କାନପୁର: ବିକାଶର ପତ୍ନୀଙ୍କ କଡ଼ା ଚେତାବନୀ । ପୋଲିସ ଓ ମିଡିଆକୁ ଦେଲେ ବଡ଼ ଚେତାବନୀ । କହିଲେ ବିକାଶର ଏଭଳି ସ୍ଥିତି ପାଇଁ ଯିଏ ଦାୟୀ ସେ ନିଶ୍ଚିତ ଦଣ୍ଡ ପାଇବ । ଆବଶ୍ୟକ ପଡ଼ିଲେ ନିଜେ ବନ୍ଧୁକ ଧରିବେ ।
କାନପୁରର ଭୌନ୍ତିରେ ଗ୍ୟାଙ୍ଗଷ୍ଟର ବିକାଶ ଦୁବେର ଏନ୍କାଉଣ୍ଟର ହେବା ପରେ ଭୈରବ ଘାଟରେ ତାର ଅନ୍ତିମ ସଂସ୍କାର ଶେଷ ହୋଇଛି । ଏହି ଅବସରରେ ବିକାଶ ଦୁବେର ପତ୍ନୀ ମିଡିଆ ଏବଂ ପୋଲିସ ବିଭାଗକୁ ଚେତାବନୀ ଦେଇଛନ୍ତି ।
ସେ କହିଛନ୍ତି ମିଡିଆ ବେଶି ରାଜନୀତି କରୁଛି । ଗଣମାଧ୍ୟମର ପ୍ରତିନିଧିଙ୍କ ପ୍ରଶ୍ନ ଥିଲା ଯେ, ବିକାଶ ଦୁବେ କ’ଣ ହତ୍ୟାକରୀ ନୁହେଁ କି ? ଏହି ପ୍ରଶ୍ନର ଉତ୍ତରରେ ବିକାଶର ପତ୍ନୀ ରିଚା ଦୁବେ କହିଛନ୍ତି, ସେ ହତ୍ୟା କଲେ କି ନକଲେ ତମେ କହିବାକୁ କିଏ । ସ୍ୱାମୀଙ୍କ ଏଭଳି ଅବସ୍ଥା ପାଇଁ ଯିଏ ଦାୟୀ ସେ ନିଶ୍ଚୟ ଦଣ୍ଡ ପାଇବ । ଆବଶ୍ୟକ ପଡ଼ିଲେ ବନ୍ଧୁକ ମଧ୍ୟ ଧରିବି ।
ଏହା ପରେ ଗଣମାଧ୍ୟମ ଆହୁରି କିଛି ପ୍ରଶ୍ନ କରିବାକୁ ଚେଷ୍ଟା କରିଥିଲା । କିନ୍ତୁ ରିଚାଙ୍କ ବ୍ୟବହାର ପାଇଁ ସବୁ ଚୁପ୍ ରହିଥିଲେ । ରିଚା କହିଥିଲେ, ଗଣମାଧ୍ୟମ ପ୍ରଥମେ ନାଟ ଲଗାଉଛି, ପରେ ଏଠି ଆସି ସଫେଇ ଦେଉଛି ।
କାନ୍ଦି କାନ୍ଦି ଚିତ୍କାର କରି ଗଣମାଧ୍ୟମ ଉପରେ ପ୍ରବଳ ରାଗ ସୁଝାଇଛନ୍ତି ରିଚା । ଏହା ସହ ରିଚା କହିଛନ୍ତି ଯଦି ମୋ ସ୍ୱାମୀ ଭୁଲ କରିଥିଲେ, ,ତେବେ ପୋଲିସ ଯାହା କଲା କ’ଣ ଠିକ୍ କଲା ?
