ଗଞ୍ଜେଇର ମୂଳୋତ୍ପାଟନ ନେଇ ପୋଲିସର ସ୍ପେଶାଲ ଡ୍ରାଇଭ୍: ୧୯ ମାମଲାରେ ୩୯ ଗିରଫ
ପାରଳାଖେମୁଣ୍ଡି: ନୀଳ ଜହରର ଭୂସ୍ୱର୍ଗ ପାଲଟିଛି ଗଜପତି ଜିଲ୍ଲା । ଏହି ଦୁର୍ଗମ ଅଞ୍ଚଳରେ ଗଞ୍ଜେଇ ମାଫିଆଙ୍କ ମୂଳ ପୋଛ କରିବା ପାଇଁ ଆକ୍ଟିଭ୍ ହୋଇଛି ଜିଲ୍ଲା ପୋଲିସ। ଯାହାର ନେତୃତ୍ୱ ନେଇଛନ୍ତି ଏସପି ତପନ କୁମାର ପଟ୍ଟନାୟକ । ଆକ୍ସନମୋଡରେ ଥିବା ପୋଲିସ ମାଫିଆଙ୍କ ସମସ୍ତ ଯୋଜନା କରୁଛି ପଣ୍ଡ । ଜବତ ହେଉଛି ରେକର୍ଡ ସଂଖ୍ୟକ ଗଞ୍ଜେଇ । ମାତ୍ର କିଛି ଦିନ ମଧ୍ୟରେ ମିଳିଛି ଅଭୁତପୂର୍ବ ସଫଳତା ।
ଗଜପତିରେ ଗଞ୍ଜେଇର ହେବ ମୂଳୋତ୍ପାଟନ । ଦୁର୍ଗମ ଅଞ୍ଚଳରେ ଦୂର ହେବ ମାଫିଆ ରାଜ । ଏ ନେଇ ପୋଲିସ ଆରମ୍ଭ କରିଛି ସ୍ପେଶାଲ ଡ୍ରାଇଭ୍ । ଏଣିକି ଗଜପତି ଜିଲ୍ଲାର ଦୁର୍ଗମ ଅଞ୍ଚଳରୁ କମିବ ଗଞ୍ଜେଇ ମାଫିଆଙ୍କ ରାଜ୍ । ଜିଲ୍ଲାରେ ଗଞ୍ଜେଇର ମୂଳୋତ୍ପାଟନ ପାଇଁ ପୋଲିସ ପ୍ରଶାସନ ପକ୍ଷରୁ ଆରମ୍ଭ ହୋଇଛି ଆକ୍ସନ ପ୍ଲାନ୍ । ପୋଲିସ ଏହି ସ୍ୱତନ୍ତ୍ର ଅଭିଯାନକୁ ବିଭିନ୍ନ ମହଲରେ ସ୍ୱାଗତ କରାଯାଇଛି । ତଥ୍ୟ ଅନୁଯାୟୀ, ଚଳିତ ବର୍ଷ ମାତ୍ର ୨୦ ଦିନ ମଧ୍ୟରେ ୧୯ଟି ମାମଲାରେ ୩୯ଜଣ ଗିରଫ ହୋଇଥିବା ବେଳେ ୮କ୍ୟୁଣ୍ଟାଲ ୮୭୩ କିଲୋ ୭୦୦ ଗ୍ରାମ ଗଞ୍ଜେଇ ଜବଦ ହୋଇଛି । ଏଥିସହ ଗୋଟିଏ କଣ୍ଟେନର, ୪ଟି ଟ୍ରକ୍ ୧୪ଟି କାର ସହ ୧ ଲକ୍ଷ ୨୪ ହଜାର ୭ଶହ ଟଙ୍କା ଜବତ କରିଛି ପୋଲିସ ।
ଗଜପତି ଜିଲ୍ଲା ମୋହନା, ଅଡ଼ବା, ରାୟଗଡ, ଉଦୟଗିରି, ରାମଗିରି, ଛେଳିଗଡ, ଆଦି ପାହାଡିଆ ଅଞ୍ଚଳରେ ଏକର ଏକର ଜମିରେ ଗଞ୍ଜେଇ ଚାଷ ହୋଇଥାଏ । ବେଆଇନ ଭାବରେ ଚାଷ କରି ରାଜ୍ୟ ତଥା ରାଜ୍ୟ ବାହାରକୁ ଚାଲାଣ ହେଉଛି ଗଞ୍ଜେଇ । କିନ୍ତୁ ପ୍ରତ୍ୟେକ ସିଜନରେ ପ୍ରଶାସନ ପକ୍ଷରୁ ରାଜସ୍ୱ, ଜଙ୍ଗଲ, ଅବକାରୀ ଓ ପୋଲିସର ମିଳିତ ଅପରେସନରେ ନଷ୍ଟ କରାଯାଉଛି । ତଥାପି ବର୍ଷ ତମାମ ଵିଭିନ୍ନ ଉପାୟରେ ଚୋରା ଚାଲାଣ ହେଉଛି କୋଟି କୋଟି ଟଙ୍କାର ଏହି ମାଦକ ଦ୍ରବ୍ୟ । ତେବେ ଜିଲ୍ଲାରେ ନୂତନ ଏସପି ଦାୟୁତ୍ବ ନେବା ପରେ ଏହା ଉପରେ ସାମାନ୍ୟ ରୋକ୍ ରାଗିଥିବା କହିଛନ୍ତି ବୁଦ୍ଧିଜୀବୀ ଓ ଆଉନଜୀବୀ । ଆଦିବାସୀଙ୍କ ଆର୍ଥିକ ଦୁର୍ବଳତା ଓ ନୀରହିତାର ସୁଯୋଗ ନେଇ ଗଜପତି ଜିଲ୍ଲାରେ ଗଞ୍ଜେଇ ମାଫିଆଙ୍କ ରାଜ ଚାଲୁଥିବା ବେଳେ ଏହାର ମୂଳୋତ୍ପାଟନ କରିବା ପାଇଁ ଆକ୍ସନ ପ୍ରସ୍ତୁତ କରିଛି ପୋଲିସ ।
ଏକର ଏକର ଜମି ଛାରଖାର୍: ଭାଙ୍ଗିଗଲା ଘର, ଉଜୁଡ଼ିଲା ଚାଷ
