ନୂଆଦିଲ୍ଲୀ: କରୋନା ସଂକ୍ରମଣ ରୋକିବାକୁ ଟେଷ୍ଟ, ଟ୍ରାକ୍‌ ଓ ଟ୍ରିଟ୍‌କୁ ଗୁରୁତ୍ୱ । ଟେଷ୍ଟିଂ ବଢାଇବାକୁ ସମସ୍ତ ରାଜ୍ୟ ସରକାରଙ୍କୁ ଆଇସିଏମ୍‌ଆର ପକ୍ଷରୁ ପରାମର୍ଶ ଦିଆଯାଇଛି । ଆଗରୁ କେବଳ ହସପିଟାଲ, କଣ୍ଟେନମେଣ୍ଟ ଜୋନ୍‌ ଓ ହଟସ୍ପଟ୍‌ର ଲକ୍ଷଣ ଥିବା ବ୍ୟକ୍ତି, କରୋନା ପଜିଟିଭଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତି, ସ୍ୱାସ୍ଥ୍ୟକର୍ମୀ ତଥା ବିଦେଶରୁ ଫେରିଥିବା ବ୍ୟକ୍ତିଙ୍କର ଟେଷ୍ଟିଂ କରାଯାଉଥିଲା । ତେବେ ଆଇସିଏମ୍‌ଆର ଏହାର ଟେଷ୍ଟିଂ ରଣନୀତିରେ ପରିବର୍ତ୍ତନ କରିଛି ।

ଏଣିକି ସଂକ୍ରମଣ ରୋକିବାକୁ ଦେଶର ସମସ୍ତ ଭାଗରେ ଲକ୍ଷଣ ଥିବା ବ୍ୟକ୍ତିଙ୍କର ଟେଷ୍ଟ ପାଇଁ ପରାମର୍ଶ ଦିଆଯାଇଛି । ସେହିପରି କଣ୍ଟେନମେଣ୍ଟ ଅଞ୍ଚଳରେ କଣ୍ଟାକ୍ଟ ଟ୍ରେସିଂକୁ ଆହୁରି ବଢାଇବାକୁ କୁହାଯାଇଛି । ଟେଷ୍ଟିଂ ବଢାଇବା ପାଇଁ ମିଳିତ ଭାବେ ବିଭିନ୍ନ ପରୀକ୍ଷଣ ବ୍ୟବସ୍ଥା ଲାଗୁ କରିବାକୁ କୁହାଯାଇଛି । ରିୟଲ ଟାଇମ୍‌ ଆର୍‌ଟି-ପିସିଆର, ରାପିଡ୍‌ ଆଣ୍ଟିଜେନ୍‌ ଏବଂ ସେରୋସର୍ଭେ ପାଇଁ ଆଣ୍ଟିବଡି ପରୀକ୍ଷଣ କରାଯାଇପାରିବ। ଦେଶରେ ଜୁନ୍‌ରେ ବଢିଛି କରୋନା ସଂକ୍ରମଣ ।

ଆକ୍ରାନ୍ତ ସଂଖ୍ୟା ୪ଲକ୍ଷ ୫୦ ହଜାର ପାର ହୋଇଥିବା ବେଳେ ଭୂତାଣୁ ନେଲାଣି ୧୪ ହଜାରରୁ ଅଧିକ ଜୀବନ। ମୁମ୍ବାଇ ପରେ ଦିଲ୍ଲୀ ପାଲଟୁଛି କୋଭିଡ୍‌ ହଟସ୍ପଟ୍‌ । ଗତକାଲି ଗୋଟିଏ ଦିନରେ ସର୍ବାଧିକ ୩ହଜାର ୯୪୭ କରୋନା ପଜିଟିଭ ଚିହ୍ନଟ ହୋଇଥିବା ବେଳେ ୬୮ ଜଣଙ୍କ ମୃତ୍ୟୁ ହୋଇଛି ।

