ରାୟଗଡ଼ା: କରୋନା କଟକଣା ଭିତରେ ଶିକ୍ଷାଦାନକୁ ଆଗକୁ ନେବାକୁ ପ୍ରସ୍ତୁତ ହେଉଛି ଅନଲାଇନ୍ ରଣନୀତି । ହେଲେ ରାଜ୍ୟର କିଛି ଉପାନ୍ତ ଅଞ୍ଚଳର ପିଲାଙ୍କ ପାଇଁ ଏହା ଯେମିତି ସ୍ୱପ୍ନ । ପାହାଡ଼ିଆ ଜଙ୍ଗଲରେ ମୋବାଇଲ୍ ଟାଓ୍ୱାର ନଥିବାରୁ ଅନେକ ଛାତ୍ରଛାତ୍ରୀ ମୋବାଇଲ୍ ଥାଇ ମଧ୍ୟ ଅନଲାଇନ୍ ପାଠ ପଢାରୁ ବଞ୍ଚିତ ହେଉଛନ୍ତି  । ମୋବାଇଲ୍ ନେଟୱର୍କ ପାଇଁ ମାଇଲ ମାଇଲ ବାଟ ଯିବାକୁ ପଡ଼ୁଛି ତ ଆଉ କେଉଁଠି ପାହାଡ଼ ଚଢିବାକୁ ପଢୁଛି ।

ଉପାନ୍ତରେ ଅପହଞ୍ଚ ଅନଲାଇନ୍ ଶିକ୍ଷା । ମୋବାଇଲ୍ ଅଛି ହେଲେ ନେଟୱର୍କ ନାହିଁ । ପାଠ ପଢିବା ପାଇଁ ପାହାଡ଼ ଚଢୁଛନ୍ତି ଛାତ୍ରଛାତ୍ରୀ । ଆଦିବାସୀ ଅଧ୍ୟୁଷିତ ଅଞ୍ଚଳରେ ଅନଲାଇନ ପାଠପଢ଼ାର ଏ ହେଉଛି ବାସ୍ତବତା । ଏଭଳି ସ୍ଥିତିରେ ପିଲା ପାଠ ପଢିବେ ଆଗକୁ ବଢିବେ । ତେଣୁ ଅଭାବ ସତ୍ୱେ ପିଲାଙ୍କ ପାଇଁ ବାପାମାଆ କିଣି ଦେଇଛନ୍ତି ମୋବାଇଲ୍ । ହେଲେ ଗାଁରେ ନାହିଁ ମୋବାଇଲ୍ ଟାୱାର୍ ।  ତେଣୁ ଜଙ୍ଗଲ ଡେଇଁ, ପାହାଡ଼ ଚଢି ପିଲାଙ୍କୁ ଖୋଜିବାକୁ ପଡୁଛି ମୋବାଇଲ୍ ନେଟଓ୍ୱର୍କ । କାଁଭାଁ ଗୋଟିଏ ସିଗନାଲ୍ ଆସିଲେ ‘ବୁଡ଼ି ଗଲା ଲୋକଙ୍କୁ ସୂତାଖିଅ ଭରାସା’ ଭଳି । ଏ ହେଉଛି ରାୟଗଡ଼ା ଜିଲ୍ଲା ସଦର ବ୍ଲକ କନ୍ଧଖୀଲମ୍ ଅଞ୍ଚଳର ଦୃଶ୍ୟ । ଅନ୍-ଲାଇନ୍ ପାଠପଢା ଆରମ୍ଭ ଦିନଠାରୁ ଆଜି ପର୍ଯ୍ୟନ୍ତ ସମସ୍ତ କ୍ଲାସରୁ ବଞ୍ଚିତ ଏଠାକାର ଛାତ୍ରଛାତ୍ରୀ ।