ଚଣ୍ଡିଖୋଲ: ବନ୍ୟା ଛାଡିଛି ହେଲେ ବଢିଛି ଲୋକଙ୍କ ଦୁର୍ଦ୍ଦଶା । କେଉଁଠି ନଦୀ ବନ୍ୟା ପଶି ବ୍ୟାପକ କ୍ଷୟକ୍ଷତି କରିଛି ତ ଆଉ କେଉଁଠି ନଦୀ ବନ୍ଧରେ ଘାଇ ହୋଇ ବ୍ୟାପକ ଫସଲ ନଷ୍ଟ ହୋଇଛି । ଆଉ ଏହି ଦୁର୍ଦ୍ଦଶା ଭିତରେ ବନ୍ୟା ପୀଡ଼ିତ ନିଜର ଭଙ୍ଗା କୁଡ଼ିଆ ସଜାଡ଼ିବାରେ ଲାଗି ପଡ଼ିଛନ୍ତି । ଦେଖିବା ଯାଜପୁର ଜିଲ୍ଲା ବଡ଼ଚଣା ବ୍ଲକରୁ ଏହି ରିପୋର୍ଟ ।
ବନ୍ୟା ଆଣି ଦେଲା ଦୁଃଖ । ଭାଙ୍ଗିଗଲା ଘର, ଉଜୁଡ଼ିଲା ଚାଷ । ଏକର ଏକର ଜମି ହେଲା ଛାରଖାର । ଆଉ ଦୁର୍ଦ୍ଦାଶା ଭିତରେ ଭଙ୍ଗା କୁଡ଼ିଆ ସଜାଡ଼ିବାରେ ଲାଗି ବନ୍ୟା ପୀଡ଼ିତ । ଏ ଚିତ୍ର ହେଉଛି ଯାଜପୁର ଜିଲ୍ଲା ବଡ଼ଚଣା ବ୍ଲକ ଦେକୁଡ଼ି ଗାଁର । ବନ୍ୟା ଛାଡିବା ପରେ ଏଠାରେ ଲୋକଙ୍କ ଦୁର୍ଦ୍ଦଶା ବଢିଯାଇଛି । କେଉଁଠି ଘର ମାଟି ମିଶି ଯାଇଛି ତ କେଉଁଠି କାନ୍ଥ ଭଙ୍ଗି ନଇଁ ପଡିଛି ଚାଳ ଘର । ଏହାରି ଭିତରେ ନିଜର ଭଙ୍ଗା କୁଡିଆକୁ ସଜାଡିବା ଲାଗି ପଡିଛନ୍ତି ବନ୍ୟା ପୀଡିତ । ଆଉ କିଏ ଭାଙ୍ଗା କାନ୍ଥ ପୁଣି ଥରେ ସଳଖେଇବାକୁ ଚେଷ୍ଟା କରୁଛି ତ କିଏ କୌଣସି ଉପାୟ ନପାଇ ଭଙ୍ଗା ନୁଆଣିଆ ଘରେ ସାହାରା ନେଉଛି ।
କେବଳ ଏତିକି ନୁହେଁ ବନ୍ୟା ଯୋଗୁଁ ଚାଷୀର ମେରୁଦଣ୍ଡ ଭାଙ୍ଗି ଯାଇଛି । ଏକର ଏକର ଚାଷ ଜମିରେ ବନ୍ୟା ପାଣି ପଶିବା ଯୋଗୁଁ ସମ୍ପୂର୍ଣ୍ଣ ରୂପେ ନଷ୍ଟ ହୋଇଛି । ଫଳରେ ଚାଷୀର ଦୁଃଖ ଦ୍ୱିଗୁଣିତ ହୋଇଛି । ଏସବୁ ଭିତରେ ପାଣି ଛାଡ଼ିବା ପରେ ବର୍ଷକର ଆହର ପାଇଁ ଜମିରେ ପୁଣି ଥରେ ବେଉସଣ ଆରମ୍ଭ କରିଛି ଚାଷୀ । ଏପଟେ ବନ୍ୟା ପୀଡିତଙ୍କୁ କୌଣସି ରିଲିଫ ସାମଗ୍ରୀ କି ଚାଷୀଙ୍କୁ ସରକାରୀ ସହାୟତା ମିଳିନଥିବା ଅଭିଯୋଗ ହୋଇଛି । ତେବେ ଖୁବ ଶୀଘ୍ର ପଦକ୍ଷେପ ନିଆଯିବ ବୋଲି କହିଛନ୍ତି ଦର୍ପଣ ଅତିରିକ୍ତ ତହସିଲଦାର । ବନ୍ୟାରେ କ୍ଷତିଗ୍ରସ୍ତ ହୋଇଥିବା ଅଂଚଳରେ ପ୍ରଶାସନ ପକ୍ଷରୁ ସମସ୍ତ ସରକାରୀ ସହାୟତା ଦେବା ଜରୁରୀ ହୋଇ ପଡିଛି ।
‘ମହଲା କ୍ଲାସ’ ପାଇଁ ଚର୍ଚ୍ଚାରେ ସିନେମା ବାଲା ବାବୁ, ମୋଟର ସାଇକେଲରେ ଚାଲିଛି କ୍ଲାସ
ଛତିଶଗଡ଼: ଗତ ମାର୍ଚ୍ଚ ମାସ ଠାରୁ ଲକଡାଉନ ପାଇଁ ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିଛି । ଏହାକୁ ନଜରରେ ରଖି ଅନଲାଇନ କ୍ଲାସ ଆରମ୍ଭ ହୋଇଛି । ଦୀର୍ଘ ଦିନ ହେବ ସ୍କୁଲ ବନ୍ଦ ରହିଛି । ଏବେ ସାମାଜିକ ଦୂରତାକୁ ନଜରରେ ରଖି ନୂଆ ଗାଇଡଲାଇନ ସହିତ ସ୍କୁଲ ଖୋଲିବା ପାଇଁ ପ୍ରସ୍ତୁତି ଜାରି ରହିଛି । ଏଭଳି ପରିସ୍ଥିତିରେ ଛତିଶଗଡ଼ର କୋରିୟା ଜିଲ୍ଲାରେ ଶିକ୍ଷକ ଅଶୋକ ଲୋଧି ପିଲାଙ୍କୁ ପଢାଇବାର ଏକ ନିଆରା ପ୍ରୟାସ ଆପଣାଇଛନ୍ତି । ସେ ‘ମହଲା କ୍ଲାସ’ ଆରମ୍ଭ କରିଛନ୍ତି । ତେବେ ସାହି ମାନଙ୍କରେ ବୁଲି ବୁଲି ସେ ପିଲାଙ୍କୁ ପାଠ ପଢାଉଛନ୍ତି । ମୋଟର ସାଇକେଲରେ ଏକ ଟିଭି ଲଗାଇ ସେଥିରେ ପିଲା ମାନଙ୍କୁ ପାଠ ପଢାଉଛନ୍ତି ଉକ୍ତ ଶିକ୍ଷକ । ଟିଭି ସହିତ ସ୍ପିକର ସାଙ୍ଗରେ ନେଇ ବୁଲୁଛନ୍ତି ଅଶୋକ । ପଢା ସହିତ ପିଲାମାନେ କାର୍ଟୁନ ମଧ୍ୟ ଦେଖୁଛନ୍ତି ।
