ଆସିକା: ଗଂଜାମ ଜିଲ୍ଲା କବିସୂର୍ଯ୍ୟନଗରରେ ଅଭାବନୀୟ ଘଟଣା । ପୁଅର ମୃତ୍ୟୁରେ ମର୍ମାହତ ହୋଇ ଜୀବନ ହାରିଲେ ବାପା ମାଆ । ମୃତକ ଦ୍ୱୟ ହେଲେ ରାଜକିଶୋର ଶତପଥୀ ଓ ପତ୍ନୀ ସୁଲୋଚନା ଶତପଥୀ । ପୁଅର କରୋନାରେ ମୃତ୍ୟୁ ହୋଇଥିବା ଖବର ପାଇ ଉଭୟ ଆତ୍ମହତ୍ୟା କରିଛନ୍ତି । ଖବର ଅନୁସାରେ ନାରାୟଣପୁର ଶାସନର ସୀମାଞ୍ଚଳ ଶତପଥୀ ନାମକ ଜଣେ ଶିକ୍ଷକ ଅସୁସ୍ଥତା ହୋଇ ଭୁବନେଶ୍ୱରର ଏକ ମେଡିକାଲରେ ଚିକିତ୍ସାଧିନ ଥିଲେ । ତାଙ୍କୁ କରୋନା ହୋଇଥିବା ନେଇ ସହରରେ ଚର୍ଚ୍ଚା ଚାଲିଥିବା ବେଳେ ଆଜି ମୃତ୍ୟୁ ହୋଇଥିଲା । ପୁଅର ମୃତ୍ୟୁରେ ବାପା-ମାଆ ଭାଙ୍ଗି ପଡିଥିବା ବେଳେ ଶେଷରାସ୍ତା ବାଛିଥିଲେ । ସେପଟେ କରୋନା ଭୟରେ ମୃତଦେହ ପାଖକୁ କେହି ଆସୁନଥିବା ବେଳେ ପୋଲିସ ତଦନ୍ତ ଆରମ୍ଭ କରିଛି ।

ପାରାଦ୍ୱୀପ: ପଣ୍ୟ ପରିବହନ କ୍ଷେତ୍ରରେ ଇତିହାସ ସୃଷ୍ଟି କରିଛି ପାରାଦ୍ୱୀପ ବନ୍ଦର। କାନଡଲାର ଦିନଦୟାଲ ବନ୍ଦରକୁ ପଛରେ ପକାଇ ପଣ୍ୟ ପରିବହନରେ ଏକ ନମ୍ବର ସ୍ଥାନ ହାସଲ କରିଛି ପାରାଦ୍ୱୀପ ବନ୍ଦର । ଚଳିତ ଆର୍ଥିକ ବର୍ଷର ମାତ୍ର ୩ ମାସରେ ୨୫.୭୩ ମିଲିୟନ ମେଟ୍ରିକ ଟନ୍ ପଣ୍ୟ କାରବାର ହୋଇପାରିଛି । କରୋନା ଯୋଗୁଁ ସବୁ କ୍ଷେତ୍ରରେ ମାନ୍ଦାବସ୍ଥା ଚାଲିଥିବା ବେଳେ ପାରାଦ୍ୱୀପ ବନ୍ଦରର ଏହି ସଫଳତା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ସ୍ୱପ୍ନକୁ ସାକାର କରିବାରେ ସଫଳ ହୋଇଛି ।

ବନ୍ଦର ଅଧ୍ୟକ୍ଷ ରିଙ୍କେଶ ରୟଙ୍କ ସଠିକ୍ ପରିଚାଳନା ଯୋଗୁଁ ବିଗତ ୩ ବର୍ଷ ଧରି ପାରାଦ୍ୱୀପ ବନ୍ଦର ଭାରତର ଦ୍ଵିତୀୟ ବୃହତ୍ତମ ବନ୍ଦରର ମାନ୍ୟତା ହାସଲ କରିଥିଲା। ଏବଂ ୨୪ ଘଣ୍ଟାରେ ୨୪ ଜାହାଜକୁ ପରିଚାଳନା କରି ପୂର୍ବରୁ ଇତିହାସ ସୃଷ୍ଟି କରିଥିଲା ପାରାଦ୍ୱୀପ ବନ୍ଦର। ବିଜୁବାବୁଙ୍କ ପ୍ରଚେଷ୍ଟାରେ ୧୯୬୨ ମସିହାରେ ମାତ୍ର ଗୋଟିଏ ବର୍ଥରୁ ଆରମ୍ଭ ହୋଇଥିବା ପାରାଦ୍ୱୀପ ବନ୍ଦର ଆଜି ଭାରତର ଏକ ନମ୍ବର ମେଜର ପୋର୍ଟ ଭାବେ ନିଜର ସ୍ୱତନ୍ତ୍ର ପରିଚୟ ହାସଲ କରିବାରେ ସଫଳ ହୋଇଛି ।