କୋରାପୁଟ ଜିଲ୍ଲାର ପ୍ରାୟ ୭୦ପ୍ରତିଶତ ଛାତ୍ରଛାତ୍ରୀ ଗ୍ରାମାଞ୍ଚଳରେ । କରୋନା କଟକଣା ପାଇଁ ଆରମ୍ଭ ହୋଇଥିବା ଏହି ଶିକ୍ଷା ବ୍ୟବସ୍ଥା ଏମାନଙ୍କ ପାଇଁ ଏବେ ଯେମିତି ଉପହାସ ପାଲଟିଛି । ଶିକ୍ଷାଦାନର ବିକଳ୍ପ ବ୍ୟବସ୍ଥା ପାଇଁ ବୁଦ୍ଦିଜୀବୀ ଦାବି କରିଛନ୍ତି । କେମିତି ପଢିବେ ଏ ଅନ୍ଧାରୀ ମୂଲକର ପିଲା । ଅନ୍ଲାଇନ୍ ବ୍ୟତୀତ କଟକଣା ଭିତରେ ସରକାର କରିବେ କି ଏମାନଙ୍କ ପାଇଁ ବିକଳ୍ପ ବ୍ୟବସ୍ଥା ।

(ଜୟପୁରରୁ ହୃଷୀକେଶ ମିଶ୍ର) 

ଇରାକ: ଇରାକରୁ ଆସିଲା ଆମକୁ ଫେରାଇ ନିଅର ଅନୁରୋଧ । କରୋନାରେ କଡ଼ା କଟକଣାର ଆସିଲା ବିଦେଶର ଅସଲ ଚିତ୍ର । କରୋନା ସମୟରେ ଏବେ ପୁରା ବିଶ୍ୱରେ ହାହାକାର ପଡ଼ିଛି । ବିଭିନ୍ନ ଦେଶରେ କରୋନା ତାର କାୟା ବିସ୍ତାର କରିବାରେ ଲାଗିଛି । ବିଶ୍ୱରେ କରୋନା ସଂଖ୍ୟା ବଢ଼ିବା ସହ ମୃତ୍ୟୁ ସଂଖ୍ୟା ମଧ୍ୟ ହୁହୁ ହୋଇ ବଢ଼ୁଛି । ଏଇ ଭିତରେ ରୁନ୍ଧି ହୋଇଛନ୍ତି ବାହାର ଦେଶରେ କାମ କରୁଥିବା ପ୍ରବାସୀ ଓଡ଼ିଆ । ଆଜି ସେହି ଭଳି ଏକ ଦୃଶ୍ୟ ଆମ ପାଖକୁ ଇରାକରୁ ଆସିଛି । ଯେଉଁ ଭିଡିଓରେ ଇରାକରେ ଦେଖିବାକୁ ମିଳିଛି କରୋନା କଟକଣାର ଅସଲ ଚିତ୍ର । ଓଡ଼ିଶାରୁ ଯାଇ ଇରାକରେ କାମ କରୁଥିବା ଜଣେ ପ୍ରବାସୀ ଏହି ଭିଡିଓଟି ଜାରି କରିଛନ୍ତି । ନିଜ ଭିଟାମାଟିକୁ ଆସିବାକୁ ଚାହିଁ ମଧ୍ୟ ଆସି ପାରୁନାହାନ୍ତି ।