Chhattisgarh: Nicknamed ‘cinema wale babu’, a teacher in Koriya conducts ‘mohalla’ classes for school students with TV & speaker on his motorcycle. “I thought this is a good way to attract students,” he says
“It’s fun. We watch cartoons & study at the same time,” says a student pic.twitter.com/cPML94eHTN
— ANI (@ANI) September 12, 2020
“I don’t bear any extra cost as the TV is from our school & I am anyway supposed to visit places to take classes. Local administration also encouraged me,” says teacher Ashok Lodhi who has earned the moniker of ‘Cinema wale babu’ for his innovative teaching methods. #Chhattisgarh https://t.co/sY4qP8O1UO pic.twitter.com/nkTWVWbPQ7
— ANI (@ANI) September 12, 2020
ଏହି କ୍ଲାସ ପାଇଁ ଅଶୋକ ଲୋଧି ସିନେମା ବାଲା ବାବୁ ନାମରେ ପରିଚିତ ହୋଇ ସାରିଛନ୍ତି । ତେବେ ନିଜର ଏଭଳି ନିଆରା ସ୍କୁଲ ପାଇଁ କିଛି ଅଧିକ ଟଙ୍କା ଖର୍ଚ୍ଚ କରିବାକୁ ପଡ଼ୁନାହିଁ ବୋଲି ଗଣମାଧ୍ୟମ ସାକ୍ଷାତକାରରେ କହିଛନ୍ତି ଅଶୋକ । ତେବେ ସେ ସାଙ୍ଗରେ ନେଉଥିବା ଟିଭିଟି ସ୍କୁଲର ଏବଂ ତାହାକୁ ଭିନ୍ନ ଭିନ୍ନ ସ୍ଥାନକୁ ନେଇ କ୍ଲାସ କରିବା ତାଙ୍କ କର୍ତ୍ତବ୍ୟରେ ସାମିଲ ଅଛି ବୋଲି ସେ କହିଛନ୍ତି ।
ଫୋକସରେ ଟ୍ୱିନ୍ ସିଟି : ୫ ପ୍ଲାଟୁନ୍ ଓ ୫୦ ପୋଲିସ ଅଧିକାରୀ ନିଯୁକ୍ତ, ରାଜଧାନୀରେ ୩ ଡିସିପିଙ୍କୁ ଦାୟିତ୍ୱ…
ଭୁବନେଶ୍ୱର/କଟକ: ରାଜଧାନୀ ସଂକ୍ରମଣ ଏବେ ସରକାରଙ୍କ ମୁଣ୍ଡବିନ୍ଧାର କାରଣ । କଟକରେ ବି ସ୍ଥିତି ସଙ୍ଗୀନ । ସଂକ୍ରମିତ ସଂଖ୍ୟାରେ ରୋକ୍ ଲାଗିବା ସମ୍ଭବ ହେଉନି । ଏଭଳି ସ୍ଥିତିରେ କଟକଣାକୁ ଅଧିକ ଶକ୍ତ କରିବା ସପକ୍ଷରେ ନିଷ୍ପତ୍ତି ନେଇଛି କମିଶନରେଟ୍ ପୋଲିସ । ରାଜଧାନୀରେ ଅଧିକ ୫ ପ୍ଲାଟୁନ ଫୋର୍ସ ମୁତୟନ କରାଯିବ । ଟ୍ୱିନ୍ ସିଟିରେ ଆହୁରି ୫୦ ଅଧିକାରୀ ଭୁବନେଶ୍ୱରର କୋଭିଡ୍ କଟକଣା ସ୍ଥିତି ଉପରେ ନଜର ରଖିବେ ।