Congratulate @paradipport for becoming No-1 major #port for cargo handling in the country. Biju Babu would have been proud of #Odisha’s giant strides in maritime trade. A tribute to Odisha's glorious seafaring history.#OdishaOnTheMove pic.twitter.com/SLCvq41lt4

— Naveen Patnaik (@Naveen_Odisha) July 3, 2020

ଅପରପକ୍ଷରେ ପାରାଦ୍ୱୀପ ବନ୍ଦରର ଏହି ସଫଳତା ନେଇ ଖୁସି ବ୍ୟକ୍ତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏନେଇ ସେ ପାରାଦ୍ୱୀପ ପୋର୍ଟ କର୍ତ୍ତୃପକ୍ଷଙ୍କୁ ଶୁଭେଚ୍ଛା ଜଣାଇଛନ୍ତି । ଓଡ଼ିଶାର ଏଭଳି ସଫଳତା ନେଇ ବିଜୁ ବାବୁ ମଧ୍ୟ ଗର୍ବିତ ଅନୁଭବ କରିଥାନ୍ତେ ବୋଲି ଟ୍ୱିଟ୍ ଯୋଗେ ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ।

ପୁରୀ: ଆସନ୍ତା ଶନିବାର ଓ ରବିବାର ପୁରୀରେ ହେବନାହିଁ ସଟଡାଉନ୍‌ । ୩୨ଟି ଓ୍ୱାର୍ଡରେ ୩୨ଟି ଏନଫୋର୍ସ ଟିମ୍‌ ଘର ଘର ବୁଲି ସଂକ୍ରମିତଙ୍କୁ ଚିହ୍ନଟ କରିବା ସହିତ ଲୋକଙ୍କୁ କରୋନା ନେଇ ସଚେତନ କରାଇବେ । ଏଥିସହ କାଲିଠାରୁ ୫ଟି ଟିମ୍‌ ସହରର ସମସ୍ତ ଦୋକାନ ଓ ଠେଲାଗାଡ଼ିଗୁଡ଼ିକ ବୁଲି କୋଭିଡ ନିୟମ ପାଳନ କରୁଛନ୍ତି କି ନାହିଁ ସେନେଇ ତଦନ୍ତ କରିବେ ।

ରଥଯାତ୍ରା ଭଳି କରୋନା ନିୟମକୁ କଡ଼ାକଡ଼ିଭାବେ ଅନୁପାଳନ କରୁଛୁ ବୋଲି ପୁରୀବାସୀ ଦେଖାଇବାକୁ ଜିଲ୍ଲାପାଳ ନିବେଦନ କରିଛନ୍ତି । ମାସ୍କ ଓ ସାମାଜିକ ଦୂରତା ନମାନିଲେ ଫାଇନ କରାଯିବା ସହ ପ୍ରଶାସନ କଡା ଆଭିମୁଖ୍ୟ ଦେଖାଇବ ବୋଲି ଚେତାଇ ଦେଇଛନ୍ତି । ହସ୍ପିଟାଲକୁ ସ୍ୱତନ୍ତ୍ର ନଜରରେ ରଖାଯାଇଛି । ଗୁରୁତର ରୋଗ ନହେଲେ ମେଡିକାଲକୁ ନଆସିବାକୁ ନିବେଦନ କରିଛନ୍ତି ଜିଲ୍ଲାପାଳ ।

ଔଷଧ ଆବଶ୍ୟକ ହେଲେ ଟେଲିମେଡ଼ିସିନ ନମ୍ବରରେ ଯୋଗାଯୋଗ କରିବାକୁ କହିଛନ୍ତି ଜିଲ୍ଲାପାଳ । ସଟ୍‌ଡାଉନ୍‌ ସମୟରେ ଜରୁରୀକାଳୀନ ସେବା ଯୋଗାଇବା ପାଇଁ ଜିଲ୍ଲାପ୍ରଶାସନ ପ୍ରସ୍ତୁତ ଅଛି । ତେବେ ଆସନ୍ତା ଶନିବାର ଓ ରବିବାର ଅର୍ଥାତ ୪ ଓ ୫ ତାରିଖ ବ୍ୟତୀତ ଅନ୍ୟ ଶନିବାର ଓ ରବିବାରରେ ସାପ୍ତାହିକ ସଟ୍‌ଡାଉନ୍‌ ଜାରି ରହିବ ।