ଇରାକରେ ଏବେ ରାସ୍ତା ଉପରେ ହଜାର ହଜାର ଓଡ଼ିଆ ଏବଂ ଭାରତୀୟ ଶ୍ରମିକ । ଦକ୍ଷିଣ ଏସିଆର ହଜାର ହଜାର ପ୍ରବାସୀ ଶ୍ରମିକ ରାସ୍ତା ଉପରେ । ଭାରତର କର୍ଣ୍ଣାଟକ, ତାମିଲନାଡୁ, ପଶ୍ଚିମବଙ୍ଗ, ଓଡ଼ିଶା ଭଳି ରାଜ୍ୟରୁ ଲୋକେ ମଧ୍ୟ ସେଠାରରେ ଫସିଛନ୍ତି । ହେଲେ ଏମାନେ ରାସ୍ତାକୁ କାହିଁକି ଓହ୍ଲାଇଛନ୍ତି । ଏହାର କାରଣ ହେଉଛି ଇରାକର କେନ୍ଦ୍ର ସରକାରଙ୍କ ଦ୍ୱାରା ଏକ ପ୍ରକଳ୍ପ କାମ ଚାଲିଛି । ଯେଉଁଥିପାଇଁ ସେଠାରେ ବିଭିନ୍ନ ଦେଶରୁ ଲୋକେ କାର୍ଯ୍ୟ କରୁଛନ୍ତି । କିନ୍ତୁ କାର୍ଯ୍ୟ ସ୍ଥଳରେ କୌଣସି ପ୍ରକାରର କରୋନା କଟକଣାକୁ  ଅବଲମ୍ବନ କରାଯାଇନାହିଁ । ଛୋଟ ଛୋଟ ଘରେ ୯ରୁ ୧୦ ଜଣ ଲେଖାଏଁ ଲୋକେ ରହୁନ୍ତି । ସାମାଜିକ ଦୂରତା କଥାତ ନକହିବା ଭଲ । କେବଳ ଯାହା ଖାଇବାକୁ ପାର୍ସଲ ଜରିଆରେ ଆସୁଛି ସେତିକି ।

ତେବେ ସପ୍ତାହକୁ କେବଳ ଗୋଟିଏ ଫ୍ଲାଇଟ ରହିଛି ଯେଉଁଥିରେ ଲୋକେ ଭାରତକୁ ଫେରୁଛନ୍ତି । କିନ୍ତୁ ୮ ହଜାର ଶ୍ରମିକ କେମିତି ଯିବେ । ସେଥିପାଇଁ ଦିନକୁ ଗୋଟିଏ ଫ୍ଲାଇଟ କରିବା ପାଇଁ ରାସ୍ତାକୁ ଓହ୍ଲାଇଛନ୍ତି ପ୍ରବାସୀ ଶ୍ରମିକ । ଓଡ଼ିଶାର ଫସିଥିବା ଶ୍ରମିକ ମାନେ ସେମାନଙ୍କୁ ଏକ ସ୍ୱତନ୍ତ୍ର ଫ୍ଲାଇଟ କରି ଫରାଇନେବାକୁ ଅନୁରୋଧ କରିଛନ୍ତି । ଗୋଟିଏ ଟେଣ୍ଟ ତଳେ ୮ ହଜାର ଶ୍ରମିକ ରହି ଷ୍ଟ୍ରାଇକ କରିଛନ୍ତି । ସେପଟେ ଏହି ଶ୍ରମିକ ମାନଙ୍କ ମଧ୍ୟରୁ ୧୨ ଶହ ଲୋକ ସଂକ୍ରମିତ ହୋଇଥିବା ବେଳେ ୧୫ ଜଣଙ୍କର ମୃତ୍ୟୁ ହୋଇସାରିଲାଣି । ଡ଼ରି ଡ଼ରି ବଞ୍ଚଛନ୍ତି ବୋଲି ସେ କହିଛନ୍ତି । ତେବେ ଯେତେ ଜଲଦି ହେବ ସେମାନଙ୍କୁ ସେଠାରୁ ଆଣିବା ପାଇଁ ଭିଡ଼ିଓରେ ଓଡ଼ିଆ ଶ୍ରମିକ ଜଣେ ଅନୁରୋଧ କରିଛନ୍ତି ।