ତେବେ କଟକଣାର ସ୍ଥିତି ପରଖିବା ସହ ସହରବାସୀଙ୍କୁ ସଚେତନ କରାଇବା ଦିଗରେ ମଧ୍ୟ କାର୍ଯ୍ୟ କରାଯିବ । କରୋନା ସଂକ୍ରମଣ କ୍ରମାଗତ ଭାବେ ବଢୁଥିବା ହେତୁ ସାଧାରଣରେ ଏହାକୁ ନେଇ ଭୁଲ ଧାରଣା ବସା ବାନ୍ଧିଲାଣି । ଲୋକେ, ଭ୍ୟାକ୍ସିନ୍ ନଆସିବା ପର୍ଯ୍ୟନ୍ତ ସଂକ୍ରମଣକୁ ସ୍ୱାଭାବିକ ଜୀବନଶୈଳୀ ବୋଲି ଭାବିନେଲେଣି । ଯଦିଓ ଏହା ଭୁଲ, ମାତ୍ର ରାଜଧାନୀରେ ସ୍ଥିତି ଏବେ -ଏହା । ଅର୍ଥନୀତି ନିମ୍ନଗାମୀ ହେବା ପରେ ସରକାର ବାଧ୍ୟ ହୋଇ କଟକଣା ହଟାଇଲେ । କେନ୍ଦ୍ର ସରକାର ମଧ୍ୟ ରାଜ୍ୟରେ ଅନାବଶ୍ୟକ କଟକଣା ନ ଲଦିବା ପାଇଁ ରାଜ୍ୟ ସରକାରଙ୍କୁ ଜଣାଇଲେ । ଏହାର ଅର୍ଥ ଏହା ଆଦୌ ନୁହେଁ ଯେ, ଲକଡାଉନ୍ ଖୋଲି ସରକାର ସ୍ୱାଭାବିକ ଯାତାୟାତକୁ ଅନୁମତି ଦେଲେ । ଭୁବନେଶ୍ୱରେ କଟକଣା ହଟିବା ପରେ ଏବେ ସ୍ଥିତି ଏମିତି ହିଁ ହୋଇଛି । ଅନାବଶ୍ୟକ ଗହଳି ବଢ଼ିଛି । ଏଣୁ ସରକାର ବାଧ୍ୟ ହୋଇ ପୁଣି ନୂଆ ଢଙ୍ଗରେ ସଚେତନତା କାର୍ଯ୍ୟକ୍ରମ ହାତକୁ ନେବା କଥା ଚିନ୍ତା କରୁଛନ୍ତି ।
କମିଶନରେଟ୍ ପୋଲିସ ବିଶେଷ ଭାବେ ହଟ୍ସପଟ୍ ଓ ମାର୍କେଟ ଜୋନକୁ ସ୍ୱତନ୍ତ୍ର ଫୋକସ୍ ଦେବ । ଚଢାଉ କରି ଗହଳି ନିୟନ୍ତ୍ରଣ କରିବାକୁ ଚେଷ୍ଟା କରିବ । ଅଯଥା ଯାତାୟାତ ଓ ଖଟିକୁ ରୋକିବା ଦିଗରେ କାମ କରିବ । ତେବେ ଦାୟିତ୍ୱରେ ରହୁଥିବା ପୋଲିସ କର୍ମଚାରୀମାନଙ୍କୁ ପିପିସି କିଟ୍ ମଧ୍ୟ ଦିଆଯିବ । ପୋଲିସ କର୍ମଚାରୀମାନେ ସାଧାରଣ ଲୋକଙ୍କ ପାଖରେ ପହଞ୍ଚି ଜନସମର୍ଥନ ଲୋଡ଼ିବେ । ଲୋକଙ୍କୁ ବୁଝେଇ ସୁଝେଇ ସଚେତନ କରିବାକୁ ଚେଷ୍ଟା କରିବେ । ଏହାବ୍ୟତୀତ ଭୁବନେଶ୍ୱରକୁ ତିନୋଟି ଜୋନରେ ବିଭକ୍ତ କରାଯିବ । ପ୍ରତି ଜୋନ ପାଇଁ ଜଣେ ଜଣେ ଡିସିପି ଦାୟିତ୍ୱରେ ରହିବେ । କିଭଳି ଭାବେ ସହରରେ ହେଉଥିବା ଅଯଥା ଗହଳି ଭାଙ୍ଗିବ ସେ ନେଇ ଡିସିପିମାନେ ପଦକ୍ଷେପ ନେବେ ।
ଟାଟା ପ୍ରୋଜେକ୍ଟସ ଲିମିଟେଡ ନିର୍ମାଣ କରିବ ନୂଆ ସଂସଦ ଭବନ, ମିଳିଛି ୮୬୧.୯୦ କୋଟି ଟଙ୍କାର କଣ୍ଟ୍ରାକ୍ଟ
ନୂଆଦିଲ୍ଲୀ: ଟାଟା ପ୍ରୋଜେକ୍ଟସ ଲିମିଟେଡ ୮୬୧.୯୦ କୋଟି ଟଙ୍କାରେ ନୂଆ ସଂସଦ ଭବନ ନିର୍ମାଣ କରିବା ପାଇଁ କଣ୍ଟ୍ରାକ୍ଟ ପାଇଛି । ଟାଟା ନିର୍ମାଣ ପାଇଁ ପକାଯାଇଥିବା ଟେଣ୍ଡରରେ ଲାର୍ସନ ଆଣ୍ଡ ଟବ୍ରୋକୁ ପଛରେ ପକାଇଛି । ଲାର୍ସନ ୮୬୫ କୋଟିର ଟେଣ୍ଡର ପକାଇଥିଲା । Central Public Works Department ନୂଆ ସଂସଦ ନିର୍ମାଣ ପାଇଁ ବୁଧବାରକୁ ଟେଣ୍ଡର ଖୋଲିଲା । ଯେଉଁଥିରେ ଟାଟାକୁ ଏହି ଟେଣ୍ଡର ମିଳିଲା । ସୂଚନା ମୁତାବକ ଏହି ପ୍ରକଳ୍ପ ଏକ ବର୍ଷ ମଧ୍ୟରେ ନିର୍ମାଣ ହେବାର ସମ୍ଭାବନା ରହିଛି । CPWD ନୂଆ ସଂସଦ ଭବନ ନିର୍ମାଣ ପାଇଁ ୯୪୦ କୋଟି ଟଙ୍କା ଖର୍ଚ୍ଚ ହେବାକୁ ନେଇ ଅନୁମାନ କରୁଥିଲେ ।