ନୂଆଦିଲ୍ଲୀ: ଏଲ୍‌ଏସିରେ ଭାରତ-ଚୀନ୍‌ ମଧ୍ୟରେ ତିକ୍ତତା ବଢ଼ିବାରେ ଲାଗିଛି । ଗୋଟିଏ ପଟେ ଚୀନ୍ ଭାରତ ସହିତ ଲଦାଖ ସୀମାରେ ଶାନ୍ତି ପାଇଁ ଆହ୍ୱାନ ଦେଉଥିବାବେଳେ ଅନ୍ୟପଟେ ଭାତରକୁ ଅନ୍ୟ ଦେଶରୁ ସମର୍ଥନ ମିଳୁଥିବାରୁ ଚୀନ୍‌ ଏବେ ଝଟକରାରେ । ଏପରିକି ଚୀନ୍‌ର ସରକାରୀ ପ୍ରଚାର ଖବରକାଗଜ ପିପୁଲ୍ସ ଡେଲି ଋଷକୁ ‘ସମ୍ବେଦନଶୀଳ’ ସମୟରେ ଭାରତକୁ ଅସ୍ତ୍ର ନଦେବା ପାଇଁ ପରାମର୍ଶ ଦେଇଛି । ଋଷରେ ବିଜୟ ଦିବସ ପାଳନ ଅବସରରେ ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମସ୍କୋରେ ପହଞ୍ଚିଛନ୍ତି ଏବଂ ଏହି ସମୟ ମଧ୍ୟରେ ପ୍ରତିରକ୍ଷା ଚୁକ୍ତି ଉପରେ ଆଲୋଚନା ହୋଇଛି ।

ଏକ ଗଣମାଧ୍ୟମ ସୂଚନା ଅନୁଯାୟୀ, ପିପୁଲ୍ସ ଡେଲି ଫେସବୁକରେ ‘ସୋସାଇଟି ଫର ଓରିଏଣ୍ଟାଲ୍ ଷ୍ଟଡିଜ୍ ଅଫ୍ ଋଷ’ ନାମକ ଏକ ଗ୍ରୁପ୍‌ରେ ଲେଖିଛି, ବିଶେଷଜ୍ଞମାନେ କହିଛନ୍ତି ଯେ ଯଦି ଋଷ ଚୀନ୍ ଏବଂ ଭାରତୀୟଙ୍କ ହୃଦୟକୁ ତରଳାଇବାକୁ ଚାହୁଁଛି । ତେବେ ଋଷ ଭାରତକୁ ଏପରି ସମ୍ବେଦନଶୀଳ ସମୟରେ ଅସ୍ତ୍ର ଦେବା ଉଚିତ୍ ନୁହେଁ । ପିପୁଲ୍ସ ଡେଲି କହିଛି ଯେ ଲଦାଖରେ ଚୀନ୍ ସହ ଚାଲିଥିବା ଉତ୍ତେଜନା ମଧ୍ୟରେ ଭାରତ ମିଗ ୨୯ ଏବଂ ୧୨ଟି ସୁଖୋଇ ୩୦ ଏମକେ ସମେତ ୩୦ ଟି ଯୁଦ୍ଧ ବିମାନ କିଣିବାକୁ ଚାହୁଁଛି।

ଅନ୍ୟପକ୍ଷରେ ଦେଶର ଉପମୁଖ୍ୟମନ୍ତ୍ରୀ ୟୁରୀ ଇଭାନୋଭିକଙ୍କ ସହ ଆଲୋଚନା କରିବା ପରେ ମସ୍କୋରେ ପହଞ୍ଚିଥିବା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି ଯେ ଦୁଇ ଦେଶ ମଧ୍ୟରେ ହୋଇଥିବା ଚୁକ୍ତିନାମା ଜାରି ରହିବ ବୋଲି ଋଷ ନିଶ୍ଚିତ କରିଛି । ଏହା ମଧ୍ୟ କୁହାଯାଇଛି ଯେ ଏଗୁଡିକ ଶୀଘ୍ର ମୁକାବିଲା କରାଯିବ। ବାସ୍ତବରେ, ଉଭୟ ଚୀନ୍ ଏବଂ ପାକିସ୍ଥାନର ଉନ୍ନତ ଅସ୍ତ୍ରଶସ୍ତ୍ରକୁ ଦୃଷ୍ଟିରେ ରଖି ଭାରତ ପାଇଁ ଅସୁବିଧା ବଢ଼ୁଛି । ଭାରତ ଏହାର ଷ୍ଟକପାଇଲ୍ ଏବଂ ଏୟାର ଡିଫେନ୍ସ ମିସାଇଲ୍ ସିଷ୍ଟମ S-400 କୁ ୫ ବିଲିୟନ ଡ଼ଲାର ଅର୍ଥାତ୍ ୪୦,୦୦୦ କୋଟି ଟଙ୍କା ବୃଦ୍ଧି କରିବାକୁ ନିଷ୍ପତ୍ତି ନେଇଛି ।