ଝାରସୁଗୁଡ଼ା: କରୋନା ଯୋଗୁ ସ୍ଥିତି ସଙ୍ଗୀନ । ରକ୍ତ ଭଣ୍ଡାର ଆଗରେ ଲାଗିଛି ଲମ୍ବା ଲାଇନ୍ । ହେଲେ ରକ୍ତ ଭଣ୍ଡାରରେ ରକ୍ତର ଅଭାବ । ଜରୁରୀ ସମୟରେ ରକ୍ତ ପାଇଁ ଆସି ନିରାଶ ହେଉଛନ୍ତି ରୋଗୀଙ୍କ ସମ୍ପର୍କୀୟ । ଦରକାର ମୁତାବକ ରକ୍ତ ନଥିବା ବେଳେ ରକ୍ତ ବଦଳ କରି ନେବାକୁ ଚାହିଁଲେ ବି ମିଳୁନି ରକ୍ତ । ଝାରସୁଗୁଡ଼ା ରକ୍ତ ଭଣ୍ଡାରରେ ଏଭଳି ସମସ୍ୟା ସୃଷ୍ଟି ହୋଇଛି । ବିଗତ ୩ ଦିନ ହେଲା ରକ୍ତ ଭଣ୍ଡାରରେ ଗୋଟିଏ ୟୁନିଟ୍ ବି ରକ୍ତ ନାହିଁ  । ଯାହାକୁ ନେଇ ଚିନ୍ତା ଦେଖାଦେଇଛି  । ରୋଗୀ ରକ୍ତ ନପାଇବାରୁ ସ୍ଥିତି ଅଧିକ ସଙ୍ଗୀନ ହେବାରେ ଲାଗିଛି ।

ସୂଚନା ଅନୁଯାୟୀ, ରାଜ୍ୟରେ ଏବେ କରୋନା ସ୍ଥିତି ସଙ୍ଗୀନ ରହିଛି । କରୋନା ପାଇଁ ସବୁଠି କଟଣା କରାଯାଇଛି । ତେବେ ଡାକ୍ତରଖାନାରେ ମଧ୍ୟ କରୋନା ସଂକ୍ରମିତ ଚିହ୍ନଟ ହେଉଛନ୍ତି । ସେଥିପାଇଁ କରୋନା ଯୋଗୁଁ ଭୟରେ କେହି ରକ୍ତ ଦେଉନାହାନ୍ତି । ରକ୍ତ ଦେବା ବେଳେ କାଳେ କରୋନା ବ୍ୟକ୍ତିଙ୍କ ସଂସ୍ପର୍ଶରେ ଆସିଯିବେ ସେଥିପାଇଁ ଭୟ କରୁଛନ୍ତି ଲୋକେ । ସେଥିପାଇଁ ପୂର୍ବ ଭଳି ଆଉ ରକ୍ତ ସଂଗ୍ରହ କରାଯାଇ ପାରୁ ନାହିଁ । ଯେତିକି ସଚେତନ ହେବା କଥା ହୋଇ ନାହାନ୍ତି ଲୋକେ  । ଯାହା ପଇଁ ଭୟରେ ରକ୍ତ ଦେବାକୁ ମଧ୍ୟ ଯାଉନାହାନ୍ତି ।

ଆଗୁଆ ଲୋକ ସ୍ୱେଚ୍ଛାକୃତ ଭାବେ ଯେଉଁଠି ରକ୍ତଦାନ କରୁଥିଲେ ଏବେ କେହି ଆସୁନାହାନ୍ତି  । ସେପଟେ ରକ୍ତଦାନ ଶିବିରର ବି ଆୟୋଜନ କରାଯାଇ ପାରୁ ନଥିବାରୁ ସମସ୍ୟା ଆହୁରି ବଢିବାରେ ଲାଗିଛି  । ରକ୍ତଅଭାବ ଥିବା କଥାକୁ ସ୍ୱୀକାର କରିଛନ୍ତି ରକ୍ତ ଭଣ୍ଡାର ଅଧିକାରୀ । ରକ୍ତ ସଂଗ୍ରହ ହୋଇନପାରିବାରୁ ଏଭଳି ସମସ୍ୟା ଦେଖାଦେଇଥିବା ସେ କହିଛନ୍ତି  । ଖୁବ୍ ଶୀଘ୍ର ସ୍ୱାସ୍ଥ୍ୟ ବିଭାଗ ତଥା ପ୍ରଶାସନ ଏ ଦିଗରେ ପଦକ୍ଷେପ ନେବା ଜରୁରୀ ହୋଇପଡ଼ିଛି  ।