ଖବର ଅନୁସାରେ ନୂଆ ବିଲଡିଙ୍ଗକୁ ତ୍ରିକୋଣ ଆକାରର ଡିଜାଇନରେ ନିର୍ମାଣ କରାଯିବ । ବର୍ତ୍ତମାନ ଥିବା ସଂସଦ ଭବନ ବ୍ରିଟିଶ ସମୟରେ କରାଯାଇଥିଲା ଏବଂ ଏହାର ଆକୃତି ବୃତ୍ତାକାର । ଯଦିଓ ଦେଶ ସ୍ୱାଧୀନ ହେବାର ୭୫ ବର୍ଷରେ ପଦାର୍ପଣ କରିବ ତଥାପି ସଂସଦ ଭବନ ଆଜି ମଧ୍ୟ ପୁରୁଣା । ଏଠାରେ ଭିନ୍ନ ଭିନ୍ନ ସମସ୍ୟା ସାମ୍ନାକୁ ଆସୁଛି । ତେବେ ୧୫ ଅଗଷ୍ଟ ୨୦୨୨କୁ ୭୫ ବର୍ଷ ସ୍ୱାଧୀନତା ଦିବସରେ ସାଂସଦମାନେ ନୂଆ ସଂସଦରେ ବସନ୍ତୁ ଏହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଇଛା ।
ସୂଚନାଯୋଗ୍ୟ ପୂର୍ବତନ ଲୋକସଭା ବାଚସ୍ପତି ସୁମିତ୍ରା ମହାଜନ, ଲୋକସଭା ବାଚସ୍ପତି ଓମ୍ ବିର୍ଲା ଏବଂ ଉପରାଷ୍ଟ୍ରପତି ଭେଙ୍କେୟା ନାଇଡୁ ନୂଆ ସଂସଦ ଭବନର ଆବଶ୍ୟକତାକୁ ନେଇ ପୂର୍ବରୁ କହି ସାରିଛନ୍ତି ।
ସଂସଦ ଭବନ ୧୯୧୧ରେ ନିର୍ମାଣ ଆରମ୍ଭ ହୋଇଥିଲା । ସେହି ସମୟରେ ବ୍ରିଟିଶ୍ ଶାସନରେ ଦିଲ୍ଲୀ ଭାରତର ରାଜଧାନୀ ହୋଇଥିଲା । ୧୯୨୭ରେ ସଂସଦ ଭବନର ଉଦଘାଟନ ହୋଇଥିଲା । ଏବେ ସଂସଦରେ ସଟ ସର୍କିଟିଙ୍ଗ ଭଳି ଅନେକ ସମସ୍ୟା ଦେଖା ଦେଉଛି । ତେଣୁ ନୂଆ ସଂସଦ ନିର୍ମାଣ ପାଇଁ ଯୋଜନା ପ୍ରସ୍ତୁତି ହୋଇଛି ।
ସୁପ୍ରିମକୋର୍ଟଙ୍କ ନିଷ୍ପତ୍ତିକୁ ମହାରାଷ୍ଟ୍ରରେ ବିରୋଧ: ସ୍ଥଗିତାଦେଶକୁ ଭୁଲ ବୋଲି କହିଲେ ବିକ୍ଷୋଭକାରୀ
ପୁନେ: ସୁପ୍ରିମକୋର୍ଟଙ୍କ ଆଦେଶକୁ ମହାରାଷ୍ଟ୍ରରେ ବିରୋଧ । ଚଳିତ ବର୍ଷ ‘ମରାଠା କୋଟା’କୁ ଲାଗୁ କରାଯିବା ଉପରେ ସ୍ଥଗିତାଦେଶ ଜାରି କରିଥିଲେ ମାନ୍ୟବର ସୁପ୍ରିମକୋର୍ଟ । ଯାହାକୁ ନେଇ ଏବେ ପୁନେରେ ବିକ୍ଷୋଭ ଦେଖିବାକୁ ମିଳିଛି । କୋର୍ଟଙ୍କ ଏଭଳି ନିଷ୍ପତ୍ତିକୁ ଭୁଲ ବୋଲି କହିଛି ମରାଠା କ୍ରାନ୍ତି ମୋର୍ଚ୍ଚା । ଗତ ୧୦ ବର୍ଷ ଧରି ମାମଲା ଚାଲିଆସୁଥିବା ବେଳେ ଏହି ମାମଲାରେ ନିଜ ମତ ରଖିବା ପାଇଁ ପ୍ରତିବାଦ ବ୍ୟତୀତ ଅନ୍ୟ କୌଣସି ପନ୍ଥା ନଥିବା କହିଛନ୍ତି ବିକ୍ଷୋଭକାରୀ ।
ସୂଚନା ଯୋଗ୍ୟ ଯେ, ଗତ ୯ ତାରିଖରେ ମରାଠା କୋଟା ସମ୍ପର୍କିତ ଏକ ମାମଲାର ଶୁଣାଣି କରିଥିଲେ ମାନ୍ୟବର ସୁପ୍ରିମକୋର୍ଟ । ଶୁଣାଣି ପରେ ନିଜ ନିଷ୍ପତ୍ତିରେ ଚଳିତ ବର୍ଷ ଶିକ୍ଷା ଓ ନିଯୁକ୍ତି କ୍ଷେତ୍ରରେ ମରାଠା କୋଟା ଲାଗୁକରାନଯିବାକୁ ନିର୍ଦ୍ଦେଶ ଦେଇଥିଲେ କୋର୍ଟ । ଏଥିସହିତ ମାମଲା ଆଗାମୀ ଶୁଣାଣି ପାଇଁ ଏକ ସ୍ୱତନ୍ତ୍ର ଖଣ୍ଡପିଠ ଗଠନ ନେଇ ସୁପ୍ରିମକୋର୍ଟଙ୍କ ପ୍ରଧାନ ବିଚାରପତିଙ୍କ ନିକଟକୁ ସୁପାରିସ୍ କରିଥିଲେ ମାମଲାର ଶୁଣାଣି କରୁଥିବା ଜଷ୍ଟିସ୍ । କିନ୍ତୁ ମାନ୍ୟବର କୋର୍ଟଙ୍କ ଏଭଳି ନିଷ୍ପତ୍ତକୁ ନେଇ ଏବେ ପ୍ରତିବାଦ ଦେଖିବାକୁ ମିଳିଛି ।
Pune: Maratha Kranti Morcha protests against Supreme Court stay order on Maratha reservation.