ମୁମ୍ବାଇ: ଲକ୍‌ଡାଉନ୍ ଯୋଗୁଁ ଶ୍ରମିକଙ୍କ ପଳାୟନ ପରେ ଅଟକି ରହିଛି ନିର୍ମାଣ କାର୍ଯ୍ୟ । ବଡ଼ ବଡ଼ ନିର୍ମାଣ କାର୍ଯ୍ୟ ପାଇଁ ବହୁ ସଂଖ୍ୟାରେ ଶ୍ରମିକଙ୍କ ଆବଶ୍ୟକତା ପଡ଼ୁଥିବା ବେଳେ ପ୍ରାୟ ଶ୍ରମିକ ଏବେ ସେମାନଙ୍କ ଘରେ । ଯାହାକୁ ନେଇ ଏବେ ଅଡ଼ୁଆରେ ପଡ଼ିଛନ୍ତି ଠିକାଦାର । ପରିସ୍ଥିତି ଏଭଳି ଉପୁଜିଛି ଯେ, ସେମାନଙ୍କୁ ବିମାନରେ ଫେରାଇ ଆଣିବାକୁ ପଡ଼ିଛି । ଜାତୀୟ ଗଣମାଧ୍ୟମରେ ଏସମ୍ପର୍କରେ ଏକ ରିପୋର୍ଟ ପ୍ରକାଶ ପାଇଛି ।

ଯେଉଁଥିରେ କିଛି ଶ୍ରମିକଙ୍କୁ ଏକ ଠିକା ସଂସ୍ଥା ବିମାନ ଯୋଗେ ଫେରାଇଆଣିଥିବା ଦର୍ଶାଯାଇଛି । ଫେରିଆସିଥିବା ଶ୍ରମିକମାନଙ୍କ ମଧ୍ୟରୁ ଜଣେ ହେଉଛନ୍ତି ବିହାରର ୨୯ ବର୍ଷୀୟ ଅମିତ କୁମାର । ସେ ଲକ୍‌ଡାଉନ୍ ବେଳେ କାମ ନଥିବାରୁ ଘରକୁ ଫେରିଆସି ନିଜ ବୃଦ୍ଧ ପିତା ମାତ ଓ ସ୍ତ୍ରୀଙ୍କ ସହ ରହୁଥିଲେ । ତେବେ ଏଭଳି ପରିସ୍ଥିତିରେ ଠିକାଦାର ତାଙ୍କୁ କାମ ପାଇଁ ପ୍ରସ୍ତାବ ଦେବା ସହ ପାଟଣାରୁ ମୁମ୍ୱାଇ ଫେରିବାକୁ ବିମାନ ଟିକେଟ ମଧ୍ୟ ପଠାଇଛନ୍ତି । ଏହା ଅମିତଙ୍କ ପାଇଁ ଡବଲ୍‌ ଖୁସି, କାହିଁକି ନା ବର୍ତ୍ତମାନର ପରିସ୍ଥିତିରେ ତାଙ୍କୁ କାମ ମିଳିବା ସହ ବିମାନରେ ଯାତ୍ରା କରିବାର ସୁଯୋଗ ମିଳିଛି  ।

ଅମିତ କୁମାରଙ୍କ ପରି ପଶ୍ଚିମବଙ୍ଗର ମାଲଦାରେ ରହୁଥିବା ସୁନୀଲ ମଧ୍ୟ ବୃଦ୍ଧା ମା, ପତ୍ନୀ ଏବଂ ୪ ବର୍ଷର ଶିଶୁକୁ ନେଇ ରହୁଛନ୍ତି । ସୁନୀଲ ୱେଲଡର ଭାବରେ କାମ କରନ୍ତି, କିନ୍ତୁ ଲକଡାଉନ୍ ସମୟରେ କାମ ପାଇଲେ ନାହିଁ । ଏବଂ ଘରକୁ ଫେରିଆସି ଖାଲି ବସିଛନ୍ତି । ଏଭଳି ପରିସ୍ଥିତିରେ ମୁମ୍ବାଇର କଣ୍ଟ୍ରାକ୍ଟର ତାଙ୍କୁ କାମ ଯୋଗାଇଦେବା ସହ ଫେରିଆସିବା ଲାଗି ବିମାନ ଟିକେଟ୍ ଟିକେଟ୍ ମଧ୍ୟ ପଠାଇଥିଲେ । ତେବେ ଜୀବନରେ ପ୍ରଥମ ଥର ପାଇଁ ବିମାନରେ ଯାତ୍ରା କରିଥିବାରୁ ସୁନିଲ ମଧ୍ୟ ବେଶ୍‌ ଖୁସି ଜାହିର କରିଛନ୍ତି ।

