। ୧୯୯୪ ପରେ ପ୍ରଥମ ଥର ପାଇଁ ଓଡ଼ିଶାରେ କୌଣସି ସଂସଦୀୟ କମିଟିର ବୈଠକ ହେବାକୁ ଯାଉଛି। ସବୁ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ବିଧାନସଭା କମିଟିର ଜଣେ ଅଧ୍ୟକ୍ଷ, 5 ଜଣ ସଦସ୍ୟ ଏବଂ 4 ଜଣ ବିଧାୟକ ଯୋଗଦେବେ। ଅନୁସୂଚିତ ଜାତି ଓ ଜନଜାତି ଉନ୍ନୟନ ସଂସଦୀୟ କମିଟିର 30 ଜଣ ସଦସ୍ୟ ଯୋଗଦେବେ। ଏହାକୁ ଲୋକସଭା ବାଚସ୍ପତି ଓମ ବିର୍ଲା ଉଦଘାଟନ କରିବେ। ଏଥିରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସମେତ ଅନ୍ୟ କେନ୍ଦ୍ରମନ୍ତ୍ରୀମାନେ ଯୋଗଦେବେ। ଏଥିରୁ ସାରା ଦେଶରୁ 395 ଜଣ ପ୍ରତିନିଧି ଯୋଗ ଦେବେ।
ଏହି ସମ୍ମିଳନୀର ବିଷୟବସ୍ତୁ ହେଉଛି ଆଦିବାସୀ ବିକାଶରେ ସଂସଦୀୟ କମିଟିର ଭୂମିକା। ଯାହା ସମ୍ପର୍କରେ ଆଲୋଚନା ହେବ। ଉଦଯାପନୀ ସମାରୋହରେ ରାଜ୍ୟପାଳ ହରିବାବୁ କମ୍ଭମପତିଙ୍କ ସମେତ ରାଜ୍ୟ ମନ୍ତ୍ରୀମାନେ ଉଦବୋଧନ ଦେବେ। ଏ ନେଇ ଆଜି ବିଧାନସଭା ବାଚସ୍ପତିଙ୍କ ଅଧ୍ୟକ୍ଷତାରେ ଏକ ବୈଠକ ବସିଥିଲା। ଦୁଇ ଦିନ ଧରି ଲୋକସେବା ଭବନ କନଭେନସନରେ ଏହି ସମ୍ମିଳନୀ ଆୟୋଜିତ ହେବ। ସାମ୍ବିଧାନିକ ସୁରକ୍ଷା ଓ ଆଦିବାସୀ ବିକାଶ ନେଇ ବିଭିନ୍ନ ରାଜ୍ୟ ନେଇଥିବା ପଦକ୍ଷେପକୁ ଏହି ସମ୍ମିଳନୀରେ ଉପସ୍ଥାପନ କରାଯିବ। 31 ବର୍ଷ ପରେ ଏହା ଓଡ଼ିଶାରେ ଆୟୋଜନ କରାଯାଉଛି। ଓଡ଼ିଶାର ହସ୍ତଶିଳ୍ପ, କାରିଗରୀ, ସଂସ୍କୃତି ଓ କଳାକୁ ନେଇ ଏକ ପ୍ରଦର୍ଶନୀ ସହ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯିବ। ଉଦଯାପନୀ ପରେ ପ୍ରତିନିଧିମାନଙ୍କୁ କୋଣାର୍କ ସହ ଶ୍ରୀଜଗନ୍ନାଥ ଦର୍ଶନ କରାଯିବ।
ଗଣେଶ ପୂଜାରେ ଛିଟିକିଣି ଧରି ବୁଲୁଛନ୍ତି ଲୁଟେରା
ଗଣେଶ ପୂଜାରେ ଛିଟିକିଣି ଧରି ବୁଲୁଛନ୍ତି ଲୁଟେରା । ବାଟୁଳି ବାଜୁଛି, କାଚ ଭାଙ୍ଗୁଛି । ଖାରବେଳନଗର ଥାନା ଠାରୁ ଶହେ ମିଟର ଦୂରରେ ଘଟିଛି ଅଘଟଣ । ଗତକାଲି ଭୁବନେଶ୍ୱର ଜନପଥରେ ଲୁଟେରା ଏଭଳି କାର କାଚ ଭାଙ୍ଗି ଲୁଟିଛନ୍ତି । ଲୁଟ ର ଶିକାର ହୋଇଛନ୍ତି ବାଲେଶ୍ଵରର ସୌମ୍ୟରଞ୍ଜନ କର । ସୌମ୍ୟଙ୍କ ଘର ବାଲେଶ୍ଵର । ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ପତ୍ନୀଙ୍କ ସହ ସପିଂ କରି ଫେରିବା ବେଳକୁ କାର ରୁ ଲାପଟପ, ସୁନା ମୁଦି, ସୁନା କାନଫୁଲ ଲୁଟ ହୋଇଥିବା ଜଣାପଡିଛି । ଏ ନେଇ ଖାରବେଳନଗର ଥାନାରେ ଅଭିଯୋଗ ପରେ ପୋଲିସ ସିସିଟିଭି ଆଧାରରେ ଆରମ୍ଭ କରିଛି ।