"The stay order has been passed incorrectly & govt should vacate it soon. The issue has been going on for 10 years. Marathas have no other way but to stage a protest," says a dissenter. pic.twitter.com/29b2DeU0Xv
— ANI (@ANI) September 17, 2020
କଙ୍ଗନାଙ୍କ ଅଫିସ ଭଙ୍ଗା ପ୍ରସଙ୍ଗ : ଶରଦ ପାଓ୍ୱାର କହିଲେ ଏହା ଜରୁରୀ ନଥିଲା
ପକୁଡି ବିକି କାହିଁକି ଫାଇନ୍ ଦେଲେ ଯୁବ କଂଗ୍ରେସ ରାଜ୍ୟ ସଭାପତି ? ଜାଣନ୍ତୁ
ଭୁବନେଶ୍ୱର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମ ଦିବସକୁ ପ୍ରତିବାଦ ସ୍ୱରୂପ ନିଆରା ଢଙ୍ଗରେ ପାଳିଛନ୍ତି କଟକ ଛାତ୍ର କଂଗ୍ରେସର ସଦସ୍ୟ । ଏହି ଦିବସକୁ ବେରୋଜଗାର ଦିବସ ଭାବେ ପାଳନ କରି ଚା ବିକିଛନ୍ତି ସଦସ୍ୟମାନେ। କଟକ ଛାତ୍ର କଂଗ୍ରେସର ସଦସ୍ୟମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମ ଦିବସକୁ ନିଆରା ଢଙ୍ଗରେ ପାଳିଛନ୍ତି । କଟକ କଚେରୀ ନିକଟରେ ଏକ ଚା ଦୋକାନ ଖୋଲି ଚା ବିକିଛନ୍ତି ଏହି ଯୁବକମାନେ । ଏଥିସହିତ ମୋଦିଙ୍କ ଜନ୍ମ ଦିବସକୁ ସେମାନେ ବେରୋଜଗାର ଦିବସ ଆଖ୍ୟା ଦେଇଛନ୍ତି ।
ଛାତ୍ର କଂଗ୍ରେସ ସଦସ୍ୟମାନେ ହାତରେ କେଟିଲ ଧରି ସାମାଜିକ ଦୂରତ୍ୱ ରଖି ଦୋକାନକୁ ଆସୁଥିବା ସାଧାରଣ ଲୋକଙ୍କୁ ଚା’ ଦେବା ସହ ପାଠଶାଠ ପଢି ସେମାନେ କିପରି ମୋଦିଙ୍କ ଶାସନ ସମୟରେ ବେକାର ଅଛନ୍ତି ତାହା ବଖାଣିଥିଲେ। ଗତ ଛଅ ବର୍ଷ ମଧ୍ୟରେ ମୋଦି ଦେଇଥିବା ନିଯୁକ୍ତି ଓ ଚାକିରୀ ପ୍ରତିଶୃତି କେବଳ ନାରାବାଜିରେ ରହିଛି ବୋଲି ସେମାନେ ଅଭିଯୋଗ କରିଛନ୍ତି । ଛାତ୍ର କଂଗ୍ରେସ ଏଭଳି ନିଆରା ପ୍ରତିବାଦ ଜରିଆରେ ସାଧାରଣରେ ସଚେତନତା ସୃଷ୍ଟି କରିଥିଲେ ।
ପକୁଡି ବିକି ଫାଇନ୍ ଦେଲେ
ଅନ୍ୟପଟେ ପକୁଡି ବିକି ଫାଇନ୍ ଦେଇଛନ୍ତି ଯୁବ କଂଗ୍ରେସ ସଭାପତି ସ୍ମୃତି ରଂଜନ ଲେଙ୍କା । ଭୁବନେଶ୍ୱରରେ ମୋଦିଙ୍କ ଜନ୍ମଦିନରେ ପକୁଡି ବିକି ପ୍ରତିବାଦ କରୁଥିଲା ଯୁବ କଂଗ୍ରେସ । କିନ୍ତୁ ପକୁଡି ବିକିବା ବେଳେ କର୍ମୀ ଭୁଲି ଯାଇଥିଲେ କରୋନା କଟକଣା କଥା । ମୋଦିଙ୍କୁ ବିରୋଧ କରିବାକୁ ତାଙ୍କ ଜନ୍ମଦିନକୁ ରାଷ୍ଟ୍ରୀୟ ବେରୋଜଗାରୀ ଦିବସ ଭାବେ ପାଳନ କରିବା ନିଶାରେ କଂଗ୍ରେସ କର୍ମୀ ଭୁଲିଯାଇଥିଲେ ସାମାଜିକ ଦୂରତା କଥା । କିନ୍ତୁ ପୋଲିସ ଭୁଲିନଥିଲା