ପଶ୍ଚିମବଙ୍ଗ ଏବଂ ବିହାରରୁ ୨୦ ଜଣ ଶ୍ରମିକଙ୍କୁ ବିମାନ ଯୋଗେ ମୁମ୍ବାଇକୁ ଆଣିଥିବା ଏହି ସଂସ୍ଥାର ନାମ ହେଉଛି ବ୍ରିଜ ଇଞ୍ଜିନିୟରିଂ କମ୍ପାନୀ, ଯାହା ମୁମ୍ବାଇ ନିକଟସ୍ଥ କଲ୍ୟାଣ ରେଳଲାଇନ ଦେଇ ଯାଉଥିବା ଏକ ବ୍ରିଜର ପ୍ରଶସ୍ତିକରଣ ପାଇଁ ଚୁକ୍ତି କରିଥିଲା । ସ୍ଥାନୀୟ ଲୋକମାନଙ୍କ ପାଇଁ ଏହା ଏକ ମୁଖ୍ୟ ରାସ୍ତା ପାଲଟିଥିବା ବେଳେ ବ୍ରିଜ୍‌ଟି ବହୁତ ସଂକୀର୍ଣ୍ଣ । ଏଣୁ ଏଠାରେ ପ୍ରାୟ ସମୟରେ ଟ୍ରାଫିକ୍ ଜାମ୍ ହୋଇଥାଏ । ସରକାର ଏହି ବ୍ରିଜକୁ ଡବଲ ଲେନ୍‌ରୁ ୬ ଲେନ୍‌ କରିବାକୁ ନିଷ୍ପତ୍ତି ନେଇଛନ୍ତି ।

ଏ ନେଇ ଠିକା ସଂସ୍ଥାକୁ ଓ୍ୱାର୍କ ଅର୍ଡର ଦେବା ପରେ କାମ ମଧ୍ୟ ଆରମ୍ଭ ହୋଇଥିଲା । କିନ୍ତୁ ଲକ୍‌ଡାଉନ୍‌ ଯୋଗୁଁ କାମ ବନ୍ଦ ହୋଇରହିଛି । ତେବେ ବର୍ତ୍ତମାନ ପୁଣି କାମ ଆରମ୍ଭ କରିବା ପାଇଁ ଅନୁମତି ଦିଆଯିବା ପରେ ଶ୍ରମିକମାନଙ୍କୁ ଫେରାଇ ଆଣିବାକୁ ନିଷ୍ପତ୍ତି ନିଆଯାଇଥିଲା । ତେବେ ଏବେ ମଧ୍ୟ ବସ୍ ଓ ଟ୍ରେନ୍ ଚଳାଚଳ ସେତେଟା ସ୍ୱାଭାବିକ ହୋଇନଥିବା ବେଳେ ସେମାନଙ୍କ ଫେରିବାରେ ବିଳମ୍ୱ ହୋଇପାରେ । ଏଣୁ ସେମାନଙ୍କୁ ବିମାନରେ ଫେରାଇ ଆଣିବାକୁ ନିଷ୍ପତ୍ତି ନେଲା ଠିକା ସଂସ୍ଥା । ଏବଂ ସେମାନଙ୍କୁ ବିମାନ ଟିକେଟ ମଧ୍ୟ ପଠାଯାଇଥିଲା । ଏବଂ ସେମାନେ ବିମାନ ଯୋଗେ ଆସି ମୁମ୍ୱାଇରେ ପହଞ୍ଚିବା ସହ ସେମାନେ କାମ ଆରମ୍ଭ କରିସାରିଛନ୍ତି ।