କରୋନା କଟକଣା କଥା । କରୋନା କାଳରେ ଏମିତି ପକୁଡି ବିକା କ୍ୟାପିଟାଲ ଥାନା ପୋଲିସ ନଜର ପଡିଥିଲା । ତା’ପରେ ପୋଲିସ ଫାଇନ କାଟିଥିଲା । ତେବେ ଆମ ପାଖେ ପଇସା ନାହିଁ ଫାଇନ୍ କେମିତି ଦେବୁ କହି ଯୁବ କଂଗ୍ରେସ ସଭାପତି ସ୍ମୃତି ରଞ୍ଜନ ଲେଙ୍କା ଭିକ୍ଷା କରିଥିଲେ । ଭିକ୍ଷା ଟଙ୍କାରେ ସେ ଫାଇନ୍ ଭରିଛନ୍ତି ।
Ladakh LAC News : ଚୀନକୁ ରାଜନାଥଙ୍କ ରୋକଠୋକ, ବେଜିଂର କଥା ଗୋଟେ କାମ ଗୋଟେ
ନୂଆଦିଲ୍ଲୀ: ଲଦାଖ ସ୍ଥିତିକୁ ନେଇ ରାଜ୍ୟସଭାରେ ଆଜି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ନିଜ ବକ୍ତବ୍ୟ ରଖିଛନ୍ତି । ଚୀନ୍ ବିରୋଧରେ ସେ ଦୋମୁହାଁ ନୀତିର ଅଭିଯୋଗ ଆଣିଛନ୍ତି । ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, ଚୀନ୍ କହୁଛି ଗୋଟିଏ କଥା କିନ୍ତୁ କରୁଛି ଅଲଗା । ଚୀନ୍ ସହିତ ସଂପର୍କରେ ସୁଧାର ଆସି ପାରିବ କିନ୍ତୁ ସୀମା ବିବାଦର ପ୍ରଭାବ ନିଶ୍ଚିତ ଭାବେ ସଂପର୍କ ଉପରେ ପଡିବ । ଚୀନର ଗତିବିଧିରୁ ଜଣାପଡ଼ୁଛି ଏହା କହୁଛି ଗୋଟେ ଏବଂ କରୁଛି ଗୋଟେ । ଆଲୋଚନା ପରେ ମଧ୍ୟ ଚୀନ ଅଗଷ୍ଟ୨୯-୩୦ରେ ଉସୁକାଇବା ଭଳି କାମ କରିଥିଲା । ଏଥିରୁ ଚୀନର ଦୋମୁହାଁ ନୀତି କଥା ସାମ୍ନାକୁ ଆସୁଛି । ରାଜ୍ୟସଭାରେ ରାଜନାଥ ସିଂ ସ୍ପଷ୍ଟ କରି ଦେଇଛନ୍ତି ଯେ, ଲଦାଖରେ ଭାରତୀୟ ସେନାକୁ ପାଟ୍ରୋଲିଂ କରିବାରୁ କେହି ମଧ୍ୟ ରୋକିବାର ସାହାସ କରିପାରିବେ ନାହିଁ ।
ଚୀନ ସହ ସୀମା ବିବାଦକୁ ନେଇ ସେ କହିଥିଲେ ଯେ, ଲଦାଖର ୩୮ ହଜାର ବର୍ଗ କିମି ଅଂଚଳ ଚୀନ୍ ଅଧିନରେ ଅଛି । ସେହିଭଳି ପାକିସ୍ତାନ ଅବୈଧ ଭାବରେ ୫ ହଜାର ୧୮୦ କିଲୋମିଟର ଭାରତୀୟ ଅଞ୍ଚଳ ଚୀନକୁ ଦେଇଦେଇଛି । ଚୀନ ଅରୁଣାଚଳ ପ୍ରଦେଶରେ ୯୦ ହଜାର ବର୍ଗ କିଲୋମିଟର ଅଞ୍ଚଳକୁ ନିଜର ବୋଲି ଦାବି କରୁଥିବା କଥା ମଧ୍ୟ କହିଛନ୍ତି ରାଜନାଥ ସିଂ । ତେବେ ସୀମାକୁ ନେଇ ବିବାଦ ପୂର୍ବରୁ ମଧ୍ୟ ହୋଇଛି । ଏହାକୁ ନେଇ ଉଭୟ ଦେଶର ବୟାନ୍ ଭିନ୍ନ ଭିନ୍ନ । ମଇ ମାସରେ ଚୀନ ଗଲଓ୍ୱାନ ଠାରେ ଭାରତୀୟ ସୈନିକଙ୍କ ପେଟ୍ରୋଲିଂକୁ ଅଟକାଇଥିଲେ । ଯାହାପରେ ୧୫ ଜୁନରେ ପିଏଲଏକୁ କଡ଼ା ଜବାବ ଦେଲା ଭାରତୀୟ ସେନା ।
ରାଜନାଥ ରାଜ୍ୟସଭାରେ ଏହା ମଧ୍ୟ କହିଛନ୍ତି କି ଚୀନ ଯାହା କଲା ତାହା ଦ୍ୱିପାକ୍ଷିକ ଚୁକ୍ତିନାମାର ଉଲଙ୍ଘନ । ସୀମାରେ ଚୀନର ସେନା ମୃତୟନ ପ୍ରକ୍ରିୟା ୧୯୯୩ ଏବଂ ୧୯୯୬ ମସିହାରେ ହୋଇଥିବା ଚୁକ୍ତିନାମା ବିରୁଦ୍ଧରେ । ସୀମାବର୍ତ୍ତୀ ଅଞ୍ଚଳରେ ଶାନ୍ତି ପାଇଁ ଲାଇନ ଅଫ ଆକଚୁଆଲ କଣ୍ଟ୍ରୋଲକୁ ସମ୍ମାନ ଦେବା ଖୁବ ଜରୁରୀ । ଭାରତୀୟ ସେନା ଏହାକୁ ସମ୍ପୂର୍ଣ୍ଣ ଭାବରେ ପାଳନ କରୁଛନ୍ତି । କିନ୍ତୁ ଚୀନ ପକ୍ଷରେ ଏଭଳି ନଜର ଆସୁନାହିଁ । ଆଲେଚନା ମାଧ୍ୟମରେ ଭାରତ ସମାଧାନ କରିବାକୁ ଚାହୁଁଥିବା କହିଛନ୍ତି ରାଜନାଥ ।
ପ୍ରତିରକ୍ଷାମନ୍ତ୍ରୀ ଚୀନକୁ ଦେଇଥିବା ବାର୍ତ୍ତାରେ କହିଛନ୍ତି କି ଭାରତ ଆଲୋଚନାକୁ ସମର୍ଥନ କରୁଛି କିନ୍ତୁ ନଇଁବ ନାହିଁ । ଏହା ସହିତ ଚୀନ ସୀମାରେ ଚୀନ ବିପୁଳ ସୈନ୍ୟ ମୃତୟନ କରିଛି ବୋଲି ରାଜନାଥ କହିଛନ୍ତି ।
ଡ୍ରଗ୍ସ ମାମଲାକୁ ନେଇ ନାମ ଆସିବା ପରେ କୋର୍ଟରେ ପହଞ୍ଚିଲେ ରକୁଲପ୍ରୀତ ସିଂ
ନୂଆଦିଲ୍ଲୀ: ଡ୍ରଗ୍ସ ମାମଲାରେ ସଂପୃକ୍ତି ଥିବା ଖବର ସାମ୍ନାକୁ ଆସିବା ପରେ ରକୁଲପ୍ରୀତ ସିଂ ଦିଲ୍ଲୀ ହାଇକୋର୍ଟରେ ପିଟିସନ ଦାଖଲ କରିଛନ୍ତି । ପିଟିସନରେ ତାଙ୍କ ବିରୁଦ୍ଧରେ ହୋଇଥିବା ମିଡିଆ କଭରେଜକୁ ରୋକିବା ପାଇଁ ସେ ନିବେଦନ କରିଛନ୍ତି । ଯେଉଁଥିରେ ତାଙ୍କ ଇମେଜ ଖରାପ କରିବା ପାଇଁ ଚେଷ୍ଟା କରାଯାଉଥିବା ସେ କହିଛନ୍ତି । ତେବେ ଉକ୍ତ ମାମଲାକୁ ନେଇ କୋର୍ଟର ଶୁଣାଣି ଜାରି ରହିଛି ।
ରକୁଲ କୋର୍ଟରେ କହିଛନ୍ତି କି ରିୟାଙ୍କ ଡ୍ରଗ୍ସ ମାମଲା ସାମ୍ନାକୁ ଆସିବା ପରେ ମିଡିଆ ଟ୍ରାଏଲ ଜାରି ରହିଛି । ତାଙ୍କୁ ନେଇ କୌଣସି ମିଡିଆ କଭରେଜରୁ ସୁଯୋଗ ନଦେବା ପାଇଁ ପାଇଁ ଇଡିକୁ ନିର୍ଦ୍ଦେଶ ଦେବା ପାଇଁ ସେ କୋର୍ଟରେ ପିଟିସନ ଦାଖଲ କରିଛନ୍ତି । ରକୁଲଙ୍କୁ ଜାଣିଶୁଣି ହାରାସ କରାଯାଉଥିବା କୋର୍ଟରେ କହିଛନ୍ତି ରକୁଲପ୍ରୀତଙ୍କ ଓକିଲ । ଏହି ମାମଲାର ଶୁଣାଣି ସମୟରେ ହାଇକୋର୍ଟ ସମସ୍ତ ମିଡିଆ ଚ୍ୟାନେଲକୁ ସଂଯମତାର ସହିତ କାମ କରିବାକୁ କହିଛନ୍ତି । ମିଡିଆ ଚ୍ୟାନେଲ ଗୁଡ଼ିକୁ ଇଣ୍ଟରିମ ଡାଇରେକ୍ସନ ଦେବା ପାଇଁ ହାଇକୋର୍ଟ କେନ୍ଦ୍ର ସରକାର, ନ୍ୟାସନାଲ ବ୍ରଡକାଷ୍ଟର ଆସୋସିଏସନ, ପ୍ରସାର ଭାରତୀ ଏବଂ ପ୍ରେସ କାଉଂସିଲିଂକୁ କହିଛନ୍ତି ।
ସୂଚନାଯୋଗ୍ୟ ରିୟାଙ୍କ ଡ୍ରଗ୍ସ ସଂମ୍ପୃକ୍ତି ମାମଲା ସାମ୍ନାକୁ ଆସିବା ପରେ ତାଙ୍କୁ NCB ପଚରାଉଚରା ଆରମ୍ଭ କରିଥିଲା । ଯାହାପରେ ଜେଲରେ ଅଛନ୍ତି ରିୟା । ତେବେ ଏହା ମଧ୍ୟରେ ରିୟା ସାରା ଅଲି ଖାନ ଏବଂ ରକୁଲପ୍ରୀତଙ୍କ ନାମ ନେଇଥିବା ଖବର ସାମ୍ନାକୁ ଆସିଥିଲା ।